Björn Sigurjónsson látinn

Fide-meistarinn Björn Sölvi Sigurjónsson lést á Landspítalanum þann 22. desember eftir veikindi.  Björn varð þrívegis skákmeistari Kópavogs auk þess að verða bæði Reykjavíkur- og Akureyrarmeistari. Síðustu misseri bjó Björn Sölvi í Hveragerði þar sem hann stundaði skriftir og bjó til skákþrautir með öðru.

Björn var ávallt mikill TR-ingur en eftir langt hlé frá skákinni gekk hann til liðs við Skákfélag Vinjar fyrir nokkrum árum og tók þátt í deildakeppninni frá því að liðið var skráð í Skáksambandið. Það var ekki síst fyrir frammistöðu hans sem liðið komst í þriðju deild eftir tímabilið 2009-2010, þar sem Björn fékk sex vinninga af sjö mögulegum, enda titlaður „jóker" Vinjarmanna.

Í öðru tbl veftímaritsins Skák, árið 2009 var mikil grein um Björn Sölva og hvaða þátt hann hafði í framgöngu Skákfélags Vinjar, en að öðru leyti byggð á samantekt Trausta Björnssonar sem birtist í tímaritinu skák, jan/feb 2002 undir formerkjunum „íslenskir skákmeistarar".http://www.skaksamband.is/assets/Timaritid_Skak/TimaritidSkak-2tbl.pdf

Skákþáttur Morgunblaðsins: Fremstur meðal jafningja

Tigran Petrosjan hafði þessi orð um stöðu heimsmeistarans í skák á hverjum tíma. Þessi skilgreining hentaði honum ágætlega; þegar hann hélt titlinum frá 1963-'69 vann hann sjaldan þau mót sem hann tók þátt í enda lagði hann alltaf aðaláherslu á að tapa ekki og gaf því frá sér alltof marga hálfa vinninga, eins og Bent Larsen orðaði það.

Staða heimsmeistarans, Anands, hefur verið til athugunar eftir tvö stórmót, minningarmótið um Tal á dögunum og London chess classic sem lauk á mánudaginn. Í þessum tveimur mótum vann Anand eina skák, gerði 15 jafntefli og tapaði einni. Hann gat enga skýringu gefið á dauflegri frammistöðu sinni en stutt er í einvígi hans við Boris Gelfand og hefðu ýmsir talið að hægt væri að finna verðugri mótstöðumenn.

„Við erum allir í ræsinu, en sumir okkar eru að horfa á stjörnurnar," sagði Oscar Wilde. Anand kom skemmtilega á óvart með þátttöku sinni í „stjörnuþokuspjalli", hliðaratburði á London chess classic-mótinu sem enski stórmeistarinn og stærfræðingurinn John Nunn stóð fyrir. Þar sýndu þeir magnaðar myndir sem þeir hafa tekið í gegnum stjörnukíki. Kannski hefur undirbúningur þess verkefnis komið niður á frammistöðu hans við skákborðið en lokaniðurstaða mótsins, þar sem þriggja stiga reglan var í gildi, varð þessi:

1. Kramnik 16 stig. 2. Nakamura 15 stig. 3. Carlsen 14 stig.

4. Luke McShane 13 stig. 5.-6. Anand og Aronjan 9 stig. 7. Short 6 stig. 8. Howell 4 stig. 9. Adams 3 stig.

Slök frammistaða ensku stórmeistaranna vakti mikla athygli en þrír neðstu menn fengu jafnmarga vinninga samanlagt og sigurvegarinn Kramnik sem vann alla Englendinga. Þótt Magnús Carlsen hafi mátt gera sér 3. sætið að góðu treysti hann stöðu sína á toppnum og lagði Nakamura að velli. Í skákinni sem hér fer á eftir neitaði Nakamura að leggjast í vörn þegar þess þurfti:

Magnús Carlsen - Hikaru Nakamura

Ítalskur leikur

1. e4 e5 2. Rf3 Rc6 3. Bc4 Rf6 4. d3 Bc5 5. c3 d6 6. Bb3 a6 7. Rbd2 Ba7 8. Rf1 h6 9. Rg3 0-0 10. 0-0 Be6 11. h3 Dd7 12. Be3 Re7 13. Rh4 Rg6

Eftir 13.... Bxe3 14. fxe3 hefur hvítur sóknarfæri eftir f-línunni og trausta stöðu á f5-reitnum. Það breytist þó ekki þótt svartur stofni nú til uppskipta.

