Skákþáttur Morgunblaðsins: Þú ert kóngspeðsmaður

Seinni umferð Íslandsmóts skákfélaga hefur undanfarin ár farið svo nálægt dagskrá Reykjavíkurskákmótsins að úrslit og viðureignir hafa því ekki alltaf fengið verðskuldaða athygli. Eins og komið hefur fram vann Víkingaklúbburinn öruggan sigur með einu hæsta vinningshlutfalli í sögu keppninnar. Þess ber þó að geta að liðið sem hafnaði í 2. sæti, Huginn, fékk fleiri mótsstig og réði þar mestu sigurinn yfir Víkingaklúbbnum í lokaumferðinni. Greinarhöfundur deilir þeirri skoðun með fjölmörgum að löngu sé tímabært að taka upp stigafyrirkomulagið eins og í þýsku Bundesligunni, á ólympíumótum og víðar. Þetta er ekki sett fram til að gera lítið úr frammistöðu Íslandsmeistaranna sem unnu góðan sigur eftir þeim leikreglum sem í gildi voru.

Í síðustu viku skilaði Daði Ómarsson því ágæta verki að færa inn á skrár allar skákir 1. og 2. deildar. Þetta er mikið verk og þakkarvert og margar athyglisverðar skákir sjá nú dagsins ljós. Ein sú umtalaðasta var viðureign Margeirs Péturssonar á 3. borði gegn litháíska stórmeistaranum Kveinys í keppni TR við Víkingaklúbbinn. Eftir vafasama byrjun hitti Margeir á sterka leiki í flóknu miðtafli og var með unnið tafl þegar hér var komið sögu:

Íslandsmót skákfélaga 2017-18, 7. umferð:

Margeir – Kveinys

36. Hf1!

Svartur vonaðist til að geta leikið 36. ...Rgf3 en nú valdar hrókurinn f3- reitinn og hótar mátsókn.

36.... Rd7

Eini leikurinn en hvítur á 37. Hf7 og svartur er varnarlaus, t. 37.... Hc8 38. Dc3 eða 38. Hh7.

37. bxc6??

Hrikalegur afleikur sem ekki er hægt að skýra með öðru en æfingaleysi.

37..... Dxa5

– og hvítur gafst upp.

Hin þétta dagskrá mótsins gat af sér margar yfirsjónir jafnvel hjá hinum sterkustu meisturum. Þannig misstu Hannes Hlífar og Hjörvar Steinn vænlegar stöður niður í tap í viðureign Hugins og TR.

Ef hægt er að draga lærdóm af næstu skák þá er hann sá að enginn skyldi stóla á æfingaleysi hjá „gömlu brýnunum.“ Daði Ómarsson vann glæsilegan sigur á Nóa Síríus-mótinu í fyrra og vann þá t.d. Jón L. Árnason sem var eitthvað að þæfast í vængtafli. Við svipað tækifæri nokkrum áratugum fyrr – eftir 1. Rg1-f3 – stóð sjálfur Mikhael Tal yfir Jóni og sagði honum að þetta ætti hann ekki að gera. Af hverju? spurði Jón á móti. Vegna þess að þú ert kóngspeðsmaður, var svarið. Hvort töframaðurinn hafi vitjað Jóns fyrir eftirfarandi skákina liggur ekki fyrir en hann tefldi alltént í stíl meistarans:

Íslandsmót skákfélaga 2017-18, 7. umferð:

Jón L. Árnason – Daði Ómarsson

Sikileyjarvörn

1. e4 c5 2. Rf3 e6 3. d4 cxd4 4. Rxd4 a6 5. Bd3 Bc5 6. Rb3 Be7 7. 0-0 d6 8. c4 b6 9. Rc3 Rf6 10. f4 0-0 11. Df3 Bb7 12. Bd2 Rbd7 13. Kh1 Dc7 14. Hae1 Hfe8

Allt eftir „bókinni“ en Jón hefur margsinnis meðhöndlað svipaðar stöður með góðum árangri.

15. Rd4 g6 16. Dh3 e5 17. Rf3 exf4 18. Bxf4 Rc5 19. Rg5 h6 

20. Rxf7!

Tilfinningin fyrir stöðunni svíkur ekki. Allir menn hvíts eru tilbúnir til sóknar.

