Óliver Aron meðal efstu manna - Nansý og Kristján Dagur mokuðu inn stigum á Västerås Open 2016. Pistill Helga Árnasonar fararstjóra

Þriðja árið í röð bauð Skákdeild Fjölnis sínum efnilegustu og virkustu ungmennum til Svíþjóðar með styrk og stuðningi íslenskra fyrirtækja og forystumanna sænska skáksambandsins. Í fyrra tók hópurinn þátt í æfingabúðum og landskeppni við sænska unglingalandsliðið í Uppsala. Nú fór 9 manna hópur til Västerås helgina 23. – 26. september til þátttöku í Västerås Open, fjölmennasta alþjóðlega skákmóti Norðurlanda (350) sem haldið var í 8. skipti. Ungmennin voru þarna á kunnugum slóðum því að allt frá árinu 2012 hefur Skákdeild Fjölnis sent efnilega þátttakendur á þetta fjölmenna helgarskákmót sem þykir afar skemmtilegt og vel skipulagt. Västerås er afar fallegur og vinalegur bær í um tveggja tíma akstursfjarlægð frá Stokkhólmi.

Alls eru tefldar 8 umferðir á Västerås Open, fjórar atskákumferðir og fjórar keppnisskákir. Teflt er í tveimur flokkum, opnum flokk og flokki skákmanna undir 1600 stigum. Í opna flokknum tefldu þau Dagur Ragnarsson, Oliver Aron Jóhannesson, Jón Trausti Harðarson, Dagur Andri Friðgeirsson, Hörður Aron Hauksson og Nansý Davíðsdóttir. Í undir 1600 tefldu þeir Kristófer Jóel Jóhannesson, Joshua Davíðsson og Kristján Dagur Jónsson. Hópurinn er á aldrinum 11 – 23 ára og hefur alist upp og keppt undir merkjum Fjölnis allt frá barnaskólaaldri. Helgi Árnason formaður skákdeildar Fjölnis og Davíð Hallsson voru fararstjórar.

 

Flestir af sterkustu skákmönnum Svíþjóðar tóku þátt í mótinu, Emanuel Berg, Erik Blomqvist, Tiger Hillarp Petersen, Jonathan Westenberg, Johnny Hector, Aryan Tari að ógleymdri skákdrottningunni og heimsmeistaranum Piu Cramling. Almennt virtist styrkleiki andstæðinga vera hagstæður efnilegum íslenskum skákmönnum til að safna stigum og tefla við sterka 2000+ skákmenn og aðra sem hafa verið þeim samferða á Norðurlandamótum grunnskóla í sveita og  einstaklingskeppni. Íslenski hópurinn samanstóð nokkuð af sama hópi og fór á Västerås Open 2014 og framfarirnar sýndu sig í því að í flestum umferðum í ár voru íslensku keppendurnir að tefla um eða vel fyrir ofan miðju.

Bestum árangri náði Oliver Aron sem tefldi mjög vel og hlaut 6 vinninga af 8. Hann tapaði aðeins fyrir alþjóðameisturunum Jonathan Westenberg (2491) og Lars Oskar Hauge (2385), ungstirninu norska, sem náði toppárangri og reyndist efstur í lokin. Oliver Aron varð einnig efstur allra í "rating 2" stigaflokknum. Þrátt fyrir flensukvilla allan tímann þá tefldi Jón Trausti Harðarson mjög vel en Dagur Ragnarsson vildi gera betur í lokin eftir að hafa byrjað mótið með sigri í 3 fyrstu skákunum. Nansý Davíðsdóttir (1842) nýtti sér það tækifæri sem hún fékk að tefla upp fyrir sig í öllum skákum og hækkaði um 63 skákstig án mikillar fyrirhafnar. Hún varð nr 2 í "rating" 13 líkt og Hörður Aron í „rating 12“. Í flokki undir 1600 var það Kristján Dagur Jónsson (1251)(TR) sem nýtti sér stigahærri andstæðinga best, hlaut 4,5 vinninga og hækkaði sig um 69 skákstig. Glæsileg frammistaða hjá þessum 11 ára skákmanni sem sýndi þrautseigju í 5. umferð þegar hann tefldi í rúma 4 klst. í erfiðri stöðu en knúði fram jafntefli.  Úr þeim 72 skákum sem íslenski hópurinn tefldi fengust 41 vinningur.

