Skák.is

Bloggfærslur mánaðarins, maí 2018

5.5.2018 | 20:00

Skákþáttur Morgunblaðsins: Áskorandinn hefur alltaf meðbyr

Þrátt fyrir glæsilegan sigur Fabiano Caruana á áskorendamótinu í Berlín sem lauk í síðasta mánuði virðast ekki margir hafa trú á því að honum takist að velta Magnús Carlsen heimsmeistara úr sessi í heimsmeistaraeinvígi þeirra sem hefst í London þann 9. nóvember nk. Sigur hans á Grenke-mótinu breytir þar litlu um. Caruana varð vinningi á undan Carlsen, hlaut 6 ½ v. af níu mögulegum. Ferill Magnúsar og fyrri skákir hans við Caruana eiga sennilega stærstan þátt í þessari vantrú á möguleikum Bandaríkjamannsins.

Sé litið til sögu heimsmeistaraeinvíga síðustu 100 árin kemur hinsvegar í ljós að „áskorandinn“ virðist oftast hafa meðbyr þegar í stóra slaginn er komið. Úrslit fyrri viðureigna sem grundvöllur fyrir spádómi um úrslit hafa reynst óáreiðanlegt viðmið.

Emanuel Lasker var heimsmeistari í 27 ár en þegar hann háði einvígi sitt við Capablanca í Havana á Kúbu árið 1921 tapaði hann án þess að vinna eina einustu skák. Capablanca bar höfuð og herðar yfir helstu andstæðinga sína á næstu árum og var jafn öruggur og aðrir um sigur í einvíginu við Aljékín í Buenos Aires árið 1927. Aljékín vann einn óvæntasta sigur skáksögunnar, 6:3 með 25 jafnteflum. Hann varði titil sinn gegn óverðugum áskorenda, Efim Bogoljubov, sem gat hinsvegar tryggt nægt verðlaunafé sem var hlutverk áskorandans á þessum árum.

Árið 1935 var áskorandinn Max Euwe og vann 15½ : 14½. Tveim árum síðar tefldu þeir aftur og Aljékín endurheimti titilinn með öruggum sigri, 15½ : 9½.

Aljékín lést árið 1946 og og nýr handhafi krúnunnar var Sovétmaðurinn Mikhael Botvinnik. Hann hélt titlinum á jöfnu, 12:12 í einvígi við Bronstein árið 1951 og einnig gegn Smyslov þrem árum síðar. En árið 1957 varð Smyslov heimsmeistari með öruggum sigri, 12½ : 9½. Botvinnik nýtti sér réttinn til annars einvígis og endurheimti titilinn árið 1958. Á sömu leið fór þegar hann tefldi tvisvar við Mikhael Tal sem vann 12½ : 8½ árið 1960 en tapaði svo ári síðar, 8:13. Þessi réttur Botvinniks var afnuminn og hann tapaði fyrir Tigran Petrosjan 9½ : 12½ árið 1963. Hann mætti Boris Spasskí árið 1966 og vann 12½ : 11½. Armeninn er því einn fárra sem náð hafa að verja heimsmeistaratitilinn. Aftur bankaði Spasskí á dyr þrem árum síðar og vann, 12½ : 10½.

Bobby Fischer vann 12½ : 8½ í „einvígi aldarinnar“ í Reykjavík sumarið 1972. Hann afsalaði sér „FIDE-heimsmeistaratitlinum“ og Anatolí Karpov, sem var krýndur vorið 1975 varði titilinn í einvígum við Kortsnoj árin 1978 og 1981.

Allir vissu á hvaða ferð Garrí Kasparov var er hann vann áskorendakeppnina 1983-´84. Fyrsta einvígi hans af fimm gegn Karpov 1984-´84 lauk án niðurstöðu eins og frægt varð en ákveðið að þeir myndu tefla aftur og Kasparov vann haustið 1985 í 24 skáka einvígi, 13:11. Viðureignum hans við Karpov var ekki lokið; þeir tefldu í London og Leningrad, í Sevilla á Spáni og loks í New York og Lyon. Kasparov stóðst allar atlögur.

