Hraðkvöld í Mjódd hjá GM Helli í kvöld

Skákfélagið GM Hellir heldur hraðkvöld mánudaginn 13. janúar nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili GM Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Fimm með fullt hús í Skákþingi Reykjavíkur

Alþjóðlegi meistarinn Jón Viktor Gunnarsson, Fide meistararnir Sigurbjörn Björnsson og Einar Hjalti Jensson, stórmeistari kvenna Lenka Ptacnikova og Þorvarður F. Ólafsson hafa öll þrjá vinninga að loknum þremur umferðum í Skákþingi Reykjavíkur sem fram fór í dag. Fimm keppendur fylgja í kjölfarið með 2,5 vinning.

Jón Viktor sigraði Oliver Aron Jóhannesson, Sigurbjörn lagði Mikael Jóhann Karlsson, Einar Hjalti hafði betur gegn Degi Ragnarssyni og Þorvarður vann Harald Baldursson.  Af eftirtektarverðum úrslitum má nefna jafntefli Fide meistarans Davíðs Kjartanssonar og Þórs Más Valtýssonar og sömuleiðis gerðu Jón Úlfljótsson og hinn efnilegi Gauti Páll Jónsson jafntefli.

Þá vann Bárður Örn Birkisson góðan sigur á Ingvari Erni Birgissyni en á þeim munar 500 Elo stigum þeim síðarnefnda í hag.  Bárður Örn er liðsmaður T.R. og það er einnig Mykhaylo Kravchuk sem gerði gott jafntefli við Vigni Bjarnason en þar er um svipaðan stigamun að ræða.

Fjórða umferð fer fram á miðvikudagskvöld og hefst kl. 19.30.

• Heimasíða TR
• Chess Results
  
• Myndir

Skákþing Akureyrar hófst í dag

Í dag hófst taflið um skákmeistaratitil Akureyrar í 76. sinn. Tíu skákkempur eru skráðar til leiks í þeirri orrustu.

Mótið hófst með einnar mínútu þögn vegna fráfalls  Hauks Jónssonar frá Dunhaga, en Haukur var jarðsettur í gær. Hann var um áratugaskeið virkur í starfi Skákfélagsins og tefldi á síðu síðasta móti á Skákþingi Akureyrar árið 2011.

Svo voru tefldar fjórar skákir, en einni frestað um sólarhring eða svo.  Þessi úrslit fengust:

• Andri Freyr Björgvinsson-Símon Þórhallsson  jafntefli
• Jón Kristinn Þorgeirsson-Logi Rúnar Jónsson   1-0
• Sigurður Eiríksson-Tómas Veigar Sigurðarson   1-0
• Haraldur Haraldsson-Jakob Sævar Sigurðsson  1-0
• Frestað var skák þeirra Hjörleifs Halldórssonar og Rúnars Ísleifssonar.

Önnur umferð mótsins verður háð nk. fimmtudag 16. janúar og hefst kl.18. 

• Heimasíða SA
• Chess-results

Skákþáttur Morgunblaðsins: 50 ár frá mögnuðu afreki

Fyrir sléttum 50 árum lauk á Henry Hudson-hótelinu í New York Skákþingi Bandaríkjanna, keppni sem hefur þá sérstöðu meðal átta sigra Bobby Fischers á bandaríska meistaramótinu 1957-´67 að hann hlaut 11 vinninga af 11 mögulegum - 100% vinningshlutfall. Gæði skáka Fischers, sem stóð á tvítugu, voru ótvíræð og mótherjarnir bestu skákmenn Bandaríkjanna, stórmeistarar á borð við Samuel Reshevsky, Pal Benkö, Robert Byrne og Larry Evans. Nokkrar skákir rötuðu í hina frægu bók „60 minnisverðar skákir" og við tökum tvö dæmi:

- Sjá stöðumynd 1 -

Fischer - Benkö

Benkö hafði vonast til að hrinda atlögu hvíts, hinum augljósa leik 19. e5 má nefnilega svara með 19. ...f5! en nú kom þrumuleikur:

19. Hf6!

Með hugmyndinni 19. ... Bxf6 20. e5 og mátar.

