Fischer-nefndin fær verðlaun frá Svíþjóð

Fréttablaðið greinir frá því í dag að tveir sænskir sjónvarpsmenn, sem hlutu nýlega verðlaun sem frumlegustu þáttastjórnendur ársins þar í landi, hafi ákveðið að ánafna verðlaunagripinn baráttuhópnum sem vann að frelsun Bobby Fischers og komu hans til Íslands hér um árið.

Guðmundur G. Þórarinsson, frumkvöðull hópsins, fór til Svíþjóðar sl. mánudag í boði sjónvarpsstöðvarinnar KANAL 5 og tók við verðlaunagripnum í beinni útsendingu á þætti sjónvarpsmannanna FILIPS og FREDERIKS sem tóku við hann spjall í þætti sínum BREAKING NEWS, sem er fréttamagasín þáttur með gamansömu ívafi.  

Guðmundur segir við FB það vera merkilegt að þessi sænsku aðilar heiðri með þessum hætti þá sem stóðu í baráttu við tvo stærstu efnahagsveldi heims til að koma Fischer hingað til lands og vinna að því að honum yrði veittur íslenskur ríkisborgararéttur, annars hefði hann líklegast dáið í fangelsi í Bandaríkjunum. 

Hann segir það draum sinn og annarra að komið verði upp safni um Fischer og heimsmeistaraeinvígið í skák  1972 milli hans og Boris Spassky. Af því hefur ekki orðið hingað til en 40 ár verða liðin frá einvíginu fræga á næsta ári.  Guðmundur segist ætla að láta sænska verðlaunagripinn renn til slíks safns, verði það að veruleika, ásamt viðurkenningarskjali frá sænska sjónvarpinu þar sem tilurð gjafarinnar er útskýrð.

Sjá má umræddan sjónvarpsþátt á meðf. slóð en viðtalið við Guðmund er undir lok hans og hefst uþb þegar 35 mínútur er liðnar af þættinum.

http://www.kanal5play.se/program/play/breakingnews-s01e13