Árið 1993 varð klofningur í skákheiminum og tveir heimsmeistaratitlar í „umferð“. Þrettán árum síðar vann Kramnik Topalov í „sameiningareinvígi“ en ári síðar náði Indverjinn Anand titlinum og vann Topalov og Gelfand á næstum árum. Svo kom Magnús Carlsen kom til skjalanna. Hann telst sextándi heimsmeistari sögunna

Helgi Ólafsson helol@simnet.is

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 28. apríl 2018

Skákþættir Morgunblaðsins

Spil og leikir | Breytt 28.4.2018 kl. 08:53 | Slóð | Facebook | Athugasemdir (0)

5.5.2018 | 09:06

Birkir Ísak efstur í eldri flokki - Róbert og Gunnar Erik í þeim yngri

Fimmta og sjötta umferð Landsmótsins í skólaskák fóru fram í gær. Spennan er gríðarleg í yngri flokki en þar eru fimm keppendur efstir og jafnir og flest stefnir í aukakeppni. Birkir Ísak Jóhannsson (1957) stendur vel að vígi í eldri flokki. Í gær fóru krakkarnir í Keiluhöllina í boði Skáksambandsins og spiluðu keilu og borðuðu pizzu!

Eldri flokkur

Birkir Ísak Jóhannsson er efstur í eldri flokki með 5,5 vinninga. Honum dugar jafntefli í lokaumferðinni til að vinna mótið. Óskar Víkingur Davíðsson (1962) og Stephan Briem (1915) eru í 2.-3. sæti með 4,5 vinninga.

Staðan á Chess-Results.

Yngri flokkur

Staðan í yngri flokki er ótrúleg. Fimm keppendur eru efstir og jafnir með 4 vinninga. Það eru Gunnar Erik Guðmundsson (1571), Róbert Luu (1687), Örn Alexandersson (1463), Benedikt Briem (1670) og Stefán Orri Davíðsson (1414).

Verði tveir eða fleiri keppendur efstir og jafnir verður aukakeppni. Það stefnir flest í svo verði rauinin. Mögulega geta orðið 4 keppendur efstir og jafnir með 5 vinninga.

Staðan á Chess-Results.

Sjöunda umferð hefst kl. 10.

Spil og leikir | Breytt 6.5.2018 kl. 09:23 | Slóð | Facebook | Athugasemdir (0)

5.5.2018 | 08:40

Sigurbjörn Björnsson er skákmeistari öðlinga 2018

Fyrir lokaumferðina voru Sigurbjörn og Þorvarður efstir og jafnir með 5,5 vinning og gat enginn af keppendunum náð þeim að vinningum. Sigurbjörn stýrði hvítu mönnunum gegn Kristni J. Sigurþórssyni (1744) og þrátt fyrir mikinn stigamun varð úr mikil baráttuskák þar sem Kristinn hafði í fullu tré við Fide-meistarann framan af skák. Svo fór þó að styrkleikamunurinn sagði til sín og Sigurbjörn sigldi sigrinum í höfn í endatafli sem var hvítu mönnunum ofviða. Á sama tíma sá Þorvarður vart til sólar með hvítt gegn Lenku sem þjarmaði hart að Öðlingameistaranum 2012 og 2013. Lenka kláraði orrustuna af öryggi og því var ljóst að Þorvarður myndi ekki gera atlögu að titlinum að þessu sinni.

