Hraðskákkeppni taflfélaga: Nýliðar mætast í kvöld

Þrjár viðureignir fóru fram í Hraðskákkeppni taflfélaga í gærkveldi eins og áður hefur komið fram á Skák.is. Huginn, Bolvíkingar og Fjölnismenn komust þá áfram. Reyknesingar höfðu áður tryggt sér keppnisrétt í átta liða úrslitum. Í kvöld heldur áfram því þá eru tvær viðureignir. Í annarri þeirri tefla unglingasveit TR og UMSB en bæði lið eru að hefja frumraun sína í keppninni. Hins vegar mætast svo Vinaskákfélagið og Skákdeild Hauka.

Það verður fróðlegt að fylgjast með unglingasveit TR sem hefur innanborðs marga sterka hraðskákmenn og Borgnesinga sem hafa verið að sanka að sér nýjum félagsmönnum síðustu daga. Gæti orðið mjög spennandi viðureign. Viðureignin fer fram Skákhöll TR og hefst kl. 19:30.

Hin viðureignin er á milli Vinaskákfélagsins og Skákdeildar Hauka. Þær mætast tvö sterk annarrar deildar félög og þar má jafnframt búast við jafnri og spennandi viðureign. Viðureignin fer fram í Vin og hefst kl. 19:30.

Fyrstu umferð lýkur svo 21. ágúst.

Áhorfendur eru velkomnir á báða mótsstaði.

Röðun/úrslit fyrstu umferðar

• Taflfélag Bolungavíkur - Skákdeild Hugins b-sveit 39½-38½
• Skákdeild Hauka - Vinaskákfélagið (19. ágúst kl. 19:30 í Vin)
• Skakfélags Selfoss og nágrennis - Taflfélag Reykjavíkur (21. ágúst, kl. 20 í Fischersetrinu)
• UMSB - Taflfélag Reykjavíkur unglingasveit (19. ágúst, kl. 19:30 í TR)
• Taflfélag Vestmannaeyja - Skákfélagið Huginn a-sveit 16½-55½
• Taflfélag Garðabæjar - Skákdeild Fjölnis 18-56
• Skákfélag Íslands - Víkingaklúbburin (21. ágúst, kl. 20 í SÍ)
• Skákfélag Akureyrar - Skákfélag Reykjanesbæjar 33-39

Bolvíkingar sigruðu Hugin-b eftir bráðabana!

Í gærkvöld fóru fram tvær toppviðureignir í Hraðskákkeppni taflfélaga.  Annars vegar mættust lið Taflfélags Bolungarvíkur og b-sveit Hugins í hörkuspennandi slag.

Flestum á óvart höfðu Huginsmenn lengst af forystu, þótt stigalægri væru, en Bolvíkingar náðu að saxa á forskotið í lokin og jöfnuðu metin í síðustu umferð: 36-36.

Grípa þurfti til bráðabana og þar tryggði TB sér sigurinn með minnsta mun: 3,5-2,5. Flesta vinninga Bolvíkinga fengu Bragi Þorfinnsson, Jón Viktor Gunnarsson og Dagur Arngrímsson en hlutskarpastir Huginsmanna voru Kristján Eðvarðsson, Andri Áss Grétarsson og Hlíðar Þór Hreinsson.

Í hinni viðureign kvöldsins bar a-sveit Hugins sigurorð af Taflfélagi Vestmannaeyja með allmiklum mun. Þess ber að geta að í sveit Eyjamanna vantaði báða stórmeistarana, þá Helga Ólafsson og Henrik Danielsen, og munar um minna. Huginn náði hins vegar að tefla fram sínu sterkasta liði og var styrkleikamunurinn á liðunum, mældur í skákstigum, um 200 elóstig að meðaltali. Flesta vinninga Huginsmanna hlaut Hjörvar Steinn Grétarsson, fullt hús, en Helgi Áss Grétarsson, Þröstur Þórhallsson og Magnús Örn Úlfarsson komu þar skammt á eftir.

Hlutskarpastir Eyjamanna voru Ingvar Þór Jóhannesson, Sigurbjörn Björnsson og Björn Ívar Karlsson.

Hraðskákkvöld þetta fór hið besta fram. Vel fór á með keppendum og stutt var í gamanmálin þó svo að hart væri tekist á og jafnvel grimmilega á köflum.

Áhorfendur virtust skemmta sér vel enda spennan magnþrungin á köflum. Höfðu nokkrir á orði að tilþrif eflanda og baráttuvilji gæfu góð fyrirheit um komandi leiktíð á hvítum reitum og svörtum.

Kristjáni Eðvarðssyni og öðrum starfsmönnum Sensu er þakkað kærlega fyrir afnot að hinum vistlegu húsakynnum félagsins.

Á heimasíðu TB er skemmtileg umfjöllun um keppnina.

Úrslitin má nálgast á Chess-Results (þar er þó ekki bráðabaninn)

• Huginn - TV 
• TB - Huginn-b

Ólympíuskákmótið 2014 - Uppgjör liðsstjóra kvennaliðs

Áður hafði ég ritað pistla um fyrstu umferðirnar og mótsstaðinn auk þess sem ritaður var pistill þegar mótið var hálfnað. Mun reyna að skrifa um það sem gerðist hjá okkur seinni part móts ásamt því að gera aðeins upp árangurinn og annað.

Árangur í "seinni hálfleik"

Fyrstu sex umferðirnar hafði kvennasveitin meira og minna unnið þær sveitir sem þær átti að vinna en fylgt því svo eftir með því að tapa 3,5-0,5 gegn þeim sterkari. Nokkur styrkleikamunur var í þeim viðureignum en engu að síður voru töpin og stór og sérstaklega gegn Venezuela sem virðst hafa eitthvað tak á okkar sveit.

Sigurinn á Bangladesh var þó góður þar sem sú sveit var örlítið stigahærri en okkar. Í 7. umferð unnum við annan góðan sigur á svipaðri sveit þar sem Mexíkó lá í valnum 2,5-1,5 þó að við höfum snemma lent 0-1 undir í þeirri viðureign.

Áframhald varð á jójó-inu og enn töpuðum við 3,5-0,5 og nú gegn nokkuð þéttri tékkneskri sveit. Fyrir þetta tap var kvittað strax í næstu umferð með mjög góðum 4-0 sigri á sveit IBCA (fatlaðir) sem þó voru aðeins örlítið stigalægri en okkar sveit.

Tapið gegn El Salvador voru nokkur vonbrigði í 10. umferðinni en þar tapaðist viðureignin með minnsta mun en fyrirfram hélt ég að við ættum að hafa þar sigur.

