Ný alþjóðleg skákstig

Ný alþjóðleg skákstig eru komin út. Héðinn Steingrímsson er stigahæstur íslenskra skákmanna, Björgvin Jónas Hauksson er stigahæstur nýliða og nýkrýndur Reykjavíkurmeistari í skák, Stefaán Steingrímur Bergsson, hækkaði mest allra á stigum frá febrúar-listanum

Topp 20

Héðinn Steingrímsson (2574) er stigahæstur íslenskra skákmanna með 2574 skákstig. Í næstu sætum eru Hjörvar Steinn Grétarsson (2568) og Hannes Hlífar Stefánsson (2533). 

No	Name	Tit	mar.18	Diff	Gms
1	Steingrimsson, Hedinn	GM	2574	0	0
2	Gretarsson, Hjorvar Steinn	GM	2568	3	4
3	Stefansson, Hannes	GM	2533	8	4
4	Hjartarson, Johann	GM	2513	-23	16
5	Olafsson, Helgi	GM	2508	0	0
6	Petursson, Margeir	GM	2499	0	0
7	Danielsen, Henrik	GM	2498	1	1
8	Gunnarsson, Jon Viktor	IM	2471	5	4
9	Gretarsson, Helgi Ass	GM	2451	10	4
10	Arnason, Jon L	GM	2450	-7	7
11	Thorfinnsson, Bragi	IM	2448	22	16
12	Kristjansson, Stefan	GM	2447	0	0
13	Kjartansson, Gudmundur	IM	2432	-9	28
14	Gunnarsson, Arnar	IM	2428	0	0
15	Thorsteins, Karl	IM	2426	0	0
16	Thorhallsson, Throstur	GM	2419	1	7
17	Kjartansson, David	FM	2409	0	0
18	Thorfinnsson, Bjorn	IM	2399	-1	5
19	Arngrimsson, Dagur	IM	2370	0	0
20	Ulfarsson, Magnus Orn	FM	2364	-7	1

Nýliðar

Þrír nýliðar eru á listanum. Þeirra stigahæstur er Björgvin Jónas Hauksson (1704). 

No	Name	Tit	mar.18	Diff	Gms
1	Hauksson, Bjorgvin Jonas		1704	1704	9
2	Jensson, Erlingur		1603	1603	11
3	Brodman, Gestur Andri		1324	1324	5

Mestu hækkanir

Skákmeistari Reykjavíkur, Stefán Bergsson (2201) hækkar mest frá febrúar-listanum eða um 108 skákstig. Í næstu sætum eru Örn Alexandersson (+100) og Hilmir Freyr Heimisson (+88).

No	Name	Tit	mar.18	Diff	Gms
1	Bergsson, Stefan		2201	108	17
2	Alexandersson, Orn		1466	100	13
3	Heimisson, Hilmir Freyr	CM	2224	88	21
4	Davidsson, Stefan Orri		1365	85	11
5	Briem, Benedikt		1560	79	13
6	Johannsson, Birkir Isak		1867	70	7
7	Omarsson, Adam		1126	58	9
8	Jonsson, Kristjan Dagur		1329	45	5
9	Halldorsson, Bragi		2126	44	14
10	Karlsson, Sighvatur		1309	35	6
11	Edvardsson, Kristjan		2217	33	7
12	Bjorgvinsson, Andri Freyr		2035	32	6
13	Fridjonsson, Julius		2167	30	14
14	Sigurjonsson, Siguringi		2063	29	7
15	Olgeirsson, Armann		1541	28	6
16	Sigurdarson, Alec Elias		1400	27	5
17	Bjornsson, Eirikur K.		1959	25	9
18	Ulfsson, Olafur Evert		1808	24	6
19	Bjarnason, Larus H		1563	24	7
20	Ulfljotsson, Jon		1710	23	6

Stigahæstu ungmenni landsins (u20)

Vignir Vatnar Stefánsson (2300) er stigahæsta ungmenni landsins. Í næstum sætum eru Jón Kristinn Þorgeirsson (2298) og Oliver Aron Jóhannesson (2281).

