Viðtal við Margeir í áströlsku skáktímariti

Ágúst-hefti ástralíska tímaritsins 50 moves kom út fyrir skemmstu. Þar má meðal annars finna fróðlegt og skemmtilegt viðtal við Margeir Pétursson sem tekið var á Portu Mannnu-mótinu í Sardiníu fyrr í sumar.

Tímaritið má nálgast (frítt) á heimasíðu tímaritsins. Óhætt er að mæla með blaðinu sem ritað er á ensku. Í apríl-tímaritinu var t.a.m. umfjöllun um Reykjavik Open Pub Quiz.

Í viðtalinu segir Margeir meðal annars frá skákferli sínum, vinningsskákinni gegn Carlsen, skákklúbbnum sínum í Úkraínu og frá endurkomu sinni við skákborðið.

Smá kafli úr viðtalinu.

One and a half years ago, Adrian suggested that we Icelandic "old guys" [should form a legends team] at the European Teams Championship [in Reykjavik in November]. When in Iceland I always play chess with my friends there, Johann [Hjartarsson], Helgi [Olafsson] and Jon [Arnason] amongst others. So I told them about the idea and they immediately caught on. Then we told the Federation and they immediately said yes, fantastic. And then Fridrik, even he was ready, so now there is no way out of it! 

I figured I had to do  some training for the European Championships, not only play blitz but  some serious chess. So that’s how I ended up here in Sardinia, my first tournament in 15 years. I met Gunnar [Bjornsson, the organiser of the  Reykjavik Open] in Italy when he was on the way back [from Porto Mannu in 2014] and he was saying this is such a nice tournament – something for the retired guys. Then Yuri [Garrett] was in Reykjavik [at the Reykjavik Open in March] and he promoted the tournament, very successfully as you can see.

Viðtalið má einnig finna í heild sinni sem PDF-viðhengi.

Skák.is þakkar 50movesmagazine.com fyrir að leyfa birtingu á Skák.is!

Bikarsyrpa TR hefst föstudaginn 4. september

Bikarsyrpa Taflfélags Reykjavíkur fer nú af stað annað árið í röð eftir góðar móttökur í fyrra. Mótum syrpunnar hefur verið fjölgað og telur hún alls sex kappskákmót sem eru ætluð börnum á grunnskólaaldri (fædd 2000 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Fyrsta mótið í syrpunni hefst föstudaginn 4. september og stendur til sunnudagsins 6. september. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar TR (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (4. september)
2. umferð 10.30 á laugardegi (5. september)
3. umferð 14.00 á laugardegi (5. september)
4. umferð 10.30 á sunnudegi (6. september)
5. umferð 14.00 á sunnudegi  (6. september). (Lokaumferð + verðlaunaafhending).

Vinsamlegast skráið þátttakendur sem fyrst, það hjálpar við undirbúning mótsins!

• Skráningarform
• Skráðir keppendur

Bikarsyrpan samanstendur af sex mótum í vetur. Bikarar og medalíur eru í verðlaun fyrir efstu sætin í hverju
 móti, en auk þess verða veitt sérstök verðlaun fyrir samanlagðan árangur á mótunum.

Hlökkum til að sjá ykkur!

Sigurvegarar Bikarsyrpunnar 2014-2015:

• Mót 1: Mykhaylo Kravchuk
• Mót 2: Aron Þór Mai
• Mót 3: Jóhann Arnar Finnsson
• Mót 4: Mykhaylo Kravchuk
• Bestur samanlagður árangur: Mykhaylo Kravchuk

Pistill um lokamót Bikarsyrpunnar 2014-2015.

Nigel Short eini farþeginn í farþegaþotu!

Stórmeistarinn Nigel Short varð fyrir þeirri sérkennilegu upplifun að vera eini farþeginn í þotu sem var að fljúga á milli Suður-Afríku og Simbabve. Vélin tekur 168 farþega og gat Short því valið á milli allmargra sæta!