Mótið kláruðum við þó á góðum nótum með 3,5-0,5 sigri gegn Jamaíku en þar náðu ansi margar stöður að snúast okkur í hag því snemma stefndi ekki í svo góðan sigur!

Í seinni hálfleik hjá karlaliðinu vannst fínn skyldusigur á Pakistan 3,5-0,5 og því var fylgt eftir með þéttum sigri á nokkuð reyndri skoskri sveit 3-1.  Í kjölfarið komu tvö jafntefli gegn Katar og Tyrklandi sem voru fín úrslit þó sóknarfæri hefði e.t.v. mátt reyna að finna gegn Katar.

Þessi fíni endasprettur þýddi að mikið sóknarfæri var í síðustu umferð gegn Egyptum þar sem möguleiki var að ná besta sæti sveitarinnar í mjög langan tíma. Því miður hittum við ekki áð góðan dag og úr varð gott mót í stað frábærs móts.

Ég mun fara yfir einstaklingsárangur í niðurlagi þessa pistils.

 

Kasparov-partýið

 

FIDE kosningarnar voru á mánudaginn 11. ágúst en laugardaginn 9. ágúst hélt Kasparov smá teiti þar sem meðal annars Nigel Short spilaði á gítar, Elisabeth Paetz tók lagið með honum og magnaður töframaður frá Indlandi lék listir sínar. Ýmis hamagangur var einnig á sviðinu eins og sjá má hér:

 

Þeir sem hamast þarna á sviðinu voru þeir sem dregnir voru í happdrætti aðgangsmiða en gefnir voru heilir þrettán (auðvitað 13!!) Samsung Tablets. Gummi var með miða nr. "H 13" og sturlaðist þegar lesið var "H thirtee.........TWO"

 Myndir úr partýinu:

 

Töframaðurinn að störfum, hann var frábær...að neðan er stutt myndbrot þar sem hann hafði verið bundinn af fjórum sjálfboðaliðum. Það varði ekki lengi!

 

 

 

 

 

 

 

 

 

 

 

 

 

 

 

Flott hljómsveit spilaði áður en partýið byrjaði og að því loknu fyrir dansi. 

 

Áður en heim var haldið hittum við mann frá Gabon sem afhenti okkur A4-blað með hans sögu. Hann var réttmætur fulltrúi Gabon og til þess valinn af "Ministry of Sport" í sínu heimalandi og fleira. FIDE (lesist Kirsan) hinsvegar hunsaði það bara og fulltrúinn á FIDE þinginu einhver allt annar.

 

Þarna var mér endanlega ljóst að kosningarnar voru skíttapaðar eins og allir höfðu talað um. 

 

Expo-salurinn

 

Skákstaðurinn sjálfur var að mörgu leiti frekar snautlegur. Reyndar hafði ég ekki aðgang að VIP aðstöðu og e.t.v. hefur Gunnar Björnsson aðra sögu að segja :-)

 

Allavega, skáksalurinn var vel skipulagður en vantaði bæði betri aðstöðu fyrir áhorfendur á neðri borðin og fleira sem ég e.t.v. fer betur yfir á eftir.

 

Ég saknaði þess að sjá enga bóksölu og eins var í raun ekkert afdrep þar sem hægt var að setjast niður en kannski var það erfitt í ljósi "vopnaleitarinnar" við aðalinnganginn.

 

Ég leit þó stundum inn í hið svokallaða Expo herbergi en þar var bein útsending hjá Chessbase, hægt var að kaupa sér hressingu og svo var mikið um kosningabása.

 

 

 

 Hér má sjá Azmaiparashvili í forsvari fyrir bás Batumi borgar en sú borg vann réttinn að halda  Ólympíuskákmótið árið 2018.

 

 

 

 Básinn hans Kirsan. Þær voru vel þjálfaðar þarna og stilltu sér upp og brostu skvísurnar hans. Bæði Kasparov og Kirsan gáfu öllum keppendum veglegar gjafir eins og áður hefur komið fram, kosningabaráttan var hörð!

 

Kosningarnar

 

Gunnar sat FIDE og ECU þingin og veit því manna best gang mála í kosningunum. Ég visa á pistil hans. Kirsan vann að sjálfsögðu enda kosningavél hans vel smurð og stefnan var sett á fullnaðarsigur. 110 atkvæði gegn 61 var niðurstaðan eins og áður hefur komið fram.

 

Ljóst er að við sitjum upp með þennan Kirsan fýr svo lengi sem honum sýnist. Auðvitað má hann eiga það að hann er ágætis diplómat og kann allskonar trikk. Staðreyndin er hinsvegar sú að hann situr áfram og nú er bara að vinna með honum.

 

Ég tek það fram að það er mín persónulega skoðun að hafa mun fremur viljað Kasparov við stjórnvölinn. Hinsvegar fann ég það að mikill meirihluti keppenda var sammála mér. Flestir sem ég ræddi við voru mjög ósáttir við að Kirsan skildi vinna og eins og ég hef áður sagt þá fengu allir T-boli frá báðum aðilum og bolir Kasparovs voru mun meira áberandi á skákstað, í Tromsö og meira að segja nú eftir mót þegar ég rita þetta (tefldi við mann í slíkum bol í gærkveldi og sá annan erlendan á Facebook í sínum!)  

 

 En eins og ég sagði, kosningunum lokið og það sem meira er nánast allir sem Kirsan vildi koma að komust að og auk þess vann Zurab ECU þannig að segja má að fullnaðarsigur hafi unnist hjá Kirsan & co.

 

 

Kasparov hér nýbúinn að tapa kosningum. Væntanlega ekki sáttur

 

 

 

Kasparov var vel merktur út um allt en það dugði einfaldlega ekki til :-( 

 

 

Fótboltinn 

 

Fótboltinn hélt áfram og var mikið spilaður. Aðeins fjaraði undan allra síðustu dagana en í heildina höfum við örugglega farið í fótbolta í 6-8 skipti svei mér þá!

Boltinn var misskemmtilegur. Mjög gaman var þegar jöfn og vel spilandi lið voru á ferðinni en auðvitað er allur gangur á því og sumir blessunarlega mjööööög góðir í skák því hreyfigeta þeirra ekki beint á háu stigi!

 

Hef áður nefnt ýmis nöfn sem tóku þátt en tek bara hérna smá lista til að hafa gaman af: Magnus Carlsen, GM's Borki Predojevic, Alexander Ipatov, Maze, Vachier-Lagrave, Libisewski, Fressinet, Tkachiev, Wesley So, Shulman, Akobian, Julio Granda, Helgi Olafsson og svo mætti lengi telja. 

