Skákdagurinn framundan

Skákdagurinn verður haldinn hátíðlegur um land allt mánudaginn 26. janúar. Friðrik Ólafsson fyrsti stórmeistari Íslendinga og þjóðhetja á þá stórafmæli, en hann stendur á áttræðu. Feril Friðriks þekkja flestir. Hann varð Íslandsmeistari 1952 þá sautján ára gamall, tefldi frægt einvígi við Bent Larsen 1956 og var næstu árin meðal allra bestu skákmanna heims. Friðrik gegndi embætti forseta FIDE 1978-1982 og átti farsælan feril sem skrifstofustjóri Alþingis um árabil.

Taflborðin verða tekin upp í skólum, taflfélögum, fyrirtækum og víðar á Skákdaginn og munu landsmenn þannig heiðra afmælisbarnið í verki. Þegar eru allmargir viðburðir fyrirhugaðir. Eldri skákmenn í Reykjavík munu halda áfram baráttunni um Friðrikskónginn þar sem Gunnar Gunnarsson hefur titil að verja. Gunnarar hafa reyndar unnið Friðrikskónginn síðustu þrjú ár! Taflið hefst 19:30 og er teflt um Friðrikskónginn í skákherberginu í KR-heimilinu.

Friðrik hefur verið félagi í Taflfélagi Reykjavíkur allan sinn feril. Taflfélagsmenn munu heiðra þennan helsta félaga sinn með Frikkanum 2015, en um þann titil verður teflt á næsta skemmtikvöldi Taflfélagsins sem verður haldið föstudagskvöldið 30. janúar.  Tefldar verða stöður upp úr skákum Friðriks. Auk þess er Skákþing Reykjavíkur sem nú er í gangi honum til heiðurs.

Vinaskákfélagið og Skákfélagið Hrókurinn standa fyrir Friðriksmóti í Vin á mánudaginn.

Skákfélagið Huginn mun að kvöldi Skákdagsins standa fyrir hraðkvöldi í félagsaðstöðu sinni í Mjóddinni.

Lágafellsskóli í Mosfellsbæ er mikill skákskóli. Þar sinnir Ingibjörg Rósa Ívarsdóttir kennari við skólann skákkennslu í fullu starfi. Hjörvar Steinn Grétarsson stórmeistari mun tefla fjöltefli í skólanum morguninn eftir Skákdaginn. Fjöltefli verða einnig haldin í Kerhólsskóla, Hvolsskóla Hvolsvelli og víðar.

Taflfélögin út á landi láta ekki sitt eftir liggja og verður Hugin með opið hús um kvöldið á Húsavík og Skákfélag Akureyrar higgur á skákmót í verslunarmiðstöðinni Glérártorgi. Þá hefur heyrst af skákviðburðum á Blönduósi og Patreksfirði.

Skáksundlaugarsett verða vígð víða um land, m.a. á Ólafsvík, Ólafsfirði og Seltjarnarnesi.

Frekar upplýsingar um Skákdaginn er að vænta í vikunni og má senda upplýsingar um viðburði á stefan@skakakademia eða [e-mail].

               

Dagur og Dagur í forystu á Skákþingi Reykjavíkur

Margar spennandi viðureignir voru í 5.umferð Skákþings Reykjavíkur sem tefld var síðastliðinn sunnudag. Hart var barist á toppnum sem fyrr og urðu tveir titilhafar að játa sig sigraða.

Á 1.borði mættust alþjóðlegi meistarinn Dagur Arngrímsson (2368) og FIDE meistarinn Guðmundur Gíslason (2315) í hörkuskák. Í þessari orrustu um toppsætið mættust stálin stinn og varð eitthvað undan að láta. Svo fór að lokum að Ísfirðingurinn knái, Gummi Gísla, lagði niður vopn eftir harða rimmu og nokkra vel útfærða leiki Dags. Afar mikilvægur og sterkur sigur hjá Degi í toppbaráttunni.

