Tap gegn Færeyjum í gær - verður hefnt í dag?

Nú um helgina fer fram Landskeppni (Landsdystur) við knáa skákpilta frá Færeyjum. Lið Íslands er skipað félögum frá Norðurlandi – Skákfélagi Akureyrar og Skákfélaginu Huginn. Keppt er í 19. sinn í ár, en keppnin var fyrst háð árið 1978.

Teflt var á Laugum í Þingeyjarsveit í gær en í dag er haldið til Akureyrar, þar sem hátíðarsalur SA (Íþróttahöllinni á Akureyri, gengið inn að vestan) verður heimavöllur Íslands. Taflið hefst kl. 14 og eru áhorfendur velkomnir!

Lið Íslands hefur 2174 stig að meðaltali og lið Færeyja 2052.

Ekki blés byrlega fyrir okkar menn í gær, þrátt fyrir að vera með mun stigahærra lið, því engum tókst að vinna skák en þrír töpuðu sínum viðureignum. Okkar menn voru mögulega óheppnir á köflum, en bæði Jón Kristinn Þorgeirsson og Jakob Sævar Sigurðsson voru tveim peðum yfir í sínum skákum, en gerðu báðir jafntefli. Fleirum voru mislagðar hendur í umferðinni; Áskell Örn lék sig óvænt í mát (skv. heimildum) og Björn Ívar átti hugsanlega vinningsmöguleika í lokastöðunni, með fyrirvara um ítarlegri greiningu.

Niðurstaða dagsins er því stórtap, 3,5 – 6,5 og Færeyingar í afar sterkri stöðu fyrir seinni umferðina.

Nokkrar breytingar verða gerðar á liði Íslands fyrir seinni umferðina: Halldór Brynjar Halldóssson, Tómas Veigar Sigurðarson og Elsa María Kristínardóttir koma inn í liðið en Áskell Örn Kárason, Smári Sigurðsson og Sigurður Daníelsson hvíla.

Nánar á Skákhuganum og á heimasíðu SA.

Úrslitin á Chess-Results. 

Stórmót TR og Árbæjarsafns fer fram í dag

Stórmót Taflfélags Reykjavíkur og Árbæjarsafns fer fram í ellefta sinn sunnudaginn 16. ágúst. Teflt verður í Árbæjarsafni og hefst taflið kl. 14. Tefldar verða sjö umferðir með umhugsunartímanum 7 mín. á skák. Veitt verða verðlaun fyrir þrjú efstu sætin í Stórmótinu, 15.000 kr., 10.000 kr. og 5.000 kr.

Þátttökugjöld í Stórmótinu eru kr. 1.300 fyrir 18 ára og eldri, en ókeypis fyrir yngri en 18 ára, eldri borgara (67) og öryrkja. Þátttökugjöld eru jafnframt aðgangseyrir að safninu en þeir sem þegar hafa aðgang, t.d. með menningarkorti, þurfa ekki að borga þátttökugjald.

Frekari upplýsingar veitir Torfi Leósson, netfang: ([e-mail]) eða í síma 697-3974. Mótið er jafnan einn af upphafsviðburðum skákársins, og við vonumst til að sjá sem flesta á þessu skemmtilega móti.

Skákþáttur Morgunblaðsins: Endalok Evans-bragðs

Eitt þekktasta leikbragð skákarinnar er kennt við við William Davies Evans, kaptein í breska sjóhernum á því tímabili við upphaf 19. aldar þegar Napóleóns-stríðin voru ekki á enda kljáð. Í frístundum sat hann og tefldi á uppihaldskrá sinni í London, beitti bragði sínu við hvert tækifæri og vann margan frækilegan sigur. Til er í handriti skák sem hann tefldi og vann í 20 leikjum gegn landa sínum Alexander McDonnell. Sá varð síðar frægur fyrir maraþoneinvígi sem hann háði síðar í London við Frakkann La Bourdonnais. Evans-bragð sprettur upp úr Ítalska leiknum: 1. e4 e5 2. Rf3 Rc6 3. Bc4 Bc5 og nú 4. b4!? Besta leið svarts hefur löngum verið talin sú að hirða b4-peðið og gefa það síðan aftur við hentugt tækifæri. Fischer og Kasparov tefldu stundum Evans-bragð, sá fyrrnefndi í léttari skákum, en frægt varð þegar Kasparov vann Anand í aðeins 25 leikjum á skákmóti í Ríga árið 1995. Það vill nú samt verða svo með unnendur gambíta að þeir eiga stundum erfitt með að fóta sig í flóknum stöðum, t.d. þegar þeir hafa leiðst út í að henda miklum liðsafla „fyrir borð“. Í dag vandast málið fræðilega með „skákreikna“ beintengda við gagnagrunna sem meta stöðurnar á örskotsstundu. En samt hafa gambítarnir, t.d. kóngsbragð, skólað til marga öfluga stórmeistara og nægir að nefna Boris Spasskí og Jón L. Árnason.

