Fjölbreytt dagskrá á uppskeruhátíð Hróksins á laugardaginn

Hrókurinn býður til uppskeruhátíðar laugardaginn 9. júlí milli klukkan 14 og 16 í Pakkhúsi Hróksins, Geirsgötu 11, við Reykjavíkurhöfn. Þar verður tafl og tónlist, vöfflur og bókamarkaður, myndasýning frá Grænlandi og kynning á starfi félagsins.

Hrókurinn hefur haft aðstöðu í vöruskemmu Brims sl. tvö ár og þar hefur verið miðstöð fatasöfnunar í þágu barna og ungmenna á Grænlandi. Fjölmargir hafa lagt söfnuninni lið og hefur mikið af góðum fatnaði farið til fjölmargra þorpa og bæja á Grænland og komið í góðar þarfir.

Á laugardag verður margt til gamans gert; Linda Guðmundsdóttir frá Finnbogastöðum í Trékyllisvík mun leika á harmónikku, Valdimar Tómasson mun stýra bókamarkaði í þágu verkefna Hróksins á Grænlandi og skákmeistarar tefla við gesti og gangandi.

Hróksliðar hafa á síðustu 12 mánuðum farið sex sinnum til Grænlands að útbreiða skák og vináttu, og fjölmargar ferðir eru á teikniborðinu. Hér heima hefur Hrókurinn síðan árið 2003 heimsótt Barnaspítala Hringsins flesta fimmtudaga, auk þess að halda uppi líflegu skákstarfi í þágu fólks með geðraskanir, aldraðra og barna. Þá efndi Hrókurinn í vor til afar vel heppnaðs MótX-einvígis milli stórmeistaranna Nigels Shorts og Hjörvars Steins Grétarssonar. Síðast en ekki síst stóð Hrókurinn fyrir afar vel heppnuðu skákmaraþoni í maí í þágu sýrlenskra flóttabarna og söfnuðust þrjár milljónir króna, sem runnu óskiptar til Fatimusjóðs og UNICEF.

Í nóvember veitti Hrafn Jökulsson forseti félagsins viðtöku viðurkenningu Barnaheilla -- Save the children fyrir starf í þágu barna á Íslandi og Grænlandi. Þá var Hrafn útnefndur máttarstólpi Vinjar, fræðslu- og bataseturs Rauða krossins og í janúar hlaut Hrókurinn viðurkenningu Minningarsjóðs Gunnars Thoroddsens.

Verkefni Hróksins næstu misseri verða kynnt á uppskeruhátíðinni, og má nefna skákmót í öllum landsfjórðungum, áframhaldandi skáklíf í Hringnum, Vin og víðar og þátttöku í ýmsu góðargerðarstarfi.

Allir eru hjartanlega velkomnir á uppskeruhátíð Hróksins.

Sólarmót Skákakademíunnar á fimmtudag

Á fimmtudaginn kemur verður heiðskýrt og hlýtt um alla borg. Skákakademía Reykjavíkur efnir því til Sólarmóts Skákakademíunnar í hádeginu. Taflið hefst 12:05 og tefldar verða fimm umferðir hraðskák. Mótið fer fram á Útitaflinu við Lækjargötu.

Unglingalandslið Íslands æfir grimmt þessa dagana undir Ólympíumót 16ára og yngri sem fram fer í Slóvakíu síðar í mánuðinum. Krakkarnir mæta til leiks í Sólarmótið og munu án efa skipa sér í efstu sætin.

Góð verðlaun fyrir efstu þrjú sætin.

Skráning á staðnum, fyrir 12:00.

Stórsigur gegn Skotum í lokaumferðinni - sjöunda sæti niðurstaðan

Gullaldarliðið vann skosku sveitina 3½-½ í lokaumferð heimsmeistaramóts skáksveita 50 ára og eldri sem fram fór í dag. Jóhann Hjartarson, Jón L. Árnason og Friðrik Ólafsson unnu sínar skákir í dag. Verr gekk hins vegar í gær en þá náði ensku skákmennirnir að hefna fyrir enska fótboltalandsliðið með sigri á okkar mönnum með minnsta mun. Íslenska sveitin endaði í sjöunda sæti en Þjóðverjar unnu nauman sigur á mótinu eftir harða baráttu við Armena. 

