Nýtt fréttabréf SÍ

Nýtt fréttabréf SÍ kom út í fyrradag. Meðal efnis í blaðinu:

• Jóhann og Lenka Norðurlandmeistarar í skák
• Alþjóðlegt unglingamót til minningar um Steinþór Baldusson
• Friðrik teflir í Dundee
• Íslandsmót kvenna hefst 16. ágúst
• NM barna- og grunnskólasveita haldið að Laugum í september
• Ný mótaáætlun SÍ
• Skráning í Norðurljósamótið
• GAMMA Reykjavíkurskákmótið - niðurtalning
• Mót á döfunni

Fréttabréfið má nálgast hér.

Fréttabréf SÍ kemur einu sinni á mánuði að jafnaði og er sent rafrænt til áskrifenda. Hægt er að skrá sig fyrir þig á Skák.is (ofarlega til vinstri).

Eldri fréttabréf SÍ má finna hér.

 

Fundargerð aðalfundar SÍ

Aðalfundur SÍ var haldin 27. maí sl. Fundargerð fundarins er nú aðgengileg. Hana má sem finna sem viðhengi. 

Einnig er fundargerð fyrsta stjórnarfundar SÍ aðgengileg.

Fundargerðirnar báðar fylgja með sem viðhengi.

Skrár tengdar þessari bloggfærslu:

• 1_stjornarfundur_2017-2018_0.pdf
• a_alfundur_s_2017_2_0.pdf

Garry Kasparov snýr aftur!

Garry Kasparov fetar í fótspor Jóhanns Hjartarsonar og snýr aftur! Þrettándi heimsmeistarinn tefldi síðast reiknaða skák 2015 og hefur síðan þá lítið teflt nema í sýningarskákir. Hann reyndar tefldi einvígi við Short árið 2015 og á fjögurra manna móti árið 2016 ásamt Nakamura, So og Caruana. Nú teflir hann vegar á skákmóti - reiknuðu til skákstiga í ágúst í St. Louis.

Á mótinu, sem Garry teflir, er teflt eftir sama fyrirkomulagi og í París og Leuven. Níu atskákir og 18 hraðskákir.

Meðal andstæðinga hans verða Nakamura, Caruana, Aronian, Karjakin og Anand. 

Nánar má lesa um endurkomu Kasparovs á Chess24.

Mynd: Lennart Ootes (af Chess24).

Alþjóðlegt unglingamót til minningar um Steinþór Baldursson

Skáksamband Íslands og Skákskóli Íslands standa fyrir alþjóðlegu unglingamóti í janúar nk. Mótið verður minningarmót um Steinþór Baldursson, fyrrum stjórnarmann SÍ og alþjóðlegan skákdómara, sem lést langt fyrir aldur fram í fyrra.

Virðing hf. þar sem Steinþór vann síðustu starfsárin veitti stjórn SÍ nýlega 750.000 kr. til stuðnings mótshaldinu. Gunnar Björnsson, forseti SÍ, og Claire Bilton, ekkja Steinþórs, veittu styrknum móttöku. Forstjóri Virðingar, Hannes Frímann Hrólfsson og Lára Björnsdóttir frá Virðingu færðu SÍ styrkinn.

Jafnframt styrkir Landsbankinn við mótið með 750.000 kr. framlagi en þar starfaði Steinþór um langt árabil.

Fyrirkomulag mótsins verður kynnt í ágúst. 

SÍ færir Virðingu og Landsbankanum miklar þakkir fyrir að styðja svona myndarlega við mótshaldið.

Ráðgátan um uppruna taflmannanna frá Ljóðhúsum - Íslenska kenningin

 

Ritið The Enigma of the Lewis Chessmen – The Icelandic Theory  um hina fornu taflmenn og mögulegan íslenskan uppruna þeirra, eftir Guðmund G. Þórarinsson, verkfræðing, er nú komin út í fjórða sinn í enn aukinni og endurbættri útgáfu á ensku í ritstjórn Einars S. Einarssonar. 