No	Name	Tit	mar.18	Diff	Gms	B-day
1	Stefansson, Vignir Vatnar	FM	2300	-20	13	2003
2	Thorgeirsson, Jon Kristinn	FM	2298	-21	12	1999
3	Johannesson, Oliver	FM	2281	18	11	1998
4	Heimisson, Hilmir Freyr	CM	2224	88	21	2001
5	Birkisson, Bardur Orn	CM	2212	-14	6	2000
6	Jonsson, Gauti Pall		2104	-56	15	1999
7	Thorhallsson, Simon		2060	-4	6	1999
8	Birkisson, Bjorn Holm		2022	-24	16	2000
9	Mai, Alexander Oliver		1995	14	22	2003
10	Mai, Aron Thor		1975	10	22	2001
11	Davidsdottir, Nansy		1975	0	0	2002

 

Stigahæstu öldungar (65+)

Friðrik Ólafsson (2355) er stigahæstur öldunga landsins. Í nsætum sætum eru Kristján Guðmundsson (2289) og Áskell Örn Kárason (2264).

No	Name	Tit	mar.18	Diff	Gms	B-day
1	Olafsson, Fridrik	GM	2355	-10	4	1935
2	Gudmundsson, Kristjan		2289	0	0	1953
3	Karason, Askell O	FM	2264	0	0	1953
4	Einarsson, Arnthor		2252	0	0	1946
5	Thorvaldsson, Jonas		2239	-19	5	1941
6	Torfason, Jon		2235	0	0	1949
7	Thorvaldsson, Jon		2184	14	5	1949
8	Fridjonsson, Julius		2167	30	14	1950
9	Viglundsson, Bjorgvin		2147	-20	9	1946
10	Halfdanarson, Jon		2131	0	0	1947

 

Reiknuð innlend kappskákmót

• Skákhátið MótX (a-, b- og hvítir hrafnar)
• Skákþing Reykjavíkur
• Meistaramót Hugins (N) (vestur-, norður og úrslitariðill)
• Skákþing Akureyrar
• Bikarsyrpa TR IV
• Skákþing Vestmannaeyja

 

Skrár tengdar þessari bloggfærslu:

• Alþjóðleg skákstig, 1.mars 2018

GAMMA Reykjavíkurskákmótið hefst á þriðjudaginn

GAMMA Reykjavíkurskákmótið 2018 fer fram í Hörpu dagana 6.-14. mars nk. Mótið að þessu sinni er einnig minningarmót um Bobby Fischer en 9. mars nk. verða 75 ár liðin frá fæðingu ellefta heimsmeistarans í skák.

Í tilefni þess verður mótið einkar veglegt í ár. Ber þar hæst að þann 9. mars verður frídagur á sjálfu mótinu og verður þá teflt Fischer-slembi skákmót sem verður jafnframt fyrsta slíka Evrópumótið. Flestir sterkustu skákmenn sjálfs Reykjavíkurmótsins ætla einnig að taka þátt í því. Manngangurinn er sá sami en mögulegar upphafsstöður eru 960. Jafnframt verður sýning til heiðurs Fischer í Hörpu, hádegisfyrirlestrar tileinkaðir meistaranum og boðið upp á ferðir þar sem slóðir honum tengdar sýndar. Upplýsingar um sérviðburði má finna hér.

Um 230 keppendur eru skráðir til leiks á mótið og þar af um 30 stórmeistarar. Þeirra stigahæstur er úkraínski ofurstórmeistarinn Pavel Eljavov sem hefur 2711 skákstig. Næststigahæstur kepepnda eru Richard Rapport. 

