Skákdagurinn í Kerhólaskóla

Skákdagur Íslands tókst afar vel í Kerhólsskóla. Við erum lítill leik- og grunnskóli á Borg í Grímsnesi, með tæplega 60 nemendur alls, niður í 1 árs börn. Björn Þorfinnsson skákmeistari heimsótti okkur eftir hádegi og spjallaði við nemendur í grunnskóladeildinni og elsta hóp leikskólans um skákina. Krakkarnir voru afar áhugasamir áheyrendur enda fróðlegt og skemmtilegt að hlusta á Björn.

Að því loknu tók hann hraðskák við þrjá nemendur, hann fékk 13 sekúndur en nemendur þrjár mínútur! Björn var nú fljótur að vinna fyrstu tvo en sá þriðji stóð aðeins í honum og náði að fella Björn á tíma. Var Samúel, nemandinn í 8. bekk að vonum ánægður með sig.

Eftir að nemendur höfðu spreytt sig við taflið í nokkurn tíma undir leiðsögn skákmeistarans og kennara, tefldi Björn fjöltefli við allan hópinn. Áhugi á skák er töluverður í Kerhólsskóla og hefur aukist aftur mikið síðustu daga. Í skólanum eru komin skákborð víða og nemendur nota hvert tækifæri til að tefla. Við í Kerhólsskóla þökkum kærlega fyrir þessa ánægjulegu heimsókn og ætlum að rækta skákáhugann áfram með nemendum okkar.

Guðmundur með annan frábæran sigur - mætir Svidler - Hannes mætir Topalov!

Guðmundur Kjartansson (2468) heldur áfram frábæru gengi á alþjóðlega mótinu í Gíbraltar. Í þriðju umferð sem fram fór í dag vann hann paragvæska stórmeistarann Axal Bachmann (2629) í mjög vel tefldri skák. Hannes Hlífar Stefánsson (2570) lét sér hins vegar duga jafntefli gegn rússneska stórmeistaranum og sigurvegara Gíbraltar-mótsins í fyrra Nikita Vitiugov (2735).

Guðmundur hefur fullt hús en Hannes hefur 2,5 vinning. 

Andstæðingar morgundagsins eru ekki að verra taginu en Guðmundur teflir við Peter Svidler (2739) og Hannes teflir við Veselin Topalov (2800) stigahæsta keppenda mótsins, fjórða stigahæsta skákmann heims,og fyrrum heimsmeistara í skák. 

Ritstjóri telur, þó ekki að fullrannsökuðu máli, að þetta sé í fyrsta skipti að íslenskur skákmaður tefli við skákmann sem hafi 2800 skákstig eða hærri.

Rétt er að benda skákáhugamönnum á Facebook-hópinn "Íslenskir skákmenn" en þar má gera ráð fyrir að skákir dagsins verði skeggræddar á meðan þær eru í gangi.

Umferð dagsins hefst kl. 14 og er mælt með að skákáhugamenn byrgi sig upp með poppi og Pepsi Max. 

Feðginin Magnús Kristinsson (1744) og Veronika Steinunn Magnúsdóttir (1566) taka einnig þátt. Þau hafa hálfan vinning.

Alls taka 253 frá 46 löndum þátt í efsta flokki mótsins. Þar eru 72 stórmeistarar. Hannes er nr. 40 í stigaröð keppenda en Guðmundur er nr. 82.

• Heimasíða mótsins
• Beinar útsendingar (hefjast kl. 14)
• Skákskýringar

Haldið upp á Skákdaginn í Melaskóla

Mánudaginn sl. var haldið upp á skákdaginn með taflmennsku víða um land. Dagurinn er til heiðurs Friðriki Ólafssyni, fyrsta stórmeistara Íslendinga í skák. Friðrik fæddist 26. janúar 1935 og var því 80 ára þann. Hann er án efa sá íslenski skákmaður sem mestum frama hefur náð í greininni.

