Hjörvar fór illa með þjóðina

Skák Hjörvars við þjóðina fór vel af stað og 15-20 fulltrúar þjóðarinnar greiddu að jafnaði atkvæði um hvern þeirra þriggja leikja sem voru í boði á korters fresti.  Hjörvar beitti enska leiknum og til að byrja með fylgdi skákin hefðbundnum leiðum. En í 9. og 10. leik lék þjóðin tveim slæmum leikjum og notfærði Hjörvar sér það til að fá unna stöðu.

Eftirfarandi póstur kom frá einum þjóðar-liðanum á þeim tímapunkti:  "Hvaða vitleysingjar eru að leika e4??" "Nenni þessu ekki lengur, hvítur kominn með mun betra"

Í 22.leik þegar Hjörvar var orðinn heilum manni yfir, bauð hann þjóðinni kurteisisjafntefli. Sjö samþykktu boðið, tveir neituðu og fjórir vildu gefast upp.  Skákinni lauk því með jafntefli.

Skákina má sjá á: http://live.chess.is/2012/skakdagurinn/tfd.htm

Róbert efstur á Haítí

Methúsalem vert á Cafe Haítí hefur fagnað mjög þeirri skákvæðingu sem hefur átt sér stað á staðnum undanfarnar vikur. Skákakademía Reykjavíkur færði staðnum töfl og klukkur og fara þar nú fram einkatímar ungmenna jafnt sem skákmót fyrir sókndjarfa kaffihúsakákmenn.

Einn slíkur, Róbert Lagerman, fór með sigur úr býtum á Skákmóti Haítí sem fór fram á Skákdaginn. Þrettán keppendur mættu til leiks og eftir stigaútreikning úrskurðaði Róbert sjálfan sig sigurvegara mótsins en hann var jafnframt skákstjóri. Í næstu sætum voru Björn Ívar Karlsson og Tómas Björnsson en alls tefldu 13 vaskir piltar á mótinu.

Aronian efstur þrátt fyrir tap gegn Navara - Carlsen vann Topalov í ótrúlegri skák

Það gekk á miklu í 11. umferð Tata Steel-mótsins sem fram fór í Wijk aan Zee í dag.  Efsti maður mótsins Aronian (2805) tapaði fyrir þeim neðsta, Navara (2712) en er efstur engu að síður.  Radjabov (2773) og Carlsen (2835) eru hálfum vinningi á eftir þeim armenska.  Carlsen (2835) vann Topalov (2770) eftir að hafa haft koltapað tafl um tíma.  Caruana (2736) og Ivanchuk (2766) eru í 4.-5. sæti hálfum vinningi þar á eftir.  

Í 12. og næstsíðustu umferð, sem fram fer á morgun, mætast m.a.: Carlsen-Kamsky, Gelfand-Aronian og Reykjavíkurmótsmennirnir Navara-Caruana.

• Heimasíða mótsins
• Beinar útsendingar (hefjast kl. 12:30 nema lokumaferðin kl. 11 - frídagar (18., 23. og 26. janúar)
  
• ChessBomb

Bergsteinn skákmeistari Landsbankans

Í gær, á Skákdaginn, fór fram Skákmeistari Landsbankans.  Teflt var í höfuðstöðvum bankans og tóku 9 skákmenn þátt í mót.  Hart var barist um sigurinn en svo fór að lokum að Bergsteinn Ólafur Einarsson sigraði á mótinu með fullu húsi.  Það fór vel á því enda á Bergsteinn afmæli 26. janúar, á skákdaginn sjálfan, rétt eins og Friðrik Ólafsson sjálfur.   

Gunnar Björnsson varð annar, Ólafur Kjartansson þriðji, Ingimundur Sigurmundsson fjórði og Friðrik Helgason fimmti.  

Þrír efstu keppendur fengu bók hjá Sigurbirni bóksala í verðlaun.  Einnig voru tveir heppnir keppendur dregnir út og voru það Friðrik og Stefán H. Jónsson.

Stefán Bergsson, framkvæmdastjóri Skákakademíu Reykjavíkur heiðraði samkomuna og lék fyrsta leik mótsins fyrir afmælisbarnið í skák hans gegn Ingimundi. 

 

Teflt á Vinnumálastofnun á Skákdaginn

Frá Árna Steinari Stefánssyni á Vinnumálastofnun:

Í tilefni Skákdagsins, sem er haldinn hátíðlegur um allt land í gær, hefur Skákakademía Reykjavíkur gefið stofnuninni taflsett að gjöf. Gissur og Sverrir vígðu settið nú rétt áðan og lauk rimmunni með jafntefli. Sverrir kom forstjóranum algjörlega í opna skjöldu í byrjun með því að beita Scheveningen-afbrigði Sileyjarvarnarinnar, en Gissur lét það þó ekki slá sig út af laginu og náði jafntefli með því að siga Averbakh-afbrigðinu á Sverri undir það síðasta.