 

Skemmtileg stemmning var eitt kvöldið þegar Varuzhan Akobian fór hamförum þrátt fyrir getulegar og hæðarlegar hömlur. Í hvert skipti sem hann var nálægt því að skora var hrópaðan á pöllunum "Akooobbbbbiaaaaan" og veðraðist hann allur upp og setti nokkur þrátt fyrir að ekki hafi verið mikil innistæða fyrir því ;-)

 

Virkilega gaman að þessu og bæði var nauðsynlegt fyrir menn að hreyfa sig aðeins og eins var þetta vettvangur til að kynnast ýmsum keppendum betur. 

 

 

Seinni frídagur

 

 

 Veðrið hafði leikið við okkur flest alla dagana en því miður gerði það það engan veginn þegar við héldum upp á fjall þarna í Tromsö og góðan göngutúr. Gengið var yfir forláta brú og þar með af eyjunni. Straumsey (Tromsö) er jú eyja! Hér er pistlahöfundur með Kirsan húfuna en hún var notuð í neyðartilviki þar sem ótækt var að láta rigna á skallann í kuldanum.

 

 

Á miðri leið yfir brúnna að kláfinum. 

 

 

Kvennaliðið vopnaðar regnhlífum á leið að kláfinum.

 

Á leiðinni upp. 

 

 

 

Því miður var útsýnið uppi ekki upp á marga fiska. Þessi mynd ætti í raun að sýna útsýni yfir sjóinn og Straumsey en eins og sjá má var skyggni ekkert!

 

 

 

Við misstum af fyrstu ferð til baka niður og þá var lítið annað að gera en að fá sér gómsætt í gogginn og taka nokkrar léttar tvískákir!

 

 

 

Dauðsföllin

 

Ég hef svosem engan sérstakan áhuga á að fjalla um dauðsföll en því miður var mikið fjallað um það í fjölmiðlum. Við höfðum á orði þarna úti þegar seinna dauðsfallið varð: "nú....verður þá önnur frétt á ______ (ákveðinn fréttamiðill) um Ólympíuskákmótið??"

 

Það er eiginlega skömm að því hvað fréttamiðlar (ekki bara hérlendis) vilja miklu frekar lepja upp svona leiðindafréttir heldur en að fjalla um mótið sem slíkt. Ég fór t.a.m. á twitter og fletti upp hashtaginu #olympiad og var nánast 90% af færslum á þessa vegu  "two people die...."

 

Ég varð því miður vitni að þessum atburði. Borð okkar var tiltölulega nálægt og heyri ég óp um hjálp á borði rétt hjá okkur. Ég geng að því til að sjá hvað er í gangi (ég kann grundvallaratriði í skyndihjálp) og sá þá að eldri maður hafði hnigið niður og var mjög liklega að fá hjartaáfall.

 

Sjúkraliðar komu nokkuð fljótlega á staðinn eftir að hrópað hafði verið á þá.

 

 

 

 Fyrr í mótinu hafði ég einmitt tekið eftir þessum sjúkraliðum en í raun ekki spáð í hversu mikilvægir þeir væru í svo stóru móti.

 

Erfitt var fyrir marga að klára sínar skákir og fannst mér skákstjórum liggja full mikið á að hefja tafl aftur. Byrjað var að tefla aftur meðan lífgunartilraunir stóðu yfir og reglulega heyrðist tíst í hjartastuðtæki. Leiðinlegur endir á annars mjög góðu móti.

 

 

 

Skáksalurinn

 

Hef svosem áður talað um skáksalinn en af því litla sem setja mætti út á í þessu móti að mínu mati þá var það tvímælalaust skákstaðurinn. Eins og ég sagði var aðstaða fyrir áhorfendur nánast engin og ein mamma sem átti stelpu sem var að tefla í Noregi 3 varð frá að hverfa þar sem hún komst ekki inn á svæðið þar sem liðið var. Í raun var aðeins hægt að fylgjast með toppborðunum með fáum undantekningum. 

 

Margir kvörtuðu undan þungu lofti á efstu borðunum. Loftræsting var engin í salnum og því þurfti að opna stórar dyr en þá kom á móti að þeir sem tefldu þar var á meðan skítkalt! Yfirleitt vildi þannig til að Afríkuþjóðir tefldu þar.

 

 

Tapað/Fundið

 

Fyrir eina af síðustu umferðunum tilkynnt skákstjóri að farsími hefði fundist í skáksalnum. Eiganda hans var velkomið að nálgast hann hjá skákstjóra. Ekki er vitað hvort símans var vitjað ;-)

 

Ljóst er að einhver hefur komist framhjá öryggisleitinni með síma en svosem gætu verið ýmsar ástæður fyrir veru símans. Um gæti verið að ræða starfsmenn eða einhverja VIP's en svo er alls ekki útilokað að einhverjir keppendur hafi ætlað sér að nota smá aðstoð frá vélrænum vinum sínum ;-)

 

 

Árangur einstakra keppenda 

 

Renni aðeins yfir karlaliðið eins og það stóð sig frá mínum bæjardyrum séð áður en ég fer yfir í kvennaliðið.

 

1. borð Hannes Hlífar

 

Hannes var mjög traustur og mátti sjá glitta í gamla "Nesa" á köflum. Tapaði ekki skák fyrr en í síðustu umferð þar sem hann líkt og flestir náðu sér ekki á strik. Framan af því var hann mjög traustur og vann góða sigra og hélt góðum jafnteflum. Hannes vinnur sér inn 12 elóstig

 

 2. borð Hjörvar Steinn

 

Það er engin tilviljun að Hjörvar er kominn með 2543 skákstig og virðist bara á leiðinni upp. Hjörvar var eini íslenski keppandinn sem tapaði ekki skák. Í raun hefur hann lítið verið í því undanfarið og þarf líklega að fara aftur í meistara Rúnar Sigurpálsson í Íslandsmóti Skákfélaga til að finna tap hjá kappanum! Hann fór taplaus í gegnum mót í Andorra og svona til gamans hreinsaði hann 12/12 í hraðskákkeppni taflfélaga (var samt með'ann í síðustu :-( )  Hjörvar hækkar um 5 stig fyrir frammistöðuna. 

 

 

3. borð Guðmundur Kjartansson

 

Það geta ekki allir átt gott mót og að þessu sinni náði Gummi sér ekki á strik. Gummi teygir sig stundum of langt sem er kostur og galli. Vel má vera að hann þurfi að finna meira jafnvægi fyrir liðakeppnir. Bæði að vera meira solid með hvítu og eins varðandi rútínu. Gummi er manna duglegastur að vinna í sínum málum og ég veit að eftir þessa reynslu er hann bara ákveðnari að koma sterkur til baka og vinna sig inn í liði fyrir Baku 2016! Spakur liðsstjóri karlaliðsins benti einnig á að margir hefðu ekki byrjað vel á sínu fyrsta ÓL!

