GAMMA Reykjavíkurskákmótið - hörð barátta á toppnum

Enn eru sex efstir og jafnir á GAMMA Reykjavíkurskákmótinu þegar aðeins tvær umferðir eru til stefnu. Enginn af efstu mönnum vann sína skák og því náðu þeir Zoltan Almasi og Anish Giri að komast aftur í hóp efstu manna með 6,5 vinning af 8.  Almasi vann sigur á Tyrkjanum Emre Can sem hafði komið á óvart í síðustu umferð og Giri lagði þýska stórmeistarann Alexander Donchenko. Nils Grandelius, Abhijeet Gupta, Vidit Santosh Gujrati og Baadur Jobava eru með þeim í hópi efstu manna.

 

Jóhann Hjartarson átti vænlega stöðu gegn Erwin l‘Ami frá Hollandi en sá hollenski sýndi mikla seiglu og hélt jafntefli. Jóhann er eftir sem áður efstur Íslendinga með 6 vinninga og enn hálfum vinningi á eftir efstu mönnum.  Bragi Þorfinnsson náði mjög góðu jafntefli gegn hinum þekkta skákmanni Alexei Shirov sem verða að teljast mjög góð úrslit. Bragi er næstur Íslendinga með 5,5 vinning ásamt Þresti Þórhallssyni, Birni Þorfinnssyni og Guðmundi Kjartanssyni. Guðmundur Kjartansson vann seiglusigur á ungstirninu Vigni Vatnari en nokkuð var um Íslendingaslagi þar sem þeir reynslumeiri höfðu sigur. Hannes Hlífar lagði Jón Kristin Þorgeirsson og Þröstur Þórhallsson lagði Halldór Grétar.

 

Indverska ungstrinið Rameshbabu Praggnanandhaa vann gríðarlega sterkan sigur á Gawain Jones og mögulegt er að enn einu sinni fæðist ný stjarna í skákheiminum á Reykjavíkurskákmótinu. Sterkar lokaumferðir gætu hjálpað indverska undrabarninu gríðarlega í baráttunni um að ná að vera yngsti stórmeistari sögunnar.

Fjölmargir virðast stefna á áfanga í mótinu. Awonder Liang, ungi Bandaríkjamaðurinn sem er að koma á mótið þriðja árið í röð virðist ætla að ná stórmeistaraáfanga og sama má segja um Kanadamanninn Aman Hambleton eftir kraftaverkajafntefli i dag. Landi hans Kleinman virðist einnig ætla að ná áfanga að alþjóðlegum meistaratitli.

 

Baráttan heldur áfram í 9. umferð sem hefst á morgun klukkan 15:00. Enginn má við því að misstíga sig þegar svo lítið er eftir og mikilvægt að vinna skákir á efstu borðunum. Skákskýringar munu hefjast um 17:00.

 

Heimasíða mótsins

Bein útsending með Fionu og Simon Williams

Úrslit og paranir

Dagskrá dagsins: Umferð, skákskýringar og kotra - Jóhann og Bragi í toppbaráttunni

Áttunda umferð GAMMA Reykjavíkurskákmótsins fer fram í dag og hefst kl. 15. Margar áhugaverðar viðureignir. Jóhann Hjartarson (2536), sem er aðeins hálfum vinningi frá efstu mönnum, teflir við Erwin L´Ami (2614) óvæntan sigurvegara Reykjavíkurskákmótsins 2015. Bragi Þorfinnsson (2457) fær hinn hláturmilda lettneska stórmeistara Alexei Shirov (2693), sigurvegara mótsins frá 1992 (ásamt Jóhanni). Íslendingaslagur er svo á 24. borði þar sem Vignir Vatnar Stefánsson (2341) og Guðmundur Kjartansson (2468) mætast. 

Skákskýringar Einars Hjalta Jenssonar hefjast kl. 17.

Skákáhugamenn eru hvattir til að fjölmenna í Hörpu. 

Kotrusamband Íslands stendur svo fyrir kotrumóti sem hefst kl. 19. Nánar má lesa um það hér.

 

• Heimasíða mótsins
• Bein útsending með Fionu og Simon Williams
• Úrslit og paranir

 

 

 

Aðalfundur SÍ fer fram 27. maí

Aðalfundur SÍ fer fram laugardaginn 27. maí. Til hans verður boðað með formlegum hætti næstu daga. 

