Laugardagsæfingar T.R. komnar á fullt

Barna- og unglingaæfingar Taflfélags Reykjavíkur hófust um síðastliðna helgi en á sama tíma fór fram Íslandsmót barna tíu ára og yngri þar sem margir fastagesta æfinganna voru meðal þátttakenda. Laugardagsæfingarnar halda áfram í dag og verður þá kynnt til leiks örlítið breytt fyrirkomulag byrjendaæfinganna sem hafa mælst mjög vel fyrir.  Með breytingunni er vonast til að betur verði komið til móts við ólíkar þarfir krakkanna sem eru komin mislangt á allra fyrstu stigum skáklistarinnar.

Breytingin felst í því að kl. 11-11.40 verður áherslan á þau börn sem eru að stíga sín allra fyrstu skref, þ.e. farið verður yfir mannganginn, virði mannanna og grundvallarreglur skákarinnar.  Kl. 11.45-12.25 verður áherslan síðan á þau börn sem eru komin örlítið lengra, þ.e. farið verður yfir hvernig hentug uppstilling mannanna er í byrjun tafls, hvernig skal máta, hvernig skal nota skákklukku og hvernig framkomu skal sýna við skákborðið.

Skákæfingarnar fara fram alla laugardaga yfir vetrartímann í húsnæði félagsins að Faxafeni 12 (gengið inn að norðanverðu).  Ókeypis er á æfingarnar sem eru opnar öllum börnum (fæddum 2002 og síðar) en félagsmenn fá ítarlegri kennslu sbr. dagskrá hér að neðan.  Ekki þarf að skrá börnin fyrirfram á æfingarnar.  Á vef T.R. er að finna nánari upplýsingar um æfingarnar og fylgja hér að neðan nokkrir tenglar sem gott er að líta á.

 

Dagskrá veturinn 2014-2015

• 11.00-11.40 Byrjendaflokkur  I
• 11.45-12.25 Byrjendaflokkur II
• 12.30-13.45 Skákæfing stúlkna/kvenna
• 14.00-15.15 Skákæfing fyrir börn fædd 2002 og síðar (opnar æfingar)
• 15.15-16.00 Félagsæfing fyrir börn fædd 2002 og síðar

• Laugardagsæfingar T.R.
• Kennsluefni æfinganna
• Dagskrá T.R.
• Skráning í T.R

Tveir stigahæstu skákmenn heims tefla saman í dag - Ivanchuk efstur - Pólverji slær í gegn

Sjötta umferð Tata Steel-mótsins hófst nú kl. 12:30 í Sjávarvík (Wijk aan Zee). Þar mætast tveir stigahæstu skákmenn heims Caruana (2820) og Carlsen (2862) og stýrir Ítalinn hvítu mönnunum. Ivanchuk (2715) hefur farið mikinn og er efstur með 4 vinninga. Mesta athygli hefur hins vegar vakið frammistaða Pólverjans Wojtaszek (2744) sem hefur lagt að velli bæði Carlsen og Caruana. Pólverjinn var meðal aðstoðarmanna Anand í heimsmeistaraeinvíginu gegn Carlsen. 

Staða efstu manna:

• 1. Ivanchuk (2715) 4 v.
• 2.-3. Wojtaszek (2744) og Ding Liren (2732) 3½ v.
• 4.-7. Caruana (2820), Wesley So (2762), Carlsen (2862) og Giri (2784) 3 v.

Pólverjinn mætir Hou Yifan (26739 og Ivanchuk teflir við Krótann Ivan Saric (2666) sem vann b-flokkinn í fyrra.

Í b-flokki eru Íslandsvinirnir Erwin L´Ami (2613), Wei Yi (26759 og David Navara (2769) efstir með 3½ vinning. L´Ami og Navara eru meðal keppenda á næsta Reykjavíkurskákmóti. 

Góðar útsendingar eru frá skákstað í umsjón Yasser Seirawan.

 

• Heimasíða mótsins
• Beinar útsendingar

Nóa Siríus mótið: Fjórir efstir með fullt hús - Unga kynslóðin stelur senunni

Önnur umferð Nóa Síríusmótsins – Gestamóts Hugins og Skákdeildar Breiðabliks var tefld í gær, fimmtudag.

Talsvert var af óvæntum úrslitum í umferðinni og ber þar hæst sigur Dags Ragnarssonar (2059) í viðureign við WGM Lenku Ptácníková (2270) og sigur Hrafns Loftssonar (2165) gegn IM Björgvin Jónssyni (2353)

Fjórir eru nú efstir með fullt hús: GM Þröstur Þórhallson (2433), IM Jón Viktor Gunnarsson(2433), Hrafn Loftsson (2165) og Dagur Ragnarsson (2059).