Kg8 20. e5 h6 21. Re2!

- svartur gafst upp.

- Sjá stöðumynd 2 -

Robert Byrne - Fischer

Fischer hafði fórnað manni fyrir það sem flestir áhorfendur töldu óljósar bætur. Sumir töldu jafnvel að svarta staðan væri töpuð. En Fischer hafði séð lengra:

19. ... d4! 20. Rxd4 Bb7+ 21. Kf1 Dd7!

- og öllum á óvart gafst Byrne upp. Hann sá meginafbrigði fléttunnar, 22. Df2 Dh3+ 23. Kg1 He1+!! 24. Hxe1 Bxd4 og vinnur.

Á þessu ári 1964 stóð Bobby Fischer á krossgötum á ferli sínum. Leiðirnar voru ekki allar greiðar. Hann hafði ekki tekið þátt í Piatigorski-mótinu í Santa Monica árinu áður, arfur deilna um einvígi sem hann háði við Reshevsky árið 1961 spratt þar upp, ekki heldur á millisvæðamótinu í Amsterdam þetta ár; áskorendamótið í Curacao ´62 hvíldi enn þungt á honum, fjöltefla-túr hans um gervöll Bandaríkin varð að fresta um nokkra mánuði vegna morðsins á Kennedy forseta og á 21 árs afmælinu sendi „Sámur frændi" honum herkvaðningu, en Fischer fór aldrei til Víetnam.

En sigurinn á meistaramótinu 1963-´64 hafði gríðarleg áhrif á stöðu Fischers í skákheiminum. Það er a.m.k. niðurstaða Kasparovs í bókaflokknum „Hinir miklu fyrirrennarar mínir". Gagnrýnendur áttu varla til orð. Þó skilaði Bent Larsen sératkvæði: „Fischer var að tefla við börn," sagði hann en sjö árum síðar tapaði hann 0:6 fyrir Fischer. Byrjanir Fischers á þessu fræga meistaramóti voru fjölbreyttari en áður, hann beitti meira að segja norska afbrigði spænska leiksins í eftirfarandi skák:

Bandaríska meistaramótið 1963-´64:

William Addison - Bobby Fischer

Spænskur leikur

1. e4 e5 2. Rf3 Rc6 3. Bb5 a6 4. Ba4 b5 5. Bb3 Ra5

Upphafsleikur norska afbrigðisins.

6. d4 exd4 7. Dxd4 Re7 8. c3 Rxb3 9. axb3 Bb7 10. Bf4 d5 11. e5 c5!

Snjall leikur sem leysir öll vandamál svarts, 12. Dxc5 er svarað með 12. ... Rf4 og drottningin á engan reit.

12. Dd3 Rg6 13. Bg3 Be7 14. Rbd2 Rf8 15. O-O Re6

Riddarinn er kjörinn til að skorða e5-peðið. Nimzowitsch hefði ekki gert þetta betur.

16. Had1 g5! 17. h3 h5 18. Hfe1 Db6 19. Rf1 d4 20. R3d2

Gefur fullmikið eftir en eftir 20. cxd4 g4 21. d4 kemur 21. ... Hd8 o.s.frv.

20. ... g4 21. h4 Dc6 22. De4 O-O-O

Uppskipti á eigin forsendum!

23. Dxc6 Bxc6 24. c4 Kd7 25. Ha1 Ha8 26. Re4 Bxe4 27. Hxe4 Rg7 28. Rd2 Rf5 29. Hf4 Ke6

Kóngurinn tekur sæti riddarans. Svarta staðan teflir sig sjálf.