Á skákmóti sem lauk í Dortmund í Þýskalandi á dögunum vann Fabiano Caruana öruggan sigur eftir mikinn sprett þar sem hann vann fimm skákir í röð og varð að lokum 1½ vinningi á undan næsta manni, Filippseyingnum Wesley So. Í einni af sigurskákunum kom Evans-bragð við sögu. Sennilega hefur andstæðingur hans, Nisipeanu frá Georgíu, ætlað að koma Caruana á óvart en Ítalinn, sem brátt mun tefla fyrir Bandaríkjamenn, reyndist öllum hnútum kunnugur. Í skýringum sem hann gerði við skákina komst hann svo að orði að frá sínum sjónarhóli væri bragð Evans búið að vera. Einhvern veginn flögrar að manni að Caruana hafi kynnt sér skákir sem Hannes Hlífar Stefánsson tefldi fyrir allmörgum árum.

Dortmund 2015; 7. umferð:

Dieter Nisipeanu – Fabiano Caruana

Ítalskur leikur – Evans-bragð

1. e4 e5 2. Rf3 Rc6 3. Bc4 Bc5 4. b4 Bxb4 5. c3 Ba5 6. d4 d6 7. Db3 Dd7

Þessi og næsti leikur svarts halda stöðunni saman. lakara er 7. ... De7 vegna 8. d5 þó að svartur geti barist áfram með 8. ... Rd4!

8. dxe5 Bb6 9. a4 Ra5 10. Da2 Rxc4 11. Dxc4 Re7 12. Ba3

Þekktur staður fyrir biskupinn í Evans-bragði en skapar engin vandamál.

12. ... 0-0 13. 0-0 He8

Í skýringum sínum telur Caruna að enn betra hefði verið að leika 13. ... Rg6 og eftir 14. exd6 cxd6 15. Hd1 Dg4! hóti svartur m.a. 16. .... Rf4.

14. exd6 cxd6 15. Hd1 Dc6 16. Rbd2 Be6 17. Dxc6 Rxc6 18. Bxd6 Had8 19. Bb4 Hd3!

Svartur hefur gefið peð um stundarsakir en menn hans standa vel.

20. a5 Bc7 21. Rf1 Hxd1 22. Hxd1 Rxa5 23. Rd4 Rc4 24. Rxe6 Hxe6 25. Hd7 Hc6 26. Rg3 g6!

Svarta staðan er alltaf betri vegna þess hve illa biskupinn á b4 stendur. Áður en svartur ræðst til atlögu loftar hann út og hindrar för riddarans til f5 í leiðinni.

27. Re2 a5 28. Rd4?

Hann varð að leika 28. Be7.

28. ... axb4 29. Rxc6 b3 30. Hxc7 Rd6!

Magnaður lokahnykkur, b3-peðið rennur upp í borð þó að hvítur sé hrók yfir.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 8. ágúst 2015

Skákþættir Morgunblaðsins

[Event "Dortmund"] [Site "Dortmund GER"] [Date "2015.07.05"] [EventDate "2015.06.26"] [Round "7"] [Result "0-1"] [White "Liviu Dieter Nisipeanu"] [Black "Fabiano Caruana"] [ECO "C52"] [WhiteElo "2654"] [BlackElo "2805"] [PlyCount "60"] 1. e4 e5 2. Nf3 Nc6 3. Bc4 Bc5 4. b4 Bxb4 5. c3 Ba5 6. d4 d6 7. Qb3 Qd7 8. dxe5 Bb6 9. a4 Na5 10. Qa2 Nxc4 11. Qxc4 Ne7 12. Ba3 O-O 13. O-O Re8 14. exd6 cxd6 15. Rd1 Qc6 16. Nbd2 Be6 17. Qxc6 Nxc6 18. Bxd6 Rad8 19. Bb4 Rd3 20. a5 Bc7 21. Nf1 Rxd1 22. Rxd1 Nxa5 23. Nd4 Nc4 24. Nxe6 Rxe6 25. Rd7 Rc6 26. Ng3 g6 27. Ne2 a5 28. Nd4 axb4 29. Nxc6 b3 30. Rxc7 Nd6 0-1

