Barna Blitz: Undanrásir Breiðabliks í dag

Næstsíðustu undanrásir Barna Blitz fara fram í Stúkunni við Kópavogsvöll í dag kl. 13. Allir velkomnir - ókeypis aðgangur. Tveir efstu öðlast sæti í úrslitum.

Taflfélag Reykjavíkur, Huginn, Víkingaklúbburinn og Skákfélag Selfoss og nágrennis hafa haldið undanrásir sínar.

Undanrásir hjá Fjölni fara fram miðvikudaginn 7. mars klukkan 16:30 í Rimaskóla. Þrír efstu öðlast sæti í úrslitum. Úrslitin verða tefld sunnudaginn 11. mars. 

Öllum fyrirspurnum má beina til Stefáns Bergssonar í síma 863-7562.

Skákþáttur Morgunblaðsins: Reykjavíkurlundar stefna hátt

Ingvar Þór Jóhannesson er maðurinn á bak við þátttöku Reykjavik Puffins, sem stefnir að einu af fjórum efstu sætunum í sínum riðli í atskákkeppni á netinu, Pro chessleague. Ingvar er skráður í lið Reykjavíkurlundanna en þar sem hann heldur úti vefsíðu og beinum útsendingum á meðan á keppni stendur hefur hann látið sér nægja að bera fyrirliðabandið. Þeir sem teflt hafa fyrir sveitina auk greinarhöfundar eru Jóhann Hjartarson, Hjörvar Steinn Grétarsson, Hannes Hlífar Stefánsson, Þröstur Þórhallsson, Jón Viktor Gunnarsson og bræðurnir Björn og Bragi Þorfinnssynir. Fjögur efstu sætin í riðlinum gefa rétt á þátttöku í 16 liða útsláttarkeppni en þeim liðum sem síðan komast í undanúrslit verður boðið til New York í sérstaka úrslitakeppni og útsendingu kostaða af Chess.com vefnum.

Forsvarsmenn keppninnar hafa fengið til keppni kappa á borð við Magnús Carlsen heimsmeistara, Maxime Vachier-Lagrave, Viswanathan Anand og Hikaru Nakamura,Fambiano Carugna svo nokkrir séu nefndir. Það kom í hlut greinarhöfundar að tefla við Magnús á dögunum og tapaðist sú skák eftir snarpa baráttu en á ýmsu hefur gengið hjá okkar sveit. Tveir sigrar, tvö töp og eitt jafntefli og 5. sæti í riðlinum en betur má ef duga skal. Tímafyrirkomulagið er oftast 15 2 en stundum 10 2.

Þó að skemmtigildið sé vissulega í fyrirrúmi fylgir keppninni alvara og ákveðnar reglur sem krefja þátttakendur um að undirrita loforð um að hegða sér íþróttamannslega, hafa ekki samráð á meðan keppni á stendur, nota ekki hugbúnað o.s.frv. Keppendur sjást raunar í vefmyndavél á meðan teflt er, sem er ákveðin trygging, en einbeittur brotavilji gæti hæglega eyðilagt svona keppni nema sendur væri sérstakur eftirlitsmaður/dómari á vettvang.

Eftir fyrstu viðureign Reykjavik Puffins við franska liðið Marseille Migraines var sigurskák Braga Þorfinnssonar kosin skák umferðarinnar. Bragi vann með tilþrifum. Fögnuðu þeir bræður Björn og Bragi vel og lengi eftir á. Bragi hikaði ekki við að tefla fjögurra peða árásina í kóngsindverskri vörn, afbrigði sem hann lærði fyrir Ólympíumót 16 ára og yngri á Kanaríeyjum árið 1995:

Bragi Þorfinnsson – Etienne Bacrot

Kóngsindversk vörn

1. d4 Rf6 2. c4 g6 3. Rc3 Bg7 4. e4 d6 5. f4 0-0 6. Rf3 c5 7. d5 e6 8. Be2 exd5 9. cxd5 Bg4 10. 0-0 Rbd7 11. He1 He8 12. h3 Bxf3 13. Bxf3 a6 14. g4 h6 15. h4!

Hér duga engin vettlingatök.