Boðsferðir Fjölnis eru ekki síður ætlaðar til að efla hópinn og styrkja Fjölnishjartað. Þar stendur hópurinn vissulega undir einkunnaorðum FIDE, "Við erum ein fjölskylda". Það voru Landsnet, Íslandsbanki og Skáksamband Íslands sem styrktu Fjölni til þessarar glæsilegu ferðar. Skákdeild Fjölnis vill koma á þakklæti til þessara aðila fyrir ómetanlegan stuðning. Skákdeildin naut aðstoðar André Nilsen mótsstjóra í Västerås við hótelgistingu á Stadshótelinu og skráningu á sérkjörum. 

Dawid Kolka skákmeistari Hugins

Aukakeppnin um titilinn skákmeistari Hugins fór fram sl. laugardag. Þar tefldu Dawid Kolka, Heimir Páll Ragnarsson og Óskar Víkingur Davíðsson um titilinn en þeir voru allir jafnir á meistaramótinu með 4v efstir Huginsmanna. Tefld var tvöföld umferð með umhugsunartímanum 15 mínútur á skák + 5 sekúndur á leik. Dawid tók strax í fyrri hlutanum forystu með því að vinna báðar skákirnar. Fyrri skákin við Heimi Pál Ragnarsson var samt eina skákin sem hann lenti í einhverjum erfiðleikum. Þegar leið á skákina og tíminn minnkaði þá var Dawid fljótari og öruggari að leika og innbyrti fyrir rest mikilvægan vinning. Í seinni hlutanum var þetta engin spurning og Dawid tryggði sér öruggan og verðskuldaðan sigur í aukakeppninni með 3,5v af fjórum mögulegum. Dawid Kolka er því skákmeistari Hugins 2016 á suðursvæði og í annað sinn sem hann vinnur þennan titil því á árinu 2014 varð hann einnig skákmeistari Hugins.

Jafnteflið í aukakeppninni gerði Dawid við Óskar Víking Davíðsson. Það má með sanni segja að þeir hafi dottið um jafnteflið. Dawid hafði lengi skákarinnar staðið til vinnings en þegar tíminn var orðinn lítill og þeir búnar að tefla nokkurn tíma á viðbótartímanum þá verða uppskipti og allt í einu kemur upp staðan á stöðumyndinn hér fyrir neðan. Óskar var að leika c4 og bauð jafntefli um leið, áður en Dawid uppgötvaði að hægt var að vinna skákina með því leika b peðinu ofan í tvöfalda peðsvaldið á b5 og mynda þannig nýtt frípeð langt frá valdaða frípeðinu sem tryggir öruggan sigur. Jafntefli var því niðurstaðan í skákinni en það skipti ekki máli þegar upp var staðið.

Búið er finna út hverjir unnu til aukaverðlauna á Meistarmóti Hugins en það eru:

• Skákmeistari Hugins, kr. 10.000: Dawid Kolka
• Undir 2000, bók hjá Skákbókasölunni kr. 5.000: Heimir Páll Ragnarsson
• Undir 1800, bók hjá Skákbókasölunni kr.  5.000: Óskar Víkingur Davíðsson
• Undir 1600  bók hjá Skákbókasölunni kr. 5.000: Héðinn Briem.
• Sigalausir, bók hjá Skákbókasölunni kr. 5.000: Jóhann Bernhard Jóhannsson

Unglingaverðlaun:

1. Bók hjá Skákbókasölunni kr. 5.000: Alexander Oliver Mai
2. Bók hjá Skákbókasölunnii kr. 4.000: Aron Þór Mai
3. Bók hjá Skákbókasölunni kr. 4.000: Stephan Briem

Vinningshafar velja sér bók við hæfi hjá Skákbókasölunni.

Búið er sameina allar færslur á innslætti skáka þannig að allar umferðir eru komnar saman í eina skrá. Hægt er að nálgast allar skákirnar á heimasíðu Hugins. 

