KR: Sigurður Herlufsen hrósaði sigri

Það er ekki tekið út með sitjandi sældinni að taka þátt í hraðskákmótum í KR-heimilinu á mánudagskvöldum.  Nærri 30 keppendur mættir til harks - 13 umferðir takk - hvorki meira né minna. Keppendur fá varla „hlandgrið" milli skáka,  eins og Högni Torfason sagði stundum,  svo hratt gengur hið gráa gaman og grimmi hráskinnaleikur fyrir sig.

Þeir sem haldnir eru svokallaðri „skákáráttupersónuleikastreituröskun" eða skákdellu öðru nafni  eru sí og æ að brjóta heilann yfir flækjum manntaflsins. Þungt þjakaðir af sífelldum heilabrotum um skákbyrjanir, varnir og varíanta. Því er kannski ekki alveg út í hött (Hróa hött eða Tóka munk)  að skilgreina þá sem eins konar „síbrotamenn"  á sínu sviði. Þekkt hugtak úr lögregluskýrslum sem lagatæknar  kannast líka mæta vel við um óforbetranlega smákrimma.   KriSt hrl.,  formaður skákdeildarinnar,  þekkir vel til margra slíkra síbrotamanna úr starfi sínu sem landsfrægur verjandi. Þeir fá oftast milda refsingu því þeim er ekki alveg sjálfrátt.  Það sama gildir um skákfíklana, þeim er ekki alveg sjálfrátt heldur, sífellt að brjóta heilann.  

Nú hópast hér að honum sægur „síbrotamanna" með skákbakteríu sem engin bönd fá hamið, nema þeir fái að tefla og máta hvern annan sleitulaust.  Kristján tekur þeim öllum fagnandi með bros á vör og setur mótið.  Segja má að „einbeittur brotavilji"  auk sterks sigurvilja, einkenni fas þeirra og framkomu alla þegar þeir reyna að brjótast gegnum varnir mótherja sinna og freista þessa að gera brotaþolum sínum allt til miska.  Hörkunaglar og skáktöffarar sem engu eira. Láta ekki einu sinni vesælt peð úr hendi sleppa - nema baneitrað sé.  Gangast upp í því  að valda eins miklum óskunda og mannfalli í liði mótherja sinna og möguleg er,  áður en þeir ná að máta andstæðinginn  eða kála kóngi hans. Stundum snýst taflið óvænt  við og fallhættan er alltaf fyrir hendi. Því betra að hafa vaðið fyrir neðan sig - skákin er ekki búin fyrr en hún er búin.

Mótið sl. mánudag bar merki þessa alls. Þó Gunnararnir væru fjarri  góðu gamni var skáksalurinn troðfullur af fantagóðum skákgeggjurum. Þar af einum af erlendu bergi, Jorge Fonseca, Spánverja sem búsettur hefur verið hérlendis um árabil. Tölvunarfræðingur sem er væntanlega vel að sér í Houdini og Fritz og  hulduheimum skákfræðanna. Öflugur skákmaður úr VIN sem náði m.a. að vinna stórmeistarann frænka Jóhann Hjartarson óvænt í Íslandsmóti taflfélaga fyrr á árinu.  Enda fór hann vel af stað í mótinu og vann 6-7 fyrstu skákirnar þangað til að úthaldið fór etv. að segja til sín og einhverjir varnarjaxlar úr KR náðu að stoppa hann af.

En hinn eitilharði og sigursæli Sigurður A. Herlufsen (76) reyndist hins vegar óstöðvandi. Var öryggið uppmálað,  fór taplaus í gegnum mótið og gerði  aðeins 3 jafntefli  og stóð svo að endingu uppi sem glæstur sigurvegari  eina ferðina enn með 10.5 vinninga af þrettán. Glæsilegt hjá honum.   Jón Þ. Þór sem hafði orðið fremstur meðal jafningja vikuna áður varð nú að sætta sig við 2. sætið með 9.5 vinning og var eðlilega ósáttur við það eftir atvikum.    Þriðji í röðinni varð svo áður nefndur Jorge með 9v, en félagar hans þeir Birgir Berndsen og Ingi Tandri Traustason, ásamt Dr. Ingimar komu svo næstir allir með 8.5v.  Aðrir með minna, en einn er hver einn, sögðu skakkarlarnir í gamladaga á handfærunum og undu glaðir við sitt.