 

4. borð Þröstur Þórhallsson 

 

Lengi hefur verið talað um hversu góður liðsmaður Þröstur er. Hann sýndi það og sannaði í verki enn eina ferðina. Þröstur hækkaði um 11 stig í mótinu og var manna duglegastur að stúdera og peppa aðra upp. Þröstur átti t.a.m. mjög sterkt jafntefli gegn Ipatov með svörtu sem var mjög mikilvægt og hleypti kappi í liðið í erfiðri viðureign undir lokin. Í lok móts var bæði keppendum, liðsstjórum og öðrum tíðrætt um hversu góður mórall hefði verið í ferðinni og hjá liðunum og algjörlega morgunljóst að það skiptir miklu máli í svona keppnum.

 

5. borð Helgi Ólafsson

 

Helgi var að mörgu leiti óheppinn í þessari ferð og fannst mér hann tefla betur en töpuð stig gefa til kynna. Klaufalegt tap í síðustu umferð sat í Helga enda var það algjör óþarfi og var hann taplaus fram að því. Herslumuninn vantaði í nokkrum jafnteflum en andstæðingur hans varðist vasklega í einni skák peði undir og gegn Skotlandi var Helgi skynsamur og reyndi að tefla til vinnings eins og hægt var innan ramma þess að vera að keppa í liðakeppni. Helgi hefði getað tekið áhættur en hefði þá verið að bjóða upp á möguleika á tapi og kaus skynsamlega að gera það ekki.

Helga varð á orði við upphafi móts við liðsstjóra Dana (Lars Schandorff) þegar hann var spurður hvort hann væri að tefla: "I can still play some chess you know!"

 

Forsendur þessarar setningar hafa ekkert breyst og vonandi heldur Helgi ótrauður áfram að gefa kost á sér enda einn fremsti skákmaður okkar frá upphafi eins og hann hefur margoft sýnt. 

 

 

Ég færi mig þá yfir í kvennaliðið sem ég stýrði.

 

1. borð Lenka Ptacnikova

 

Lenka fór sem fyrr fyrir kvennaliðinu og ótrúlega sterkt að hafa hana alltaf á efsta borði. Að þessu sinni var e.t.v. árangurinn síðri heldur en undanfarin Ólympíumót en Lenka er alltaf "solid" eins og við segjum. Hún hefur átt gott ár og m.a. annars tók hún IM-norm á Reykjavíkurskákmótinu og vann sér rétt til að tefla í Landsliðsflokki að ári.

 

Lítið er í raun hægt að setja út á mótið hjá Lenku. Það er helst að Sarai Sanchez ásamt Venezuela virðist hafa eitthvað tak á Lenku og liðinu okkar en við töpuðum of stórt fyrir þeim aftur 3,5-0,5. Aö öðru leiti voru margar baráttuskákir sem gátu fallið öðruvísi og t.a.m. var grátlegt að fara úr betri stöðu í jafntefli og svo í tap gegn Ísrael. Lenka lenti einnig í því í miðju móti að strákurinn hennar þurfti að fara á spítala og er ég heilt yfir mjög ánægður með Lenku þrátt fyrir að hún tapi 8 stigum í mótinu.

 

Einnig gladdi hún liðsstjóra með því að nota hugmyndir úr undirbúningi fyrir mót í einni stuttri og snarpri skák, sjá neðst í pistli!

 

2. borð Hallgerður Helga

 

 

Hallgerður stóð sig frábærlega á þessu móti og sýndi að hún á að vera mun stigahærri. Hún var eini íslenski keppandinn sem tefldi allar skákirnar og sýndi engin þreytumerki. Ef einhver ætti að gera það væri það Hallgerður þar sem hún á það til að tefla langar skákir ;-)

 

Hallgerður tapaði aðeins tveim skákum gegn sterkum og stigaháum skákkonum en að öðru leiti gaf hún engin færi á sér og hækkar um heil 25 skákstig fyrir framimstöðuna! Hún er þá komin yfir 2000 elóstig þar sem hún á heima.

 

Hallgerður er með eitt traustasta byrjanakerfið af öllum liðsmönnum og þarf bara að vinna í því að viðhalda því og bæta við sig vopnum. Hún er komin með mikla keppnisreynslu og orðin góð í endatöflum enda leita skákirnar oft þangað. Hallgerður þarf að bæta eilítið við sig í taktík til að taka framfarastökk og hækka sig enn meira á stigum en ég tel fyllilega innistæðu fyrir því.

 

3. borð Tinna Kristín

 

Tinna átti nokkuð traust mót á 3. borði og meira og minna vann þær skákir sem til hefði verið ætlast fyrirfram og eins nokkrar sem fyrirfram hefðu átt að vera 50-50 skákir.  Töpin voru öll gegn skákkonum með 2200 stig eða meira og aðeins slysalegur afleikur á móti El Salvador sem hefði mátt ætlast til að færi betur.

 

Tinna getur verið sterk í taktíkinni á köflum og kom liðsstjóra t.a.m. vel á óvart með nokkrum lævísum gildrum þegar farið var yfir skákir eftir umferð. Tinna þarf að styrkja sig í ákveðnum stöðutýpum eða "pósanum" og þá tekur hún líka gott stigastökk.

 

4. borð Jóhanna Björg 

 

Líkt og hjá karlaliðinu náðu sér ekki allir á strik og að þessu sinni var Jóhanna undir getu. Það býr mikið í Jóhönnu og hefur hún margsannað það með góðum úrslitum  Hún lenti í slæmum kafla um miðbik móts en að hluta til höfðu utanaðkomandi hlutir þar einhver áhrif á.

 

Jóhanna hefur á köflum fínt stöðumat og er góð í taktíkinni en hefur glímt við sama vandamál og margir sterkir íslenskir skákmenn hafa oft þurft að glíma við, fljótfærni.

 

Ég geri orð KÖE í kommentakerfi skak.is að mínum: 

  

Það hefur vakið athygli hér heima að sumar stelpurnar okkar hafa verið að klára skákirnar sínar (tapað) með klukkutíma eftir á skáklukkunni (hafa leikið nær viðstöðulaust). Hvet þær til að nýta tímann betur, tefla í botn og hafa gaman af þessu!

 

Jóhanna sýndi engu að síður karakter og kláraði vel með tveimur sigrum í lokin og sleppur því vel stigalega frá mótinu. 

 

5. borð Elsa María

 

Elsa María komst einnig fínt frá mótinu stigalega og hækkar um nokkur stig. Elsa átti sterkt jafntefli gegn Ísrael og vann einnig skákir sem voru mikilvægar í að landa sigri í nokkrum viðureignum eins og t.d. gegn Mexíkó.  Á milli voru tapskákir þar sem Elsa sá ekki til sólar og því mjög sveiflukennt mót hjá Elsu.