20..... Kxf7 21. e5 Rxd3 22. Dxd3 dxe5 23. Bxe5 Had8 24. Rd5! Bxd5 25. cxd5 Hd6

Betra var 25.... Dc5 en „vélarnar“ segja mér að hvítur eigi að vinna eftir 26. b4! Dxb4 27. He4 Dc5 28. De2! o.s.frv.

26. Bxd6 Dxd6 27. He6! Db4 28. De2 Da4 29. De5 Dh4 30. d6

– og svartur gafst upp.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 21. apríl. 

Skákþættir Morgunblaðsins

Vignir Vatnar efstur á hraðkvöldi Hugins

Vignir Vatnar Stefánsson og Örn Leó Jóhannsson voru efstir og jafnir á hraðkvöldi Hugins sem fram fór síðastliðið mánudagskvöld 7. maí sl. með 6,5v af sjö mögulegum. Þeir gerðu jafntefli í innbyrðis viðureign í fjórðu umferð en sýndu enga miskunn í öðrum viðureignum. Vignir Vatnar var hins vegar stigi hærri og hlaut fyrsta sætið en Örn Leó varð annar. Þriðji var svo Gauti Páll Jónsson með 5v og geta menn giskað fyrir hverjum hann tapaði eða bara litið á chess-results.

Tölvan dró töluna 5 að þessu sinni og vann Vigfús því í happdrættinu annað skiptið í röð og hefur hann eiginlega tekið við hlutverki Björgvins sem hinn heppni í þessum úrdrætti á hraðkvöldunum. Eins og síðast þegar Vignir og Vigfús fengu verðlaun á hraðkvöldi þá valdi Vignir Vatnar gjafabréf frá Dominos og Vigfús Saffran. Næsta hraðkvöld verður mánudaginn 28. maí en þá verður búið að kjósa.

Lokastaðan á hraðkvöldinu:

1. Vignir Vatnar Stefánsson, 6,5v/7
2. Örn Leó Jóhannsson, 6,5v
3. Gauti Páll Jónsson, 5v
4. Hörður Jónasson, 4v
5. Vigfús Ó. Vigfússon, 4v
6. Björn Grétar Stefánsson, 4v
7. Sigurður Freyr Jónatansson, 3,5v
8. Jón Úlfljótsson, 3,5v
9. Hjálmar Sigurvaldason, 3v
10. Alexander Már Brynjarsson, 3v
11. Rigon Jón Kaleviqi, 2v
12. Snorri Már Friðriksson, 1v
13. Róbert Kaleviqi, 1v

Lokastaðan í chess-results:

Þorsteinn teflir í Búdapest

FIDE-meistarinn, Þorsteinn Þorsteinsson (2299), situr þessa dagana að tafli á First Saturday-mótinu í Búdapest. Þorsteinn teflir í GM-flokki og er næststigalægstur keppenda. Eftir fjórar umferðir hefur Þorsteinn 1 vinning. Í þriðju umferð gerði hann jafntefli við úkraínska stórmeistarann Eldar Gasanov (2482). 

Nánar um árangur Þorsteins á Chess-Results. 

• Heimasíða mótsins
• Chess-Results

Fjölmenn og fjörug Vorhátíð Taflfélags Reykjavíkur

Vorhátíð Taflfélags Reykjavíkur fór fram sunnudaginn 6.maí í húsakynnum félagsins að Faxafeni 12. Dagskráin var fjölbreytt og skemmtileg og hófst með því að nýjasti stórmeistari TR/Íslands, Bragi Þorfinnsson var boðinn velkominn. Bragi byrjaði ungur að tefla og fór fljótlega á skákæfingar í TR og hlustuðu krakkarnir með mikilli athygli á frásögn Braga um skákiðkun hans sem barns og ráð hans um hvað þarf að gera til að verða stórmeistari.

Síðan skoruðu krakkarnir Braga á hólm í skák sem sýnd var með skjávarpa á stóru tjaldi. Torfi Leósson, skákþjálfari, valdi úr uppréttum höndum krakkanna þegar þeir áttu leik.

