Skákþáttur Morgunblaðsins: Dagur vann úrslitaskákina um sæti í landsliðsflokki

Þegar lokaumferðin í áskorendaflokki fór fram um síðustu helgi lá ljóst fyrir að enginn gat náð Guðmundi Gísalsyni að vinningum. Hann hafði hlotið 7 ½ vinning úr átta skákum og langt í næstu menn. Tvö sæti í landsliðsflokki voru í boði og ýmsir möguleikar í stöðunni. Jóhann Ingvason stóð vel að vígi ef kæmi til stigaútreiknings en varð þó að vinna skák sína gegn Tómasi Björnssyni til að vera öruggur með sæti í landsliðsflokknum. Þá áttust við Lenka Ptacnikova og Dagur Ragnarsson og gátu bæði með sigri unnið sæti í landsliðsflokknum ef önnur úrslit yrðu þeim hagfelld. Og eftir mikla baráttu vann Dagur sína skák, Jóhann varð að gera sér jafntefli að góðu og á toppborðinu dró til tíðinda þegar Bolvíkingurinn Halldór Grétar Einarsson vann sigurvegarann. Ekki í fyrsta sinn sem þeir heiðursmenn Halldór og Guðmundur Gíslason eigast við. En þessi úrslit breyttu þó litlu um lokaniðurstöðuna:

1. Guðmundur Gíslason 7 ½ v. (af 9) 2. Dagur Ragnarsson 6 ½ v. 3. Jóhann Ingvason 6 v. 4. – 7. Björgvin Víglundsson, Halldór Grétar Einarsson, Kristján Eðvarðsson og Lenka Ptacnikova 5 ½ v.

Keppendur voru 22 talsins.

Þrír ungir men taka nú sæti í landsliðsflokki, auk Dags, þeir Vignir Vatnar Stefánsson og Bárður Örn Birkisson. Verður skemmtilegt að fylgjast með taflmennsku þeirra. Dagur missti af lestinni í fyrra en mætir nú enn sterkari á þennan vettvang. Hann náði snemma frumkvæðinu í úrslitaskákinni og vann sannfærandi sigur:

Skákþing Íslands 2017; 9. umferð:

Lenka Ptacnikova – Dagur Ragnarsson

Vængtafl

1. c4 c6 2. Rf3 d5 3. b3 Bg4 4. Re5 Bh5 5. Bb2 f6 6. Rf3 e5 7. cxd5 exd5 8. g3 Bd6 9. Bg2 Re7 10. O-O O-O 11. d3 Rbc6 12. Rc3 Dd7 13. a3 a5 14. Rb5 Bb8 15. a4 Ra7 16. Rxa7 Bxa7 17. d4?

Þessi leikur er verri en enginn. Það er smá galli við vængtöflin að hvítur á stundum erfitt með að finna haldgóða áætlun eftir byrjunarleikina.

17. e4 18. Rd2 b5 19. f3? f5

Eðlilegur leikur en sterkara er 19. e3! 20. Rb1 b4! og riddarinn á b1 getur sig hvergi hrært.

20. e3 b4!

Þenur út áhrifasvæði sitt. Það kemur líka á daginn a biskupinn á b2 hefur ekkert svæði að vinna með.

21. Hc1 g5 22. De1 Hae8 23. f4 gxf4 24. gxf4 Rg6 25. Df2 Bb6 26. Hc2 Bd8 27. Hfc1 Rh4 28. Kh1 He6 29. Bf1 Hg6 30. Bb5 Df7 31. Hc6 Hg2 32. Hg1 Hxg1+ 33. Kxg1 Kh8 34. Hc8 Rf3 35. Rxf3 exf3!

Einnig kom til greina að tala við biskup. En úr þessu er ekki nokkur leið fyrir hvítan að verjast. 

36. Kf1 De6 37. Hxd8 Hxd8 38. Dh4 Hg8 39. Dxh5 Dxe3 

Hvítur getur varist máti með því að gefa drottninguna en það er vitaskuld algerlega vonlaust svo Lenka lagði niður vopnin.

