Aðalfundur TR fer fram á mánudaginn

Aðalfundur Taflfélags Reykjavíkur verður haldinn mánudaginn 15. júní í húsnæði félagsins að Faxafeni 12.  Fundurinn hefst kl. 20.  Dagskrá er venjuleg aðalfundarstörf.  Hér að neðan fylgja lagabreytingatillögur sem liggja fyrir.

• Lagabreytingatillögur

Riddarinn: Hvert æfingamótið öðru betra!

Ekkert lát er á skákskylmingum eldri skákmanna í Vonarhöfn þó sól hækki á lofti.  Þar hittast gamlir skákskarfar til tafls á miðvikudögum allan ársins hring. Margir þeirra tefla líka  í öðrum klúbbum og skemmta sér við að vega mann og annan hvar sem færi gefst – þó í óeiginlegri merkingu sé.

Síðustu mót hafa farið harðnandi með þátttöku reyndra meistara af gamla skólanum. Almennt er taflmennskan mjög lífleg og enginn annars bróðir í leik.  Spennan og vígamóðurinn er  það sem þessir gömlu fuskar sækja í og þrífast á.  Allir skilja þó sáttir enda skiptir góður félagsskapur öllu máli.

Síðastliðinn miðvikudag var það Jón Þ. Þór sem brá sér í víking eftir nokkurt hlé og fór með sigur af hólmi með 9.5 vinningi af 11 mögulegum.  Kristján Stefánsson sá óútreiknanlegi ástríðuskákmaður skaust öllum á óvart upp í annað sætið, Gunnar Gunnarsson varð þriðji og Ingimar Halldórsson fjórði.  Fyrir viku síðan var það hins vegar Gunnar sem vann með 10.5 v., Ingimar annar og Jóhann Örn þriðji.  Og fyrir hálfum mánuði var það svo Ingimar sem gaf engin grið og sigraði með sama vinningafjölda. 

Taflmennska eldri skákmanna gefur lífinu mikið gildi fyrir þá – brýtur upp tilbreytingaleysi tilverunnar- og dreifir huga þeirra frá Alþingisrásinni og hinum lákúrulegu umræðum þar,  ástandinu í málefnum aldraðra og þjóðmálum almennt. Gamall hálfútbrunninn eldmóður blossar upp og þeim halda engin bönd við að freista þess að máta andstæðinginn eða verða sjálfir mát ella.  J

  Sjá má svipmyndir af vettvangi og vopnaviðskiptum á meðf. myndskeiðum:

https://youtu.be/_X8

https://youtu.be/2KVuc107Vzc

https://youtu.be/fr_mMryipN0

Öll  úrslit á www.riddarinn.net.  

 

Mjóddarmót Hugins fer fram á laugardaginn

Mjóddarmótið fer fram laugardaginn 13. júní í göngugötunni í Mjódd.  Mótið hefst kl. 14 og er mótið öllum opið. Góð verðlaun í boði.  Á síðasta ári sigraði Frú Sigurlaug en fyrir hana tefldi Einar Hjali Jensson.  Tefldar verða sjö umferðir með sjö mínútna umhugsunartíma.  Skráning fer fram í síma 866-0116 og á skak.is Upplýsingar um skráða keppendur má finna hér.  Þátttaka er ókeypis!

Mjóddarmótið var fyrst haldið 1999 og hét þá Kosningamót Hellis og fór fram á kjördegi. Á fyrsta mótinu sigraði Hannes Hlífar Stefánsson sem tefldi fyrir Símvirkjann. Mótið fékk fljótlega nafnið Mjóddarmótið enda ekki hægt að halda kosningamót á hverju ári og ekki var mögulegt að halda mótið á kjördegi eftir að félagið flutti í núverandi húsnæði.

Verðlaun eru sem hér segir:

• 1. 15.000
• 2. 10.000
• 3.   5.000

Skráning:

• Skak.is
• Sími: 866 0116

Friðrik með glæsiskák - sex Íslendingar í beinni í morgunsárið

Friðrik Ólafsson sýndi að hann hafi engu gleymt þegar hann vann glæsilegan sigur í þriðju umferð Sardiníumótsins í gær.  Fórnaði skiptamun og svo fórn og mátaði í framhaldinu. Friðrik hefur 2,5 vinning og er efstur Íslendinganna ásamt Jóhanni Hjartarsyni, Stefáni Bergssyni og Heimi Páli Ragnarssyni.

 

Jóhann þurfti verulega að hafa fyrir sínum andstæðingi sem var 13 ára og greinilega mikið efni. Stefán vann góðan sigur í gær en Heimir Páll gerði jafntefli við skákmann sem var 600 skákstigum hærri en hann. Var sérstaklega gaman að fylgjast með þeirri skák þar sem andstæðingurinn var alveg fara af taugum á meðan Heimir Páll var pollrólegur. Heimir hefur 2,5 vinning þrátt fyrir að hafa teflt uppfyrir sig allt mótið.