 

Meðal annarra keppenda má nefna Gata Kamsky fyrrum áskorenda Karpovs um heimsmeistaratitilinn, Indverjann sterka Baskaran Adhiban. Fyrrum sigurvegarar láta sig ekki vanta má þar nefna Indverjann Abhijeet Gupta og Hollendinginn Erwin L´Ami.  

Kvennahersveitin svipa meðal annars Sabina-Francesca Foisor, sem var bandarískur meistari í hitteðfyrra og löndu hennar Tatev Abrahamyan og Alinu L´Ami eiginkonu Erwins. Laura Unuk, frá Slóvakíu, heimsmeistari stúlkna undir 18 er meðal keppenda.

Ávallt hefur verið lögð á undrabörn og er þar engin undantekning núna.  Yngsti stórmeistari heims, Nodirbek Abdusattorv frá Úsbekistan teflir í fyrsta sinn. Hann er næstyngsti stórmeistari skáksögunnar. Aðeins Sergei Karjakin, síðasti áskorendi Magnúsar Carlsen, hefur orðið stórmeistari yngri. Indversku undradrengirnir Pragganandhaa og Nihal Sarin, sem slógu eftirminnilega í gegn í fyrra, eru meðal keppenda aftur í ár.  Sá fyrrnefndi hefur möguleika á að verða yngsti stórmeistari skáksögunnar.

 

 

Heimavarnarlið íslenskra stórmeistara skipa sem stendur Hannes Hlífar Stefánsson og Þröstur Þórhallsson. Án efa á eftir fjölga í þeim hópi enda taka iðulega nánast allir sterkustu virku skákmenn landsins þátt í Reykjavíkurskákmótinu.

Mótið er afar mikilvægt fyrir íslenskt skáklíf og hefur verið flaggskip þess síðan framsýnir menn héldu fyrsta Reykjavíkurskákmótið í Lídó árið 1964. Mótið er afar vinsælt og hátt skrifað út í hinum stóra heimi og hefur síðustu ár lent í 2.-4. sæti yfir besta opna skákmót heims í vali atvinnuskákmanna.

Skráning fer fram á Skák.is (guli kassinn efst). Upplýsingar um þátttökugjöld má finna hér. Athugið að Íslendingar fá evruna á 100 kr., þ.e. hægt er að margfalda evruþátttökugjöldin með 100 kr. og leggja inn á 101-26-12763, kt. 580269-5409. Hægt er að senda fyrirspurnir um þátttökugjöld í netfangið [e-mail]

Heimasíða mótsins

 

Undanrásir Barna-Blitz

Undanrásir fyrir Reykjavik Open Barna-Blitz eru tefldar þessar vikurnar.

Taflfélag Reykjavíkur, Huginn og Víkingaklúbburinn hafa haldið undanrásir sínar.

Áfram eru komnir: Óskar Víkingur Davíðsson, Ryan Sharifa, Benedikt Þórisson, Róbert Luu, Stefán Orri Davíðsson, Benedikt Briem, Baltasar Máni Wedholm, Gunnar Erik Guðmundsson og Ísak Orri Karlsson. 

Undanrásir hjá Breiðablik fara fram sunnudaginn 4. mars klukkan 13:00 í Skákstúkunni við Breiðabliksvöll. Tveir efstu öðlast sæti í úrslitum.

Undanrásir hjá Fjölni fara fram miðvikudaginn 7. mars klukkan 16:30 í Rimaskóla. Þrír efstu öðlast sæti í úrslitum.

Auk þessara undanrása stendur Skákskóli Íslands fyrir sérstökum undanrásum einungis ætluðum þátttakendum á suðurlandsnámskeiði skólans sem fer fram á í Fischer-safni þetta misserið. Tvö sæti verða í boði í þeim undanrásum.

Öllum fyrirspurnum má beina til Stefáns Bergssonar í síma 863-7562.