 

Wesley So sigraði á bandaríska meistaramótinu

„Skytturnar þrjár“, Wesley So, Hikaru Nakamura og Fabiano Carurana, áttu ekki sjö dagana sæla á bandaríska meistaramótinu sem lauk í St. Louis um síðustu helgi. Eftir ellefu umferðir varð So að deila efsta sæti með Alexander Onischuk en þeir hlutu 7 vinninga af af ellefu mögulegum. Þeir þurftu að tefla tvær atskákir um sæmdarheitið Skákmeistari Bandaríkjanna 2017. So sigraði 1 ½ :½ og bætti þar með enn einni rósinni í hnappgatið. Nakamura og Caruana urðu í 3.-5. sæti ásamt Akobian en þeir fengu allir 6 ½ vinning.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 15. apríl 2017

Skákþættir Morgunblaðsins

Dagskrá dagsins: Fimmta umferð, úrslit Barna Blitz og Pub Quiz - Hannes teflir við Jobava

Í gær og dag eru stærstu dagar á skákhátíðinni Reykjavíkurskákmótinu. Í gær fór fram fjölmennt hraðskákmót og tveir fyrilestar fyrir utan fjórðu umferð. Mikil stemming var í Hörpu og var skákskýringasalurinn þétt setinn í gær. Búast má við enn betri aðsókn um helgina. 

Í dag verður afar mikið um vera. Úrslit Barna Bltiz hefjast núna kl. 11:00. þar tefla átta íslenskir skákmenn til úrslita. Það eru: Óskar Víkingur Davíðsson, Stefán Orri Davíðsson, Róbert Luu, Ísak Orri Karlsson, Balthazar Máni Wedholm Gunnarsson, Kristján Dagur Jónsson, Arnór Gunnlaugsson og Benedikt Þórisson keppea eftir úsláttarfyrirkomulagi Krakkarnir tóku þátt í undankeppnum sem haldnar voru í TR, Hugin, Víkingaklúbbnum og Fjölni. Mótið stendur til u.þ.. 12:30 og eru áhorfendur velkomnir.

Umferð dagsins hefst kl. 15.  Hannes Hlífar Stefánsson (2566) fær krefjandi verkefni en hann teflir við georgíska ofurstórmeistarann Baadur Jobava (2712), Jóhann Hjartarson (2536) mætir Vigni Vagnari Stefánssyni (2341), Halldór Grétar Einarsson (2257) teflir við indverska undrabarnið Nihal Sarin (2424). 

RÚV fjallaði um indversku undradrengina í gær. Þá frétt má nálgast hér.

 

Skákskýringar Ingvars Þórs Jóhaannessar hefjast kl. 17.

Pub Quiz sem eru iðulega væusælasti sérviðburður mótsins fer fram Hótel Plaza í kvöld og hefst kl. 21:30. Nánar um vibðurinn hér.

Beinar útsendingar á vefnum hefjast kl. 15. Þær eru í umsjón Simon Williams og Fionu Steil-Antoni.

 

• Heimasíða mótsins
• Úrslit og paranir
• Beinar útsendingar á vefnum

Mustafa Yilmaz sigurvegari á Reykjavik Open Blitz

Tyrkneski stórmeistarinn Mustafa Yilmaz kom sá og sigraði á hraðskákmóti Reykjavík Open - Reykjavik Open Blitz.

Alls mættu til leiks 68 skákmenn tilbúnir að kljást á reitunum 64 þó nokkrir hafi helst úr lestinni snemma móts.

Eftir nokkra hnökra í byrjun rann mótið hratt í gegn en tefldar voru 9 umferðir með umhugsunartímanum 3+2 eða 3 mínútur á skákina plus 2 sekúndur í viðbótartíma á hvern leik.

Mustafa lét snemma til sín taka og vann allar sínar skákir snemma móts. Nokkrir fylgdu á eftir í humátt og sérstaklega byrjuðu Björn Þorfinnsson og Vignir Vatnar vel með fjóra vinninga af fjórum. Björn lagði að velli Luca Barillaro sem hafði farið skemmtilega af stað og lagt að velli stórmeistarana Helga Áss Grétarson og Simon Williams.

