Meistaramót Hugins (suðursvæði) hefst 23. ágúst

Meistaramót Hugins (suðursvæði) 2017 hefst miðvikudaginn 23. ágúst klukkan 19:30. Mótið er 7 umferða opið kappskákmót sem lýkur 2. október. Leyft verður að taka 2 yfirsetur í 1.- 6. umferð sem tilkynna þarf um fyrir lok næstu umferðar á undan. Vegleg og fjölbreytt verðlaun eru í boði. Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra og íslenskra skákstiga. Skráning í mótið er á skak.is en einnig er hægt að skrá sig með því að hringja í skákstjóra s-866-0116 (Vigfús).

Upplýsingar um þegar skráða keppendur má finna hér.

Mótið hefst á miðvikudegi en aðrir skákdagar eru á mánudögum. Að þessu sinni verður aðeins ein umferð í hverri viku. Teflt er í félagsheimili Hugins í Álfabakka 14a í Mjóddinni.

Aðalverðlaun:

1. 50.000
2. 40.000
3. 30.000

Aukaverðlaun (miðað er við alþjóðleg skákstig)

• Skákmeistari Hugins (suðursvæði): Kr. 10.000.
• Besti árangur undir  2000 skákstigum:  Skákbók hjá skákbókasölunni að verðmæti kr. 5.000.
• Besti árangur undir 1800 skákstigum:  Skákbók hjá skákbókasölunni að verðmæti kr. 5.000.
• Besti árangur undir 1600 skákstigum: Skákbók hjá skákbókasölunni að verðmæti kr. 5.000.
• Besti árangur stigalausra: Skákbók hjá skákbókasölunni að verðmæti kr. 5.000.
• Unglingaverðlaun (15 ára og yngri), skákbækur hjá skákbókasölunni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

Félagsmenn kr. 3.500; aðrir 4.500-
Unglingar 15 ára og yngri: Félagsmenn: 2.000; Aðrir 3.000.
Allir titilhafar fá frítt í mótið

Umferðartafla:

• 1. umferð, miðvikudaginn, 23. ágúst, kl. 19:30
• 2. umferð, mánudaginn, 28. ágúst, kl. 19:30
• 3. umferð, mánudaginn, 4. september, kl. 19:30
• 4. umferð, mánudaginn, 11. september, kl. 19:30
• 5. umferð, mánudaginn, 18. september, kl. 19:30
• 6. umferð, mánudaginn, 25. september, kl. 19:30
• 7. umferð, mánudaginn, 2. október, kl. 19:30

 Upplýsingar um þegar skráða keppendur má finna hér.

Þrír efstir í Genf

Þrír skákmenn eru efstir og jafnir á FIDE Grand Prix-mótinu í Genf í Sviss. Það eru Grischuk (2761), Harikrishna (2737) og Radjabov (2724) með 4 vinninga eftir 6 umferðir. 

Sjöunda umferð fer fram í dag. Mótinu lýkur á laugardaginn.

Nánar á heimasíðu FIDE.

 

 

Wesley So vann í León

Wesley So sigraði á þrítugasta skákmótinu í León sem lauk fyrir skemmstu. Fjórir skákmenn tóku þátt og tefldu eftir atskákmót eftir útsláttarfyrkomulagi. Í fyrstu umferð vann Wesley So Jan-Krzysztof Duda 2,5-1,5 þrátt fyrir að hafa leikið sér drottningunni í fyrstu skákinni. Anand þurfti hins  vegar mikið fyrir að því að vinna heimamanninn og alþjóðlega meistarann Latasa Santos. Þurfi framlengingu við.

Weslay So vann svo Anand í úrslitunum 3,5-2,5. Þetta er í 30. skipti sem Leon-mótið fer fram og hefur Anand þar af unnið tíu sinnum.

Nánar á Chess24.

 

Skákþáttur Morgunblaðsins: Jóhann og Lenka Norðurlandameistarar

Jóhann Hjartarson varð Norðurlandameistari í Reykjavík fyrir 20 árum og hefur varla átt von á því að vinna titilinn aftur 20 árum síðar. En sigur hans á Norðurlandamótinu sem fram fór í Vaxsjö í Svíþjóð var engin tilviljun. Hann tefldi best allra og kom í mark með 7½ vinning úr níu skákum, jafn aðalkeppinaut sínum, Svíanum Nils Grandelius, en var hærri á mótsstigum. Fyrir lokaumferðina hafði Jóhann ½ vinnings forskot á Svíann og með betri stigatölu og allar líkur bentu því til þess að jafntefli dygði honum. Það varð líka niðurstaðan. Íslandsmeistarinn Guðmundur Kjartansson hlaut 6 vinninga af 9 mögulegum og hafnaði í 9. sæti.