Í Melaskóla var haldið fjöltefli í Skálanum. Nemendur í 6. bekk  tefldu fjöltefli við nemendur í 2. og 3. bekk. Björn Pétursson fyrrverandi skólastjóri  tefldi fjöltefli við nemendur í 4. og 5. bekk. Það var svo Harpa Ingólfsdóttir skákkona og Íslandsmeistari kvenna 2000 og 2004 sem tefldi fjöltefli við nemendur í  6. og 7. bekk. Thor, Tómas og Ingi náðu lengstu skákunum gegn Hörpu en máttu að lokum játa sig sigraða eins og allir aðrir keppinautar hennar.

Á skákdeginum var teflt um allt land; í skólum, fyrirtækjum, kaffihúsum, skipum, sundlaugum, taflfélögum, skákklúbbum og víðar. Allir tefla; konur og karlar, ungir og gamlir, atvinnumenn og áhugamenn, enda eru kjörorð skákhreyfingarinnar VIÐ ERUM EIN FJÖLSKYLDA.

Toyota-skákmót eldri borgara.

Á morgun föstudaginn 30 janúar verður Toyotaskákmót eldri borgara haldið í höfuðstöðvum Toyota í Kauptúni Garðabæ. Að mótinu standa eldri skákmenn á stór Reykjavíkursvæðinu það Æsir skákfélag eldri borgara í Reykjavík og Riddarinn skákfélag eldri borgara í Hafnarfirði.

Þetta er áttunda Toyotamótið sem er haldið. Fyrsta mótið fór fram í Stangarhyl 4 félagsheimili F E B í Reykjavík 2008. Hin hafa öll verið haldin í söludeild  Toyota

Toyota gefur öll verðlaun, sem eru vegleg teflt er um veglegan farandbikar.

Það eru rúmlega 30 skákmenn skráðir til leiks núna.Þeir sem ætla að vera með en hafa ekki skráð sig ennþá eru beðnir að skrá sig í netf. [e-mail] og í [e-mail]

Mótið byrjar kl. 13.00. Tefldar verða 9 umferðir með 10. mín. umhugsunartíma.

Frikkinn 2015 fer fram á föstudagskvöld!

Frikkinn 2015  fer fram nú á föstudagskvöldið á fyrsta skemmtikvöldi ársins og hefst það kl. 20.00

Taflfélag Reykjavíkur bíður til veislu Friðriki Ólafssyni til heiðurs.  Tefldar verða stöður úr skákum afmælisbarns vikunnar og heiðursborgara Reykjavíkur.  Við hvetjum alla skákmenn til að heiðra Friðrik með þáttöku, og um leið gefst frábært tækifæri til að tefla stöður úr sumum af mögnuðustu skákum meistarans okkar.

Fyrirkomulagið verður eftirfarandi:

1. Tefldar verða stöður úr skákum Friðriks Ólafssonar
2. Tefldar verða 12 skákir með 5 mínútna umhugsunartíma
3. Keppendur tefla innbyrðis eina skák með hvítt og eina skák með svart. (2. skáka viðureign milli keppenda)
4. Tvær stöður úr skákum Friðriks verða í boði í hverri viðureign.  Sá sem stýrir svörtu mönnunum í hvorri skák velur hvor staðan er tefld!  Hvítur á alltaf fyrsta leik í stöðunum.
5. Stöðurnar geta bæði verið úr þekktum byrjunum eða þegar þeim sleppir.
6. Gerð verða eitt eða tvö hlé til Billjardbarsferða meðan á mótinu stendur.
7. Verðlaun:
   1.sæti 8000 króna úttekt á billjardbarnum í formi veitinga.
   2.sæti 5000 króna úttekt á Billjardbarnum í formi veitinga.
   3.sæti 2000 króna úttekt á Billiardbarnum í formi veitinga.
8. Þátttaka á þetta sérstaka skemmtikvöld er ókeypis.
9. Aldurstakmark er 20 ár og rétt er að geta þess að áfengisbann ríkir í húsakynnum Taflfélagsins.
10. Sigurvegarinn hlítur nafnbótina Frikkinn 2015
    

Tekið skal fram að í vor verður haldin skemmtikvöldakóngakeppni þar sem Mórinn 2014,Karlöndin 2014, Úlfurinn 2014, Frikkinn 2015 og aðrir sigurvegarar skemmtikvöldanna munu mætast í uppgjöri þeirra bestu.

Verið velkomin!