Hjörvar sigurvegari minningarmóts Guðmunds Arnlaugssonar

Vel heppnað minningarmót um Guðmund Arnlaugsson var haldið í Menntaskólanum við Hamrahlíð í gær. Mótið hófst með því að Lárus H. Bjarnason, rektor MH, hélt snjalla ræða. Að því loknu minntist Friðrik Ólafsson Guðmundar. Friðrik valdi þá skemmtilega nálgun að fjalla um tiltekið skákdæmi og sýndi dæmi úr tefldri skák Uhlmanns og Tönju Sadchev þar sem staðan úr skákdæminu hefði getað komið upp. Friðrik nefndi það í tali sínu að meistara Guðmund að hann hafi verið snillingur í hinu fagurfræðilega og því vel tilheyrandi að vera með skákdæmi.

Að því loknu hófst sjálft skákmótið. Mótið var gríðarlega vel skipað en sjö stórmeistarar voru meðal keppenda! Hjörvar Steinn og Helgi Áss voru í gríðarlegu stuði og unnu fimm fyrstu skákirnar. Í sjöttu umferð gerðu þeir svo jafntefli í sjöttu umferð.  Eftir 9 umferðir hafði Hjörvar 8½ vinning en Helgi 8 vinninga. Þá tapaði Hjörvar fyrir Magnúsi Erni en það kom ekki að sök þar sem Helgi Áss tapaði fyrir Þresti í sömu umferð. Þeir unnu báðir í lokaumferðinni. Hjörvar, sem var stigahæstur keppenda, lét fyrsta borðið aldrei af hendi.

Hjörvar fékk 9½ vinning, Helgi Áss fékk 9 vinninga og Þröstur tók þriðja sæti með góðum endaspretti með 8½ vinning.

Helgi Ólafsson varð fjórði með 8 vinninga og Arnar Gunnarsson og Magnús Örn Úlfarsson urðu í 5.-6. sæti með 7½ vinning.

Skákstjóri var Gunnar Björnsson. Það er Menntaskólinn við Hamrahlíð og Skáksamband Íslands sem stóðu að sameiningu að mótshaldið. Mótið var hluti af 50 ára afmælishátíð skólans en Guðmundur var fyrsti rektor skólans.

Lokastöðu mótsins má finna á Chess-Results.

Tvíklikka á myndina til að sjá í betri upplausn

Fjölniskrakkar gerðu það gott í Västerås

Níu íslensk ungmenni á vegum Skákdeildar Fjölnis tóku þátt í alþjóðlegu móti í Västerås í Svíþjóð sl. helgi. Oliver Aron Jóhaannsson (2555) stóð sig best íslensku ungmennina og endaði í 13.-20. sæti með 6 vinninga í 8 skákum.  Nansý Davíðsdóttir og Kristján Dagur Jónsson mokuðu inn skákstigunum en Nansý hækkaði um 63 skákstig og Kristján Dagur um 69 skákstig.

Árangur íslensku krakkanna varð sem hér segir:

A-flokkur

Oliver Aron Jóhannsson 6 v. af 8
Dagur Ragnarsson 5 v.
Nansý Davíðsdóttir og Jón Trausti Harðarson 4½ v.
Hörður Aron Hauksson 4 v.
Dagur Andri Friðgeirsson 3½ v.

B-flokkur:

Kristján Dagur Jónsson og Kristófer Jóel Jóhannesson 4½ v.
Joshua Davíðsson 4 v.

• Heimasíða mótsins
• Úrslitaþjónusta (svenska Chess-Results)

Andri Freyr og Jón Kristinn efstur á Haustmóti SA

Þriðja umferð Haustmóts Skákfélags Akureyrar fór fram í gær. 

Úrslit 3. umferðar:

• Jón Kristinn-Sigurður A     1-0
• Sigurður E-Andri Freyr      1-0
• Hreinn-Elsa María           1/2
• Karl-Haki                   1/2
• Fannar-Hilmir               1-0
• Arnar-Gabríel, frestað til miðvikudags.

Í A-úrslitum eru Jón Kristinn og Andri efstir með tvo vinninga, en Sigurðar og Hreinn koma á hæla þeim með 1,5.

Í B-úrslitum eru fóstbræður H og K efstir með 2,5 vinning og kemur hinn 11 ára gamli Fannar Breki á hæla þeim með 2.

