Dagur með jafntefli við stórmeistara í 3. umferð

Alþjóðlegi meistarinn Dagur Arngrímsson (2366) gerði jafntefli við ungverska stórmeistarann Imre Balog (2542) í 3. umferð alþjóðlega mótsins í Arad í Rúmeníu.  Dagur hefur 2,5 vinning og er í 14.-30. sæti. 

Í dag eru tefldar 2 umferðir.  Í 4. umferð, sem nú er í gangi teflir Dagur við rúmenska stórmeistarann Vlad-Christian Jianu (2507).   Skákin er sýnd beint á vefsíðu mótsins.

183 skákmenn taka þátt í mótinu frá 9 löndum.  Þar á meðal eru 11 stórmeistarar og 11 alþjóðlegir meistarar.  Dagur er nr. 22 í stigaröð keppenda.

• Heimasíða mótsins
• Beinar útsendingar (15 efstu borðin) - flestar umferðir hefjast kl. 13:30.
• Chess-Results

Henrik með sigra í tveimur fyrstu umferðunum

Stórmeistarinn Henrik Danielsen (2511) vann sínar skákir í 1. og 2. umferð Politiken Cup sem fram fóru í gær og í dag.  Í gær vann Svíann Eric Nordin (1906) en í morgun vann hann Danann Mikael Skjoldager (2077). 

Í dag eru tefldar 2 umferðir. Í 3. umferð, sem er í gangi, teflir hann við Danann Jesper Schultz-Pedersen (2172).  Hægt er að fylgjast með þeirri skák beint á vefsíðu mótsins. 

292 skákmenn taka þátt frá 24 löndum.  Þar á meðal eru 22 stórmeistarar.  Henrik er nr. 19 í stigaröð keppenda.

• Heimasíða mótsins
• Beinar útsendingar (35 efstu borðin) - flestar umferðir hefjast kl. 11.
• Chess-Results

Afmælismót Don Roborto fer fram á morgun

Góður vinur Skákfélags Vinjar, Róbert Lagerman, verður heiðraður á mánudaginn 30. júlí með veglegu móti. Fer það fram í Vin, Hverfisgötu 47 og hefst klukkan 13:15.

Róbert hefur í fjölmörg ár komið við á mánudögum og leiðbeint bæði byrjendum og lengra komnum auk þess að stýra mótum og aðstoðað á allan mögulegan hátt við skákkennslu og mótahald hjá hinum ýmsu deildum Rauða krossins á Íslandi, að Kleppsspítala og fleiri viðburðum sem Skákfélag Vinjar hefur komið að.

Tefldar verða sex umferðir með sjö mínútna umhugsunartíma og veitt verða verðlaun fyrir efstu sætin auk aldursflokkaverðlauna, óvæntustu úrslitin og annað, alls tólf verðlaun. Verða þau algjörlega í anda Róberts, fagurbókmenntir, kántrý- og þjóðlagatónlist á geisladiskum og harðhausamyndir á DVD með Clint Eastwood.

Forsetinn hann Gunnar Björnsson heldur utan um að stýra veislunni og hefur fullt dómsvald. Orkufullar kaffiveitingar í hléi.

Allt áhugafólk hjartanlega velkomið og það er bara að mæta tímanlega og skrá sig.

Myndaalbúm tileinkað Róberti (HJ)

Dagur vann í 2. umferð - alvaran hefst á morgun

Alþjóðlegi meistarinn Dagur Arngrímsson (2366) vann Arghir Bonte (1986) í 2. umferð alþjóðlega mótsins í Arad í Rúmeníu sem fram fór í morgun.  Dagur er meðal 37 keppenda sem hafa fullt hús.  

Tvær umferðir fara fram á morgun.  Segja má að þá hefjist alvaran en í fyrri umferð dagsins teflir Dagur við ungverska stórmeistarann Imre Balog (2542).  Umferðin hefst kl. 6:30 og verður skák Dags sýnd beint. 

183 skákmenn taka þátt í mótinu frá 9 löndum.  Þar á meðal eru 11 stórmeistarar og 11 alþjóðlegir meistarar.  Dagur er nr. 22 í stigaröð keppenda.

• Heimasíða mótsins
• Beinar útsendingar (15 efstu borðin) - flestar umferðir hefjast kl. 13:30.
• Chess-Results

Henrik í beinni frá Politiken Cup kl. 12

Í dag hefst opna skákmótið Politiken Cup sem haldið er í nágrenni Kaupmannahafnar, Helsingör.  Meðal keppenda er Henrik Danielsen (2511).  Í fyrstu umferð, sem hefst núna kl. 12 teflir Henrik við Svíann Eric Nordin (1906).  Henrik er eini Íslendingurinn sem tekur þátt nú en Héðinn Steingrímsson (2560) sem einnig var skráður til leiks er ekki meðal keppenda. 