30. Re4 bxc4 31. bxc4 Hhb8 32. Ha2 Hb4 33. Rd2 Rxh4 34. Bxh4 Bxh4 35. He4 Bg5 36. f4 gxf3 37. Rxf3 Be3 38. Kh2 Hxc4

- og Addison gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 5. janúar 2014.

Skákþættir Morgunblaðsins

[Event "US Championship 1963/64"] [Site "New York City, NY USA"] [Date "1963.12.26"] [EventDate "1963.??.??"] [Round "7"] [Result "0-1"] [White "William G Addison"] [Black "Robert James Fischer"] [ECO "C70"] [WhiteElo "?"] [BlackElo "?"] [PlyCount "76"] 1. e4 e5 2. Nf3 Nc6 3. Bb5 a6 4. Ba4 b5 5. Bb3 Na5 6. d4 exd4 7. Qxd4 Ne7 8. c3 Nxb3 9. axb3 Bb7 10. Bf4 d5 11. e5 c5 12. Qd3 Ng6 13. Bg3 Be7 14. Nbd2 Nf8 15. O-O Ne6 16. Rad1 g5 17. h3 h5 18. Rfe1 Qb6 19. Nf1 d4 20. N3d2 g4 21. h4 Qc6 22. Qe4 O-O-O 23. Qxc6+ Bxc6 24. c4 Kd7 25. Ra1 Ra8 26. Ne4 Bxe4 27. Rxe4 Ng7 28. Nd2 Nf5 29. Rf4 Ke6 30. Ne4 bxc4 31. bxc4 Rhb8 32. Ra2 Rb4 33. Nd2 Nxh4 34. Bxh4 Bxh4 35. Re4 Bg5 36. f4 gxf3 37. Nxf3 Be3+ 38. Kh2 Rxc4 0-1

Jakob Sævar og Jón Aðalsteinn unnu sigur í Árbót

Jakob Sævar Sigurðsson og Jón Aðalsteinn Hermannsson unnu sigur á skákþingi GM-Hellis á norðursvæði sem lauk í Árbót í Aðaldal í gærkvöldi. Jakob Sævar vann öruggan sigur með 5,5 vinninga af 6 mögulegum í eldri flokki. Tómas Veigar Sigurðarson varð í öðru sæti með 4,5 vinninga og Smári Sigurðsson og Sigurður G Daníelsson urðu jafnir í þriðja sæti með fjóra vinninga, en Smári varð hærri á stigum. Smári hreppti því önnur verðlaun og Sigurður Daníelsson þriðju verðlaun þar sem Tómas keppti sem gestur á mótinu. Úrslit í 5. umferð og 6. umferð.

 

             Smári, Jakob og Tómas Veigar. 

Lokastaðan: 

	Sigurðsson Jakob Sævar	1824	GM Hellir	5.5	20.0	13.0
	Sigurðarson Tómas Veigar	1990	Víkingakl.	4.5	23.0	15.0
	Sigurðsson Smári	1913	GM Hellir	4.0	20.5	13.0
	Daníelsson Sigurður G	1971	GM Hellir	4.0	20.5	13.0
	Ásmundsson Sigurbjörn	1185	GM Hellir	3.5	15.0	10.5
	Viðarsson Hlynur Snær	1071	GM Hellir	3.5	15.0	10.5
	Aðalsteinsson Hermann	1333	GM Hellir	2.5	21.5	16.0
	Akason Aevar	1456	GM-Hellir	2.5	20.5	13.5
	Hermannsson Jón Aðalsteinn	0	GM Hellir	2.5	16.0	10.5
	Kristjánsson Bjarni Jón	1061	GM Hellir	2.0	14.5	10.5
	Statkiewicz Jakub Piotr	0	GM Hellir	1.5	14.0	10.5
	Þórarinsson Helgi James	0	GM Hellir	0.0	15.5	10.5

 

Jón Aðalsteinn vann sigur í flokki 16 ára og yngri með 2,5 vinninga, Bjarni Jón Kristjánsson varð annar með 2 vinninga og Jakub Piotr Statkiewicz varð þriðji með 1,5 vinninga.

