Viltu taka þátt í skákævintýrinu mikla og vera sjálfboðaliði á EM?

Bragi Halldórsson og Donika Kolica verða meðal sjálfboðaliða á EM. Hvað með þig?

Skáksamband Íslands mun í vetur ráðast í eitt stærsta verkefni íslenskrar skáksögu þegar Evrópumeistaramót landsliða verður haldið í Laugardalshöllinni dagana 12. – 22. nóvember. Framkvæmdin er gríðarlega umfangsmikil. Skáksambandið leitar um þessar mundir að sjálfboðaliðum til að starfa við mótið. Ýmis störf eru í boði og verður unnið á tveimur vöktum. Önnur vaktin er frá 14:00 – 18:00 og hin frá 18:00 – 21:00. Sjálfboðaliðarnir munu m.a. vinna við miðasölu, móttöku keppenda, veitingasölu, vörslu verðmæta,uppsetningu og frágang, upplýsingagjöf og öryggisgæslu.

Óskað er eftir 50-60 sjálfboðaliðum en nú þegar eru sjálfboðaliðar þegar orðnir 35 talsins. Skráning verður opin til 8. október. Fundir með sjálfboðaliðum verða haldnir sunnudaginn 11. október. Annar klukkan 13:00 og hinn 20:00 en farið verður yfir sömu atriði á fundunum og geta sjálfboðaliðar valið hvorn fundinn þeir sækja.

Skáksambandið mun leggja mikla áherslu á góðan aðbúnað sjálfboðaliða. Þeir munu fá góða leiðsögn og þjálfun svo störfin verði sem auðveldust að vinna. Sérstakt herbergi í Höllinni verður tekið frá fyrir sjálfboðaliða þar sem þeir geta hvílst og notið veitinga. Þeir sjálfboðaliðar sem taka sjö vaktir eða fleiri fá boð á lokhóf mótsins, veglega gjöf frá Skáksambandinu að móti loknu og boð á uppskeruhátíð mótsins í desember þar sem landsliðsmenn munu koma í heimsókn og fara yfir þátttöku sína á mótinu. Allir sjálfboðaliðar fá gefins minjagrip mótsins.

Skáksambandið hvetur fólk á öllum aldri til að skrá sig sem sjálfboðaliða og taka þátt í því skákævintýri sem framundan er.

Bragi Halldórsson og Donika Kolica ætla bæði að vera sjálfboðaliðar á EM!  Viltu slást í hópinn?

Skráning hér.

 

Huginn með hálfs vinnings forskot á TR eftir fyrri hlutann

Skákfélagið Huginn hefur hálfs vinnings forskot á Taflfélag Reykjavíkur að loknum fyrri hluta Íslandsmóts skákfélaga sem fram fór um helgina í Rimaskóla. Í fimmtu umferð unnu Huginsmenn Taflfélag Bolungarvík 6-2 en á sama tíma vann Taflfélag Reykjavíkur Skákdeild Fjölnis 5½-2½. Skákfélag Akureyrar sem vann stórsigur á Skákdeild Kr, 7-1, er í þriðja sæti. 

Önnur úrslit urðu þau að Víkingaklúbburinn vann b-sveit Akureyringa 4½-3½ og b-sveit Hugins vann b-sveit TR 5-3. 

Fallbaráttan í deildinni getur orðið jöfn og spennandi en þrjú lið eru neðst með 12½ vinning.

Stöðuna má nálgast á Chess-Results.

2. deild

Skákfélag Reykjanesbæjar hefur 5 vinninga forystu í 2. deild. Sveitin hefur 19 vinninga c-sveit TR er í öðru sæti með 14 vinninga og Taflfélag Garðabæjar er í þriðja sætm með 13½.

Fallbaráttan í deildin getur orðið mjög spennandi en aðeins munar vinningi á fjórum neðstu liðunum. 

Sjá Chess-Results.

3. deild

Vinaskákfélagið hefur fullt hús - hefur unnið allar sínar viðureignir. C-sveit Skákfélags er í öðru sæti með 6 vinninga og b-sveit KR er í þriðja sæti með 5 vinninga.

Sjá Chess-Results.