Guðmundur Stefán Gíslason (2315) ogÖgmundur Kristinsson (2062) eiga inni frestaða skák og geta bæst við hóp efstu manna.

En það voru liðsmenn ungu kynslóðarinnar sem stal senunni í umferðinni því fjölmargir úr þeirra hópi náðu hagstæðum úrslitum sem kannski mætti lýsa sem óvæntum:

Dagur Ragnarsson (2059) – Lenka Ptácníková (2270) 1 – 0
IM Karl Þorsteinsson (2456) – Óliver Aron Jóhannesson (2170) 1/2 – 1/2
Sverrir Örn Björnsson (2117) – Gauti Páll Jónsson (1871) 1/2 – 1/
Örn Leó Jóhannsson (2048) – Halldór Grétar Einarsson (2187) 1/2 – 1/2
Magnús Teitsson (2205) – Dagur Andri Friðgeirsson (1849) 1/2 – 1/2

Pörun 3. umferðar verður birt á laugardaginn, 17. janúar, kl. 17!

• Heimasíða Hugins
• Chess-Results
• Myndaalbúm (GB)

Jón Arnljótsson atskákmeistari Skákfélags Sauðárkróks

Átta skákmenn skráðu sig til leiks í atskákmeistaramót Skákfélags Sauðárkróks 2015. Mótið varð því 7 umferðir og fór fyrri hlutinn fram þann 7. janúar (umf. 1-3), en síðari hlutinn fór fram í gær, þann 14. janúar (umf. 4-7). Sigurganga Jóns Arnljótssonar virtist óstöðvandi og var hann búinn að leggja alla sína andstæðinga fyrir lokaumferðina, en þá tefldi hann við Þór Hjaltalín.

Eftir æsispennandi endatafl og tímahrak ákváðu þeir að skipta með sér jöfnum hlut og endaði Jón með 6½ vinning. Birkir Már Magnússon tefldi af miklu öryggi og tapaði aðeins fyrir Jóni og náði öðru sæti með 6 vinninga. Þór Hjaltalín varð svo þriðji með 5½ vinning. Það setti nokkurt strik í reikninginn að tveir skákmenn forfölluðust í síðari hlutanum. Næstu tveir miðvikudagar verða hefðbundnir æfingadagar þar sem tefldar verða 15.mín. skákir.

Nýtt Fréttabréf SÍ

Nýtt Fréttabréf SÍ kom út í fyrradag. Meðal efnis í Fréttabréfinu er:

• Ingvar þór og Einar Hjalti landsliðsþjálfarar
• Óskar Víkingur Íslandsmeistari barna
• Guðmundur hársbreidd frá stórmeistaraáfanga - tvisvar!
• Héðinn sigurvegari Friðriksmóts Landsbankans
• Héðinn Íslandsmeistari í atskák
• Davíð Kjartansson Íslandsmeistari í netskák
• Skákdagurinn nálgast
• Mjög vel heppnað FIDE-þjálfara námskeið
• Magnús Pálmi sigraði á Vetrarmóti öðlinga
• Það teflt um land allt á alls konar mótum!
• Reykjavíkurskákmótið 2015 - Nýjustu skráningar
• Mót á döfinni

Fréttabréfið má nálgast hér.

Hægt er að skrá sig fyrir Fréttabréfinu sem kemur að jafnaði út tvisvar á mánuði yfir vetrarmánuðina ofarlega á vinstri hluta Skák.is.

Eldri fréttabréf má nálgast hér.

Guðmundur Gíslason efstur á Skákþingi Reykjavíkur

FIDE-meistarinn Guðmundur Gíslason (2315) er einn efstur með fullt hús að lokinni fjórðu umferð Skákþings Reykjavíkur sem fram fór í kvöld. Guðmundur hafði betur gegn Sævari Bjarnasyni (2114). Ekki var jafn mikið um óvænt úrslit og í þriðju umferð þó þau væru til staðar. Ólafur Gísli Jónsson (1871) gerði jafntefli við Björn Þorfinnsson (2373) þrátt fyrir 500 skákstigamun.

Meðal annarra óvæntra úrslit má nefna að Aron Þór Mai (1262) vann John Ontiveros (1810) þrátt fyrir mikinn stigamun, Hallgerður Helga Þorsteinsdóttir gerði jafntefli við Omar Salama (2282) og Stefán Bergsson (2085) gerði sér lítið fyrir og lagði Kristján Örn Elíasson (1831) að velli.

Fjórir skákmenn hafa 3½ vinning en það eru Dagur Ragnarsson (2059), Oliver Aron Jóhannesson (2170), Þorvarður F. Ólafsson (2245) og Dagur Arngrímsson (2368). 

