Skák.is

Bloggfærslur mánaðarins, júní 2015

16.6.2015 | 14:21

Norway Chess mótið rétt nýhafið

Ofurmótið í Stafangri í Noregi, Norway Chess, hófst kl. 14. Meðal keppenda eru flestir sterkustu skákmenn heims. Magnus Carlsen (2876), Caruana (2805), Anand (2803) og Nakamura (2802).

Carlsen og Topalov tefla saman í fyrstu umferð. Hægt er að fylgjast með öllum herlegheitunum í beinni útsendingu.

Heimasíða mótsins
Beinar útsendingar (hefjast almennt kl. 14)
Beinar útsendingar (norska)

Spil og leikir | Slóð | Facebook | Athugasemdir (0)

16.6.2015 | 14:11

Hannes í beinni frá Teplice

Hannes Hlífar Stefánsson (2580) og Lenka Ptácníková (2307) eru bæði meðal keppenda á Teplice-mótinu í Tékklandi. Hannes Hlífar hefur 2,5 vinning en Lenka hefur 2 vinninga.

Hannes er í beinni frá fjórðu umferð sem er nýhafin. Þar teflir hann við alþjóðlega meistarann Sebastian Plischki (2395).

Árangur þeirra á mótinu má nálgast á Chess-Results.

Heimasíða mótsins
Beinar útsendingar (hefjast almennt kl. 14)
Chess-Results

Spil og leikir | Slóð | Facebook | Athugasemdir (0)

16.6.2015 | 11:51

Teflt við útitaflið á morgun - 17. júní

Skákakademía Reykjavíkur stendur fyrir fjöltefli við skákmeistara við útitaflið á Bernhöftstorfu og gestir geta teflt sín á milli. Skákmeistarinn Björn Ívar Karlsson, skákmeistari, mun tefla við gesti og gagnandi sem eru hvattir til að fjölmenna!

Taflið fer fram á milli 14 og 17.

Spil og leikir | Breytt s.d. kl. 18:07 | Slóð | Facebook | Athugasemdir (0)

16.6.2015 | 07:46

Riddarinn - teflt á þriðjudegi (í dag) að þessu sinni

Riddarar reitaða borðsins láta ekki reglubundnar skákværingar sínar falla niður enda þótt þjóðhátíðardagurinn setji strik í reikninginn með því að vera í miðri viku. Þessvegna verður blásið til sóknar og varnar á þriðjudegi í þetta sinn og efnt til veislukaffis til hátíðarbrigða.

Spennu- og gamanmyndin HRÚTAR sem vann til verðlauna í Cannes nýverið lýsir vel átökum tveggja sauðfjárbænda og bræðra í Bárðardal sem talast ekki við frekar en skákmenn að tafli. Þar leika hrútar aðalhlutverkin auk stórleikaranna Sigga Sigurjóns og Tedda Júl sem fara á kostum.

Á skákborðinu stangast menn líka á þó með ólíkum hætti sé og láta ekki deigan síga þó sumar sé. Djúpt innsæi og heildstætt stöðumat og hugsun er þó það sem gildir og ræður úrslitum.

Í síðustu viku var metþátttaka í Vonarhöfn skáksal Riddararns í skjóli Hafnarfjarðarkirkju. Aldrei hefur mótið unnist á svo lágu vinningshlutfalli fyrr eða aðeins með 7.5 vinningi af 11 mögulegum sem segir og sýnir að baráttan á borðinu hefur verið feikihörð. Allir skyldu þó sæmilega sáttir á yfirborðinu. Hér má sjá lærdómsríkt sýnishorn af taflmennsku dagsins:

Svo fylgir mótstaflan með líka með hér að neðan til frekari upplýsingar. Munið að tvíklikka á myndir til að sjá þær í HD, bæði stærri og skýrari, og klikkið svo ekki á því að mæta til tafls þeir sem hafa aldur til.

Spil og leikir | Breytt s.d. kl. 08:30 | Slóð | Facebook | Athugasemdir (0)

14.6.2015 | 09:58

Sjö íslenskir verðlaunahafar!

