Friðriksmót í Vin í dag kl. 13

Vinaskákfélagið og Hrókurinn bjóða til Friðriksmótsins í skák, mánudaginn 25. janúar klukkan 13, í tilefni af Skákdegi Íslands og afmæli hins ástsæla meistara, Friðriks Ólafssonar.
 
Tefldar verða sex umferðir með 7 mínútna umhugsunartíma. Að vanda verða ljúffengar veitingar í boði og allir eru hjartanlega velkomnir.
 
Skáklífið hefur haldið áfram að blómstra í Vin í vetur. Þar eru fastar æfingar á mánudögum kl. 13, en heita má að teflt sé alla daga. Þá teflir Vinaskákfélagið fram tveimur sveitum á Íslandmóti skákfélaga, en úrslit ráðast í mars. A-sveit félagsins trónir á toppnum í 3. deild og B-sveitin er meðal þeirra efstu í 4. deild.

Skákdagurinn - viðburðir

Skákdagurinn verður haldinn hátíðlegur um allt land þriðjudaginn 26. janúar á afmælisdegi Friðriks Ólafssonar. Þá sameinast Íslendingar um að taka upp taflborðin þjóðhetjunni til heiðurs.

Fjölmargir viðburðir fara fram á sjálfan Skákdaginn sem og í allri afmælisvikunni.

Vinaskákfélagið ríður á vaðið með Friðriksmóti klukkan 13:00 á mánudegi. Teflt er í VIN að Hverfisgötu 47. Sex umferðir með sjö mínútna umhugsunartíma.

Taflfélagið Huginn heldur hraðkvöld mánudagskvöldið 25. janúar. Í verðlaun verður bókin um feril Friðriks; „50 valdar sóknarskákir“. Bók sú er orðin fágæt.

Skákdeild KR í samstarfi við Gallerí Skák stendur fyrir hinu árlega kapptefli um Friðrikskónginn. Um er að ræða mótaröð og er fyrst teflt mánudagskvöldið 25. janúar í Skákherberginu í Frostaskjóli.

ÆSIR sem tefla nær alla þriðjudaga ársins munu tefla Friðriki til heiðurs á sjálfan Skákdaginn í húsakynnum sínum að Stangarhyl.

Riddarinn í Hafnarfirði efnir til sérstaks Friðriksmóts miðvikudaginn 27. janúar.

Áttunda umferð í Skákþingi Reykjavíkur fer fram á miðvikudagskvöldið. Teflt er húsakynnum Taflfélags Reykjavíkur að Faxafeni 12.

Fjórða umferðin í Nóa-Síríusmóti Taflfélagsins Hugsins verður tefld á fimmtudagskvöldið í Stúkunni við Kópavogsvöll.

Grunnskólinn í Hveragerði hefur verið með mikla skákkennslu í vetur og tekur m.a. þátt í verkefni Skáksambandsins Skák eflir skóla – kennari verður skákkennari. Alþjóðlegi meistarinn Guðmundur Kjartansson teflir fjöltefli við nemendur skólans á Skákdaginn

Stefán Bergsson heimsækir nemendur Kerhólsskóla á Skákdaginn og verður með skákkynningu- og kennslu. Fjölmargir aðrir skólar hafa skipulagt skákviðburði. Má nefna Lágafellsskóla, Grunnskólann á Hólmavík og Vatnsendaskóla.

Þá verða vígð skáksundlaugarsett um allt land m.a. á Þórshöfn á Langanesi, Hvammstanga, Eskifirði og Reyðarfirði.

 

Gallerý Skák og Skákdeild KR - Kappteflið um Friðrikskónginn V.

Eins og í fyrra standa klúbbarnir saman af mótaröðinni nú sem fram fer næstu fjögur mánudagskvöld vestur í skáksal KR í Frostaskjóli. Mótið er liður í stóru viðburðahaldi í tilefni af „Skákdegi  Íslands“  sem SÍ og Skákakademía Reykjavíkur standa fyrir og hefst á þriðjudaginn kemur, þann 26. janúar á afmælisdegi Friðriks Ólafssonar, fremsta skákmanns okkar fyrr og síðar, sem þá fagnar 81. árs afmæli sínu. Margt fleira ber til tíðinda þann dag og í vikunni.