 

Þeirri áhugaverðu tilgátu að hinir fornfrægu taflmenn séu íslenskir að uppruna, en ekki norskir - gerðir í  Þrándheimi, eins og haldið hefur verið fram, vex stöðugt fylgi. Kenning Guðmundar þar um er nú almennt viðurkennd sem jafngild hinni fyrri og af mörgum talin sennilegri.    

Þessir merku skák- og listmunir fundust 1831 grafnir í sand í Uig (Vík) á eyjunni Lewis eða Ljóðhúsum eins og eyjan er jafnan nefnd í fornum íslenskum heimildum. Þeir er  fyrstu taflmennirnir með nútímasniði sem fundist hafa í heiminum og  taldir vera meðal 5 merkustu muna og gersema í eigu Breska þjóðminjasafnsins og þess Skoska, þar sem 11 af þeim 93 taflmönnum sem fundust eru varðveittir, en í þeim söfnum kennir margra grasa.   

Eins og kunnugt er endurvakti Guðmundur árið 2010 þá einkar athyglisverðu kenningu, sem Sir Frederic Madden safnvörður British Museum setti fram 1832 stuttu eftir að taflmennirnir fundust, að þeir væru að öllum líkindum íslenskir að uppruna.  Skornir úr rostungstönnum í Skálholti í lok 12. aldar af Margréti hinni högu, prestfrú þar fyrir tilstuðlan Páls Jónssonar, biskups.  Fjallað hefur verið um þessa kenningu og söguskoðun á alþjóðlegum málþingum bæði í Edinborg og í Skálholti og ritað um hana í New York Times, the Scotsman og fleiri víðlesnum blöðum og skáksíðum víða um heim.  

Í ljósi þeirra nýju röksemda og ígrundana, sem settar eru  fram í hinni auknu og endurbættu útgáfu, má segja að hinni norsku kenningu hafi mögulega verið hrundið. Kemur þar einkum til að það mikla ófremdarástand ríkti á erkibiskups-stólnum í Niðarósi í lok 11. aldar á þeim tíma þegar taflmennirnir eru taldir hafa verið gerðir sem og mörg önnur afar söguleg og athyglisverð rök sem benda til Íslands.  

Fyrir sex árum síðan fannst útskorinn taflmaður úr beini á Siglunesi frá sama tíma, sem ber svo sterkt svipmót af hróknum/berserknum í Lewistaflsettunum að vart fer milli mála að sá sem hann gerði hafi annað hvort verið kunnugur þeim eða umræddur hrókur verið fyrirmynd þeirra.  

Bókin IVORY VIKINGS – The Mystery of the Most Famous Chessmen in the World and the Woman who made them – sem út kom fyrir tveimur árum, eftir bandaríska rithöfundinn og sagnfræðinginn Nancy M. Brown, hleypir enn frekari stöðum undir íslensku kenninguna um uppruna hinna fornu taflmanna.  

Ef kenningin um að taflmennirnir frá Ljóðhúsum séu í raun íslenskir að uppruna reynist rétt mun hún varpa nýju ljósi á menningu og handmennt landsmanna okkar til forna og breyta Íslandssögunni.  Forfeður okkar voru ekki einungis frábærir sögumenn, skáld og sagnaritarar - sem alkunna er - heldur og einnig afburða lista- og hagleiksmenn á heimsvísu.

Bókin er til sölu í Safnbúð Þjóðminjasafnsins, Gestastofu Skálholts og hjá útgefandanum: [e-mail]. Hægt er að skrá sig fyrir bókinni hér á Skák.is (guli kassinn).

Jóhann Hjartarson í Akraborginni

Jóhann Hjartarson, stórmeistari í skák varð um helgina Norðurlandameistari í skák í annað sinn. Jóhann kíkti um borð í Akraborgina á X-inu og spjallaði um ferilinn og óvæntan titil. 

Viðtalið er alls 15 mínútur og er óhætt að mæla með því.