Það gekk sérlega vel hjá íslensku sendinefndinni í Portu Mannu í Sardiníu en mótinu lauk í gær. Alls hömpuðu sjö Íslendingar verðlaunum!

Jóhann Hjartarson, Margeir Pétursson og Friðrik Ólafsson urðu efstir Íslendinganna í 4.-14. sæti með 6 vinninga. Jóhann varð hæstur þeirra eftir stigaútreikning og hlaut 6. sætið.

Áskell Örn Kárason, Veronika og yðar einlægur urðu í 15.-28. sæti með 5,5 vinning. Ég varð efstur í flokki skákmanna með minna en 2100 skákstig og Veronika önnur. Veronika varð svo efst í u1800 flokknum.

Þorsteinn Magnússon varð annar í u1500 flokknum og Heimir Páll Ragnarsson varð annar í unglingaflokki.

Íslendingar fengu tvö af þremur verðlaunum í flokki skákmanna 60 ára og eldri. Áskell varð þriðji og Friðrik annar. Þýski stórmeistarinn Lothar Vogt tók gullið sjónarmun á undan Friðriki eftir stigaútreiknng.

Yuri Garret, aðalskipuleggjandi mótsins, þakkaði íslensku sendisveitinni sérstaklega fyrir komuna og nefndi hversu ánægjulegt það hefði verið að fá þessar þrjár goðsagnir í mótið. Fékk hann Friðrik upp til að afhenda sérstök afreksverðlaun fyrir tvo unga Ítali. Friðik hélt stutta tölu og þakkaði Yuri fyrir frábært mótshald.

Íslendingar almennt mokuðu inn stigum. Í fljótu bragði sýnist mér allir nema titilhafarnir hækka á stigum. Engin þó meira en Veronika og Heimir sem tóku inn 121 og 120 skákstig!

Konstantin Landa sigraði á mótinu. Varð efstur ásamt Sabino Brunello en vann mótið á stigum.

Leikur mótsins

Áskell Örn Kárason átti án efa einn allra merkilegasta leik mótsins. Í næstsíðustu umferðin lék hann 38...Ba6+ sem vann skákina þegar í stað. Þegar Áskell kom heim uppgötvaði hann að á a6 hefði átt að vera svart peð sem að einhverjum ástæðum hafði færst til á a7! Leikurinn var því kolólöglegur! Það breytti því þó ekki að staða Áskels var kolunnin.

Ég sjálfur

Ég sjálfur tók þátt í mótinu eins og í fyrra. Mér gekk mun betur nú en þá og tek inn 30 stig fyrir frammistöðuna. Ég hef að ég held aldrei haft jafn gaman að því tefla og nú.

Ég undirbjó mig fyrir hverja einustu skák (nema fyrir fyrstu umferð), sem ég hef lítt sinnt í gegnum tíðina, og ávallt nema einu sinni nýttist undirbúningurinn á einhvern hátt. Síðustu skákina gegn David Spence (2248) vann ég á eldhúsborðinu (frekar borðinu á veröndinni). Fórnaði drottningu með svörtu í áttunda leik og vann skákina í 26 leikjum.

Allar mínar skákir voru tefldar í botn nema eitt stutt jafntefli á tvöfalda deginum.

Aðstæður

Allar aðstæður á skákstað voru til fyrirmyndar. Flott skáksett, dúkuð borð, vatnsvél, loftræsting og góðir skákstjórar. Allt gert til að skákmönnunum liði vel.

Eina sem mér fannst mega gera betur var að birta pörun fyrr. Ítalirnir kláraðu umferðina og fóru svo að borða. Að því loknu var parað! Íslendingar myndu para fyrst og borða svo!

Yuri Garret og hans lið stóð sig frábærlega

Að loknu

Íslendingarnir voru gríðarlega ánægðir með mótið og allir skemmtu sér vel. Krakkarnir höfðu gríðarlega gaman að því að hafa goðsagnirnar þrjár með. Þeir sinntu krökkunum vel og fóru stundum yfir skákirnar með þeim.

Óhætt er að mæla með þessu móti fyrir íslenska skákmenn. Einkar fjölskylduvænar aðstæður til staðar.

Ég og mitt fólk stefnir ótrautt á þátttöku að ári!