Um er að ræða 4ra kvölda GrandPrix mótaröð þar sem átta efstu sæti í hverju móti telja til stiga  (10-8-6-5-4-3-2-1). Keppt er um veglegan farandgrip, taflkóng úr Hallormstaðabirki, merktan og áletraðan af meistaranum. Þrjú bestu mót hvers keppanda reiknast til stiga og vinnings. Sigurvegarinn ár hvert fær nafn sitt skráð gullnu letri á stall styttunnar og fagran verðlaunagrip til 

Nöfn fyrrv. sigurvegara mótaraðarinnar,  þeirra Gunnars Skarphéðinssonar; Gunnars I. Birgissonar; Gunnars Kr. Gunnarssonar og Gunnars Freys Rúnarssonar, prýða nú hinn sögulega grip. Nú er að sjá hvaða Gunnar ber sigur úr bítum að þessu sinni eða einhver annar?

Tefldar verða 9 umferðir með 10 mínútna umhugsunartíma á skákina. Mótin eru að sjálfssögðu öllum „ sem taflmanni geta valdið“ opin enda þótt keppendur séu ekki með í öllum mótunum. Sérstakir aukavinningar verða dregnir út öll kvöldin sem mótaröðin stendur en henni lýkur 15. febrúar. Friðrik mun verða  viðstaddur verðlaunahátíðina í mótslok.   

 

Skákþáttur Morgunblaðsins: 12 ára piltur vann alþjóðlegan meistara

Jón Viktor Gunnarsson og Jóhann Ragnarsson eru efstir að loknum fjórum umferðum á Skákþingi Reykjavíkur. Í fjórðu umferð sl. miðvikudagskvöld vann Jón Viktor hinn 12 ára gamla Vigni Vatnar Stefánsson sem í umferðinni á undan hafði lagt alþjóðlega meistarann Björn Þorfinnsson að velli. Keppendur í efsta flokki mótsins eru 64 talsins og staða efstu manna er þessi:

1. – 2. Jón Viktor Gunnarsson og Jóhann Ragnarsson 4 v. 3. – 5. Stefán Kristjánsson, Mikhael Jóhann Karlsson og Dagur Ragnarsson 3 ½ v. 6. – 14. Guðmundur Gíslason, Vignir Vatnar Stefánsson, Björn Þorfinnsson, Oliver Jóhannesson, Einar Valdimarsson, Siguringi Sigurjónsson, Jón Trausti Harðarson, Héðinn Briem og Björn Hólm Birkisson 3 v.

Viðureign Björn Þorfinnssonar og Vignis Vatnars er sú skák sem mesta athygli hefur vakið en Björn lagði niður vopnin eftir aðeins 22 leiki. Hann hefur vissulega átt betri daga en engu að síður var taflmennska Vignis fjarska góð af svo ungum manni að vera:

Skákþing Reykjavíkur 2016; 3. umferð:

Björn Þorfinnsson – Vignir Vatnar Stefánsson

Drottningarindversk vörn

1. Rf3 d5 2. d4 Rf6 3. c4 e6 4. Rc3 Be7 5. g3 O-O 6. Bg2 Re4 7. O-O b6 8. Bf4 Bb7 9. cxd5 Rxc3 10. bxc3 exd4 11. c4 Rd7 12. cxd5

Björn er ekki ýkja mikið fyrir að tefla upp á tæknilegar stöður en 12. Re5 kom sterklega til greina, t.d. 12. ... Rxe5 13. dxe5 c6 14. cxd4 cxd5 15. Db3 og hvítur nær svo að „hlaða“ á d5-peðið.

12. ... Rf6 13. Hc1 Rxd5 14. Re5 c5 15. dxc5 Bxc5 16. Kh1?

