Fjöltefli Friðriks á RÚV

Sjálft afmælisbarnið fór mikinn á Skákdaginn og ætla mætti að Friðrik Ólafsson stæði á sextugu frekar en að vanta þrjú ár í áttrætt. Sú hugmynd Þorsteins Þorsteinssonar markaðsstjóra RUV og Andreu Margrétar Guðmundsdóttur stjórnarmanns í Skáksambandinu og starfsmanns RUV um að heiðra Friðrik var afar vel til fundin.

Friðriki var færð merkileg gjöf; átta diska mynddiskasafn af svipmyndum frá sínum ferli. Með þessum hætti sinnir RUV glæsilega því hlutverki sínu að varðveita og kynna þær miklu menningarminjar sem íslensk þjóð býr yfir.

Séntilmaðurinn Friðrik lagði átta andstæðinga að velli en þrír þáðu jafntefli, Hilmir Freyr Heimisson, Þorsteinn Þorsteinsson og svo sjálfur útvarpsstjórinn Páll Magnússon; „það hefur nú ekki tíðkast að máta útvarpsstjóra" kvað Friðrik og uppskar mikinn hlátur.

Lagerman sigraði á minningarmóti um Björn Sölva

Tuttugu og einn þátttakandi var á minningarmóti Skákfélags Vinjar um Björn Sölva Sigurjónsson sem haldið var í fyrradag í Vin. Björn hefði orðið 63 ára á Skákdeginum mikla en hann lést í desember sl. Félagar í Vinjargenginu gerðu allt til að komast á mót klukkan 13:00 enda allir sem vildu tefla Birni til heiðurs.

Sérlega ánægjulegt var að fá nánustu fjölskyldu Björns Sölva í heimsókn en Guðlaug móðir hans, Margrét dóttir ásamt Guðmundi eiginmanni sínum og elstu afastelpu Björns, Herdísi, voru viðstödd og færðu athvarfinu glæsilega tertu í tilefni dagsins.

Árni H. Kristjánsson færði fjölskyldunni stuttmynd sína um Skákfélag Vinjar, þar sem Björn er í forgrunni og varð þess valdandi að Árni, meistari bréfskákarinnar, gekk til liðs við félagið. Að sjálfsögðu var litgreint skákborð sem Björn færði Skáksambandinu að gjöf fyrir nokkru haft uppi við. Best klæddu menn dagsins, Gunnar Björnsson og Stefán Bergsson kíktu við. Stefán þekkir hið litgreinda borð manna best, enda stúderað það og lesið um. Hann sagði örstutt frá pælingunum bakvið liti og reiti.

Fyrirliðinn Hrannar Jónsson setti svo mótið og Herdís lék fyrsta leikinn í viðureign Arnars Valgeirssonar og Hrannars stjóra. Það var stál í stál allt fram að kaffi. Eftir það var enn harðar barist og Róbert Lagerman hafði að lokum sigur á stigum, en hann og Ólafur B. Þórsson voru með 5 vinninga í sex skákum þar sem tíminn var sjö mínútur á mann. Róbert og Björn Sölvi voru einmitt miklir mátar og háðu einvígi í Vin sem var langt frá því búið þegar Björn féll frá. Þá var staðan jöfn. Róbert fékk að launum glæsilegan bikar auk bæklinga sem Björn Sölvi skrifaði fyrir nokkru og gaf út. Fimm efstu fengu bókavinninga og Emil Sigurðsson fékk bók fyrir besta skor unglings, Elsa María Kristínardóttir krækti í bók og bestu útlendingarnir, Jorge og Lea græddu líka.

Efstu sæti:

1.       Róbert Lagerman                    5

2.       Ólafur B. Þórsson                    5

3.       Tómas Björnsson                    4,5

4.       Gunnar Freyr Rúnarsson       4,5

5.       Bjarni Hjartarson                    4

6.       Jorge Fonseca                         4

7.       Kjartan Guðmundsson           3,5

8.       Elsa María Kristínard              3,5

9.       Hrannar Jónsson                     3,5

Svo fylgdi strollan á eftir.

