Ísbílsmótið - Hjörvar í beinni

Mikil skákhátíð fer fram í dag í Sumarskákhöll Skákakademíunnar. Venju samkvæmt verður hádegishraðskákmót sem hefst 12:00. Að þessu verður ekki teflt um annað en heiðurinn -- en um mitt mót mun Ísbíllinn renna upp að Skákhöllinni og keppendur kæla sig niður með ljúffengum íspinna.

Að loknu hraðskákmótinu, upp úr eitt, mun skák Hjörvars Steins Grétarssonar í áttundu umferð Opna tékkneska meistaramótsins verða varpað á stóru tjaldi. Hjörvar hefur hvítt á hinn 14 ára gamla Nitzan Steinberg frá Ísrael sem er mikið efni. Með sigri mun Hjörvar Steinn hafa góðan möguleika á að tryggja sér stórmeistaratitil. Meistarar munu sjá um skákskýringar.

Hraðskák, ís og svo fylgjast með næsta stórmeistara okkar í beinni -- getur ekki klikkað, sjáumst sem flest.

Ef einhver villist á leiðinni að Þingholtsstræti 37 er það bara símtal í 863-7562 og málið leyst.

Hjörvar og Hannes með jafntefli - Hjörvar í 2.-10. sæti

Alþjóðlegi meistarinn, Hjörvar Steinn Grétarsson (2507), gerði jafntefli við stórmeistarann Rustam Knusnutdinov (2503), frá Kasakstan, í sjöundu umferð Czech Open sem fram fór í dag.  Hjörvar hefur 5,5 vinning og er í 2.-10. sæti.  Á morgun teflir Hjörvar við mikið efni frá Ísrael, Nitzan Steinberg (2326).  Skák Hjörvars verður sýnd beint og hefst skákin kl. 13. 

Hannes Hlífar Stefánsson (2515) gerði jafntefli við tékkneska alþjóðlega meistarann Jaroslav Bures (2392).  Hannes hefur 4,5 vinning og er í 34.-66. sæti.  Hannes mætir rússneska alþjóðlega meistarann Mikhaeil Antipov (2470).

Ísraelski stórmeistarinn Tamir Nabity (2582) er efstur með 6,5 vinning.

Í b-flokki vann Smári Rafn Teitsson (2057) en Sigurður Eiríksson (1959) tapaði. Smári hefur 4,5 vinning en Sigurður hefur 2 vinninga.

Í d-flokki gerði Dawid Kolka (1532) jafntefli en Felix Steinþórsson (1329) tapaði.  Felix hefur 3 vinninga en Dawid hefur 2 vinninga.

Í e-flokki vann Róbert Leó Jónsson en Steinþór Baldursson tapaði.  Róbert hefur 4 vinninga en Steinþór hefur 2,5 vinning.

259 skákmenn frá 30 löndum tefla í a-flokki.  Þar af eru 48 stórmeistarar.  Hannes er nr. 28 í stigaröð keppenda en Hjörvar er nr. 31. 

• Heimasíða mótsins
• Beinar útsendingar (Hefjast kl. 13 -15 efstu borðin)
• Myndir (Steinþór Baldursson)
• Chess-Results

Hjörvar vann Robert Hess - er í 2.-5. sæti

 

Alþjóðlegi meistarinn, Hjörvar Steinn Grétarsson (2507), gerði sér lítið fyrir og vann bandaríska landsliðsmanninn og Íslandsvininn Robert Hess (2639) með svörtu í sjöttu umferð Czech Open sem fram fór í dag.  Hjörvar hefur nú 5 vinninga og er í 2.-5. sæti.   Í sjöundu umferð, sem fram fer á morgun, teflir Hjörvar við stórmeistarann Rustam Knusnutdinov (2503) frá Kasakstan.  Skák Hjörvars verður sýnd beint og hefst skákin kl. 13. 

 

Hannes Hlífar Stefánsson (2515) gerði jafntefli við tékkneska alþjóðlega meistarann Stanislav Korotkjevich (2401).  Hannes hefur 4 vinninga og er í 27.-63. sæti.  Hannes mætir tékkneska alþjóðlega meistaranum Jaroslav Bures (2392) á morgun.

Ísraelski stórmeistarinn Tamir Nabity (2582) er efstur með fullt hús.

Í b-flokki gerði Sigurður Eiríksson (1959) jafntefli en Smári Rafn Teitsson (2057) tapaði.  Smári hefur 3,5 vinning en Sigurður hefur 2 vinninga.

Í d-flokki gerði Felix Steinþórsson (1329) jafntefli en Dawid Kolka (1532) tapaði.  Felix hefur 3 vinninga en Dawid hefur 1,5 vinning.