Þorsteinn Magnússon bættist við í hóp ungra skákmanna sem hafa hafa stigahærri andstæðinga.  Steini vann með smellinni taflmennsku.

Hörður Jónasson tefldi við fulltrúa blindra á mótinu en Hörður þurfti að segja leikinn upphátt og leika fyrir andstæðinginn.

Staða efstu íslensku skákmannanna:

• 6-12. Jóhann Hjartarson, Friðrik Ólafsson, Heimir Páll Ragnarsson og Stefán Bergsson 2,5 v.
• 13-43. Gunnar Björnsson, Áskell Örn Kárason, Veronika Steinunn Magnúsdóttir og Óskar Víkingur Davíðsson 2 v.
• 44.-58. Margeir Pétursson, Óskar Long Einarsson og Loftur Baldvinsson 1,5 v.

Tvær umferðir fara fram í dag og hefjast þær klukkan 7 og 13:30. Sex Íslendingar eru í beinni í fyrri umferð dagins.

Það eru Friðrik sem teflir við ítalska stórmeistarann Sabino Brunello, Jóhann Hjartarson, Stefán Bergsson, Áskell Örn, Margeir Pétursson og yðar einlægur.

Bestu kveðjur frá Sardiníu,
Gunnar

• Heimasíða mótsins
• Úrslitaþjónusta (áþekkt Chess-Results)
• Beinar útsendingar (yfirleitt kl. 13)
• Myndaalbúm (Facebook)

 

Gott gengi íslensku keppendanna í Sardiníu

Önnur umferð Bjarnarhöfða-mótsins fór fram í Sardiníu í gær.  Jóhann Hjartarson vann en Margeir Pétursson og Friðrik Ólafsson gerðu jafntefli. Áskell Örn Kárason var nærri því að halda jafntefli gegn Sabino Brunello. Óskar Víkingur Davíðsson og Heimir Páll Ragnarsson eru þeir eru einu sem hafa fullt hús en þeir hafa verið að tefla við mun veikari andstæðinga.

Heilt yfir gengur Íslendingum vel. Krakkarnir ungu hafa verið að gera góða hluti. Heimir Páll, Óskar Víkingur, Stefán Orri og Veronika hafa öll verið að vinna stigahærri andstæðinga. Sumir eru auðvitað að stíga sín fyrstu skref á alþjóðlegu móti og fá hér frábæra reynslu.

Aðstæður eru allar til fyrirmyndar. Flott sett á dúkuðum borðum. Loftkæling til staðar og vel fer um keppendur. 

Í hádeginu er svo hlaðborð með úrvalsfæði. Gisting og fullt fæði kostar aðeins um 9.000 kr. á fullorðinn.

Í gær fór fram Pub Quiz í umsjón Stefáns Bergsson og Erlu og gekk vel. Ingvar Þór Jóhannesson reyndist ráðagóður frá Hafnarfirði en hann henti í nokkrar spurningar. Ian og Cathy Rogers sem eru hér í fríi og vinnu unnu sigur.

Ég sjálfur gerði jafntefli í gær við Alan Byron, tíðan gest á Reykjavíkurmótunum, í hörkuskák og er heilt yfir ánægður við taflmennsku mína.

Margeir, Jóhann, Friðrik og Áskell verða allir í beinn í dag en umferðin hefst kl. 13. Vek athygli á því að á morgun eru tvær umferðir  og hefst sú fyrri kl. 7.

Þessi pistill átti að birtast fyrir umferð í dag - en birting mistókst.

Bestu kveðjur frá Sardínu,
Gunnar

• Heimasíða mótsins
• Úrslitaþjónusta (áþekkt Chess-Results)
• Beinar útsendingar (yfirleitt kl. 13)
• Myndaalbúm (Facebook)

 

Skákþáttur Morgunblaðsins: Á Íslandsmótinu sannaði 30 leikja reglan gildi sitt

Á Íslandsmótinu sem lauk í Hörpu um síðustu helgi var tekin upp sú ágæta regla að banna jafntefli áður en 30 leikjum var náð. Þó gátu menn slíðrað sverðin ef sama staðan kom þrisvar en það kom ekki oft fyrir. 30 leikja reglan er reyndar rússnesk uppfinning og var ef ég man rétt notuð á sovéska meistaramótinu 1973 þegar herða átt upp bestu skákmennina eystra eftir hrakfarir þeirra í viðskiptum sínum við Bobby Fischer. Nokkrir háttsettir menn úr íþróttamálaráðuneytinu vildu raunar fangelsa þá sem fylgdu Spasskí til Reykjavíkur sumarið 1972 með þeim rökum, að afhroð á keppnisvelli geri kröfu til þess að sökudólgur sé fundinn – þegar í stað. En þrátt fyrir 30 leikja regluna tókst hinum friðsömu á þessu meistaramóti að semja sín jafntefli og þá yfirleitt með samningum áður en skákin var tefld; í bakherbergjum hripuðu menn niður sennilegt 30 leikja handrit og skákin síðan „tefld“ og jafntefli samið.