Mótinu verður nú frestað framyfir Íslandsmót skákfélag og fjóra umferð tefld þann 9. október.

Nánar á Chess-results:

• A-úrslit
• B-úrslit
• Heimasíða SA

Verkís (Ingvar Þór sigraði á Kringluskákmóti Víkingaklúbbsins.

Ingvar Þór Jòhannesson sem telfdi fyrir Verkfræðistofuna Verkís kom sá og sigraði á Kringluskákmótinu sem fram fór fimmtudaginn 22. september. Ingvar fékk sjö vinninga af átta mögulegum. Annar varð stórmeistarinn Hannes Hlífar Stefánsson sem telfdi fyrir Þórshús með 6.5 vinninga af 8 mögulegum. Þriðji varð svo alþjóðameistarinn Arnar Gunnarsson sem telfdi fyrir hið íslenska reðursafn, en hann hlaut 6 vinninga. Efstur Víkinga varð Lárus Ari Knútsson með 5.5 vinninga og hlýtur hann því titilinn Hraðskákmeistari Víkingaklúbbsins. 2016. Efst kvenna varð Lenka Ptácníková. Alls tóku 35 keppendur og 35 fyrirtæki þátt í mótinu. Telfdar voru 8. umferðir með 5. mínútna umhugsunartíma og skákstjóri var Páll Sigurðsson.

Mótið á chess-Results hér:

Úrslit:


1 Verkís, Ingvar Þór Jóhannesson 7
2 Þórshús, Hannes Hlífar Stefánsson 6.5
3 Hið íslenska reðursafn, Arnar Gunnarsson 6
4 Suzuki bílar, Magnús Örn Ùlfarsson 5.5
5 Hamborgarabúllan, Tómas Björnsson 5.5
6 Skrudda, Dagur Ragnarsson 5.5
7 Billjardbarinn, Lárus Knútsson 5.5
8 Gallabuxnabúðin, Davíð Kjartansson 5
9 Bónus Kringlunni, Ólafur B. Þórsson 5
10 Happahúsið, Vignir Vatnar Stefánsson 5
11 Guðmundur Arason ehf, Kristján Örn Elíasson 4.5
12 Boozst barinn, Páll Andrason 4.5
13 Rikki Chan, Gunnar Fr Rúnarsson 4.5
14 Spútnik, Hjörtur Yngvi Jóhannsson 4.5
15 Skóarinn, Stefán Þór Sigurjónsson 4.5
16 Bæjarbakarí, Jóhann Ingvason 4.5
17 Henson, Lenka Ptcnikova 4
18 Happahúsið, Björgvin Smári Guðmundsson 4
19 Dunkin Donuts, Sturla Þórðarson 4
20 Blómabúðin Kringlunni, Halldór Pálsson 4
21 Dúka, Sigurður Freyr Jónatansson 4
22 Jón og Óskar, Sigurður Ingason 3.5
23 Sjóvá, Haraldur Baldursson 3.5
24 Betra líf, Jon Olav Fivelstad 3.5
25 Kringlukráin, Halldór Kristjánsson 3.5
26 Bygging ehf, Ingi Tandri Traustason 3.0
27 Húrra diskótek, Arnljótur Sigurðsson 3.0
28 Kex Hostel, Hjálmar Sigvaldason 3.0
29 Neon, Smári Arnarson 3.0
30 Prentlausnir, Pétur Jóhannesson 3.0
31 Efling, Björgvin Kristbergsson 3.0
32 Dekurstofan, Finnur Finnsson 2.5
33 GM EInarsson, Hörður J'onsson 2.5
34 Dressmann, Jón Einar Karlsson 2.0
35 Finnska búðin, Marlon Lee Pollock 1.0

Myndir á heimasíðu Víkingsklúbbsins

Atkvöld hjá Hugin í kvöld

Atkvöld verður hjá Huginn mánudaginn 26. september 2016 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 3 mínútur + 2 sekúndur á hvern leik. Síðan verða  þrjár atskákir með umhugsunartímanum fimmmtán mínútur + 5 sekúndur á hvern leik.. Teflt er í félagsheimili Hugins í Álfabakka 14a í Mjóddinni. Mótið verður reiknað til hraðskák- og atskákstiga.