 Myndaalbúm (AV)

Skákdagurinn: Gerðu það ekki endasleppt: Tefldu 20 skákir

Þeir slógu ekki slöku við þessi síungu gamalmenni á myndinni, sem létu sig ekki muna um að taka þátt í tveimur kappmótum í fyrradag, á Skákdeginum, Friðriki og Kaissu, gyðju skáklistarinnar til dýrðar. 

Fyrst tóku þeir þátt í Toyota-skákmóti öldunga og hófu þar talf kl. 13 og telfdu 9 skákir með 10 mín. uhs., en héldu síðan upp í Gallerý Skák í Bolholti, þar sem keppni um Friðrikskónginn hófst kl. 18 og stóð til kl. 22.30. Þar voru teldar 11 umferðir með sömu tímamörkum.  Uppskeran var eftir atvikum góð að loknu góðu dagsverki.  Ekki er að sjá á myndinni sem tekin er í mótslok að þeir séu að niðurlotum komnir.  

Þessir heiðursmenn og höbbðingjar eru taldir frá vinstri og vinningar í sviga: Einar S. Einarsson (9.5v); Páll G. Jónsson (11.5v);  Gísli Gunnlaugsson (12v.) og Stefán Þormar Guðmundsson (11.5 v)

Halldór Brynjar Íslandsmeistari í ofurhraðskák

Halldór Brynjar Halldórsson sigraði á Íslandsmótinu í ofurhraðskák sem Taflfélagið Hellir stóð fyrir og var lokaviðburður Íslenska skákdagsins og fór fram á ICC seint að kvöldi.   Tefldar voru 2ja mínútna skákir.  Halldór hlaut 12,5 vinning í 15 skákum, annar varð Davíð Kjartansson með 12 vinninga og þriðji varð Róbert Lagerman með 11,5 vinning.  Omar Salama var umsjónarmaður mótsins.

Margir keppendanna höfðu áður tekið þátt í einum eða fleiri viðburðum yfir daginn!

Röð efstu manna:

• 1. Halldór Brynjar Halldórsson 12,5 v.
• 2. Davíð Kjartansson 12 v.
• 3. Róbert Lagerman 11,5 v.
• 4. Jón Kristinsson 10,5 v.
• 5. Omar Salama 9,5 v.
• 6. Lenka Ptácníková 9 v.
• 7. Oliver Aron Jóhannesson 8,5 v.
• 8.-12. Tómas Veigar Sigurðarson, Gunnar Freyr Rúnarsson, Eiríkur Björnsson, Jón Trausti Harðarson og Kristján Halldórsson 8 v.

24 skákmenn tóku þátt.

 

Skákfjör í Laugardalslaug

Skákdagurinn var tekinn snemma í Laugardalslaug af ungum og efnilegum skákkrökkum; Björn Þorfinnsson tefldi fjöltefli við þá í tilefni Skákdagsins.

Þátttakendur voru félagarnir Hilmir Freyr Heimisson og Heimir Páll Ragnarsson og stöllurnar Donika Kolica og Hrund Hauksdóttir.

Björn gaf ekkert eftir og niðurstaðan varð 4-0 eftir harða baráttu krakkanna.

Á Skákdaginn voru vígð mörg skáksundlaugarsett út um allt land; Egilsstöðum, Grímsey, Akureyri, Reykjavík og Borgarnesi.

Íslenski skákdagurinn: Friðrik heimsótti Gallerý Skák

Í tilefni að Skákdeginum, 26. janúar 2012, var Gallerý Skák einn að viðkomustöðum Friðriks Ólafssonar, stórmeistara, sem átti mjög annríkt og fór víða til að fylgja eftir þema dagsins sem er að efla íslenskt skáklíf og hvetja til almennrar skákvakningar meðal landsmanna á öllum aldri.