Gunnar Björnsson

Spil og leikir | Slóð | Facebook | Athugasemdir (0)

13.6.2015 | 20:00

Skákþáttur Morgunblaðsins: Æskuþróttur á meistaramóti

Á Meistaramóti Skákskóla Íslands, sem fram fór um síðustu helgi, var keppt í tveim stigaflokkum, flokki þeirra sem voru með meira en 1600 elo-stig og flokki keppenda undir 1600 elo-stigum. Þessi flokkaskipting reyndist vel og þó tímamörk væru ekki þau sömu voru bæði mótin reiknuð til alþjóðlegra stiga. Lengstu skákirnar í stigalægri flokknum, með tímamörkin 30 30, stóðu í meira en 2 klst. en í þeim stigahærri voru tímamörk 90 30 og hefur reynslan kennt okkur að skákir standa yfirleitt ekki mikið lengur en í 4 klst. Þar komu fyrstir í mark félagarnir Jón Trausti Harðarson og Dagur Ragnarsson, hlutu 5 ½ vinning af sex. Á mánudagskvöldið tefldu þeir stutt einvígi um nafnbótina meistari Skákskóla Íslands 2015 og hafði Jón Trausti betur. Í stigalægri flokknum urðu efstir og jafnir Jóhann Arnar Finnsson og Robert Luu með 4 ½ vinning af sex mögulegum en Jóhann var hærri á mótsstigum og hreppti 1. verðlaun. Þar sem stigamunur/ styrkleikamunur á keppendum var minni en oft varð baráttan afar hörð og eins og á nýafstöðnu Íslandsmóti var ekki í boði að semja jafntefli eftir innan við 30 leiki. Hugmyndaflug og ofdirfska héldust í hendur í nokkrum af skemmtilegustu skákum þessa móts. Lítum á nokkur dæmi:

Það virtist vera fokið í flest skjól hjá Óskari Víkingi Davíðssyni sem er nýorðinn 10 ára þegar þessi staða kom upp í skák í 3. umferð:

Gauti Páll Jónsson – Óskar Víkingur Davíðsson

Svartur er manni undir og leiðirnar ekki greiðar en Óskar var ekki af baki dottinn og lék...

24. ... Rh1+! Eftir 25. Hxh1 Dg3+ 26. Ke2 Dg2+ 27. Kd3 Dxh1 hefði Gauti Páll átt að leggja áherslu á vörnina og leika 28. Dd1! og koma hróknum í spilið. Hann valdi hinsvegar 28. Rd5? og eftir 28. ... h3! réð hann ekki við h-peð Óskars sem vann eftir 51 leik.

Veronika Steinunn Magnúsdóttir vann til verðlauna í flokki keppenda með 1600-1800 elo-stig. Sigur í lokaumferðinni réð því en í eftirfarandi stöðu átti Dawid Kolka góða möguleika. Einn leikur leiðir til sigurs:

Dawid Kolka –Veronika Steinunn

17. Rxb5?

Freistandi en vinningsleikurinn var 17. d5!, t.d. 17. ... Ha8 18. dxe6! o.s.frv.

17. ... Hxb5 18. Da4 Da5!

Dawid sást yfir þennan snjalla leik sem byggist á valdleysi hróksins á e1. Hvíta staðan er töpuð og svartur vann í 29 leikjum.

Stigahæsti keppandinn, Oliver Aron, náði sér ekki á strik að þessu sinni. Í 3. umferð mætti hann Hilmi Frey Heimissyni sem sýndi allar sína bestu hliðar:

Oliver Aron Jóhannesson – Hilmir Freyr Heimisson

Frönsk vörn

1. e4 e6 2. d4 d5 3. Rc3 Bb4 4. e5 c5 5. a3 Bxc3 6. bxc3 Dc7 7. Dg4 Re7 8. Bd3 h5!?

Lítt þekktur leikur sem hentaði kringumstæðum vel.

9. Dxg7 Hg8 10. Dh6 Rbc6 11. Bh7?!

11. Rf3 eða 11. Re2 var mun betra.

11. ... Hxg2 12. Kf1 Hg6! 13. Bxg6 Rxg6 14. Be3 cxd4 15. cxd4 b6

Opnar a6-reitinn fyrir biskupinn og kemur kónginum í skjól.

