Ivanchuk bestur í biðskákunum

Síðustu daga hefur farið fram sérstakt skákmót í Amsterdam í Hollandi.  Þar var notast við hin gömlu "klassísku" tímamörk, þ.e. 2,5 klst. á 40 leiki og af því loknu fóru skákirnar í bið.  Þetta virtist henta Ivanchuk (2769) afar vel því hann sigraði á mótinu, hlaut 5 vinninga í 6 skákum.  Annar varð Kamsky (2744) með 4,5 vinning og þriðji varð Sutovsky (2687) með 3,5 vinning.

Mótið var ekki reiknað til skákstiga.  

Lokastaðan:

Rank	Name	Fed.	Rating	Score
1	GM Ivanchuk, Vassily	UKR	2769	5,0
2	GM Kamsky, Gata	USA	2744	4,5
3	GM Sutovsky, Emil	ISR	2687	3,5
4	GM Le Quang, Liem	VIE	2693	3.0
5	GM Muzychuk, Anna	SLO	2606	3,0
6	GM Sasikiran, Krishnan	IND	2707	1,5
7	GM Jobava, Baadur	GEO	2730	0.5

 

Heimasíða mótsins

Pardubice: Hjörvar vann - Hannes með jafntefli

Hjörvar Steinn Grétarsson (2507) vann rússneska alþjóðlega meistarann Konstantin Rjabzev (2279) í 2. umferð aðalmóts Czech Open sem fram fór í Pardubice í gær.  Hannes Hlífar Stefánsson (2515) gerði jafntefli við tékkneska FIDE-meistarann Jan Suran (2363).   Báðir hafa þeir 1,5 vinning og eru í 32.-90. sæti.  

Í 3. umferð, sem fram fer í dag, teflir Hannes við slóvenska FIDE-meistarann Aljosa Tomazini (2340) og Hjörvar við þýska FIDE-meistarann Thomas Michalczak (2364). 

Í b-flokki vann Smári Rafn Teitsson (2057) en Sigurður Eiríksson (1959) tapaði.  Smári hefur 1 vinning en Sigurður hefur 0,5 vinning.

D- og E-flokkar hófust svo í gær. 

Dawid Kolka  (1532) og Felix Steinþórsson (1329) tefla í d-flokki.  Felix vann stigaháan andstæðing (1828) en Dawid tapaði.

Róbert Leó Jónsson (1203) og Steinþór Baldursson, faðir Felix, tefla í e-flokki.  Róbert Leó vann en Steinþór tapaði.

259 skákmenn frá 30 löndum tefla í a-flokki.  Þar af eru 48 stórmeistarar.  Hannes er nr. 28 í stigaröð keppenda en Hjörvar er nr. 31.  

 

• Heimasíða mótsins
• Beinar útsendingar (Hefjast kl. 13 -15 efstu borðin)
• Myndir (Steinþór Baldursson)
• Chess-Results

Gawain Jones stafnbúi Goðans!

Í fornum ritum íslenskum er stafnbúa víða getið og þótti sæmdarheiti. Stafnbúar voru vígamenn er stóðu í stafni herskipa og var þeim falinn sá virðingarstarfi að aflífa sem flesta úr framvarðarsveit andstæðinganna. Hið rammíslenska skákfélag Goðinn hefur nú valið sér stafnbúa fyrir orrustur vetrarins. Sá er enskur og heitir Gawain Jones. Stafnbúanum er að fornum sið treyst til að þjarma að andstæðingum sínum á 1. borði Goðans á Íslandsmóti skákfélaga.

Gawain (2655) er einn af öflugustu skákmönnum Englendinga um þessar mundir þó að hann sé aðeins 24 ára að aldri. Ferill hans hefur verið afar farsæll. Hann ávann sér fyrst lýðhylli þegar hann lagði alþjóðlegan skákmeistara að velli, aðeins níu vetra. Nafnbótina stórmeistari hlaut hann svo áratug síðar. Gawain hefur vegnað vel á alþjóðlegum mótum, deildi m.a. fyrsta sæti á London Classic Open 2010 og sigraði á Breska samveldismótinu 2011. Leiktíðina 2011-2012 tefldi hann fyrir hið ágæta skákfélag Máta í fyrstu deild Íslandsmótsins og hlaut 5 vinninga af sex mögulegum. Í kjölfarið tók hann þátt í Alþjóðlega  Reykjavíkurskákmótinu í Hörpu þar sem hann hafnaði í 2.- 8. sæti. 