15.... b5 16. g5 Rh7 17. e5!

Snarplega leikið, peðsleikurinn rýmir fyrir d-peðinu, riddaranum og biskupnum á f3.

17.... dxe5 18. d6 Hb8 19. Rd5 hxg5 20. hxg5 Rhf8 21. Rc7?!

„Houdini“ telur 21. Bg4! betra þar sem svartur getur nú leikið 21.... exf4 með góðri stöðu. En Bragi var greinilega búinn að slá Bacrot út af laginu.

21.... Re6 22. Rxe8 Dxe8 23. a4 Dd8 24. axb5 axb5 25. Bd5! Rdf8 26. fxe5 Rxg5 27. Dg4 Rge6 28. Ha7 Db6

(– Sjá stöðumynd)

29. Hxf7!

Glæsilega leikið. Eftirleikurinn ætti að vera auðveldur en Bacrot er harður í vörninni.

29.... Kxf7 30. Hf1+ Ke8 31. Bxe6 c4+ 32. Hf2 Hb7

 

 

33. Bf7+!

Hvítur vinnur nú mikið lið og úrslitin eru ráðin.

33.... Hxf7 34. Dc8+ Dd8 35. Dxd8+ Kxd8 36. Hxf7 Bxe5 37. Bg5+ Kc8 38. Hxf8+ Kd7 39. Hd8+ Ke6 40. d7 Bxb2 41. Hb8 Kxd7 42. Hxb5 c3 43. Kf1 Kc6 44. Hb8 Kd5 45. Ke2 Ke4 46. Hb4 Kf5 47. Hb5 Kg4 48. Bf6 g5 49. Hxg5 Kf4 50. Hc5 Ke4 51. Bxc3

- og svartur gafst upp.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 24. febrúar 2018

Skákþættir Morgunblaðsins

Víkingar með 8½ vinnings forskot

Víkingaklúbburinn hefur 7½ vinnings forskot á Huginn. Víkingar lögðu TR örugglega að velli 7-1. Huginn siglir afar lygnan sjó í öðru sæti eftir stórsigur á b-sveit SA 7½-½. Hafa 10½ vinning á Fjölni í þriðja sæti. Hugins menn lögðu b-sveit Akureyringa 6½-1½ í gær. Fjölnismenn unnu stórsigur 7-1 á Bolvíkingum/Blikum í gær og styrktu verulega sig í baráttunni um bronsið. Staða Blika/Bolvíkinga er hins vegar erfið og flest bendir til þess að þeir falli.

Í viðureign Víkinga og TR-inga unnu þeir fyrrnefndu 6 skákir. Tveim skákum lauk með jafntefli og náði Vignir Vatnar (TR) jafntefli við stórmeistarinn Artur Jakubiec. 

Þór Már Valtýsson (SA-b) gerði jafntelfi við Magnús Örn Úlfarsson (Huginn) en aðrir norðanmenn lutu í dúk.

Önnur úrslit í urðu Akureyringar og KR-ingar gerðu jafntefli. KR-ingar lyftu sér uppúr með þeim úrslitum úr fallsæti á kostnað SA-b.

Garðabæingar er sjóðheitir og lögðu b-sveit Hugins 5½-2½.

Staðan

1. Víkingaklúbburinn 50 v.
2. Huginn-a 42½ v .
3. Fjölnir 33 v.
4. Skákfélag Akureyrar-a 29½
5. Taflfélag Garðabæjar 26 v. (9 stig)
6. Taflfélag Reykjavíkur 26 v. (7 stig)
7. Huginn-b 22½ v.
8. Skákdeild KR 19 v.
9. Skákfélag Akureyrar-b 18 v.
10. Skákdeild Breiðabliks og Bolungarvíkur 13½ v.

Áttunda og næstsíðasta umferð hefst kl. 11. 

Staðan á Chess-Results.

2. deild

Reyknesingar eru efstir en b-sveit TR kemur skammt undan. Flest bendir til að þessar sveitir endurheimti sæti sitt í efstu deild. Haukar eru þriðju.

Í fallsætum eru c-sveitir Hugins og TR.

Staðan á Chess-Results.