Fór svo að Bragi vann sigur, eftir að kóngur krakkanna lenti í ógöngum og endaði á a7. Engu að síður hugrakkur kóngur þar á ferð og allt var þetta á léttu nótunum!Næst á dagskránni var skákboðhlaup. Mættir voru 36 krakkar og var þeim skipt í fjögur níu manna lið, þar sem aldur krakkanna í hverju liði spannaði frá 5 árum upp í 13 ár. Mjög góð stemning í öllum liðum og flott samvinna. Það var mikill handagangur í öskjunni, sérstaklega þegar 10 mínúturnar á klukkunni voru að nálgast núllið! Fóru leikar svo að “Hoppandi hrókar” unnu “Lið tvö” 6-2 og “Nei” vann liðið “Skákmaður” með sama mun 6:2.

Eftir þetta var frjáls taflmennska í 10 mínútur á meðan skákþjálfarar tóku fram medalíur og hressinguna.

Þá var komið að medalíunum. Veittar voru medalíur fyrir Íslandsmót unglingasveita, þar sem medalíur voru ekki til fyrir alla þegar mótið fór fram í Garðabæ í desember. 

Þau sem fengu medalíur fyrir Íslandsmót unglingasveita eru þessi lið/liðsmenn:

• C-lið: Adam Omarsson, Alexander Björnsson, Ingvar Wu Skarphéðinsson, Tristan Theodór Thoroddsen, Gabríel Sær Bjarnþórsson.
• D-lið: Einar Tryggvi Petersen, Bjartur Þórisson, Jósef Omarsson, Freyr Grímsson.
• E-lið: Soffía Berndsen, Ásthildur Helgadóttir, Anna Katarina Thoroddsen, Elsa Kristín Arnaldardóttir.
• F-lið: Katrín María Jónsdóttir, Hildur Birna Hermannsdóttir, Elín Lára Jónsdóttir, Gerður Gígja Óttarsdóttir.
• G-lið: Sigurður Steinsson, Einar Helgi Dóruson, Stefán Geir Hermannsson, Daníel Davíðsson.
• H-lið: Emil Kári Jónsson, Rigon Kaleviqi, Róbert Kaleviqi, Jón Björn Margrétarson, Ísak Smári Svavarsson. 

Þau sem fengu medalíur fyrir góða mætingu á skákæfingum í vetur voru: 

Byrjendaæfingarnar (Torfi Leósson)

1. Svavar Óli Stefánsson

2. Jón Sölvi Sigurðarson

3. Kristófer Árni Davíðsson, Elín Lára Jónsdóttir

 

Stelpuskákæfingar (Sigurlaug Regína Friðþjófsdóttir)

1. Iðunn Helgadóttir

2. Þóra Magnúsdóttir

3. Bergþóra Helga Gunnarsdóttir, Hildur Birna Hermannsdóttir

 

Laugardagsæfingarnar kl. 14 (Gauti Páll Jónsson)

1. Ingvar Wu, Rayan Sharifa.

2. Benedikt Þórisson, Adam Omarsson, Einar Tryggvi Petersen

3. Bjartur Þórisson, Jósef Omarsson.

Framhaldsflokkur (Björn Ívar Karlsson)

1. Iðunn Helgadóttir

2. Daníel Davíðsson, Einar Helgi Dóruson

3. Benedikt Þórisson, Ingvar Wu Skarphéðinsson

Að lokum var svo “sparihressing”. Boðið var upp á magnaða súkkulaðinammitertu frá Myllunni, sem við mælum svo sannarlega með! Þetta var kærkomin hressing á skemmtilegri skákæfingu.

Við skákþjálfarar í  TR þökkum kærlega fyrir veturinn og óskum ykkur gleðilegs sumars! Við minnum jafnframt á sumarnámskeiðin sem Bragi Þorfinnsson verður með í TR í sumar (upplýsingar og skráningarform á heimasíðu TR).Skákæfingar Taflfélags Reykjavíkur hefjast svo að nýju í byrjun september og verða auglýstar sérstaklega. Fylgist með á heimasíðunni og í Facebook-hópnum Taflfélag Reykjavíkur – skákforeldrar.

Frásögnina skrifaði Sigurlaug R. Friðþjófsdóttir.

Nánar (myndskreytt frásögn) á heimasíðu TR. 