Á 2.borði mættust TR-ingurinn síungi Þorvarður Fannar Ólafsson (2245) og Rimaskólaundrið Dagur Ragnarsson (2059). Báðir höfðu þeir náð góðum úrslitum fyrr í mótinu og báðir voru þeir taplausir fyrir þessa viðureign. Eftir heiðarlegan bardaga var það Dagur sem vann skákina og trónir hann nú á toppnum ásamt nafna sínum Degi Arngrímssyni. Í þessu samhengi er athyglivert að rifja upp þungbæra kennslustund Dags Ragnarssonar á Evrópumóti ungmenna í Batumi í Georgíu síðastliðið haust þar sem hann varð að gera sér að góðu að skilja 122 skákstig eftir í Batumi. Slík reynsla hefur bugað margan skákmanninn, en Dagur er með höfuðið skrúfað rétt á og hefur honum tekist að vinna með þessa erfiðu reynslu á uppbyggilegan hátt. Afraksturinn er augljós nú eftir fimm skákir í Skákþinginu því piltur hefur 4¹/2 vinning sem skipar honum á bekk með efsta manni mótsins og skilar honum 72 skákstigum.

Á 3.borði börðust Suðurnesjatröllið Jóhann Ingvason (2126) og Grafarvogsstjarnan Oliver Aron Jóhannesson (2170). Margir reiknuðu vafalítið með sigri Olivers í ljósi hraustlegrar framgöngu hans í mótinu til þessa, en Jóhann er sýnd veiði en ekki gefin. Auk þess berast nú þær fregnir úr undirheimunum að Jóhann sé í stífum æfingum hjá ónefndum stórmeistara. Svo virðist sem þær æfingar séu að skila sér því Jóhann gerði jafntefli við Oliver og hefur því nælt sér í 1¹/2vinning í síðustu tveimur skákum gegn tveimur ungum og afar efnilegum skákmönnum.

Á 4.borði stýrði sonur Suðurnesjatröllsins, Örn Leó Jóhannsson (2048), hvítu mönnunum gegn stórmeistaranum Stefáni Kristjánssyni (2492). Það er ljóst að þrátt fyrir örlítið hikst í stórmeistaravélinni í 3.umferð að þá mætir Stefán einkar vel undirbúinn til leiks í Skákþingið. Á kaffistofunni veltu menn því fyrir sér hvort Stefán væri að beita heimabrugguðum launráðum í þessari skák gegn Erni Leó. Ekki verður úr því skorið hér en hitt er ljóst að Stefán vann skákina eftir nokkrar sviptingar. Er Stefán sterklega grunaður um að hafa fínpússað byrjanir sínar áður en Skákþingið hófst.

Fullyrða má að Akademíuforinginn Stefán Bergsson (2085) hafi farið eilítið aðra leið en stórmeistarinn í sínum byrjanaundirbúningi fyrir Skákþingið. Erfitt er að finna orð til að lýsa því nánar en ljóst er að orðið fínpússning væri nokkuð villandi í því samhengi. Stefán stýrði svörtu mönnunum gegn stjórnarmanni Taflfélags Reykjavíkur, Þóri Benediktssyni (1895). Þórir lék 1.e4 og Stefán svaraði með 1...f5. Var það mál manna á kaffistofunni að 1...f5 væri að öllum líkindum versti mögulegi svarleikur svarts gegn 1.e4. Enda fór það svo að Þórir vann skákina.

Óvænt úrslit voru framleidd á 6.borði hvar Bjarni Sæmundsson (1895) stýrði svörtu mönnunum til sigurs gegn alþjóðlega meistaranum Sævari Bjarnasyni (2114). Bjarni á það til að ganga berserksgang á skákborðinu og er besta dæmið um það er hann lagði titilhafana Róbert Lagerman (2320) og Dag Arngrímsson (2367) að velli í Reykjavíkurskákmótinu árið 2011, líkt og skákáhugamönnum er vafalítið enn í fersku minni. Sævar fékk nú að finna fyrir vélabrögðum Bjarna sem er til alls líklegur í þessum ham.

Af öðrum úrslitum bar hæst að skákþjálfarinn dagfarsprúði Björn Þorfinnsson (2373) lagði kollega sinn, skákþjálfarann Loft Baldvinsson (1987), að velli á rétt rúmum klukkutíma. Staunton-sérfræðingurinn Jón Viktor Gunnarsson (2433) vann landsliðskonuna geðþekku Hallgerðu Helgu Þorsteinsdóttur (1992) og byrjanaprófessorinn Daði Ómarsson (2256) er aftur kominn á beinu brautina eftir sigur á Dawid Kolka (1829).