Úrslit 8. umferðar

 

 

 

Úrslit 9. umferðar

 

 

 

Íslensku skáksveitina skipuðu:

1. Jóhann Hjartarson (2547) 4 v. af 8
2. Helgi Ólafsson (2543) 5 v. af 8
3. Margeir Pétursson (2509) 6 v. af 8
4. Jón L. Árnason (2490) 5 v. af 8
5. Friðrik Ólafsson (2377) 3. v af 4

Lokastöðu mótsins má nálgast hér.

• Heimasíða Hróksins (ítarlegar fréttaflutningur
• Skákhornið (skákskýringar liðsstjóra)
• Heimasíða mótsins
• Beinar útsendingar (hefjast kl. 7:30)

 

Skák eflir skóla - nýir þátttakendur

Skák eflir skóla – kennari verður skákkennari er verkefni sem Skáksambandið vinnur í samstarfi við mennta- og menningarmálaráðuneytið. Skólaveturinn 2015-16 var fyrsta framkvæmdarár verkefnisins. Megintilgangur þess er að fjölga skákkennurum meðal grunnskólakennara. Hver kennari sem tekur þátt kennir skák einu sinni í viku í sínum skóla og nýtur leiðsagnar og aðstoðar verkefnisstjóra. Níu skólar tóku þátt í verkefninu í vetur; Á höfuðborgarsvæðinu, Reykjanesi, suðurlandi og Hólmavík. Mikil ánægja var hjá kennurunum með verkefnið og hafa þeir nær allir náð samkomulagi við sinn skólastjóra um að halda áfram með skákkennslu í stundatöflu á næsta ári. Þeir verða þó ekki formlegir þátttakendur í verkefninu næsta skólaár en munu þó njóta stuðnings frá verkefnisstjóra.

Þrettán nýir skólar víðs vegar af landinu koma inn í verkefnið næsta skólaár:

Kársnesskóli

Dalskóli

Ingunnarskóli

Grunnskóli Húnaþings vestra

Húnavallaskóli

Grunnskóli Fáskrúðsfjarðar

Nesskóli (Neskaupsstað)

Flúðaskóli

Grunnskóli Vestmannaeyja

Varmárskóli

Melaskóli

Salaskóli

Undirbúningur fyrir næsta skólaár er þegar hafinn með einstaklingsfundum fyrir þátttakendur. Námskeið fyrir kennara verður haldið í ágúst. Verkefnisstjóri mun svo heimsækja skólanna snemma í haust og leggja línurnar fyrir veturinn. Eitt af markmiðum fyrir veturinn er að tengja verkefnið meir inn í framkvæmd Landsmóts í skólaskák. Þannig verður leitast eftir því við þátttakendur að þeir taki að sér framkvæmd undanmóta á sínum svæðum.

Stefán Bergsson,

Verkefnisstjóri Skák eflir skóla – kennari verður skákkennari

Síðasta vika sumarnámskeiða TR að hefjast – opið fyrir skráningu

Alþjóðlegi meistarinn og skákkennarinn, Bragi Þorfinnsson, hefur undanfarnar vikur leitt börn á sumarnámskeiðum TR um helstu króka og kima skáklistarinnar. Börnin virðast hafa drukkið í sig fróðleikinn en ekki síður skemmt sér konunglega í glímu sinni við þær þrautir og leiki sem Bragi hefur blásið til.

Framundan er síðasta vika sumarnámskeiðanna og því einungis tvö námskeið eftir þetta sumarið. Námskeiðin eru opin öllum börnum fædd 2003-2009.

Námskeið #7 hefst mánudaginn 4.júlí kl.10:00. Námskeið #8 hefst sama dag kl.13:30. Skráning á námskeiðin er nú í fullum í gangi og má nálgast skráningareyðublaðið með því að smella hér.

Skákþáttur Morgunblaðsins: Skákþorsti Viktors Kortsnoj

Eftirmæli sem fallið hafa um Viktor Kortsnoj sem lést þann 6. júní sl. 85 ára að aldri eru flest á þann veg, að þar sé genginn eftirminnilegur baráttujaxl. Garrí Kasparov hafði orð á því að Kortsnoj hefði verið trúandi fyrir því að snúa á manninn með ljáinn í einhverju flóknu hróksendatafli. En það gerðist ekki og því gefst tækifæri til að gera upp einstæðan skákferil stórmeistara sem kom margoft við sögu hér á landi.