 

Elsa getur teflt mjög vel ef hún fær einfaldlega skákstöður. Hún brást hinsvegar illa við óvæntum leikjum í byrjunum þó lítil ástæða hafi verið til. Ég verð að hluta til að taka á mig sökina þar!

 

 

 

Lokaorð

 

Heilt yfir geta bæði liðið verið sátt. Kvennaliðið endaði níu sætum ofar en upphafssætið og kláruðum við í 55. sæti.

 

 

 

Við loka liðskvöldverð fékk kvennaliðið pöntun númer 55, ótrúleg tilviljum en það var einmitt lokasætið í mótinu!

 

Heilt yfir ekki undan miklu að kvarta, góðir sigrar á sveitum á svipuðu róli eins og Bangladesh og Mexíkó og mjög góðir stórsigrar gegn IPCA og IBCA. Slæmu viðureignirnar voru helst gegn Venezuela og El Salvador. 

 

Fyrirfram settum við takmarkið á besta árangur á þessari öld með því að ná í topp 50. Ég taldi fyrirfram að það hefði verið vel gerlegt. Að mínu mati býr mun meira í stelpunum en stigin segja til um. Þær þurfa allar að vinna í sínum veikleikum og geri þær það tel ég þær allar eiga heima yfir 2000 stigum og þarf ekki mikið til! 

 

Fyrir mig var þetta mikil reynsla og ef ég fengi að fara til baka myndi ég gera eitthvað öðruvísi en það á við okkur öll og er hluti af því að læra. 

 

Ég vil að lokum þakka öllum fyrir frábæra ferð og skemmtun. Bæði keppendum, Jóni L, Gunnari og skákstjórum. Reynslan var bæði skemmtileg og vonandi dýrmæt og ég tók mikið út úr þessu. 

 

 

[Event "WCO2014"] [Site "Tromso"] [Date "2014.08.12"] [Round "10.9"] [White "Ptacnikova Lenka"] [Black "Sanchez Ingrid"] [Result "1-0"] [ECO "B23"] [WhiteElo "2273"] [BlackElo "2020"] [PlyCount "45"] [EventDate "2014.??.??"] [TimeControl "6000+865"] [WhiteClock "0:43:00"] [BlackClock "0:43:49"] 1. e4 c5 2. Nc3 d6 3. f4 g6 4. Nf3 Bg7 5. Bb5+ Bd7 6. Bc4 Nc6 7. O-O e6 8. d3 Nge7 9. f5 exf5 10. Qe1 O-O 11. Qh4 d5 12. exd5 Na5 13. Bg5 f6 14. d6+ Nxc4 15. Qxc4+ Kh8 16. dxe7 Qxe7 17. Rae1 Qd8 18. Bf4 Rc8 19. Bd6 b5 20. Qd5 Bc6 21. Qe6 Re8 22. Be7 Qb6 23. Qd6 1-0

Fjölnismenn lögðu Garðbæinga

Skákdeild Fjölnis vann öruggan sigur á Taflfélagi Garðabæjar í fyrstu umferð (16 liða úrslitum) Hraðskákkeppni taflfélaga. Á Facebook-síðu TG segir:

Okkar menn voru full gjafmildir á vinninga í kvöld gegn sterkum andstæðingum frá Skákdeild Fjölnis í hraðskákkeppni taflfélaga, auk þess sem okkar menn voru einum færri fram að hálfleik vegna mismunandi ástæðna, Svanberg Pálsson sem kom inn sem varamaður tefldi því bara 6 skákir. 

Staðan í hálfleik var 9,5 vinningur TG gegn 26,5 vinning. Lokastaðan varð svo 16 vinningar gegn 56 og TG því úr leik í mótinu í ár. 

Guðlaug Þorsteinsdóttir var sú eina sem eitthvað stóð í andstæðingunum með 6 vinninga af 12. mögulegum. Hjá Fjölnismönnum var stórmeistarinn Héðinn Steingrímsson bestur með 10,5 vinning af 11 og sama vinningshlutfall var hjá Tómasi Björnssyni. Aðrir fengu lítið minna. 

TG óskar Fjölnismönnum góðs gengis í framhaldinu.

Tvær aðrar viðureignir fóru fram í kvöld. Huginn vann öruggur sigur á TV. Taflfélag Bolungarvíkur vann b-sveit Hugins í æsispennandi viðureign eftir bráðabana en nánar verður fjallað um þær tvær viðureignir á morgun.

Tvær aðrar viðureignir fara fram á morgun. Annars mætast UMSB og unglingasveit TR og hins vegar mætast Haukar og Vinaskákfélagið. Nánar verður sagt frá þeim viðureignum einnig á Skák.is á morgun.

Úrslitn (hægt að stækka)

 

 

 

Hraðskákkeppni taflfélaga: Topplið mætast í kvöld

Í kvöld fara fram toppviðureignir í Hraðskákkeppni taflfélaga. Í kvöld mætast annars Skákfélagið Huginn og Taflfélag Vestmannaeyja og hins vegar Taflfélag Bolungarvíkur og b-sveit Hugins. Allt eru þetta sveitir sem eiga sæti í efstu deild Íslandsmóts skákfélaga og samtals eru átta íslenskir stórmeistarar í þessum þremur félögum. Búast má því við hörkuviðureignum.

Áhorfendur eru velkomnir enda ekki á hverjum degi sem að tækifæri gefst til sjá sterkustu hraðskákmenn okkar að tafli

Teflt verður í hinum vistlegu húsakynnum Sensu, Kletthálsi 1, og hefst viðureignirnar kl. 20:00. Áhorfendur velkomnir

Röðun/úrslit fyrstu umferðar

Aðeins einni viðureign er lokið en flestar viðureignirnar fara fram á allra næstu dögum. Ritstjóri hefur ekki upplýsingar um dagsetningu á einni viðureign (SFÍ-Víkingar)

• Taflfélag Bolungavíkur - Skákdeild Hugins b-sveit (18. ágúst)
• Skákdeild Hauka - Vinaskákfélagið (19. ágúst)
• Skakfélags Selfoss og nágrennis - Taflfélag Reykjavíkur (21. ágúst)
• UMSB - Taflfélag Reykjavíkur unglingasveit (19. ágúst)
• Taflfélag Vestmannaeyja - Skákfélagið Huginn a-sveit (18. ágúst)
• Taflfélag Garðabæjar - Skákdeild Fjölnis (18. ágúst)
• Skákfélag Íslands - Víkingaklúbburinn (???)
• Skákfélag Akureyrar - Skákfélag Reykjanesbæjar 33-39

Skákþáttur Morgunblaðsins: Heimsmeistarataktar í Tromsö

Íslensku liðin sem tefla á ólympíumótinu í Tromsö í Noregi hafa bæði hlotið sex stig, karlasveitin er með 14 vinninga sem er 70% vinningshlutfall; í sjálfu sér ágætt en þó ber að hafa í huga íslenska sveitin hefur mætt tveim frekar slökum sveitum. Eftir sigra í fyrstu umferðunum kom bakslag: tap með minnsta mun fyrir Serbum var gremjulegt. Vænlegar stöður gáfu aðeins jafntefli á 1. og 4. borði.