Yilmaz gaf lítið eftir og gaf í raun í og hafði lagt alla andstæðinga sína að velli eftir 8 umferðir. Tyrkinn átti sgurinn vísan fyrir síðustu umferð.

Baráttan um hin verðlaunasætin tvö var hinsvegar mjög hörð en þar hafði Svíinn Erik Blomqvist átt góðan endasprett og var kominn í annað sætið meðan Björn Þorfinnsson sat í því þriðja.

Björn átti erfiða skák gegn Aman Hambleton sem var hálfum vinningi á eftir honum ásamt fjölmörgum öðrum.

Blomqvist og Yilmaz tryggðu sín verðlaun með stuttu jafntefli í síðustu umferð en Björn sýndi úr hverju hann er gerður og lagði Aman Hambleton að velli og tryggði veru sína á verðlaunapalli.

Stemmning var almennt mjög góð og menn höfðu gaman að taflmennskunni. Vert er einnig að minnast á góðan árangur Arnljóts Sigurðssonar sem lagði hvern meistarann á fætur öðrum.

Úrslit má nálgast á Chess-results

 

Fimm enn með fullt hús

Fimm skákmenn standa enn eftir með fullt hús eftir fjórðu umferð á GAMMA Reykjavíkurskákmótinu sem lauk í kvöld í Hörpu. Hollenska stórstirnið Anish Giri heldur sínu striki og er í hópi efstu manna ásamt þeim Gawain Jones, Nils Grandelius, Vidit Santosh Gujrati og sigurvegaranum frá því í fyrra, Abhijeet Gupta. Vidit þessi lagði einmitt Jóhann Hjartarson að velli í snarpri skák þar sem sá indverskri sá lengra í flækjunum.

Giri lagði landa sinn Jorden van Foreest í tæknilegu endatafli þar sem Giri sýndi af hverju hann er meðal fremstu skákmanna í heimi. 

Íslandsvinirnir Gawain Jones og Nils Grandelius unnu báðir flott sigra. Gawain er í miklu stuði en hann vann nýlega feikisterkt opið mót í Dubai. Nils vann gríðarlega tæknilegt endatafl með hrók gegn biksup og peði þar sem hann hrakti kóng andstæðings síns yfir borðið áður en hann gat tekið peð hans og vakið upp drottningu þrátt fyrir að eiga aðeins kantpeð eftir. Skák sem er lærdómsríkt að skoða.

Loks er Abhijeet Gupta enn og aftur að sýna styrkleika sinn og stefnir á að endurtaka leikinn frá því í fyrra.

Hannes Hlífar Stefánsson er orðinn eftur Íslendinga með þrjá og hálfan vinning og er í stórum hópi skákmanna sem koma í humátt á eftir efstu mönnum. Fjöldi Íslendinga er svo með þrjá vinninga.

Fimmta umferð er á morgun klukkan 15:00 og skákskýrngar hefjast að venju klukkan 17:00. Mjög áhugaverðar viðureignir verða á efstu borðum sem gaman verður að fylgjast með. Vidit mætir Giri og Hannes fær erfiða skák með svörtu gegn Jobava.

 

Heimasíða mótsins

Bein útsending með Fionu og Simon Williams

Úrslit og paranir

 

GAMMA Reykjavíkurskákmótið: Dagskrá dagsins - umferð, fyrirlestrar, hraðskákmót og Friðrik með skákskýringar

Það er afar mikið um að vera í dag á GAMMA Reykjavíkurskákmótinu. Fjórða umferð fer fram í dag og hefst kl. 15. Þess fyrir utan eru tveir fyrirlestrar og deginum lýkur með hraðskákmótinu "Harpa Blitz" sem ávallt er afskaplega vinsælt. 

Dagurinn hefst með fyrirlestri Konstantin Landa "Helping talent to shine: My experince in Iran". Mikil skáksprengja hefur átt sér stað í Íran síðustu ár og urðu Íranar ólympíumeistarar 16 ára og yngri. Landa hefur komið að þjálfun Írana. Mjög athyglisverður fyrirlestur ekki síst fyrir þá sem áhuga hafa á skákennslu. Fyrirlesturinn hefst kl. 11:30 í Vísu (skákskýringarsalnum). Sjá nánar hér.