Slakur leikur sem gerir svarti kleift að jafna taflið. Mun betra var 16. e3 sem gefur drottningunni aðgang að g4- og h5-reitunum.

16. ... Hc8 17. Db3 Rxf4 18. Bxb7 Rxe2!

Millileikur sem Birni hafði sést yfir. Svartur hyggst svara 19. Bxc8 með 19. ... Rxc1 o.s.frv.

19. Hcd1 Rd4 20. Dc4 Hc7 21. Bd5?

Kannski var þetta hugmyndin eftir allt saman.

21. ... b5!

22. Bxf7+ Hfxf7!

- og nú sá Björn að 23. Rxf7 er einfaldlega svarað með millileiknum 23. ... Da8+! og drottningin fellur. Hann gafst því upp. 

Skákmótið í Wijk aan Zee hefst í dag

Eitt skemmtilegasta skákmót ársins, Tata Steel-mótið, hefst í dag í Wijk aan Zee í Hollandi. Efsti flokkur sem dregur til sín stigahæstu stórmeistara heims er hluti af skákhátíð sem haldin hefur verið í meira en 80 ár. Athyglin beinist sem fyrr að heimsmeistaranum Magnúsi Carlsen sem vann London classic um daginn og opna mótið í Katar. Þátttakendur verða: Magnús Carlsen, Fabiano Caruana, Ding Liren, Anish Giri, Wesley So, Sergey Karjakin, Michael Adams, Shakhriyar Mamedyarov, Wei Yi, David Navara, Hou Yifan, Loek Van Wely, Evgeny Tomashevsky og Pavel Eljanov. 

Hægt er að fylgjast með beinum útsendingum á ýmsum vefsvæðum. Má þar nefna Chess24 og ICC. 

Daði Örn Jónsson Evrópumeistari í bréfskák

Daði Örn Jónsson hefur tryggt sér titilinn Evrópumeistari einstaklinga í bréfskák. Daði hlaut 10 ½ vinning af 16 mögulegum, vann fimm skákir og gerði ellefu jafntefli. Í bréfskák nú til dags er heimilt að nota allan þann hugbúnað sem fyrirfinnst á markaði og hæfni Daða sem er tölvufræðingur við mötun forrita á óvenjulegum hugmyndum réð miklu um frammistöðu hans. Þrír rússneskir bréfskákmenn urðu í næstu sætum. Þetta er langbesti árangur sem íslenskur bréfskákmaður hefur náð.

Grein þessi birtist í Morgunblaðinu 16 janúar 2016.

Skákþættir Morgunblaðsins

Carlsen og Caruana efstir í Sjávarvík - heimsmeistarinn á sigurbraut

Heimsmeistarinn Magnus Calrnse (2844) er kominn á beinu brautina eftir hæga byrjun á Tata Steel mótinu í Wijk aan Zee. Hann gerði jafntefli í fjórum fyrstu umferðunum en hefur nú unnið þrjár skákir í röð. Í dag vann hann Pavel Eljanov (2760). Caruana (2787) er jafn heimsmeistaranum eftir sigur á Ding Liren (2766) í umferð dagsins. Mamedyarov (2747) er kominn á beinu brautina eftir afleik ársins og hafði betur gegn Hou Yifan (2673) í umferð dagins.

Mótstafla (tvíklikka til að stækka):

 

 

Ákaflega góða og vandaða umfjöllun um mótið má nálgast á Chess24

 

• Heimasíða mótsins
• Beinar útsendingar
• Chess24

Kennimark Skáksögufélagsins

Hið íslenska skáksögufélag var stofnað fyrir rúmu ári síðan með það að markmiði að stuðla að því að sögu manntaflsins og skáklistarinnar á Íslandi, að fornu og nýju, verði sem best til haga haldið. Jafnframt skyldi félagið beita sér fyrir því að saga fræknustu skákmeistara okkar og helstu skákviðburða hérlendis yrði skráð og að vinna að varðveislu hvers konar skákminja og muna, eftir föngum.  Ærið verkefni sem óvíst er hvort félagið eða stjórnarmenn þess fá nokkurn tíma undir risið nema með öflugum stuðningi skákunnenda og hins opinbera.

