Smári Rafn: Pistill frá Pardubice

Þriðjudaginn 10. júlí 2012 héldu þrír skákmenn af stað í skákferð til Pardubice í Tékklandi. Þetta voru þeir Smári Rafn Teitsson (2057), þjálfari Íslandsmeistara barnaskólasveita (Álfhólsskóla), og tveir nemendur hans: Dawíd Kolka (1532) og Róbert Leó Jónsson (1203). Flogið var til Stuttgart og svo var tekin lest til Munchen þar sem gist var á Siddiqi Pension lengst í útjaðri borgarinnar (neðanjarðarlest á síðustu stoppistöð og svo strætó líka á síðustu stoppistöð!). Gæðin á þeim gististað voru reyndar ekki meiri en svo að eftir að hafa sloppið þaðan heilu á höldnu gekk hann undir nafninu "Shit í kúk", en nóg um það.

11. júlí tókum við svo lest til Prag og þaðan aðra á áfangastaðinn Pardubice. Við fundum eftir talsverða leit blokkina sem við búum í (blokk F, íbúð 602), hún er staðsett um 1km frá skákhöllinni.

12. júlí byrjaði svo alvaran, fyrsta mótið af fimm sem drengirnir taka þátt í og fyrsta af fjórum hjá undirrituðum (strákarnir sitja nú, 17. júlí, að tafli í parahraðskákmóti). Um sjö umferða opna liðakeppni var að ræða, fjórir í liði (F-mótið). Við fundum unga þýska stelpu til að tefla með okkur sem fjórða mann, og þótt hún hafi ekki fengið vinning erum við henni þakklátir að hafa gefið okkur möguleikann á að taka þátt. Við kölluðum liðið okkar Iceland (og biðjum alla velvirðingar á að hafa endað í 91. sæti af 103!) .Bæði Dawíd og ég hækkum á stigum, og Róbert Leó, sem er ekki með alþjóðleg stig, sýndi frammistöðu upp á 1801 stig. Sannarlega glæsilegt hjá Róberti, sem er að tefla af meiri styrk en ég hef áður séð hjá honum. Róbert Leó vann góðan sigur á +1900 stiga manni í fyrstu umferð og kom í veg fyrir að við töpuðum á núllinu (við töpuðum aldrei á núllinu í þessu móti og vorum nokkuð sáttir með það, enda sterkt mót). Róbert vann einnig +1700 stiga mann og gerði traust jafntefli við +1800 stiga mann. Róbert Leó fékk 2,5 v. í sex tefldum skákum (við fengum skottu í 4. umferð).

Hjá Dawíd vantaði oft herslumuninn, en þessi ellefu ára strákur er hér að öðlast mikilvæga reynslu. Hann fékk 1,5 v. af sex og hækkar þó um 22 stig. Hann gerði jafntefli við 1922 stiga mann í 5. umferð og vann svo örugggan sigur á 1738 stiga manni í 7. og síðustu umferð.

Eftir að hafa tapað naumlega fyrir 2084 stiga manni í fyrstu umferð hrökk Smári í gang og tapaði ekki skák eftir það. Í 2. umferð pressaði ég (Smári) stíft til vinnings með hvítu gegn Markusi Bach (2060), sem varðist vel og á endanum tók ég jafntefliboði nr. 2. Í næstu tveimur skákum vann ég býsna örugga sigra gegn 1900 stiga mönnum og í 6. umferð kom heltraust jafntefli með svörtu á móti Karel Krondraf (2173).