Í grein Today segir meðal annars: 

Short was told at check-in to not to be late for boarding as there was only four passengers on the flight. However, when he arrived at the gate, he found he was the only one.

He told TODAY.com he thought he had arrived at the wrong gate or had the time wrong, going back four or five times to check.

When the flight crew arrived, Short was told he would be the only passenger . Despite the unlimited seating options on offer, Short chose to sit in his assigned economy seat rather than move to first or business class. He later moved to a window seat to get a look at the view.

Short tísti 

I am not saying they are losing money, but I was the sole passenger on the Air Zimbabwe 737 from Jo'burg-Victoria Falls.

— Nigel Short (@nigelshortchess) July 15, 2015

Guðmundur byrjar vel í Litháen

Alþjóðlegi meistarinn Guðmundur Kjartansson (2447) byrjar vel á alþjóðlegu móti sem nú er í gangi í Panevezys í Litháen. Eftir 3 umferðir hefur Guðmundur 2½ vinning og er í 1.-2. sæti.

Úrslit Guðmundar

Fjórða umferð fer fram á morgun. Þá teflir Gummi við eistneska alþjóðlega meistarann Ottomar Ladva (2452). Hægt verður að fylgjast með skákinni beint. Hefst kl. 13.

 

• Heimasíða mótsins
• Chess-Results
• Beinar útsendingar (hefjast yfirleitt kl. 13)

Vetrardagskrá Taflfélags Reykjavíkur 2015 - 2016

Taflfélag Reykjavíkur býður líkt og áður upp á fjölbreytta og metnaðarfulla dagskrá þetta starfsárið.  Fjöldi móta og skákæfinga hefur aldrei verið meiri en ár.  Á dagskrá félagsins eru 40 skákviðburðir og um 200 skákæfingar fyrir börn og unglinga.

Vetrarstarf félagsins hefst formlega á morgun, föstudaginn 14. ágúst þegar Borgarskákmótið fer fram í Ráðhúsi Reykjavíkur og á sunnudaginn fer fram hið stórskemmtilega stórmót Árbæjarsafns og TR á Kornloftinu. Meðal annara viðburða má nefna Haustmót Taflfélags Reykjavíkur sem nú verður haldið í 82. sinn.  Bikarsyrpa félagsins sem sló rækilega í gegn í fyrra mun nú samanstanda af sex mótum í stað fjögurra.  Nýtt mót hefur göngu sína í október, U-2000 mót TR og er það við hæfi á 115 ára afmæli félagsins, en mót með svipuðu var síðast haldið fyrir 10 árum árið 2005.  Skemmtikvöldin verða á sínum stað og verða nú haldin einu sinni í mánuði yfir allan veturinn.

Taflfélagið á gott samstarf við ýmis önnur skákfélög og svið Borgarinnar um mótahald.  Þar má nefna fyrrnefnt Borgarskákmót sem haldið er í samstarfi við Borgina og Skákfélagið Huginn, Alþjóðlega Geðheilbrigðismótið í október í samstarfi við Vinaskákfélagið og Hrókinn, Æskan og ellin í samstarfi við Riddarann, félag eldri borgara, Einar Ben mótið og MS mót Jónasar Hallgrímssonar á degi íslenskrar tungu í samstarfi við Hrókinn og síðast en ekki síst Jólaskákmót TR og SFR í samstarfi við Skóla og frístundasvið Reykjavíkurborgar sem er fjölmennasta barna og unglingamót landsins.

Eftir áramót hefst samkvæmt venju Skákþing Reykjavíkur sem er elsta skákmót landsins og þótt víðar væri leitað en það hefur verið haldið samfleytt í 85 ár!  Hin geysivinsæla Páskaeggjasyrpa Nóa Síríus verður á sínum stað sem og Skákmót Öðlinga og Wow air stórmótið svo fátt eitt sé nefnt.