16. Rf3 Ba6+ 17. Kg2 O-O-O 18. Hhg1 Be2! 19. Rg5

19. ... Rcxe5!?

Opnar hornalínuna, 19. ... Rh4+ var einnig gott.

20. dxe5 d4 21. Bd2 Dxe5 22. Kh1?

Hann varð að reyna 22. f4!

22. ... Hh8! 23. Dxh8

23. Rh7 strandaði á 23. ... Bf3+.

23. ... Dxh8 24. Hae1 Bc4 25. Hg3 Bd5 26. Kg1 h4 27. Hg4 f5!

- og hvítur gafst upp. Hrókurinn á g5 á engan góðan reit.

Helgi Ólafsson helol@simnet.is

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Morgunblaðinu 6. júní

Skákþættir Morgunblaðsins

Veljið skák (90 alls):

Spil og leikir | Breytt 12.6.2015 kl. 08:43 | Slóð | Facebook | Athugasemdir (0)

13.6.2015 | 07:00

Mjóddarmót Hugins fer fram í dag

Mjóddarmótið fer fram laugardaginn 13. júní í göngugötunni í Mjódd. Mótið hefst kl. 14 og er mótið öllum opið. Góð verðlaun í boði. Á síðasta ári sigraði Frú Sigurlaug en fyrir hana tefldi Einar Hjali Jensson. Tefldar verða sjö umferðir með sjö mínútna umhugsunartíma. Skráning fer fram í síma 866-0116 og á skak.is Upplýsingar um skráða keppendur má finna hér. Þátttaka er ókeypis!

Mjóddarmótið var fyrst haldið 1999 og hét þá Kosningamót Hellis og fór fram á kjördegi. Á fyrsta mótinu sigraði Hannes Hlífar Stefánsson sem tefldi fyrir Símvirkjann. Mótið fékk fljótlega nafnið Mjóddarmótið enda ekki hægt að halda kosningamót á hverju ári og ekki var mögulegt að halda mótið á kjördegi eftir að félagið flutti í núverandi húsnæði.

Verðlaun eru sem hér segir:

1. 15.000
2. 10.000
3. 5.000

Skráning:

Skak.is
Sími: 866 0116

Spil og leikir | Breytt 9.6.2015 kl. 09:33 | Slóð | Facebook | Athugasemdir (0)

12.6.2015 | 07:45

Jóhann í 4.-7. sæti í Sardiníu - næstsíðasta umferðin í dag

Jóhann Hjartarson er efstur íslenska skákmannanna með 5 vinninga þegar sjö umferðum er lokið í Bjarnarhöfðamótinu í Sardiníu. Í gær vann hann Áskell Örn Kárason. Friðrik Ólafsson vann snaggaralegan sigur í gær. Aðspurður hafði hann leitað til hvernig smiðju Taimanovs frá Hastings 1956! Margeir Pétursson, og Loftur Baldvinsson, sem gerði gott jafntefli við alþjóðlegan meistara koma næstir með 4 vinninga.

Í gær hélt hluti hópsins upp á Bjarnarhöfða en upp á höfanum er klettur sem er nákvæmlega eins og björn í laginu og er svæðið skýrð eftir því. Húfan fauk af af mér í miðri myndatöku eins og sjá má.

Hópmynd

Ungu krakkarnir hafa átt gott mál flestir og eru í miklum stigagróða.

Í gær var teflt hraðskákmót á skákstað. Þar kom Óskar Long Einarsson gríðarlega sterkur inn og endaði í þriðja sæti. Tempó og hraði í hraðskákmótum er ítölskum skákstjórum ekki jafn eðilslægur og okkur íslendingum! Stelpurnar létu sig ekki vanta.

Veðrið hefur verið frábært en í dag fór að rigna. Þessi pistill er því skrifaður innandyra!

