Tan Zhongyi þarf sigur á morgun til að jafna metin

Lokaskák heimsmeistaraeinvígis kvenna fer fram á morgun. Tan Zhongyi (2522) þarf nauðsynlegra á sigri að halda til að jafna metin gegn Ju Wenjun (2571) en staðan er 5-4 fyrir þeirri síðarnefndu eftir þrjú jafntefli í röð. Wenjun dugar jafntefli jafntefli til að tryggja sér titilinn. Vinni Zhongyi tefla þær til úrslita með styttri umhugsunartíma. 

Lokaskákin hefst kl. 7:30 í fyrramálið.

Nánar um einvígið á Chess.com

Góð frammistaða Hilmis Freys í Fredericia

Kandídata-meistarinn (CM), Hilmir Freyr Heimisson (2131) tók fyrir skemmstu þátt í alþjóðlegu lokuðu skákmóti í Fredericia í Danaveldi. Hilmir Freyr hlaut 4,5 vinninga í 9 skákum. Góð frammistaða hjá Hilmi enda meðalstigin 2329 skákstig.

Hilmir gerði 5 jafntefli, vann tvær skákir og tapaði tveimur. Hilmir meðal annars lagði alþjóðlega meistarann Jens Ove Fries Nielsen (2375) að velli. 

Frammistaða Hilmis samsvaraði 2329 skákstigum og hækkar hann um 88 stig fyrir hana.

Heimasíða mótsins

Íslandsbanki (Jokko) vann sigur í Firmakeppni SA

Sunnudaginn 13. maí lauk hinni árlegu firmakeppni SA. Til úrslita kepptu 10 skákmenn fyrir jafn mörg fyrirtæki og stóðu þeir sig allir vel. Vert er að hafa í huga að úrslitin segja ekki endilega alla söguna um það hvernig men stóðu sig. Þannig tefldi Arnar Smári, sem tefldi fyrir Íslensk verðbréf, mun betur en vinningafjöldinn segir til um. Þar fer efnispiltur sem þarf aðeins meiri æfingu gegn reyndum sjóhundum.

Leikar fóru þannig að Jón Kristinn Þorgeirsson, sem tefldi fyrir Íslandsbanka, lagði alla sína andstæðinga og sigraði af öryggi.

Aðrir skákmenn reittu vinninga hver af öðrum. Í öðru sæti var Sjóvá með 7 vinninga. Fyrir tryggingafélagið tefldi Símon Þórhallsson. Í þriðja til fjórða sæti urðu jöfn að vinningum Skíðaþjónustan og Arionbanki. Fyrir þessi fyrirtæki tefldu Ólafur Kristjánsson og Áskell Örn Kárason og fengu þeir sex vinninga hvor.

Úrslit urðu sem hér segir.

Íslandsbanki (Jón Kristinn Þorgeirsson) 9 vinningar
Sjóvá (Símon Þórhallsson)  7 vinningar
Arionbanki (Áskell Örn Kárason) 6 vinningar
Skíðaþjónustan (Ólafur Kristjánsson) 6 vinningar
Litla saumastofan (Sigurður Arnarson) 5 vinningar
Matur og mörk (Haraldur Haraldsson) 4 vinningar
Kúnígúnd (Karl Egill Steingrímsson) 3,5 vinningar
Blikk og tækni (Smári Ólafsson) 3 vinningar
Tölvulistinn (Sigurður Eiríksson) 1 vinningur
Íslensk verðbréf (Arnar Smári Signýjarson) 0,5 vinningar

Vill stjórn Skákfélags Akureyrar hér með þakka öllum þeim fyrirtækjum sem studdu okkur með því að taka þátt í mótinu. Stuðningur þeirra er félaginu mjög mikilvægur. Einnig vill stjórnin þakka þeim skákmönnum sem sáu sér fært að tefla í keppninni, bæði í undanrásum og í úrslitum. Það er mikilvægt fyrir félagið að sem flestir taki þátt.