Friðrik Ólafsson heiðursborgari Reykjavíkur

Dagur B. Eggertsson borgarstjóri sæmdi Friðrik Ólafsson stórmeistara í skák, heiðursborgaranafnbót  við hátíðlega athöfn í Höfða, í gær. Friðrik Ólafsson er sjötti einstaklingurinn sem gerður er að heiðursborgara Reykjavíkurborgar. Þeir sem hlotið hafa þessa nafnbót áður eru; séra Bjarni Jónsson árið 1961, Kristján Sveinsson augnlæknir árið 1975, Vigdís Finnbogadóttir árið 2010, Erró árið 2012 og Yoko Ono árið 2013.

Með því að sæma Friðrik Ólafsson heiðursborgaratitli vill Reykjavikurborg þakka Friðriki fyrir árangur hans og afrek á sviði skáklistarinnar. Dagur B. Eggertsson borgarstjóri sagði það vel við hæfi að heiðra Friðrik á áttræðisafmælinu, en hann átti afmæli þann 26. janúar sl. Dagur sagði að áhugi á skák væri óvíða meiri en á Íslandi og líklega hefði enginn Íslendingur haft jafn mikil áhrif á skákíþróttina hérlendis og Friðrik Ólafsson. Hans dýrmæta framlag til íslenskrar menningar væri þakkarvert.

Stórmeistarar fjölmenntu í Höfða til að fagna heiðursborgara Reykjavíkur

Í ræðu borgarstjóra kom fram að Friðrik hafi ungur að árum sýnt óvenjulega dirfsku og hugkvæmni og í skákum hans hafi hann sýnt meiri tilþrif en menn áttu að venjast. Hann var ungur að árum eða aðeins 17 ára gamall þegar hann varð Íslandsmeistari, 18 ára Norðurlandameistari og stórmeistari í skák árið 1958 fyrstur íslenskra skákmanna.

Friðrik lauk lögfræðiprófi frá Háskóla Íslands og starfaði hjá dómsmálaráðuneytinu áður en hann varð atvinnumaður í skákíþróttinni árið 1974. Friðrik var forseti alþjóðaskáksambandsins FIDE á árunum 1978-1982 og að því loknu starfaði hann sem skrifstofustjóri Alþingis. Á sínum skákferli vann Friðrik allmörg alþjóðleg skákmót, varð skákmeistari Norðurlanda og sex sinnum varð hann Íslandsmeistari.

Friðrik þakkaði fyrir heiðursnafnbótina og sagði að sér þætti vænt um titilinn því honum þætti vænt um Reykjavík. Hann sagðist oft hafa gengið fram hjá Höfða þegar hann var ungur að árum á leið í og úr skóla og aldrei hefði honum dottið í hug að 70 árum seinna stæði hann einmitt í Höfða og tæki við heiðursnafnbót.

Gunnar Björnsson, forseti Skáksambands Íslands, tilkynnti að Skáksambandið hefði stofnað sjóð, Friðrikssjóð, sem yrði varið til að styrkja unga skákmenn. Þá færði hann Friðriki einnig heiðursskjal frá  alþjóðaskáksambandinu FIDE þar sem hann er gerður að heiðursfélaga sambandsins.

Sjá nánar á vefsíðu Reykjavíkurborgar.

Stefán, Jón Viktor og Björn efstir á Skákþingi Reykjavíkur

Stefán Kristjánsson (2492), Jón Viktor Gunnarsson (2433) og Björn Þorfinnsson (2373) eru efstir og jafnir með 6½ vinning að lokinni áttundu og næstsíðustu umferð Skákþings Reykjavíkur sem fram fór í gær. Athyglisvert er að þeir töpuðu allir óvænt í þriðju umferð en hafa heldur betur náð vopnum sínum. Stefán og Jón Viktor gerðu jafntefli í innbyrðis skák í gær en Björn hafði betur gegn Oliver Aroni Jóhannssyni (2170).

Dagur Ragnarsson (2059), Mikael Jóhann Karlsson (2077) og Jón Trausti Harðarson (2067) eru í 4.-6. sæti með 6 vinninga.

Sem fyrr var nokkuð um óvænt úrslit. Örn Leó Jóhannsson (2048) endurtók góð úrslit frá Gestamóti Hugins og Breiðabliks og gerði jafntefli við Guðmund Gíslason (2315).