Lauk svo skemmtilegu og velheppnuðu hörkumóti að sögn þátttakenda og menn fóru  að koma sér heim í háttinn enda kvöldi tekið vel að halla.   En það kemur dagur eftir þennan.  

Nánari úrslit má sjá á  meðf. mótstöflu  hér á síðunni og á  www. kr.is (skák)

 

 

ESE-skákþankar 27.11.2012

Jóhann Örn vann Haustmót Ása

Haustskákmót Ása var haldið í gær. Tuttugu og átta skákmenn mættu til leiks, margir þrælsterki. Tefldar voru níu umferðir með tíu mínútna umhugsunartíma. Jóhann Örn Sigurjónsson varð sigursæll eins og hann hefur oft verið áður. Jóhann Örn leyfði aðeins tvö jafntefli og fékk átta vinninga af níu mögulegum.

Þór Valtýsson varð í öðru sæti með sjö og hálfan vinning.Bronsið fékk svo Sigurður Kristjánsson með sex vinninga, jafn honum að vinningum var Ari Stefánsson en Sigurður var hærri á stigum.

Ari fékk flesta vinninga  af þeim sem eru 60 til 70 ára og fékk verðlaunapening sjö þátttakendur voru úr þessum aldurs hóp.

Í hópnum 70 til 80 ára voru langflestir, alls átján skákmenn,  Valdimar Ásmundsson  varð hlutskarpastur með fimm og hálfan vinning.

Í elsta hópnum 80 + voru þrír skákmenn, þar varð Haraldur Axel Sveinbjörnsson efstur með fimm og hálfan vinning

Ari,Valdimar og Haraldur fengu allir gullpening.

Nánari úrslit á Haustmótinu voru þessi.

• 1          Jóhann Örn Sigurjónsson                                8 vinninga
• 2          Þór Valtýsson                                                  7.5
• 3-4       Sigurður Kristjánsson                                      6
•             Ari Stefánsson                                                            6
• 5-7       Valdimar Ásmundsson                                   5.5
•             Guðfinnur R Kjartansson                                5.5
•             Haraldur Axel                                                 5.5
• 8-12     Gunnar Finnsson                                             5
•             Guðjón Magnússon                                         5
•             Össur Kristinsson                                            5
•             Jón Víglundsson                                             5
•             Birgir Sigurðsson                                            5
• 13-16   Þorsteinn K Guðlaugsson                               4.5
•             Einar S Einarsson                                            4.5
•             Kristján Guðmundsson                                   4.5
•             Finnur Kr Finnsson                                         4.5
• 17-19   Gísli Sigurhansson                                          4
•             Garðar Guðmundsson                                     4
•             Birgir Ólafsson                                                4

Að þessu sinni  fengu níu skákmenn örlítið færri vinninga.

Myndaalbúm (ESE)  

 

Maraþon-krakkar í heimsókn í Hringnum: Æðislegt að sjá hvað vel er hugsað um börnin

,,Það var virkilega gaman að koma og kynnast starfinu á Barnaspítalanum," sagði Elín Nhung, sem er í hópi krakkanna sem ætla að tefla maraþon í Kringlunni á föstudag og laugardag milli klukkan 12 og 18 og safna peningum í þágu Barnaspítala Hringsins.

Tekið var á móti Elínu, Doniku Kolica og Felix Steinþórssyni í leikstofunni þar sem Gróa Gunnarsdóttir sýndi þeim þá frábæru og skemmtilegu aðstöðu sem er í boði fyrir börnin sem þurfa að leita sér lækninga á spítalanum.

,,Það er bæði fjölbreytt og skemmtilegt, og mér fannst athyglisvert hvað börnin höfðu úr mörgu að velja. Svo er líka sniðugt að börnin geta verið í skóla á meðan þau eru á spítalanum," segir Elín. Austurbæjarskóli heldur úti skóla fyrir börnin í Hringnum, og þangað koma líka oft systkini barna sem eru til lækninga.