Á dagskrá félagsins eru 40 viðburðir eins og áður kom fram og alls verður teflt á mótum í 84 daga í Skákhöll félagsins í Faxafeni.  Allir eru ætíð velkomnir á hin fjölmörgu skákmót hvort sem er til að taka þátt eða þá til að fylgjast með skemmtilegri taflmennsku um leið og menn drekka í sig þá einstöku stemmingu sem ætíð ríkir í Skákhöllinni okkar.

Skákæfingar barna og unglinga er ekki síður stór þáttur í starfssemi félagsins.  Í áratugi hefur Taflfélag Reykjavíkur haldið metnaðarfullar skákæfingar fyrir börn og unglinga. Laugardagsæfingarnar eru fyrir löngu orðnar rótgróinn partur af starfi félagsins og flestum skákiðkendum landsins vel kunnar. Margir af sterkustu skákmönnum þjóðarinnar stunduðu æfingarnar hjá félaginu á sínum yngri árum.

Þjálfun og kennsla á laugardagsæfingunum er í höndum þaulreyndra og sterkra skákmanna og er aðgangur ókeypis. Æfingarnar henta byrjendum jafnt sem lengra komnum og er börnum velkomið að mæta og fylgjast með til að byrja með ef þau eru ekki tilbúin að taka beinan þátt strax.

Taflfélag Reykjavíkur heldur um 200 skákæfingar á þessu starfsári fyrir börn og unglinga og ber höfuð og herðar yfir önnur félög á höfuðborgarsvæðinu hvað varðar fjölda iðkenda og fjölda æfinga.

Almennar æfingar fara fram í húsnæði félagsins að Faxafeni 12 á laugardögum yfir vetrartímann og hefjast 29. ágúst.

Umsjón með æfingunum er í höndum Sigurlaugar R. Friðþjófsdóttur, Torfa Leóssonar, Kjartans Maack og Björns Jónssonar.

Þess má geta að Taflfélag Reykjavíkur hafði algjöra yfirburði á Íslandsmóti unglingasveita á síðasta ári og sigraði í öllum flokkum.  A lið félagsins varð Íslandsmeistari, og B, C, D, E, og F sveitir félagsins unnu sína flokka.

Afrekshópur barna og unglinga hjá Taflfélagi Reykjavíkur æfir tvisvar í viku allan veturinn á laugardögum og fimmtudögum. Þessar æfingar eru fyrir þá krakka sem lengra eru komnir og eru í umsjá Torfa Leóssonar og Daða Ómarssonar.

Þá styrkir félagið marga af sínum efnilegustu krökkum og unglingum til þátttöku á mótum erlendis og á Reykjavíkurskákmótið.

 

Hér á eftir fara þeir viðburðir sem Taflfélag Reykjavíkur stendur fyrir fram að áramótum.  Við vonumst til að sjá sem flesta skákmenn og skákáhugamenn á viðburðum félagsins.  Félagsheimili TR er og verður ætíð miðdepillinn í skákstarfi höfuðborgarsvæðisins og allir eru ætíð velkomnir á viðburði félagsins.

 

Borgarskákmótið fer fram 14. ágúst kl. 16.00 í 30. sinn. Taflfélag Reykjavíkur og Taflfélagið Hellir héldu mótið saman frá 1993 en það var fyrst haldið á 200 ára afmæli Reykjavíkur 1986.
Nú er það Skákfélagið Huginn sem heldur mótið með TR. Mótið hefur í mörg ár farið fram í Ráðhúsi Reykjavíkur. Tefldar eru 7 umferðir með 7 mínútna umhugsunartíma. Í fyrra sigraði alþjóðlegi meistarinn Jón Viktor Gunnarsson.

 

Stórmót Taflfélags Reykjavíkur og Árbæjarsafns markar oftast upphafið á skákvertíðinni en er nú haldið sunnudaginn 16. ágúst, rétt á eftir Borgarskákmótinu. Þetta verður í ellefta sinn sem mótið fer fram og byrjar kl. 14. Tímamörk eru 7 mínútur og tefldar eru 7 umferðir.
Fimm keppendur urðu efstir og jafnir í fyrra með 5 og hálfan vinning af 7 mögulegum, gamli fléttumeistarinn Gylfi Þórhallsson, Ísfirðingurinn knái Guðmundur Gíslason og TR-ingarnir Jón Viktor Gunnarsson, Þorvarður Fannar Ólafsson og Daði Ómarsson.