 

 

Helgi Áss Grétarsson hraðskákmeistari Reykjavíkur

 

Það var fjörlega teflt síðastliðið miðvikudagskvöld er Hraðskákmót Reykjavíkur var haldið í salarkynnum Taflfélags Reykjavíkur. Margir keppendur gengu vasklega fram, enginn þó meira en stórmeistarinn brosmildi Helgi Áss Grétarsson.

Helgi Áss lék á alls oddi og vó mann og annan langt fram eftir kvöldi, og voru sumir andstæðingarnir klofnir í herðar niður. Helgi sem hefur brýnt skákkuta sína af kostgæfni að undanförnu vann átta fyrstu skákir sínar og hafði þá þegar tryggt sér sigur í mótinu. Margt benti til þess að Helgi myndi leika eftir afrek Guðmundar Gíslasonar sem árið áður vann mótið með fullu húsi. Það átti þó ekki fyrir Helga að liggja að ná fullu húsi að þessu sinni því í lokaumferðinni kom andstæðingur loks á hann höggi og var þar á ferð kotrurefurinn Róbert Lagerman sem með sigrinum hýfði sig upp í 4.sæti með 6 vinninga.

Bronsverðlaunin komu í hlut FIDE-meistarans Sigurbjörns Björnssonar sem nokkrum dögum áður missti með naumindum af bronsverðlaunum á Skákþingi Reykjavíkur eftir stigaútreikning. Sigurbjörn hlaut 6,5 vinning og tryggði 3.sætið með sigri í síðustu umferð á FM-kollega sínum Vigni Vatnari Stefánssyni.

Í 2.sæti varð CM Bárður Örn Birkisson með 7,5 vinning. Bárður Örn tapaði aðeins einni skák, gegn Helga Áss, auk þess sem hann gerði eitt jafntefli, við Sigurbjörn í næst-síðustu umferð. Bárður nældi sér í mestu stigahækkun allra keppenda á mótinu en hann hækkar um 61 hraðskákstig.

Helgi Áss Grétarsson er Hraðskákmeistari Reykjavíkur árið 2018. Þetta er í annað sinn sem Helgi Áss hreppir titilinn en síðast gerðist það árið 1994, fyrir hvorki meira né minna en 24 árum síðan. Helgi Áss hefur sést meira við taflborðin að undanförnu og er það afar ánægjulegt fyrir íslenskt skáklíf, bæði vegna þess að ungir skákmenn geta lært mikið af Helga en ekki síður vegna þess að Helgi hefur ennþá heilmikið fram að færa á sjálfu taflborðinu.

Upplýsingar um lokastöðu og einstök úrslit má finna á Chess-Results.

Árangurinn á Kragaeyju

Eins og fram hefur komið áður á Skák.is náði Bragi Þorfinnsson sér í lokaáfangann að stórmeistaratitli á alþjóðlega mótinu á Kragaeyja sem lauk í gær. Skák.is hefur ekki sinnt heildarúrslitum mótsins ekki sem skyldi og er nú úr því bætt!

Bragi Þorfinnsson (2426) varð annar á mótinu. Hlaut 7 vinninga og og hækkar um 24 skákstig á mótinu. Frammistaða hans samsvaraði 2619 skákstigum!

Stefán Bergsson (2093), skákmeistari Reykjavíkur, átti einnig gott mót og hlaut 5 vinninga. Hann hækkar um 32 stig. Hann gæti náð því að verða CM. 

Hrannar Baldursson (2153) átti ekki gott mót en endaði á tveimur sigrum og hlaut 4 vinninga.

Sigurður Daníelsson (1780) varð efstur íslensku kappanna í b-flokki. Hann hlaut 6 vinninga, Hermann Aðalsteinsson (1589) og Erlingur Jensson hlutu 4,5 vinninga og Þórður Guðmundsson (1565) hlaut 4 vinninga.

Íslensku félagarnir létu vel af aðstæðum og án efa mun Íslendingar fjölmenna í Kragaeyju að ári. A.m.k. þeim líkar við "Túrbó-mót" en tefldar voru 9 umferðir á 5 dögum.