Stjórn félagsins er það því mikið ánægjuefni nú að  geta greint frá því fyrsta stóra viðfangsefni þess,  að láta taka saman efni og byggja upp sérstaka yfirgripsmikla vefsíðu tileinkaða fyrsta stórmeistara okkar FRIÐRIK ÓLAFSSYNI og glæstum skákferli hans, er um það bil að komast í höfn.  Kunngert verður um formlega opnun hennar eftir helgina. 

Í aðdraganda þessa þótti fara vel á því að láta hanna sérstakt einkennismerki (logo) fyrir félagið og fengin til þess norsk-bandarísk myndlistarkona Kirsten Sevik Desjardins, sem hér dvaldi  um tíma, og tók það að sér „pro bono“  endurgjaldslaust   fyrir góðra manna orð til að skilja eftir óafmáanlegt listrænt spor sítt hér á landi. Samanstendur það að riddara, fjöðurstaf og bók eins og hér má sjá.

Það fór því vel á því að færa henni þakkarskjöld að launum með merkinu að skilnaði.        

/ESE   www.kirstensevig.com 

Nóa Síríus mótið - Fjölmennt á toppnum!

Það er fjölmennt á toppi Nóa Síríus mótsins – Gestamóti Hugins og Breiðabliks. Eftir þrjár umferðir eru Guðmundur Gíslason (2307), Stefán Kristjánsson (2471), Guðmundur Kjartansson (2456) og Þorsteinn Þorsteinsson (2253) efstir og jafnir með 2½ vinning. Ellefu skákmenn hafa 2 vinninga og spennan því magnþrungin þegar mótið er hálfnað.

Þorsteinn gerði sér lítið fyrir og vann Karl Þorsteins (2449) eftir miklar flækjur í spennandi skák. Guðmundur Kjartansson vann góðan sigur á Ingvari Þór Jóhannessyni (2369). Gríðarlega mikilvæg úrslit fyrir Guðmund eftir tapið gegn Vigni Vatnari á Skákþingi Reykjavíkur degi áður. Stefán Kristjánsson vann góðan sigur á Björgvini Jónssyni eftir háþrýsting á miðborðinu þar sem eitthvað varð undan að láta.

Dagur Ragnarsson (2219) er í góðu þessu formi um þessar mundir og nær bæði góðum úrslitum á Gestamótinu og Skákþinginu. Í gær gerði hann jafntefli við stórmeistarann Þröst Þórhallsson (2423). Halldór Brynjar Halldórsson (2209) vann Stefán Bergsson (2023) í uppgjöri akureysku goðsagnanna.

Fjórða umferð fer fram á fimmtudagskvöld. Þá teflir Þorsteinn við Stefán og Gummarnir (Kjartansson og Gíslason) skella saman skoltum á öðru borði.

Enn fjölmennara á toppnum í b-flokki!

Ekki er spennan minni í b-flokki. Þar eru sjö skákmenn efstir og jafnir með 2½ vinning. Það er Dagur Andri Friðgeirsson (1858), Dawid Kolka (1897), Bárður Örn Birkisson (1954), Guðmundur Kristinn Lee (1747), Snorri Þór Sigurðsson (1845), Hrund Hauksdóttir (1777) og Agnar Tómas Möller (1894).

Stephan Briem (1360) heldur áfram að gera frábæra hluti og gerði í gær jafntefli við stigahæsta keppandann, Harald Baldursson (1974).

Nánar á Skákhuganum.