4. deild

Hrókar alls fagnaðar fara mikinn á sínu fyrstu ári og eru efstir með fullt hús stiga. Taflfélag Vestmanneyja er í öðru sæti með 7 vinninga og Skákdeild Breiðabliks er þriðja sæti einnig með 7 stig en færri vinninga.

Sjá Chess-Results

Nánari umfjöllun um mótið á morgun.

• Heimasíða mótsins
• Myndaalbúm (HÁ)

 

Skákfélagið Huginn og Taflfélag Reykjavíkur berast á banaspjót

Stórmeistarnir Þröstur og Helga Áss tefla með Hugin

Sveitir Skákfélagsins Hugins og Taflfélags Reykjavíkur (TR) eru sem fyrr jafnar og efstar á Íslandsmóti skákfélaga. Huginn vann Víkingaklúbbinn 5½-2½ og TR vann b-sveit Hugins með sama mun. Í lokaumferð helgarinnar sem hefst kl. 11 í Rimaskóla teflir Huginn við við Bolvíkinga en TR-ingar við Fjölnismenn. 

Hannes Hlífar og Gummi Kja fara fyrir sveit TR

Huginn og TR hafa 26 vinninga. Fjölnismenn eru í þriðja sætið með 18½ vinning en þeir unnu 7-1 stórsigur á b-sveit Skákfélags Akureyrar (SA). 

Önnur úrslit fjórðu umferðar urðu þau KR-ingar unnu mjög góðan 4½-3½ sigur á Bolvíkingum og a-sveit SA vann b-sveit TR 6-2.  

Meðal einstakra óvæntra úrslita má nefna Stefán Þór Sigurjónsson (Víkingaklúbbnum) vann stórmeistarann Stefán Kristjánsson (Hugin)

Stöðuna má nálgast á Chess-Results.

Í gær voru afhendir átta bíó-miðar á Pawn Sacrifice myndina. Í upphafi umferðarinnar á eftir verða einnig afhendir fleiri miðar. 

Boðsmiða fengu (tvo hver)

Þessir eru á leiðinni á bíó!

Fyrsta deild 

• Lárus Knútsson
• Magnús Pálmi Örnólfsson 

Önnur deild 

• Magnús Matthíasson
• Bárður Örn Birkisson 

Þriðja deild 

• Gestur Guðrúnarson
• Sveinbjörn Sigurðsson 

Fjórða deild 

• Hilmar Arnarson
• Stefán Orri Davíðsson

Einnig voru afhend viðurkenningarskjöl sem nýlega tóku FIDE-þjálfara námskeið og teljast nú viðurkenndir FIDE-þjálfarar.

 

2. deild

 

Skákfélag Reykjanesbæjar er með algjöra yfirburði í 2. deild en sveitin hefur 16 vinninga af 18 mögulegum. Í 2.-3. sæti eru c-sveit TR og Taflfélag Garðabæjar með 11 vinninga. 

Sjá Chess-Results.

3. deild

Hjálmar og Hörður eru lykilmenn Vinaskákfélagsins.

Vinaskákfélagið er í forystu í þriðju deild en félagið hefur 6 stig. d-sveit TRer í þriðja sæti með 5 vstig. b-sveit, Reyknesinga, c-sveit SA og d-sveit Hugins koma í næstu sætum með 4 stig.

Sjá Chess-Results.

4. deild

"Það er gott að búa í Fjallabyggð" Gunnar Skarphéðinsson, Gunnar I. Birgisson og Kristján Stefánsson

Skákfélag Sauðárkróks og Hrókar alls fangaðar eru í forystu með 6 stig. Taflfélag Vestmannasveita a-sveit Breiðabliks koma næst með 5 stig. 