Þorsteinn fékk tvo vinninga - gerði tvö jafntefli við stórmeistara

FIDE-meistaranum, Þorsteini Þorsteinssyni (2299), gekk ekki vel á First Saturday-mótinu sem lauk í dag í Búdapest. Þorsteinn hlaut 2 vinninga í 9 skákum. Honum gekk þó vel á móti stórmeisturunum á mótinu og gerði jafntefli bæði við Eldar Gasanov (2482) og Slatko Ilinicic (2447).

Nánar um árangur Þorsteins á Chess-Results. 

• Heimasíða mótsins
• Chess-Results

Ný stjórn kosin á aðalfundi Vinaskákfélagsins í gær

Á aðalfundi Vinaskákfélagsins í gær var kosin ný stjórn. Endurkjörinn sem forseti félagsins var Róbert Lagerman til næstu 2 ára. Varaforseti var einnig endurkjörinn Hörður Jónasson, einnig Gjaldkeri Héðinn Briem og Ritari Hjálmar Sigurvaldason. Nýr meðstjórnandi var kosinn Elvar Örn Hjaltason. Varamaður 1 var kosinn Aðalsteinn Thorarensen og varamaður 2 var svo Jóhann Valdimarsson.

Lagabreytingar urðu á 7 grein og hljóðar hún svona:

7 grein: Vinaskákfélagið skal vera með bankareikning. Ekkert árgjald er og Vinaskákfélagið er ekki með þátttökugjöld á mánudags skákmótum í Vin, Hverfisgötu 47, 101 Reykjavík. Aftur á móti geta meðlimir styrkt félagið með frjálsum framlögum á heimasíðu þess undir linknum „Styrktarreikningur“.

Varaforseti las upp Skýrslu stjórnar og kemur hún hér fyrir neðan.

Skýrsla stjórnar á aðalfundi félagsins 14 maí 2018.

Góðan daginn félagar.

Þessi skýrsla stjórnar nær frá aðalfundi 4 maí 2017 til aðalfundar 14 maí 2018.

Margt hefur verið gert á þessum tíma og hefur Vinaskákfélagið verið virkt á tímabilinu. Breytingar urðu á stjórn félagsins á aðalfundi 4 maí 2017.

Nýr Ritari var kosinn Hjálmar Hrafn Sigurvaldason, en fv. Ritari fór í Varamann 1. Varamaður 2 var síðan kosinn Þorvaldur Ingveldarson.

Aðrir stjórnarmenn voru endurkjörnir eða Varaforseti Hörður Jónasson, Gjaldkeri Héðinn Briem og meðstjórnandi Ingi Tandri Traustason. Forseti félagsins þarf ekki að kjósa nema á 2 ára tímabili og þurfti ekki að kjósa hann 2017.

Nokkrir nýir félagar komu inn í Vinaskákfélagið á tímabilinu og er félagatalið núna 103 félagar.

2 félagar okkar eða Forseti vor Róbert Lagerman var endurkjörinn sem Ritari á aðalfundi Skáksambandsins þann 27 maí 2017. Á sama fundi var varaforseti Hörður Jónasson kjörinn varamaður 4.

Í byrjun tímabilsins voru miklar áhyggjur stjórnarmanna af miklum skuldum Vinaskákfélagsins og lögðu menn höfuðið í bleyti hvað væri til ráða.

Varaforseti kom með þá tillögu að sækja um styrk hjá Geðhjálp og í framhaldi að halda fjöltefli þar sem fólk frá athvörfum og eða búsetukjörnum tækju þátt. Á stjórnarfundi sem haldið var 12 júní var samþykkt að varaforseti skyldi sækja um styrk hjá Geðhjálp að upphæð 100.000 kr., og var styrkveitingin samþykkt hjá Geðhjálp. Styrkurinn var þó skilyrtur að hann færi í undirbúning fjölteflisins.