3. deild

B-sveit Víkingaklúbbsins hefur örugga forystu í 3. deild og er nánast öruggir um sæti í 2. deild að ári. Skákfélag Sauðárkróks er í öðru sæti en baráttan um þriðja sæti er afar hörð en þar er SA-c en margar sveitir rétt á eftir.

Staðan á Chess-Results

4. deild

B-sveit TG er í efsta sæti eftir nokkuð óvæntan sigur á Skagamönnum. Akurnesingar eru aðrar og c-sveit Víkingaklúbbsins og Selfyssingar eru í 3. og 4. sæti. 

Staðan á Chess-Results.

 

 

Heimasíða mótsins

Minningarorð um Stefán Kristjánsson stórmeistara

Þau hörmulegu tíðindi bárust í vikunni að Stefán Kristjánsson, stórmeistari í skák, er látinn. Stefán fæddist þann 8. desember árið 1982 og var því aðeins 35 ára gamall þegar hann lést. Hann er fyrsti stórmeistari Íslands sem fellur frá. Óhætt er að fullyrða að hann var einn hæfileikaríkasti skákmaður sem Ísland hefur eignast auk þess sem hann heillaði flesta sem honum kynntust með persónutöfrum sínum, greind og kímnigáfu.

Svona hefjast falleg og hugljúf minningarorð Björns Þorfinnssonar, skákmeistara og blaðamanns um Stefán Kristjánsson í helgarblaði DV. 

Minningarorð Björns um Stefán má finna í heild sinni á vefsíðu DV.

Bragi fjórtándi – elsti stórmeistari Íslandssögunnar

Það skiptast á skin og skúrir í íslensku skáklífi. Á blaðsíðu fjögur í helgarblaði DV er greint stuttlega frá lífshlaupi stórmeistarans Stefáns Kristjánssonar sem lést í vikunni, aðeins 35 ára að aldri. Aðeins nokkrum dögum fyrr hafði íslenskt skáksamfélag fagnað innilega þegar góðvinur Stefáns, alþjóðlegi meistarinn Bragi Þorfinnsson, landaði síðasta stórmeistaraáfanga sínum.

 

Þar með hafði Bragi uppfyllt allar kröfur titilsins og verður að öllum líkindum formlega útnefndur stórmeistari á þingi Alþjóða skáksambandsins í apríl næstkomandi.

Svona hófst grein DV í dag um Braga Þorfinnsson, nýjasta stórmeistara okkar Íslendinga. Greinin er hnyttin enda skrifuð af stjörnublaðamanninum Birni bróður Braga. Við sögu kemur meðal annars Amma Bíbí, amma þeirra bræðra. 

Greinina í heild sinni má finna á vef DV.

Víkingaklúbburinn eykur forystuna - hörð barátta um bronsið

Síðari hluti Íslandsmóts skákfélaga hófst í kvöld í Rimaskóla í Reykjavík. Víkingaklúbburinn jók forystuna í 8 vinninga með góðum 6-2 sigri á Fjölnismönnum. Huginn og Taflfélag Reykjavíkur gerðu 4-4 jafntefli og segja má að baráttan um bronsið hafa galopnast því aðeins munar 1 vinningi á Fjölni sem er í 3. sæti og TR sem er í fimmta sæti. Á milli þeirra er Skákfélag Akureyrar sem vann b-sveit Hugins 4½-3½. Huginn siglir lygnan sjó í öðru sæti en miklu munar á þeim og sveitunum í 1. og 3. sæti. 

Í viðureign Víkingaklúbbsins og Fjölnis unnust Víkingar 4 skákir en jafnmörgum lauk með jafntefli. 

Á ýmsu gekk í viðureign TR og Hugins. Aðeins tveimur skákum lauk með jafntefli en 3 skákir féllu á sitthvorn veginn. Afar hagstæð úrslit fyrir TR sem voru stigalægri á sjö borðum af átta. Guðmundur Kjartansson, TR, vann Hjörvar Stein Grétarsson, Hugin, á fyrsta borði. 