Sjá Chess-Results

• Heimasíða mótsins
• Myndaalbúm (HÁ)

 

Skákþáttur Morgunblaðsins: Aronjan, Gelfand og Kamsky úr leik á heimsbikarmóti FIDE

Þessa dagana stendur yfir í Bakú í Aserbasjan heimsbikarmót FIDE en sigurvegarinn þar fær keppnisrétt í áskorendamótinu sem síðar ákveður hver verður áskorandi heimsmeistarans Magnúsar Carlsen. Alls hófu 132 skákmenn keppni um síðustu helgi en keppnisfyrirkomulagið býður upp á tveggja skáka einvígi með venjulegum umhugsunartíma. Verði jafnt er gripið til skáka með styttri umhugsunartíma. Og það kemur auðvitað á daginn að spennustigið í styttri skákunum er slíkt að skemmtanagildið eykst stórum og er það auðvitað í takt við hraðann á okkar tímum. Vefurinn Chess24 hefur verið með skemmtilegar streymis-útsendingar frá mótinu þar sem nokkrir af sigurstranglegustu skákmönnunum hafa þegar þurft að taka pokann sinn og eru á heimleið. Skal þar fremstan telja Levon Aronjan sem féll úr keppni í 2. umferð, Boris Gelfand datt strax úr leik, einnig Gata Kamsky og skákdrottningin Hou Yifan.

32 skákmenn voru eftir þegar keppnin hélt áfram á fimmtudaginn og spennandi einvígi framundan: Kramnik gegn Andreikin, Giri gegn Leko, Radjabov gegn Svidler, Nakamura gegn Nepomniachtchi, Ivanchuk gegn Jakovenko, Grischuk gegn Eljanov svo nokkur dæmi séu tekin.

Kínverjarnir og afrek Eljanovs

Þó að Kínverjar hafi unnið opna flokk síðasta ólympíuskákmóts, státi af fremstu skákkonu heims svo fátt eitt sé tínt til, eru menn alltaf að gleyma því að þeir eru hið nýja stórveldi skákarinnar. Vandi Kínverja hefur verið sá að þrátt fyrir frábæran árangur í flokkakeppnum eiga þeir enn eftir að slá í gegn á einstaklingsmótum. Kannski kemur það nú; í Bakú tefla þeir fram sínum bestu mönnum t.a.m. hinum 16 ára gamla Wei Yi sem margir telja að verði næsti heimsmeistari.

Í ljósi þess hve mikið er undir í hverri skák er afrek Úkraínumannsins Pavel Eljanov magnað en hann hefur unnið allar fimm kappskákir sínar. Á fimmtudaginn vann hann fyrri skák sína við Alexander Grischuk í æsispennandi skák. Rétt fyrir tímamörkin gat Grischuk unnið. Síðar varð hann að láta drottninguna en gat sennilega haldið jafntefli þegar hann lék sig í mát:

Alexander Grischuk – Pavel Eljanov

Katalónsk byrjun

1. c4 Rf6 2. Rf3 e6 3. g3 d5 4. Bg2 dxc4 5. Da4 Rbd7 6. Dxc4 c5 7. O-O b6 8. Rc3 Bb7 9. d4 Hc8 10. Dd3 cxd4 11. Rxd4 Bxg2 12. Kxg2 Bb4 13. Rdb5 a6 14. Rd6 Bxd6 15. Dxd6 De7 16. Dd3 b5 17. Bf4 e5 18. Bg5 h6 19. Rd5 De6 20. Bxf6 Rxf6 21. Rxf6 Dxf6 22. Da3!

Staðan er býsna jafnteflisleg en Grischuk tekst að skapa sér ýmis færi en tekur ákveðna áhættu líka.

22. ... Hc2 23. b3 Dc6 24. Kg1 Dc5 25. Dxa6 O-O 26. a4 Hxe2 27. a5 e4 28. Hae1 Hxe1 29. Hxe1 f5 30. De6+ Kh7 31. Hd1 Hf6 32. Dd5 Dc2 33. Hd2 Dc3 34. Ha2 De1+ 35. Kg2 f4 36. a6 f3 37. Kh3 Hg6

38. Kh4?

Afleikur í tímahraki, 38. a7 vinnur þar sem 38. .... Dg1 er svarað með 39. Df5!

38. ... Db4 39. Kh3 Hg5 40. Df7 Dc5 41. g4 Dc1 42. a7 h5 43. Dxh5 Hxh5 44. gxh5 Dc8 45. Kg3 Da8 46. Ha6 Kg8 47. b4 Kf8 48. Kf4 Ke7 49. Ke3 Kd7 50. Kd4 Kc7 51. Ke3 Kb7 52. Ha5 Kb6 53. Ha3 Kc6 54. Ha5 Kd6

Vandséð er hvernig svartur getur unnið eftir 55. Kf4, t.d. 55. ... Kd5 56. Hxb5+ Kc4 57. Ha5 Kxb4 58. Ha1! o.s.frv.