Sigurvegarinn á atkvöldinu fær í verðlaun máltíð fyrir einn á Saffran eða pizzu frá Dominos. Einnig verður dreginn út af handahófi annar keppandi sem fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Mai-bræðrum halda engin bönd í Haustmótinu

Stuttum fyrri hálfleik Haustmótsins lauk með 3.umferð á föstudagskvöld. Framundan er mótshlé vegna Minningarmóts Guðmundar Arnlaugssonar sem og vegna Íslandsmóts skákfélaga. Næsta umferð, sú fjórða, verður tefld 5.október.

A-flokkur

Það var einmannalegt um að litast á pallinum er 3.umferð var tefld í gær því fjórum af fimm skákum var frestað vegna anna skákmanna utan landsteinanna. Vignir Vatnar Stefánsson var þó mættur til leiks og stýrði hann hvítu mönnunum til sigurs gegn Gauta Páli Jónssyni. Var það fyrsta sigurskák Vignis Vatnars í mótinu og hefur hann nú hlotið 1,5 vinning. Frestaðar skákir verða tefldar næstkomandi mánudagskvöld kl.19:30.

B-flokkur

Mai-bræðrum halda engin bönd í B-flokki. Aron Þór Mai (1845) er einn efstur með fullt hús vinninga eftir sigur á Halldóri Kristjánssyni (1649). Þá gerði Alexander Oliver Mai (1656) jafntefli með svörtu við landsliðskonuna Veroniku Steinunni Magnúsdóttur (1777) og hefur Alexander því hlotið 2,5 vinning. Alexander situr í 2.sæti ásamt Magnúsi Kristinssyni (1833) sem lagði Jón Þór Lemery (1591) að velli. Loks vann Stephan Briem (1569) góðan sigur á Sigurlaugu R. Friðþjófsdóttur (1802). Þrátt fyrir ágæta taflmennsku Stephans í fyrstu tveimur umferðunum þá var uppskeran rýr, svo sigurinn í gær var vafalítið kærkominn fyrir hann.

Úrslit 3.umferðar:

Bo.	No.	Rtg		Name	Result		Name	Rtg	No.
1	2	1591		Lemery Jon Thor	0 – 1		Kristinsson Magnus	1833	10
2	3	1845		Mai Aron Thor	1 – 0		Kristjansson Halldor	1649	1
3	4	1802		Fridthjofsdottir Sigurl. Regi	0 – 1		Briem Stephan	1569	9
4	5	1867		Hauksson Hordur Aron			Luu Robert	1672	8
5	6	1777		Magnusdottir Veronika Steinun	½ – ½		Mai Alexander Oliver	1656	7

Opinn flokkur

Ólafur Evert Úlfsson (1464) gefur andstæðingum sínum engin grið í Opna flokknum og fórnarlamb hans í 3.umferð var Ingvar Egill Vignisson (1554). Ólafur Evert hefur unnið allar þrjár skákir sínar. Héðinn Briem (1563) hefur unnið báðar sínar skákir, en skák hans úr 2.umferð var frestað. Í gær vann hann Tryggva K. Þrastarson (1450). Það var Vinaskákfélagsslagur í gær þar sem Hjálmar Sigurvaldason (1485) mætti Herði Jónassyni (1532) og lyktaði viðureigninni með jafntefli. Benedikt Briem (1093) heldur áfram að hrekkja stigahærri mótherja því í gær gerði hann jafntefli við Halldór Atla Kristjánsson (1417). Benedikt er því enn taplaus í Opna flokknum.