Gawain er maður víðförull og langförull eins og stafnbúa sæmir. Hann fæddist í Jórvíkurskíri en hefur búið á Ítalíu, Írlandi, Ástralíu og á Nýja-Sjálandi. Hann er fjölhæfur íþróttamaður, leikur tennis, hleypur vasklega og er vel liðtækur glímumaður. Það verður Goðanum því  ánægjuefni að efna til móts í íslenskri glímu, Gawain til heiðurs, þegar hann sækir Þingeyjarsýslurnar heim í haust og fróðlegt að sjá hvernig honum vegnar á þeim vettvangi. Einnig kemur til greina að Gawain tefli fjöltefli á vegum Goðans á Húsavík.

Í för með Gawain verður eiginkona hans, Sue Maroroa Jones. Sú mæta kona er nýsjálensk að uppruna og er ágæt skákona með 2035 elóstig. Sue mun án efa styrkja B-sveit Goðans með kunnáttu sinni og reynslu. 

Goðinn býður Sue og Gawain hjartanlega velkomin í raðir félagsins og væntir mikils af atfylgi þessara góðu gesta.

Pardubice: Hannes vann í fyrstu umferð - Hjörvar með jafntefli

Aðalmótið á skákhátíðinni Pardubice í Tékklandi, Czech Open, hófst í dag.   Stórmeistarinn Hannes Hlífar Stefánsson (2515) vann Rússann Vladimir Zahhartsov (2271) en alþjóðlegi meistarinn, Hjörvar Steinn Grétarsson (2507) gerði jafntefli við Constantin Goebel (2266).   

Í dag hófst einnig keppni í b-flokki.  Þar gerði Sigurður Eiríksson (1959) jafntefli en Smári Rafn Teitsson (2057) tapaði.  Keppni í neðri flokkum hefst á morgun en í neðri flokkunum tefla 4 Íslendingar til viðbótar.  

Í 2. umferð, sem fram fer á morgun, teflir Hannes við tékkneska FIDE-meistarann Jan Suran (2363) en Hjörvar við alþjóðlega meistarann Konstantin Rjabzev (2279).

• Heimasíða mótsins
• Beinar útsendingar (Hefjast kl. 13 -15 efstu borðin)
• Myndir (Steinþór Baldursson)
• Chess-Results

Prýðisárangur í Pardubice

Smári Rafn Teitsson (2057) náði góðum árangri í efsta flokki atskákmóts í Pardubice sem fram fór í gær og í dag.  Smári hlaut 4,5 vinning í 9 skákum og endaði í 69.-96. sæti en fyrirfram var honum raðað í 128. sæti á stigum.  Frammistaða Smára samsvaraði 2194 skákstigum.  

Fjórir íslenskir skákmenn tóku í c-flokki, skákmanna með minni en 1800 skákstig.  Dawid Kolka (1532) stóð sig þar afar vel, endaði í 10.-19. sæti, með 5,5 vinning í 9 skákum, en honum var fyrirfram raðað í 30. sæti.  Frammistaða hans samsvaraði 1885 skákstigum.  

Felix Steinþórsson (1329) stóð einnig mjög vel en hann hlaut 5 vinninga og endaði í 20.-35. sæti en honum var fyrirfram raðað í 36. sæti.  Frammistaða hans samsvaraði 1833 skákstigum.  

Steinþór Baldursson, faðir Felix, hlaut 3 vinninga og endaði í 81.-93. sæti en Róbert Leó Jónsson hlaut 2 vinninga og endaði í 101.-108. sæti.   