55. Kd4?? Dd5+ 56. Ke3 Ke5!

– hótar máti á d3 eða d4. Grischuk gafst upp.

 

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 19. september

Skákþættir Morgunblaðsins

Huginn og TR í forystu

 

Skákfélagið Huginn og Taflfélag Reykjavíkur eru jöfn og efst með 20½ vinning að lokinni þriðju umferð Íslandsmóts skákfélaga. Huginn vann Fjölni 6-2 en TR-ingar unnu Akureyringa 5½-2½. Sveitirnar eru efstir og jafnar með 20½ vinning. Víkingaklúbburinn er í þriðja sæti með 13½ eftir 4½-3½ sigur á Bolvíkingum. 

B-sveit Hugins vann b-sveit Akureyringa 6-2 en KR-ingar gerðu 4-4 jafntefli við b-sveit TR.

Sjá nánar á Chess-Results.

2. deild

Skákfélag Reykjanesbæjar er efst með 10 vinninga. Taflfélag Garðabæjar og c-sveit TR eru í 2.-3. sæti með 8 vinninga.

Sjá Chess-Results.

3. deild

Vinaskákfélagið er efst með 4 stig D-sveit TR og Skákfélag Siglufjarðar eru í 2-3. sæti með 3 stig með 7½ vinning.

Sjá Chess-Results.

4. deild

Skákfélag Sauðárkróks, Hrókar alls fagnaðar og unglingasveit Breiðabliks eru í forystu með 4 stig.

Sjá Chess-Results

• Heimasíða mótsins
• Myndaalbúm (HÁ)

 

TR með hálfs vinnings forskot á Hugin

"The Brothers" tefla með forystusveit TR

Það stefnir í harða baráttu Taflfélags Reykjavíkur og Skákfélagsins Hugins um Íslandsmeistaratitil skákfélaga. Liðin kepptu bæði í gær við eigin b-sveitir og unnu yfirburðasigra. TR vann eigið b-lið 8-0 á meðan Huginn missti niður hálfan vinning gegn eigin b-liði þar Magnús Teitsson (2157) gerði jafntefli gegn Einari Hjalta Jenssyni (2392).

Jon Ludvig Hammer og Helgi Ólafsson fara fyrir Huginsmönnum

Önnur úrslit gærdagsins voru þau að a-lið SA vann eigið b-lið 6½-1½, Fjölnismenn unnu Bolvíkinga með minnsta mun og Víkingaklúbburinn lagði KR-inga að velli 6-2.

TR hefur 15 vinninga, Huginn hefur 14½ og Fjölnismenn eru þriðju með með 9½ vinning. 

Í þriðju umferð sem hefst kl. 11 teflir TR við SA á meðan Huginn mætir Fjölni. 

Sjá nánar á Chess-Results.

2. deild

"Sjonni" og Örn Leó tefla fyrir Reyksnesninga

Reyknesingar eru efstir með 5 vinninga, Selfyssingar og Garðbæingar eru í 2.-3. sæti.

Sjá Chess-Results.

3. deild

"Gaman að þessu" Róbert Lagerman forystusauður Vinaskákfélagsins ásamt Kristjáni Erni skákstjóra og G. Sverri Þór.

Vinaskákfélagið hóf keppnina með látum og hefur 5½ vinning. d-sveit TR og Skákfélag Siglufjarðar hafa 4½ vinning.

Sjá Chess-Results.

4. deild

Hreinn Hrafnsson og Sveinbjörn Sigurðsson tefla með Akureyringum.

Eyjamenn eru efstir með 6 vinninga. Unglingasveit Breiðabliks og hið nýstofnaða félag Áttavilltir eru í 2.-4. sæti með 5½ vinning.

Sjá Chess-Results

• Heimasíða mótsins
• Myndaalbúm (HÁ)

 

Heimsbikarmótið: Og þá eru eftir fjórir

Átta manna úrslitum Heimsbikarmótsins lauk í Bakú í gær. Anish Giri, sem vann Vachier-Lagrave og Pavel Eljanov, sem vann Hikaru Nakamura, komust áfram í kappskákunum. Peter Svidler og Sergei Karjakin þurftu hins vegar að hafa meira fyrir hlutunum gegn Wei Yi og Mamedyarov.