• Skákhuginn
• A-flokkurinn á Chess-results
• B-flokkurinn á Chess-results

Fréttir af unglingastarfi Hugins

Skákfélagið Huginn er með barna- og unglingaæfingar í Mjóddinni á mánudögum fyrir krakka á grunnskólaaldri. Svo hafa einnig verið séræfingar fyrir félagsmenn í Mjóddinni á þriðjudögum, miðvikudögum, fimmtudögum og laugardögum eftir því sem til hefur fallið. Á æfingunum eru tefldar 5-6 umferðir með umhugsunartímanum 7 eða 10 mínútum.Þátttakendur leysa dæmi og farið er í grunnatriði með byrjendum eftir því sem tími vinnst til. U.þ.b einu sinni í mánuði er félagsæfing þar sem er þemaskák og um miðbik æfingarinnar er gert hlé þegar pizzzurnar koma. Í öðrum tímum er kennsla þar sem farið er í byrjanir, dæmi og endtöfl allt eftir þörfum þeirra sem taka þátt..

Óskar Víkingur Davíðsson eru efstur í stigakeppni Huginsæfinganna í Mjóddinni með 20 stig. Annar er Dawid Kolka með 15 stig og þriðji Heimir Páll Ragnarsson allt kunnuleg nöfn í efstu sætum síðustu ára. Fjórði er Óttar Örn Bergmann Sigfússon með 10 stig og jafnir í fimmta og sjötta sæti eru Ísak Orri Karlsson og Adam Omarsson með 8 stig. Það hefur verið góð mæting á haustmisseri en það hafa 12 þátttakendur mætt á 10 eða fleiri æfingar af 15 mögulegum. Þar af hafa fjórir mætt á þær allar en það eru Heimir Páll Ragnarsson, Óskar Víkingur Davíðsson, Ísak Orri Karlsson og Stefán Orri Davíðsson.. Næsta æfing verður svo mánudaginn 25. janúar 2016 og hefst kl. 17.15. Næsta félagsæfing verður mánudaginn 1. febrúar en þá verður skipt í tvo flokka eftir styrkleika og aldri og hafa þemaskák í 2. og 3. umferð í eldri flokki. Ekki er búið að ákveða hvaða byrjun verður tekin fyrir þá en væntanlega verðum við á svipuðum slóðum og undanfarið í Petroffs vörn eða Caro Can. Skákir, stöðumyndir og upplýsingar um upphafsstöðu verða sendar til félagsmanna. Æfingarnar eru í Álfabakka 14a í Mjóddinni. Inngangur milli Fröken Júlíu og Subway og salurinn er á 3 hæð.

Í lok vetrar verða veitt bókarverðlaun handa þeim sem mætt hafa best yfir veturinn og til þeirra sem sýnt hafa verulegar framfarir yfir veturinn og þeirra sem eru efstir í stigakeppninni. Staðan í stigakeppninni og listi yfir þá sem hafa mætt best er hér fyrir neðan.

Með besta mætingu eru:

Heimir Páll Ragnarsson            15 mætingar

Ísak Orri Karlsson                     15 —-„——

Óskar Víkingur Davíðsson        15 —-„—–

Stefán Orri Davíðsson               15 —-„——

Óttar Örn Bergmann Sigfússon 14 —-„——

Elfar Ingi Þorsteinsson               13 —-„——

Viktor Már Guðmundsson         13 —-„——

Eiríkur Þór Jónsson                   12 —-„——

Adam Omarsson                        11 —-„——

Jökull Freyr Davíðsson              11 —-„——

Jón Þorberg Sveinbjörnsson      11 —-„——

Baltasar Máni Wedholm            10 —-„——

Dawid Kolka                               9 —-„——

Sölvi Már Þórðarson                   9 —-„——

 

Efstir í stigakeppninni:

1. Óskar Víkingur Davíðsson 20 stig
2. Dawid Kolka 15 stig
3. Heimir Páll Ragnarsson 14 stig
4. Óttar Örn Bergmann Sigfússon 10 stig
5. Ísak Orri Karlsson 8 stig
6. Adam Omarsson 8 stig
7. Stefán Orri Davíðsson 7 stig

Friðriksmót í Vin á mánudaginn

Vinaskákfélagið og Hrókurinn bjóða til Friðriksmótsins í skák, mánudaginn 25. janúar klukkan 13, í tilefni af Skákdegi Íslands og afmæli hins ástsæla meistara, Friðriks Ólafssonar.
 