Viðtalið má nálgast hér.

Lyfjaval í Mjódd sem Hjörvar Steinn Grétarsson tefldi fyrir sigraði á Mjóddarmótinu

 

Hjörvar Steinn Grétarsson sem tefldi fyrir Lyfjaval í Mjódd sigraði örugglega með fullu húsi 7v af sjö mögulegum á Mjóddarmótinu sem fram fór laugardaginn 1. júlí sl. í göngugötunni í Mjódd Annar var Daði Ómarsson með 6v sem tefldi fyrir Gámaþjónustuna. Gámaþjónustan var einnig í öðru sæti í fyrra en þá með annan keppanda við stýrið. Það var meiri slagur um þriðja sætið á mótinu en þar voru fjórir skákmenn jafnir í 3. – 6. sæti með 5v en það voru Hilmir Freyr Heimisson sem tefldi fyrir Hjá Dóra, Aron Þór Maí sem tefldi fyrir Suzuki bíla, Vignir Vatnar Stefánsson sem tefldi fyrir Gísla Einarsson múrarameistara og Júlíus Björnsson sem tefldi fyrir Eflingu stéttarfélag. Þeir Hilmir Freyr, Aron Þór og Vignir Vatnar eru allt ungir og efnilegir skákmenn sem eflaust munu vinna mótið síðar. Júlíus Björnsson hefur hins vegar ekki sést á móti hérna lengi enda býr hann erlendis og er hérna að heimsækja vini og ætttingja og notaði tækifærið og skellti sér á Mjóddarmótið. Annar keppandi sem kom langt að er Torin Kuehnle sem kemur fá Philadelphia í Bandaríkjunum og er hér í stuttu sumarleyfi.

 

Mjóddarmótið hefur ekki áður farið fram í júlí þannig að það var rennt nokkuð blint í sjóinn með þátttökuna.  33 skákmaður tók þátt sem er nokkuð nærri meðalþátttöku og verður að teljast harla gott miðað við núverandi aðstæður. Mótið var vel skipað blöndu af eldri og yngri skákmönnum. Af þeim sem tóku þátt höfðu Hjörvar, Daði og Bragi Halldórsson sem núna tefldi fyrir Reykjavíkurborgunnið mótið áður. Mótshaldið tókst vel þrátt fyrir tvær bilaðar klukkur, hrók á hvolfi og ólöglega leiki og má segja að engin ágreiningsefni hafi komið upp fyrr en í lokin þegar bæði Róbert Lagerman sem tefldi fyrir ÍTR og Júlíus Björnsson töldu báðir sig hafa unniðí í lokaumferðinni þótt þeiri hefðu átt að tefla innbyrðis. Við ahugun kom í ljós að þeir höfðu alls ekki teflt saman heldur tefldi Róbert við Braga Halldórsson og Júlíus við Alexander Oliver Mai, Ökuskólinn í Mjódd. Málið var bara leyst með því að leiðrétta pörun lokaumferðar miðað við hvernig hún var tefld. Þetta má eflaust skrifa á það hve bjart var í Mjóddinni þótt það væri skýjað þannig að pörunin sem varpað var á hvítan vegginn í Mjóddinni sást ekki alstaðar vel. Að vísu var hún einnig lesin upp en það virðist ekki hafa dugað til í þessu tilviki. Það má svo velta fyrir sér hvort mistökin hefðu nokkuð uppgötvast ef Alexander Oliver hefði unnið Júlíus.

Skákfélagið Huginn þakkar keppendum fyrir þátttökuna og fyrirtækjunum fyrir þeirra framlag til mótsins. Sjáumst að ári.

Nánar á Skákhuganum. 

Lokastaðan á Chess-Results.