292 skákmenn taka þátt frá 24 löndum.  Þar á meðal eru 22 stórmeistarar.  Henrik er nr. 19 í stigaröð keppenda.

• Heimasíða mótsins
• Beinar útsendingar (35 efstu borðin) - flestar umferðir hefjast kl. 11.
• Chess-Results

Hjörvar með jafntefli í dag - er í 4.-15. sæti fyrir lokaumferðina

Alþjóðlegi meistarinn, Hjörvar Steinn Grétarsson (2507), gerði jafntefli við hinn unga og efnilega Ísraela, Nitzan Steinberg (2326), sem er aðeins 14 ára, í áttundu og næstsíðustu umferð Czech Open sem fram fór í dag.  Hjörvar hefur 6 vinninga og er í 4.-15. sæti fyrir lokaumferðina sem fram fer á morgun.  Þá teflir Hjörvar við þýska stórmeistarann og landsliðsmanninn Rainer Buhmann (2571) sem var í liði Þjóðverja þegar þeir urðu Evrópumeistarar í Grikklandi í fyrra.

Hannes Hlífar Stefánsson (2515) vann í dag rússneska alþjóðlega meistarann Mikhaeil Antipov (2470).  Hannes hefur 5,5 vinning og er í 16.-36. sæti.  Hann mætir Kasparov á morgun.  

Skákir beggja verður sýndar beint á morgun og hefjast þær kl. 13.  Hjörvar þarf að vinna til að tryggja sér sinn síðasta stórmeistaraáfanga.

Efstir með 6,5 vinning eru stórmeistararnir Tamir Nabity (2582), Ísraelk, Chanda Sandipan (2618) og Alexandre Danin (2525), Rússlandi.

Í b-flokki gerðu Smári Rafn Teitsson (2057) og Sigurður Eiríksson (1959) jafntefli Smári hefur 5 vinninga en Sigurður hefur 2,5 vinning.

Í d-flokki gerði Dawid Kolka (1532) og Felix Steinþórsson (1329) jafntefli.  Felix hefur 3,5 vinning en Dawid hefur 2,5 vinning.

Í e-flokki vann Steinþór Baldursson en Róbert Leó Jónsson tapaði.  Róbert hefur 4 vinninga en Steinþór hefur 3,5 vinning.

259 skákmenn frá 30 löndum tefla í a-flokki.  Þar af eru 48 stórmeistarar.  Hannes er nr. 28 í stigaröð keppenda en Hjörvar er nr. 31. 

• Heimasíða mótsins
• Beinar útsendingar (Hefjast kl. 13 -15 efstu borðin)
• Myndir (Steinþór Baldursson)
• Chess-Results

Ærsladraugur í Pardubice? - Pistill frá Steinþóri Baldurssyni

Upp hafa komið umræður hvort Ærsladraugur sé mögulega kominn á stjá í skákhöllinni í Pardubice. Ærsladraugar eins og menn kannski muna eru sagðir vera húsdraugar sem gera skarkala, hreyfa hluti úr stað og sem valda ýmsum óútskýranlegum atvikum innanhúss.

Vísbendingar um þetta komu upp í skák Felixar í Pardubice í gær þegar riddari andstæðings hans á skákborðinu hreyfðist óútskýrt eftir 13. leik Felixar af reit H5 og tók sér nýja bólfestu á reit G7. Þetta gerðist meðan Felix brá sér á salerni en hinn skráði leikur andstæðinsins á skorblaðið var h6. Þegar Felix benti andstæðingi sínum á þetta á sinni kurteisilegu ensku fékk hann aðeins svör á tekknésku frá hinum sextuga tekkneska andstæðingi sínum en þau svör útskýrðu ekki á neinn hátt þennan sérkennilega liðsflutning riddarans fyrir Felix. Taka skal fram að þetta hlaup riddarans skilaði sér ekki inn á lista yfir skráða leiki hjá Tekkanum en hann var nú samt sáttur við þessa breyttu stöðu og lék riddaranum tveim leikjum síðar frá hinum nýja stað. Þar sem við Felix trúum því að skákmenn séu heiðarlegir þá er eina trúverðuga skýringin sem eftir stendur sá möguleiki að ærsladraugur hafi verið hér á ferð. Felix kaus að sætta sig við þessa breyttu óútskýrðu stöðu jafnvel þótt það hafi kostað hann amk 2 tempó og hélt áfram að tefla skákina út frá hinni breyttu verri stöðu. Að lokum skrifaði Felix undir skorblaðið eftir að hafa gefið skákina eftir 59. leik.

Eftir að skákinni lauk sannreyndum við feðgarnir út frá skorblöðum beggja að þetta hafði í raun gerst og ákváðum að tilkynna um atvikið til skákstjóra sem í framhaldinu staðfesti hinn sérkennilega atburð. Þar sem Felix hafði hins vegar skrifað undir skorblaðið teljast úrslitin endaleg og verður ekki breytt. Skákstjórnin tók fréttum af atvikinu hins vegar mjög alvarlega og mun rannsaka atburðinn nánar og í því sambandi væntanlega ráðfæra sig við sérfræðinga í draugagangi til að leita leiða til að kveða niður djöfsa komi í ljós að um ærsladraug var að ræða.

