NM öldunga: Stefnir í metþátttöku - margir sterkir íslenskir skákmenn hafa skráð sig

Það stefnir í metþátttöku á NM öldunga sem fram fer í Reykjavík 10-18. september nk.  Þegar um 1,5 mánuður er í mót hafa 46 skákmenn skráð til leiks en metið er frá 2001 þegar 44 skákmenn tóku þátt.  Mótið er jafnframt það langsterkasta en skráðir eru til leiks eru 3 stórmeistarar, 1 alþjóðlegur meistarar og 3 FIDE-meistarar.  Það er einnig ánægjulegt að sjá mjög marga af okkar sterkustu skákmönnum taka þátt, kappar sem hafa ekki reglulegir gestir á kappskákmótum hérlendis!

Þar má fremstan nefna Friðrik Ólafsson (2434), þá Magnús Sólmundarson (2218), Braga Halldórsson (2198), Júlíus Friðjónsson (2190), Jón Þ. Þór (2188), Jóhann Örn Sigurjónsson (2133) og Gunnar Finnlaugsson (2072) en sá síðastnefndi hefur farið mikinn í kynningarmálum fyrir mótið á erlendri grundu.

Þess má að Magnús Sólmundarson fékk um daginn nýlega leiðréttingu á skákstigum.  Hans stig var ranglega skráð eftir Haustmót TR 1993 þar sem Magnúsi gekk illa.  Hann var tvískráður inn sem nýr aðili og var tvöfaldur á tímabili á stigalistanum.  Síðar við hreinsun hjá FIDE fóru hærri stigin út en sú lægri héldu sér.  Stiganefnd SÍ beitti sér í málinu fyrir skemmstu og náði fram leiðréttingu hjá Magnúsi sem verður til þess að hann er nú næststigahæstur íslensku keppendanna!

Íslenskir skákmenn eru hvattir til að skrá til leiks.   

• Heimasíða mótsins
• Skráðir keppendur
• Skráningarform

 

Sögulegur fornleifafundur: Taflmaður frá 12. öld finnst á Siglunesi

Við fornleifauppgröft á Siglunesi fannst nýlega fínlega úskorinn taflmaður úr beini í líkingu við hina fornu LEWIS taflmenn. Taflmaðurinn er talinn vera frá 11. eða 12. Öld.  Frá þessu er greint í frétt á heimasíðu Fornleifastofnunar Íslands í dag.

Þetta eru stórmerkur fundur og  góð tíðindi því hann hleypir á sinn hátt fyllri stoðum undir kenningu Guðmundar G. Þórarinssonar  um að hinir fornu sögualdartaflmenn frá 12 öld séu gerðir á Íslandi.
 Þann 19. ágúst nk. verður haldið í Skálholti alþjóðlegt málþing um ráðgátuna miklu  um uppruna  „The Lewis Chessmen" undir yfirskriftinni „Eru taflmennirnr frá Ljóðhúsum (Lewis) íslensk listasmíð?"

Svipmót Lewis taflmannanna bendir til þess að þeir séu af íslenskum uppruna, hrókarnir í berserkslíki og riddarinn á smáhesti og ekki hvað síst biskupinn, sem þar kemur til skjalanna í fyrsta sinn á skákborðinu svo vitað sé, sem bendir til þess að þeir séu gerðir á biskupsstóli.  Auk þess sem mörg önnur,  söguleg og málfræðileg rök og ýmsar vísbendingar benda til þess að þeir séu  íslenskir að uppruna.   

Á málþinginu munu þekktir fræðimenn, þeir  James Robinson, safnvörður frá Breska þjóðminjasafninu og  David H. Caldwell frá því Skoska, báðir flytja erindi um líklegan uppruna „Taflmannanna frá Ljóðshúsum"  en þeir eru báðir höfundar nýlegra fræðirita þar um  „The Lewis Chessmen" (2004) og „The Lewis Chessmen Unmasked" (2010) auk Guðmundar G. Þórarinssonar og 2-3 íslenskra fræðimanna.

Málþingið fer fram á ensku og er öllum opið meðan húsrúm leyfir.  Það hefst með setningarathöfn í Skálholtskirkju kl. 10 árdegis  föstudaginn 19. ágúst nk. og stendur daglangt með hádegishléi. 