Kortsnoj og Paul Keres eru fyrstir nefndir meðal skákmanna sem næst hafa komist því að hampa heimsmeistaratitlinum; á árunum 1974-1981 háði Kortsnoj þrjú einvígi við Anatoli Karpov, hið fyrsta var í reynd um heimsmeistaratitilinn en Bobby Fischer neitaði að verja titil sinn. Hvað „langlífi“ á skáksviðinu varðar á Kortsnoj engan sinn líka og Emanuel Lasker sá eini sem stenst einhvern samanburð.

Eftir stórmót IBM í júlí árið 1976 gekk Kortsnoj inn á lögregustöð í Amsterdam og baðst hælis sem pólitiskur flóttamaður. Þetta var stærsta frétt The New York times þann daginn. Hann var 45 ára gamall, hafði átt fast sæti í sovéska landsliðinu, tekið þátt i fjórum áskorendakeppnum og unnið mýmörg alþjóðleg mót. En orð voru dýr í þá daga og Kortnoj hafði látið ýmislegt flakka í viðtali við júgóslavneskt dagblað um þann mikla aðstöðumun sem var á honum og óskabarninu Anatolí Karpov. Hann var látinn gjalda fyrir ummæli sín með árs keppnisbanni á erlendri grund en þegar leyfið var endurvakið var hann farinn að hugsa sér til hreyfings. Kortsnoj blómstraði skáklega séð í „“útlegðinni“ en fjölskyldan heima fékk að glíma við margháttaða erfiðleika, einkasonurinn Igor neitaði að gegna herþjónustu og sat í fangelsi í tvö ár. Bella eiginkona Kortsnojs fékk að yfirgefa Sovétríkin vorið 1982. Þá var hann tekinn saman við aðra konu, Petru Lewerwijk.

Ef velja á úr mót eða einvígi frá meira en 60 ára ferli vandast málið. Ég hef alltaf haldið upp á taflmennsku hans á millisvæðamótinu 1973 en ætla að velja kafla úr ferli hans sem sýndi magnaðan keppnisþrótt. Heimsmeistaraeinvígið í Baguio á Filippseyjum stóð í meira en þrjá mánuði var frá byrjun heilmikill farsi þar sem helst voru í fréttum dulsálfræðingurinn Zoukhar, spegilgleraugu, jógúrt, Ananda- marga lið með vafasama fortíð, svikull aðstoðarmaður og þar fram efir götunum. Kortsnoj virtist ekki ætla að ráða við hinn útsmogna stíl Karpovs og eftir 27 skákir var staðan 5:2 Karpov í vil en teflt var uppá sex sigra. Í næstu fjórum skákum vann Kortsnoj þrisvar og gerði eitt jafntefli. Sigrarnir voru fengnir í löngum og ströngum endatöflum sem Kortsnoj tefldi frábærlega vel. Staðan var 5:5 en 32. skákina vann Karpov og hélt titlinum. Nokkrum dögum síðar gekk Kortsnoj inn í skáksal Ólympíumótsins í Buenos Aires. Þá var klappað fyrir honum. Hann tefldi fyrir Sviss og náði bestum árangri fyrsta borðs manna, hlaut 9 vinninga af ellefu mögulegum og hélt eftirminnilega skáksýningu sem jafnast á við þá sem Fischer hélt í Havana 1966 og Kasparov í Manila 1992. Síðustu árin voru Kortsnoj erfið. Hann fékk heilablóðfall árið 2011 og var bundinn við hjólastól upp frá því. Hann virtist haldinn óslökkvandi skákþorsta og undir það síðasta tefldi hann á hverjum degi við einn vin sinn í kringum 100 hraðskákir á dag.

Grein þessi birtist í Morgunblaðinu 25. júní

Skákþættir Morgunblaðsins

Gullaldarliðið: Stórsigur gegn Úkraínu

Gullaldarliðið vann stórsigur, 3½-½, í sjöundu umferð skáksveita 50 ára og eldri sem fram fór fyrr í dag. Jóhann Hjartarson, Helgi Ólafsson og Margeir Pétursson unnu sínar skákir á 1.-3. borði.Friðrik Ólafsson, sem tefldi á fjórða borði, gerði jafntefli.

Strákarnir okkar, töpuðu hins vegar mjög slysalega gegn Þýskalandi í gær með minnsta mun en þar stefndi lengi vel í íslenskan sigur. Margeir vann, Helgi gerði jafntefli en Jóhann og Jón töpuðu báðir slysalega eftir að hafa haft vænlegrar stöður - sérstaklega sá síðarnefndi.