 

Fyrsta Skemmtikvöld Taflfélags Reykjavíkur af tíu þetta starfsárið fer fram 28. ágúst. Þá verður keppt í fyrsta sinn í “King of the hill” skák!
Skemmtikvöldin eru frábær skemmtun og gleðin við völd þótt oft sé barist hart á reitunum 64.

 

Bikarsyrpa Taflfélags Reykjavíkur sem hóf göngu sína í fyrra vakti stormandi lukku. Syrpansamanstendur í ár af sex kappskákmótum og er ætluð börnum undir 1600 skákstigum. Þar með gefst þeim tækifæri til að ná í alþjóðleg skákstig á mótum sem sérhönnuð eru fyrir þau.
Fyrsta mótið í syrpunni hefst 4. september og stendur til sunnudagsins 6. september. Tefldar eru 5 umferðir eftir svissnesku kerfi. Tímamörk eru 30 mínútur + 30 sek á leik.

 

Haustmót Taflfélags Reykjavíkur 2015 hefst 13. september. Mótið er annað af elstu skákmótum landsins og hefur verið haldið samfleytt í yfir áttatíu ár!
Mótið hefur fyrir löngu unnið sér sess sem eitt af aðalmótum vetrarins og er jafnan mjög vel sótt af skákmönnum á öllum aldri. Mótið er níu umferðir og teflt er tvisvar í viku, sunnudögum og miðvikudögum.
Davíð Kjartansson sigraði mótið 2014 með 7,5 vinninga af 9 og skákmeistari Taflfélags Reykjavíkur varð Þorvarður Fannar Ólafsson.

 

Annað Skemmtikvöld Taflfélags Reykjavíkur fer fram 18. september. Þá fer fram hvorki meira né minna en Íslandsmót taflfélaga í Fischer Random!  Taflfélag Reykjavíkur sigraði mótið í fyrra og er því núverandi Íslandsmeistari í Fischer Random.

 

Alþjóðlega geðheilbrigðismótið 2015. Það eru Vinaskákfélagið, Taflfélag Reykjavíkur og Skákfélagið Hrókurinn sem standa saman að mótinu, en það fór nú fram í 10. sinn.
Mótið fer fram 8. október og verður án efa jafnvel mannað og undanfarin ár. Stórmeistarinn Hannes Hlífar Stefánsson sigraði í fyrra með 6,5 vinninga af sjö mögulegum.

 

Hraðskákmót Taflfélags Reykavíkur fer fram 18. október og venju samkvæmt fer þá einnig
fram verðlaunaafhending fyrir Haustmót Taflfélagsins.
Hraðskákmótið er jafnan vel mannað og í fyrra sigraði Róbert Lagerman með 12 vinninga.

 

Æskan og ellin er eitt af alskemmtilegustu skákmótum vetrarins og fer fram 24. október.
Taflfélag Reykjavíkur og Riddarinn, taflfélag eldri borgara halda saman mótið með dyggri aðstoð Taflfélags Garðabæjar. Þáttökurétt á þessu hraðskákmóti hafa eingöngu börn , unglingar og eldri borgarar eins og nafnið ber með sér. Mótið er eitt af fjölmennustu mótum hvers árs.
Bragi Halldórsson sigraði í fyrra með 7.5 vinninga af 9 mögulegum og var það annað árið í röð sem hann bar sigur úr bítum.