Jón Viktor sigraði á Borgarskákmótinu

Alþjóðlegi meistarinn Jón Viktor Gunnarsson sem tefldi fyrir Malbikunarstöðina Höfða sigraði á 28. Borgarskákmótinu sem fram fór í Ráðhúsi Reykjavíkur í gær. Hann sigraði alla andstæðinga sína og kom í mark með 7 vinninga. Jón Viktor sigraði einnig mótið í fyrra en þá hlaut hann 6 1/2 vinning.

Formaður borgarráðs og staðgengill Borgarstjóra Sigurður Björn Blöndal setti mótið, og hafði á orði að síðasta skák sem hann hefði teflt við hefði verið gegn Róbert Lagerman á Grænlandi fyrir nokkrum árum. Nefndi hann einnig í ræðu sinni að það væri gaman að sjá hve skákin héldi vel velli, væri í sókn og hve breiður hópur skákmanna væri mættur í Ráðhúsið. Að því loknu lék hann fyrsta leiknum í skák Jóns Viktors og Sigurðar Ingasonar.

Mótið í ár var ágætlega mannað en alls tóku 63 keppendur þátt að þessu sinni. Yfir sjötíu ára aldursmunur var á yngsta og elsta keppenda mótsins þeim Adam Ómarssyni (8) og Páli G. Jónssyni (82) og stóðu báðir sig með með prýði.

Fyrirfram máttti búast við harðri keppni titilhafanna á mótinu um sigurinn og sú varð raunin. Fide meistarinn Davíð Kjartansson sem tefldi fyrir Olís kom annar í mark á eftir Jón Viktor með sex vinninga og tapaði einungis innbyrðisviðureign þeirra. Þriðji varð svo annar Fide meistari, fyrrnefndur Róbert Lagerman (Faxaflóahafnir) með 5 1/2 vinning.

Ungu skákmennirnir settu sterkan svip á mótið og fóru mikinn. Örn Leó Jóhannsson (Efling stéttarfélag) og Jón Trausti Harðarson (Grillhúsið) hlutu báðir 5 vinninga og enduðu í 4.-13. sæti. Tvíburabræðurnir unguBjörn og Bárður Birkissynir sem tefldu fyrir Byko og Hamborgarbúllu Tómasar vöktu athygli og lögðu að velli marga reynda meistara. Má þar nefna Forseta skáksambandsins Gunnar Björnsson (Landsvirkjun) sem þurfti að játa sig sigraðann gegn þeim báðum, Stefán Bergsson(Jómfrúin) og gamla brýnið Gunnar Gunnarsson (Sjóvá) sem þurftu að lúta í gras gegn Bárði og alþjóðlegi skákdómarinn Omar Salama (Hvalur hf) sem fann engar löglegar leiðir til að verjast Birni. Þá stóð Óskar Víkingur Davíðsson (10) (Íslandsbanki) sig mjög vel og kom í mark með 4 1/2 vinning eftir góðan endasprett.

Af stúlkunum stóð Lenka (Íslandspóstur) sig best (4v), Guðlaug (3 1/2),Veroníka (3) og Freyja Birkisdóttir sem einungis er níu ára hlaut 2 vinninga.

Skák og lífskúnsterinn Einar S. Einarsson átti trúlega stystu skák mótsins þegar að hann kæfingarmátaði Guðlaugu Þorsteinsdóttir með þekktu stefi í Búdapestarvörninni í einungis 7 leikjum.

Töluverður fjöldi áhorfenda var á mótinu, þá einkannlega túristar sem staddir voru í Ráðhúsinu og fylgdust spenntir með af pallinum. Aðrir höfðu minni áhuga á taflmennskunni en þeim mun meiri á öndunum á tjörninni. Þeirra á meðal sonur Omars og Lenku sem grandskoðaði fuglalífið á meðan á móti stóð.

Skákfélagið Huginn og Taflfélag Reykjaavíkur vilja koma á framfæri þökkum til allra þeirra sem tóku þátt, Borgarinnar fyrir að hýsa mótið og síðast en ekki síst þeim fjölmörgu fyrirtækjum sem styrktu mótið.