Úrslit 6. umferðar

Úrslit 7. umferðar

 

Íslenska sveitin hefur núna 10 stig af 14 mögulegum og er í sjöunda sæti. Góð úrslit í lokumferðunum tveimur geta fleytt sveitinni í verðlaunasæti. 

Í áttundu og næstsíðustu umferð sem fram fer í fyrramálið teflir íslenska sveitin við sterka sveit Englands sem stillir upp goðsögnunum Nunn og Speelman á 1. og 2. borði.

Sveit Englands.

 

• Heimasíða Hróksins (ítarlegar fréttaflutningur
• Skákhornið (skákskýringar liðsstjóra)
• Heimasíða mótsins
• Beinar útsendingar (hefjast kl. 7:30)

 

Ný alþjóðleg skákstig

Ný alþjóðleg skákstig komu í dag, 1. júlí. Hannes Hlífar Stefánsson (2577) hefur endurheimt efsta sæsti stigalistans. Héðinn Steingrímsson (2572) er annar og Íslandsmeistarinn Jóhann Hjartarson (2556) er þriðji. Þorsteinn Magnússon hækkaði mest allra frá júní-listanum eða um 77 skákstig. Litlar breytingar eru á listanum að þessu sinni. Aðeins eitt íslenskt mót var reiknað, sjálft Íslandsmótið. Þess fyrir utan tóku Íslendingar aðeins þátt í einu alþjóðlegu móti, þ.e. í Sardiníumótinu. 

Heildarlistann má finna í PDF.

Topp 20

Nr.	Skákmaður	Tit	Stig	Ská.	Br.
1	Stefansson, Hannes	GM	2577	0	0
2	Steingrimsson, Hedinn	GM	2572	10	-5
3	Hjartarson, Johann	GM	2556	11	9
4	Gretarsson, Hjorvar Steinn	GM	2550	8	-30
5	Olafsson, Helgi	GM	2543	0	0
6	Petursson, Margeir	GM	2509	0	0
7	Arnason, Jon L	GM	2490	0	0
8	Danielsen, Henrik	GM	2480	0	0
9	Kristjansson, Stefan	GM	2464	0	0
10	Gunnarsson, Jon Viktor	IM	2457	11	3
11	Gretarsson, Helgi Ass	GM	2448	0	0
12	Kjartansson, Gudmundur	IM	2442	11	-8
13	Thorsteins, Karl	IM	2439	0	0
14	Thorfinnsson, Bragi	IM	2433	11	7
15	Gunnarsson, Arnar	IM	2431	0	0
16	Thorhallsson, Throstur	GM	2411	0	0
17	Thorfinnsson, Bjorn	IM	2398	10	2
18	Ulfarsson, Magnus Orn	FM	2385	0	0
19	Arngrimsson, Dagur	IM	2378	0	0
20	Olafsson, Fridrik	GM	2377	0	0

Mestu hækkanir

Sardiníufararnir, Þorsteinn Magnússon (77) og Heimir Páll Ragnarsson (70) hækka langmest allra á stigum frá júní-listanum. Guðmundur Gíslason (47) er þriðji eftir stórgott Íslandsmót.

Nr.	Skákmaður	Tit	Stig	Ská.	Br.
1	Magnusson, Thorsteinn		1415	9	77
2	Ragnarsson, Heimir Pall		1645	9	70
3	Gislason, Gudmundur	FM	2327	11	47
4	Johannsson, Orn Leo		2257	11	31
5	Bjornsson, Gunnar		2130	9	20
6	Bergsson, Stefan		1993	9	19
7	Sigurdsson, Snorri Thor		1972	9	19
8	Hjartarson, Johann	GM	2556	11	9
9	Thorfinnsson, Bragi	IM	2433	11	7
10	Gunnarsson, Jon Viktor	IM	2457	11	3

 

Heimslistinn

Magnus Carlsen (2855) er efstur á heimslistanum, Vladimir Kramnik (2812) annar og Fabi Caruana (2810). 

Topp 100 má nálgast hér.

Skrár tengdar þessari bloggfærslu:

• Alþjóðleg skákstig, 1. júlí 2016

Gullaldarliðið beið lægri hlut - en leynivopn á leiðinni!

Gullaldarlið Íslands tapaði sinni fyrstu viðureign í 5. umferð á HM skákliða 50 ára og eldri í Dresden á fimmtudag. Íslenska stórmeistarasveitin beið lægri hlut fyrir mjög öflugri sveit Armeníu, 3-1, og er nú í 3.-7. sæti. Fjórar umferðir eru eftir á mótinu og ljóst að seinni hálfleikurinn verður æsispennandi.