 

             Bjarni Jón, Jón Aðalsteinn og Jakub. 

• Heimasíða GM Hellis
  
• Mótið á chess-results. 

Skákþing Akureyrar hefst í dag

Mótið hefst nk. sunnudag 12. janúar kl. 13.00 í Skákheimilinu, Íþróttahöllinni við Skólastíg. Mótið er að þessu sinni haldið í samvinnu við Landsbankann og nefnist Landsbankamótið.

Teflt verður í einum flokki og er öllum heimil þátttaka. Aðeins þeir skákmenn sem eiga lögheimili á Akureyri eða eru fullgildir félagsmenn í Skákfélagi Akureyrar geta unnið titilinn sem teflt er um:

„SKÁKMEISTARI AKUREYRAR 2014."

Dagskrá:

Á mótinu er áformað að tefla 9 umferðir á eftirtöldum dögum

Sunnudaginn 12. janúar kl. 13.00         1. umferð

Fimmtudaginn 16. janúar kl. 18.00       2. umferð

Sunnudaginn 19. janúar kl. 13.00         3. umferð

Fimmtudaginn 23. janúar kl. 18.00       4. umferð

Fimmtudaginn 30. janúar kl. 18.00       5. umferð

Sunnudaginn 2. febrúar kl. 13.00         6. umferð

Sunnudaginn 9. febrúar kl. 13.00         7. umferð

Fimmtudaginn 13. febrúar kl. 18.00     8. umferð

Sunnudaginn 16.febrúar kl. 13.00        9. umferð

Hraðskákmót Akureyrar og verðlaunafhending verður svo sunnudaginn 23. febrúar kl. 13.00

Mótsstjórn áskilur sér rétt til að gera minniháttar breytingar á þessari dagskrá þegar fjöldi þátttakenda liggur fyrir. Ákvörðun um þetta mun liggja fyrir við upphaf 1. umferðar. 

Umhugsunartími verður 90 mínútur á skákina, auk þess sem 30 sekúndur bætast við tímann fyrir hvern leik (90+30).

Mótið verður reiknað til innlendra og alþjóðlegra skákstiga.

Þátttökugjald er kr. 3.000 fyrir skuldlausa félagsmenn, kr. 4.000 fyrir aðra. Þátttaka er ókeypis fyrir þá unglinga sem greitt hafa æfingagjald. 

Skráning er með tölvupósti á netfangið [e-mail], eða á skákstað eigi síðar en 30 mínútum fyrir auglýst upphaf 1. umferðar.

Verðlaun. Veitt verða peningarverðlaun fyrir þrjú efstu sætin, auk a.m.k. einna stigaverðlauna. Lágmarksverðlaunafé er kr. 50.000 en getur hækkað með góðri þátttöku.  Endanleg ákvörðun um upphæð verðlauna mun liggja fyrir eftir upphafsumferð mótsins.

 

Vignir Vatnar Íslandsmeistari barna

 

Íslandsmót barna fór fram í 21. skipti fyrr í dag. Mótið sem er fyrir skákmenn 11 ára og yngri er eitt helsta skákmót yngstu kynslóðarinnar ár hvert. Þátttaka í dag var með miklum ágætum en 90 keppendur tóku þátt í aðalmótinu og sautján börn stigu sín fyrstu skref á skákmóti með þátttöku í peðaskákmóti.

 

Flestir sterkustu skákmenn í þessum aldursflokki voru mættir til leiks. Keppendur voru frá allmörgum taflfélögum og sérstaklega gaman að sjá keppendur frá Akureyri, Hellu og Grindavík auk þess sem flest bæjarfélög á höfuðborgarsvæðinu áttu sína fulltrúa og keppendur frá Reykjavík og Kópavogi í meirihluta eins og svo oft áður.