Úrslitin má finna á hinu norska Chess-Results.

 

 

Sæmundur unglingameistari og Freyja stúlknameistari Reykjavíkur

Barna- og unglingameistaramót Reykjavíkur, sem og Stúlknameistaramót Reykjavíkur fór fram í skákhöll Taflfélags Reykjavíkur sunnudaginn 25. febrúar í hinu besta vetrarveðri.

Þátttaka var með ágætum, en samtals tóku 49 krakkar þátt, 34 í opnum flokki og 15 í stúlknaflokki. Setti það og góðan brag á mótið að 12 norsk ungmenni tóku þátt. Mótshaldið gekk vel, keppendur sýndu fyrirmyndar framkomu og hart var barist í báðum flokkum.

Verðlaunahafar í stúlknaflokki. F.v.: Freyja Birkisdóttir, Batel Goitom Haile, Ásthildur Helgadóttir, Katrín María Jónsdóttir, Guðrún Fanney Briem.

Stúlknameistarmót Reykjavíkur snerist fljótlega upp í kapphlaup milli Batel Goitom Haile og Freyju Birkisdóttur. Batel hafði sigur í innbyrðisviðureign þeirra leiksystra í 3. umferð og það stefndi í að henni tækist að verja titil sinn frá í fyrra þar til í næstsíðustu umferð, en þá tapaði hún fyrir Guðrúnu Fanneyju Briem. Við það náði Freyja að jafna Batel að vinningum og hafði svo sigur á stigum. Í 3. sæti lenti svo Ásthildur Helgadóttir. Hún tapaði einungis fyrir efstu tveimur en gaf engum öðrum grið.

Aldursflokkasigurvegarar í stúlknaflokki:

• f. 2006-2007: Freyja Birkisdóttir
• f. 2008-2009: Katrín María Jónsdóttir
• f. 2010 og síðar: Guðrún Fanney Briem

Keppendur skiptust um að hafa forystu í opna flokknum og fyrir lokaumferðina gátu hvorki fleiri né færri en 6 hrósað sigri. Það var hinsvegar Sæmundur Árnason sem sýndi stáltaugar í síðustu umferð og tryggði sér titilinn Unglingameistari Reykjavíkur. Sæmundur hlaut 6 vinninga og varð hálfum vinningi á undan Benedikt Briem og Óskari Víkingi Davíðssyni, sem næstir komu.

Aldursflokkasigurvegarar í opnum flokki:

• f. 2002-2003: Sæmundur Árnason
• f. 2004-2005: Óskar Víkingur Davíðsson
• f. 2006-2007: Benedikt Briem
• f.2008-2009: Einar Tryggvi Petersen
• f.2010 og síðar: Josef Omarsson

Nánari úrslit eru á Chess-Results.

Nánar á heimasíðu TR.

Róbert Luu, Benedikt Briem og Stefán Orri Davíðsson komust í úrslit Barna-Blitz

Fjölmennt og æsispennandi laugardagsmót barna var haldið þann 25. febrúar. 32 börn tóku þátt en það sem var merkilegt við þetta mót var að þrír efstu í mótinu gátu tryggt sér þátttöku í Reykjavík Barna-Blitz sem verður í Hörpunni samhliða Reykjavíkurskákmótinu. Einnig dró til tíðinda er hópur norskra krakka mætti á svæðið og stóðu þau sig með prýði. Íslensku krakkarnir tefldu samt hraustlega til vinnings gegn Norðmönnunum, vitandi að Gamli sáttmáli er löngu fallinn úr gildi.