Í undirbúningsnefnd eru: Dr. Kristinn Ólason; rektor Skálholtsskóla,  Einar S. Einarsson;  Guðmundur G. Þórarinsson;  Guðni Ágústsson og  Sr. Gunnþór Ingason

Nánari upplýsingar á: www.leit.is/lewis  og www.skalholt.is    

Myndaalbúm

Hraðskákkeppni taflfélaga: Hellir mætir Bridsfjelaginu í fyrstu umferð

Dregið var í fyrstu umferð og forkeppni Hraðskákkeppni taflfélaga í kvöld.  Hraðskákmeistarar Hellis mæta Bridsfjelaginu í frumraun þeirra síðarnefndu í liðakeppni og Íslandsmeistarar Bolvíkinga mæta KR-ingum. 

Röðun forkeppni:

• Fjölnir - Víkingaklúbburinn
• Vin - TA

Röðun 1. umferðar:

• Mátar - TR
• Goðinn - TV
• SA - TG
• SSON - SR
• Hellir - Bridsfjelagið
• Haukar - Fjölnir/Víkingaklúbburinn
• SFÍ - Vin/TA
• TB - KR

Félögin eru hvött til þess að klára fyrstu umferð fyrir 15. ágúst nk.

 

Czech Open: Hannes með hálfs vinnings forskot fyrir lokaumferðina

Stórmeistarinn Hannes Hlífar Stefánsson (2546) gerði jafntefli við rússneska stórmeistarann Alexandre Danin (2538) í áttundu og næstsíðustu umferð Czech Open sem fram fór í Pardubice í Tékklandi í dag.  Farið er yfir skák dagsins á Skákhorninu.  Hannes er efstur með 7 vinninga.  Fjórir stórmeistarar koma humátt á eftir Hannesi með 6,5 vinning.  Í lokaumferðinni sem fram fer á morgun teflir Hannes við úkraínska stórmeistarann Dmitry Kononenko (2593).  Skákin, sem hefst kl. 13, verður sýnd beint á heimasíðu mótsins og án efa mun íslenskir skákfræðingar fjalla um hana jafnóðum á Skákhorninu.

Guðmundur Gíslason (2323) vann tékkneska FIDE-meistaranum Josef Kratochvil (2230) en nafni hans Kjartansson (2310) tapaði fyrir spænska alþjóðlega meistaranum David Recuero (2441).  Gíslason hefur 4,5 vinning en Kjartansson hefur 4 vinninga.  Gíslason mætir Þjóðverjanum Dennes Abel á (2418) á morgun en Kjartansson mætir tékkneska FIDE-meistaranum Jan Bartos (2215).

Í b-flokki tapaði Sigurður Eiríksson (1951) en Jakob Sævar Sigurðsson (1789) gerði jafntefli.  Sigurður hefur 4 vinninga en Jakob Sævar hefur 1,5 vinning.

Í a-flokki tefla 279 skákmenn.  Þar af eru 50 stórmeistarar og 58 alþjóðlegir meistarar.  Hannes er nr. 17 í stigaröð keppenda, Gíslason nr. 132 og Kjartansson nr. 140.

• Heimasíða mótsins
• Chess-Results
• Beinar útsendingar frá 15 efstu borðunum (hefjast kl. 13)

Carlsen öruggur sigurvegari í Biel

Magnus Carlsen (2821) vann öruggan sigur á ofurskákmótinu sem lauk í Biel í dag.  Magnus gerði jafntefli við Caruana (2711) í lokaumferðinni og hlaut 19 stig stig.  Morozevich (2694) kórónaði gott mót þegar hann vann Pelletier (2590) og varð annar með 17 stig.  Þeir voru í sérflokki en í 3.-4. sæti urðu Vachier-Lagrave (2722) og Shirov (2714) með 12 stig.  Sá fyrrnefndi náði 1,5 vinningi gegn Magnúsi.