Með sigrinum öðlast Jóhann keppnisrétt á heimbikarmóti sem fram fer í Tblisi í Úkraínu í haust. Undanfarin tvö ár hefur Jóhann aukið mjög við taflmennsku sína, náði afbragðs árangri á Evrópumóti landsliða haustið 2015 og varð Íslandsmeistari í fyrra. Norðurlandamótið fór fram í fjórum flokkum og í opna flokknum voru keppendur 73 talins, flestir frá Svíþjóð.

Í kvennaflokki bar Lenka Ptacnikova sigur úr býtum og er því Norðurlandameistari kvenna. Hún lét óvænt tap í 2. umferð ekki slá sig út af laginu og vann allar skákir sínar eftir það og hlaut 6 vinninga af sjö mögulegum.

Í flokki keppenda 50 ára og eldri nældi Áskell Örn Kárason sér í silfurverðlaun, hlaut 6 vinninga af átta mögulegum.

Þegar litið er til þess að meðal keppenda voru margir öflugir skákmenn á borð við Færeyinginn Helga Dam Ziska, Danann Allan Stig Rasmussen, Guðmund Kjartansson og Svíann Jonathan Westerberg áttu menn ekki endilega von á því að Jóhann og Nils Grandelius myndu slíta sig frá öðrum keppendum með jafn afgerandi hætti og raun bar vitni. Lykilsigur Jóhanns kom í næst síðustu umferð en þá hafði hann svart gegn sterkasta Dananum sem gat með sigri blandað sér baráttuna um efsta sætið. Það var því heilmikið undir í þessari skák:

NM 2017; 8. umferð:

Allan Stig Rasmussen – Jóhann Hjartarson

Pirc vörn

1. e4 g6 2. d4 Bg7 3. Rc3 d6 4. Be3 a6 5. Dd2 b5 6. f3 Rd7

Byrjun Jóhanns ber stundum heitið „Tískuvörn“ – en það er gömul tíska. Svona tefldi t.d. Guðmundur Sigurjónsson gegn sjálfum Karpov í Caracas í Vensúela árið 1970.

7. h4 Rgf6 8. g4 h6 9. Rge2 Rb6 10. b3 h5 11. g5 Rfd7 12. Rg3 c5 13. Hd1 Bb7 14. Rce2 cxd4 15. Bxd4 Bxd4 16. Rxd4 Dc7

Svarta staðan hefur fengið á sig yfirbragð traustrar sikileyjarvarnar.

17. f4 e5 18. Rde2 exf4 19. Dxf4

19. Rxf4 kom til álita en eftir 19. ... Re5 20. Be2 O-O-O er svarta staðan betri.

19. ... Dxc2 20. Hc1 Dxa2 21. Dxd6 Hc8 22. Hxc8 Bxc8 23. Rd4 Da5+ 24. b4 Da1+ 25. Kf2 Db2 26. Kg1 Bb7 27. Hh2 Da1 28. Rge2

Lítur illa en út en svartur hótaði 28. ... Rc4 og riddarinn á d4 fellur.

28. ... Bxe4 29. Kf2 Kd8 30. Bg2

Riddarar svarts valda kónginn vel og nú fá þeir stuggað við drottningunni.

30. ... Rc4! 31. Df4 Bxg2 32. Hxg2 Rce5 33. Hg3 He8 34. Kg2 Da2 35. De4 Ke7 36. Hc3 Kf8 37. Hc2 Da4 38. Rf4 Rg4 39. Rde6 Kg8 40. Hd2 Rf8! 41. Db1 Rxe6 42. Rd5

Hann gat reynt 42. Rxe6 Hxe6 43. Hc8+ Kh7 44. Db2 en þá kemur 44. .... Dc2+! 45. Dxc2 Re3+ og vinnur.