Í e-flokki vann Steinþór Baldursson en Róbert Leó Jónsson tapaði.  Róbert hefur 3 vinninga en Steinþór hefur 2,5 vinning.

259 skákmenn frá 30 löndum tefla í a-flokki.  Þar af eru 48 stórmeistarar.  Hannes er nr. 28 í stigaröð keppenda en Hjörvar er nr. 31. 

• Heimasíða mótsins
• Beinar útsendingar (Hefjast kl. 13 -15 efstu borðin)
• Myndir (Steinþór Baldursson)
• Chess-Results

Guðfinnur bar sigur úr bítum

RIDDARAR REITAÐA BORÐSINS hittast til tafls jafnt sumar sem vetur og láta ekki deigan síga þótt sól skíni í heiði.  Að etja kappi í skáktafli er mun skemmtilegri iðja finnst flestum en að reita arfa. Líka má segja að sumir hverjir hinna öldnu skákmanna séu haldnir eins konar „áráttustreyturöskun“ og láta því ekkert tækifæri ónotað til að tefla ef aðstæður leyfa.   Að skák sé bara fyrir letingja eða þá  sem haldnir eru „áreynsluleysisstreituröskun“ eða hafa ekkert þarfara að gera, eins og heyrst hefur, er meiriháttar misskilningur enda vísindalega sannað að heilabrot séu heilsubót.

Góð þátttaka hefur verið í miðvikudagsmótum Riddarans í sumar þetta 14-20 þátttakendur hverju sinni og að jafnaði hart barist enda hefur það sýnst sig að allir geta unnið alla á góðum degi og láta ekki svokallaða  „mótlætisstreituröskun“ á geðlæknamáli hafa áhrif á sig þótt á móti blási stöku sinnum.

Sigurvegarar undanfarinna móta hafa m.a. verið Jón Þ. Þór, sem vann mótið í vikunni sem leið með fullu húsi, hlaut 11 vinninga af 11 mögulegum, hafði þó nokkru áður orðið í 5 sæti með 7 vinninga, svo sjá má að baráttan er hörð.   Ingimar Halldórsson, hefur unnið 2 mót með 9.5/11 og 8/11, Sæbjörn G. Larsen eitt með 8/11, Kristján Stefánsson  eitt 8.5 /11 með Jóhann Örn Sigurjónsson fyrir neðan sig með 7.5 v.  Sigurður Herlufssen hefur fylgt þessum mönnum eftir eins og skugginn, sem og Guðfinnur R. Kjartansson, sem gerði sér lítið fyrir og vann mótið í dag með 10 v. af 11, nokkuð léttleikandi.

Sjá nánar meðf. úrslitatöflu og myndir.

 

 

Mótin fara fram í Vonarhöfn, Strandbergi, safnaðarheimili Hafnarfjarðarkirkju og hefjast kl. 13 alla miðvikudaga árið um kring. Tefldar eru 11 umferðir með 10 mín. umhugsunartíma á skákina. Allir liðtækir skákmenn 60 ára og eldri velkomnir til tafls. Þátttökugjald er kr. 300 og innifelur kaffi og meðlæti.

Myndaalbúm (ESE)

Meira á www.riddarinn.net

Giri efstur í Biel - Morozevich hættur á mótinu

Hollenski stórmeistarinn Anish Giri (296) er efstur á ofurskákmótinu í Biel eftir sigur á Bacrot (2713) í dag.  Giri hefur 7 stig (2½ vinning).  Kínverjinn Wang Hao (2739) er annar með 6 stig (2 stig) en hann vann Nakamura (2778) í dag.   

Stærstu fréttir dagsins eru hins vegar að Morozevich (2770) hætti í dag á mótinu eftir töp í tveimur fyrstu umferðunum.  Framvísaði hans læknisvottorði en Móri átti að tefla við Carlsen (2837) í dag.   Móldóvinn Bologan tekur sæti hans og teflir við Carlsen á frídaginn.  Sigrar Giri og Bacrot gegn Morozevich standa.   Bologan hefur sæst á að tefla bara átta skákir.   

Þess má geta að Giri virðist vera í feiknaformi þessa dagana.  Hann varð fyrir skemmstu hollensku meistari, hlaut 6 vinninga í 7 skákum.  Íslandsvinirnir Sokolov (2676) og Erwin L´ami (2615) urðu í 2.-3. sæti með 5 vinninga.

• Heimasíða mótsins
• Beinar útsendingar - hefjast kl. 12
• Chessbomb

Ísbílsmótið á föstudag!