Hraðskákmót öðlinga fer fram í kvöld

Hraðskákmót öðlinga fer fram miðvikudaginn 9. maí í félagsheimili TR að Faxafeni 12. Mótið hefst kl. 19.30 og er opið fyrir alla 40 ára (á árinu) og eldri. Tefldar verða 7 umferðir með umhugsunartímanum 4 mín + 2 sek á leik (umferðum kann að vera fjölgað í níu ef næg þátttaka verður).  Í lok mótsins fer fram verðlaunaafhending fyrir Hraðskákmótið sem og Skákmót öðlinga.

Þátttökugjald er kr. 1.000 og er í því innifalið ilmandi nýtt kaffi. Greiða skal með reiðufé við upphaf móts.

Mótið verður reiknað til alþjóðlegra (Fide) hraðskákstiga.

Núverandi Hraðskákmeistari öðlinga er Helgi Áss Grétarsson.

Skákmenn 40+ eru hvattir til að fjölmenna!

Skráning fer fram hér að neðan.

Skráningarform

Skráðir keppendur

Heimsmeistaramótið í skólaskák - Albanía, 20-29 apríl 2018

Við urðum þess heiðurs aðnjótandi að elstu börnum á Laufásborg voru boðið að taka þátt í HM í skólaskák í Albaníu. Þetta er í fyrsta sinn í heiminum sem leikskóli fer á Heimsmeistarmót sem er frábært fyrir okkur, að taka þetta frumkvöðlaskref.

Við viljum senda hjartans þakkir til allra sem hafa styrkt okkur, foreldrum okkar á Laufásborg, Hjallastefnunni, Menntamálaráðuneytinu, Skáksambandi Íslands. Þökkum líka kærlega fyrir sýndan áhuga, sérstaklega Forseta Íslands, Guðna Th. Jóhannessyni

Markmið okkar var:

 læra, æfa, taka þátt og kynnast fólki frá öðrum löndum.

10. febrúar: Foreldrar fjögurra stúlkna á Eldri stúlknakjarna ákveða að fara og taka þátt í mótinu. Emilía Embla, Inga Jóna, Rebekka og Urður.
11. febrúar: Nöfn þátttakenda voru send til mótshaldara í Albaníu, Jensa og Omar munu fara fyrir hönd Laufásborgar. Samdægurs byrjuðu formlega æfingar fyrir HM, sem var 45 mínútur, tvisvar sinnum á dag á leikskólatíma.

24 mars:  Í páskafríinu (10 dagar) voru æfingar í 7 daga og voru æfingar 1,5 tími þrisvar sinnum á dag.

1 apríl:  Æfingar komnar í þrisvar á dag alla daga vikunnar. Bæði innan og utan leikskólatíma

20. apríl: Við lögðum af stað um morguninn og vorum að koma til Durres í Albaníu um kl 20:00.

21-29 apríl: Stúlkurnar tefldu 9 skákir, eina skák á dag. Þær gerðu sitt besta og voru ótrúlega þrautseigar að klára skákirnar sínar sem voru í kringum 2 tíma í siðastu umferðum og skrifa þurfti niður alla leikina á blað. Þetta var mikill persónulegur sigur fyrir þær, tefla dag eftir dag, taka þá í Heimsmeistaramóti sem hefur stóra umgjörð með fullt af reglum. Omar fékk að vera inn í salnum og fannst okkur það mikill stuðningur við stúlkurnar en fyrsta daginn voru þær einar inni og allt gekk ótrúlega vel og við fengum fyrsta sigurinn.

Ferðin til Albaníu var ótrulega skemmtileg og lærdómsrík fyrir okkur öll.  Dagurinn snérist um skákina, taka æfingu, tefla og leika þess á milli.  Við nutum þess að Durres er strandbær og hotelið við ströndina. Þetta var frábært og gott jafnvægi milli þess að leika og vera á HM. Daglegar æfingar voru á milli 10:00 og 12:00 og voru líka einkaæfingar. Foreldrar stóðu sig frábærlega og stúlkurnar höfðu mjög gaman á mótinu, komu út af síðustu skákinni tilbúnar í fleiri sem var ótrúlega gaman. Þær kynntust vinkonum og vinum frá hinum þjóðunum sem er mjög dýrmætt.

Það var Indversk stúlka sem vann í þeirra flokki 7 ára og yngri með 8 vinninga.