Kvennasveitin hefur hlotið 11 ½ vinning úr skákum sem er nokkuð eftir bókinni. Sjö þjóðir eru með 9 stig en í efsta sæti á stigum er sveit Aserbaídsjan. Í kvennaflokknum leiða Kínverjar með 10 stig.

Norska sjónvarpið hefur verið með beinar útsendingar alla keppnisdagana og beinist athyglin mest að heimsmeistaranum Magnúsi Carlsen. Honum hefur verið fylgt hvert fótmál eftir sigurinn í heimsmeistaraeinvíginu sl. haust og skákir hans frá ýmsum mótum sem hann hefur tekið þátt í eftir Indlandseinvígið oft í beinni á norsku sjónvarpsstöðvunum. Ungur landi hans, Frode Urkedal, sem teflir fyrir Noreg 2, stal þó senunni er hann lagði Vasilí Ivantsjúk að velli í 2. umferð. Tapið virðist hafa slegið Ivantsjúk út af laginu en hann tapaði aftur í fimmtu umferð og er nú vart mönnum sinnandi.

Opni flokkurinn er fyrir bæði kynin en aðeins fjórar konur tefla á þeim vettvangi. Judit Polgar er að venju farsæl og hefur unnið allar skákir sínar hingað til fyrir ungversku sveitina.

Aðstæður eru að mörgu leyti góðar í Tromsö og flestir virðast vera búnir að gleyma þeirri óvissu sem ríkti áður en mótið hófst. Öryggisgæsla er afar ströng.

Aftur að Magnús Carlsen. Eftir dauft jafntefli i fyrstu umferð gegn Finnanum Tomi Nyback vann hann næstu skák án þess að sýna mikið en í fjórðu umferð komu loks heimsmeistaratilþrif. Pólverjinn Wojtaszek er geysiöflugur skákmaður og er vel heima í flóknum byrjanaafbrigðum. En eins og stundum áður vék Magnús frá alfaraleiðum, fór í smiðju til Spasskí þegar hann valdi lokaða afbrigðið gegn Sikileyjarvörn og vann með tilþrifum:

Magnús Carlsen - Radoslaw Wojtaszek

Sikileyjarvörn

1. e4 c5 2. Rc3 d6 3. g3 Rc6 4. Bg2 g6 5. d3 Bg7 6. Be3

Spasskí tefldi lokaða afbrigðið yfirleitt með því að leika 6. f4 strax.

6. ... e5 7. Rh3 Rge7 8. f4 Rd4 9. O-O O-O 10. Dd2 Bd7 11. Rd1 Dc8 12. Rdf2!?

Fram að þessu hefur þetta allt verið eftir bókinni en þessi leikur er óvenjulegur.

12. ... Rdc6 13. c3 b5 14. fxe5 Rxe5 15. Bh6 R7c6 16. Bxg7 Kxg7 17. Rf4 Dd8 18. Had1 Hc8 19. De2!

Eftir rólega byrjun þar sem leikir svörtu drottningarinnar hafa kannski orkað tvímælis finnur Magnús góða áætlun. Bein hótun er nú 20. d4.

19. ... h5 20. d4 cxd4 21. cxd4 Rg4 22. h3 Rxf2 23. Dxf2 Re7 24. Hd3!

Beinir spjótum að f7-peðinu.

24. ... b4 25. Hf3 De8?

Slakur varnarleikur. Hann gat haldið í horfinu með 25. ... Kg8.

26. g4!?

Blæs til sóknar. Annar góður leikur var 26. d5!

26. ... hxg4 27. hxg4 Bb5 28. He1 Dd8 29. g5! Db6 30. Bh3 Hcd8

31. Be6!

Bætir biskupinum í sóknina.

31. ... Be8 32. Rd5 Rxd5 33. Bxd5

og Pólverjinn gafst upp. Aðalhótun svarts er 34. Hh3 og 35. Df6+. Svartur á engan nothæfan leik, t.d. 33. ... De7 34. Hh4 f6 35. Hh7+! Kxh7 36. Dh4+ og 37. Dh6 mát. Glæsileg skák tefld í sönnum heimsmeistarastíl.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 9. ágúst 2014

Skákþættir Morgunblaðsins

[Event "Chess Olympiad"] [Site "Tromso NOR"] [Date "2014.08.05"] [EventDate "2014.08.02"] [Round "4.3"] [Result "1-0"] [White "Magnus Carlsen"] [Black "Radoslaw Wojtaszek"] [ECO "A07"] [WhiteElo "2877"] [BlackElo "2735"] [PlyCount "65"] 1. e4 c5 2. Nc3 d6 3. g3 Nc6 4. Bg2 g6 5. d3 Bg7 6. Be3 e5 7. Nh3 Nge7 8. f4 Nd4 9. O-O O-O 10. Qd2 Bd7 11. Nd1 Qc8 12. Ndf2 Ndc6 13. c3 b5 14. fxe5 Nxe5 15. Bh6 N7c6 16. Bxg7 Kxg7 17. Nf4 Qd8 18. Rad1 Rc8 19. Qe2 h5 20. d4 cxd4 21. cxd4 Ng4 22. h3 Nxf2 23. Qxf2 Ne7 24. Rd3 b4 25. Rf3 Qe8 26. g4 hxg4 27. hxg4 Bb5 28. Re1 Qd8 29. g5 Qb6 30. Bh3 Rcd8 31. Be6 Be8 32. Nd5 Nxd5 33. Bxd5 1-0

Hraðskákmót Hugins (suðursvæði) fer fram á fimmtudaginn

Hraðskákmót Hugins í Mjóddinni hefur verið frestað til fimmtudagsins 21. ágúst nk. vegna viðureigna í Hraðskákkeppni taflfélaga. Teflt er í félagsheimili Hugins í Álfabakka 14a og hefst taflið kl. 20. Tefldar verða 7 umferðir 2*5 mínútur.

Stefnt er að því að reikna mótið til hraðskákstiga. Heildarverðlaun á mótinu eru kr. 20.000.