Línur eru teknar að skýrast í Skákþinginu. Dagur Arngrímsson og Dagur Ragnarsson leiða mótið með 4¹/2 vinning en í humátt á eftir þeim með 4 vinninga koma Guðmundur Gíslason, Oliver Aron Jóhannesson, Stefán Kristjánsson, Jón Trausti Harðarson, Jón Viktor Gunnarsson, Bjarni Sæmundsson og Þórir Benediktsson. Aðrir hafa minna.

Í 6.umferð verður risaslagur á 1.borði hvar Stefán Kristjánsson hefur hvítt gegn Degi Arngrímssyni. Á 2.borði er ekki síðri bardagi þar sem Dagur Ragnarsson hefur hvítt gegn Jóni Viktori Gunnarssyni. Athygliverð rimma er jafnframt á 4.borði en þar mætast Rimaskólabræðurnir Oliver Aron Jóhannesson og Jón Trausti Harðarson í baráttu um Grafarvogskrúnuna. Það mun eitthvað ganga á í skáksal Taflfélags Reykjavíkur þegar 6.umferð verður tefld og mörgum spurningum ósvarað þar til þá. Munu nafnarnir halda toppsætinu eða er Dagur að kveldi kominn? Mun nýr Dagur upp rísa? Hvaða afbrigði verður fínpússað á eldhúsborði stórmeistarans fyrir umferðina? Verður Grafarvogur samur eftir slag Olivers og Jóns Trausta? Hvað leikur Akademíuforinginn í 1.leik?

Ekki missa af fjörinu. Klukkur verða ræstar á slaginu 19:30 á miðvikudagskvöldið næstkomandi.

• Heimasíða TR
• Chess-Results

Norðurorkumótið - Skákþing Akureyrar 2015 hófst í gær

Norðurorkumótið, Skákþing Akureyrar 2015 hófst í gær með 10 skákum. Hart var barist á öllum borðum og engin skák endaði með jafntefli. 21 keppandi er skráður til leiks. Þar á meðal eru margir reyndir kappar, ungir og efnilegir drengir og kempur sem hafa ekki teflt kappskák á Akureyri í langan tíma. Ungu, óreyndu drengirnir stóðu sig vel en máttu sín lítils gegn reynsluboltunum. Þeirra tími mun koma.

Á fyrsta borði áttust við Sveinbjörn Sigurðsson og Áskell Örn Kárason. Skákinni lauk eftir 38 leiki þegar Sveinbjörn féll með erfiða stöðu.

Á öðru borði vann Ólafur Kristjánsson glæsilegan sigur á Kristjáni Hallberg í aðeins 19 leikjum. Tvímælalaust glæsilegasta skák kvöldsins.

Á þriðja borði mættust Ulker Gasanova og Jón Kristinn Þorgeirsson. Langt er síðan Ulker hefur teflt á skákmótum á heimavelli og gaf hún ungstirninu ekkert eftir. Jón tók það til bragðs að skipta upp í seinnihluta miðtaflsins og Ulker sat uppi með erfiða stöðu og lék af sér. Hún gafst upp eftir 35 leiki.

Á fjórða borði áttust við Smári Ólafsson og Logi Jónsson. Smári tefldi djarft og fórnaði tveimur peðum fyrir frumkvæðið. Seinni peðsfórnin var vafasöm. Í kjölfarið lék Smári illa af sér og Logi náði að króa drottningu Smára inni. Smári gafst þá upp.

Á fimmta borði mætti Hreinn Hrafnsson ungstirninu Símoni Þórhallssyni. Símon saumaði jafnt og þétt að hreini og vann hann í vel tefldri skák í 26 leikjum.

Á sjötta borði mætti Haraldur Haraldsson Eymundi Eymundssyni sem ekki hefur teflt mikið að undanförnu. Eymundur fékk þrönga stöðu og vann Haraldur nokkuð örugglega. Eymundur gafst upp eftir 34 leiki eftir að hafa leikið af sér skiptamun í erfiðri stöðu.

Á sjöunda borði mættust Haki Jóhannesson og Sigurður Eiríksson. Haki hefur í mörg ár haft hægt um sig í kappskákum í heimabænum. Þetta var spennandi skák þar sem Sigurður reyndi að herja á hálfopna a-línu en Haki lagði undir sig opna c-línu. Opna línan reyndist happadrýgri og Haki bætti stöðu sína jafnt og þétt uns Sigurður þurfti að gefa drottningu sína fyrir riddara og hrók. Þær bætur reyndust ekki nægar þrátt fyrir kröftuga taflmennsku svarts og Haki hafði að lokum sigur eftir laglegan lokahnykk í 50. leik.