Lokastaðan:

	Name		ELO	Points
1.	Magnus Carlsen	NOR	2821	19
2.	Alexander Morozevich	RUS	2694	17
3.	Maxime Vachier-Lagrave	FRA	2722	12
4.	Alexei Shirov	ESP	2714	12
5.	Fabiano Caruana	ITA	2711	10
6.	Yannick Pelletier	SUI	2590	5

Sex skákmenn tóku þátt og tefldu tvöfalda umferð.   Veitt voru 3 stig fyrir sigur og eitt stig fyrir jafntefli.

Heimasíða mótsins

 

Skák út um allt: Líf og fjör í Laugardalslaug!

Það var heldur betur líf í tuskunum þegar Bragi Þorfinnsson landsliðsmaður og Stefán Bergsson hjá Skákakademíu Reykjavíkur tefldu vígsluskákina í 38 gráðu pottinum í Laugardalslaug í dag, fimmtudag.
 
Þetta var liður í verkefninu ,,Skák út um allt" sem Skákakademían og Skáksamband Íslands standa saman að, en upp á síðkastið hefur taflsettum verið dreift á marga staði í borginni, og framundan eru enn fleiri heimsókn og taflgjafir.
 
Sundlaugargestir tóku heimsókninni fagnandi, ekki síst unga kynslóðin, og fjölmiðlar gerðu atburðinum góð skil. Hér eru myndir úr pottinum!

 

 

Til í slaginn! Bragi Þorfinnsson landsliðsmaður og Stefán Bergsson framkvæmdastjóri Skákakademíu Reykjavíkur búa sig undir vígsluskákina.

 

Pottverjar kunnu vel að meta heimsókn skákmeistaranna.

 

Bragi blés til stórsóknar með hvítu, fórnaði manni og ætlaði greinilega að drekkja svarta kónginum. Neðst til vinstri sést stóra tá alþjóðlega meistarans.

 

Arnar Valgeirsson skákfrömuður m.m. og Jón Viktor Gunnarsson alþjóðlegur meistari fylgjast með darraðardansinum.

 

 

 

 Bragi Þorfinnsson glaðbeittur í viðtali við Mbl.is eftir sigur í spennandi viðureign.

 

 

Krakkarnir hópuðust í heita pottinn og fylgdust spenntir með.

 

 

Bragi átti í vök að verjast með svörtu mönnunum, en fékk mörg góð ráð hjá krökkunum.

 

 

Skákin á greinilega heima í sundlaugunum!

 

Stefán Bergsson segir frá Skákakademíu Reykjavíkur og hinu skemmtilega verkefni ,,Skák út um allt" sem Akademían og Skáksamband Íslands standa saman að.

 

 

Bragi útskýrir leyndardóma skáklistarinnar.

 

 

Ragnhildur Sigurðardóttir fréttamaður Sjónvarpsins hikaði ekki við að demba sér í pottinn og skora meistarana á hólm!
 

• Myndaalbúm
• Frétt mbl.is
• Frétt RÚV

Hannes með vinningsforskot í Tékklandi

Stórmeistarinn Hannes Hlífar Stefánsson (2546) heldur áfram ótrúlegri sigurgöngu á Czech Open sem fram í Pardubice í Tekklandi.  Í sjöundu umferð, sem fram fór í dag, vann hann rússneska stórmeistarann Konstantin Chernyshov (2552).  Hannes hefur nú unnið 5 skákir í röð og hefur hlotið 6,5 vinning.  Hann hefur vinnings forskot á næstu menn.  Farið er yfir skák dagsins á Skákhorninu.  Í áttundu og næstsíðustu umferð sem fram fer á morgun teflir Hannes við rússneska stórmeistarann Alexandre Danin (2538).  Skákin verður sýnd beint á heimasíðu mótsins og án efa mun íslenskir skákfræðingar fjalla um hana jafnóðum á Skákhorninu.

Nafnarnir Guðmundur Gíslason (2323) og Guðmundur Kjartansson (2310) töpuðu báðir fyrir stórmeisturum.  Kjartansson fyrir Rússanum Alexei Gavrilov (2481) en Gíslason fyrir Tékkanum Petr Velicka (2461).  Kjartansson hefur 4 vinninga en Gíslason hefur 3,5 vinning.  Kjartansson mætir spænska alþjóðlega meistaranum David Recuero (2441) á morgun en Gíslason mætir tékkneska FIDE-meistaranum Josef Kratochvil (2230).  

