Huginn með 3½ vinnings forystu eftir sigur á TR

Skákfélagið Huginn vann Taflfélag Reykjavíkur með minnsta mun, 4½-3½ í fimmtu umferð Íslandsmóts skákfélaga sem fram fór í Rimaskóla í kvöld. Þar með juku Huginsmenn forystuna uppí 3½ vinning. Bragi Þorfinnsson (TR) vann frábæran sigur sigur á enska ofurstórmeistaranum Gawain Jones í kvöld og er það stigahæsti andstæðingur sem Bragi hefur lagt að velli á skákferlinum. Guðmundur Kjartansson gerði jafntefli við Robin Van Kampen á öðru borði. 

Mikil spenna var í lok viðureignir Hugins og TR þegar tvær skákir voru eftir og fjöldi áhorfenda fylgdist með eins og meðfylgjandi mynd fangar vel.

Skákdeild Fjölnis er þriðja sæti þrátt fyrir tap gegn Bolvíkingum. Þar lagði Jóhann Hjartarson (Bolungarvík) Héðin Steingrímsson (Fjölni) að velli á fyrsta borði en þeir háðu mikla baráttu um Íslandsmeistaratitilinn fyrr á árinu á Seltjarnarnesi. 

Víkingaklúbburinn vann svo mjög góðan, 5½-2½, sigur á Skákfélagi Akureyrar og er í fjórða sæti. 

B-sveitirnar áttu góðan dag. B-sveit Hugins vann sveit Reyknesingar 5-3 og b-sveit Taflfélags Reykjavíkur vann Skákdeild KR með minnsta mun, 4½-3½.

Einstaklingsúrslit dagsins má nálgast á Chess-Results.

Staðan

1. Skákfélagið Huginn 25½ v. af 32
2. Taflfélag Reykjavíkur 22 v.
3. Skákdeild Fjölnis 19 v.
4. Víkingaklúbburinn 17½ v.
5. Taflfélag Bolungarvíkur 14½ v.
6. Skákfélag Reykjanesbæjar 14 v.
7. Taflfélag Reykjavíkur b-sveit 12½ v.
8. Skákfélagið Huginn b-sveit 12 v. (2 stig)
9. Skákdeild KR 12 v. (0 stig)
10. Skákfélag Akureyrar 11 v.

Fimmta umferð hefst kl. 11 í fyrramálið. Þá teflir Huginn við Fjölni og TR við Reykjanesbæ. 

2. deild 

C-sveit Hugins og Taflfélag Garðabæjar eru í forystu í 2. deild. B-sveit Skákfélags Akureyrar og Skákdeild Hauka eru í 3.-4. sæti hálfum vinningi á eftir. 

Mikil spenna er í deildinni en aðeins munar einum vinningi á sveitinni í efsta og sjötta sæti og reyndar aðeins 2½ vinningi á efsta og neðsta liði.

Mótstafla á Chess-Results. 

3. deild

Hrókar alls fagnaðar eru efstir en Skákfélag Selfoss hefur aðeins hálfum vinningi minna. D-sveit Hugins og b-sveit Reyknesinga eru í 3.-4. sæti. 

Staðan á Chess-Results.

4. deild

B-sveit Víkingaklúbbsins er á toppnum en þeir hafa unnið allar sínar viðureignir. Skákfélag Sauðárkróks og Taflfélag Vestmannaeyja koma þar næst á eftir.

Staðan á Chess-Results.

Á Íslandsmóti skákfélaga er kynslóðarbilið brúað en keppendur á mótinu eru á aldursbilinu 6-83 ára.

