Gunnar efstur á NM öldunga í hraðskák

Í gærkvöldi var boðið til NM OPEN BLITZ hraðskáksmóts öldunga í Gallerý Skák í tengslum við Norðurlandamót öldunga sem nú fer fram í Faxafeni.

Þátttakendur voru með færra móti, sem bendir til þess að það taki talsvert á fyrir aldurhnigna skáköldunga að tefla langar og strangar keppnisskákir dag eftir dag. Aðeins einn keppandi var  mættur frá hinum Norðurlöndunum og hann undir aldri.  Vel var vandað til mótsins og fagrir verðlaunagripir í boði auk kaffis og kræsinga. Tefldar voru 9 skákir með 7 mín. umhugsunartíma á skákina.

Gunnar Skarphéðinsson varð hlutskarpastur eftir tvísýna baráttu á toppnum með 8 vinninga, Guðfinnur R. Kjartansson kom næstur með 7 og síðan Kristinn Bjarnason með 6.

Í næstu viku hefjast reglulega hvatskákmót í Gallerýinu, sem verða öll fimmtudagskvöld í vetur og hefjast kl. 18. Tefldar eru 11 umferðir á 10 mínútum og mótunum líkur um 10 leitið. Þau eru aðallega ætluð "ástríðuskákmönnum" af eldri kynslóðinni. Mótin samt eru öllum opin óháð aldri og félagsaðild og því allir liðtækir skákmenn velkomnir. Lagt í púkk fyrir matföngum, kaffi og kruðerí.

Nánar á http://www.galleryskak.net/

Myndaalbúm (ESE)

                          

Svidler vann Grischuk í fyrstu skák einvígis þeirra

Peter Svidler vann fyrstu einvígisskákina af fjórum gegn Alexander Grischuk í úrslitum Heimsbikarmótsins.  Í dag fór jafnframt fyrsta skákin í einvígi Ponomariov og Ivanchuk um þriðja sæti sem gefur keppnisrétt í næstu Heimsmeistarakeppni.  Henni lauk með jafntefli.  Einvígunum verður framhaldið í fyrramálið kl. 9.  

Úrslit:

Grischuk - Svidler 0-1

3. sætið:

Ivanchuk - Ponomariov 0,5-0,5

• Heimasíða mótsins
• Beinar útsendingar með tölvuskýringum (hefjast kl. 9)

Nýir liðsmenn Taflfélags Reykjavíkur

Stórveldi Taflfélags Reykjavíkur er nú að rísa úr öskunni eins og slíkra er siður. Með það í huga hafa, nú á síðustu dögum, margir góðir skákmenn gengið til liðs við félagið, einkum þó af erlendum uppruna.

Meðal nýrra liðsmanna eru fyrrverandi heimsmeistari, Anatoly Karpov (eló 2617), fyrrum Evrópumeistari, Emil Sutovsky (2690), besta skákkona sögunnar og einn besti skákmaður heims, Júdít Polgar (2701), einn af bestu skákmönnum heims, Rússinn Vugar Gashimov (2756), hollenski stórmeistarinn Jan Smeets (2617), úkraínski stórmeistarinn Yuriy Kryvoruchko (2666), rússneski stórmeistarinn Vaselí Papin (2581), danski alþjóðameistarinn Jakob Vang Glud (2496), færeyski alþjóðameistarinn Helgi Dam Ziska  (2460), og nokkrir innlendir meistarar.

Með þessu mun Taflfélagið hrista af sér slenið og berjast til sigurs á komandi Íslandsmóti skákfélaga, þar sem margar öflugar sveitir munu etja kappi saman og keppni trúlega verða skemmtileg og spennandi eins og jafnan áður.