Umferðin hefst kl. 15 eins og áður sagði. Margar athyglisverðar viðureignir eru í dag og má þar nefna að Jóhann Hjartarson teflir við Indverjann sterka Gujrathi Vidit, Þröstur við Armenann Sergei Movsesian, 

Skákskýringar hefjast kl. 17 og verða í umsjón Friðriks Ólafssonar.

Klukkan 20:00 verður Takis Nikolopoulos, virtasti skákdómari heims, með fyrirlesturinn "World Champsionship Matches - What happens behind the scenes". Þar segir hann frá reynslu sinni sem yfirdómari nokkurra heimsmeistaraeinvígja. Fyrirlesturinn fer fram í Vísu (skákskýringarsalnum). Sjá nánar hér.

Kvöldinu lýkur svo með hraðskákmótinu Harpa Blitz sem hefst kl. 21:30 í Flóa (skáksalnum) í Hörpu. Mótið er opið fyrir alla 18 ára og eldri. Skráningargjald er 2.000 kr. og skal greiðast með reiðufé á skákstað. Skráning fer fram á Skák.is (guli kassinn). 80% af þátttökugjöldunum renna í verðlaun. Nánari upplýsingar má finna hér.

Beinar útsendingar á vefnum hefjast kl. 15. Þær eru í umsjón Simon Williams og Fionu Steil-Antoni.

 

• Heimasíða mótsins
• Úrslit og paranir
• Beinar útsendingar á vefnum

GAMMA Reykjavíkurskákmótið - Jóhann efstur ásamt öðrum

Íslandsmeistarinn Jóhann Hjartarson er í hópi 16 skákmanna með fullt hús vinninga, þrjá úr þrem skákum. Nokkrir af efstu mönnum misstu niður hálfan vinning í seinni umferð dagsins, þar á meðal hinn georgíski Baadur Jobava og hinn þekkti Letti Alexei Shirov. Tveir stigahæstu menn mótsins, Anish Giri og Dmitry Andreikin halda sínum dampi og eru jafnir Jóhanni að vinningum.

Eitthvað var um óvænt úrslit og má nefna að Robert Ris alþjóðlegur meistari frá Hollandi lagði að velli goðsögnina Alexander Beliavsky. 

Næstir Íslendinga með tvo og hálfan vinning eru Hannes Hlífar Stefánsson, Bragi Þorfinnsson, Þröstur Þórhallsson og Áskell Örn Kárason. Fjórða umferð fer fram á morgun, föstudag klukkan 15:00 í Hörpu og þá fara stigahæstu menn mótsins að mætast innbyrðis.

Jóhann mætir Indverjanum sterka Vidit Santosh Gujrati á meðan Giri mætir landa sínum Jorden van Foreest. Fjöldi Íslendinga verður á sýningarborðum og hægt er að sjá útsendingar frá þeim á heimasíðu mótsins undir "Live Games"

 

Heimasíða mótsins

Bein útsending með Fionu og Simon Williams

Úrslit og paranir

 

 

GAMMA Reykjavíkurskákmótið - lítið um óvænt úrslit

Önnur umferð GAMMA Reykjavíkurskákmótsins fór fram í morgun. Allir sterkustu skákmenn mótsins komust slysalaust í gegnum umferðina og því enn gríðarlegur fjöldi skákmanna með fullt hús vinninga. Mesta athygli vakti skák Anish Giri (2771) við Vigni Vatnar Stefánsson (2341), okkar efnilegasta skákmann, en Vignir stóð sig vel og þurfti að láta Hollendinginn hafa vel fyrir vinningnum en hann hafðist eftir 44 leiki.