• Heimasíða mótsins
• Chess-Results

Skákþáttur Morgunblaðsins: Björn Þorsteinsson lærði af Paul Keres

Skákkeppni stofnana á áttunda áratug síðustu aldar: Guðmundur Pálmason og Ólafur Magnússon að tefla fyrir Orkustofnun, Jón Kristinsson, Bragi Kristjánsson, Leifur Jósteinsson og Stefán Þormar fyrir Búnaðarbankann, Jóhann Örn Sigurjónsson og Hilmar Viggósson fyrir Landsbankann, Guðmundur Ágústsson fyrir Sveinsbakarí, Friðrik Ólafsson og Baldur Möller fyrir Stjórnarráðið, Ingvar Ásmundsson, Stefán Briem og Bragi Halldórsson að tafli fyrir MH, Guðmundur Sigurjónsson á 1. borði fyrir Orator. Og svona mætti lengi telja. Það var ekki leiðinlegt fyrir unga menn að fylgjast með þessum meisturum safnast saman í sal Taflfélags Reykjavíkur við Grensásveg. Eitt virtist óumbreytanlegt, skáksveit Útvegsbanka Íslands var ávallt skipuð Birni Þorsteinssyni, Gunnari Gunnarssyni, Braga Björnssyni og Jóhannesi Jónssyni og yfir þeim vakti viðburðastjóri bankans, Adolf Björnsson. Sveitin var afar sigursæl á þessum vettvangi en átti oft í harðri keppni við Búnaðarbankann og Stjórnarráðið.

Björn Þorsteinsson, sem féll frá á dögunum 76 ára gamall, vann ýmis önnur og stærri afrek á löngum skákferli. Hann varð Íslandsmeistari 1967 og aftur 1975, tók yfirleitt þátt í þrem stóru mótunum innanlands, haustmóti TR, Skákþingi Reykjavíkur og Skákþingi Íslands. Var einn sigursælasti skákmaður landsins á ákveðnu tímabili í kringum 1970, tefldi nokkrum sinnum fyrir Íslands hönd á Ólympíuskákmótum 1962, 1964, 1968 og 1976 og var magnaður hraðskákmaður. Öllum var ljóst að þessi dagfarsprúði maður hafði allt sem þurfti til að ná langt á alþjóða mælikvarða, sem hann sóttist ekki eftir. Fyrir mína kynslóð var hins vegar alveg ómetanlegt að fá að kljást við svo öflugan meistara sem hafði m.a. öðlast styrk sinn með því að þaulkanna allar skákir sem hann komst yfir og Paul Keres hafði teflt. Hann hafði fyrir sið að bjóða aldrei jafntefli. Við athugun mína á skákum Björns blasti raunar við stórkostleg eyða í gagnagrunnum. En þá rifjaðist upp dagstund í Norræna húsinu á sumri hallanda 1971 viðureign hans við annan tvöfaldan Íslandsmeistara. Björn Þorsteinsson og Jón Kristinsson háðu marga hildi á þessum tíma og gekk á ýmsu. En að þessu sinni hafði Björn betur:

Skákþing Norðurlanda 1971:

Björn Þorsteinsson – Jón Kristinsson

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 e6 6. Bc4 Be7 7. Bb3 Rc6 8. Be3 O-O 9. De2 a6 10. O-O-O-O Dc7 11. Hhg1 b5 12. g4 b4 13. Rxc6 Dxc6 14. Rd5!

Ræðst strax til atlögu. Hér er hugmyndin að svara 14. .. exd5 með 15. g5 Rxe4 16. Bxd5 og hvítur vinnur lið til baka. 

14. ... Rxd5

Velimirovic-árásin var ekki vel þróuð á þessum tíma og nú þykir best að leika 14. .. exd5 15. g5 Rxe4 16. Bxd5 Da4 17. Bxe4 Be6 með ýmsum færum.

15. exd5 Dd7 16. dxe6 fxe6 17. f4 d5 18. f5 Bb7 19. fxe6 Dxe6 20. Dd2 Kh8 21. Bd5 a5 22. Hde1 Df7 23. Ba4

Hvíta staðan er betri vegna staka d-peðsins auk þess sem biskuparnir eru ógnandi.

23. ... Bd6 24. Kb1 Hac8 25. Bb5 Dc7 26. Bd3 Bc5?

Gengur beint í gildruna. Svartur varð að loka á drottninguna og leika 26. ... Hf4 og staðan er enn tvísýn. 

27. Dh6!

Óvæntur hnykkur. Svartur er óverjandi mát og gafst upp.