Fimm efstir á GAMMA Reykjavíkurskákmótinu

Leikar eru farnir að æsast og það var ljóst á baráttunni á efstu borðum GAMMA Reykjavíkuskákmótsins. Aðeins Anish Giri og Gata Kamsky skildu jafnir á efsta borði en sjö næstu skákir voru allar sigurskákir. Fimm skákmenn eru nú efstir og jafnir. Baadur Jobava frá Georgíu var fyrstu að nýta sér jafnteflið á efsta borði og lagði sinn andstæðing laglega. Emre Can kom á óvart og lagði Gawain Jones og loks lagði Vidit Santosh Gujrati sinn andstæðing laglega. Þeir Nils Grandelius og Abhijeet Gupta bættust svo í hópinn eftir mjög langar og strangar skákir.

 

Jóhann Hjartarson er efstur Íslendinga eftir að hafa lagt sænska alþjóðlega meistarann Björn Ahlander. Jóhann er með 5,5 vinning og hálfum vinningi á eftir efstu mönnum. Næstur kemur Bragi Þorfinnsson með 5 vinninga.

 

Áttunda umferðin hefst á morgun klukkan 15:00 og má búast við mikilli baráttu. Nils Grandelius mætir Jobava á efsta borði og Indverjarnir Vidit og Gupta mætast. Jóhann fær hvítt á Erwin l‘Ami, stórmeistara frá Hollandi, en hann vann mótið 2015. Bragi mætir sjálfum Alexei Shirov. Áhorfendur eru velkomnir og skákskýringar hefjst um 17:00.

 

Heimasíða mótsins

Bein útsending með Fionu og Simon Williams

Úrslit og paranir

GAMMA Reykjavíkurskákmótið: Dagskrá dagsins - lykilumferð og skákskýringar Helga Áss

Sjöunda umferð GAMMA Reykjavíkurskákmótsins hefst kl. 17 í dag. Seinna en vanalega þar sem margir erlendu keppendanna fara gullna hringinn og heimsækja gröf Fischers í dag. Það er mikil spennan fyrir daginn. 14 skákmenn efstir og jafnir með 5 vinninga. Jóhann Hjartarson og Björn Þorfinnsson eru svo hálfum vinningi á eftir efstu mönnum.

Margar athyglisverðar skákir eru í dag. Á efsta borði teflir Anish Giri (2771) við Gata Kamsky (2668).

Vert er að benda á indversku skákkonuna R. Vaishaili (2259) sem er aðeins 16 ára. Hún er langstigalægst þeirra fjórtán sem eru á toppnum á mótinu. Vaishaili þessi hefur svolítið fallið í skuggann af bróður sínum Praggnanandhaa (2447) en er auðvitað geysisterk og er tvöfaldur heimsmeistari stúlkna. Í tveimur síðustu umferðum hefur hún lagt stórmeistara að velli.

 

Sigurlaug Friðþjófsdóttir hefur fylgst vel með henni og skrifaði svo á Facebook-vef skákmanna í gær

Í dag tefldi ég frekar stutta skák og náði loksins að horfa á aðrar skákir. Sá 16 ára stúlku (fædd 2001) frá Indlandi með 2259 vinna stórmeistara með 2509. Ekki nóg með það: hún byrjaði á að vinna einn með 1708, tapaði gegn stórmeistara 2607, vann síðan 1928 og 2067 og 2455 og í dag 2509. Á morgun fær hún stórmeistara með 2614! Hún er með alþjóðlegan meistaratitil kvenna með performance upp á 2511 og er þegar búin að hækka um 38 stig!

Þessi stúlka stendur fyllilega undir sínum stigum! Hefur verið að vinna stigalægri og vinna einnig stigahærri! Á morgun teflir hún við fjórða stórmeistarann og þar af stórmeistara nr. 2 með yfir 2600 stig! Þvílík fyrirmynd fyrir ungar skákstelpur og þvílíkt flottur skákmaður sem blómstrar á Reykjavík open. Ég segi: áfram Vaishali! Glæsilegur árangur hingað til!

Litli bróðir Vaishali, Praggnanandhaa, teflir í dag við goðsögnina Alexander Beliavsky (2597). Aldursmunurinn er 52 ár!