 

Tefldar eru 7 umferðir með 15 mínútna umhugsunartíma í Unglinga og stúlknameistaramótiTaflfélags Reykjavíkur. Krakkar úr barna og unglingastarfi félagsins fjölmenna jafnan á þetta skemmtilega mót en það er öllum opið. Unglingameistari félagsins er Vignir Vatnar Stefánsson en hann hefur unnið mótið með fullu húsi undanfarin tvö ár. Stúlknameistari félagsins er hin kornunga Freyja Birkisdóttir. Mótið verður haldið 25. október.

 

U-2000 mót Taflfélags Reykavíkur er nýung í þéttu mótahaldi félagsins þetta árið. Í tilefni af 115 ára afmæli félagsins verður mótið nú endurvakið, en það var síðast haldið fyrir 10 árum árið 2005. Tefldar verða sjö umferðir með 90 mínútum +30 sek á leik og keppnisrétt hafa allir skákmenn með minna en 2000 Elo skákstig.
Mótið kemur í stað Vetrarmóts öðlinga. Mótið hefst 28. október og teflt er á miðvikudagskvöldum.

 

Þriðja Skemmtikvöld Taflfélags Reykjavíkur fer fram 30. október. Tilhögun á keppni kvöldsins verður ákveðin þegar nær dregur.
Skemmtikvöldin eru frábær skemmtun og gleðin við völd þótt oft sé barist hart á reitunum 64.

 

Afmælismót Einar Ben var eitt best heppnaða skákmótið í fyrra og verður nú haldið í annað sinn. Það fer fram á veitingastaðnum Einar Ben sem er mótshaldari ásamt Taflfélagi Reykjavíkur og Hróknum. Þjóðskáldið Einar Benediktsson fæddist 31. október 1864 og lést árið 1940. Hann var ástríðufullur skákmaður og meðal stofnenda Taflfélags Reykjavíkur um aldamótin 1900. Tefldar verða 7 umferðir með 7 mínútna umhugsunartíma. Mótið fer fram 31. október. Stórmeistarinn Helgi Ólafsson sigraði á mótinu í fyrra með 6 vinninga.

 

Bikarsyrpa Taflfélags Reykjavíkur. Sjötta nóvember er komið að öðru mótinu í bikarsyrpunni. Reynslunni ríkari eftir fyrsta mótið verður eflaust hart barist hjá ungviðinu í móti tvö. Fyrsta umferð fer fram á föstudegi, tvær á laugardegi og lokaumferðirnar tvær á sunnudeginum 8. nóvember. Umhugsunartími verður líkt og í fyrsta mótinu 30 mín + 30 sek á leik, og mótið er reiknað til alþjóðlegra skákstiga.

 

Skákfélagið Hrókurinn og Taflfélag Reykjavíkur standa fyrir MS Afmælismóti Jónasar Hallgrímssonar í Ráðhúsi Reykjavíkur, mánudaginn 16. nóvember kl. 16. Mótið er haldið á fæðingardegi þjóðskáldsins sem jafnframt er Dagur íslenskrar tungu. Mótið er fyrir börn á grunnskólaaldri og tefldar verða 7 umferðir með 7 mínútna umhugsunartíma. Símon Þórhallsson sigraði mótið í fyrra með fullu húsi vinninga.

 

Fjórða Skemmtikvöld Taflfélags Reykjavíkur fer fram 30. október. Tilhögun á keppni kvöldsins verður ákveðin þegar nær dregur.
Skemmtikvöldin eru frábær skemmtun og gleðin við völd þótt oft sé barist hart á reitunum 64.

 

Jólaskákmót Taflfélags Reykjavíkur og SFR er fjölmennasta barnaskákmót hvers árs. Fjögurra manna sveitir úr skólum borgarinnar keppa þá í tveimur flokkum. Yfir tvöhundruð börn og unglingar tóku þátt í mótinu 2014 sem var nýtt met. Mótið fer fram 29. og 30. nóvember.
Í fyrra sigruðu sveitir frá Rimaskóla og Laugarlækjaskóla í yngri og eldri flokk.