 

Grein þessi birtist í Morgunblaðinu 24. september 2016

Skákþættir Morgunblaðsins

Huginn í forystu á Íslandsmóti skákfélaga - viðureign tveggja efstu liða hefst kl. 17

Skákfélagið Huginn jók forystuna á Íslandsmót skákfélaga með góðum sigri, 7-1, á Taflfélagi Bolungarvíkur í þriðju umferð sem fram fór í dag. Taflfélag Reykjavíkur er þó skammt undan en sveitin vann b-sveit Hugins 5½-2½. Munurinn á sveitunum er 2½ vinningur. Sveitirnar mætast einmitt í fjórðu umferð sem fram fer í dag og hefst kl. 17. 

Skákdeild Fjölnis, sem gerði 4-4 jafntefli við Skákfélag Akureyrar, er í þriðja sæti með 15½ vinning. 

Önnur úrslit í dag voru þau Víkingaklúbburinn vann öruggan, 5½-2½, á Skákdeild KR. Skákfélag Reykjanesbæjar, sem var neðsta sæti fyrir umferðina, lyfti sér á botninum og upp í fimmta sæti með mjög góðum 6-2 sigri á b-sveit Taflfélags Reykjavíkur. 

Staðan efstu liða:

1. Skákfélagið Huginn 21 v. 24
2. Taflfélag Reykjavíkur 18½ v.
3. Skákdeild Fjölnis 15½ v.
4. Víkingaklúbburinn 12 v.
5. Skákfélag Reykjanesbæjar 11 v.
6. Taflfélag Bolungarvíkur 10 v.

Mótstöflu má finna hér.

Öll einstaklingsúrslit má finna á Chess-Results. 

2. deild

C-sveit Hugins og b-sveit Skákfélag Akureyrar eru efst í 2. deild. Skákdeild Hauka og Taflfélag Garðabæjar eru í 3.-4. sæti.

Mótstöflu má nálgast á Chess-Results.

3. deild

Hrókar alls fagnaðar eru í forystu í þriðju deild. D-sveit Hugins er í öðru sæti og Skákfélag Selfoss og nágrennis í því þriðja.

Mótstöflu má nálgast á Chess-Results.

4. deild

Skákfélag Sauðárkróks er í forystu í 4. deild. Sauðkrækingar hafa unnið allar skákir sínar 12 talsins. B-sveit Víkingaklúbbsins er í öðru sæti og Taflfélag Vestmannaeyja er í þriðja sæti. 

Mótstöflu má nálgast á Chess-Results.

Á Íslandsmóti skákfélaga er kynslóðarbilið brúað en keppendur á mótinu eru á aldursbilinu 6-83 ára.

• Heimasíða mótsins
• Chess-Results

Huginn í forystu á Íslandsmóti skákfélaga

Skákfélagið Huginn er í forystu á Íslandsmóti skákfélaga að lokinni annarri umferð mótsins sem fram fór í kvöld í Rimaskóla. Huginsmenn unnu eigin b-sveit 6½-1½. Taflfélag Reykjavíkur er í öðru sæti en þeir unnu eigin b-sveit með sama mun. Skákdeild Fjölnis er í þriðja sæti eftir 5-3 sigur á Skákdeild KR í afar spennandi viðureign.

Önnur úrslit kvöldsins urðu þau að Skákfélag Akureyrar og Taflfélag Bolungarvíkur gerðu 4-4 í spennuþrunginni viðureign. Þar hélt Halldór Brynjar Halldórsson áfram að gera góða hluti en í kvöld vann hann Jón L. Árnason. Í gær gerði hann jafntefli við Helga Ólafsson.

Að lokum vann Víkingaklúbburinn Skákfélag Reykjanesbæjar í langlengstu viðureign kvöldsins sem lauk ríflega eitt í nótt. Skák Jóhanns Ingvarssonar (SR) og Edyka Jakubies (Víkingaklúbbsins) tók alls 137 leiki.

Staðan efstu liða:

1. Skákfélagið Huginn 14 v. af 16
2. Taflfélag Reykjavíkur 12½ v.
3. Skákdeild Fjölnis 11½ v.
4. Taflfélag Bolungarvíkur 9 v.
5. Víkingaklúbburinn 6½ v.

Öll einstaklingsúrslit má finna á Chess-Results. 

Þriðja umferð hefst kl. 11 í fyrramálið. Þá mæta Huginsmenn Bolvíkingum og Taflfélag Reykjavíkur mætir b-sveit Hugins. 

