Sveitakeppni grunnskóla í Kópavogi fer fram í dag

Sveitakeppni grunnskóla í Kópavogi í skák verður haldin þriðjudaginn 21 feb. Kl . 17:00 til 20.00 í Salaskóla.

Það eru 4 nemendur í hverju liði  og það er heimilt að stilla upp liði með varamönnum.

Umhugsunartími verður 10 mín. ( Hver skák 2x10 min)

Keppt verður í eftirfarandi aldursflokkum

1..4 bekkur

5..7 bekkur

8..10 bekkur.

Skólum er heimilt að færa nemendur upp í eldri flokk ef vandræði eru við liðsskipan.

Fjölda liða í hverju aldurshólfi þarf að tilkynna fyrir kl 11:30 mánudaginn 20 feb. Því við þurfum eflaust að fá lánaðar  græjur annars staðar og hlaupum ekkert eftir slíku þegar keppnin á að hefjast.

Þá verðum við búin að still öllu upp þannig að keppnin geti farið strax í gang kl 17.00

Þvi væri skynsamlegt fyrir alla að mæta kl 16:50  

Við munum skipta þessu upp í þrjú aðskilin hólf þannig að keppendur séu ekki allir í sama rými.

Liðsskipan og fjöldi liða sendist á [e-mail] eða [e-mail]

Ath. 10. bekkur Salaskóla mun selja veitingar á meðan á keppni stendur.

Tómas Rasmus kennari Salaskóla.

 

Tímaritið Skák endurvakið í marsbyrjun

Tímaritið Skák verður endurvakið nú í marsbyrjun.  Um er að ræða árstímarit þar sem farið væri yfir liðið ár og fjallað um helstu viðburði eins og Reykjavíkurskákmótið, Ólympíuskákmótið, Skákþing Íslands, Íslandsmót skákfélaga, unglingastarf o.s.frv. Vandað verður til verka í alla staði þar sem andi gamla blaðsins svífur yfir vötnum. Gengið er út frá því að blaðið verði 90-100 bls. í fallegu broti.

Þeir sem eru tilbúnir að styðja málefnið og kaupa Tímaritið Skák árlega á aðeins 2.000 kr. eru vinsamlegast beðnir að skrá sig hér.

Allir skákáhugamenn eru hvattir til að taka þátt í þessu átaki enda blaðið ómetanleg heimild í fortíð, nútíð og framtíð.

Rúnar Ísleifsson skákmeistari Goðans

Rúnar Ísleifsson vann sigur á skákþing Goðans 2012 sem lauk í gær. Rúnar gerði jafntefli við Hjörleif Halldórsson í lokaumferðinni, en á sama tíma gerðu þeir bræður Smári og Jakob Sævar Sigurðsson jafntefli. Rúnar vann því sigur á stigum því hann og Jakob urðu jafnir með 4,5 vinninga. Talsverð spenna var fyrir lokaumferðina því þessir þrír gátu allir unnið sigur á mótinu. Þeir bræður börðust af mikilli hörku í sinni skák sem fór í tæplega 80 leiki og ætluðu báðir sér sigur. Báðir voru þeir komnir í mikið tímahrak þegar þeir sömdu um jafntefli.

Hjörleifur Halldórsson (SA) endaði að vísu í þriðja sæti, en þar sem hann keppti sem gestur á mótinu hreppti Smári þriðja sætið.   Mótstöflu mótsins má finna hér. 

Alls tóku 13 keppendur þátt í skákþinginu að þessu sinni.

Snorri Hallgrímsson vann sigur í yngri flokki og Hlynur Snær Viðarsson varð í öðru sæti.

• Heimasíða Goðans
• Chess-Results