Glatt var á hjalla í Sumarskákhöllinni síðastliðinn föstudag. Yfir 20 keppendur mættu og sem fyrr var keppandalistinn afar fjölbreyttur. Í fyrstu umferð mátti Róbert Lagerman þakka fyrir sigur gegn Gauta Páli, sem hefur verið í mikilli framför að undanförnu. Eftir þennan heppnissigur stöðvaði ekkert Róbert sem sigraði á mótinu með sex vinninga af sex mögulegum.

Enn og aftur hlaut Vignir Vatnar barna- og unglingaverðlaunin og Sóley Lind Pálsdóttir varð efst stúlkna. Stefán Davíðsson, hinn ungi nemandi Ölduselsskóla var dreginn út í happdrættinu. Fengu sigurvegararnir allir veglega bókavinninga frá Sögum útgáfa.
 
Á föstudaginn kemur, í hádeginu 12:00, fer fram Ísbílsmótið. Spáð er sólríku veðri og um mitt mótið mun Ísbíllinn renna í hlað í Þingholtsstrætinu og gefa öllum keppendum ís.
 
Skák, ís og sól:)
 
Allir velkomnir í Sumarskákhöllina að Þingholtsstræti 37.

Fjölgar hjá Víkingum

Hinn öflugi skákmaður Þorvarður Fannar Ólafsson (2202) gekk á þriðjudagskvöld í raðir Víkingaklúbbsins. Þorvarður Fannar er góður liðstyrkur fyrir Víkingaklúbbinn í baráttunni í deildarkeppninni í vetur, en Þorvarður var áður félagi í Skákdeild Hauka. Þorvarður er einnig frábær liðsmaður sem teflir allar skákir i liðakeppnum og er manna iðnastur við skákborðið, en hann varð nýlega öðlingur í skákinni (fertugur) og hélt upp á það með því að vinna Öðlingamótið 2012.  Það var vel við hæfi að Hafnfirðingurinn knái, vigðist í Víkingaklúbbinn á heimasvæði Golfklúbbsins Keilis í Hafnafirði. 

Skammt er stórra högga á milli, því fyrr í sumar gekk hinn þétti skákmaður og norski víkingur Hrannar Baldursson (2137) í Víkingaklúbbinn en Hrannar  var áður í Skákdeild KR og úr sjálfu Svíalandi eða Svíaríki kemur sænskur landi sjálfs Gláms, enginn annar en GM Emanuel Berg (2573), en hann gekk einnig í Víkingaklúbbinn í vikunni. 

sjá nánar á
http://vikingaklubburinn.blogspot.com/

Hjörvar vann - Hannes með jafntefli

Alþjóðlegi meistarinn, Hjörvar Steinn Grétarsson (2507), vann tékkneska alþjóðlega meistarann Pavel Simacek (2478) í 5. umferð Czech Open sem fram fór í dag.  Hannes Hlífar Stefánsson (2515) gerði hins vegar jafntefli við þýska alþjóðlega meistarann Julian-Marcel Jorcik (2399).  Hjörvar hefur 4 vinninga og er í 4.-20. sæti en Hannes hefur 3,5 vinning og er í 21.-57. sæti.

Í 6. umferð, sem fram fer á morgun, teflir Hjörvar við bandaríska stórmeistarann og Íslandsvininn Robert Hess (2639), sem er næststigahæstur keppenda, en Hannes við tékkneska alþjóðlega meistarann Stanislav Korotkjevich (2401).  Skák Hjörvars verður sýnd beint og hefst skákin kl. 13. 

Ísraelski stórmeistarinn Tamir Nabity (2582) er efstur með fullt hús.

Í b-flokki vann Smári Rafn Teitsson (2057) en Sigurður Eiríksson (1959) tapaði.  Smári hefur 3,5 vinning en Sigurður hefur 1,5 vinning.

Í d-flokki vann Felix Steinþórsson (1329) en Dawid Kolka (1532) tapaði.  Felix hefur 2,5 vinning en Dawid hefur 1,5 vinning.

Í e-flokki vann Róbert Leó Jónsson sína skák en Steinþór Baldursson tapaði.  Róbert Leó hefur 3 vinninga en Steinþór hefur 1,5 vinning.

259 skákmenn frá 30 löndum tefla í a-flokki.  Þar af eru 48 stórmeistarar.  Hannes er nr. 28 í stigaröð keppenda en Hjörvar er nr. 31. 