Það var aðeins sænski meistarinn Eric Blomqvist sem tapaði á efstu borðum en hann lá fyrir hollenskum skákmanni. Fjölmargir Íslendingar náðu góðum jafnteflum og t.a.m. náðu nokkrir efnilegir skákmenn góðum úrslitum. Jón Kristinn Þorgeirsson (2189) gerði jafntefli við Guðmund Kjartansson (2468) og Báður Örn Birkisson (2146) gerði jafntefli við Þröst Þórhalsson (2423). Vert er einnig að minnast á gott jafntefli hjá Júlíusi Friðjónssyni gegn bandaríska stórmeistaranum James Tarjan.

Jóhann Hjartarson (2536) er efstur Íslendinga og sá eini sem er með fullt hús ásamt efstu mönnum með tvo vinninga. Jóhann vann í dag snarpan sigur í fallegri sóknarskák og er til alls líklegur. Gaman verður að fylgjst með Jóhanni en hann hefur ekki teflt á Reykjavíkurskákmóti í 21 ár en hefur fært taflmennsku aðeins í aukana undanfarið og varð m.a. Íslandsmeistari í fyrra.

 

Leikar taka að æsast í þriðju umferðinni sem fram fer klukkan fimm í dag en þetta er eini dagurinn þar sem keppendur tefla tvær skákir.  Jóhann mætir indverskri skákkonu í þriðju umferðinni og eins munu margir fylgjast með Eugenio Torre, goðsögninni frá Filipseyum, sem mun etja kappi við Íslandsvininn Gawain Jones. Áhorfendur eru velkomnir í Hörpu en Helgi Áss Grétarsson mun sjá um skákskýringar frá kukkan 19.

 

Heimasíða mótsins

Bein útsending með Fionu og Simon Williams

Úrslit og paranir

GAMMA Reykjavíkurskákmótið: Dagskrá dagsins - tvöfaldur dagur!

Það verður mikið teflt á GAMMA Reykjavíkurskákmótinu í dag - enda tvöfaldur dagur! Fyrri umferð dagsins hefst kl. 9 og sú síðari kl. 17. Í fyrri umferð dagsins er athyglisverð viðureign á fyrsta borði því Anish Giri (2771) mætir okkar efnilegasta skákmanni Vigni Vatnari Stefánsson (2341). 

Aðrar athyglisverðar viðureignir fyrir okkur Íslendinga má nefna Guðmundur Gíslason (2314) - Zoltan Almasi (2696), Sigurbjörn Björnsson (2279) - Vidit Gurathi (2670), Alexander Beliavsky (2597) - Halldór Grétar Einarsson (2257) og Aljeandro Ramirez (2555) - Lenka Ptácníková (2242).

Ekki verða skákskýringar við fyrri umferð dagsins en skákskýringar Helga Áss Grétarssonar við umferð 3 hefjast kl. 19. Spennandi verður að heyra hvort að matarbókin komi þar eitthvað við sögu.

Beinar útsendingar á vefnum verða í boði í allan dag. Þær eru í boði Simon Williams og Fionu Steil-Antoni.

 

• Heimasíða mótsins
• Úrslit og paranir
• Beinar útsendingar á vefnum

Lítið um óvænt úrslit á GAMMA Reykjavíkurskákmótinu

GAMMA Reykjavíkurskákmótið hófst í dag í Hörpu þegar fyrsta umferð mótsins fór af stað. Alls eru mættir til leiks 264 keppendur frá 40 löndum sem er nálægt metþátttöku. Meðal keppenda eru 33 stórmeistarar og stigahæstur keppenda er ofurstórmeistarinn Anish Giri (Hollandi) sem státar af 2771 skákstigi. Giri hefur verið fastagestur á elítuskákmótum í langan tíma þrátt fyrir að vera aðeins 22 ára og er talinn í hópi líklegra kandídata til að hrifsa krúnuna af Magnus Carlsen. 

Styrkleikamunur er venjulega mikill í fyrstu umferðum á opnum skákmótum og lítið var um óvænt úrslit. Verst fór hjá þeim bræðrum Birni og Braga Þorfinnssyni en þeir urðu að sættast á skiptan hlut gegn mun stigalægri keppendum. Bragi gerði jafntefli gegn nýbökuðum skákmeistara Norðlendinga, Haraldi Haraldssyni en Björn Þorfinnsson slapp með skrekkinn gegn hinni efnilegu Nansý Davíðsdóttur. Hinn ungi Birkir Ísak Jóhannsson náði einnig jafntefli gegn mun stigahærri andstæðing en sá fyrsti til að leggja stigahærri andstæðing var Ármann Pétursson (1227) sem lagði þýskan andstæðing sinn M.Wecker (2134) í aðeins 11 leikjum með svörtu mönnunum eftir laglega fléttu.