Deildir 2-4 hófust í kvöld. Skákdeild Hauka er efst í 2. deild, d-sveit Hugins í 3. deild og Skákfélag Sauðárkróks og b-sveit Víkingaklúbbsins 4. deild.

Á Íslandsmóti skákfélaga er kynslóðarbilið brúað en keppendur á mótinu eru á aldursbilinu 6-83 ára.

• Heimasíða mótsins
• Chess-Results

Ný alþjóðleg skákstig

Ný alþjóðleg skákstig eru komin út og taka gildi á morgun 1. október. Héðinn Steingrímsson (2572) er stigahæsti skákmaður landsins. Í næstum sætum eru Hannes Hlífar Stefánsson (2571) og Hjörvar Steinn Grétarsson (2559). Arnar Sigurmundsson (1524) er stigahæsti nýliðinn og Hilmir Freyr Heimisson (119) hækkaði mest frá síðasta skáklista.

Topp 20

No.	Name	Tit	OCT16	Diff	Gms
1	Steingrimsson, Hedinn	GM	2572	0	0
2	Stefansson, Hannes	GM	2571	-3	10
3	Gretarsson, Hjorvar Steinn	GM	2559	12	10
4	Hjartarson, Johann	GM	2539	-6	7
5	Olafsson, Helgi	GM	2539	0	0
6	Petursson, Margeir	GM	2512	0	0
7	Danielsen, Henrik	GM	2480	0	0
8	Arnason, Jon L	GM	2478	0	0
9	Kristjansson, Stefan	GM	2464	0	0
10	Gunnarsson, Jon Viktor	IM	2457	0	0
11	Gretarsson, Helgi Ass	GM	2448	0	0
12	Thorsteins, Karl	IM	2439	0	0
13	Thorfinnsson, Bragi	IM	2435	5	8
14	Gunnarsson, Arnar	IM	2431	0	0
15	Kjartansson, Gudmundur	IM	2427	-15	18
16	Thorhallsson, Throstur	GM	2411	0	0
17	Thorfinnsson, Bjorn	IM	2398	0	0
18	Ulfarsson, Magnus Orn	FM	2385	0	0
19	Arngrimsson, Dagur	IM	2378	0	0
20	Jensson, Einar Hjalti	IM	2378	0	0

Listann í heild sinni má finna hér í PDF.

Nýliðar

Þrír nýliðar eru á listanum. Stigahæstur þeirra er Arnar Sigurmundsson (1524).

No.	Name	Tit	OCT16	Diff	Gms
1	Sigurmundsson, Arnar		1524	1524	8
2	Johannsson, Johann Bernhard		1426	1426	5
3	Haile, Batel Goitom		1297	1297	9

Mestu hækkanir

Hilmir Freyr Heimisson (119) hækkar mest frá síðasta september-listanum. Í næstu sætum eru Ísak Orri Karlsson (96) og Sverrir Hákonarson (76).

No.	Name	Tit	OCT16	Diff	Gms	B-day
1	Heimisson, Hilmir Freyr		2107	119	7	2001
2	Karlsson, Isak Orri		1244	96	5	2005
3	Hakonarson, Sverrir		1414	76	3	2003
4	Davidsdottir, Nansy		1905	63	4	2002
5	Gislason, Stefan		1812	57	3	1950
6	Ragnarsson, Heimir Pall		1693	48	6	2001
7	Ptacnikova, Lenka	WGM	2197	38	11	1976
8	Baldursson, Atli Mar		1203	36	1	2002
9	Thorsteinsdottir, Hallgerdur	WFM	2050	35	9	1992
10	Stefansson, Vignir Vatnar		2163	34	5	2003

Stigahæstu skákkonur landsins

Lenka Ptácníková (2197) er stigahæsta skákkona landsins. Í næstu sætum eru Hallgerður Helga Þorsteinsdóttir (2050) og Guðlaug Þorsteinsdóttir (2009). Nansý Davíðsdóttir (1905) skaust upp í fjórða sætið með góðri frammistöðu í Vesteras í Svíþjóð.