Í fallsætunum eru Skákdeild Breiðabliks og Bolungarvíkur annars vegar og Skákdeild KR hins vegar. B-sveit Skákfélags SA er nokkru á undan en hún á eftir erfiðaðri sveitir en SBB og KR. Þessar sveitir berjast um að halda sér uppi. Taflfélag Garðabæjar og b-sveit Hugins sigla hins vegar lygnan sjó og virðast vera hólpin frá falli.

Í umferð kvöldsins gerði KR-jafntefli við b-sveit SA og Garðbæingar unnu Bolvíkinga/Blika með minnsta mögulega mun.

Staðan

1. Víkingaklúbburinn 43 v.
2. Huginn-a 35 v.
3. Fjölnir 26 v.
4. Skákfélag Akureyrar-a 25½
5. Taflfélag Reykjavíkur 25 v.
6. Taflfélag Garðabæjar 20½ v.
7. Huginn-b 20 v.
8. Skákfélag Akureyrar-b 17½ v.
9. Skákdeild KR 15 v.
10. Skákdeild Breiðabliks og Bolungarvíkur 12½ v.

Í sjöundu umferð sem fram fer á morgun mætast meðal annars Víkingaklúbburinn og TR. Á morgun hefst taflmennska í deildum 2-4. 

Taflmennska morgundagsins hefst kl. 20. 

Heimasíða mótsins

Baltasar, Gunnar Erik og Ísak Orri komust áfram í úrslit Reykjavík Barna-Blitz

Síðasta mánudagsæfing Hugins sem fram fór 26. febrúar sl. var ekki hefðbundin æfing heldur jafnframt ein af undankeppnum fyrir Reykjavík Barna-Blitz. Þrír efstu á mótinu gátu tryggt sér þátttöku í úrslitum Reykjavík Barna-Blitz sem verður 11. mars nk. í Hörpunni samhliða Reykjavíkurskákmótinu.

23 keppendur mættu til leiks og háðu jafna og spennandi keppni um hin eftirsóttu þrjú sæti. Að lokum stóð Baltasar Máni Wedholm Gunnarsson einn efstur með 5,5v af sex mögulegum. Annar var Gunnar Erik Guðmundsson með 5v. Efstu tveir tefldu ekki saman því tapið hjá Gunnari Erik kom strax í fyrstu umferð gegn Einari Degi Brynjarssyni og svo vann hann rest. Þriðji var Ísak Orri Karlsson með 4,5v. Ísak Orri og Baltasar fylgdust að fram í síðustu umferð og gerðu jafntefli í innbyrðis viðureign í fjórðu umferð og voru öruggir áfram fyrir síðustu umferð. Ísak Orri fékk Gunnar Erik í lokaumferðinni og mátti Gunnar Erik ekki tapa viðureigninni til að missa ekki af lestinni. Á meðan fékk Baltasar Rayan Sharifa sem var kominn í úrslit Barna-Blitz með vaskri framgöngu í undankeppninni hjá Víkingaklúbbnum. Gunnar Erik lagði Ísak Orra og Baltasar vann Rayan og þar með var Baltasar, Gunnar Erik og Ísak Orri komnir áfram.

Næsta mánudagsæfing Hugins verð hefðbundin og verður haldin mánudaginn 5. mars nk. og hefst kl. 17.15. Æfingarnar eru í Álfabakka 14a í Mjóddinni, gengið er inn milli Subway og Lyfjaval í Mjódd og salurinn er upp á þriðju hæð.

Lokastaðan í chess-results:

 

Nú hafa Huginn, Taflfélag Reykjavíkur og Víkingaklúbburinn haldið undanrásir sínar. Áfram eru komnir: Óskar Víkingur Davíðsson, Ryan Sharifa, Benedikt Þórisson, Róbert Luu, Stefán Orri Davíðsson, Benedikt Briem, Baltasar Máni Wedholm, Gunnar Erik Guðmundsson og Ísak Orri Karlsson.

 

Undanrásir hjá Breiðablik fara fram sunnudaginn 4. mars klukkan 13:00 í Skákstúkunni við Breiðabliksvöll. Tveir efstu öðlast sæti í úrslitum.