Á morgun hefst aðalmótið og þá mæta landsmennirnir Hannes Hlífar Stefánsson (2515) og Hjörvar Steinn Grétarsson (2507) meðal annars til leiks.

Mynd af Facebook-síðu Smára Rafns

• Heimasíða mótsins
• Chess-Results

Hraðskákmót í Sumarskákhöllinni í hádeginu á föstudag

Skákakademían býður til fjórða hraðskákmótsins í Sumarskákhöllinni, Þingholtsstræti, gegnt breska og þýska sendiráðinu, í hádeginu á föstudag. Hraðskákmótin í Sumarskákhöllinni hafa verið æsispennandi og skemmtileg.

Mótin eru opin skákáhugamönnum á öllum aldri og þátttaka er ókeypis. Taflið hefst klukkan 12.05 og verða tefldar 6 umferðir. Verðlaun eru veitt fyrir sigur á mótinu, bestan árangur barna á grunnskólaaldri og bestan árangur kvenna.

 

Einvígið á Borgarbókasafninu

Í aðalsafni Borgarbókasafnsins má nú finna rekka tengdan einvígi aldarinnar.   Það er gert í tilefni 40 afmælis einvígisins.  Það er Saga Kjartansdóttir, formaður Skákfélagsins ÓSK, sem vinnur í safninu, sem stendur fyrir þessu framtaki, en hugmyndin er Aðalsteins Thorarensen.

Vel til fundið og tilvalið fyrir skákákhugamenn að lesa sér til um þennan stórmerkilega atburð.  Nánar má lesa um framtak Borgarbókasafnsins á Skákhorninu.  

Myndir (Aðalsteinn Thorarensen)

Íslendingar að tafli í Pardubice

Fimm Íslendingar sitja nú að tafli í Pardubice í Tékklandi þar sem fram fer skákhátíðin Czech Open.  Aðalmótin hefjast 20. júlí, en þá bætast fleiri við, en þessa dagana eru í gangi styttri mót.  Í dag hófust atskákmót sem lýkur á morgun.  

Smári Rafn Teitsson (2057) tekur þátt í efsta flokki (G1).  Hann er nr. 128 af 164 keppendum.  Eftir 3 umferðir af 9 hefur Smári hlotið 1 vinning.  Hann hefur gert jafntefli við stigaháa andstæðinga (2366-2395).

Fjórir Íslendingar taka þátt í flokki skákmanna með minna en 1800 skákstig (G3).  Dawid Kolka (1532) og Felix Steinþórsson (2329) hafa 2 vinninga en Steinþór Baldursson, faðir Felix, og Róbert Leó Jónsson hafa 1 vinning. 

Það er nokkuð merkileg tilviljun að í fyrst umferð mætust feðgarnir Steinþór og Felix!

• Heimasíða mótsins
• Chess-Results

Ponomariov, Karjakin og Kramnik efstir í Dortmund

Ponomariov (2726), Karjakin (2779) og Kramnik (2799) eru efstir með 3,5 vinning að loknum fimm umferðum á Dortmund Sparkasen-mótinu sem nú er í fullum gangi. 

Átta skákmenn taka þátt í mótinu sem fram fer í 13.-22. júlí.  Meðalstig eru 2711 skákstig.  Í tilefni afmælis Hannesar Hlífars Stefánssonar, Jóns Viktors Gunnarssonar og Sævars Bjarnasonar verður frídagur á morgun, 18. júlí.   

• Heimasíða mótsins
• Beinar útsendingar (umferðir hefjast kl. 13 nema lokaumferðin kl. 11)
• Chessbomb

Smári Rafn: Pistill frá Pardubice

Þriðjudaginn 10. júlí 2012 héldu þrír skákmenn af stað í skákferð til Pardubice í Tékklandi. Þetta voru þeir Smári Rafn Teitsson (2057), þjálfari Íslandsmeistara barnaskólasveita (Álfhólsskóla), og tveir nemendur hans: Dawíd Kolka (1532) og Róbert Leó Jónsson (1203). Flogið var til Stuttgart og svo var tekin lest til Munchen þar sem gist var á Siddiqi Pension lengst í útjaðri borgarinnar (neðanjarðarlest á síðustu stoppistöð og svo strætó líka á síðustu stoppistöð!). Gæðin á þeim gististað voru reyndar ekki meiri en svo að eftir að hafa sloppið þaðan heilu á höldnu gekk hann undir nafninu "Shit í kúk", en nóg um það.