Guðmundur vann í dag og í gær

Guðmundur Gíslason (2332) vann sínar skákir í 3. og 4. umferð Gíbraltar mótsins sem fram fóru í gær og í dag.  Í gær vann hann Ítalann Salvatore Marano (1967) og í dag lagði hann Spánverjann Francois Weber (2155).  Guðmundur hefur 2 vinninga.  Í fimmtu umferð, sem fram fer á morgun, teflir hann við Svisslendinginn Camille De Seroux (2076).

Alls taka 256 skákmenn þátt í þessa sterka móti frá 58 löndum.  Þar af eru 56 stórmeistarar og 11 þeirra með með meira en 2700 skákstig.

• Heimasíða mótsins
• Chess-Restults
• Beinar útsendingar (12 efstu borðin)

 

 

Íslenski Skákdagurinn haldinn hátíðlegur hjá Goðanum

Í gærkvöld var skákfélagið Goðinn með opið hús í tilefni af Íslenska skákdeginum sem haldinn var hátíðlegur um allt land í gær. Opna húsið hófst kl 20.30 og lögðu þó nokkrir gestir leið sýna í félagsaðstöðu Goðans í Framsýnarsalnum á Húsavík. Goðinn bauð upp á myndasýningu af starfi félagsins undanfarin á og vor meðal annars sýndar myndir frá því þegar Boris Spassky heimsótti Húsavík árið 1978 og tefldi fjöltefli í troðfullum salnum á Hótel Húsavík.

3. umferð Gestamóts Goðans var svo tefld í suð-vestur goðorði Goðans á sama tíma.

 
Svavar Pálsson sýslumaður Þingeyinga og Sigurgeir Stefánsson sýndu fína takta.

Einnig gátu gestir á íslenska skákdeginu teflt við félagsmenn Goðans og nýttu margir sé það. Goðinn bauð uppá kaffi, djús og kanilsnúða sem formaður hafði bakað í tilefni dagsins.

 
Jóhanna Kristjánsdóttir formaður HSÞ tefldi við Heimi Bessason í gærkvöld.

Trausti Aðalsteinsson bæjarfulltrúi (VG) Norðurþings að tafli við Heimi Bessa

 

Jón efstur á atskákmóti Sauðárkróks

Atskákmót Sauðárkróks 2012 hófst í kvöld á skákdaginn og voru telfdar fyrstu þrjár umferðirnar. Jón Arnljótsson er einn efstur með fullt hús, en nokkrir keppendur koma skammt undan. Alls taka 9 keppendur þátt í mótinu og verða næstu umferðir tefldar næstkomandi þriðjudag.

Heimasíða Skákfélags Sauðárkróks

Peðaskákfjöltefli við stórmeistara í Laufásborg

Af heimasíðu Leikskólans Laufásborgar:

Í tilefni af skákdeginum til heiðurs Friðrik Ólafssyni héldu þau Lenka og Omar skákmeistarar og skákkennarar fjöltefli þar sem gesturinn var Þröstur Þórhallsson stórmeistari. Það voru stóru hóparnir sem tóku þátt í þessari peðskák og gekk alveg glimrandi vel og fengu jafntefli við stórmeistarann ;)) Lenka skákkennari hér og mikil afrekskona í skák tefli líka fjöltefli. Hún er flott fyrirmynd stúlkna og drengja :)

Þau höfðu gaman af og við líka, þetta var bara eins og að ganga inn á alvöru skákmót svo flott voru þau. Við erum alltaf svo rífandi stolt af börnunum það vantar ekki.

Frábært framtak hjá Omari og Lenku. Takk fyrir kæra vinkona og kæri vinur þið eruð frábær!

 

Bein útsending frá lokaumferð KORNAX mótsins hefst kl. 19:30

Það er mikil spenna fyrir lokaumferð KORNAX mótsins - Skákþings Reykjavíkur sem fram fer í kvöld og hefst kl. 19:30.  Bein útsending verður frá lokaumferðinni.  Sex keppendur geta sigrað á mótinu.  Ingvar Þór Jóhannesson (2337) er efstur með 7 vinninga, Guðmundur Kjartansson (2326) er annar með 6,5 vinning og og bræðurnir Björn (2406) og Bragi Þorfinnssynir (2426), Hjörvar Steinn Grétarsson (2470) og Einar Hjalti Jensson (2241) eru í 3.-6. sæti með 6 vinninga.

Beina útsendingu frá lokaumferðinni má nálgast hér (tengill virkur rétt fyrir umferð)

Stöðu mótsins má finna hér.

Í lokaumferðinni mætast meðal annars:

• Ingvar Þór (7) - Bragi Þ. (6)
• Guðmundur K. (6,5) - Hjörvar Steinn (6)
• Einar Hjalti (6) -  Björn Þ. (6)
• Stefán B. (5,5) - Þór Már (5,5)
• Sverrir Örn (5,5) - Mikael Jóhann (5,5)

Pörun lokaumferðinnar má nálgast hér.

Mjög góð þátttaka er á mótinu eða 73 skákmenn. Mótið er sterkt en fimm alþjóðlegir meistarar eru meðal þátttakenda.  Teflt er á sunnudögum (kl. 14) og á mánu- og miðvikudögum (kl. 19:30).

• Heimasíða mótsins
• Chess-Results
• Myndaalbúm (GB, HÁ, SRF og JHR)