Á áttunda borði stóð hinn reynslulitli Benedikt Stefánsson vel í sveitunga sínum úr Hörgárdalnum, Hjörleifi Halldórssyni. Svo fór að lokum að reynslan lagði æskuna af velli í endatafli eftir 36 leiki.

Á níunda borði var hinn ungi Oliver Ísak Ólafsson óheppinn að ná ekki að halda heldur verra hróksendatafli gegn Jakobi Sævari Sigurðssyni. Jakob nýtti reynslu sína og vann í 45 leikjum.

Á tíunda og neðsta borði tefldi Gabríel Freyr Björnsson sína fyrstu kappskák gegn kennara sínum, Andra Frey Björgvinssyni. Gabríel átti erfitt uppdráttar og mátti játa sig sigraðan eftir 35 leiki.

Karl Egill Steingrímsson sat yfir í fyrstu umferð.

• Heimasíða SA
• Chess-Results

Janúarmót Hugins: Hjörleifur sigraði í vestur

Vestur-riðli lauk í nýlega (að mestu) með sigri Hjörleifs Halldórssonar (1920) frá Akureyri. Hjörleifur fékk 5,5 vinninga og er hálfum á undan næsta manni.

Vestanmenn eru afar seinþreyttir til vandræða ef marka má mótstöfluna, enda gerðu fjórir efstu jafntefli í öllum innbyrðis skákunum! Í heildina gerðu vestanmenn jafntefli í níu skákum, en aðeins tveim lauk með jafntefli fyrir austan.

Sagt er að vestanmenn séu með þessu að undirbúa sig fyrir samningaviðræður við Evrópusambandið, en allir sem einn eru miklir áhugamenn um inngöngu. [Gæti verið ósatt – #KvPalli]

Tefldar voru þrjár skákir úr 6. umferð og ein úr 7. (Jakob og Jakub)  og urðu úrslit eftirfarandi:

 

Sigurbjörn Ásmundsson og Hjörleifur Halldórsson

Lokastaðan í vestur er því þannig:

1. Hjörleifur Halldórsson 5,5 vinningar af 7
2. Jakob Sævar Sigurðsson 5
3. Hermann Aðalsteinsson 4,5
4. Rúnar Ísleifsson 4
5. Sigurbjörn Ásmundsson 4
6. Ármann Olgeirsson 2,5
7. Jón Aðalsteinn Hermannsson 1
8. Jakub Piotr Statkiewicz 0,5

Þess ber að geta að Ármann Olgeirsson og Jón Aðalsteinn Hermannsson eiga inni frestaða skák, en hún hefur engin áhrif á röð keppenda.

Allar skákir mótsins eru aðgengilegar á síðunni og er bent á tenglana að neðan.

• Vesturskákir
• Vestur á Chess-Results
• Síða mótsins

Austur

Þegar hefur verið greint frá því að Tómas Veigar Sigurðarson sigraði í austur riðli. Nú er öllum skákum riðilsins lokið og því hægt að birta lokaniðurstöðuna, en síðasta skák riðilsins var tefld s.l. miðvikudag og lauk með sigri Ævars ákasonar (1433) í skák gegn Sighvati Karlssyni (1298).

Lokastaðan í austur:

1. Tómas Veigar Sigurðarson 6,5
2. Sigurður Gunnar Daníelsson 6
3. Smári Sigurðsson 5
4. Hlynur Snær Viðarsson 4
5. Ævar Ákason 2
6. Sighvatur Karlsson 2
7. Heimir Bessason 1,5
8. Guðmundur Hólmgeirsson 1

• Austurskákir
• Síða mótsins
• Austur á Chess-Results

Úrslitakeppnin

Þegar þetta liggur allt fyrir er hægt að birta hverjir koma til með að tefla til úrslita. Úrslitakeppnin fer þannig fram að tefldar verða tvær skákir um endanleg sæti – efstu menn úr hvorum riðli tefla þannig um 1.-2. sætið, næst efstu um 3.-4. o.s.frv..

Þá verður jafnframt keppst um hvort liðið fær fleiri vinninga og er heiðurinn í verðlaun. Úrslitakeppnin fer fram um næstu helgi og verður nánar auglýst fljótlega.