Nýkrýndir Norðurlandameistarar á Skákhátíð í Árneshreppi um næstu helgi

Skákhátíð í Árneshreppi verður haldin dagana 7. til 9. júlí þar sem áhugamönnum gefst kostur á að spreyta sig gegn sumum bestu skákmönnum Íslands. Meðal þeirra sem þegar eru skráð til leiks eru Guðmundur Kjartansson, nýbakaður Íslandsmeistari, stórmeistararnir Jóhann Hjartarson, Jón L. Árnason og Lenka Ptacnikova og landsliðskonan Guðlaug Unnur Þorsteinsdóttir. 

Hátíðin hefst með tvískákarmóti og brennu í Trékyllisvík föstudagskvöldið 7. júlí kl. 20. Í tvískák eru tveir saman í liði, og iðulega afar heitt í kolunum. 

Hápunktur hátíðarinnar verður laugardaginn 8. júlí í félagsheimilinu, minninningarmót Jóhönnu Kristjónsdóttur 2017. Jóhanna, sem lést 11. maí síðastliðinn, var meðal ötulustu liðsmanna Hróksins og hafði jafnframt sterk tengsl við Árneshrepp. Yfirskrift hátíðarinnar er sótt í kjörorð Jóhönnu: Til lífs og til gleði. 

Minningarmótið hefst klukkan 14 og verða tefldar 8 umferðir, með 10 mínútna umhugsunartíma. Verðlaun á mótinu eru í senn vegleg og óvenjuleg, m.a. listaverk sem Guðjón Kristinsson frá Dröngum og Valgeir Benediktsson í Árnesi vinna sérstaklega af þessu tilefni. Þá verða ýmsir munir úr fjarlægum löndum, vegleg gjafabréf og fleiri vinningar. 

Á laugardagskvöldið verður hátíðarkvöldverður í félagsheimilinu, þar sem ýmislegt verður til skemmtunar, og verðlaun á minningarmóti Jóhönnu afhent. 

Hátíðinni lýkur með hraðskákmóti í Kaffi Norðurfirði sunnudaginn 9. júlí kl. 12. Þar verða tefldar 5 mínútna skákir, 7 umferðir, og sigurvegarinn hlýtur nafnbótina Norðurfjarðarmeistarinn 2017. 

Hrókurinn hefur um árabil efnt til skákviðburða í Árneshreppi og þangað hafa flestir bestu skákmenn landsins og fjölmargir áhugamenn lagt leið sína á skákmót og hátíðir. 

Árneshreppur er afskekktasta og fámennasta sveitarfélag á Íslandi, en jafnframt eitt hið fegursta og stórbrotnasta. Það er Hróknum mikið gleðiefni að geta nú boðað til hátíðar undir kjörorðunum: Til lífs og til gleði. 

• Áhugasamir ættu að skrá sig sem fyrst hjá [e-mail] eða [e-mail]. 
• Mjög góð tjaldstæði eru í Trékyllisvík og Norðurfirði.  
• Gistirými er takmarkað en við reynum að hjálpast að við að koma öllum góðum gestum í hús!

Samstarf Skákskólans og Skákdeildar Breiðabliks næsta vetur

Skákskóli Íslands og Skákdeild Breiðabliks munu hafa samvinnu um daglega skákþjálfun efnilegra skákkrakka á grunnskólaaldri næsta vetur. Helgi Ólafsson skólastjóri Skákskólans hefur jafnframt verið ráðinn yfirmaður skákþjálfunarmála hjá Skákdeild Breiðabliks. Helgi er FIDE Senior Trainer og margreyndur stórmeistari í skák. 

Skákþáttur Morgunblaðsins: Skákmót með styttri umhugsunartíma njóta vaxandi vinsælda

Heimsmeistaranum Magnúsi Carlsen gekk ekki vel á norska mótinu um síðustu helgi. Hann hlaut 4 vinninga af níu mögulegum, varð í 6.-9. sæti og Armeninn Levon Aronjan hljópst á brott með sigurlaunin og er allur að færast í aukana eftir nokkur mögur ár. Sá grunur læðist að manni að það henti Norðmanninum hreinlega betur að tefla skákir með styttri umhugsunartíma. Kannski er hann svona næmur á samtíð sína en staðreyndin er sú að styttri skákirnar fá æ meiri athygli. Eftirminnileg var sú kvöldstund heimsmeistaraeinvígisins í New York í fyrra þegar úrslitaskákirnar fjórar, sem Magnús og Karjakin tefldu að afloknu þunglamalegu 12 skáka einvígi sem lauk án niðurstöðu, voru sýndar á breiðtjaldi á Times Square í New York og Rauða torginu í Moskvu og fylgdist mikill mannfjöldi með.