Hinn ungi og efnilegi akureyski skákmaður Jón Kristinn Þorgeirsson (2189) fær krefjandi verkefndi en hann teflir við bandaríska stórmeistarann James Tarjan (2414) sem var ólympíumeistari með sveit Bandaríkjanna árið 1976. Tarjan og Beliavsky eru þeir einu á mótinu sem eiga ólympíugull.

Umferð dagsins hefst kl. 17 eins og áður sagði. Skákskýringar Helga Áss Grétarssonar hefjast kl. 19.

• Heimasíða mótsins
• Bein útsending með Fionu og Simon Williams
• Úrslit og paranir

 

 

 

Aftur þéttist toppurinn á GAMMA Reykjavíkurskákmótinu

Jafntefli urðu á fjórum efstu borðum á GAMMA Reykjavíkurskákmótinu. Þau úrslit þýddu að allir með 4 vinninga gátu náð efstu mönnum að vinningum með því að vinna sínar skákir. Niðurstaðan er því að fjórtán skákmenn eru efstir og jafnir með 5 vinninga, þar á meðal allir stigahæstu menn mótsins, Giri, Andreikin, Almasi og Jobava.

 

Björn Þorfinnsson og Jóhann Hjartarson eru nú efstir Íslendinga með 4,5 vinning og stutt frá efstu mönnum. Björn lagði Guðmund Kjartansson og Jóhann lagði indverskan skákmann. Hinn ungi Vignir Vatnar náði ekki að fylgja á eftir góðum úrslitum í gær og tapaði gegn indverska stórmeistaranum Harika. Nokkur úrslit vöktu athygli en Akureyringurinn ungi Jón Kristinn Þorgeirsson vann t.a.m. góðan sigur á íranska alþjóðlega meistaranum Dorsa Derakhshani. Hannes Hlífar Stefánsson átti slæman dag, víxlaði leikjum í betri stöðu gegn Sopiko Guramishvili og hrókur fór í hafið.

 

Sjöunda umferð fer fram á morgun og hefst að þessu sinni klukkan 17:00. Nokkrar athyglisverðar viðureignir verða í boði. Jón Kristinn fær að reyna sig gegnum reyndum bandarískum stórmeistara, James Tarjan. Einnig verður gaman að sjá æskuna og ellina mætast þegar hinn ungi Praggnanandhaa mætir goðsögninni Beliavsky.

 

Heimasíða mótsins

Bein útsending með Fionu og Simon Williams

Úrslit og paranir

Grandelius og Kakulidis sigurvegarar á Pub Quiz

Sænska parið Nils Grandelius og Ellen Kakulidis unnu sigur á Pub Quizinu árlega sem fram fór á Hótel Plaza í gær.  Alls mættu rúmlega 40 keppendur til leiks og stemmningin var góð.

Nils og Ellen svöruðu rétt 25 spurningum af 30. Mjótt var þó á munum og stutt í næstu lið en tvö lið voru með 24 rétt svör og mörg þar stutt á eftir.

Spurningar voru af ýmsum toga og var m.a. spurt um nýlokið Heimsmeistaraenvígi, ýmsar sögulegar stöður, árangur á nýliðnu Ólympíuskákmóti og menn beðnir um að bera kennsl á skákmenn af myndum svo eitthvað sé nefnt.

 

Spurningarnar eru í viðhengi en þrjár spurningar voru vídeó spurningar. 

Skrár tengdar þessari bloggfærslu:

• RvkOpenQuiz2017

Sumarskákmót Fjölnis í Rimaskóla - stórviðburður á Barnamenningarhátíð

Rétt þegar Reykjavík Open er lokið þá verður blásið til næsta "stórmóts", Sumarskákmóts Fjölnis á Barnamenningarhátíð Reykjavíkurborgar 2017. Sumarskákmótið fer fram í hátíðarsal Rimaskóla laugardaginn 29. apríl og hefst kl. 11:00. Öllum áhugasömum skákkrökkum á grunnskólaaldri er boðið að taka þátt í glæsilegu móti. Rótarýklúbbur Grafrvogs gefur eignarbikara og að vanda er fjöldi verðlauna (20) og happadrættisvinninga (5) í boði, allir mjög eftirsóknarverðir - bíómiðar, pítsur og húfur frá 66°N. 