Sjá nánar á Skákhuganum.

Skákþáttur Morgunblaðsins: Guðmundur efstur - ekur frá Ísafirði til að tefla á skákþinginu

Guðmundur Gíslason er efstur að loknum fjórum umferðum á Skákþingi Reykjavíkur og hefur unnið allar skákir sínar. Í 2.-5. sæti koma svo Dagur Ragnarsson, Oliver Aron Jóhannesson, Þorvarður Ólafsson og Dagur Arngrímsson með 3 ½ vinning.

Talsvert hefur verið um óvænt úrslit á skákþinginu sem er vel skipað. Guðmundur lætur sig ekki muna um að aka eða fljúga á milli Ísafjarðar og Reykjavíkur til að tefla skákir sínar og hann vann Sævar Bjarnason á miðvikudagskvöldið og teflir við Dag Arngrímsson í fimmtu umferð. Hann er einnig með á Gestamóti Hugins þar sem 68 skákmenn taka þátt en þar er teflt á fimmtudagskvöldum í Stúkunni á Kópavogsvelli. 

Ivantsjúk efstur í Wijk aan Zee

Fyrsta verkefni heimsmeistarans Magnúsar Carlsen eftir að hann varði titil sinn á dögunum í Sochi við Svartahaf er að tefla á stórmótinu í Wijk aan Zee í Hollandi. Magnús var ekki með í fyrra en í ársbyrjun 2013 vann hann mótið með fáheyrðum yfirburðum, hlaut 10 vinninga af 13 mögulegum og jafnaði besta árangur Garrís Kasparovs frá 1999. Við komuna til Wijk hafði Magnús orð á því að það væri eins og að koma heim til sín; hann tefldi þarna fyrst 13 ára gamall í C-flokki árið 2004 og vann með glæsibrag, hlaut 10 ½ vinninga af 13. Frá 2007 hefur hann teflt í A-flokknum sjö sinnum, deildi sigrinum með Aronjan árið 2008 og vann mótin enn árin 2010 og 2013. Taflmennska hans í fyrstu þrem umferðunum var daufleg en svo hrökk hann í gang, vann heimamanninn Van Wely, sem í umferðinni á undan gerði sig að athlægi sakir ömurlegrar meðhöndlunar gjörunnins endtafls í skák við Pólverjann Wojtaszek sem hefur unnið bæði Carlsen og Caruana. En staða efstu manna er þessi: 1. Ivantsjúk 4 v. (af 5) 2-3. Ding, Wojtazek 3 ½ v. 4. – 7. Carlsen, Giri, So og Caruana 3 v . 

Anish Giri er í dag fremsti skákmaður Hollendinga og hann ætlar sér stóra hluti, vann sigur á Georgíumanninum Jobava á fimmtudaginn:

Wijk aan Zee; 5. umferð:

Anish Giri – Baadur Jobava

Kóngsindversk vörn

1. Rf3 Rf6 2. c4 g6 3. Rc3 Bg7 4. e4 d6 5. d4 O-O 6. Be2 e5 7. O-O Rc6 8. d5 Re7 9. b4

Afbrigði sem dregur nafn sitt af byssusting. Hvítur gengur beint til verks og reynir að ryðjast inn drottningarmegin.

9. ... Rh5 10. He1 Rf4 11. Bf1 f5 12. a4 h6 13. Rd2 g5 14. Ha3 g4 15. a5 h5 16. c5 h4 17. Rc4 Reg6 18. cxd6 cxd6 19. Rb5 Hf6 20. g3 hxg3 21. hxg3 a6 22. Rc3 Rh4!

Georgíumaðurinn er þekktur fyrir mikla hugmyndaauðgi. Það er stórhættulegt að þiggja manninn, t.d. 23. gxh4 Hh6! o.s.frv. eða 23. gxf4 Rf3+! og vinnur.

23. Re2!

Best. Giri lætur skiptamun af hendi fyrir gott spil.

23. ... Rf3+ 24. Hxf3 Rxe2 25. Bxe2 gxf3 26. Bxf3 Bh6 27. Rb6 Hb8 28. Kg2 Bxc1 29. Dxc1 f4 30. Hh1 Hg6 31. Hh5 Df8 32. Dh1 Df6 33. Dh2!?