Úrslit 3.umferðar:

Bo.	No.		Name	Rtg	Pts.	Result	Pts.		Name	Rtg	No.
1	3		Vignisson Ingvar Egill	1554	2	0 – 1	2		Ulfsson Olafur Evert	1464	6
2	5		Sigurvaldason Hjalmar	1485	2	½ – ½	2		Jonasson Hordur	1532	4
3	7		Thrastarson Tryggvi K	1450	1½	0 – 1	1		Briem Hedinn	1563	2
4	8		Kristjansson Halldor Atli	1417	1½	½ – ½	1½		Briem Benedikt	1093	18
5	9		Magnusson Thorsteinn	1415	1	½ – ½	1		Davidsson Stefan Orri	1386	10
6	11		Heidarsson Arnar	1340	1	1 – 0	1		Hakonarson Oskar	0	24
7	23		Haile Batel Goitom	0	1	0 – 1	1		Baldursson Atli Mar	1167	15
8	22		Moller Tomas	1028	1	1 – 0	½		Thorisson Benedikt	1169	14
9	17		Karlsson Isak Orri	1148	½	1 – 0	½		Kristbergsson Bjorgvin	1081	20
10	19		Gudmundsson Gunnar Erik	1082	½	½ – ½	0		Olafsson Arni	1156	16
11	13		Alexandersson Orn	1217	0	1 – 0	0		Omarsson Adam	1065	21
12	1		Bjarnason Arnaldur	1647	1	0			not paired
13	12		Hakonarson Sverrir	1338	½	0			not paired

 

Nánari upplýsingar um mótið má nálgast á chess-results. Skákir Haustmótsins eru aðgengilegar hér (pgn):#1, #2, #3

4.umferð verður tefld miðvikudagskvöldið 5.október kl.19:30. Allar ótefldar skákir til þessa verða tefldar mánudagskvöldið 26.september kl.19:30.

Myndskreytta frásögn má finna á heimasíðu TR.

• Heimasíða TR
• Chess-Results

Minningarmót um Guðmund Arnlaugsson hefst kl. 14 - enn hægt að skrá sig til leiks

Í tilefni 50 ára afmælis Menntaskólans við Hamrahlíð verður verður haldið minningarmót um Guðmund Arnlaugsson, fyrrum rektor skólans, sunnudaginn 25. september. Skákmótið er síðasti viðburður afmælisdagskrár sem nær yfir dagana 19.–25. september. Heildarverðlaun eru 100.000 kr. og tefldar verða 11 umferðir með umhugsunartímanum 4+2. Eldri nemendur úr MH er boðnir sérstaklega velkomnir til leiks en mótið er opið öllum.

Meðal þegar skráðra keppenda má nefna stórmeistarana: Jóhann Hjartarson, Hjörvar Stein Grétarsson, Jón L. Árnason, og Þröst Þórhallsson.

Mótið hefst kl. 14 og teflt verður í hátíðarsal skólans. Í upphafi móts verður Friðrik Ólafsson, fyrsti stórmeistari Íslendinga, með stuttan fyrirlestur um mikilvægi Guðmundar fyrir íslenskt skáklíf. 

Verðlaun eru sem hér segir: 

1. 50.000 kr.
2. 30.000 kr.
3. 20.000 kr.

Verðlaunum verður skipt eftir Hort-kerfinu. 

Þrenn bókarverðlaun verða veitt fyrir bestan árangur ungmenna fædd 2001 og síðar.

Þátttökugjöld eru kr. 1.000 og er hægt að leggja þau inn á reikning 101-26-12763, kt. 580269-5409 fyrir mót eða greiða með reiðufé á skákstað.

Mótið verður reiknað til alþjóðlegra hraðskákstiga. 

Skráning fer fram á www.skak.is (guli kassinn). Upplýsingar um þegar skráða keppendur má finna hér.

Mótið á Chess-Results.

Skákþáttur Morgunblaðsins: Óvænt endalok á afmælismóti Taflfélags Vestmannaeyja

Taflfélag Vestmannaeyja var stofnað fyrir 90 árum og enginn kann betur sögu þess en Arnar Sigurmundsson, núverandi formaður félagsins og aðalskipuleggjandi dagskrár vegna afmælisins, sem náði hámarki með afmælismóti TV um síðustu helgi. Arnar var 13 ára gamall þegar TV var endurvakið árið 1957. Á dögunum stóð TV fyrir útgáfu sérrrits um sögu félagsins sem dreift var með Fréttum og í það ritaði, auk Arnars, Karl Gauti Hjaltason, sem rakti einhverja mögnuðustu sókn fram á við sem um getur þegar ungmenni úr Eyjum studd af vel virkum foreldrum, skólayfirvöldum og góðum leiðbeinendum tóku skákina með trompi í hinum ýmsum skólakeppnum innanlands og utan í keppni við bestu grunnskóla Skandinavíu á Norðurlandamótum. Karl Gauti hefur einnig vakið athygli á því að meðal félagsmanna TV um miðja síðustu öld var Björn Kalman sem margir telja að sé fyrirmyndin að hr. B í sögu Stefan Zweig, Manntafl.