Tvöföld umferð verður tefld á morgun, fimmtudag og hefst sú fyrri klukkan 09:00 en sú seinni 17:00. Mótshald mun standa yfir í Hörpu næstu daga en mótinu lýkur 27. apríl. Áhorfendur eru velkomnir á mótsstað en boðið verður upp á skákskýringar í seinni umferðinni og eins er velkomið að líta við í beinar útsendingar sem sendar eru á vefinn en þeim stýra GM Simon Williams og Fiona Steil-Antoni.

 

Úrslit og paranir

Frétt á RÚV

 

 

 

GAMMA Reykjavíkurskákmótið sett kl. 14:30 i Hörpu

Setning GAMMA Reykjavíkurskákmótsins verður miðvikudaginn 19. apríl 14:30. Allir skákáhugamenn eru velkomnir á setningarathöfn mótsins. 

Alþjóðlega Reykjavíkurskákmótið nú er það sterkasta og fjölmennasta í 53 ára sögu mótsins. Alls er um 280 keppendur skráðir til leiks frá um 45 löndum. Þar af eru 35 stórmeistarar og hafa aldrei verið fleiri.  

Ofurstórmeistararnir  

Ofurstórmeistarar eru þeir taldir sem hafa 2700 skákstig eða meira. Hollendingurinn Anish Giri, sem hefur 2771 skákstig, er einn besti skákmaður heims og sá stigahæsti sem nokkurn tímann hefur teflt á Reykjavíkurskákmóti í hálfrar aldar sögu mótanna. Georgíumaðurinn Baadur Jobava er einn frumlegasti skákmaður heims og vekur taflmennska hans jafnan athygli. Dmitry Andreikin er þekktur fyrir að tefla ávallt til sigurs og vakti kraftmikil taflmennska hans í mótinu í fyrra mikla athygli.  

Goðsagnir 

Lettinn Alexei Shirov er einn allra skemmtilegast skákmaður heims, þekktur fyrir sinn leiftrandi stíl,  og hefur hefur margoft verið líkt landa sinn, Mikhail Tal, sem sigraði á fyrsta Reykjavíkurskákmótinu árið 1964. Shirov sigraði á Reykjavíkurskákmótinu 1992 ásamt Jóhanni Hjartarsyni og hefur síðan haldið sér í hópi bestu skákmanna heims. Hann er fjórði í stigaröð keppenda. Gata Kamsky tefldi síðast á Reykjavíkurskákmótinu 1990. Þá var hann 15 ára að aldri og þótti undrabarn. Kamsky komst næstum því á topp skákheimsins því hann tefldi heimsmeistaraeinvígi við Karpov sem hann tapaði.

Eugene Torre hefur löngum verið besti skákmaður Filippseyinga. Torre er sá skákmaður, sem teflt hefur á flestum Ólympíuskákmótum allra skákmanna í skáksögunni, eða alls 22 sinnum. Á Ólympíuskákmótinu í Bakú í fyrra hlaut hann 10 vinninga í 11 skákum og hefur sjaldan verið í betra formi.    

Óvæntir sigurvegarar tveggja síðustu ára Abijeet Gupta og Erwin L´Ami eru svo að sjálfsögðu meðal keppenda. 

Skákdrottningar  

Indverska skákdrottningin Tania Sadchev stal senunni í fyrra með frábærri frammistöðu og geislandi framkomu. Hún er fastagestur hér. Landskona hennar Harika Dronavalli tekur einnig þátt en hún er meðal bestu skákkvenna heims. 

Meðal annarra gesta má nefna hina mongólsku Tuvshintugs Batchimeg en hún verður þar með fyrsti skákmaðurinn frá Mongolíu sem teflir á Reykjavíkurskákmótinu.