Hafi þessi rólegi leikur sem bætir stöðu hvíts nánast ekki neitt verið byggður á þeirri vissu að svartur myndi vilja losa um mennina á drottningarvæng gengur hann fullkomlega upp. Jobava átti um 5 mínútur til að ná tímamörkunum við 40. leik.

33. ... Bg4??

Gengur í gildruna.

34. Bxg4 Hxg4 35. Dh3! Dg6

Eða 35. ... f3+ 36. Kh2 Dg7 37. Rd7! og vinnur.

36. Kf3!

– og Jobava sá sína sæng uppreidda og gaf skákina, 36. ... fxg3 37. Dxg4 Dxg4+ 38. Kxg4 gxf2 strandar á 39. Hg5+ og 40. Hf5 sem vinnur..

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 17. janúar 2015.

Skákþættir Morgunblaðsins

[Event "Tata Steel"] [Site "Wijk aan Zee NED"] [Date "2015.01.15"] [EventDate "2015.01.09"] [Round "5"] [Result "1-0"] [White "Anish Giri"] [Black "Baadur Jobava"] [ECO "E97"] [WhiteElo "2784"] [BlackElo "2727"] [PlyCount "71"] 1. Nf3 Nf6 2. c4 g6 3. Nc3 Bg7 4. e4 d6 5. d4 O-O 6. Be2 e5 7. O-O Nc6 8. d5 Ne7 9. b4 Nh5 10. Re1 Nf4 11. Bf1 f5 12. a4 h6 13. Nd2 g5 14. Ra3 g4 15. a5 h5 16. c5 h4 17. Nc4 Neg6 18. cxd6 cxd6 19. Nb5 Rf6 20. g3 hxg3 21. hxg3 a6 22. Nc3 Nh4 23. Ne2 Nf3+ 24. Rxf3 Nxe2+ 25. Bxe2 gxf3 26. Bxf3 Bh6 27. Nb6 Rb8 28. Kg2 Bxc1 29. Qxc1 f4 30. Rh1 Rg6 31. Rh5 Qf8 32. Qh1 Qf6 33. Qh2 Bg4 34. Bxg4 Rxg4 35. Qh3 Qg6 36. Kf3 1-0

Kappteflið um Friðrikskónginn - annað mótið í kvöld

Fyrsta mótið af fjórum í Kappteflinu um Skákkóng Friðriks Ólafssonar var teflt í KR-heimilinu sl. mánudag og lauk með sigri KRISTJÁNS STEFÁNSSONAR.

Segja má að sigur hans hafi komið öllum á óvart nema honum sjálfum, var þó ekki við neina aukvisa að etja. Kristján er reyndar stórmeistarabani eftir að hafa lagt Danielssen á Grænlandi, auk þess að hafa gert jafntefli við Bent Larsen á sinni tíð í fjöltefli á Bárugötunni verandi með unnið tafl.

Þrjú bestu mót hvers keppanda telja til stiga og vinnings.

Gallerý Skák og Skákdeild KR standa saman að mótshaldinu. Mótaröðin heldur áfram í kvöld og taflið hefst kl. 19.30. Telfdar verða 9 umferðir með 10 mínútna umhugsunartíma.

Munið að mæta. Kaffi og kruðerí meðan á tafli stendur.

Nánari úrslit mótsins fyrir viku hér að neðan:

Carlsen efstur eftir fimmtu sigurskákina í röð! - So yfirspilaði Ivanchuk

Magnus Carlsen (2862) vann sína fimmtu skák í röð þegar hann vann öruggan sigur á Hou Yifan (2673) í áttundu umferð Tata Steel-mótins í dag. Carlsen er efsur með 6 vinninga Wesley (2762) er kominn í 2.-4. sæti eftir að hafa yfirspilað Ivanchuk (2715) í dag. Maxime Vachier-Lagrave (2757) og Ding Liren (2732) eru einnig í 2.-4. sæti eftir sigra í dag.

Staða efstu manna:

• 1. Carlsen (2862) 6 v.
• 2.-4. Wesley So (2762), Maxime Vachier-Lagrave (2757) og Ding Liren (2732) 5½ v.
• 5. Ivanchuk (2715) 5
• 6.-7. Radjabov (2731) og Caruana (2828) 4½

Frídagur er á morgun. Níunda umferð fer fram á þriðjudag. 

Í b-flokki eru Íslandsvinirnir Erwin L´Ami (2613) og Wei Yi (2675) langefstir með 6½ vinning.