No.	Name	Tit	OCT16	Diff	Gms	B-day
1	Ptacnikova, Lenka	WGM	2197	38	11	1976
2	Thorsteinsdottir, Hallgerdur	WFM	2050	35	9	1992
3	Thorsteinsdottir, Gudlaug	WFM	2009	-37	9	1961
4	Davidsdottir, Nansy		1905	63	4	2002
5	Finnbogadottir, Tinna Kristin		1894	0	0	1991
6	Kristinardottir, Elsa Maria		1836	0	0	1989
7	Fridthjofsdottir, Sigurl. Regina		1802	0	0	1961
8	Hauksdottir, Hrund		1796	3	7	1996
9	Magnusdottir, Veronika Steinunn		1778	1	5	1998
10	Helgadottir, Sigridur Bjorg		1769	0	0	1992

Stigahæstu ungmenni landsins

Oliver Aron Jóhannesson (2263) er stigahæsta ungmenni landsins 20 ára og yngri. Í næstu sætum eru Dagur Ragnarsson (2232 og Vignir Vatnar Stefánsson (2163).

No.	Name	Tit	OCT16	Diff	Gms	B-day
1	Johannesson, Oliver	FM	2263	8	4	1998
2	Ragnarsson, Dagur	FM	2232	-40	9	1997
3	Stefansson, Vignir Vatnar		2163	34	5	2003
4	Birkisson, Bardur Orn		2120	0	0	2000
5	Heimisson, Hilmir Freyr		2107	119	7	2001
6	Hardarson, Jon Trausti		2105	5	11	1997
7	Thorgeirsson, Jon Kristinn		2102	0	0	1999
8	Thorhallsson, Simon		2085	0	0	1999
9	Jonsson, Gauti Pall		2082	0	0	1999
10	Birkisson, Bjorn Holm		2019	0	0	2000

Á næstum dögum verður gerð úttekt á hraðskákstigum landands.

Skrár tengdar þessari bloggfærslu:

• Alþjóðleg skákstig, 1. október 2016

Huginn hóf titilvörnina með miklum látum

Íslandsmót skákfélaga hófst í kvöld þegar fyrsta deild Íslandsmótsins hófst. Íslandsmeistarar Skákfélagsins Hugins hófu titilvörnina með miklum látum þegar þeir unnu stórsigur á Skákfélagi Akureyrar 7½-½. Halldór Brynjar Halldórsson (SA) gerði jafntefli við stórmeistarann Helga Ólafsson (Hugin) á öðru borði.

Taflfélag Reykjavíkur vann öruggan sigur, 6-2, á Víkingaklúbbnum sem stillir upp fjórum erlendum skákmönnum. Þar unnu Taflfélagsmenn fjórar skákir en jafn mörgum skákum lauk með jafntefli. Guðmundur Kjartansson (TR) vann þar góðan sigur á pólska stórmeistaranum Artur Jakubiec (2505).

Skákdeild Fjölnis, sem er á heimavelli í Rimaskóla, lagði Skákfélag Reyknesinga örugglega að velli 6½-1½. 

Talfélag Bolungarvíkur vann Skákdeild KR 5-3 í spennandi viðureign.

Í uppgjör b-liða Taflfélags Reykjavíkur og Skákfélagsins Hugins höfðu Taflfélagsmenn betur 4½-3½. Athyglisverð úrslit í ljósi að Huginsmenn voru stigahærri á öllum borðum. Gauti Páll Jónsson (2082) vann þar Lenku Ptácníková (2159) stórmeistara kvenna.

Öll einstaklingsúrslit umferðarinnar má finna á Chess-Results. 

Mótinu verður framhaldið á morgun og hefst taflmennskan kl. 20. Þá hefjast einnig deildir 2-4. Kátt verður þá í Rimaskóla en alls munu á fjórða hundruð skákmenn sitja að tafli. 

Á Íslandsmóti skákfélaga er kynslóðarbilið brúað en keppendur á mótinu eru á aldursbilinu 6-83 ára.

• Heimasíða mótsins
• Chess-Results

Davíð Kjartansson Víking-meistari Hróksins og Stofunnar

Davíð Kjartansson kom, sá og sigraði á Víking-móti Hróksins og Stofunnar á fimmtudagskvöld, hlaut 7 vinninga af 8 mögulegum. Róbert Lagerman hreppti silfrið og næst komu þau Gauti Páll Jónsson og Lenka Ptacnikova. Keppendur voru 23 og afar góð stemmning á þessu helsta skákkaffihúsi norðan Alpafjalla.