Í b-flokki vann Sigurður Eiríksson (1951) en Jakob Sævar Sigurðsson (1789) tapaði  Sigurður hefur 4 vinninga en Jakob Sævar hefur 1 vinning.

Í a-flokki tefla 279 skákmenn.  Þar af eru 50 stórmeistarar og 58 alþjóðlegir meistarar.  Hannes er nr. 17 í stigaröð keppenda, Gíslason nr. 132 og Kjartansson nr. 140.

• Heimasíða mótsins
• Chess-Results
• Beinar útsendingar frá 15 efstu borðunum (hefjast kl. 13)

Dortmund: Kramnik með yfirburði

Vladimir Kramnik (2781) virðist vera kominn í gamla formið á Dortmund Sparkassen mótsins sem nú er í gangi.  Í sjöundu umferð sem fram fór í dag vann Meier (2656).  Kramnik hefur hlotið 6 vinninga í 7 skákum sem verður teljast mjög gott á svo sterku móti.   Víetnaminn Le Quang (2715) er annar með 4 vinninga

Rétt eins og í Biel taka 6 skákmenn þátt og tefld er tvöföld umferð.

Staðan:

• 1. Kramnik (2781) 6 v.
• 2. Le Quang (2715) 4 v.
• 3. Giri (2701) 3,5 v.
• 4. Ponomariov (2764) 3 v.
• 5. Nakamura (2770) 2,5 v.
• 6. Meier (2656) 2 v.

• Heimasíða mótsins
• Beinar útsendingar (hefjast um kl. 13:15 nema lokaumferðin sem hefst um 11:15.

 

Carlsen hefur tryggt sér sigur í Biel

Magnus Carlsen (2821) gerði jafntefli í dag við  Vachier-Lagrave (2722) í níundu og næstsíðustu umferð ofurmótsins í Biel.  Aðalandstæðingur hans Morozevich (2694) tapaði hins vegar fyrir Caruana (2711).  Þar með hefur Carlsen 4 stiga forskot fyrir lokaumferðina, sem fram fer í fyrramálið, og hefur þar með tryggt sér sigur á mótinu.

Staðan:

	Name		ELO	Points
1.	Magnus Carlsen	NOR	2821	18
2.	Alexander Morozevich	RUS	2694	14
3.	Maxime Vachier-Lagrave	FRA	2722	11
	Alexei Shirov	ESP	2714	11
5.	Fabiano Caruana	ITA	2711	9
6.	Yannick Pelletier	SUI	2590	5

Sex skákmenn taka þátt og tefla tvöfalda umferð.   Veitt eru 3 stig fyrir sigur og eitt stig fyrir jafntefli.

• Heimasíða mótsins
• Beinar útsendingar (hefjast kl. 12 nema lokaumferðin sem hefst kl. 9)

 

Miðsumarmót Riddarans

Riddarar reitaða borðsins vilja heldur tefla sér til gamans yfir sumarið en að reita arfa í góða veðrinu.  Yfir þrjátíu skákarar af eldri kynslóðinni hafa mætt til tafls í Strandbergi og krækt sér í vinning í Vonarhöfn í júlímánuði. Það skiptast reyndar líka á skin og skúrir á skákborðinu eins og úti við.

Í gær (27. Júlí) voru 20 galvösk gamalmenni mætt þar til tafls og tefldu 11 umferðir sér til afþreyingar og yndisauka.   Guðfinnur R. Kjartansson var sigur úr bítum með 8.5 vinning, með 3.5 niður, sem segir sína sögu um tvísýna og harða keppni. GRK vann einnig fyrir viku síðan og  þá með 10 vinningum. Þar á undan sigraði Sigurður Herlufsen með 9 v.  og á fyrsta móti júlímánaðar Ingimar Halldórsson með 9 v. einnig. Ýmsir valinkunnir meistarar hafa orðið að sætta sig við færri vinninga svo ekki sé nú talað um minni spámenn, sem hafa þó iðulega mikil áhrif á úrslit móta.   

Nánari úrslit má sjá á www.riddarinn.net

Myndaalbúm (ESE)