11. júlí tókum við svo lest til Prag og þaðan aðra á áfangastaðinn Pardubice. Við fundum eftir talsverða leit blokkina sem við búum í (blokk F, íbúð 602), hún er staðsett um 1km frá skákhöllinni.

12. júlí byrjaði svo alvaran, fyrsta mótið af fimm sem drengirnir taka þátt í og fyrsta af fjórum hjá undirrituðum (strákarnir sitja nú, 17. júlí, að tafli í parahraðskákmóti). Um sjö umferða opna liðakeppni var að ræða, fjórir í liði (F-mótið). Við fundum unga þýska stelpu til að tefla með okkur sem fjórða mann, og þótt hún hafi ekki fengið vinning erum við henni þakklátir að hafa gefið okkur möguleikann á að taka þátt. Við kölluðum liðið okkar Iceland (og biðjum alla velvirðingar á að hafa endað í 91. sæti af 103!) .Bæði Dawíd og ég hækkum á stigum, og Róbert Leó, sem er ekki með alþjóðleg stig, sýndi frammistöðu upp á 1801 stig. Sannarlega glæsilegt hjá Róberti, sem er að tefla af meiri styrk en ég hef áður séð hjá honum. Róbert Leó vann góðan sigur á +1900 stiga manni í fyrstu umferð og kom í veg fyrir að við töpuðum á núllinu (við töpuðum aldrei á núllinu í þessu móti og vorum nokkuð sáttir með það, enda sterkt mót). Róbert vann einnig +1700 stiga mann og gerði traust jafntefli við +1800 stiga mann. Róbert Leó fékk 2,5 v. í sex tefldum skákum (við fengum skottu í 4. umferð).

Hjá Dawíd vantaði oft herslumuninn, en þessi ellefu ára strákur er hér að öðlast mikilvæga reynslu. Hann fékk 1,5 v. af sex og hækkar þó um 22 stig. Hann gerði jafntefli við 1922 stiga mann í 5. umferð og vann svo örugggan sigur á 1738 stiga manni í 7. og síðustu umferð.

Eftir að hafa tapað naumlega fyrir 2084 stiga manni í fyrstu umferð hrökk Smári í gang og tapaði ekki skák eftir það. Í 2. umferð pressaði ég (Smári) stíft til vinnings með hvítu gegn Markusi Bach (2060), sem varðist vel og á endanum tók ég jafntefliboði nr. 2. Í næstu tveimur skákum vann ég býsna örugga sigra gegn 1900 stiga mönnum og í 6. umferð kom heltraust jafntefli með svörtu á móti Karel Krondraf (2173).