Sérstakur farandgripur, fagurlega renndur taflkóngur, hafði verið heitinn í höfuð Friðriks, sem skákkóngurinn áritaði og vígði til keppni. Vel fór á með þeim nöfnunum eins og sjá má á meðf. myndum. Í taflhléi var sest að veislukosti, en sérstök skákterta var framreidd af þessu tilefni, áletruð og skreytt, sem menn gæddu sér á, áður en sest var að tafli á ný.   

Um „Taflkóng Friðriks" verður keppt árlega í framtíðinni í sérstakri 4 kvöld Grand Prix mótaröð, sem hófst þá um kvöldið og við hann verður kennd. 

Þá gaf Gallerý  Skák út af þessu tilefni sérprentað frímerki og póstkort með mynd af Friðrik í afar takmörkuðu upplagi, sem er til sölu á heimasíðu þess. 

Friðriki var að sjálfsögðu ákaflega vel fagnað enda mönnum mikill heiður af heimsókn hans. Ekki síst af því að hann þekkti marga úr  hópi keppenda af eldri kynslóðinni, hafði att kappi við suma þeirra á unga aldri eða fyrir margt löngu og starfað með öðrum að eflingu skáklistarinnar um árabil.

Myndaalbúm (ESE)

 

Þorfinnssynir, Guðmundur og Ingvar Þór urðu efstir á KORNAX mótinu

Bræðurnir Björn (2406) og Bragi Þorfinnsson (2426), Guðmundur Kjartansson (2326) og Ingvar Þór Jóhannesson (2337) urðu efstir og jafnir á KORNAX mótinu - Skákþingi Reykjavíkur sem lauk í kvöld.  Þeir þurfa að há aukakeppni um hver þeirra verður skákmeistari Reykjavíkur.  Bragi vann Ingvar í kvöld, Guðmundur gerði jafntefli við Hjörvar Stein Grétarsson (2470) og Björn vann Einar Hjalta Jensson (2241).  

Úrslit lokaumferðinnar má finna hér og lokastöðuna má finna hér.

Mjög góð þátttaka var á mótinu eða 73 skákmenn. Mótið var sterkt en fimm alþjóðlegir meistarar voru meðal þátttakenda. 

• Heimasíða mótsins
• Chess-Results
• Myndaalbúm (GB, HÁ, SRF og JHR)

Oliver Aron skákmeistari Rimaskóla

Það voru 67 öflugir skákkrakkar í Rimaskóla sem mættu til leiks á Skákmót Rimaskóla 2012. Nýtt nafn var skráð á bikarinn því það var hinn efnilegi ungmennalandsliðsmaður Oliver Aron Jóhannesson 8-ILK sem sigraði með 6,5 vinninga af 7 mögulegum. Oliver Aron vann félaga sinn í ungmennalandsliði Íslands, Dag Ragnarsson, í hreinni úrslitaskák í lokaumferð mótsins. Oliver Aron var sá eini sem komst taplaus frá mótinu

Keppnin var gífurlega jöfn og hörð einkum um 20 efstu sætin sem gáfu í verðlaun pítsu eða bíómiða eftir vali. Á svona gríðarsterku skólamóti vakti framganga stúlknanna mikla athygli og þrjár þeirra lentu í sex efstu sætunum. Svandís Rós varð stúlknameistari Rimaskóla og átti gríðarlega gott mót og vann alla nema Hrund.

Í sjö efstu sætunum urðu Íslandsmeistarar skólans í barna-og grunnskólaflokki og eru þessir krakkar allir að skáka hver öðrum í getu þrátt fyrir talsverðan aldursmun.Enginn skóli virðist hafa átt slíka breidd skákmeistara fyrr nema ef vera skyldi MH á árum áður.

Skákmótið var eins og aðrir viðburðir fimmtudagsins 26. jan haldið á Skákdegi Íslands. Framundan eru skólaskákmótin og alveg ljóst að Rimaskóli mun senda til leiks sigurstranglegar skáksveitir. Á þetta rynir í byrjun febrúar þegar óárennileg stúlknasveit skólans ver Íslandsmeistaratitil grunnskóla í stúlknaflokki.