7. umferðin er svo kapítuli út af fyrir sig. Í mínu tilviki fyrir það að skákin tefldist svona: 1 e4: 1-0. Búið. Mér fannst skrýtið strax í upphafi umferðarinnar að lið andstæðinganna samanstóð af þrem eldri mönnum sem settust á borð 2-4. Í ljós kom að maðurinn á 2. borði þorði einfaldlega ekki að tefla við mig og ákvað að hann ætti meiri séns á mót ellefu ára snáða. Ég get ekki neitað því að það hlakkaði dálítið í mér þegar Dawíd tók hann síðan gjörsamlega í bakaríið. Þessi maður hélt því fram við mig að e-r 2010 stiga maður myndi kannski og kannski ekki mæta innan klukkutíma og tefla á fyrsta borði. Lúalegt, því þessir þrír vissu allir að skráði fyrsta borðs maðurinn myndi aldrei mæta, því þegar ég fór og kvartaði til skákstjóranna kom í ljós að sá hafði ekki teflt eina einustu skák í mótinu. Skákstjórarnir sögðust þó ekkert geta gert í málinu, en að hert yrði á reglunum fyrir næsta mót (töluðu um sektir og jafnvel brottvísanir fyrir svona framkomu). Þetta kostaði okkur að hugsanlega fyrsti (og eini) sigur okkar í mótinu var tekinn af okkur vegna þessarar óíþróttamannslegu framkomu andstæðinganna. Ég og Dawíd unnum, en Róbert og Anushka töpuðu, en öll hefðu þau átt með réttu að fá léttari andstæðinga. Talandi um óíþróttamannslega framkomu þá var reyndar mesta dramatíkin á fjórða borði, þar sem andstæðingarnir pirruðu hina tólf ára gömlu Anushku með því að vera oft að tala á meðan umferðinni stóð, og vildi hún meina að þeir hafi verið að ræða leiki í skák hennar. Á endanum varð hún mjög reið og neitaði að tefla áfram, en pabbi hennar taldi hana á að halda áfram. Það gneistaði milli hennar og andstæðingsins og þurfti skákstjórinn að standa yfir þeim. Hann bað mig að segja henni eftir skákina að hún hefði sýnt óíþróttamannslega hegðun með því að gefa ekki fyrr (hún var vissuleg miklu liði undir). Rök hans voru m.a. þau að andstæðingurinn hefði getað fengið hjartaáfall og dáið. Þrátt fyrir að það sé vissulega alltaf möguleiki finnst mér vafasamt að ætla að banna henni að tefla til enda. Ég sagði honum að patt væri alltaf möguleiki, því hlyti hún að mega lifa í voninni um það.

Í gær 16. júlí var svo parakeppni, Czech pairs rapid open, umhugsunartími 10-5. Ég og Dawíd tefldum saman og Róbert tefldi með rússneskum skákmanni. Róbert hélt áfram að tefla vel og vann meðal annars 2060 stiga mann. Við Dawíd mættum í fyrstu umferð Rússunum GM Ramil Hasangatin (2504) og IM Iulia Mashinskaya (2285). Dawíd var hársbreidd frá jafntefli, en ég gerði hið óvænta og vann stórmeistarann, slíkt hefur ekki gerst hjá mér áður. Þetta var greinilega minn dagur, því ég vann einnig Vaclav Svoboda (2386) og fleiri góða, og endaði með sex v. af sjö í nokkuð sterku móti. Minn besti árangur á ferlinum held ég að ég geti fullyrt. Í lokin voru nokkur pör lesin upp og verðlaunuð, og þar á meðal Teitsson-Kolka. Ég veit reyndar ekki nákvæmlega fyrir hvað, en allavega fannst mér við alveg eiga skilið verðlaun! Við vorum jafntefliskóngarnir, með fimm jafnteflisviðureignir (1-1), einn sigur )2-0) og eitt tap (0-2). Gerðum samt engin jafntefli í skákum okkar!

Í dag 17. júlí tefldu svo Róbert og Dawíd á Blitz pairs open (umhugsunartími: 5-0) og enduðu í 23. sæti af 26. Mótið var sterkt, og árangurinn því fullkomlega viðunandi. Vegna góðs gengis Róberts í liðakeppninni varð úr að hann tefldi á fyrsta borði og Dawíd og 2. Róbert fékk 2,5 v. af 11 og Dawíd 6/11.

Í ferðinni það sem af er höfum við þrátt fyrir allt náð að gera sitthvað fleira en að tefla, meðal annars farið tvisvar í sundhöllina og tvisvar í bíó. Veðrið hefur verið sæmilegt, þó ekkert spes. Felix og pabbi hans koma í dag og brátt bætast einnig Hannes Hlífar, Hjörvar og Siggi Eiríks í hópinn. Á morgun og hinn tefla Smári, Róbert, Dawíd og Felix í Czech Rapid Open, umhugsunartími 15-10. Skákhátíðin í Pardubice samanstendur af mörgum mótum, aðalmótið Czech Open byrjar 20. júlí.

Skrifað í Pardubice 17. júlí 2012

Smári Rafn Teitsson

Athugasemdir

[Katrín Lilja Sigurðardóttir (IP-tala skráð) 17.7.2012 kl. 22:18]

Hæhæ

Skemmtileg ferðasaga! Gaman að sjá að þið skemmtið ykkur vel og hversu vel hefur gengið að tefla. :)

Þetta er greinilega mikil reynsla fyrir strákana!

Kv,

Katrín