Auður Ragnarsdóttir deildarstjóri Barnadeildar tók á móti skákkrökkunum og sagði þeim frá því mikla og mikilvæga hlutverki sem spítalinn gegnir.

,,Það var bara æðislegt að sjá hvað það er vel hugsað um börnin þarna," sagði Elín, sem er 16 ára, og hlakka til að tefla í þágu svo góðs málefnis.

MYND 1: Auður Ragnarsdóttir deildarstjóri Barnadeildar og maraþon-stúlkurnar Donika og Elín.

MYND 2: Gróa á leikstofunni segir frá starfinu. Liðsmenn Skákakademíunnar heimsækja leikstofuna einu sinni í viku.

Allt um maraþonið mikla á Facebook-síðu viðburðarins: Hér.

Röðun lokaumferðar Skákþings Garðabæjar

Lokaumferð a-flokks Skákþings Garðabæjar fer fram á morgun og er ljóst hverjar mætast þá. Þrír menn berjast um titilinn Skákmeistari Garðabæjar, Jóhann H. Ragnarsson (2081), sem hefur 3 vinninga og Bjarnsteinn Þórsson (1335) og Páll Sigurðsson (1983) hafa 2½ vinning. Búast má án efa við harðri baráttu þremenningana á morgun!

Einar Hjalti Jensson (2312) hefur hins vegar þegar tryggt sér öruggan sigur á mótinu.

Röðun lokaumferðarinnar má nálgast hér.

B-flokkinn má nálgast á Chess-Results.

Íslandsmótið í Vìkingaskák 2012!

Minningarmótið um Magnús Ólafsson - Íslandsmótið í Víkingaskák 2012 fer fram í húsnæði knattspyrnufélagsins Víkings í Víkinni fimmtudaginn 29. nóvember kl. 19.00. Tefldar verða 7 umferðir með 15 mínútna umhugsunartíma. Mótið eru öllum opið og það kostar ekkert að vera með. Boðið verður upp á kaffi ásamt léttum veitingum án endurgjalds.

Nauðsynlegt er að skrá sig til leiks til að tryggja þátttöku. Þátttakendur eru hvattir til að skrá sig í tölvupósti á netfangið Víkingaklubburinn(hjá)gmail.com, eða senda sms á Gunnari Fr. gsm; 8629744. Veitt verða sérstök verðlaun fyrir efstu sætin, auk þess sem sérstök veðlaun fyrir besta árangur kvenna, unglinga og öldunga.

Úrslit á Íslandsmótinu í Víkingaskák 2011 má sjá hér.

Stórmeistarar til leigu í maraþoninu!

Skákáhugamenn og velunnarar Barnaspítala Hringsins, sem vilja leggja sitt af mörkum í söfnun skákbarnanna í maraþoninu í Kringlunni á föstudag og laugardag, geta ekki allir á mætt á staðinn og sumir treysta sér ekki alveg til að tefla opinberlega.

Þá er um að gera að nýta sér bráðsniðuga leið og leigja hreinlega skákmeistara! Margir af bestu skákmönnum landsins hafa boðist til að tefla fyrir einstaklinga og fyrirtæki, sem vilja leggja söfnuninni lið.

Friðrik Ólafsson, fyrsti stórmeistari Íslendinga og fv. forseti FIDE, ætlar að tefla við krakkana á laugardaginn og sama máli gegnir um Jóhann Hjartarson, stigahæsta skákmann Íslands, og Jón L. Árnason, fyrsta heimsmeistara Íslendinga.

Þá mun okkar efnilegasti skákmaður, Hjörvar Steinn Grétarsson, sem skortir aðeins einn áfanga til að verða stórmeistari, leggja sitt af mörkum og verður til leigu í Kringlunni klukkan 13 á föstudaginn!