• Heimasíða mótsins
• Beinar útsendingar (Hefjast kl. 13 -15 efstu borðin)
• Myndir (Steinþór Baldursson)
• Chess-Results

Davíð sigraði á afmælismóti Allan Beardsworth

Hingað kom til leiks um helgina góður gestur Allan Beardsworth frá Manchester í Englandi.  Allan þessi átti nýlega 50 ára afmæli og bauð konan hans honum til Íslands í tilefni þess.   Allan, sem var m.a. liðsstjóri Englendinga á ólympíuskákmótunum 2004 og 2006, byrjaði einmitt að tefla árið 1972 þegar Einvígi aldarinnar fór fram. 

Allan sendi fyrirspurn til SÍ og spurði hvort eitthvað skákmót væri í gangi þessa helgi.  Ekki var svo.  SÍ og Skákakademían rigguðu hins vegar upp smá boðsmóti í tilefni af komu Allan, sem fram fór í gær í Iðnó.  Meðal keppenda voru flestir fulltrúar Íslands á EM ungmenna, landsliðskonur, stjórnarmenn SÍ að ógleymdum Helga Ólafssyni stórmeistara.  

Allan var afar ánægður með framtækið og gaf skákbók eftir Kasparov, þar sem fjallað er um fyrirrennara hans á heimsmeistarastóli, þá Spassky og Fischer.  

Davíð Ólafsson kom sá og sigraði á mótinu, hlaut 6 vinninga, Helgi Ólafsson varð annar með 5,5 vinning og Gunnar Björnsson varð þriðji með 5 vinninga.  Allan (2200), Róbert Lagerman (2315) og Björn Ívar Karlsson (2254) komu svo í humátt á eftir með 4,5 vinning.

Lokastaðan:

Rank		Name	Rtg	Pts
1	FM	David Olafsson	2321	6
2	GM	Helgi Olafsson	2547	5½
3		Gunnar Bjornsson	2110	5
4	FM	Robert Lagerman	2315	4½
5		Bjorn-Ivar Karlsson	2254	4½
6		Allan Beardsworth	2200	4½
7		Stefan Bergsson	2175	4
8		Dagur Ragnarsson	1913	4
9		Hallgerdur Thorsteinsdottir	1957	3
10		Oliver Johannesson	2047	3
11	FM	Halldor Gretar Einarsson	2224	3
12		Oskar Long Einarsson	1571	3
13		Stefan Mar Petursson	1500	3
14		Hrafn Jokulsson	1695	2½
15		Vignir Vatnar Stefansson	1590	2½
16		Johanna Bjorg Johannsdottir	1886	2
17		Eirikur K Bjornsson	1970	1½
18		Hilmir Freyr Heimisson	1720	1½

• Myndaalbúm (Hrafn Jökulsson og Andrea Margrét Gunnarsdóttir)
• Chess-Results

Hannes vann - Hjörvar með jafntefli við stórmeistara

Stórmeistarinn Hannes Hlífar Stefánsson (2515) vann rússnesku skákkonuna Aleksandra Goryachkinka (2354), sem er stórmeistari kvenna, í 4. umferð Czech Open sem fram fór í dag.  Hjörvar Steinn Grétarsson (2507) gerði jafntefli við tékkneska stórmeistarann Petr Velicka (2462).  Báðir hafa þeir 3 vinninga og eru í 18.-51. sæti.

Í 5. umferð, sem fram fer á morgun, teflir Hannes við þýska alþjóðlega meistarann Julian-Marcel Jorcik (2399) en Hjörvar við tékkneska alþjóðlega meistarann Pavel Simacek (2478).  

Indverski alþjóðlegi meistarinn Srinath Narayanan (2399) og ísraelski stórmeistarinn Tamir Nabity (2582) eru efstir með fullt hús.

Í b-flokki unnu bæði Smári Rafn Teitsson (2057) og Sigurður Eiríksson (1959) sínar skákir.  Smári hefur 2,5 vinning en Sigurður hefur 1,5 vinning.

Í d-flokki voru tefldar 2 umferðir í dag og hafa nú verið tefldar jafn margar umferðir í öllum flokkum.  Dawid Kolka (1532) fékk einn vinning en Felix Steinþórsson (1329) engan.  Felix hefur 2 vinninga en Dawid hefur 1,5 vinning.

Í e-flokki voru einnig tefldar tvær umferðir.  Steinþór hlaut 1,5 vinning en Róbert Leó 1 vinning.  Róbert hefur 2 vinninga en Steinþór hefur 1,5 vinning. 

259 skákmenn frá 30 löndum tefla í a-flokki.  Þar af eru 48 stórmeistarar.  Hannes er nr. 28 í stigaröð keppenda en Hjörvar er nr. 31. 

• Heimasíða mótsins
• Beinar útsendingar (Hefjast kl. 13 -15 efstu borðin)
• Myndir (Steinþór Baldursson)
• Chess-Results