 

 

 

Dagur B. Eggertsson forseti borgarráðs setti mótið og flutti stutta tölu þar sem hann hældi mótshaldinu um leið og hann sagði frá því að hann væri á sínu fyrsta skákmóti sem foreldri og þeir feðgar ætluðu að hafa leikgleðina í fyrirrúmi og hvatti aðra til hins sama. Úrslit fyrstu umferða voru nokkuð hefðbundin, lítið um óvænt úrslit og stigahæstu menn röðuðu sér í efstu sæti. Að loknum fimm umferðum komust þeir keppendur áfram sem höfðu þrjá eða fleiri vinninga en aðrir höfðu lokið þátttöku. Þeir fóru þó ekki tómhentir heim heldur með upplýsingar um námskeið Skákskólans sem hefjast síðar í mánuðinum og voru kynnt í dag.

 

 

 

Þegar leið á mótið kom í ljós að tveir keppendur voru í sérflokki: Vignir Vatnar Stefánsson TR og Óskar Víkingur Davíðsson GM Helli. Vignir hafði titil að verja og tefldi nú í síðasta sinn á þessu móti en Óskar Víkingur á enn eftir tvö ár í flokknum. Þegar þeir kappar komu í mark höfðu þeir aðeins tapað niður hálfum vinningi og það gegn hvor öðrum og því einvígi þeirra framundan.

Í einvíginu tefldu Vignir og Óskar tvær hörkuskákir. Skákirnar voru vel tefldar, en Vignir hafði betri stöðu nær allan tímann í báðum skákunum og pressaði smám saman á Óskar sem varðist þó frumlega en þurfti að lokum að játa sig sigraðan. Vignir Vatnar Stefánsson því Íslandsmeistari barna annað árið í röð og á verðlaunapalli fjórða árið í röð. Vigni þarf lítt að kynna íslenskum skákmönnum. Sigrar hans í barna- og unglingaflokki síðustu árum eru ótal margir og er hann m.a. ríkjandi Norðurlandameistari í yngsta flokki. Óskar Víkingur er átta ára gamall og hefur stundað skákina gríðarlega samviskusamlega síðustu misserin sem er að skila sér í miklum framförum. Í þriðja sæti varð Bjarki Arnaldarson TG-ingur. Bjarki er liðtækur í fleiri íþróttum en skákinni en hefur tekið jöfnum framförum síðustu árin og kemur þessi árangur lítið á óvart.

 

Sérstaka ánægju vekur árangur skákmanna utan höfuðborgarsvæðisins. Keppendur frá Grindavík, Akureyri og Hellu komust í úrslit. Siguringi Sigurjónsson sér um öflugt skákstarf í Grindavík og komst hans helsti nemandi Kamil Malinowski í úrslit. Björgvin Smári Guðmundsson hefur í nokkur misseri staðið fyrir öflugu starfi á Hellu og voru nokkrir hans kappar í úrslitum. Skákfélag Akureyrar hefur svo í áratugi átt efnilega skákmenn og komst fulltrúi félagsins í úrslit þetta árið.

 

 

 

Árgangaverðlaun

2008 Kristófer Jökull Jóhannsson

2007 Adam Omarsson

2006 Stefán Orri Davíðsson

2005 Óskar Víkingur Davíðsson

2004 Þorsteinn Emil Jónsson

2003 Vignir Vatnar Stefánsson

Peðaskákin

 

 

Lenku Ptacnikovu má öðrum fremur þakka fyrir þá innrás sem peðaskák hefur átt á skákmót og æfingar þeirra allra yngstu. Peðaskák er mjög góð þjálfunaraðferð og flott leið fyrir unga krakka til að byrja feril sinn á skákmótum. Sautján krakkar mættu í peðaskákina og var kynjaskiptingin mjög jöfn sem er gleðiefni. Sigurvegari var Sólveig Bríet Magnúsdóttir sem á skákhæfileikana ekki langt að sækja en hún er dóttir Magnúsar Pálma Örnólfssonar.