30 leikja reglan náði því aldrei miklum vinsældum en svo komu Búlgarar með Sofia-regluna sem leggur blátt bann við jafnteflum nema með leyfi og fyrir milligöngu skákdómara. Á Íslandsmótinu kallaði 30 leikja reglan fram mikla baráttu í nánast hverri einustu skák en mönnum gekk misjafnlega vel að halda haus í vandasömum stöðum eins og gengur:

Sjá stöðumynd

Einar Hjalti Jensson – Björn Þorfinnsson

Eftir byrjun sem Birni er nokkuð vel kunn ætlaði hann að leika 12....De8 en þá fór hugurinn á flug og skyndilega greip Björn í biskupinn...

12. ...Bxh2+? 13. Kxh2 De8

Hótar riddaranum og 13. ...Rh4 en hvítur á gott svar: 14. Bc5! með hugmyndinni 14. ...Rg4+ 15. Kg3 og 15. ...Dg6 strandar á 16. Re7+. Einar Hjalti hefði átt að „rissa“ upp valkostina í huganum en lék...

14. exd5 Rh4+ 15. Kg3 Dh5 16. f4?

Tapar. Nauðsynlegt var fyrst 16. Re7+ og síðan 17. f4.

16. ... He8! 17. Re5 Hxe5! 18. fxe5 Dxe5+ 19. Hf4

Eða 19. Kf3 Rxe3 20. Dxe3 Bg4+! 21. Kf2 Hf8+ og vinnur.

19. ... Rxe3 20. Kf3 Bg4+! 21. hxg4 Hf8+

- og Einar gafst upp því hann verður mát í næsta leik.

Henrik Danielsen – Björn Þorfinnsson

Björn komst í hann krappan í nokkrum skákum og hér situr hann að tafli í 10. umferð með koltapaða stöðu gegn Henrik Danielsen. Hann hefði getað gefist upp í þessari stöðu með góðri samvisku en ákvað að henda litlu spreki á löngu slokknað bál:

34. ... Hxh3

Þessum leik er t.d. hægt að svara með 35. Bxf4 en Henrik lék...

35. Bxh3??

og nú kom...

35. ... Rd3+!

Henrik varð svo mikið um þennan leik að hann skellti upp úr, stöðvaði klukkuna og gafst upp. Staðan er vissulega töpuð, t.d. 36. Ke2 Rxb2 37. g5 Da6+ en hann hefði alveg eins og Björn getað haldið aðeins áfram.

Jóhann Hjartarson – Guðmundur Kjartansson

Í miðtafli lokaumferðar þar sem yfirburðir hvíts eru augljósir greip Guðmundur til þess ráðs að leika ...

25. ...Bf5

Og hugmyndin var einföld, 36. Rxf5 Hxe5? og nær manninum til baka. Eða hvað? Jóhann í góðu formi hefði ekki verið lengi að sjá 37. Df6! Hxf5 38. Dh8+ Ka7 39. He1 og við hótuninni 40. He8 er engin vörn. Hann valdi hinsvegar að leika...

26. f4

og eftir...

26. ... Be4!

...var biskupinn komin í óskaaðstöðu og Guðmundur vann í 43 leikjum.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 31. maí

Skákþættir Morgunblaðsins

Góð byrjun í Sardiníu

Það gekk almennt vel hjá íslensku skákmönnunum í fyrstu umferð sjöunda Bjarnarhöfða mótsins sem fram fer í Sardínu. Sextán Íslendingar taka þátt í mótinu. Með fylgihlutum eru Íslendingarnar alls 30 talsins.

Í fyrstu umferð unnust 9 skákir, 3 jafntefli og 4 skákir töpuðust.  Margeir og Friðrik unnu báðir góðir sigra en Jóhann þurfti að sætta sig við jafntefli.

Aðstæður á staðnum eru afar góðar. Skákstaðurinn flottur og allt til staðar. Yuri Garret aðalskipugeggjari mótsins er afar fær sem slíkur. í gær eftir skákir setjast menn niður á hótelbarnum og fara yfir skákirnar.

Mótshaldarinn setti mótið og tók fram að hversu mikill heiður það væri fyrir mótið að hafa Friðrik Ólafsson þar og var vel klappað í salnum. 