Davíð telfdi af miklu öryggi og tapaði ekki skák á mótinu. Róbert sýndi snilldartakta í mörgum skákum og hinn ungi Gauti Páll fór á kostum. Lenka komst upp að hlið Gauta með sigrum í fjórum síðustu umferðunum.

Fleiri sýndu góða spretti, og þannig lagði Arnljótur Sigurðsson félaga sinn úr Vinaskákfélaginu, Elvar Guðmundsson, þrátt fyrir að um 400 skákstig skildu þá að. Þá var hann vaski Björgvin Kristbergsson heiðraður með sérstökum gullpeningi fyrir góða frammistöðu.

Verðlaun voru vegleg, einsog jafnan á mótum Hróksins á Stofunni. Þar er afar góð aðstaða til skákiðkunar, sem íslenskir skákmenn jafnt sem erlendir ferðamenn nýta sér daglega.

Lokastaðan:

1 Davíð Kjartansson 2377 7
2 Róbert Lagerman 2315 6
3-4 Gauti Páll Jónsson 2100 5.5
Lenka Ptacnikova 2159 5.5
5-8 Halldór Ingi Kárason 1800 5
Páll Þórsson 1777 5
Arnljótur Sigurðsson 1911 5
Kjartan Ingvarsson 1889 5
9-10 Óskar Long Einarsson 1776 4.5
Pétur Atli Lárusson 2000 4.5
11-15 Elvar Guðmundsson 2325 4
Óskar Haraldsson 1812 4
Oddgeir Ágúst Ottesen 1822 4
Helgi Pétur Gunnarsson 1801 4
Björgvin Ívarsson 1400 4
16 Gunnar Gunnarsson 1888 3.5
17-21 Þorvaldur Ingveldarson 1555 3
Halldór Kristjánsson 1444 3
Hörður Jónasson 1577 3
Hjálmar Sigurvaldason 1566 3
Björgvin Kristbergsson 1444 3
22 Gylfi Þorsteinn Gunnlaugsson 1200 2
23 Batel GoItom 1200 1

Skákfélaginu Hugin spáð sigri á Íslandsmóti skákfélaga

Ritstjóri Skák.is hefur birt árlega spá um úrslit á Íslandsmóti skákfélaga. Ritstjórinn spáir Hugin Íslandsmeistaratitlinum, Taflélagi Reykjavíkur og Víkingaklúbbnum þriðja sætinu.

Spá ritstjóra.

Íslandsmót skákfélaga hefst á morgun í Rimaskóla

Fyrri hluti Íslandsmóts skákfélaga 2016-2017 fer fram dagana 29. sept – 2. okt.  nk.  Mótið fer fram í Rimaskóla í Reykjavík.  1. umferð (eingöngu í 1.deild) mun hefjast kl. 19.30 fimmtudaginn 29. september. Aðrar deildir munu hefja taflmennsku föstudaginn 30. september. kl. 20.00 og síðan tefla 1. október  kl. 11.00 og kl. 17.00 sama dag. Síðasta umferðin í fyrri hlutanum hefst kl. 11.00 sunnudaginn 2. október. 

Umhugsunartími er 90 mín. á skákina + 30 sek. viðbótartími bætist við eftir hvern leik.

Heimasíða mótsins.

 

 

Víking-skákmót Hróksins og Stofunnar á miðvikudagskvöld

Hrókurinn og Stofan bjóða til Víking-skákmótsins á Stofunni, Vesturgötu 3, miðvikudagskvöldið 28. september kl. 20. Tefldar verða átta umferðir með 5 mínútna umhugsunartíma. Þátttökugjöld eru engin, nema gott skap og leikgleði.

Skákmót Hróksins á Stofunni hafa unnið sér fastan sess í skáklífinu, enda Stofan aðal-skákkaffihús borgarinnar, og þar er góð aðstaða til að iðka þjóðaríþróttina.

Veitingar eru á tilboðsverði og góð verðlaun í boði. Keppendur eru hvattir til að skrá sig sem fyrst á Facebook-síðu viðburðarins: https://www.facebook.com/events/172174339888234/

Á myndinni eru starfsmenn Stofunnar, Ísidór og Alla, með verðlaunagrip mótsins.