Góð frammistaða Vignis Vatnars í Stuttgart

Alþjóðlega mótinu, Staufer-Open, lauk í dag í Stuttgart í Þýskalandi í dag. Vignir tapaði fyrir stórmeistaranum Stanislav Novikov (2540) í lokaumferðinni. Guðmundur Kjartansson (2438) vann FIDE-meistarann Thomas Henrich (22440). Gúmmi hlaut 6,5 vinninga en Vignir hlaut 6 vinninga. Sá síðarnefndi var með frammistöðu upp á 2437 skákstig, var afar nærri því að ná alþjóðlegum áfanga, og hækkar um 16 stig. Guðmundur hækkar um 1 stig. 

Heimasíða mótsins

 

 

 

Bárður og Dagur efstir Íslendinga á minningarmóti Steinþórs

Bárður Örn Birkisson (2190) og Dagur Ragnarsson (2332) eru efstir íslensku skákmannanna eftir fjórar umferðir á minningarmóti Steinþórs Baldurssonar sem í gangi er í Stúkunni við Kópavogsvöll. Þeir félagarnir hafa 3 vinninga og er í 2.-7. sæti. Gauti Páll Jónsson (2161), Oliver Aron Jóhannesson (2277) eru þar skammt undan með 2,5 vinninga.

 

Fimmta umferð hófst núna kl. 10. Bárður teflir þar á fyrsta borði gegn hollenska alþjóðlega meistaranum Thomasi Beerdesen (2416), stigahæsta keppenda mótsins, og Dagur við lettneska FIDE-meistarann Dmitrijs Tokranovs (2354). 

Sjötta og næstsíðast umferð hefst svo kl. 16 í dag. Lokaumferðin hefst kl. 10 í fyrramálið. 

• Heimasíða mótsins
• Beinar útsendingar (Chess24)
• Chess-Results

Vignir í 6.-14. sæti fyrir lokaumferðina

Vignir Vatnar Stefánsson (2304) tapaði fyrir stórmeistaranum Vladimir Burmakin (2532) í áttundu og næstsíðustu umferð Staufer-Open í Stuttgart í gær. Vignir hefur 6 vinninga og er í 6.-13. sæti. Guðmundur Kjartansson (2438) gerði jafntefli við Philip Wenninger (2349) og hefur 5,5 vinninga. 

Lokaumferðin fer fram í dag. Vignir teflir við stórmeistarann Stanislav Novikov (2540) og Gummi við FIDE-meistarann Thomas Henrich (2240).   

Heimasíða mótsins

 

 

 

Bárður Örn efstur Íslendinga á minningarmóti Steinþórs

Bárður Örn Birkisson (2190) er efstur Íslendinga í 2.-4. sæti með 2½ vinning á alþjóðlegu unglingamóti sem haldið er þessa dagana til minningar um Steinþór Baldursson í Stúkunni við Kópavogsvöll. Þriðja umferð fór fram fyrr í dag. Lettneski FIDE-meistarinn Dmitrijs Tokranovs (2354) er efstur með fullt hús. Sjö skákmenn hafa 2 vinninga og þar á meðal eru Dagur Ragnarsson (2332), Gauti Páll Jónsson (2161), Símon Þórhallsson (2040) og Björn Hólm Birkisson (2084).

Hart er barist á mótinu og nánast ekkert um stutt jafntefli. Kröfugt taflmennska hjá ungmennunum sem berjast til síðasta blóðdropa í hverri skák. Fjórða umferð hófst núna kl. 16 í dag. 

Tvær skákir eru svo tefldar á morgun og lýkur mótinu á sunnudag. Leik dagsins í dag átti áðurnefndur Tokranovs í dag.

 

22...Dxh2!! 23. Dd3 (23. Dxh2 Rxc3#) 23...Dh5+ 24. He2 Rde3+! 5. Bxe3 Rb2+ og svartur vann skömmu síðar. 

Myndir væntanlegar!

Heimasíða mótsins

Vignir vann stórmeistara - er í 1.-2. sæti í Stuttgart

Vignir Vatnar Stefánsson (2304) vann þýska stórmeistarann Vitaly Kunin (2556) í sjöundu umferð Staufer Open sem fram fór í dag í Stuttgart. Vignir er efstur ásamt Íslendingabananum Jónasi Lampert (2518) með 6 vinninga. Annar stórmeistarinn sem Vignir leggur að velli á stuttum tíma. Guðmundur Kjartansson (2438) gerði jafntefli við Valentin Buckels (2332) og hefur 5 vinninga.