Teflt er eftir aðlöguðu svissnesku kerfi þar sem keppendum er skipt upp í nokkrar grúppur. Ég sjálfur var t.d. efstur í minni grúppu í gær og tefldi við Írann Jim Murray. Í dag tefli ég við Alan Byron, sem margir þekkja úr Reykjavíkurskákmótinu, þrátt fyrir að hann tapað fyrir Brunello. Ætla að reyna að stúdera þetta kerfi og athuga hvort þetta gæti verið eitthvað fyrir Reykjavíkurskákmótið. Ekki víst að kerfi sem hannað er fyrir 124 eigi endilega við þar. 

Margeir, Friðrik og Jóhann verða sem fyrr í beinni í dag en umferðin hefst kl. 13. Í þann hóp bætist við Áskell Örn Kárason sem teflir við ítalska stórmeistarann Sabino Brunello (2526).

Bestu kveðjur frá Sardínu,
Gunnar

• Heimasíða mótsins
• Úrslitaþjónusta (áþekkt Chess-Results)
• Beinar útsendingar (yfirleitt kl. 13)
• Myndaalbúm (Facebook)

 

Grænlandssyrpan í Vin á mánudag: Borgarstjórinn heiðursgestur

Dagur B. Eggertsson borgarstjóri er heiðursgestur á Grænlandsmóti Hróksins og Vinaskákfélagsins, sem haldið verður í Vin mánudaginn 8. júní klukkan 13. Tefldar verða sex umferðir með 7 mínútna umhugsunartíma.
Þetta er annað mótið í Flugfélagssyrpu FÍ, Hróksins og Vinaskákfélagsins, en sigurvegarinn fær ferð fyrir tvo til Grænlands.

Fyrsta mótið í Flugfélagssyrpunni fór fram 4. maí og þar sigraði Róbert Lagerman. Fjögur mót eru í syrpunni og er reiknaður árangur úr þremur bestu mótum hvers keppanda. Spennandi verður að fylgjast með framhaldinu, en Héðinn Steingrímsson, stórmeistari og nýbakaður Íslandsmeistari, sigraði í Flugfélagssyrpunni 2014.

Vinaskákfélagið var stofnað af liðsmönnum Hróksins 2014 og hefur síðan staðið fyrir reglulegum æfingum í Vin, bata- og fræðslusetri Rauða krossins við Hverfisgötu 47. Þangað eru allir hjartanlega velkomnir.

Að vanda eiga keppendur og gestir í Vin von á ljúffengum veitingum. Bakarameistarinn, sem hefur verið bakhjarl Vinaskákfélagsins frá upphafi, leggur til gómsæta tertu og heimamenn í Vin leggja til ljúffengar vöfflur.

• Heimasíða Hróksins

 

 

Margeir, Jóhann og Friðrik verða í beinni frá Sardiníu kl. 13

Fyrsta umferðin í Sardiníu hefst kl. 13 í dag. Stórmeistararnir Margeir, Jóhann og Friðrik verða allir í beinni.

• Beinar útsendingar
• Pörun fyrstu umferðar
• Heimasíða mótsins

 

Sextán Íslendingar tefla í Sardiníu

Sextán íslenskir skákmenn taka þátt í alþjóðlega mótinu í Sardiníu sem hefst í dag kl. 13. Með fylgifiskum (mökum, börnum, foreldrum, öfum og ömmum) telur hópurinn alls 30 manns. Meðal keppenda eru stórmeistararnir Friðrik Ólafsson, Jóhann Hjartarson og Margeir Pétursson og FIDE-meistarinn Áskell Örn Kárason. 

Keppendalistinn íslenski er annars sem hér segir:

3. GM Johann Hjartarson 

4. GM Margeir Petursson 

12. GM Friðrik Ólafsson 

15. FM Askell O Karason 

46. 1N Stefan Bergsson 

47. CM Gunnar Bjornsson 

56. 1N Loftur Baldvinsson 

101. 1N Veronika Magnusdottir 

111. 1N Oskar Long Einarsson 

113. 2N Jonasson Hordur 

115. NC Heimir Pall Ragnarsson 

117. NC Oskar Vikingur Davidsson 

119. NC Thorsteinn Magnusson 

121. NC Stefan Davidsson 

122. NC Baltasar Mani Wedholm 

124. NC Birgir Logi Steinthorsson 

Heildarkeppendalistinn er hér.

Umferðin í dag hefst kl. 13. Gera má ráð fyrir að einhverjir Íslendingar verði í beinni útsendingu (a.m.k. Jóhann og Margeir) en pörun er væntanleg um kl. 12.

Skák.is verður með puttann á púlsinum frá Sardiníu. 

Heimasíða mótsins