Núverandi hraðskákmeistari Hellis er Hjörvar Steinn Grétarsson. Þetta er í nítjánda sinn sem mótið fer fram. Björn Þorfinnsson og Davíð Ólafsson hafa hampað titlinum oftast eða fjórum sinnum.

Verðlaun skiptast svo:

1. 10.000 kr. 
2. 6.000 kr. 
3. 4.000 kr.

Þátttökugjöld eru kr. 400 fyrir félagsmenn en kr. 600 fyrir aðra. Fyrir unglinga í Huginn eru þau kr. 300 en kr. 400 fyrir aðra.

Minnt er á skráning í Meistaramót Hugins (suðursvæði) er í gangi á Skák.is.

Skákstuð Skákakademíunnar á Menningarnótt!

Rétt eins og síðustu ár stendur Skákakademían fyrir skemmtilegum skákdegi á Menningarnótt. Nú verður aðaláherslan á Alheimsmótið í leifturskák. Keppendur munu aðeins hafa eina mínútu á klukkunni og tefla tvær skákir sín á milli. Þegar hafa nokkrir af bestu leifturskákmönnum borgarinnar staðfest þátttöku sína. Má þar á meðal nefna stórmeistarann Hjörvar Stein Grétarsson og Íslandsmeistarann Guðmund Kjartansson. Þá eru ónefndir landsliðsþjálfari kvenna Ingvar Þór Jóhannesson, formaður TR Björn Jónsson, formaður SFÍ Kristján Örn Elíasson og kantmaðurinn knái Halldór Brynjar Halldórsson sem fór mikinn í viðureign SA og Skákfélag Reykjanesbæjar sem háður var nýverið en þar krækti hann í ellefu vinninga af tólf sem dugðu þó skammt fyrir Norðanmenn. Keppendur verða alls um 12-14.

Samhliða taflmennskunni verða spilaðir skemmtilegir tónar á torginu góða þar sem Alheimsmótið fer fram. Herlegheitin fara fram á Vitatorgi sem er nýtt torg við Hverfisgötu, rétt neðan Vitastígs. Sjálft mótið hefst um 14:30. Að loknu móti munu meistararnir taka skákir við gesti og gangandi auk þess sem allir geta gripið í tafl sín á milli frá því tvö um daginn.

http://menningarnott.is/skakstud-skakakademiunnar

 

Lokapistill Ólympíuskákmótsins

Íslensku sveitirnar enduðu í 39. og 55. sæti á Ólympíuskákmótinu sem lauk í gær í Tromsö. Bæði liðin stóðu því sig betur en upphaflega styrkleikaröðun gaf til kynna (43. og 66. sæti).

Varðandi toppbaráttuna bendir ritstjóri á ljómandi úttekt Hrafns Jökulssonar á heimasíðu Hróksins.

Æfintýrið hófst 1978

Margt hefur ritað um sigurgöngu Kínverjanna. Frábær frammistaða og virkilega öruggur og sanngjarn sigur. Tefldu einfaldlega best allra. Jón L. og Helgi rifjuðu það upp að Kínverjarnir tóku fyrst þátt í Ólympíuskákmótinu árið 1978 í Buenos Aires. Í fyrstu umferð mættu þeir Íslendingum og unnu mjög óvænt 3-1.

Jóni L. og Helgi upplifuðu því upphafið af kínverska ævintýrinu sem og hápunktinn á því! Helgi endaði umræðuna á þessum nótum

„Rétt er að taka fram að það var ég sem vann"

Lokaumferðin

Til að byrja með stefndi í jafna skemmtilega viðureign við Egypta en þegar tímamörkin fóru að nálgast fór að halla undan fæti. Þröstur lék af sér í tímapressu í hróksendatafli gegn Ahmed Adly og Hannes Hlífar tapaði einnig. Helgi Ólafsson lék sig í mát og Hjörvar Steinn mátti sætta sig við jafntefli. Verulega svekkjandi úrslit gegn sterkri sveit Egypta.

Kvennaliðið vann hins vegar afar góðan sigur á Jamaíka. Halla, Tinna og Jóhanna unnu en Lenka gerði jafntefli.

Opinn flokkur

Íslenska liðið hlaut 13 stig og endaði í 39. sæti. Okkur finnst þessi staða ekki endurspegla frammistöðu liðsins. Hún var betri.

Hannes, Þröstur og Hjörvar eru allir í stigaplús. Hannes hækkar um 13 stig, Þröstur um 11 stig og Hjörvar um 5 stig. 

Gummi og Helgi lækka á stigum. Gummi um 9 stig en Helgi um 12 stig.

Hannes var taplaus þar til í lokaumferðinni og var ákaflega traustur á mótinu. Hjörvar stóð sig vel á öðru borði. Hann var taplaus og traustur. Hans besta Ólympíuskákmót til þessa.

Gummi náði sér ekki strik á sínu fyrsta Ólympíuskákmóti. Gumma skortir smá reynslu, eðli málsins samkvæmt. Það er öðruvísi að tefla á Ólympíuskákmóti en á öðrum mótum t.d. vegna þess að þar ekki teflt alla daga og rytminn er annar.

Þröstur, stóð sig venju samkvæmt vel. Þröstur er ákaflega traustur og góður liðsmaður og vert er að minnast frammistöðu hans á Ólympíuskákmótinu fyrir tveimur árum síðan. Sú ákvörðun Jóns að velja Þröst var skynsamleg.

Það var frábært að fá Helga Ólafsson aftur í landsliðið. Helgi var taplaus þar til í lokaumferðinni þegar hann lék sig slysalega í mát. Það veitir liðinu gífurlegt öruggi að vita af svo traustum manni á fjórða borði.

Svo er vert að benda á Jón L. Árnason sem kom frábær inn í liðsstjórahlutverkið. Jón er ákaflega jákvæður einstaklingur sem liðsmenn bera mikla virðingu fyrir og er jafnframt félagi liðsmanna. Slíkt er gríðarlega mikilvægt fyrir liðsstjóra og ég sannarlega vona að Jón sé kominn til að vera

Semsagt. Mjög ásættanlegur árangur þrátt fyrir mótið hefði mátt enda á annan hátt.

Kvennaflokkur

Íslenska liðið endaði í 55. sæti en var fyrirfram raðað í það í 66. á stigum.

Hallgerður stóð sig afar vel og hækkar um 26 stig. Ákaflegur traustur liðsmaður en hún tefldi allar skákirnar. Eini íslenski liðsmaðurinn sem gerði það.

Elsa hækkar um 8 stig og Tinna um 7 stig. Jóhanna stóð í stað. Lenka tapaði átta stigum.

Það er komin gríðarleg reynsla í kvennaliðið. Hins vegar er ljóst að töluverðar breytingar geta orðið á liðinu fyrir EM 2015 þar sem bæði Hallgerður og Jóhanna stefna út í nám.