42. ... Hd8 43. Ha2 Hxd5 44. Hxa4 bxa4 45. Da2 a3 46. Kf3 Hd3 47. Ke4 Hd4

– og Rasmussen gafst upp. Baráttan gegn hrók og tveim riddurum er vonlaus.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 4. júlí 2017

Skákþættir Morgunblaðsins

Opna meistaramót Vinaskákfélagsins í hraðskák

Opna meistaramót Vinaskákfélagsins í hraðskák verður haldið í Vin, Hverfisgötu 47 mánudaginn 17 júlí klukkan 13:00.

Tefldar verða 6 umferðir með 7 mínútur á skák. Eins og undanfarin sumur þá verður teflt bæði inni og úti ef veður leyfir.

Að hætti hússins þá verða veittar frábærar veitingar í hlé.

Skákstjóri verður Róbert Lagerman. Verðlaun verða með hefðbundum hætti, gull, silfur og bronze peningar og einnig verður í verðlaun eignarbikar til efsta manns í Vinaskákfélaginu.

Skráning fer fram á Skák.is (guli kassinn). Einnig er hægt að skrá sig á staðnum. Upplýsingar um þegar skráða keppendur má finna hér. 

Mótið er reiknað til alþjóðlegra hraðskákstiga. 

 

Jón L. Árnason sigraði með glæsibrag á minningarmóti Jóhönnu

Jón L. Árnason vann stórglæsilegan sigur á minningarmóti Jóhönnu Kristjónsdóttur á skákhátíð Hróksins í Árneshreppi nú um helgina. Jón lagði alla andstæðinga sína og fékk 8 vinninga af 8 mögulegum. Jóhann Hjartarson, nýkrýndur Norðurlandameistari, varð annar með 7 vinninga, og í 3.-4. sæti urðu Íslandsmeistarinn Guðmundur Kjartansson og Eiríkur K. Björnsson.

Mótið var tileinkað minningu Jóhönnu, sem lést 11. maí sl. Hún var einn ötulasti liðsmaður Hróksins og með sterk tengsl við Árneshrepp. Tækifærið var að sjálfsögðu notað og safnað fyrir Fatimusjóðinn, en í gegnum hann safnaði Jóhanna milljónatugum gegnum árin í þágu barna og nauðstaddra í Miðausturlöndum og Afríku.

Skákhátíðin hófst á föstudaginn og komu um fimmtíu gestir úr öllum áttum til að vera með í veislunni. Heiðursgestir voru Harald Bianco, skólastjóri í Kuummiut, og fjölskylda hans, en Harald hefur um árabil verið helsta hjálparhella Hróksliða við að útbreiða skák á Grænlandi.

Minningarmót Jóhönnu, sem haldið var í félagsheimilinu í Trékyllisvík var bráðskemmtilegt og fjölmargir fylgdust með tilþrifum meistaranna.

Snemma var ljóst að Jón L. Árnason, heimsmeistari sveina fyrir fjórum áratugum, var maður dagins. Hann vann flestar skákir sínar af öryggi og lenti aldrei í taphættu. Alls voru keppendur á mótinu um þrjátíu og komu sumir um langan veg, til að spreyta sig gegn meisturunum og harðsnúnum fulltrúum heimamanna.

Í kjölfar mótsins var efnt til glæsilegs hátíðarkvöldverðar, þar sem verðlaun og viðurkenningar voru veittar.

Verðlaunagripurinn var enginn venjulegur bikar, heldur útskorinn rekaviðardrumbur eftir Guðjón Kristinsson frá Dröngum.

Þá hannaði Valgeir Benediktsson handverksmaður í Kört minjagrip hátíðarinnar, sem aðeins var framleiddur í 20 eintökum.

Norðurlandameistarinn Lenka Ptacnikova varð efst kvenna, en það var sérlega ánægjulegt að margar bestu skákkonur Íslands tóku þátt í mótinu.

Hátíðin hófst á föstudaginn með tvískákarmóti, en þar eru tveir saman í liði. Sigurvegarar voru Róbert Lagerman og Kormákur Bragason.

Lokapunktur skákhátíðar í Árneshreppi 2017 var hraðskákmót í Kaffi Norðurfirði á sunnudag. Þar sýndi Íslandsmeistarinn Guðmundur Kjartansson klærnar og sigraði með fullu húsi, fékk 6 vinninga í jafnmörgum skákum. Jóhann Hjartarson varð í 2. sæti en þau Kristinn Jens Sigurþórsson og Lenka urðu í 3.-4. sæti. 