Jóhann Hjartarson mætti hinum goðsagnakennda Rafael Vaganian á 1. borði. Armeninn var um árabil í hópi sterkustu skákmanna heims og varð m.a. skákmeistari Sovétríkjanna 1989. Þeir Jóhann tefldu sjö kappskákir á árunum 1989-92 og þá hafði okkar maður sannkallað fantatak á Vaganian: sigraði fimm sinnum, gerði eitt jafntefli og tapaði aðeins einni skák.

Jóhann Hjartarson

En Vaganian tefldi glæsilega með svörtu mönnunum í Dresden og fórnaði snemma skiptamun. Tölvuheilarnir töldu Jóhann með mun betri stöðu en Vaganian hafði kafað dýpra.

Halldór Grétar Einarsson liðstjóri: ,,Þótt skakreiknarnir gefi stöðuna +1 á hvítan þá er öllum mannlegum ljóst að svartur var með mun betri stöðu í raun, vegna þess hve mikið auðveldara var að tefla hana. Jóhann var óánægður með leiki 40 til 42 hjá sér. Hann var búinn að tefla vörnina mjög vel, en þarna tapaði hann tveimur tempóum, sem skiptir miklu máli í svona stöðu.“

Jóhann Hjartarson – Rafael Vaganian. — 40. Hb1+ (stöðumynd) Kxa4 41. Bc2+ Ka3 42. f5 Ka2. „Jóhann var óánægður með leiki 40 til 42 hjá sér. Hann var búinn að tefla vörnina mjög vel, en þarna tapaði hann tveimur tempóum, sem skiptir miklu máli í svona stöðu.“ HGE

Jón L. Árnason

Jón L. Árnason lenti snemma í klemmu gegn stórmeistaranum Sergey Galduntsá 4. borði eftir að peðsfórn skilaði ekki tilætluðum árangri.

Halldór: ,,Jón var ekki ánægður með 15. — Rxd5. Mun betri leikur var 15. — Bc8 sem hefði skilað ágætum bótum fyrir peðsfórnina.“

 

Sergey Galdunts – Jón L. Árnason. — 15. De1 (stöðumynd) Rxd5. ,,Jón var ekki ánægður með 15. — Rxd5. Mun betri leikur var 15. — Bc8 sem hefði skilað ágætum bótum fyrir peðsfórnina.“

Skákir Helga Ólafssonar við Ashot Anastasian og Margeirs Péturssonar gegn Karen Movsziszian voru allan tímann í jafnvægi, og lauk báðum með jafntefli.

Margeir Pétursson

Halldór segir að sigur Armena hafi verið verðskuldaður: ,,Þeir áttu skilið að vinna. Þeir tefldu betur í dag og sérstaklega var mikilvægur sigurinn á 1. borði.“

Fimm lið munu berjast um sigur á HM að mati Halldórs, enda langbest skipuð: Armenía, Þýskaland, England, Íslands og þýska skákfélagið Emanuel Lasker Gesellschaft.

Englendingar unnu stórsigur á skáksveit frá Úkraínu í 5. umferð, Þýskaland lagði kvennasveit Rússlands og Emanuel Lasker Gesellschaft sigraði þýska félagið Forchheim.

Armenar og Þjóðverjar eru nú efstir, hafa sigrað í öllum sínum viðureignum. Gullaldarliðið er í 3.-7. sæti og mætir sveit Þýskalands í 6. umferð. Þjóðverjarnir eru í miklu stuði og ætla sér greinilega að landa heimsmeistaratitlinum á heimavelli.

Sveitina leiðir Uwe Bönsch sem hefur 4 vinninga af 5, og á 2. borði hefur Klaus Bischoff unnið allar fimm skákir sínar og reiknast árangur hans til þessa upp á 3001 skákstig!

Eini veiki hlekkur sveitarinnar til þessa er alþjóðameistarinn Karsten Volke á 3. borði, með 3 vinninga af 5. Á 4. borði hefur stórmeistarinnRaj Tischbirek rakað saman 4 vinningum í jafnmörgum skákum.