Í lokaumferðinni, sem fram fer á sunnudag, mætast meðal annars Jón Viktor-Björn, Mikael Jóhann-Stefán og Jón Trausti-Dagur. 

Sú sérkennilega staða getur komið að tveir eða fleiri verði jafnir og efstir án þess að hafa mæst. 

 

• Heimasíða TR
• Chess-Results
• Myndaalbúm (GB)

Skákdagurinn í Waldorf skólanum

Skákdagurinn var víða haldinn hátíðlegur á áttræðisafmæli Friðriks Ólafssonar, 26. janáur sl. Þar á meðal í Waldorf skólanum Sólstöfum.

Sjón er sögu ríkari.

Guðmundur með mjög góðan sigur í gær - Hannes vann líka

Guðmundur Kjartansson (2468) vann pólska stórmeistarann Mateusz Bartel (2631) í annarri umferð Gíbraltar-mótsins í gær í mjög vel tefdri skák. Hannes Hlífar Stefánsson lagði þýska alþjóðlega meistarann Arno Zude (2377) að velli. Báðir hafa þeir 2 vinninga að loknum tveimur umferðum. 

Þriðja umferð hefst í dag kl. 14 og verða þeir báðir í beinni. Hannes teflir við rússneska stórmeistarann Nikita Vitiugov (2735) og Guðmundur við paragvæska stórmeistarann Axal Bachmann (2629).

Alls taka 253 frá 46 löndum þátt í efsta flokki mótsins. Þar eru 72 stórmeistarar. Hannes er nr. 40 í stigaröð keppenda en Guðmundur er nr. 82.

• Heimasíða mótsins
• Beinar útsendingar (hefjast kl. 14)
• Skákskýringar

Tvö stúlknamót fara fram um helgina

Íslandsmót grunnskólasveita 2015 - stúlknaflokkur

Íslandsmót grunnskólasveita 2015 - stúlknaflokkur fer fram laugardaginn 31. janúar nk. í Rimaskóla, Reykjavík.

Hver skóli má senda fleiri en eina sveit. Hver sveit er skipuð fjórum keppendum (auk varamanna).  Mótið hefst kl. 12  og tefldar verða 7 umferðir með 10 mínútna umhugsunartíma.

Veitt verða sérstök verðlaun fyrir sveitir sem eingöngu hafa á skipa nemendum úr 1.-3. bekk. Mæti a.m.k. fjórar slíkar sveitir tefla þær í sér flokki.

Þátttökugjöld eru 5.000 kr. per sveit en þó að hámarki kr. 10.000 per skóla.  

Skráning fer fram á Skák.is. Upplýsingar um skráðar sveitir má nálgast hér.

Íslandsmót stúlkna 2015 - einstaklingskeppni

Íslandsmót stúlkna 2015 - einstaklingskeppni fyrir stúlkur á grunnskólaaldri fer fram, sunnudaginn 1. febrúar, í Rimaskóla og hefst kl. 11.

Veitt verða þrenn verðlaun í öllum flokkum en teflt er fimm flokkum.

• 8.-10. bekkur (1999-2001)
• 5.-7. bekkur (2002-2004)
• 3.-4. bekkur (2005-2006)
• 1.-2. bekkur (2007-2008). (Jafnframt mega yngri stelpur tefla.)
• Peðaskák (leikskólaaldur og fyrir þær sem ekki treysta sér ekki í hefðbundna skák)

Tefldar verða 10 mínútna skákir - umferðafjöldi fer eftir fjölda þátttakenda.

Samhliða mótinu verður tefld Peðaskák sem er ætlað ungum keppendum sem hafa nýlega byrjað að tefla.

Allir keppendur fá Prins Póló í lok mótsins!

Þátttökugjöld eru 500 kr. á keppenda. Systur greiða þó ekki meira en 750 kr.

Skráning fer fram á Skák.is. Upplýsingar um skráðar keppendur má nálgast hér.

Skráningar í sveitakeppnina er fram til 29. janúar en opið verður fyrir skráningu í einstaklingskeppnina fram að mótsbyrjun. Mælt er samt með að stelpurnar skrái sem fyrst til leiks.