Við undirbúninginn þá voru keyptar 10 skákklukkur (2 stjórnarmenn keyptu síðan 2 klukkur af félaginu, þannig að félagið fékk 8 skákklukkur).

Fjöltefli Geðhjálpar og Vinaskákfélagsins fór svo fram 21 ágúst 2017 og tókst vel.

Áfram var haldið með áskriftarkerfi Hollvina á tímabilinu, en það hófst um jólin 2016. Núna á vormánuðum kom svo í ljós að áskriftarkerfið var að hruni komið, þar sem áhugi var engin og var ákveðið á stjórnarfundi 5 apríl að hætta með það.

Þar sem styrkurinn frá Geðhjálp var skilyrtur, þá þurfti Vinaskákfélagið enn á rekstrarfé að halda og komu Forseti félagsins Róbert Lagerman og Verndari Hrafn Jökulsson, sumarið 2017 að máli við þáverandi Heilbrigðisráðherra Óttarr Proppe og sóttu um styrk hjá Velferðaráðuneytinu. Það var svo í Október 2017 sem gleðilegt svar kom og fengum við styrk að upphæð 250.000 kr., sem kom sér vel.

Að lokum í sambandi við styrk umsóknir, þá sótti stjórn félagsins um styrk til Velferðasviðs Reykjavíkurborgar fyrir 1 október 2017. Svar kom seinni hluta febrúar og fengum við styrk að upphæð 200.000 kr.

Þess má geta að 16 apríl 2018 barst Vinaskákfélaginu höfðingleg bókagjöf, en það eru margir árgangar af Tímaritinu Skák sem Róbert Gestsson átti og batt inn, en hann var mikill áhugamaður um skák. T.d. var í því fyrsti árgangur Tímaritinu skákar árið 1947. Dætur hans Ingveldur, Guðný og Kristín gáfu okkur tímaritin með von um að félagið okkar gæti nýtt sér það.

Þá er komið að skákmótum og viðburðum félagsins tímabilið maí 2017 til maí 2018.

Fyrsta skákmótið var Opna Meistaramótið í hraðskák sem haldið var í Vin, Hverfisgötu 47. Fjöldi manns tók þátt í mótinu eða 26 manns, en það var haldið bæði úti og inn í Vin í góðu veðri. Róbert Lagerman er hraðskákmeistari félagsins. Næsta mót var svo Geðhjálparmótið 21 ágúst 2017 sem var haldið í húsnæði Geðhjálpar, en eins og áður segir tóku fólk frá athvörfum og Búsetukjörnum þátt, en stjórnarmennirnir Hörður og Hjálmar tefldu við þá.

Á haustmánuðum 2017 kom til tals milli stjórnar félagsins og Arnljótar Sigurssonar félagi í Vinaskákfélaginu og starfsmaður á Hotel Hlemmi Square hvort Vinaskákfélagið gæti haldið hraðskákmót á Hlemmi Square. Voru haldin 3 skákmót á Hlemmi Square fyrir jól 2017. Ekki varð framhald á mótaröðinni eftir áramótin, þar sem Arnljótur flutti sig á annan bar. Það kemur svo í hlut nýrrar stjórnar / mótanefndar hvort þetta verður endurvakið næsta haust, en þessi mót tókust mjög vel og var t.d. á síðasta mótinu 27 manns.

Fyrir utan þetta þá hélt Vinaskákfélagið 2 mót í Vin þ.e. Haustmótið og Jólaskákmótið. Á Haustmótinu þá sigraði Jón Torfason sem var að koma aftur að tefla fyrir félagið eftir langt hlé. Á jólamótinu sigraði forseti vor Róbert Lagerman.

Eitt af því sem Vinaskákfélagið sér um ásamt Taflfélagi Reykjavíkur er Alþjóðlega Geðheilbrigðis skákmótið, en það var haldið í kringum alþj.lega geðheilbrigðis daginn sem er 10 október. Mótið 2017 var haldið 12 október í húsnæði TR.