Segja má að sigurinn hafi verið verðskuldaður hjá Sigurbirni sem tefldi heilt yfir af töluverðu öryggi í sínu fyrsta Öðlingamóti og verður nú 17. skákmaðurinn til að bera titil Öðlingameistara á þeim 26 árum sem mótið hefur farið fram. Alls tóku 37 keppendur þátt en nokkur stígandi hefur verið í mótinu undanfarin ár eftir fækkun keppenda árin á undan. Keppendum er þökkuð þátttakan og þá fær Þorvarður sérstakar þakkir fyrir milligöngu um glæsilegar veigar á lokakvöldinu. Mótahaldinu lýkur formlega næstkomandi miðvikudagskvöld með Hraðskákmóti öðlinga þar sem jafnframt fer fram verðlaunaafhending.

Að venju má nálgast öll úrslit ásamt skákunum á Chess-Results en það var Daði Ómarsson sem sló inn skákirnar hratt og örugglega.

Heimasíða TR

Spil og leikir | Slóð | Facebook | Athugasemdir (0)

4.5.2018 | 06:28

Óskar sigraði á hraðkvöldi Hugins

Óskar Víkingur Davíðsson og Vigfús Ó. Vigfússon voru efstir og jafnir með 8,5v á hraðkvöldi Hugins sem fram fór 30. apríl sl. Þátttakendur voru sex og tefldu tvöfalda umferð allir við alla. Óskar Víkingur vann innbyrðis viðureign þeirra með 1,5v gegn 0,5v en missti niður hálfan vinning gegn bæði Hjálmari Sigurvaldasyni og Stefáni Orra Davíðssyni á meðan Vigfús vann alla aðra andstæðinga sína. Innbyrðis viðureigning vóg þungt í stigútreikningnum svo Óskar hlaut fyrsta sætið en Vigfús varð annar. Þriðji var svo Hjálmar Sigurvaldason með 6,5v.

Tölvan sá um dráttinn í happdrættinu og annað skiptið í röð kom upp talan 2. Óskar valdi pizzumiða frá Dominos meðan Vigfús hélt sig við Saffran. Næsta hraðkvöld verður mánudaginn 7. maí.

Lokastaðan á hraðkvöldinu í chess-results.

Spil og leikir | Slóð | Facebook | Athugasemdir (0)

3.5.2018 | 16:00

Héðinn sigraði á alþjóðulegi móti í Flórída

Stórmeistarinn Héðinn Steingrímsson sigraði á alþjóðlegu skákmóti sem fram fór dagana 27.-29. apríl í Flórída í Bandaríkjunum. Héðinn hlaut 4,5 vinninga í 5 skákum og vann t.d. goðsögnina Alexey Dreev í lokaumferðinni.

Lokastöðuna má nálgast hér.

Spil og leikir | Breytt s.d. kl. 12:28 | Slóð | Facebook | Athugasemdir (0)

3.5.2018 | 12:15

Alexander Oliver og Stefán Orri Reykjavíkurmeistarar í skólaskák

Skólaskákmót Reykjavíkur fór fram fyrir skemmstu í Laugalækjarskóla. Alexander Oliver Mai, Laugalækjarsóla, kom sá og sigraði í eldri flokki. Vann allar sínar skákir. Mikil spenna var í yngri flokki en þar vann Stefán Orri Davíðsson.

Eldri flokkur

Alexander Oliver Mai vann allar sínar skákir, fimm talsins. Óskar Víkingur Davíðsson, Ölduselsskóla, varð annar og Sæmundur Árnason, Foldaskóla, varð þriðji.

Lokastöðuna má finna á Chess-Results.

Yngri flokkur

Spennan í yngri flokki var yfir mikil og töluvert um óvænt úrslit. Svo fór að Stefán Orri Davíðsson, Öldusselsskóla, og Árni Ólafsson, Hlíðaskóla, komu jafnir í mark. Balthasar Máni Wedholm Gunanrsson, Ölduselsskóla, varð þriðji.

Lokastöðuna má finna á Chess-Results.

Tveir efstu keppendur á báðum flokkum unnu sér keppnisrétt í Landsmótinu í skólaskák sem hefst á morgun.