Garrí Kasparov var í vikunni viðstaddur opnun mótaraðar í París, Grand Chess tour en þar eru mættir til leiks ýmsir kunnir kappar og enn og aftur var Magnús Carlsen mættur til leiks. Kasparov sem er einn skipuleggjanda gat þess í viðtali við frönsku pressuna að þessa dagana væri auðveldara að finna kostendur fyrir mót með styttri umhugsunartíma. Fyrirkomulagið er þannig að tíu þátttakendur tefla níu at-skákir með tímamörkum „25 10 Bronstein“, síðan er tvöföld umferð í hraðskákinni með tímamörkunum „5 3 Bronstein“. Kasparov lagði furðu mikla áherslu á að „Bronstein tímamörkin“ yrðu notuð á Reykjavik Rapid-mótinu 2004 og situr enn við sinn keip. Í því kerfi bætist ekki við tímann.

Í París eru gefin tvö stig fyrir sigur í at-skákinni og eitt stig fyrir jafntefli. Í hraðskákinni fá menn 1 stig fyrir sigur og jafntefli er eftir sem áður ½ vinningur. Þetta eru ekki slæm býtti fyrir norska heimsmeistarann sem að loknum sjö umferðum hefur náð forystunni. Staðan: 1. Carlsen 10 stig. 2. Nakamura 9 stig. 3. Mamedyarov 8 stig. 4.-5. So og Grischuk 7 stig. 6. Vachier-Lagrave 6 stig. 7. Karjakin 5 stig. 8. Topalov 4 stig 9. Bacrot 3 stig 10. Caruana 1 stig.

Það gefur auga leið að viðureignir með skertum umhugsunartíma eru misjafnar að gæðum en spennan er líka meiri.

Magnús lék afar lævísum leik í þessari stöðu í 3. umferð:

 

Magnús Carlsen – Vachier-Lagrave

30. De2!

Verst ýmsum hótunum og virðist undirbúa framrás b-peðsins.

30. ... Kh8??

Hann varð að leika 30. ... Bd6 eða 30. ... He8.

31. f4!

Vinnur mann. Svartur reyndi ....

31. ... exf3 32. Dxe5 Dh5

... en eftir

33. Rf4 Dxh2 34. Rg6+ Kh7 35. Rxf8+ Kh8 35. Rg6+ Kh7 37. Rf4!

... var frekari barátta vonlaus og Frakkinn gafst upp í 39. leik.

Hægt er að fylgjast með hraðskákunum í dag t.d. á vefsvæði Chess24., Chessbomb og ICC. Baráttan hefst kl. 16 í dag en kl. 14 á morgun, sunnudag. 

Jóhann og Guðmundur tefla á Norðurlandamótinu í skák

Norðurlandamótið í skák hefst í þrem flokkum í Växsjö í Svíþjóð á mánudaginn. Í opna flokki mótsins tefla Íslandsmeistarinn Guðmundur Kjartansson og Jóhann Hjartarson. Jóhann varð Norðurlandameistari fyrir 20 árum. Stigahæstur keppenda er Svíinn Nils Grandelius. Efsta sætið gefur keppnisrétt á heimsbikarmóti FIDE sem fram fer í Georgíu í haust. 

Lenka Ptacnikova teflir á Norðurlandamóti kvenna og þá teflir Áskell Örn Kárason í öldungaflokki mótsins.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 24. júní 2017

Skákþættir Morgunblaðsins