Framlög eru frjáls og fara vitanlega eftir efnum og ástæðum hjá hverjum og einum. Ráðgjafafyrirtækið GEKON reið á vaðið og tryggði sér skák með Jóhanni Hjartarsyni á 50.000 þúsund krónur.

Við hvetjum skákáhugamenn til að kynna maraþonið á sínum vinnustöðum og fá sem flest fyrirtæki til að leigja sér skákmeistara í þágu málstaðarins!

Fylgist með á Facebook-síðu þessa skemmtilega viðburðar: Hér.

Skákmaraþon í þágu Hringsins: Við erum ein fjölskylda!

Krakkarnir í Skákakademíunni bjóða gestum og gangandi á öllum aldri í Skákmaraþon í Kringlunni föstudaginn 30. nóvember og laugardaginn 1. desember næstkomandi, milli kl. 12 og 18. Tilgangurinn er göfugur: Að safna peningum til tækjakaupa fyrir Barnaspítala Hringsins.

Liðsmenn Skákakademíunnar heimsækja leikstofu Hringsins einu sinni í viku og þekkja því vel til á barnaspítalanum.

Mörg efnilegustu skákbörn og ungmenni landsins munu taka þátt í maraþoninu. Öllum sem vilja er boðið að spreyta sig gegn börnunum og leggja góðu málefni lið með frjálsum framlögum.

Krakkarnir skora á skákáhugamenn úr öllum áttum og á öllum aldri að koma í Kringluna og taka þátt í skákmaraþoninu! Þá munu fjölmargir þjóðþekktir einstaklingar koma í heimsókn í Kringluna og taka skák við krakkana.

Þau sem ekki eiga heimangengt, eða treysta sér alls ekki til að tefla sjálf, geta leigt skákmeistara á staðnum! Svo er hægt að leggja inn á söfnunarreikning vegna maraþonsins nr. 0101-26-83280, kennitala 7006083280.

Á síðasta ári söfnuðu skákkrakkarnir næstum 2 milljónum króna fyrir Rauða krossinn og rann söfnunarféð óskipt til sveltandi barna í Sómalíu.

Skákáhugamenn eru hvattir til að koma í Kringluna, leggja góðum málstað lið og sýna í verki kjörorð skákhreyfingarinnar: Við erum ein fjölskylda!

Fylgist með á Facebook-síðu þessa skemmtilega viðburðar: Hér.

Kári Elíson með tvo meistaraáfanga

Kári Elísson náði tvöföldum alþjóðlegum áfanga með frábærri frammistöðu í undankeppni níunda Evrópumóts landsliða. Þetta var fyrsti áfangi Kára að alþjóðlegum meistaratitli (IM), en árangur hans dugði jafnfram til áfanga að SIM-titli, sem er millistig milli alþjóðlegs meistara og stórmeistara í bréfskák.

Það var sigur Kára í síðustu skákinni sem innsiglaði þennan góða árangur. Sigurinn var jafnframt mikilvægur áfangi á þeirri leið að tryggja Íslandi sæti í úrslitakeppni Evrópumótsins. Það jók enn á mikilvægi skákarinnar, að hún var gegn okkar helstu keppinautum, Slóvökum. Kári tryggði sér sigurinn með skemmtilegri skiptamunsfórn í endatafli. Árangur Kára setur hann í vænlega stöðu til að ná bestum árangri keppenda á sjötta borði í keppninni.

Það er merki um mikinn uppgang í bréfskákinni hér á landi, að þetta er þriðji landsliðsmaður okkar sem nær áfanga á Evrópumótinu, sjá nánar undir slóðinni: http://www.simnet.is/chess/

Íslenska liðið hefur lengst af verið efst í sínum riðli þrátt fyrir að margar af sterkustu bréfskákþjóðum Evrópu tefli þar. Þrjú efstu liðin komast áfram í úrslitakeppnina og má segja að sigur Kára í lokaskákinni hafi farið langleiðina með að tryggja íslenska landsliðinu sæti í henni.

Hallgerður sigraði á hraðkvöldi - Björgvin vann aftur happdrættið!