7. umferðin er svo kapítuli út af fyrir sig. Í mínu tilviki fyrir það að skákin tefldist svona: 1 e4: 1-0. Búið. Mér fannst skrýtið strax í upphafi umferðarinnar að lið andstæðinganna samanstóð af þrem eldri mönnum sem settust á borð 2-4. Í ljós kom að maðurinn á 2. borði þorði einfaldlega ekki að tefla við mig og ákvað að hann ætti meiri séns á mót ellefu ára snáða. Ég get ekki neitað því að það hlakkaði dálítið í mér þegar Dawíd tók hann síðan gjörsamlega í bakaríið. Þessi maður hélt því fram við mig að e-r 2010 stiga maður myndi kannski og kannski ekki mæta innan klukkutíma og tefla á fyrsta borði. Lúalegt, því þessir þrír vissu allir að skráði fyrsta borðs maðurinn myndi aldrei mæta, því þegar ég fór og kvartaði til skákstjóranna kom í ljós að sá hafði ekki teflt eina einustu skák í mótinu. Skákstjórarnir sögðust þó ekkert geta gert í málinu, en að hert yrði á reglunum fyrir næsta mót (töluðu um sektir og jafnvel brottvísanir fyrir svona framkomu). Þetta kostaði okkur að hugsanlega fyrsti (og eini) sigur okkar í mótinu var tekinn af okkur vegna þessarar óíþróttamannslegu framkomu andstæðinganna. Ég og Dawíd unnum, en Róbert og Anushka töpuðu, en öll hefðu þau átt með réttu að fá léttari andstæðinga. Talandi um óíþróttamannslega framkomu þá var reyndar mesta dramatíkin á fjórða borði, þar sem andstæðingarnir pirruðu hina tólf ára gömlu Anushku með því að vera oft að tala á meðan umferðinni stóð, og vildi hún meina að þeir hafi verið að ræða leiki í skák hennar. Á endanum varð hún mjög reið og neitaði að tefla áfram, en pabbi hennar taldi hana á að halda áfram. Það gneistaði milli hennar og andstæðingsins og þurfti skákstjórinn að standa yfir þeim. Hann bað mig að segja henni eftir skákina að hún hefði sýnt óíþróttamannslega hegðun með því að gefa ekki fyrr (hún var vissuleg miklu liði undir). Rök hans voru m.a. þau að andstæðingurinn hefði getað fengið hjartaáfall og dáið. Þrátt fyrir að það sé vissulega alltaf möguleiki finnst mér vafasamt að ætla að banna henni að tefla til enda. Ég sagði honum að patt væri alltaf möguleiki, því hlyti hún að mega lifa í voninni um það.

Í gær 16. júlí var svo parakeppni, Czech pairs rapid open, umhugsunartími 10-5. Ég og Dawíd tefldum saman og Róbert tefldi með rússneskum skákmanni. Róbert hélt áfram að tefla vel og vann meðal annars 2060 stiga mann. Við Dawíd mættum í fyrstu umferð Rússunum GM Ramil Hasangatin (2504) og IM Iulia Mashinskaya (2285). Dawíd var hársbreidd frá jafntefli, en ég gerði hið óvænta og vann stórmeistarann, slíkt hefur ekki gerst hjá mér áður. Þetta var greinilega minn dagur, því ég vann einnig Vaclav Svoboda (2386) og fleiri góða, og endaði með sex v. af sjö í nokkuð sterku móti. Minn besti árangur á ferlinum held ég að ég geti fullyrt. Í lokin voru nokkur pör lesin upp og verðlaunuð, og þar á meðal Teitsson-Kolka. Ég veit reyndar ekki nákvæmlega fyrir hvað, en allavega fannst mér við alveg eiga skilið verðlaun! Við vorum jafntefliskóngarnir, með fimm jafnteflisviðureignir (1-1), einn sigur )2-0) og eitt tap (0-2). Gerðum samt engin jafntefli í skákum okkar!

Í dag 17. júlí tefldu svo Róbert og Dawíd á Blitz pairs open (umhugsunartími: 5-0) og enduðu í 23. sæti af 26. Mótið var sterkt, og árangurinn því fullkomlega viðunandi. Vegna góðs gengis Róberts í liðakeppninni varð úr að hann tefldi á fyrsta borði og Dawíd og 2. Róbert fékk 2,5 v. af 11 og Dawíd 6/11.

Í ferðinni það sem af er höfum við þrátt fyrir allt náð að gera sitthvað fleira en að tefla, meðal annars farið tvisvar í sundhöllina og tvisvar í bíó. Veðrið hefur verið sæmilegt, þó ekkert spes. Felix og pabbi hans koma í dag og brátt bætast einnig Hannes Hlífar, Hjörvar og Siggi Eiríks í hópinn. Á morgun og hinn tefla Smári, Róbert, Dawíd og Felix í Czech Rapid Open, umhugsunartími 15-10. Skákhátíðin í Pardubice samanstendur af mörgum mótum, aðalmótið Czech Open byrjar 20. júlí.

Skrifað í Pardubice 17. júlí 2012

Smári Rafn Teitsson