Einnig má nefna hina írönsku Dorsa Derakhshani sem hefur vakið athygli fyrir það að neita að tefla með slæðu og hefur gerð brotræk úr landsliði Írans fyrir þá sök. 

Undrabörnin 

Það hefur ávallt verið lögð mikil áhersla á að fá hingað til landsins undrabörn. Í áranna rás hafa t.d. Magnus Carlsen, Gata Kamsky, Fabiano Caruana og Hikaru Nakamura, sótt landið sem kornungir skákmenn. 

Á mótinu nú er vert að benda á tvo unga indverska drengi sem báðir eru taldir geta orðið meðal bestu skákmanna heims - jafnvel heimsmeistarar.  Praggnanandhaa Rameshbabu er annar þeirra. Sá er aðeins 11 ára og sá yngsti í heimi sem náð hefur titli alþjóðlegs meistara. 

Hinn er Nihal Sarin, 12 ára, og er líka alþjóðlegur meistari. Sarin þessi lagði Helga Ólafsson t.d. nýlega að velli í hraðskák í Moskvu.  Þeir eru báðir talda hafa möguleika á því að verða yngsti stórmeistari sögunnar. Nýlega grein má lesa um kappann í Chessbase.  

Heimavarnarliðið  

Nærri 100 íslenskir skákmenn taka þátt í mótinu nú og þar á meðal þrír stórmeistarar. Stigahæstur þeirra er Hannes Hlífar Stefánsson, sigursælasti skákmaður í sögu Reykjavíkurskákmótanna. Hannes hefur sigrað fimm sinnum á mótinu.

Það sætir tíðindum að Jóhann Hjartarson tekur nú þátt í mótinu nú í fyrsta skipti í 21 ár og er það mikið fagnaðarefni.  Sá þriðji er svo Þröstur Þórhallsson.  Sjö íslenskar skákkonur taka þátt. Fyrir þeim fer Lenka Ptáncíková, stórmeistari kvenna og margfaldur Íslandsmeistari. 

Alþjóðlegu meistararnir Guðmundur Kjartansson, Bragi og Björn Þorfinnssynir taka þátt og það gerir einnig Vignir Vatnar Stefánsson, okkar efnilegasti skákmaður. 

Íslenska heimavarnarliðið er skemmtilegt blanda af atvinnumönnum, áhugamönnum, eldri skákmönnum og ungum ljónum sem eru að stíga sín fyrstu skref. Akureyringar fjölmenna á Reykjavíkurskákmótið nú og er það gleðilegt og vitnar um skákgrósku norðan heiða.  

Færeyingar fjölmennir  

Um 180 erlendir skákmenn taka þátt í mótinu og hafa þeir aldrei verið fleiri. Flestir þeirra koma frá Bandaríkjunum, Indlandi og Kanada.  Góð þátttaka Færeyinga vekur athygli en þeir eru 12 talsins. Fyrir þeim hópi fer Helgi Dam Ziska, fyrsti stórmeistari okkar góðu frændþjóðar.  

Ekki bara skákmót 

Reykjavíkurskákmótið er miklu frekar skákhátíð  en skákmót. Efnt er til alls konar sérviðburða meðan mótið fer fram. Áður hefur verið minnst á fjöltefli Anish Giri. Meðal annarra sérviðburða má nefna: 

Opnunarpartý, fyrirlestur um skákþjálfun, fyrirlestur um það sem gerist bakvið tjöldin í heimsmeistaraeinvígum, hraðskákmót, barnahraðskákmót, spurningkeppni (pub quiz), fótbolta, gullna hringinn með viðkomu að leiði Fischers og kotrumót. 

Þesir viðburðir eru opnir gestum og gangandi. 

Umferðir hefjast yfirleitt kl. 15. Boðið verður upp á skákskýringar alla daga í Hörpu og hefjast þær um tveimur tímum eftir upphaf umferðar eða um kl. 17. Um skákskýringar sjá okkar fremstu skákmenn af þeim sem ekki taka þátt í mótinu að þessu sinni.