Afmælismótið dró til sín marga skákmenn sem voru virkir á öðrum blómatíma skákarinnar í Eyjum rétt fyrir gos og hafa haldið tryggð við skákgyðjuna síðan. Alls voru keppendur 24 talsins og við athugun kom í ljós að sjö þeirra höfðu á einhverjum tíma gegnt formennsku, auk Arnars þeir Andri Hrólfsson, Einar B. Guðlaugsson, Óli Á. Vilhjálmsson, Stefán Gíslason, Ólafur Hermannsson og Ægir Páll Friðbertsson. Á mótinu var hvert borð merkt með númerum úr krossvið sem smíðuð voru sérstaklega fyrir keppnir milli Austurbæjar og Vesturbæjar í Eyjum uppúr 1960.

Á mótinu voru tefldar níu umferðir og efstir urðu:

1. Helgi Ólafsson 8 v. (af 9) 2.-3. Davíð Kjartansson og Oliver Aron Jóhannesson 6½ v. 4.-6. Stefán Bergsson, Sævar Bjarnason og Ólafur Hermannsson 5½ v. 7.-10. Elvar Guðmundsson, Einar B. Guðlaugsson, Vigfús Vigfússon og Hörður Aron Hauksson 5 v.

Af úrslitunum mætti draga þá ályktun að sigur undirritaðs hafi verið öruggur en það gekk á ýmsu. Skákin við Elvar Guðmundsson tók undarlega stefnu þegar sóknartilburðir svarts virtust vera að renna út í sandinn og Elvar með tvær drottningar á borðinu:

90 ára afmælismót TV; 4. umferð:

Elvar Guðmundsson – Helgi Ólafsson

Slavnesk vörn

1. d4 d5 2. c4 c6 3. Rf3 Rf6 4. e3 Bf5 5. Rc3 e6 6. Bd3 Bxd3 7. Dxd3 Rbd7 8. O-O Be7 9. e4 dxe4 10. Rxe4 Rxe4 11. Dxe4 O-O 12. b3 a5 13. Bb2 a4 14. Hfd1 Db6 15. Dc2 Bf6 16. g3 Hfd8 17. Kg2 h6 18. Hd3 axb3 19. axb3 Hxa1 20. Bxa1 Da6 21. Bc3 Ha8 22. Hd1 b5 23. d5 cxd5 24. Ha1 Db7 25. Hxa8+ Dxa8 26. Bxf6 Rxf6 27. cxb5 Da7 28. Dc8+ Kh7 29. Da6 Dc5 30. Dc6 Db4 31. b6 Re4 32. Dc7 Dxb3 33. b7 Db2

34. Rd2!

„Elvar bombaði riddaranum ofan í bæði drottningu og riddara Helga. Sú sleggja knúði fram unnið tafl,“ stóð skrifað á skak.is.

34. ... Dxd2 35. Df4! De2 36. b8(D) Rd2!

Hótar 37. .. Df1 mát.

37. h4 Df1+ 38. Kh2 De2 39. Dxf7!

Best en ég átti allt eins von á 39. g4 f5 með hugmyndinni 40. gxf5? e5! o.s.frv.

39. ... Rf3+

Kóngurinn á tvær leiðir – önnur leiðir til sigurs – hin til glötunar!

40. Kh3?

40. Kg2! vinnur.

40. ... Df1+ 41. Kg4 Rh2+! 42. Kh5 De2+ 43. f3 Dxf3+ 44. Dxf3

Og hér héldu margir að svartur yrði að taka drottninguna en þá kom...

44. ... g6 mát!

Óvænt endalok. Lokastaðan á síðasta orðið um 90 ára afmælismót Taflfélags Vestmannaeyja.

Helgi Ólafsson [e-mail]

Grein þessi birtist í Morgunblaðinu 17. september 2016

Skákþættir Morgunblaðsins