Tefldar verða sex umferðir með 7 mínútna umhugsunartíma. Að vanda verða ljúffengar veitingar í boði og allir eru hjartanlega velkomnir.
 
Skáklífið hefur haldið áfram að blómstra í Vin í vetur. Þar eru fastar æfingar á mánudögum kl. 13, en heita má að teflt sé alla daga. Þá teflir Vinaskákfélagið fram tveimur sveitum á Íslandmóti skákfélaga, en úrslit ráðast í mars. A-sveit félagsins trónir á toppnum í 3. deild og B-sveitin er meðal þeirra efstu í 4. deild.

Breytt fyrirkomulag á Laugardagsæfingum TR

Frá og með 23. janúar til og með 27. febrúar verður stigakeppni á laugardagsæfingum Taflfélags Reykjavíkur sem og barna- og unglingamótum félagsins.

Allir krakkar á grunnskólaaldri (fædd 2000 og síðar) sem ekki hafa náð 1600 Elo-stigum hafa þátttökurétt á skákæfingunum og fjórða móti Bikarsyrpunnar. Þá hafa allir krakkar á grunnskólaaldri þátttökurétt á Barna- og Unglingameistaramóti Reykjavíkur. Einungis krakkar sem eru félagsmenn í TR safna stigum í stigakeppninni. Þátttaka á æfingunum er ókeypis fyrir alla.

Á laugardagsæfingunum verður teflt í 2 flokkum: A-flokki fyrir krakka sem hafa Elo-stig og B-flokki fyrir krakka sem hafa ekki stig. Tefldar verða 5 umferðir með umhugsunartímanum 7 mínútur + 5 sekúndur á hvern leik og stendur hver æfing yfir frá kl.14 til kl.16. Krakkar í A-flokki eru í sér stigakeppni og krakkar í B-flokki eru í sér stigakeppni. Veitt verða verðlaun fyrir 3 efstu í hvorum flokki að lokinni laugardagsæfingu 27. febrúar.

Stigagjöfin er þannig að 1 stig fæst fyrir mætingu, 2 stig fyrir 4.sæti, 3. stig fyrir 3. sæti, 4 stig fyrir 2. sæti og 5 stig fyrir 1.sæti. Ef krakkar verða jöfn að vinningum þá fá þau öll jafnmörg stig.

Til viðbótar við laugardagsæfingar verða tvö barna- og unglingamót hluti af stigakeppninni, það er Bikarsyrpa TR helgina 12.-14. febrúar og Barna- og unglingameistaramót Reykjavíkur sunnudaginn 21.febrúar.

Á þessum tveimur mótum verða veitt tvöföld stig í stigakeppninni, það er 2 stig fyrir mætingu, 3 stig fyrir 8. sæti, 4 stig fyrir 7. sæti, 5 stig fyrir 6.sæti, 6 stig fyrir 5.sæti, 7 stig fyrir 4.sæti, 8 stig fyrir 3.sæti, 9 stig fyrir 2.sæti og 10 stig fyrir 1.sæti.

Fyrirkomulag byrjenda-, stúlkna- og afreksæfinga breytist ekki. Hér að neðan má sjá yfirlit yfir þá viðburði þar sem breytt fyrirkomulag gildir.

• Laugardagar kl. 14-16: Opin skákæfing fyrir alla fædda 2000 og síðar og með minna en 1600 Elo-stig – ókeypis fyrir alla
• Fös-sun 12. – 14. febrúar: 4. mót Bikarsyrpunnar – ókeypis fyrir félagsmenn TR, kr. 1.000 fyrir aðra
• Sun 21. febrúar: Barna- og unlingameistaramót Reykjavíkur – ókeypis fyrir alla

Við hlökkum til að sjá ykkur á spennandi æfingum og mótum í janúar og febrúar!