Úrslit á minningarmóti Jóhönnu Kristjónsdóttur: http://www.chess-results.com/tnr287597.aspx?lan=1&art=1&fed=ISL&wi=821

Nánar á heimasíðua Hróksins.

Jón Lúðvík skákmeistari Noregs

Jon Ludvig Hammer (2628) sigraði á Meistaramóti Noregs sem lauk í gær í Stafangri í Noregi. Jon hlaut 6,5 vinninga og varð hálfum vinningi fyrir ofan Frode Elsness (2466), Simen Agdetesin (2604), Frode Urkedal (2541).

Nokkrar athygli vakti að norska meistaramótið fór fram á síma tíma og Norðurlandamótið í Vaxjö og olli það nokkurri óánægju meðal norska skákmanna.

Nánari upplýsingar á Mattogpatt.

 

Skákþáttur Morgunblaðsins: Jóhann í hópi efstu manna á Norðurlandamótinu

Jóhann Hjartarson er í efsta sæti eftir sex umferðir í opna flokki Norðurlandamótsins í Växjö í Svíþjóð ásamt Allan Stig Rasmussen frá Danmörku og Svíunum Nils Grandelius og Jonathan Westerberg. Þeir hafa hlotið fimm vinninga. Jóhann gerði jafntefli við stigahæsta keppanda mótsins, Nils Grandelius, í 6. umferð.

Íslandsmeistarinn Guðmundur Kjartansson vann fyrstu þrjár skákirnar, náði svo jafntefli úr tapaðri stöðu í skák sinni við Jóhann í 4. umferð en tapaði skákum sínum í fimmtu og sjöttu umferð. Keppendur eru 73 talsins og verða tefldar níu umferðir.

Í flokki keppenda 50 ára og aldri er Áskell Örn Kárason í 3.-5. sæti með 3 ½ vinning úr fimm skákum og Lenka Ptacnikova er fulltrúi okkar í kvennaflokknum og hefur hlotið 2 vinninga úr þrem fyrstu skákum sínum.

Möguleikar Jóhanns á lokasprettinum hljóta að teljast góðir en hann hefur teflt af miklu öryggi og allir sigrar hans sannfærandi. Í eftirfarandi skák sem tefld var í 2. umferð stóð hann frammi fyrir örvæntingarfullri gagnsókn og hratt atlögunni á fumlausan hátt:

NM 2017; 2. umferð:

Jóhann Hjartarson – Tom Rydström

Slavnesk vörn

1. c4 c6 2. Rf3 d5 3. e3 Rf6 4. b3 Bf5 5. Bb2 e6 6. Be2 Rbd7 7. Rh4 Bg6 8. O-O Bd6 9. g3 De7 10. Rc3 e5?! 11. cxd5 Rxd5 12. Rxd5 cxd5 13. f4!

Snarplega teflt eftir hinn vafasama 12. leik svarts.

13. ... f6 14. Bb5

Enn betra var 14. Bh5! með hugmyndinni 14. ... Bxh5 15. Dxh5+ Df7 16. Rf5! og svartur tapar peði, t.d. 16. ... Dxh5 17. Rxg7+ og 18. Rxh5.

14. ... O-O-O 15. Dg4 Kb8 16. Rxg6 hxg6 17. Dxg6

Öruggara var 17. Bxd7.

17. ... exf4 18. exf4 Bc5+?!

Í eina skiptið í skákinni gat svartur náð tafljöfnun og jafnvel gott betur, best var 18. ... Rc5!

19. Kg2 De6 20. h4 Hh6 21. Dd3 a6 22. De2 Dd6 23. Bxd7 Dxd7 24. Hfe1 g5?!

Reynir að opna taflið en Jóhann hirðir peðið óhræddur.

25. fxg5 fxg5 26. De5+ Ka8 27. Dxg5 Hf8 28. Hf1 Hxf1 29. Hxf1 He6 30. Dg4 De8 31. Kh3 Hg6 32. Df3 Bd6 33. g4 He6 34. Dxd5 Bb8 35. Hf2 He1 36. Hf7 Dc8 37. Hf6 Bc7 38. Df3 He8 39. Hxa6+

Það er eftirtektarvert að hvítur var ekkert að flýta sér að þessu. Hótunin er sterkari en leikurinn.