Annað sem Vinaskákfélagið er hvað stoltastur af að halda ásamt Hróknum, er Jólaskákmótið á Kleppi, en það er haldið oftast síðustu vikuna fyrir jól. Á því móti keppir fyrir utan Vinaskákfélagið, deildir frá kleppi, athvörfum og búsetukjörnum og einnig geðdeild Landsspítalans. Keppt er í 3 manna liðum og er þetta eitt af skemmtilegustu skákmótum ársins.

Eitt aðalskákmótið sem Vinaskákfélagið tekur þátt í á ári hverju er Íslandsmót skákfélaga, en þar koma fram frá öllu landinu milli 300 til 400 skákmenn og konur. Vinaskákfélagið tefldi fram 3 sveitum, en A sveitin tefldi í 2 deild og náði 3 sætinu. B sveitin tefldi í 3 deild og varð í 5 sæti og C sveitin tefldi í 4 deild og varð í miðjum hópi skáksveita. Íslandmótið er teflt í 2 hlutum þ.e. á haustin og vorin eða oftast í Okt., og mars.

Eftir áramótin voru haldin 3 skákmót í Vin eða Nýársskákmótið 8 janúar sem Jón Torfason sigraði á, Friðriksmótið sem var haldið 29 janúar, sem Róbert Lagerman sigraði á og svo Páskamótið 9 apríl sem Patrick Karcher sigraði á.

Aftur á mótið var frestað að halda Meistaramótið í Atskák sem átti að vera í febrúar 2018 og kemur það í hlut nýrrar mótanefndar að skoða það hvenær hægt er að halda það.

Að lokum má nefna það að í ár 2018, er afmælisár Vinaskákfélagsins en þá er félagið 15 ára. Félagið var s.s. stofnað árið 2003. 

Kveðja Varaforseti Hörður Jónasson.

Meistaramót TRUXVA á annan í hvítasunnu – 21.maí

Meistaramót Truxva fer fram annan í hvítasunnu, þann 21. maí, en þetta er í annað sinn sem mótið er haldið. Truxvi, ungliðahreyfing TR, býður TR-ingum af öllum stærðum og gerðum, auk nokkurra velunnara ungliðahreyfingarinnar, til að taka þátt í þessu skemmtilega og öfluga hraðskákmóti. Tefldar verða 11 umferðir og notast verður við alþjóðlegu hraðskáktímamörk Fide, 3 mínútur á mann og 2 sekúndur bætast við eftir hvern leik (3+2). Mótið verður reiknað til hraðskákstiga. Mótið hefst klukkan 19:30 og skráningu lýkur kl.19:20. Frítt er í mótið og kaffi á könnunni fyrir þátttakendur.

Sigurvegarinn árið 2017 var IM Arnar Gunnarsson með 10 vinninga í 11 skákum. Í 2.sæti varð IM Einar Hjalti Jensson með 8,5 vinning og þriðji varð FM Oliver Jóhannesson með 8 vinninga. Öll úrslit og lokastaða mótsins má finna á Chess-Results.

Opnað hefur verið fyrir skráningu og eru skákmenn beðnir um að skrá sig á vefnum til að auðvelda skipulagningu mótsins.

Ju Wenjun með forystu í heimsmeistaraeinvígi kvenna

Heimsmeistaraeinvígi kvenna fer fram þessa dagana í Chongqing í Kína. Tvær kínverskar stúlkur tefla um heimsmeistaratitilinn. Eftir sjö skákir af tíu hefur Ju Wenjun hlotið fjóra vinninga gegn þremur vinningum Tan Zhongyi.

Einvíginu verður framhaldið 15., 16. og 18. maí með þremur síðustu skákunum.