Sjáumst að ári!

Nánar á Skákhuganum og á heimasíðu TR

Íslandsmeistararnir og hraðskákmeistararnir mætast

Í gær var dregið í aðra umferð Hraðskákeppni taflfélaga. Íslandsmeistarar Hugins og hraðskákmeistarar taflfélaga, Taflfélags Reykjavíkur, mætast í átta liða úrslitum en þessi lið mættust í úrslitum í fyrra.

Einnig var dregið í Litlu bikarkeppnina sem nú fer fram í fyrsta sinn en þar mætast liðin sem töpuðu í fyrstu umferð.

Það var Ólafur S. Ásgrímsson, yfirdómari keppninnar, sem dró. Drátturinn fór fram í kaffistofu Björgunar.

Hraðskákkeppni taflfélaga:

• Skákfélag Akureyrar - Víkingaklúbburinn
• Vinaskákfélagið/Taflfélag Bolungarvíkur - Skákdeild Hauka/TRuxvi
• Taflfélag Reykjavíkur - Skákfélagið Huginn a-sveit
• Skákfélagið Huginn b-sveit - Taflfélag Garðabæjar

Litla bikarkeppnin:

• Skákfélag Íslands - Skákgengið
• Ungmennasamband Borgarfjarðar - Skákfélag Selfoss og nágrennis
• Vinaskákfélagið/Taflfélag Bolungarvíkur - Skákddeild Fjölnis
• Skákdeild Hauka/TRuxvi - Skákfélag Reykjanesbæjar

Annarri umferð á að vera lokið eigi síðar en 30. ágúst nk.

Heimasíða keppninnar

Skákhátíð Skákakademíunnar á Menningarnótt

Skákakademían efnir til Skákhátíðar á Menningarnótt. Að þessi sinni fer hátíðin fram í Iðnó, á 2. hæð. Helsti viðburður hátíðarinnar er viðureign tveggja sigursælustu landsliða sem Ísland hefur átt. Annars vegar er um að ræða gullaldarlið Íslands frá árunum 1980-1996. Á því tímabili átti Ísland eitt af tíu bestu landsliðum heims. Kjölfestuna í liðinu mynduðu stórmeistararnir Jóhann Hjartarson, Helgi Ólafsson, Margeir Pétursson og Jón L. Árnason. Margeir á ekki heimangengt á Menningarnótt en Þröstur Þórhallsson tekur sæti hans. Þröstur tefldi fyrst með landsliðinu árið 1988 og var lykilmaður langt fram yfir aldamótin.

                Á móti gullaldarliðinu munu tefla Ólympíumeistarar 16ára og yngri frá árinu 1995. Þá vann sú unga sveit frækinn sigur sem vakti mikla athygli. Sveitina skipuðu Jón Viktor Gunnarsson, Bragi Þorfinnsson, Bergsteinn Einarsson, Björn Þorfinnsson og Einar Hjalti Jensson. Þeir munu allir fagna 20ára afmæli Ólympíugullsins með því að tefla við gullaldarliðið. Má ætla að viðureignin geti orðið verulega tvísyn.

 

Liðin tefla hraðskákir sín á milli með tvöfaldri umferð, alls átta skákir.

Ásamt þessari skemmtilegu viðureign geta gestir skákhátíðarinnar teflt sína á milli eða skorað á stórmeistarann Hjörvar Stein Grétarsson sem verður á staðnum.

Salurinn í Iðnó opnar 13:30 og hefst viðureignin 14:00. Hátíðinni lýkur um 17:00.

Víkingaklúbburinn lagði Skákfélag Íslands að velli

Víkingaklúbburinn og Skákfélag Íslands mættust í 16-liða úrslitum Hraðskáksmóts taflfélaga fimmtudaginn 13. ágúst í húsnæði Skáksambands Íslands. Viðureignin var heimaleikur Skákfélagsins.  Viðureignin endaði með nokkrum öruggum sigri Víkingaklúbbsins, en lokastaðan varð  46.5 gegn 25.5 vinningar Skákfélagsins.  Það skal sérstaklega taka fram að Skákfélag Íslands gat bara stillt upp á fimm borðum og því var einvígið mun jafnara en úrslit gefa til kynna, þar sem ein viðureign tapaðist í hverri umferð hjá Skákfélaginu vegna auðs borðs.