 

Bikarsyrpa Taflfélags Reykjavíkur. Fjórða desember er komið að þriðja mótinu í bikarsyrpunni.
Fyrsta umferð fer fram á föstudegi, tvær á laugardegi og lokaumferðirnar tvær á sunnudeginum 6. desember.
Umhugsunartími verður líkt og áður 30 mín + 30 sek á leik, og mótið er reiknað til alþjóðlegra skákstiga.

 

Jólaskákæfing Taflfélags Reykjavíkur er einn af skemmtilegustu viðburðum félagsins.
Verðlaun og viðurkenningar eru veittar fyrir ástundun og árangur á barna og unglingaæfingum haustsins auk þess sem fram fer liðakeppni nemenda og aðstandenda.  Jólaskákæfingin fer fram 12. desember.

 

Fimmta Skemmtikvöld Taflfélags Reykjavíkur fer fram 30. október. Tilhögun á keppni kvöldsins verður ákveðin þegar nær dregur, en veitt verða sérstök verðlaun fyrir jólalegasta klæðnaðinn!
Skemmtikvöldin eru frábær skemmtun og gleðin við völd þótt oft sé barist hart á reitunum 64.

 

Jólaskákmót TR fer fram 29. desember. Tefldar verða að venju fjórtán hraðskákir með 5 mínútur á klukkunni. Í fyrra sigraði Oliver Aron Jóhannesson með nokkrum yfirburðum en hann hlaut 12.5 vinninga úr skákunum 14.

 

Með skákkveðju,

Stjórn Taflfélags Reykjavíkur

Davíð Kjartansson sigraði á stórmóti Árbæjarsafns og Taflfélags Reykjavíkur

Stórmót Árbæjarsafns og TR fór fram í kornhlöðunni í Árbæjarsafni í gær. Þátttakan var heldur minni en undanfarin ár og kann að skýrast af því að mótið fór nú fram tveimur dögum á eftir Borgarskákmótinu. Það var þó vel skipað og tveir af verðlaunahöfum Borgarskákmótsins voru mættir til leiks, Fide meistararnir Davíð Kjartansson og Róbert Lagerman.

Davíð Kjartansson sem hafnaði í öðru sæti á Borgarskákmótinu fór nú mikinn og vann yfirburðarsigur. Sigraði hann alla andstæðinga sína, hlaut sjö vinninga af sjö mögulegum og varð heilum tveimur vinningum á undan næstu mönnum. Í öðru til fimmta sæti urðu þeir Róbert Lagerman, Bárður Örn Birkisson og Gylfi Þórhallsson og Þorvarður Fannar Ólafsson með fimm vinninga.

Líkt og á Borgarskákmótinu tóku nokkur af okkar efnilegustu skákkrökkum þátt í bland við eldri og reyndari meistara. Kristján Dagur Jónsson (10) stóð sig vel og krækti í þrjá vinninga með góðu jafntefli við gamla brýnið Jón Víglundsson í lokaumferðinni. Þá var árangur Bárðar Birkissonar eftirtektarverður en hann tapaði einungis gegn Fide meisturunum tveimur en sigraði aðra andstæðinga sína.

Tvær stúlkur tóku þátt, þær Sigríður Björg Helgadóttir sem hlaut 3 1/2 vinning og Freyja Birkisdóttir (2v).

Skákstjórn var í öruggum höndum Torfa Leóssonar líkt og undanfarin ár.

Heildarúrslit má finna á chess-results hér

Myndir frá mótinu: [Sýna allar]

Taflfélag Reykjavíkur vill þakka þeim sem tóku þátt og Árbæjarsafni fyrir að hýsa mótið í Kornhlöðunni sem er án vafa einn skemmtilegasti og mest sjarmerandi skáksalur landsins.

Sjáumst að ári!

Á heimasíðu TR má finna fullt af myndum frá mótinu.

Landskeppnin: Jafnt í seinni umferðinni - Færeyingar unnu með þrem

Seinni umferð Landskeppninnar (Landsdystur) við Færeyinga fór fram í hátíðarsal SA í gær. Færeyingar höfðu þriggja vinninga forskot eftir fyrri daginn og var dagsskipunin allt annað en massívur varnarleikur.