Eftir jafnt og spennandi mót komu efstir í mark með 5,5 vinning þeir Róbert Luu og Benedikt Briem en í humátt á eftir þeim komu fimm skákmenn með fimm vinninga. Ekki nema það þó! Efstur þeirra sem hlutu fimm vinninga var Stephan Briem en þar sem hann er of gamall fyrir barnablitzið (Undirritaður leggur til að „Barna-Blitz“ verði umsvifalaust breytt í „Hraðtefli ungdómsins“) var leitað neðar í töfluna og þar var Stefán Orri Davíðsson. Eldri bróðir hans, Óskar Víkingur, hafði einmitt tryggt sér sæti í hraðskákinni nokkru áður í undankeppni hjá Víkingaklúbbnum. Mótið gekk hratt og vel fyrir sig, enda flestir keppendur vanir stórum skákmótum. Að sjálfsögðu var heitt á könnunni fyrir kaffiþyrsta foreldra og norska kennara sem fylgdust með af kostgæfni. Athygli er vakin á því að næsta laugardagsmót verður þarnæsta laugardag, þann 10. mars, því næstkomandi laugardag verða allir skákkennarar TR (og að vísu flestir aðrir skákmenn) sitjandi með sveittan skallann yfir skákum sínum í hinu æsispennandi Íslandsmóti skákfélaga. Meira um það síðar!

Nánar á heimasíðu TR.

Barnablitz 2018 á Selfossi

Martin Patryk Srichakham frá Hellu sigraði á miðsvetrarmóti barna og unglinga í Fischersetri á Selfossi en mótið fór fram þann 25. febrúar sl. var hluti af námskeiði sem Skákskóli Íslands hefur verið með börn og unglinga á Suðurlandi undanfarin ár í  samvinnu við Fischersetrið og félaga í SSON. Keppendur á miðsvetrarmótinu voru 12 talsins en keppt var keppnisrétt, tvö sæti í barna-blitzi Reykjavíkurskákmótsins, þann 11. mars nk.   

Martin Patryk hlaut 10 vinninga af 11 mögulegum en 2. sætið og keppnisréttur  barna-blitzinu kom í hlut á Fannars Jóhannssonar sem hlaut 9 vinninga. Í 3. sæti varð Patrekur Jónsson  með 8 ½ vinning og í 4. – 5. sæti komu Þrándur Ingvarsson og Anton með 8 vinninga hvor. Guðbergur Ágústsson varð svo í 6. sæti með 6 ½ vinning.

Myndatexti:

Þrír efstu á miðsvetrarmótinu í Fischersetri: Fannar Jóhannsson sem varð í 2. sæti þá sigurvegarinn Martin Partryk Srichakham og Patrekur Jónsson sem hlaut bronsið.

 

Atkvöld hjá Hugin í kvöld

Mánudaginn 26. febrúar nk. verður atkvöld hjá Huginn í Mjóddinni og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 3 mínútur + 2 sekúndur á hvern leik. Síðan verða þrjár atskákir með umhugsunartímanum tíu mínútur + 5 sekúndur á hvern leik.. Teflt er í félagsheimili Hugins í Álfabakka 14a í Mjóddinni. Mótið verður reiknað til hraðskák- og atskákstiga.

Sigurvegarinn á atkvöldinu fær í verðlaun máltíð fyrir einn á Saffran eða pizzu frá Dominos. Einnig verður dreginn út af handahófi annar keppandi sem fær sama val. Þar eiga allir jafna möguleika, án tillits til árangurs á mótinu.
Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Undanrásir Barna-Blitz hjá Huginn í dag kl. 17.15

Undankeppni Skákfélagsins Hugins fyrir Reykjavík Open Barna-Blitz verður haldin mánudaginn 26.febrúar kl.17.15-19. Undankeppnin verður hluti af hefðbundinni mánudagsæfingu Hugins. Þrjú efstu börnin fædd 2005 eða síðar fá sæti í úrslitum sem tefld verða í Hörpu 11.mars.

Tefldar verða 6 umferðir með umhugsunartímanum 5+3 (5 mínútur auk 3 sekúndna viðbótartíma eftir hvern leik).