Í undanúrslitum, sem hefjast kl. 10 í dag, mætast Eljanov-Karjakin og Giri-Svidler. Fjórir Evrópubúar. Þrír þeirra tefla á EM landsliða í Reykjavík í nóvember þ.e.a.s. allir nema Karjakin.

Sigurvegarar einvíganna fá keppnisrétt á áskorendamótinu í skák sem fram fer í mars á næsta ári. 

Það verður að teljast nokkuð sérkennileg ákvörðu hjá FIDE að setja undanúrsliti Heimsbikarmótsins oní Íslandsmót skákfélaga.

 

• Heimasíða mótsins
• Beinar útsendingar (daglega kl. 10)
• Myndaalbúm (GB)

TR og Huginn í forystu eftir fyrstu umferð Íslandsmóts skákfélaga

Fyrsta umferð Íslandsmóts skákfélaga fór fram í gærkveldi. Huginn og TR hófu bæði deildina með góðum 7-1 sigrum. Huginsmennu unnu Akureyringa en TR-ingar unnu KR-inga. Fjölnismenn unnu Víkinga 5-3. B-sveit Hugins vann 4½-3½ sigur á Bolvíkingum. Óvæntustu úrslit umferðarinnar hljóta að teljast sigur b-sveitar Akureyringa á b-sveit TR - þrátt fyrir að Norðanmenn væru stigalægri á öllum borðunum átta. 

Óvæntustu einstaklingsúrslit umferðarinnar verðast að teljast sigur Jóns Kristinssonar (2239), SA, á stórmeistaranum Stefáni Kristjánssyni (2485), Hugin, en það heyrir til mikillar tíðinda þegar Stefán tapar skák á Íslandsmóti 

Jón Þór Bergþórsson (2172), KR, gerði svo jafntefli við stórmeistarann Margeir Pétursson (2521).

Í kvöld kl. 20 hefst svo  taflmennska 2, 3. og 4. deild. 

Í fyrstu í kvöld tefla a-liðin við eigin b-lið, KR-ingar tefla við Víkinga og Bolvíkingar við Fjölnismenn.

Fyrsta deildin á Chess-Results.

Vígsla útitafls við Fischersetur á Selfossi í dag

Föstudaginn 25. september verður útitaflið fyrir framan Fischersetur, Gamla-bankann á Selfossi, vígt. Tefldar verða tvær skákir á útitaflinu og hefst taflmennskan kl. 15.30. Liðsstjórar verða Guðni Ágústsson fyrrverandi ráðherra og Kjartan Björnsson formaður bæjarráðs Árborgar. Gunnar Finnlaugsson verður aðstoðarmaður Guðna. Samkvæmt Gunnari þá munu þeir Guðni starfa í anda samvinnu og vaða áfram á miðjunni, en Kjartan og hans menn sennilega á hægri kantinum!

Á meðan á vígslunni stendur verður Fischersetur opið almenningi og frítt verður inn. Allir velkomnir. 

Eljanov vann Nakamura í gær

Úkraínumaðurinn geðþekki Pavel Eljanov (2723)heldur áfram að fara mjög mikinn á heimsbikarmótinu í Bakú. Í gær vann hann Bandaríkjamanninn Hikarau Nakamura (2814) sem af mörgum þykir ekki sérstakleg geðþekkur! 

Eljanov hefur hlotið 8 vinninga í 9 skákum og hefur með frammistöðu sinni farið upp um heil 17 sæti á heimslistanum og er nú í fimmtánda sæti.

Öðrum skákum lauk með jafntefli. Heimamaðurinn, Mamedyarov (2736) var nærri því að leggja Karjakin (2753)að velli sem varðist afar vel og hélt jafntefli. Hin tvö einvígin hófust á fremur tilþrifalítinn hátt.

Önnur skák átta manna úrslit fer fram í dag og hefst kl. 10.

 

• Heimasíða mótsins
• Beinar útsendingar (daglega kl. 10)
• Myndaalbúm (GB)