Staða íslensku skákmannanna

5-7. Jóhann Hjartarson 5 v.
8.-20. Friðrik Ólafsson 4,5 v.
21.-46. Margeir Pétursson, Áskell Örn Kárason og Loftur Baldvinsson 4 v.
47.-77. Gunnar Björnsson, Stefán Bergsson, Veronika Steinunn Magnúsdóttir, Heimir Páll Ragnarsson og Óskar Long Einarsson 3,5 v.
78.-98. Óskar Víkingur Davíðsson 3 v.
99.-115. Þorsteinn Magnússon og Hörður Jónasson 2,5 v.
116.-121. Stefán Orri Davíðsson og Baltasar Máni Gunnarson 2 v.
124. Birgir Logi Steinþórsson 1 v.

Í gær voru sjö Íslendingar í beinni en verða aðeins fjórir í dag. Það er Jóhann, sem teflir við Konstantin Landa, Friðrik, Áskell og Margeir.

Bestu kveðjur frá Sardiníu.

Heimasíða mótsins
Úrslitaþjónusta (áþekkt Chess-Results)
Beinar útsendingar (yfirleitt kl. 13)
Myndaalbúm (Facebook)

Spil og leikir | Slóð | Facebook | Athugasemdir (0)

11.6.2015 | 07:00

Mjóddarmót Hugins fer fram á laugardaginn

Verðlaun eru sem hér segir:

1. 15.000
2. 10.000
3. 5.000

Skráning:

Skak.is
Sími: 866 0116

Spil og leikir | Breytt 9.6.2015 kl. 09:33 | Slóð | Facebook | Athugasemdir (0)

10.6.2015 | 10:43

Langur dagur að baki - Íslendingaslagir í dag

Dagurinn í gær var erfiður en þá voru tefldar tvær umferðir. Ágætlega gekk hjá Íslendingum en þó dunu yfir nokkur áföll. Ungu krakkarnir hafa verið að gera góði hluti.

Jóhann Hjartarson og Margeir Pétursson eru efstir íslenskra skákmanna. Þeir hafa 3,5 vinning og eru í 5.-12. sæti. Svo óheppilega vill til að þeir mætast í dag. Þeir félagarnir tóku sig til og buðu ungmennunum upp í skákkennslu í morgunsárið svo féll í afar góð farveg. Margeir vann báðar sínar skákir í gær en Jóhann tapaði fyrir Rombaldoni sem er efstur með 4,5 vinning.

Friðrik Ólafsson hefur 3 vinninga. Hann tapaði fyrri skák dagsins en gerði jafntefli í þeirri síðari. Friðrik er ekki vanur að tefla tvær skákir sama daginn – enda ekki gert á hans skákdögum og hélt jafnvel að hann hafi aldrei áður teflt tvær skákir sama daginn!

Fyrsta Íslendingaviðureignin fór fram í gær. Þá mættust Óskar Long og Óskar Víkingur (stundum kallaður Óskar Short ). Sá stutti vann skákina og Óskarsverðlaunin!

Í dag fara fram þrjár Íslendingaviðureignir. Auk áðurnefnds stórmeistaraslags tefla Loftur og Veronika og Stefán Orri og Balthasar Máni. Þetta er þriðja skák Lofts í röð við skákkonu!

Áskell Örn teflir við hann ítalska Henrik Danielsen, Enrico Danieli!

Ungu krakkarnir gera áfram góða hluti. Heimir Páll, Óskar Víkingur og Veronika hafa öll 3 vinninga.

Umferðin hefst kl. 13 í dag. Þá verða Friðrik og Áskell í beinni auk Jóhanns og Margeirs.

Staða íslensku skákmannanna

5.-12. Jóhann Hjartarson og Margeir Pétursson 3,5 v.
13.-48. Friðrik Ólafsson, Áskell Örn Kárason, Stefán Bergsson, Óskar Víkingur Davíðsson, Heimir Páll Ragnarsson og Veronika Steinunn Magnúsdóttir 3 v.
49.-76. Gunnar Björnsson, Óskar Long Einarsson og Loftur Baldvinsson 2,5 v.
77.-106. Þorsteinn Magnússon 2.
107.-118. Hörður Jónasson 1,5 v.
119.-123. Stefán Orri Davíðsson, Birgir Logi Steinþórsson og Balthasar Máni Gunnarsson 1 v.

Bestu kveðjur frá Sardiníu.