Halldór Grétar býst við háspennu í lokaumferðunum fjórum:

,,Það eru fimm jafn sterk lið í mótinu. Þau munu öll tefla innbyrðis. Við höfum teflt við tvö af fjórum. Þurfum helst að vinna hin tvö til að eiga möguleika á sigri, myndi ég halda. Hin liðin hafa teflt einu sinni við annað lið í topphópnum.“

Og liðstjórinn er hvergi banginn:

,,Í nótt kemur flugvél með áhorfendur frá Íslandi — eiginkonurnar! Þær mæta um hádegisbil. Við ætlum að færa þeim sigur á Þjóðverjum.“

Nánar á vefsíðu Hróksins.

• Úrslit 5. umferðar
• Staðan eftir fimm umferðir
• Pörun 6. umferðar

Gullaldarliðið á toppnum á HM - flugeldasýning Jóns L. tryggði sigur í 4. umferð

Gullaldarlið Íslands vann fjórða sigurinn í röð á HM skáksveita 50 ára og eldri í Dresden í dag. Jón L. Árnasonvar hetja dagsins, sigraði Gerhard Köhler í 23 leikjum eftir að hafa fórnað mönnum á báðar hendur. Armenía, Þýskaland og Ísland eru nú einu liðin sem hafa sigrað í öllum viðureignum sínum. Gullaldarliðið mætir sterkri sveit Armeníu í fimmtu umferð.

Íslenska stórmeistarasveitin mætti mjög sterku liði Emanuel Lasker Gesellschaft í fjórðu umferðinni. Á 1. borði gerðu Jóhann Hjartarson og Arthur Jusupov jafntefli, og sama var uppi á teningnum í viðureignumHelga Ólafssonar og Alexanders Graf, og Margeirs Péturssonar og Jakobs Meister.

Jón L. Árnason mætti Köhler á 4. borði, en Þjóðverjinn er þekktastur fyrir að hafa teflt þúsundir hraðskáka við Viktor Korchnoi, þegar hinn mikli meistari dvaldi sér til hressingar á heilsuhæli í Dresden. Jón er einn mesti sóknarskákmaður íslenskrar skáksögu, og hann hélt sannkallaða flugeldasýningu og tryggði íslenska liðinu mjög dýrmætan sigur. 

Jón L. Árnason – Gerhard Köhler

Fórn I — 17. Rg5 h6 18. Dh5!? (stöðumynd) „Það þýðir ekkert að snúa til baka þegar maður er kominn út í miðja á ! 18.Rfxe6 fxe6 19.Rxe6 Db6 20.Rxf8 var líka hægt.“ HGE

Fórn II — 20. – g6? 21. Rxg6! (stöðumynd) Rxg6?! „(21. – fxg6 var skárra, en eftir 22.Bxe6+ Hf7 23.Bxf7+ Kxf7 24.Dh7+ er hvítur með betra.)“ HGE

Fórn III — 22. Bxe6! (stöðumynd) Bd6? 23. Dxg6+ Og svartur gafst upp. „Kannski tók hvítur nokkra áhættu með mannsfórninni [fyrstu], en fyrst hún gekk upp þá var hún góð !“ HGE

• Halldór Grétar Einarsson skýrði skákina á Skákhorninu

Halldór Grétar Einarsson liðstjóri Gullaldarliðsins var að vonum ánægður með sína menn: ,,Við vorum að klára að fara yfir skákir dagsins. Það var varla leikinn slæmur leikur í þessari umferð en margir snjallir. Jón L. ruggaði aðeins bátnum til að vinna sinn andstæðing á glæsilegan hátt.“

Af öðrum úrslitum í fjórðu umferð bar hæst að Þýskaland lagði England og Armenía sigraði Kanada.

Rafael Vaganian

Í fimmtu umferð mætir Gullaldarliðið Armeníu í sannkölluðum stórleik. Fyrir armensku sveitinni fer goðsögninRafael Vaganian sem er þekktur fyrir leiftrandi sóknarstíl og algert óttaleysi við skákborðið.

Alls taka 57 skáksveitir þátt í HM í Dresden og verða tefldar 9 umferðir. Margir af þekktustu skákmönnum síðustu áratuga eru meðal keppenda, en óhætt er að segja að þátttaka íslenska Gullaldarliðsins hafi vakið mesta athygli. Auk fjórmenninganna sem héldu uppi heiðri Íslands í dag er Friðrik Ólafsson í liðinu, en þessi síungi snillingur sem nú er 81 árs tefldi fyrst fyrir Íslands hönd á Ólympíumótinu árið 1952.

Nánar á vefsíðu Hróksins.

• Staðan á HM
• Úrslit 4. umferðar
• Skákir íslenska liðsins í 4. umferð