 

 

Móthaldið tókst allt afar vel en Skáksambandið og Skákakademían stóðu saman að því. Starfsliðið var vel skipað en skákstjórar voru Stefán Bergsson, Gunnar Björnsson, Donika Kolica, Erla Hjálmarsdóttir, Björn Ívar Karlsson og Óskar Long Einarsson.

Mótstöflu má finna á Chess-Results.

Myndaalbúm (SSB, GB og fleiri)

Íslandsmót barna hefst kl. 12

Íslandsmót barna í skák fer fram í Rimaskóla laugardaginn 11. janúar og hefst klukkan 12. Þátttökurétt hafa börnfædd 2003 og síðar og sigurvegarinn fær sæmdarheitið Íslandsmeistari barna 2014 og keppnisrétt á Norðurlandamótið í skólaskák sem haldið verður í Danmörku um miðjan febrúar, nánar tiltekið í Legolandi!
 
Alls verða tefldar 9 umferðir með 10 mínútna umhugsunartíma. Eftir 5 umferðir verður keppendum fækkað þannig að þeir sem hafa 3 vinninga eða fleiri halda áfram keppninni um Íslandsmeistaratitilinn en þeir sem hafa færri en 3 vinninga hafa lokið þátttöku.

Peðaskákmót verður haldið samhliða mótinu og hefst klukkan 13:00. Það er ætlað fyrir leikskólabörn og þau allra yngstu í grunnskólum sem eru ekki tilbúin fyrir Íslandsmótið.

Skákdeild Fjölnis verður með veitingasölu á meðan mótinu stendur.

Þetta er í 21. sinn sem keppt er um Íslandsmeistaratitil barna. Sigurður Páll Steindórsson sigraði á fyrsta mótinu árið 1994, en meðal annarra meistara má nefna titilhafana Dag Arngrímsson, Guðmund Kjartansson og Hjörvar Stein Grétarsson. Núverandi Íslandsmeistari barna er Vignir Vatnar Stefánsson.
 
Skáksamband Íslands og Skákakademían annast framkvæmd mótsins. Keppendur eru hvattir til að skrá sig sem fyrst hér á Skák.is. Fram þarf að koma fullt nafn, grunnskóli og fæðingarár. Þátttökugjald er 1.000 kr (1.500 að hámarki á systkini) og greiðist á mótsstað fyrir upphaf umferðar. 

Veitt eru sérstök verðlaun fyrir bestan árangur í hverjum árgangi.

Upplýsingar um þegar skráða keppendur má finna hér.

Sigurvegarar á Íslandsmóti barna frá upphafi:
 

• 1994 Sigurður Páll Steindórsson
• 1995 Hlynur Hafliðason
• 1996 Guðjón H. Valgarðsson
• 1997 Dagur Arngrímsson
• 1998 Guðmundur Kjartansson
• 1999 Víðir Smári Petersen
• 2000 Viðar Berndsen
• 2001 Jón Heiðar Sigurðsson
• 2002 Sverrir Þorgeirsson
• 2003 Hjörvar Steinn Grétarsson
• 2004 Svanberg Már Pálsson
• 2005 Nökkvi Sverrisson
• 2006 Dagur Andri Friðgeirsson
• 2007 Kristófer Gautason
• 2008 Kristófer Gautason
• 2009 Jón Kristinn Þorgeirsson
• 2010 Jón Kristinn Þorgeirsson
• 2011 Dawid Kolka
• 2012 Nansý Davíðsdóttir
• 2013 Vignir Vatnar Stefánsson

 

Nýtt fréttabréf SÍ komið út

Nýtt fréttabréf Skáksambands Íslands kom út í gær en fréttabréfið kemur út að jafnaði tvisvar á mánuði yfir vetrarmánuðina.

Hægt er að skrá sig fyrir fréttabréfinu á Skák.is - mjög ofarlega til vinstri með því að velja "Subscribe" þar á bláum fleti.