Ingvar kom sterkur inn í liðsstjórahlutverkið. Mikill gleðigjafi rétt eins og Jón.

Lokahófið

Skáksamband Íslands bauð keppendum og skákstjórum í veislu að loknu móti. Þar gerðum við okkur góðan dag. Sérstaka kátínu vakti ljóðabálkur Jóns L. Árnasonar en hann samdi vísu eftir hverja umferð.

Lokahófið var að mörgu leyti fínt. Reyndar var ekki bar á staðnum fyrir þyrsta keppendur.

Veitt voru verðlaun fyrir bestan árangur í ýmsum flokkum. Vinir okkar Egyptarnir unnu b-flokkinn eftir burstið í lokaumferðinni. Það var sérstakt að veitt voru verðlaun í a-flokki (lið styrkleikaröðuð 1-35) og þau veitt liðinu í fjórða sæti Rússunum sem höfðu engan áhuga á þeim! Einn þeirra hafði greinilega fengið sér í vel staupinu og hvorki Kramnik né Svidler létu sjá sig.

Það var einnig sérstakt að veitt voru fyrst verðlaun í opnum flokki og svo í kvennaflokki. Tilgangurinn var ljósleg sjá að enda mótið á rússneska þjóðsöngnum. Mjög svo lýsandi fyrir Ólympíuskákmótið 2014 - þar sem rússneski björninn hefur að mörgu leyti vakað yfir og stjórnað.

 

 

Tveir menn létust

Eins og fram hefur komið létust tveir skákmenn síðasta daginn. Afar sorglegt og sérkennileg tilviljum að slíkt skuli gerast. Um var að ræða skákmann frá Seychelles-eyjum sem lést á skákstað og heyrnarlausan skákmann frá Úsbekistan sem lést á hótelherbergi sínu.

Ég og Róbert Lagerman sitjum inn á VIP-barnum í lokaumferðinni. Allt í einu sjáum við 20-30 manns hlaupa framhjá okkur og út. Við botnum ekkert í þessu og höldum okkar striki. Héldum jafnvel að hér væri eitthvað grín á ferð. Við sjáum fljótt að svo var ekki en sáum einnig að engin hætta væri á ferðinni því sumir eru rólegir við dyr skáksalarins. Á leiðinni upp á hótel mætum við sjúkrabíl

Jón L. var inn í skáksal. Hann upplifir það að það kemur maður hlaupandi og öskrar „medic". Einhvern riðlast allt og sumir virðast hafa uppskilið upphrópunina og héldu að hér hafi átt sér einhver sprengjuhótun. Jón L. sýndist Kínverjarnir vera fyrstir til þar sem þeir hlupu út. Skiptu þá engu máli að fjöldi fólks hleypur út í paník. Jón L. fylgdi með og hljóp einnig. Þegar Jón er kominn út sér þarna Þröst Þórhallsson sér við hlið.

Einn erlendur vinur minn var úti að reykja. Sér hann þar allt í einu fullt af fólki koma hlaupandi út bæði út um VIP-útganginn og aðalútganginn. Hleypur svo fólkið að einhverju leyti á móti hvoru öðru.

Reynt var að lífga manninn en því miður gekk það ekki upp. Eftir hlé á mótinu komu þeir skákmenn sem enn voru að tefla og kláraðu sínar skákir við þessi erfiðu skilyrði

Hinn maðurinn lést á hótelherbergi sínu. Um kvöldið verð ég var við sjúkraliða en vissi ekkert hvað var að gerast. Ég frétti svo af því degi síðar hvað hefði gerst.

Reykjavíkurskákmótið

Ég hafði ætlað að koma frá mér þessum pistli í gær en hafði ekki tök á því að klára það. Dagurinn var að einhverju leyti notaður til vinnu því ég hitti tvo aðila. Annars hitti ég Lawrence Trent, sem hefur verið með skákskýringar (live commentary) á ýmsum mótum. Þar með talið Ólympíuskákmóinu.

Hins vegar hitti ég Macauley Peterson frá Chess24 sem hefur áhuga á samstarfi varðandi Reykjavíkurskákmótið og EM landsliða en þeir sáu um beinar útsendingar og heimasíðu Ólympíuskákmótsins.

Ég skynja gríðarlegan áhuga á Reykjavíkurskákmótinu 2015. Jafnvel meiri en nokkurn sinni fyrr.

Að lokum

Minnisstæðu Ólympíuskákmóti er lokið. Íslensku fulltrúarnir voru kátir og glaðir eftir skemmtilegt mót. Þeir stóðu sig með sóma og stemmingin og glaðværðin í hópnum mjög góð. Liðsstjórarnir nýju, Jón L. og Ingvar Þór, eru einnig miklir gleðigjafar.

Eitt alskemmtilegasta og minnisstæðasta Ólympíuskákmót sem ég hef upplifað!

Gunnar Björnsson

Gróskumikið starf T.R. á komandi vetri

Mótahald Taflfélags Reykjavíkur á 115. starfsári þess hófst með pomp og prakt á sunnudag þegar fimm skákmenn deildu efsta sætinu á fjölmennu Stórmóti félagsins í samstarfi við Árbæjarsafn. Á mánudag fór síðan fram hið árlega Borgarskákmót sem Taflfélag Reykjavíkur stóð að í samstarfi við hið nýja skákfélag Hugin. 61 keppandi tók þátt og deildu alþjóðlegi meistarinn Jón Viktor Gunnarsson og Ólafur B. Þórsson efsta sætinu.

Taflfélag Reykjavíkur stendur fyrir vel á annan tug skákviðburða á komandi haustvertíð og eru þá ekki meðtaldar hinar fjölmörgu barna- og unglingaæfingar ásamt fimmtudagsmótunum sem hefjast nú aftur eftir nokkurt hlé. Af nægu er að taka en stærsti viðburðurinn verður án efa áttatíu ára afmælismót Haustmóts félagsins sem hefst um miðjan september. Þá má nefna nýjan byrjendaflokk á barnaæfingunum, bikarsyrpu ætlaða yngri kynslóðinni og framhald á skemmtikvöldunum sem vöktu mikla lukku á síðastliðnu starfsári.

Þeim sem hafa gaman að skáklistinni, hvort sem er sem iðkendur eða áhorfendur, er bent á að fylgjast vel með starfi félagsins í vetur því þar verður sannarlega eitthvað í boði fyrir alla. Hægt er að sækja starfsáætlun félagsins með því að smella á hlekkinn hér að neðan.

Við hlökkum til að vera með ykkur og eiga saman skemmtilegt skáktímabil!

Starfsáætlun TR starfsárið 2014-15