Nokkrar breytingar voru gerðar á liði Íslands í seinni umferðinni; Halldór Brynjar Halldórsson og Haraldur Haraldsson komu inn fyrir SA og Tómas Veigar Sigurðarson og Elsa María Kristínardóttir fyrir Huginn.

Nýliðarnir byrjuðu vel og vann Elsa (1890) nokkuð öruggan sigur gegn Gutta Petersen (1639) og var fyrst til að klára sína viðureign. Því næst var röðin komin að Tómasi Veigari (1926) sem landaði öruggum sigri gegn Luitjen Apol (2056) — Tómas heldur því enn 100% árangri í keppninni, en hann hefur nú unnið 3 af 3 skákum sem hann hefur teflt — Ísland var því næstum því búið að jafna stöðuna, en átta skákum var enn ólokið.

IM John Rödgaard færir Áskatli Erni gjöf

Þá fór að síga á ógæfuhliðina, en Halldór Brynjar Halldórsson (2217) tapaði sinni skák gegn FM Ólafi Berg (2302) og Hlíðar Þór Hreinsson (2236) tapaði gegn Sjúrði Þorsteinssyni(2168) og stóðu leikar þá jafnir, 2-2. Því næst vann Björn Ívar Karlsson (2264) góðan sigur gegn Eyðun Nölsoe (2211) en Haraldur Haraldsson (1987) tapaði sinni skák gegn Herluf Hansen (2006), var því enn jafnt 3-3 og ljóst að lið Færeyinga varð að tapa öllum sem eftir voru, ef Íslendingar ættu að eiga möguleika á að jafna.

Lukkudísirnar gengu í lið með okkar mönnum þegar Jakob Sævar Sigurðsson (1786) vann á tíma gegn Hjalta Petersen (1880), eftir að þeir höfðu báðir verið í miklu tímahraki. Jón Kristinn Þorgeirsson (2227) tapaði þá sinni skák gegn Rana Nölsoe (2062) og enn var jafnt, 4-4. Þá var ljóst að forskot Færeyinga yrði ekki jafnað og sigurinn því þeirra.

IM Einar Hjalti Jensson mátaði IM John Rödgaard með H+B gegn H!

Tvær skákir voru enn ókláraðar, IM Einar Hjalti Jensson (2394) tefldi hörkuskák gegn IM John Rödgaard (2348) og tókst að lokum að máta þann síðarnefnda með hrók og biskup gegn hrók. Að lokum var eftir skák Símons Þórhallssonar (2106) og John Jacobsen (1850), en sá fyrrnefndi tapaði eftir að hafa leikið af sér peði í tímahraki.

Niðurstaðan varð því 5-5 í seinni umferðinni, sem er öllu skárra en úr þeirri fyrri, en samanlagt unnu Færeyingar sem sagt 11,5 – 8,5.

Að lokum voru stutt ræðuhöld þar sem Færeyingum var þakkað fyrir drengilega keppni og þeir þökkuðu fyrir sig með gjöfum til handa Skákfélagi Akureyrar og Huginn og hrópuðu þrefalt húrra fyrir vináttu þjóðanna.

Skákstjórar voru: Hermann Aðalsteinsson og Áskell Örn Kárason.

• Mótið á Chess-Results
• Heimasíða SA
• Heimasíða Hugins

 

Meistaramót Hugins hefst eftir viku

Meistaramót Hugins (suðursvæði) 2015 hefst mánudaginn 24. ágúst klukkan 19:30. Mótið er 7 umferða opið kappskákmót sem lýkur 8. september (A-flokki líkur 7. september). Leyft verður að taka 1 yfirsetu í 1.-5. umferð sem tilkynna þarf um fyrir lok næstu umferðar á undan. Vegleg og fjölbreytt verðlaun eru í boði. Umhugsunartíminn verður 1½ klst. á skákina auk hálfrar mínútu á hvern leik í A-flokki en 45 mínútur+30 sek. á leik í B-flokki. Þeir sem eru undir 1600 sigum geta valið hvorn flokkinn þeir fara í..