Það sem Felix lærði kannski á þessu og það sem hann vill koma á framfæri til annarra skákkrakka er að menn hafa alltaf rétt til að biðja skákstjóra um að úrskurða um deilumál og að aðilar eiga aldrei að láta mögulega tilvist drauga, aldur og stærð andstæðingsins eða tungumálaörðugleika koma í veg fyrir slíkt. Einnig er mikilvægt að skrifa ekki undir skorblöð ef maður er ekki sáttur við eitthvað og ef maður telur eitthvað óútskýrt á ferð. Réttur vettvangur fyrir alla óvissu og ágreining er hjá skákstjóra. Þetta á við hvort sem maður er á tefla á skákmóti á Íslandi eða erlendis. Hér í Pardubice eru 3 strákar úr Álfhólsskóla sem eru komnir með þetta alveg á hreint.

Annars er þessi hátíð hér í Pardubice frábær og við hlökkum til að koma hér aftur að ári.

Kveðja

Steinþór Baldursson

Don Roberto í hálfa öld!

Góður vinur Skákfélags Vinjar, Róbert Lagerman, verður heiðraður á mánudaginn 30. júlí með veglegu móti. Fer það fram í Vin, Hverfisgötu 47 og hefst klukkan 13:15.

Róbert hefur í fjölmörg ár komið við á mánudögum og leiðbeint bæði byrjendum og lengra komnum auk þess að stýra mótum og aðstoðað á allan mögulegan hátt við skákkennslu og mótahald hjá hinum ýmsu deildum Rauða krossins á Íslandi, að Kleppsspítala og fleiri viðburðum sem Skákfélag Vinjar hefur komið að.

Tefldar verða sex umferðir með sjö mínútna umhugsunartíma og veitt verða verðlaun fyrir efstu sætin auk aldursflokkaverðlauna, óvæntustu úrslitin og annað, alls tólf verðlaun. Verða þau algjörlega í anda Róberts, fagurbókmenntir, kántrý- og þjóðlagatónlist á geisladiskum og harðhausamyndir á DVD með Clint Eastwood.

Forsetinn hann Gunnar Björnsson heldur utan um að stýra veislunni og hefur fullt dómsvald. Orkufullar kaffiveitingar í hléi.

Allt áhugafólk hjartanlega velkomið og það er bara að mæta tímanlega og skrá sig.

Myndaalbúm tileinkað Róberti (HJ)

Hraðskákkeppni taflfélaga: Akureyringar og Mátar mætast

Í kvöld var dregið í forkeppni og fyrstu umferð Hraðskákkeppni taflfélaga.  Hvorug tveggja á að vera lokið eigi síður en 15. ágúst nk.   Allmikið er um spennandi viðureignir og má þar nefna að Taflfélag Vestmannaeyja og Víkingaklúbburinn mætast í forkeppninni og að Taflfélag Bolungarvíkur og Skákfélagið Goðinn mætast í 1. umferð.   Aðalviðureignin verður þó að teljast viðureign Skákfélags Akureyringa og Máta og verður þar án efa barist til allra síðasta Akureyrings.

Forkeppni:

• Skákfélag Selfoss og nágrennis - Skákdeild Hauka
• Taflfélag Vestmannaeyja - Víkingaklúbburinn

1. umferð (16 liða úrslit)

• Skákfélag Reykjanesbæjar - Taflfélag Vestmannaeyja/Víkingaklúbburinn
• Skákfélag Akureyrar - Taflfélagið Mátar
• Briddsfjelagið - Taflfélagið Akraness
• Taflfélag Garðabæjar - Skákdeild Vinjar
• Taflfélag Bolungarvíkur - Skákfélagið Goðinn
• Taflfélagið Hellir - Skákfélag Selfoss og nágrennis/Skákdeild Hauka
• Skákdeild Fjölnis - Taflfélag Reykjavíkur
• Skákdeild KR -Skákfélag Íslands

Heimasíða mótsins

 

Dagur vann í fyrstu umferð í Arad

Í dag hófst alþjóðlegt mót í Arad í Rúmeníu.  Meðal keppenda er alþjóðlegi meistarinn Dagur Arngrímsson (2366).  Dagur vann stigalágan andstæðing (1845) í fyrstu umferð.   Hann mætir öðrum stigalágum andstæðingi (1986) á morgun.

183 skákmenn taka þátt í mótinu frá 9 löndum.  Þar á meðal eru 11 stórmeistarar og 11 alþjóðlegir meistarar.  Dagur er nr. 22 í stigaröð keppenda.

• Heimasíða mótsins
• Beinar útsendingar (15 efstu borðin)
• Chess-Results