Vigfús efstur á hraðkvöldi

Vigfús Ó. Vigfússon sigraði á hraðkvöldi Hellis sem fram fór 19. september sl. Vigfús fékk 6v af sjö mögulegum og laut aðeins í lægra haldi fyrir Jóni Úlfljótssyni. Jöfn í 2. - 3. sæti með 5,5v voru Elsa María Kristínardóttir og Jón Úlfljótsson með 5v. Í lokin vann svo Björgvin pizzuna í happdrætti í þriðja sinn í röð.

Lokastaðan:

• 1.   Vigfús Ó. Vigfússon         6v
• 2.   Jón Úlfljótsson                 5,5v
• 3.   Elsa María Kristínardóttir 5,5v
• 4.   Sigurður Ingason              5v
• 5.   Gunnar Nikulásson           3v
• 6.   Björgvin Kristbergsson     2v
• 7.   Hjálmar Sigurvaldason      1v       

Aðalfundur Hellis fer fram í kvöld

Aðalfundur Hellis fer fram þriðjudaginn 20. september nk. og hefst kl. 20.  Venjuleg aðalfundarstörf eins og yfirferð ársskýrslu og kosning stjórnar. 

Félagið hvetur félagsmenn til að fjölmenna

Tillaga fyrir borgarstjórn um að 40 ára afmælis einvígis aldarinnar verði minnst sérstaklega

Borgarstjórnarflokkur Sjálfstæðisflokkurinn flytur tillögu þess efnis að 40 ára afmæli einvígis aldarinnar verði minnst sérstaklega.  Tillagan verður tekin fyrir kl. 14 á morgun, þriðjudag, fyrir borgarstjórn og hægt verður að hægt að hlusta á umræður í beinni á vef borgarstjórnar. 

Tillaga Sjálfstæðisflokksins 

Borgarstjórn Reykjavíkur samþykkir að þess verði minnst á næsta ári að þá verða fjörutíu ár liðin frá heimsmeistaraeinvíginu í skák milli Bobby Fischers og Boris Spassky en það fór fram 1. júlí - 3. september 1972 í Reykjavík. Efnt verði til sérstakrar afmælisdagskrár og sýningarhalds af þessu tilefni og leitað eftir samstarfi við Skáksamband Íslands, Skákakademíu Reykjavíkur og taflfélögin í Reykjavík. Borgarráði er falið að skipa starfshóp til að annast undirbúning málsins og koma með tillögu að dagskrá. 

Greinargerð með tillögunni

Heimsmeistaraeinvígi Bobby Fischers og Boris Spassky um heimsmeistaratitilinn í skák hefur verið nefnt mesta skákeinvígi síðustu aldar. Umrætt einvígi er án efa frægasta skákkeppni sögunnar en það vakti á sínum tíma mikla athygli langt út fyrir raðir skákáhugamanna vegna aðstæðna í heimsmálum. Kalda stríðið var í hámarki og fjölluðu margir fjölmiðlar um einvígið eins og uppgjör milli austurs og vesturs þar sem fremstu skákmeistarar Sovétríkjanna og Bandaríkjanna mættust við taflborðið. Samskipti keppendanna einkenndust af mikilli spennu framan af mótinu og urðu ýmsir atburðir í tengslum við það ekki síður fréttaefni en einstök skákúrslit. Reykjavík var í brennidepli heimspressunnar í rúma tvo mánuði vegna einvígisins og hafði það mikla og jákvæða landkynningu í för með sér fyrir Ísland. 

Á fjörutíu ára afmæli heimsmeistaraeinvígisins er vel við hæfi að halda minningu þess á lofti og stuðla að því að það geti orðið íþróttinni hérlendis lyftistöng. T.d. mætti efna til minningarskákmóts um einvígið og sýninga á myndum og munum, sem tengjast því en margir slíkir munir eru nú varðveittir á ólíkum stöðum. Í tengslum við afmælið mætti kynna skák fyrir almenningi og leggja áherslu á að efla enn frekar skákstarf meðal ungu kynslóðarinnar í Reykjavík. Í tengslum við afmælið er rétt að leita eftir samstarfi við þá aðila, sem vinna að eflingu skákar, t.d. Skáksamband Íslands, Skákakademíu Reykjavíkur, taflfélögin í Reykjavík og grunnskóla Reykjavíkur.