Ein stúlkan okkar fékk 4 vinninga og hinar  3,5  2,5 og 1,5. Þær geta teflt aftur að ári í sama flokki á HM í skólaskák í Túnis apríl 2019. Við erum  afskaplega stolt og þakklát, þakklát foreldrum fyrir að treysta okkur og gera þetta svona ótrúlega vel með okkur.

Hjartans þakkir.

Omar Salama

Hraðskákmót öðlinga fer fram á miðvikudagskvöldið

Hraðskákmót öðlinga fer fram miðvikudaginn 9. maí í félagsheimili TR að Faxafeni 12. Mótið hefst kl. 19.30 og er opið fyrir alla 40 ára (á árinu) og eldri. Tefldar verða 7 umferðir með umhugsunartímanum 4 mín + 2 sek á leik (umferðum kann að vera fjölgað í níu ef næg þátttaka verður).  Í lok mótsins fer fram verðlaunaafhending fyrir Hraðskákmótið sem og Skákmót öðlinga.

Þátttökugjald er kr. 1.000 og er í því innifalið ilmandi nýtt kaffi. Greiða skal með reiðufé við upphaf móts.

Mótið verður reiknað til alþjóðlegra (Fide) hraðskákstiga.

Núverandi Hraðskákmeistari öðlinga er Helgi Áss Grétarsson.

Skákmenn 40+ eru hvattir til að fjölmenna!

Skráning fer fram hér að neðan.

Skráningarform

Skráðir keppendur

Hraðkvöld Hugins í kvöld

Hraðkvöld Hugins verður mánudaginn 7. maí nk. og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur eða 5 mínútur + 3 sekúndur á hvern leik. Teflt er í félagsheimili Hugins í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Birkir Ísak Íslandsmeistari í skólaskák - aukakeppni í yngri flokki

Birkir Ísak Jóhannsson (1957) sigraði í eldri flokki Landsmótsins í skólaskák fram fór um helgina í húsnæði Skáksambandsins. Fjórir keppendur urðu jafnir og efstir í yngri flokki og þurfa að heyja aukakeppni sem fram fór fljótlega. 

Eldri flokkur

Birkir Ísak Jóhannsson sigraði í eldri flokki. Stephan Briem urðu í 2.-3. sæti. 

Lokastaðan á Chess-Results. 

Yngri flokkur

Róbert Luu (1687), Örn Alexandersson (1463), Gunnar Erik Guðmundsson (1571) og Stefán Orri Davíðsson (1414) urðu efstir og jafnir með 5 vinninga eftir ótrúlega jafnan og spennandi flokk. Aukakeppni verður haldin fljótlega. 

Lokastaðan á Chess-Results. 

Nánari frétt væntanleg á morgun. 

 

Birkar Ísak efstur í eldri flokki - fimm keppendur efstir og jafnir í þeim yngri

Fimmta og sjötta umferð Landsmótsins í skólaskák fóru fram í gær. Spennan er gríðarleg í yngri flokki en þar eru fimm keppendur efstir og jafnir og flest stefnir í aukakeppni. Birkir Ísak Jóhannsson (1957) stendur vel að vígi í eldri flokki. Í gær fóru krakkarnir í Keiluhöllina í boði Skáksambandsins og spiluðu keilu og borðuðu pizzu!

Eldri flokkur

Birkir Ísak Jóhannsson er efstur í eldri flokki með 5,5 vinninga. Honum dugar jafntefli í lokaumferðinni til að vinna mótið. Óskar Víkingur Davíðsson (1962) og Stephan Briem (1915) eru í 2.-3. sæti með 4,5 vinninga. 

Staðan á Chess-Results. 

Yngri flokkur

Staðan í yngri flokki er ótrúleg. Fimm keppendur eru efstir og jafnir með 4 vinninga. Það eru Gunnar Erik Guðmundsson (1571), Róbert Luu (1687), Örn Alexandersson (1463), Benedikt Briem (1670) og Stefán Orri Davíðsson (1414). 

Verði tveir eða fleiri keppendur efstir og jafnir verður aukakeppni. Það stefnir flest í svo verði rauinin. Mögulega geta orðið 4 keppendur efstir og jafnir með 5 vinninga.

Staðan á Chess-Results. 

Sjöunda umferð hefst kl. 10.