Spil og leikir | Slóð | Facebook | Athugasemdir (0)

3.5.2018 | 07:55

Hilmir Freyr Íslandsmeistari í skólaskák 2017

Kandídatameistarinn Hilmir Freyr Heimisson er Íslandsmeistari í eldri flokki í skólaskák. Hann vann Vignir Vatnar Stefánsson í úrslitaeinvígi sem fram fór fyrir skemmstu á Chess.com þar sem Hilmir býr erlendis. Einvígið sjálft fór 1-1 eftir tvö jafntefli en bráðabanaskákina vann Hilmir.

Vignir og Hilmir komu jafnir í mark á Landsmótinu í fyrra. Sjá nánar hér. Að ýmsum ástæðum dróst að þeir tefldu til úrslita.

Spil og leikir | Slóð | Facebook | Athugasemdir (0)

2.5.2018 | 09:14

Manar-mótið: Pistill frá Hilmi Frey

Isle of Man International

23. september til 1. október 2017

Mótið var haldið á the Villa Marina, í höfuðstaðnum Douglas, sem er glæsilegt bygging og var í göngufæri frá hótelinu okkar. Ég tefldi í Masters flokki ásamt hópi Íslendinga, ég fékk stigahærri andstæðinga í öllum umferðunum og endaði með 3,5 af 9 og hækkaði um 44,4 elóstig.

Í fjórðu umferð vann ég skoska alþjóðlega meistarann Stephen Mannion (2320) og mig langar að sýna þá skák.

1.d4 d5 2.Bg5 f6 3.Bd2 Nc6 4.c4 dxc4 5.e3 e5 6.Bxc4 exd4 7.Qb3 Nh6 8.Nf3 dxe3 9.Bxe3 Na5 10.Qa4+ c6 11.Be2 þessi staða hér er nú bara tölvustúderingar sem ég aflaði mér fyrir skákina og gaman að segja frá því en hér er ég með klukkutíma og 35 mínútur á klukkunni og ákvað að fara út í ágæta veðrið sem þarna var og kíkti á fallegu fjöllin, dró andann hægt og rólega meðan að andstæðingur minn var byrjaður að svitna þar sem að hann var að detta í 20 mínútur, svo eftir dágóða stund kom ég aftur inn og sá hann leika 11.b5 12.Bxb5 cxb5 13.Qe4+ Be6 14.Qxe6+ Be7 15.Bxh6 gxh6 hér er ég bara kominn með yfirburða stöðu og hann með lélega peðastöðu, fullt af veikum reitum og með engar skaðabætur fyrir það og þar af leiðandi varð framhaldið bara tæknileg úrvinnsla. 16.O-O Qd7 17.Qe4 O-O 18.Qf4 Kg7 19.Nc3 Bd6 20.Qh4 b4 21.Ne4 f5 22.Nxd6 Qxd6 23.Rfd1 Qf6 24.Qxb4 Nc6 25.Qb7+ Kg8 26.Rac1 Rfc8 27.h3 Ne7 28.Rxc8+ Rxc8 29.Qxa7 Rc2 30.b4 Rb2 31.a3 Ra2 32.Qe3 Kg7 33.Re1 Ra1 34.Rxa1 Qxa1+ 35.Kh2 Nd5 36.Qa7+ Kf6 37.b5 Qb2 38.a4 Qb4 39.Qb8 Kf7 40.Qe5 Ne7 41.Qd4 Qa5 42.Ne5+ Ke6 43.f4 Nd5 44.Qc4 Qb6 45.Qc8+ Ke7 46.Qd7 +1-0.

Spil og leikir | Slóð | Facebook | Athugasemdir (0)

1.5.2018 | 10:23

Nazi Paikidze bandarískur meistari

Nazi Paikidze varð í gær bandarískur meistari kvenna í skák. Hún vann hina 15 ára Annie Wang í úrslitaeinvígi 2-1. Paikidze hefur verið afar sigursæl á mótinu. Hann vann jafnframt árið 2016 og varð önnur árin 2015 og 2017.

Sjá nánari umfjöllun á Chess.com.