Góðar útsendingar eru frá skákstað í umsjón Yasser Seirawan.

 

• Heimasíða mótsins
• Beinar útsendingar

Mamedyarov tekur þátt í Reykjavíkurskákmótinu

Einn sterkasti skákmaður heims, Shakhriyar Mamedyarov (2759), tekur þátt í Reykjavíkurskákmótinu sem fram fer 10.-18. mars nk. Mamedyarov sem er frá Aserbaídsjan er nr. 12 í heiminum í dag. Fáir skákmenn í heiminum þykja tefla jafn skemmilega en Aserinn brosmildi. 

Hæst hefur Mamedyimarov farið í fjórða sæti heimslistans er það var árið 2007. Hæst fór hann í 2775 skákstig en það var í ágúst í fyrra.

Mamedyarov er lykilmaður í aserka landsliðinu sem vann sigur á EM landsliða 2007 og 2011. 

Skákþáttur Morgunblaðsins: Guðmundur varð í 2.- 4. sæti í Hastings

Íslandsmeistarinn Guðmundur Kjartansson varð í 2.-4. sæti á áramótaskákmótinu í Hastings sem lauk 6. janúar. Guðmundur var aðeins hársbreidd frá því að ná lokaáfanga að stórmeistaratitli. Hastings-mótið er elsta alþjóðlega mótið og hefur aðeins fallið niður á tímum heimsstyrjaldanna. Það var haldið í fyrsta sinn árið 1895.

Of langt mál færi í að telja upp alla þá meistara sem teflt hafa í Hastings en fyrirkomulag mótsins hefur tekið ýmsum breytingum í tímans rás. Hin síðari ár hefur það farið fram í opnum flokki. Í ár dró það til sín 88 skákmenn og sigurvegari varð Kínverjinn Jun Zhao, hlaut 8 vinninga af níu mögulegum. Í 2.-4. sæti urðu Guðmundur Kjartansson, Pólverjinn Alexander Mista og Alexandr Fier frá Brasilíu, allir með 7 vinninga. Árangur Guðmundar reiknast upp á 2583 elo-stig. Hann var nýkominn úr Suður-Ameríkuferð ásamt Hannesi Hlífari Stefánssyni þar sem þeir tefldu með góðum árangri á nokkrum alþjóðlegum mótum og stigatalan er að taka kipp upp á við og verður hann með í kringum 2500 elo-stig á næsta stigalista.

Greinarhöfundur renndi yfir skákir Guðmundar frá Hastings og þar ber af sigurskák hans í lokaumferð mótsins:

Hastings 2014-2015; 9. umferð:

Mark Hebden – Guðmundur Kjartansson

Slavnesk vörn

1. d4 d5 2. Rf3 Rf6 3. c4 e6 4. Bg5 h6 5. Bxf6 Dxf6 6. Rc3 c6 7. Db3 De7

Athyglisverður leikur og sjaldséður en mælt er með 7. ... a5 með hugmyndinni 8. ... a4.

8. a3 Rd7 9. Hd1 g5!? 10. e4?!

Hvítur bregst hart við en traustara var 10. e3. Hætt er við að kraftar svartreita biskupsins leysist úr læðingi við þennan leik.

11. Be2 g4! 12. Rd2 e5!

Snarplega teflt. Svartur hefur náð að hrifsa til sín frumkvæðið.

13. cxd5 exd4 14. dxc6 bxc6 15. Ra4 Re5 16. O-O O-O 17. Rc4 Be6 18. Dc2 Rxc4 19. Bxc4 Bxc4 20. Dxc4 Dxe4 21. Hd3?

Þó svartur hafi unnið peð hefur hvítur nokkrar bætur og hefði gert best í því að skorða d4-peðið með riddara, 21. Rc5 og – Rd3 við tækifæri var betra.

21. ... Dg6 22. Rc5 Had8 23. Hfd1 Hfe8 24. H3d2 h5!

Svartur getur ekki bætt vígstöðu sína á betri hátt, í peðunum á kóngsvæng leynist dulinn kraftur.

25. He2 h4 26. Dd3 Dxd3

Einnig kom til greina að leika 26. ... Hxe2 27. Dxe2 h3. Guðmundur taldi möguleika sína ekki síðri án drottninganna.

27. Hxe8+ Hxe8 28. Rxd3 He2 29. Kf1 Hc2 30. Ke1?

Þar fór sú von. Hann gat haldið í horfinu með 30. Rb4!