Undanrásir hjá Fjölni fara fram miðvikudaginn 7. mars klukkan 16:30 í Rimaskóla. Þrír efstu öðlast sæti í úrslitum.

Stefán Kristjánsson, stórmeistari í skák, látinn

Stefán Kristjánsson, stórmeistari í skák, er látinn. Hann lést 28. febrúar sl., aðeins 35 ára að aldri.

Stefán var fæddur 8. desember 1982. Hann byrjaði tiltölulega seint að tefla en var mjög fljótur að ná góðum styrkleika og lengi vel einn efnilegasti skákmaður landsins. Hann varð útnefndur alþjóðlegur meistari árið 2002 og 10 árum síðar varð hann útnefndur stórmeistari í skák.

Stefán var um tíma fastamaður í landsliði Íslands og tefldi níu sinnum fyrir Íslands hönd á árunum 2000-08. Fimm sinnum á Ólympíuskákmóti og fjórum sinnum á Evrópumóti landsliða. 

Stefán var góður félagi sem margir innan skákhreyfingarinnar minnast með mikilli hlýju. Stefán lætur eftir sig einn son.

Íslandsmót grunnskólasveita, 4.-7. bekkur, fer fram 17. og 18. mars

Íslandsmót barnaskólasveita, 4.-7. bekkur, fer fram helgina 17.-18. mars í Rimaskóla. Tefldar verða níu umferðir eftir svissneska kerfinu. Fimm á laugardegi og fjórar á sunnudegi Umhugsunartími verður 10+5 mínútur á skák fyrir hvern keppenda. Taflið hefst kl. 11 á laugardegi og sunnudegi. 

Hver skóli getur sent fleiri en eina sveit. Í hverri sveit eru fjórir skákmenn. Keppendur skulu vera í 4.–7. bekk. Skákmenn úr í 1.–3. bekk er leyfilegt að tefla með sínum skóla en þá aðeins í a-sveit hans. Í hverri sveit mega vera allt að þrír varamenn. 

Þátttökugjöld kr. 7.500.- á sveit.  Þó ekki hærri en kr. 15.000.- fyrir hvern skóla.

Veitt verða verðlaun fyrir efstu b-e sveitir ásamt verðunum fyrir efstu sveitir af landsbyggðinni.

Veitt verða borðaverðlaun fyrir bestan árangur á 1.-4. borði. 

Sigurvegari mótsins hlýtur rétt til þátttöku á Norðurlandamóti barnaskólasveita sem fram fer í september næstkomandi í Finnlandi.

Skráning fer fram á Skák.is. Upplýsingar um þegar skráðar sveitir má finna hér. 

Skráningu skal lokið í í síðasta lagi á hádegi 16. mars.. Ekki er hægt að skrá sveitir á skákstað. 

 

Íslandsmót skákfélaga hefst í Rimaskóla í kvöld

Fyrsta deild Íslandsmóts skákfélaga hefst í kvöld í Rimaskóla. Hinar deildirnar (2.-4.) hefjast hins vegar á morgun. Taflmennskan í kvöld hefst kl. 19:30 en hefst kl. 20:00 á morgun.

1. deild

Víkingaklúbburinn hefur mikla yfirburði og hefur 6 vinninga forskot á Hugin. Fjölnir er í þriðja sæti. Fallbaráttan er einnig hörð. 

Staðan á Chess-Results.

2. deild

B-sveit Taflfélags Reykjavíkur og Skákfélag Reykjanesbæjar eru langefst í 2. deild. Haukar eru í þriðja sæti. Fallbaráttan þar er einnig afar hörð. 

Staðan á Chess-Results.

3. deild

B-sveit Víkingaklúbbsins er langefst í 3. deild. B-sveit Skákdeild Fjölnis er í 2. sæti. Skákgengið, Skákfélag Sauðárkróks og Skákfélag Siglufjarðar eru í 3.-5. sæti.

Staðan á Chess-Results. 

4. deild

Taflfélag Akraness er efst í 4. deild. B-sveit Taflfélags Garðabæjar er í 2. sæti og b-sveit Hróka alls fagnaðar í 3. sæti. 

Staðan á Chess-Results.

Heimasíða mótsins