Það var jöfn og spennandi barátta á hraðkvöldi Hellis sem fram fór 26 nóvember. Keppendur skiptust á að hafa forystuna en að lokum voru þrjú efst og jöfn með 5,5 vinning en það voru Hallgerður Helga Þorsteinsdóttir, Vigfús Ó. Vigfússon og Gunnar Björnsson. Í stigaútreikningnum lagði Hallgerður bæði formanninn og forsetann að velli og tryggði sér sigur og gjafabréf á Saffran.

Fór ágætlega á því að hún væri fyrir ofan þá báða eftir að hafa unnið Vigfús í næst síðustu umferð og gert jafntefli við Gunnar í lokaumferðinni. Hallgerði tókst svo að dobbla Stefán í úrdrættinum og dró Björgvin Kristbergson aftur sem fagnaði því ekki minna en síðast. Líkurnar á því að hann væri dreginn tvisvar voru rúmlega 0,3%. Hins vegar var fyrir mótin nokkru meiri líkur á því að einhver væri dreginn tvisvar. Það voru 11 sem mættu á báðar æfingarnar þannig að þetta gat gerst á 11 mismunandi vegu. 

Næsta skákkvöld í Hellisheimilinu verður næstkomandi mánudag 3. desember kl. 20. Þá verður einnig hraðkvöld.

 Röð  Nafn                              Vinningar M-Buch. Buch. Progr.

 1-3  Hallgerður Helga Þorsteinsdóttir,    5.5      19.5  27.5   22.5
      Vigfús Ó. Vigfússon,                 5.5      18.5  26.5   23.5
      Gunnar Björnsson,                    5.5      18.5  25.5   20.5
  4   Örn Leó Jóhannsson,                  5        23.0  31.5   21.0
  5   Gunnar Nikulásson,                   4.5      14.0  21.5   13.5
  6   Elsa María Kristínardóttir,          4        20.0  28.0   19.0
7-10  Hafliði Hafliðason,                  3.5      21.0  29.5   14.5
      Hermann Ragnarsson,                  3.5      17.0  24.0   15.0
      Bjarni Þór Guðmundsson,              3.5      16.0  23.0   12.5
      Jón Úlfljótsson,                     3.5      16.0  22.5   14.5
11-15 Vignir Vatnar Stefánsson,            3        24.0  32.5   16.0
      Mikhael Kravchuk,                    3        18.5  25.5   13.0
      Jon Olav Fivelstad,                  3        16.5  23.5   14.5
      Björgvin Kristbergsson,              3        15.5  22.5    7.0
      Óskar Víkingur Davíðsson,            3        14.0  20.0    9.0
16-17 Erik Daníel Jóhannesson,             2        15.0  22.0    7.0
      Jón Otti Sigurjónsson,               2        14.0  19.0    9.0

Skákdagurinn verður haldinn eftir 2 mánuði

Skákdagurinn verður haldinn hátíðlegur í annað sinn laugardaginn 26. janúar næstkomandi - á afmælisdegi Friðriks Ólafssonar.

Fyrsti Skákdagurinn sem haldinn var fyrr á þessu ári tókst frábærlega í alla staði og voru taflborðin tekin upp um allt land í fyrirtækjum, skólum, sundlaugum, kaffihúsum og rauninni hvar sem var. Teflt var í Grímsey, Borgarnesi, Blönduósi, Reykjavík og víðar. Fjöltefli, hraðskákeinvígi, sundlaugarskák, skólamót, fyrirtækjamót og fleira.

Skiptu skákviðburðurnir tugum ef ekki hundruðum. Er það einlæg von skipuleggjenda að viðtökur verði jafn góðar nú eins og í janúar.

Skólar, fyrirtæki, stofnanir og einstaklingar eru hvött til hvers kyns skákviðburða á Skákdaginn 2013.Þar sem daginn ber upp á laugardag er til valið fyrir skóla að hita upp fyrir daginn í vikunni á undan.

Fyrirspurnum og staðfestingar á viðburðum skulu sendar á [e-mail]

Í viðhengi má finna myndir af Skákdeginum 2012 og enn fleiri myndir má finna hér; http://skak.blog.is/album/skakdagur_2012/