Þátttaka ókeypis en veitingar seldar í skákhléi á 250 kr, Prins póló og gos, safi eða kaffi. Heitt á könnunni fyrir foreldra sem eru að vanda velkomnir að fylgjast með skemmtilegu skákmóti. Skráning á staðnum og því gott fyrir keppendur að mæta 10 - 15 mínútum fyrir mót. Skákstjórar eru þeir Helgi Árnason og Björn Ívar Karlsson. Fögnum sumrinu við skákborðið og mætum næsta laugardag, 29. apríl í Rimaskóla. Skák er skemmtileg. 

Dagskrá dagsins: Spenna umferð - Jón L. með skákskýringar og fótbolti í kvöld

Sjötta umferð GAMMA Reykjavíkurskákmótsins hefst í dag í kl. 15.  Níu skákmenn eru á toppnum með 4½ vinning. Bragi Þorfinnsson er efstur íslensku keppendanna með 4 vinninga. Skákskýringar Jóns L. Árnasonar hefjast kl. 17 og boðið er upp á fóbolta í kvöld sem hefst kl. 22:00 í Fífunni.

Spennandi viðureignir á efstu borðunum eins og sjá má.

 

 

 

 

Bragi Þorfinnsson (2457) er efstur íslensku keppendanna með 4 vinninga. Hann fær krefjandi að tefla við Konstantin Landa (2611). 

Sjö íslenskir skákmenn hafa 3½ vinning. Hannes Hlífar Stefánsson (2566) teflir við hina georísku Sopioko Goramsishvili (2323), Jóhann Hjartarson (2536) við Indverjann Aradhya Garg (2315), Vignir Vatnar Stefánsson (2341) við skákdrottninguna Hariku Dronvalli (2521). Halldór Grétar Einarsson (2257) er fastur í undversku undrabörnunum en hann mætir hinum 11 ára Praggaandandhaa (2447) sem talinn er möguleika á að verða yngsti stórmeistari skáksögunnar. Björn Þorfinnsson (2413) og Guðmundur Kjartansson (2468) mætast og Þröstur Þórhallsson (2413) teflir við Frank Buchenau (2275).

Skákskýringar Jóns L. Árnasonar hefjast kl. 17. 

Fótbolti verður í Fífunni sem á því hafa áhuga. Hægt er að skrá sig til leiks á heimasíðu GAMMA Reykjavíkurskákmótsins. 

 

• Heimasíða mótsins
• Bein útsending með Fionu og Simon Williams
• Úrslit og paranir

 

 

 

Toppurinn enn þéttur á GAMMA Reykjavíkurskákmótinu

Enginn skákmaður er lengur með fullt hús vinninga eftir umferð gærkvöldsins. Jafntefli varð niðurstaðan á þremur efstu borðunum og efstu menn því með 4,5 vinning af 5 mögulegum. Stigahæsti maður mótsins, Anish Giri, varð loks að sættast á skiptan hlut gegn Indverjanum Vidit sem ákvað að endurtaka leiki snemma tafls og úr varð stutt skák.

 

Hannes Hlífar Stefánsson átti ekki góðan dag gegn Georgíubúanum Baadur Jobava sem sá lengra í flækjunum í miðtaflinu. Mikla athygli vakti vösk vörn hins efnilega Vignis Vatnars Stefánssonar gegn Íslandsmeistaranum Jóhanni Hjartarsyni. Vignir náði jafntefli og klárlega með bestu úrslitum á hans unga ferli. Bragi Þorfinnsson vann sína skák og er nú orðinn efstur Íslendinga með fjóra vinninga. Vert er einnig að minnast á góð úrslit hjá Halldóri G. Einarssyni sem gerði jafntefli við indverska undabarnið Nishal Sarin sem er framtíðar stórstjarna.

 

Úrslit gærdagsins þýða að níu skákmenn eru nú efstir og jafnir. Ljóst má vera að hver skák skiptir miklu máli á toppnum núna og hart verður barist. Leikar hefjast aftur klukkan 15:00 og skákskýringar sem fyrr klukkan 17:00. 

 

Heimasíða mótsins

Bein útsending með Fionu og Simon Williams

Úrslit og paranir

Myndagallerí úr fimmtu umferðinni eftir Maria Emelianova og Lennart Ootes