Rúnar Ísleifsson skákmeistari Goðans

Rúnar Ísleifsson vann sigur á skákþing Goðans 2012 sem lauk í gær. Rúnar gerði jafntefli við Hjörleif Halldórsson í lokaumferðinni, en á sama tíma gerðu þeir bræður Smári og Jakob Sævar Sigurðsson jafntefli. Rúnar vann því sigur á stigum því hann og Jakob urðu jafnir með 4,5 vinninga. Talsverð spenna var fyrir lokaumferðina því þessir þrír gátu allir unnið sigur á mótinu. Þeir bræður börðust af mikilli hörku í sinni skák sem fór í tæplega 80 leiki og ætluðu báðir sér sigur. Báðir voru þeir komnir í mikið tímahrak þegar þeir sömdu um jafntefli.

Hjörleifur Halldórsson (SA) endaði að vísu í þriðja sæti, en þar sem hann keppti sem gestur á mótinu hreppti Smári þriðja sætið.   Mótstöflu mótsins má finna hér. 

Alls tóku 13 keppendur þátt í skákþinginu að þessu sinni.

Snorri Hallgrímsson vann sigur í yngri flokki og Hlynur Snær Viðarsson varð í öðru sæti.

• Heimasíða Goðans
• Chess-Results

Athugasemdir

[Jón Þorvaldsson (IP-tala skráð) 21.2.2012 kl. 06:38]

Til hamingju með sigurinn Rúnar! 

Og til hamingju með árangurinn Jakob, Smári, Snorri og Hlynur.

Spennandi og vel heppnað skákþing hjá ykkur, Norður-Goðar sem gaman var að fylgjast með. Hélt að Hermann formaður hreppti efsta sætið eftir feykiöfluga byrjun en hans tími kemur bara síðar.  

Það er virkilega ánægjulegt að hugsa til þess krafts sem er í skáklífi Goðans í báðum goðorðunum um þessar mundir. Víst er að menn mæta vel heitir til leiks á Selfossi 2. mars nk. Hlakka til að hitta ykkur þar!