30. ... c5! 31. Hd2 Hxd2 32. Kxd2 c4 33. Rb4 d3 34. Rc6 Bxb2 35. a4 

Hvítur vonast til að leika 36. Ra5 og sækja að c4 peðinu. Í svona stöðum þarf oft einn veikleika til viðbótar.

35. ... h3! 36. g3 a6 37. Re7+ Kf8 38. Rc6 f6 39. Ra5 Bd4 40. Rxc4 Bxf2 41. Re3 Bxe3+!

- og Hebden gafst upp. Framhaldið gæti orðið 42. Kxe3 f5! 43. Kxd3 f4! og svart peð kemst upp borð.

 

Góð þátttaka á Skákþingi Reykjavíkur

Á vel skipuðu Skákþingi Reykjavíkur þar sem 68 skákmenn eru skráðir til leiks hafa nokkrir valinkunnir meistarar unnið skákir sínar í fyrstu tveim umferðunum: Stefán Kristjánsson, Jón Viktor Gunnarsson, Dagur Arngrímsson, Björn Þorfinnsson, Guðmundur Gíslason og nokkrir til viðbótar. 

Á fimmtudaginn hófst svo Gestamót Hugins og Breiðabliks í Stúkunni á Breiðabliksvelli. Keppendalistinn liggur enn ekki fyrir en mótið mun vera vel skipað. Meira um það síðar.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 10. janúar 2015.

Skákþættir Morgunblaðsins

[Event "Hastings Chess Congress"] [Site "Hastings ENG"] [Date "2015.01.04"] [EventDate "2014.12.29"] [Round "9.4"] [Result "0-1"] [White "Mark Hebden"] [Black "Gudmundur Kjartansson"] [ECO "D30"] [WhiteElo "?"] [BlackElo "?"] [PlyCount "82"] 1. d4 d5 2. Nf3 Nf6 3. c4 e6 4. Bg5 h6 5. Bxf6 Qxf6 6. Nc3 c6 7. Qb3 Qe7 8. a3 Nd7 9. Rd1 g5 10. e4 Bg7 11. Be2 g4 12. Nd2 e5 13. cxd5 exd4 14. dxc6 bxc6 15. Na4 Ne5 16. O-O O-O 17. Nc4 Be6 18. Qc2 Nxc4 19. Bxc4 Bxc4 20. Qxc4 Qxe4 21. Rd3 Qg6 22. Nc5 Rad8 23. Rfd1 Rfe8 24. R3d2 h5 25. Re2 h4 26. Qd3 Qxd3 27. Rxe8+ Rxe8 28. Nxd3 Re2 29. Kf1 Rc2 30. Ke1 c5 31. Rd2 Rxd2 32. Kxd2 c4 33. Nb4 d3 34. Nc6 Bxb2 35. a4 h3 36. g3 a6 37. Ne7+ Kf8 38. Nc6 f6 39. Na5 Bd4 40. Nxc4 Bxf2 41. Ne3 Bxe3+ 0-1

Carlsen kemur til baka vann Caruana - Ivanchuk enn efstur - heimsmeistarar mætast

Sjöunda umferð Tata Steel-mótsins hófst kl. 12:30 í Sjávarvík (Wijk aan Zee). Í sjöttu umferð í gær bar það helst til tíðinda að Carlsen (2862) vann Caruana (2820) í uppgjöri tveggja stigahæstu skakmanna heims. Eftir slaka byrjun er Carlsen nú kominn í 2-4. sæti með 4 vinninga eftir 3 sigurskákir í röð. 

Staða efstu manna:

• 1. Ivanchuk (2715) 4½ v.
• 2.-4. Wojtaszek (2744), Carlsen (2862) og Wesley So (2762) 4 v.
• 5.-7. Maxime Vachier-Lagrave (2757), Ding Liren (2732) og Giri (2784) 3½ v.

Í umferð dagsins er uppgjör heimsmeistaranna en Carlsen teflir við Hou Yifan (2673) heimsmeistara kvenna.

Í b-flokki eru Íslandsvinirnir Erwin L´Ami (2613) og Wei Yi (2675) efstir með 4½ vinning.

Góðar útsendingar eru frá skákstað í umsjón Yasser Seirawan.

 

• Heimasíða mótsins
• Beinar útsendingar