Viðureignirnar fóru eftirfarandi:

Fyrri umferð:  5-1, 5-1, 4-2, 3.5-2.5, 3-3, 4-2 = 24.5-11.5

Seinni umferð:  5-1, 4-2, 2-4, 3.5-2.5, 3.5-2.5, 4-2 = 22-14

Samtals:  46.5-25.5

Besti árangur Víkingaklúbbsins:

Ólafur B. Þórsson 9.5 v af 12
Stefán Þór Sigurjónsson 9 af 12
Gunnar Fr. Rúnarsson 9. v af 9
Sigurður Ingason 6.5 v. af 11

Besti árangur Skákfélags-manna:

Árni Böðvarsson 7.5 v. af 12
Birkir Karl Sigurðsson 6.5 af 12
Kristján Örn Elíasson 5.5 af 12

Nánar á vefsíðu Víkingaklúbbsins.

Héðinn vann í lokaumferðinni - endaði í 4.-10. sæti

Alþjóðlega mótinu, Washington International, lauk í gær. Héðinn vann alþjóðlega meistarann Darwin Yang (2465) í lokaumferðinni. Hann hlaut 6 vinning og endaði í 4.-10. sæti. Verðlaunafé Héðins voru $650.

Gata Kamsky (2670) sigraði á mótinu en hann hlaut 7,5 vinning.

Alls tefldu 56 skákmenn í mótinu og þar af voru átta stórmeistarar. Héðinn var nr. 5 í stigaröð keppenda. 

 

• Heimasíða mótsins
• Beinar útsendingar
• Chessbomb

Borgarskákmótið fer fram í dag

Borgarskákmótið fer fram föstudaginn 14. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa  Taflfélag Reykjavíkur og Skákfélagið Huginn, að mótinu, eins og þau hafa gert síðustu ár. Gera má ráð fyrir að margir af sterkustu skákmönnum þjóðarinnar taka þátt í því. Skákmenn eru hvattir til að skrá sig sem fyrst eftir að opnað verður fyrir skráningu. Mótið er öllum opið og er þátttaka ókeypis en skráning fer fram á Skák.is.

Einnig er hægt að skrá sig í í síma 866 0116 (Vigfús) og 899 9268 (Björn). Tefldar verða 7 umferðir með 7 mínútna umhugsunartíma. Þetta er í 28. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Jón Viktor Gunnarsson, sem þá tefldi fyrir Jómfrúnna.

Skákfélag Akureyrar með öruggan sigur á Fjölni

Skákfélag Akureyrar og Fjölnir áttust við í 16-liða úrslitum Hraðskákkeppni taflfélaga miðvikudagskvöldið 12. ágúst. Keppnin fór fram á sal Skákskóla Íslands. Fyrirfram mátti búast við all jafnri viðureign enda liðin áþekk á ELO-stigum. Eftir fyrstu tvær umferðinar stóðu leikar jafnt, sex vinningar gegn sex. Þá gáfu Skákfélagsmenn heldur betur í og tryggðu sér góða forystu í hálfleik, 22 ½  - 13 ½ . Seinni hálfleikur var nokkuð jafnari en hann vann Skákfélagið með 19 ½ vinningi gegn 16 ½. Lokastaðan var því 42 - 30 fyrir Skákfélagi Akureyrar.

Nýjustu liðsmenn félagsins stóðu sig best. Þannig fékk Björn Ívar Karlsson tíu vinninga af tólf mögulegum og Arnar Þorsteinsson níu vinninga af tólf mögulegum. Bestur Fjölnismanna var Sigurbjörn Björnsson sem er nýgenginn í félagið. Hann fékk átta vinninga af tólf mögulegum.

Einstaklingsúrslit:

Skákfélag Akureyrar:

Björn Ívar Karlsson 10

Arnar Þorsteinsson 9

Halldór Brynjar Halldórsson 7

Jón Kristinsson 7

Stefán Bergsson 5

Gylfi Þórhallsson 4

Allir tefldu 12 skákir.

Fjölnir:

Sigurbjörn Björnsson 8/12

Tómas Björnsson 5/11

Erlingur Þorsteinsson 5/11

Dagur Ragnarsson 4 ½ /12

Jón Trausti Harðarson 4/11

Jón Árni Halldórsson 2 ½ /10

Dagur Andri Friðgeirsson 1/5