Stöðuna má finna á Chess-Results. 

Fimmta umferð fer fram á sunnudaginn. Þá mætast meðal annars Dagur Arngrímsson og Guðmundur, Þorvarður og Dagur Ragnarsson og Johann Ingvason og Oliver. 

• Heimasíða TR
• Chess-Results

Ingvar Þór og Einar Hjalti landsliðsþjálfarar á EM landsliða

Ingvar Þór Jóhannesson og Einar Hjalti Jensson hafa verið ráðnir landsliðsþjálfarar íslensku landsliðsanna á Evrópumóti landsliða sem fram fer í Laugardalshöll 13.-22. nóvember nk. Ingvar Þór verður landsliðseinvaldur a-liðsins í opnum flokki en Einar Hjalti verður landsliðseinvaldur kvennaliðsins. Guðlaug Þorsteinsdóttir verður Einari Hjalta til aðstoðar og honum innan handar.

SÍ býður þau velkomin til starfa!

Kosið um bréfskák ársins 2014

Nú stendur yfir val á bréfskák ársins í fjórða sinn. Valið stendur á milli tíu skáka sem lauk 2014. Fimm efstu skákirnar komast í úrslit keppninnar. 

Kosningunni, sem fer fram á Skákhorninu lýkur á sunnudagskvöld. 

Það eru margar meistaralega tefldar skákir í bréfskákinni, en yfirleitt vekja þær litla og jafnvel enga athygli hjá öðrum en þeim sem tefla þær. Þetta er því kjörið tækifæri til að kynna sér taflmennskuna hjá íslenskum bréfskákmönnum um þessar mundir. 

Árangur íslenskra bréfskákmanna var prýðilegur á síðasta ári og enn fjölgar í hópi bréfskákmanna og stigin fara hækkandi. Íslenska landsliðið keppir nú í úrslitum Evrópumótsins og hefur sýnt að það á fullt erindi þangað. Daði Örn Jónsson keppir í úrslitum Evrópumóts einstaklinga og nú þegar dregur að lokum mótsins er hann í baráttu um sigur á mótinu. Þá tryggði Eggert Ísólfsson sér nýlega áfanga að alþjóðlegum meistaratitli. Þrjár landskeppnir eru í gangi, gegn Ástralíu, Skotlandi og Bandaríkjunum og er íslenska liðið með góða forystu í þeim öllum. Góður árangur náðist einnig í fjölda annarra móta. 

Það er því óhætt að segja að síðasta ár hafi verið líflegt í bréfskákinni eins og skákirnar í keppninni um bréfskák ársins 2014 bera með sér. 

Kosning um bréfskák ársins 2014.Velja má allt að fimm skákir.

Björgvin og Ingimar efstir í Stangarhyl

Í gær tefldu Æsir sinn fyrsta hefðbundna skákdag á þessu nýja ári. Það var vel mætt eins og venjulega, þrjá tíu og tveir tefldu. Það var ánægjulegt að sjá ný andlit ganga í salinn og við bjóðum alla nýja skákfélaga hjartanlega velkomna.

Nú líður að skákviku okkar Íslendinga það er síðasta vikan í janúar þegar Friðrik Ólafsson  okkar fyrsti stórmeistari á afmæli, hann verður 80 ára 26 janúar. Við teflum honum til heiðurs alla þá viku.

Toyotaskákmót eldri borgara verður haldið föstudaginn 30 janúar. Þá bíður Toyota á Íslandi okkur til skákveislu í sýningarsal sínum. Þetta verður áttunda Toyotaskákmótið  og Toyota gefur öll verðlaun.

Í gær voru þeir Björgvin Víglundsson og Ingimar Halldórsson sterkastir. Þeir skildu að lokum jafnir með 8½ vinning.

Fast á eftir þeim kom svo Guðfinnur R Kjartansson með 7½ vinning. 

Sjá nánari úrslit í töflu og myndir frá ESE.

 

 

 

 

Ivanchuk byrjar með látum í Sjávarvík

Úkraínumaðurinn óútreiknanlegi Vassily Ivanchuk (2715) byrjar best allra á Tata Steel-mótinu í Sjávarvík (Wijk aan Zee). Eftir fjórar umferðir hefur Ivanchuk 3,5 vinning og hefur hálfs vinnings forskot á Caruana (2820) og Ding Liren (2732). Carlsen (2862) hefur 50% vinningshlutfall en hann tapaði óvænt fyrir Wojtaszek (2744) í gær. 

Frídagur er á morgun.

• Heimasíða mótsins
• Beinar útsendingar