Nánar um einvígið á Chess.com

Hraðskákmót öðlinga: Þrír sigurvegarar – Gunnar Freyr Hraðskákmeistari

Gríðarlega jafnt og spennandi Hraðskákmót öðlinga fór fram síðastliðið miðvikudagskvöld en 27 keppendur mættu til leiks sem er nokkuð meiri þátttaka en síðustu ár. Úrslit urðu á þá leið að Gunnar F. Rúnarsson, Jóhann H. Ragnarsson og Ólafur B. Þórsson komu jafnir í mark með 7 vinninga af níu. Eftir útreikning mótsstiga hlaut Gunnar gullið, Jóhann silfrið og Ólafur bronsið. Gunnar Freyr er því Hraðskákmeistari öðlinga 2018. Halldór Pálsson varð fjórði með 6,5 vinning en síðan fylgdu fjórir keppendur með 5,5 vinning.

Það rættist vel úr þátttöku eftir að forskráning hafði verið helst til róleg og var því ákveðið að fjölga umferðum úr sjö í níu. Úr varð afar fjörug keppni og má nefna að um tíma var nokkuð um ólöglega leiki og reyndi því á hina nýju reglu Fide sem kveður á um að einn slíkur leikur sé leyfður í hraðskák en bæta skuli einni mínútu við tíma andstæðingsins. Vel gekk að fara eftir hinni nýju línu og hafði þetta ekki teljandi áhrif á gang mótsins.

 

Fyrir lokaumferðina var Gunnar Freyr efstur með 7 vinninga en Jóhann og Ólafur komu næstir með 6 vinninga og dugði Gunnari því jafntefli. Svo fór þó að hann tapaði sinni viðureign á með þeir síðarnefndu höfðu sigur á sínum andstæðingum og því voru þeir allir með 7 vinninga sem er nokkuð óvenjulegt í níu umferða móti. Þá var stuðst við mótsstigin (tiebreaks) sem voru hin sömu og í Skákmóti öðlinga og þar stóð Gunar best eins og fyrr segir. Til gamans má geta þess að í þessu tilfelli hefðu innbyrðis viðureignir ekki nýst til að skera úr um sigurvegara þar sem þeir voru allir með 1 vinning sín í milli.

Auk verðlauna fyrir hraðskákmótið voru veitt verðlaun fyrir Skákmót öðlinga en þar sigraði Fide-meistarinn, Sigurbjörn J. Björnsson. Þorvarður F. Ólafsson varð annar og Lenka Ptacnikova þriðja. Heildarúrslit má sjá á Chess-Results.

Ársreikningur SÍ 2017

Ársreikningur Skáksambands Íslands fyrir árið 2017 er aðgengilegur en aðalfundur SÍ fer fram 26. maí nk. Fundurinn fer fram í húsnæði TR, Faxafeni 12, og hefst kl. 10. 

Ársreininginn má nálgast hér. 

Skákþáttur Morgunblaðsins: Íslensku stúlkurnar hlutu þrenn verðlaun á NM í Borgarnesi

Íslendingar unnu til þrennra verðlauna á vel heppnuðu Norðurlandamóti stúlkna sem fram fór í Borgarnesi um síðustu helgi. Nansý Davíðsdóttir varð Norðurlandameistari í flokki keppenda 16 ára og yngri, en Nansý, sem er margfaldur Norðurlandameistari, varð eftir stigaútreikning hlutskörpust þeirra fimm sem fengu flesta vinninga.

Batel Goitom Haile fékk silfur í flokki keppenda 13 ára og yngri þó að hún hafi unnið gullverðlaunahafann, Amelíu Nordquelle, í innbyrðis viðureign. Þær hlutu fjóra vinninga af fimm mögulegum.

Þá hreppti Veronika Steinunn Magnúsdóttir bronsið í elsta flokknum, þar sem keppendur voru 20 ára og yngri.

Í flokkunum þremur áttu Íslendingar níu fulltrúa en alls voru keppendur 33 talsins. Norðmenn, sem sigla á bylgju mikils skákáhuga, unnu tvenn verðlaun og Svíar einnig. Finnar fengu ein silfurverðlaun og Danir ein bronsverðlaun.