Meðal efnis er:

• Heimsmeistarar með á N1 Reykjavíkurskákmótinu
• Bragi Íslandsmeistari í netskák
• Hannes Hlífar skákmaður ársins 2013
• Íslandsmót barna fer fram í Rimaskóla á laugardaginn
• Hannes sigraði á alþjóðlegu móti í Nikaragúa
• Gunnar B og stórmeistararnir sigruðu á Atskákmóti Icelandair
• Jólapakkamót GM Hellis - Skák er góð fyrir heilann!
• Afar góð þátttaka á Skákþingi Reykjavíkur
• N1 Reykjavíkurskákmótið - niðurtalning
• N1 Reykjavíkurskákmótið - nýir keppendur
• Mót á döfinni

Fréttabréfið má nálgast hér.

Hægt er að nálgast eldri fréttabréf hér.

Íslandsmót barna fer fram á morgun

Íslandsmót barna í skák fer fram í Rimaskóla laugardaginn 11. janúar og hefst klukkan 12. Þátttökurétt hafa börnfædd 2003 og síðar og sigurvegarinn fær sæmdarheitið Íslandsmeistari barna 2014 og keppnisrétt á Norðurlandamótið í skólaskák sem haldið verður í Danmörku um miðjan febrúar, nánar tiltekið í Legolandi!
 
Alls verða tefldar 9 umferðir með 10 mínútna umhugsunartíma. Eftir 5 umferðir verður keppendum fækkað þannig að þeir sem hafa 3 vinninga eða fleiri halda áfram keppninni um Íslandsmeistaratitilinn en þeir sem hafa færri en 3 vinninga hafa lokið þátttöku.

Peðaskákmót verður haldið samhliða mótinu og hefst klukkan 13:00. Það er ætlað fyrir leikskólabörn og þau allra yngstu í grunnskólum sem eru ekki tilbúin fyrir Íslandsmótið.

Skákdeild Fjölnis verður með veitingasölu á meðan mótinu stendur.

Þetta er í 21. sinn sem keppt er um Íslandsmeistaratitil barna. Sigurður Páll Steindórsson sigraði á fyrsta mótinu árið 1994, en meðal annarra meistara má nefna titilhafana Dag Arngrímsson, Guðmund Kjartansson og Hjörvar Stein Grétarsson. Núverandi Íslandsmeistari barna er Vignir Vatnar Stefánsson.
 
Skáksamband Íslands og Skákakademían annast framkvæmd mótsins. Keppendur eru hvattir til að skrá sig sem fyrst hér á Skák.is. Fram þarf að koma fullt nafn, grunnskóli og fæðingarár. Þátttökugjald er 1.000 kr (1.500 að hámarki á systkini) og greiðist á mótsstað fyrir upphaf umferðar. 

Veitt eru sérstök verðlaun fyrir bestan árangur í hverjum árgangi.

Upplýsingar um þegar skráða keppendur má finna hér.

Sigurvegarar á Íslandsmóti barna frá upphafi:
 

• 1994 Sigurður Páll Steindórsson
• 1995 Hlynur Hafliðason
• 1996 Guðjón H. Valgarðsson
• 1997 Dagur Arngrímsson
• 1998 Guðmundur Kjartansson
• 1999 Víðir Smári Petersen
• 2000 Viðar Berndsen
• 2001 Jón Heiðar Sigurðsson
• 2002 Sverrir Þorgeirsson
• 2003 Hjörvar Steinn Grétarsson
• 2004 Svanberg Már Pálsson
• 2005 Nökkvi Sverrisson
• 2006 Dagur Andri Friðgeirsson
• 2007 Kristófer Gautason
• 2008 Kristófer Gautason
• 2009 Jón Kristinn Þorgeirsson
• 2010 Jón Kristinn Þorgeirsson
• 2011 Dawid Kolka
• 2012 Nansý Davíðsdóttir
• 2013 Vignir Vatnar Stefánsson