Mótið er öllum opið og er reiknað til alþjóðlegra og íslenskra skákstiga. Skráning í mótið fer fljótlega af stað á skák.is en einnig er hægt að skrá sig með því að hringja í skákstjóra s-866-0116 (Vigfús). Upplýsingar um skráða keppendur eru hér:

Teflt er á mánudögum, þriðjudögum og fimmtudögum.

Aðalverðlaun:

50.000
40.000
30.000

Aukaverðlaun (miðað er við alþjóðleg skákstig)

• Skákmeistari Hugins (suðursvæði): Kr. 10.000.
• Besti árangur undir  2000 skákstigum:  Skákbók hjá Sigurbirni að verðmæti kr. 5.000.
• Besti árangur undir 1800 skákstigum:  Skákbók hjá Sigurbirni að verðmæti kr. 5.000.
• Besti árangur undir 1600 skákstigum: Skákbók hjá Sigurbirni að verðmæti kr. 5.000.
• Besti árangur stigalausra: Skákbók hjá Sigurbirni að verðmæti kr. 5.000.
• Unglingaverðlaun (15 ára og yngri), skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.
• B-flokkur, skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

Félagsmenn kr. 3.500; aðrir 4.500-
Unglingar 15 ára og yngri: Félagsmenn: 2.000; Aðrir 3.000.
Allir titilhafar fá frítt í mótið

Umferðartafla:

• 1. umferð, mánudaginn, 24. ágúst, kl. 19:30 (B-flokkur kl. 18,00)
• 2. umferð, þriðjudaginn, 25. ágúst, kl. 19:30 (B-flokkur kl. 18,00)
• 3. umferð, fimmtudaginn, 27. ágúst, kl. 19:30 (B-flokkur kl. 18,00)
• 4. umferð, mánudaginn, 31. ágúst, kl. 19:30 (B-flokkur kl. 18,00)
• 5. umferð, þriðjudaginn, 1. september, ágúst, kl. 19:30 (B-flokkur kl. 18,00)
• 6. umferð, fimmtudaginn, 3. september, kl. 19:30 (B-flokkur kl. 18,00)
• 7. umferð, mánudaginn, 7. september, kl. 19:30 (Bara A-flokkur)
• 7. umferð þriðjudaginn, 8. september, kl. 18.00 (Bara B-flokkur)

Hraðkvöld hjá Hugin í kvöld

Hraðkvöld Hugins verður mánudaginn 17. ágúst nk.  og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hugins í Álfabakka 14a í Mjóddinni. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Hjörvar hlaut 6 vinninga í Riga

Alþjóðlega mótinu í Riga í Lettlandi lauk í dag. Hjörvar Steinn Grétarsson (2567) varð efstur íslensku keppendanna með 6 vinninga í 9 umferðum. Hann endaði í 11.-38. sæti (29. sæti á stigum). Guðmundur Kjartansson (2447) hlaut 5½ og endaði í 39.-56. sæti (49. sæti) og Oliver Aron Jóhannesson (2263) hlaut 3 vinninga og endaði í 159.-172. sæti (161. sæti).

Heimamaðurinn Alexei Shirov (2702) og Armeninn Robert Hovhannisyan (2612) urðu efstir og jafnir með 7½ vinning.

Guðmundur hækkaði um 3 stig fyrir frammistöðu en bæði Hjörvar og Oliver lækkuðu á stigum.

Alls tók 191 skákmaður þátt í mótinu frá 38 löndum. Þar á meðal voru 29 stórmeistarar og jafnmargir alþjóðlegir meistarar. Hjörvar var nr. 16 í stigaröð keppenda, Guðmundur nr. 40 og Oliver nr. 97.

• Heimasíða mótsins
• Chess-Results
• Beinar útsendingar
• Chessbomb