Aðstæður á mótstað voru til mikillar fyrirmyndar. Á mótinu tóku þátt nokkrar kornungar stúlkur sem ekki hafa áður keppt í móti með fullum umhugsunartíma. Lokaorðið á Nansý með fléttu úr 1. umferð: 

Nansý Davíðsdóttir – Ingrid Skaslien

Svartur lék síðast 32. ... Db6-b4 en nú kom...

33. Hxe6+! Kxe6 34. Dd5 mát!

 

Heimsmeistarinn sigraði á minningarmótinu um Vugar Gashimov

 

Magnús Carlsen bætti skrautfjöður í hattinn er hann vann minningarmótið um Aserann Vugar Gashimov sem lauk í borginni Shamkir í Aserbaídsjan um síðustu helgi. Jafnteflunum bókstaflega rigndi niður í byrjun en það var Veselin Topalov sem tók af skarið og vann fyrstu skákina í fjórðu umferð. Svo hrökk Magnús Carlsen í gang, vann þrjár mikilvægar skákir og mótið. Lokastaðan: 1. Magnús Carlsen 6 v. (af 9) 2. Ding 5½ v. 3. Karjakin 5 v. 4.-7. Radjabov, Mamedjarov, Wojtaszek og Giri 4½ v. 8.-9. Topalov og Mamedov 4 v. 10. Navara 2½ v.

Í næstsíðustu umferð vann Magnús hollensku „jafnteflisvélina“ Giri, en sá hefur oft reynst honum erfiður. Þeir deildu sigrinum í Wijk aan Zee í ársbyrjun og margir spáðu jafnteflisúrslitum er þeir mættust nú. En Magnús tefldi frábærlega vel og vann eina bestu skák ársins:

Shamkir 2018; 8. umferð:

Anish Giri – Magnús Carlsen

Enskur leikur

1. c4 e5 2. Rc3 Rf6 3. Rf3 Rc6 4. g3 d5 5. cxd5 Rxd5 6. Bg2 Rb6 7. O-O Be7 8. a3 a5 9. d3 O-O 10. Be3 Be6 11. Hc1 a4!?

Peðsfórn sem áður hafði sést í skák Nepo og Aronjan í fyrra. Ekkert er nýtt undir sólinni.

12. Rd2 f5 13. Bxb6 cxb6 14. Rxa4 Bg5 15. Rc3 e4!

Hér er hugmyndin komin fram.

16. Kh1 Dd7 17. Hb1 Had8 18. Rc4 Df7 19. b3

Að hirða b6-peðið væri glapræði, 19. Rb6 Bb3 20. De1 exd3 21. exd3 Hfe8 og drottningin á engan reit.

19. ... exd3 20. exd3 f4 21. Re4 Be7 22. gxf4 Dxf4 23. a4 Rb4 24. De2 Dh6 25. Hbd1 Rd5 26. Hg1 Kh8 27. Bf1 Hf4 28. Re5 Hdf8 29. f3 Hh4 30. d4 Rf4!

Tínir upp tvö peð, veikleikarnir á svörtu reitunum hafa kostað sitt.

31. Dd2 Bxb3 32. Hb1 Bxa4 33. Bb5 Bxb5 34. Hxb5 De6 35. Db2 Bd8! 36. Rg5 De8 37. Hb3 Bxg5 38. Hxg5 Re6 39. Hg4 Hxg4 40. fxg4 Dd8!

Banvæn sending frá enda vallarins! Svartur hótar 41. ... Dd5+.

41. Hh3

Skásta úrræðið var kannski 41. Hf3 en eftir 41. ... Hxf3 42. Rxf3 Dd5 43. Dc3 h6 verður erfitt að ráða við b-peð svarts.

41. ... Dd5 42. Kg1 De4 43. Db4 Hf6!

Hótar 44. ... Rf3. Það finnst engin vörn og Giri gafst því upp.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 2. maí 2018

Skákþættir Morgunblaðsins