Efstu 20 sætin á Skákmóti Rimaskóla urðu þessi:

Oliver Aron Jóhannesson        6,5 vinninga   

Dagur Ragnarsson                 6     

Svandís Rós Ríkharðsdóttir     

Jón Trausti Harðarson 

Hrund Hauksdóttir                  5,5

Nansý Davíðsdóttir                 5

Kristófer Jóel Jóhannesson     

Axel Hreinn Hilmisson

Tristan Ingi Ragnarsson

Joshua Davíðsson

Heiðrún Anna Hauksdóttir

Kristófer Halldór Kjartansson

Mikolaf Oskar

Hafþór Andri Helgason            4,5

Theodór I.R.Rocka

Áslaug Ingileif Halldórsdóttir

Tinna Sif Aðalsteinsdóttir

Jóhann Þór Finnsson              4

Davíð Thor Morgan

 

Héðinn mátaði Máta á Skákdaginn

Mátar létu ekki sitt eftir liggja á skákdaginn og tefldu í Garðabænum í húsakynnum Rauða krossins við Garðatorg. Nokkur eftirvænting var meðal Máta um margboðaðan leynigest. Sá reyndist á endanum enginn annar en Héðinn Steingrímsson Íslandsmeistari í skák. Eftir stutta kynningu var Héðni boðið að vera með í hraðskákmóti sem hann þáði og sýndi Mátum hvar Davíð keypti ölið. Hann vann allar skákirnar. Næstir komu Arnar Þorsteinsson og Þórleifur Karlsson.

Eftir hraðskákina sýndi Héðinn Mátum hvernig Þjóðverjar urðu Evrópumeistarar á síðasta ári með því að beita franskri vörn. Með þessu sporðrenndu viðstaddir franskri súkkulaðiköku með rjóma.

Þá var skákdagurinn á enda og Mátar stigu sáttir út í svarthvíta nóttina.

Mynd:Þórleifur Karlsson, Arngrímur Gunnhallsson, Tómas Hermannsson, Jón Árni Jónsson, Daði Guðmundsson, Arnar Þorsteinsson og Héðinn Steingrímsson.

Gallerý Skák: Kappteflið um Friðrikskónginn

Fyrsta umferð í nýrri 4 kvölda Grand Prix mótaröð um „Taflkóng Friðriks" á vegum Gallerý Skákar var teflt í gær, á Skákdeginum, afmælisdegi meistarans, 26. janúar. Friðrik Ólafsson stórmeistari kom í heimsókn, heilsaði á keppendur og löggilti hinn sögulega farandgrip, með áritun sinni.

Sautján keppendur á aldrinum 8 ára til 77 ára voru mættir til tafls en þó flestir vel komnir til ára sinna án þess þó að geta talist aldurhnignir.  Enda sýndi það sig að taflmennskan var einkar góð og vönduð með listrænu ívafi eins og hæfir gamalreyndum kempum og listasmiðjunni, vettvangi mótsins.

Staðarhaldarinn Guðfinnur R. Kjartansson, hristi flesta snilldartakta fram úr erminni og vann mótið með 9 vinningum af 11 mögulegum, sumsé nokkuð örugglega.  Hinir eitilhörðu skákmenn, þeir Bjarni Hjartarson og Gunnar Skarphéðinsson urðu jafnir í 2.-3. sæti með 7.5 v., með þrjá og hálfan niður. Síðan komu tveir Kristnar með 7 vinninga en eftir það munaði aðeins 1/2 vinningi á 6. -17. manni, sem sýnir hvað keppnin var hörð og engan vinning hægt að bóka fyrirfram frekar en fyrri daginn.

Efsta sætið gaf 10 Grand Prix stig í keppninni og það næst 8, síðan 6 o.s.frv. sem menn taka með sér í næstu umferð að viku liðinni.   

Sjá meðf. mótstöflu og nánar á www.galleryskak.net.

Myndaalbúm (ESE)