39. ... Kb8 40. Hh6 Dd7 41. Bc3 Ha7 42. Hf6 He7 43. Df2 b6 44. Df3 De8 45. Hf8 He2

Hótar máti á h2. Hvað er nú til ráða?

46. Be5!

Línurof, 46. ... Dxe5 er svarað með 47. Ha8 mát og eftir 46. ... Bxe5 kemur 47. Hf7+ o.s.frv. Svartur gafst upp.

 

Magnús tapaði þrem í röð en vann samt í París

Magnús Carlsen tapaði þrem skákum í röð á lokaspretti fyrsta móts syrpunnar Grand chess tour í París um síðustu helgi. Mótið er byggt upp með atskákum og hraðskákum. Við þessar hrakfarir komst heimamaðurinn Vachier-Lagrave í efsta sætið og hafði ½ vinnings forskot fyrir lokaumferðina. Hann varð að sætta sig við jafntefli en Magnús vann og þeir þurftu því að tefla tvær hraðskákir til að útkljá baráttuna um efsta sætið. Og eins og áður hafði Magnús betur, 1½ : ½.

 

Á miðvikudaginn hófst svo í Leuven í Belgíu annað bikarmótið og eftir sex fyrstu atskákirnar var Wesley So efstur með 10 stig en Magnús og Vachier-Lagrave fylgdu honum fast á eftir með 8 stig hvor. Í dag og á morgun tefla keppendur samtals 18 hraðskákir, 5 3 Bronstein. Gott er að fylgjast með baráttunni á vefnum Chess24.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 1. júlí 2017

Skákþættir Morgunblaðsins

Radjabov byrjar best í Genf

FDIE Grand Prix-hófst í fyrradag í Genf. Aserinn Teimour Radjabov (2724) byrjar best allra en hann er sá eini sem unnið hefur báðar sínar skákir.

Fimm skákmenn hafa 1,5 vinning og þar á meðal eru Aronian og Mamedaryov. 

Nánar á heimasíðu mótsins.

 

Sumarmót við Selvatn XI

SKÁKDEILD KR efnir til  sinnar árlegu skákhátíðar og SUMARSKÁKMÓTS við Selvatn, fimmtudaginn 27. júlí nk. Mótið sem nú er fer fram í ellefta sinn verður haldið að venju með sérstöku viðhafnarsniði. Hátíðarkvöldverður frá Eldhúsi Sælkerans  verður reiddur fram undir beru lofti og kaffi, heilsudrykkir og kruðerí í boði á meðan á móti stendur.

Mótið sem er öllum opið hefst kl. 16.30 og stendur fram eftir kvöldi. Þátttaka takmarkast þó við að hámarki 40  keppendur - svo fyrstir koma fyrstir fá. Tefldar verða 11 umferðir með 10 mínútna umhugsunartíma. Góð verðlaun og viðurkenningar fyrir efstu menn og fleiri

Þátttökugjald kr. 10.000. Allur ágóði rennur til efla keppnissjóð klúbbsins, sem rekur skákstarfssemi sína allt árið um kring og á nú sæti  1. deild á Íslandsmóti skákfélaga 3ja árið í röð.   

Mótshöldurum er það mikil ánægja að bjóða bæði eldri sem yngri skákmenn velkomna til þessarar skemmtilegu skákhátíðar þar sem mönnum gefst kostur á að láta gamminn geysa út í guðgrænni nátturinni við fjallavatnið fagurblátt.  

Þar sem keppendafjöldi er takmarkaður er áríðandi að þeir sem hafa hug á að vera með tilkynni þátttöku sína sem allra fyrst. Annað hvort  með tölvupósti til [e-mail] eða með SMS-skeytum í síma  893-0010 (GRK) eða 690-2000 (ESE)

Til að flýta fyrir óskast þátttökugjaldið síðan greitt inn á reikning  115-26-47077, kt. 470776-0139

Sjáumst og kljáumst !!

Fh. Mótsnefndar ESE/GRK

1. Listaskálinn við Selvatn er skammt fyrir ofan Geitháls við Nesjavallaveg. Skákmerki verður sett upp við afleggjarann heim að Skákseli sem er til vinstri þar sem beygt er inn á heimtröðina.