Áttunda og næstsíðasta er tefld síðar í dag. Vignir mætir stórmeistaranum Vladimir Burmakin (2532) en Gúmmi mætir Philip Wenninger (2349).

Heimasíða mótsins

 

 

 

Skákþing Reykjavíkur hefst á miðvikudagskvöldið

Skákþing Reykjavíkur hefst miðvikudaginn 10. janúar kl. 19.30. Tefldar verða níu umferðir eftir svissnesku kerfi. Tímamörk eru 90 mínútur og bætast við 15 mínútur eftir 40 leiki. 30 sekúndur bætast við eftir hvern leik alla skákina. Teflt er í húsnæði Taflfélags Reykjavíkur að Faxafeni 12.

Keppendur geta tekið tvær yfirsetur (bye) í umferðum 1-6. Leggja skal inn ósk um yfirsetu til skákstjóra við upphaf umferðarinnar á undan. Hálfur vinningur fæst fyrir yfirsetu.

Athygli er vakin á því að umferðir á sunnudögum hefjast kl. 13:00.

Dagskrá

1. umferð miðvikudag 10. janúar kl. 19.30
2. umferð sunnudag 14. janúar kl. 13.00
3. umferð miðvikudag 17. janúar kl. 19.30
4. umferð sunnudag 21. janúar kl. 13.00
5. umferð miðvikudag 24. janúar kl. 19.30
6. umferð sunnudag 28. janúar kl. 13.00
7. umferð miðvikudag 31. janúar kl. 19.30
8. umferð sunnudag 04. febrúar kl. 13.00
9. umferð miðvikudag 07. febrúar kl. 19.30

Hraðskákmót Reykjavíkur fer fram sunnudaginn 11. febrúar kl. 13 og verður þá jafnframt verðlaunaafhending fyrir Skákþingið.

Tímamörk

90 mín á 40 leiki, síðan 15 mín, auk 30 sek eftir hvern leik alla skákina.

Skákstjórn

IA Ólafur Ásgrímsson og IA Ríkharður Sveinsson ([e-mail] / s.772 2990)

Aðalverðlaun

• 1. sæti kr. 80.000
• 2. sæti kr. 40.000
• 3. sæti kr. 20.000

Stigaverðlaun

• Besta frammistaða miðað við eigin stig (rating performance – eigin stig) – kr. 10.000.
• U2000 og U1800 – kr. 10.000.
• U1600, U1400, U1200, stigalausir – bókaverðlaun.

Fide stig gilda við úthlutun stigaverðlauna (íslensk stig til vara). Hver keppandi getur aðeins hlotið ein aukaverðlaun (ofangreind röð verðlauna gildir).

Þátttökugjöld (greiðist með reiðufé við upphaf móts).

kr. 5.000 fyrir 18 ára og eldri.
kr. 2.500 fyrir 17 ára og yngri.

Skráningarform

Skráðir keppendur

Keppt er um titilinn “Skákmeistari Reykjavíkur 2018” og hlýtur sá keppandi sem verður efstur þeirra sem eiga lögheimili í Reykjavík, eða eru félagsmenn í reykvísku skákfélagi, titilinn og farandbikar til varðveislu í eitt ár. Núverandi Skákmeistari Reykjavíkur er alþjóðlegi meistarinn Guðmundur Kjartansson.

Verði keppendur jafnir að vinningum í þremur efstu sætunum, verður verðlaunum skipt (Hort-kerfi), en stigaútreikningur (tiebreaks) látinn skera úr um lokaröð. Í öðrum verðlaunaflokkum ganga verðlaun óskipt til þess sem hefur flest stig eftir stigaútreikning. Röð stigaútreiknings: 1. Innbyrðis úrslit 2. Buchholz (-1) 3. Buchholz (median) 4. Sonneborn-Berger.

Skákþing Reykjavíkur er reiknað til alþjóðlegra skákstiga. Skákir mótsins verða slegnar inn og birtar á pgn formi.

Vinsamlegast mætið tímanlega á skákstað til að staðfesta skráningu og greiða þátttökugjald. Skráningu lýkur 15 mínútum fyrir auglýst upphaf móts, þ.e. kl. 12.45.

Minningarmótið um Steinþór hófst í Stúkunni í dag

Alþjóðlega unglingamótið um Steinþór Baldursson var sett í dag í Stúkunni við Kópavogsvöll að viðstöddu miklu fjölmenni. Gunnar Björnsson, forseti SÍ, og Arndís Ármann Steinþórsdóttir héldu stuttar tölur þar sem Steinþór var minnst og að því loknu lék Felix, sonur Steinþórs, fyrsta leikinn fyrir Alexander Oliver Mai, d2-d4, á fyrsta borði. Skáksambandið bauð svo gestum og gangandi uppá súpu og brauð.

Úrslitin á mótinu voru býsna hefðbundin í fyrstu umferð. Ávallt unnu hinir stigahærri þá stiglægri. Önnur umferð bauð upp nokkur óvænt úrslit en þó ekki ýkja mörg. 

Fimm keppendur hafa fullt hús eftir tvær umferðir. Í þeim hópi er Bárður Örn Birkisson.

Tvær umferðir fara fram á morgun. Sú fyrri hefst kl. 10 og sú síðari kl. 16.

Myndir frá opnunarhátíðinni eru væntanlegar.

Heimasíða mótsins

Vignir í 3.-5. sæti í Stuttgart - Guðmundur vann Plat stórmeistara

Vignir Vatnar átti afar góðan góðan dag á Staufer Open mótinu í Stuttgart. Í dag fóru fram 5. og 6. umferð og vann Vignir báðar sínar skákir. Í fyrri skákinnni var Manfred Schweizer (2013) lagður að velli og í þeirri síðari vann hann ungverska FIDE-meistarann Tibor Kende Antal (2419). Vignir hefur 5 vinninga og er í 3.-5. sæti. Í fyrramálið teflir hann á fyrsta borði við þýska stórmeistarann Vitaly Kunin (2556).

Guðmundur vann í fyrri skák dagsins pólska stórmeistarann Vojech Plat (2569) í fyrri skák dagsins en tapaði fyrir alþjóðlega meistaranum Jónasi Lambert (2518) í síðari skák dagsins. Jónas hefur reynst Íslendingum illa og lagt þá báða að velli. 

Á morgun eru tefldar umferðir 7 og 8. Mótinu lýkur svo á laugardaginn.

Heimasíða mótsins

 

 

 

Alþjóðlegt unglingamót til minningar um Steinþór Baldursson hefst kl. 11

Alþjóðlegt unglingaskákmót um Steinþór Baldursson fer fram dagana 4.-7. janúar nk. Mótið er teflt í glerstúkunni við Kópavogsvöll. Það eru Skáksamband Íslands og Skákskóli Íslands sem standa að mótinu í sameiningu. 

Í mótinu taka þátt tæplega 24 ungmenni (20 ára og yngri) og þar af eru 11 erlend. Keppendur koma meðal annars frá Lettlandi, Færeyjum, Svíþjóð og Hollandi.

Steinþór Baldursson lést árið 2016 aðeins fimmtugur að aldri. Hann var stjórnarmaður í Skáksambandi Íslands um langt árabil. Hann hafði alþjóðleg skákdómararéttindi og var meðal skákdómara á Evrópumóti landsliða í Laugardalshöllinni 2005 og á Ólympíuskákmótinu í Tromsö 2014. Steinþór var mikill grasrótarmaður og þótt viðeigandi að minnast hans með unglingaskákmóti.

Mótið verður sett á morgun kl. 11 og eru allir velkomnir. Felix, sonur Steinþórs, mun leika fyrsta leik mótsins á morgun. Að lokinni setningu mótsins mun Skáksambandið bjóða gestum upp á súpu og brauð. 

Tefldar verða sjö umferðir. Landsbankinn og Kvika styrkja myndarlega við mótshaldið og færir Skáksambandið þeim miklar þakkir fyrir. 

Heimasíða mótsins

Guðmundur með 3½ vinning eftir 4 umferðir í Stuttgart

Alþjóðlega mótið, Staufer Open, hélt áfram í dag í Stuttgart. Guðmundur Kjartansson (2438) fékk 1½ vinning í tveim skákum dagsins en Vignir Vatnar Stefánsson (2304) hlaut 1 vinning. Gummi hefur 3½ vinning en Vignir hefur 3 vinninga.

Guðmundur gerði jafntefli við Vadim Reimche (2040) í fyrri skák dagsins en vann Anasta Golovkina (2019) í þeirri síðari. Vignir tapaði fyrir alþjóðlega meistaranum Jónasi Lampert (2518) í fyrri skák dagsins en vann Klaus-P Wortmann (2083) í þeirri síðari. 

Á morgun eru tefldar tvær umferðir. Í fyrri skák dagsins, teflir Guðmundur við tékkneska stórmeistarann Vojech Plat (2569) en Vignir við Manfred Schweizer (2013). 

Mótið, sem er 9 umferðir, er teflt á aðeins 5 dögum.

Heimasíða mótsins