14. Rhf5 Re7 15. Rxe7 Dxe7 16. Bxa7 Hxa7 17. f4 c5 18. Bc2 b5 19. Dd2 Hb7 20. a3 a5 21. Hf2 b4 22. axb4 axb4 23. Haf1

Sjaldan er slæmt að tvöfalda hrókana eftir opnum eða hálfopnum línum. Hvítur hótar nú 24. fxe5 dxe5 25. Hxf6! gxf6 26. Rh5 o.s.frv.

23.... bxc3 24. bxc3 exf4 25. Hxf4 Rh7 26. d4 cxd4 27. cxd4 Dg5 28. Kh2 Rf6 29. Bd1 Hfb8?

Svartur mátti ekki leyfa fórnina á f6. Eftir 29.... Rh7 er staðan í jafnvægi.

30. h4 Dg6

- Sjá stöðumynd -

31. Hxf6!

Þessi skiptamunarfórn blasir við. Eftirfylgnin er lærdómsrík, Magnús ræðst hvergi beint að andstæðingnum heldur bætir stöðu hægt og bítandi.

31.... gxf6 32. Df4!

Betra en 31. Rh5 sem má svara með 31.... f5.

32.... Hb2?

Svartur varð að verja d6-peðið með 32.... Hd8.

33. Bh5! Dg7 34. Bf3 Ha8?

Enn var betra að verjast með 34.... Hd8.

35. d5 Bc8 36. Rh5 Df8 37. Rxf6+ Kh8 38. Hc1! Kg7 39. e5 dxe5 40. Rh5 Kh7 41. Be4+

Eftir 41.... Kh8 kemur 42. Dxe5+ og hrókurinn á b2 fellur. Svartur gafst upp.

Helgi Ólafsson [e-mail]

-------------------------------------------

Skákþættur Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 18. desember 2011.

Skákþættir Morgunblaðsins

[Event "London Chess Classic"] [Site "1:14:33-0:55:33"] [Date "2011.12.05"] [EventDate "2011.12.03"] [Round "3"] [Result "1-0"] [White "Carlsen"] [Black "Nakamura"] [ECO "C50"] [WhiteElo "?"] [BlackElo "?"] [PlyCount "2"] 1.e4 e5 2.Nf3 Nc6 3.Bc4 Nf6 4.d3 Bc5 5.c3 d6 6.Bb3 a6 7.Nbd2 Ba7 8.Nf1 h6 9.Ng3 O-O 10.O-O Be6 11.h3 Qd7 12.Be3 Ne7 13.Nh4 Ng6 14.Nhf5 Ne7 15.Nxe7+ Qxe7 16.Bxa7 Rxa7 17.f4 c5 18.Bc2 b5 19.Qd2 Rb7 20.a3 a5 21.Rf2 b4 22.axb4 axb4 23.Raf1 bxc3 24.bxc3 exf4 25.Rxf4 Nh7 26.d4 cxd4 27.cxd4 Qg5 28.Kh2 Nf6 29.Bd1 Rfb8 30.h4 Qg6 31.Rxf6 gxf6 32.Qf4 Rb2 33.Bh5 Qg7 34.Bf3 Ra8 35.d5 Bc8 36.Nh5 Qf8 37.Nxf6+ Kh8 38.Rc1 Kg7 39.e5 dxe5 40.Nh5+ Kh7 41.Be4+ 1-0

Jólaskákþrautir Skáklandsins halda áfram

Annar hluti skákþrauta Skáklandsins birtust á Skáklandinu í DV í dag.  Þriðji hlutinn birtist á morgun.  Skákáhugamenn eru hvattir til að taka þátt!  Góð verðlaun eru í boði. 

Lausnir skal senda á netfangið [e-mail] þar sem áður útgefið netfangið þoldi ekki álagið.

Skáklandið á DV 

 

Jólaskákmót TV fer fram í dag

Eftir gamalli hefð verður Jólaskákmót TV haldið á Jóladag og hefst kl. 13:00.  Allir félagsmenn og aðrir velunnarar félagsins eru að venju velkomnir.  Jólakonfekt í verðlaun.

Býsna ítarleg umfjöllun um Jólaskákmót TV og tilurð þess má finna á heimasíðu TV.

Gleðileg skákjól!

Ritstjóri óskar öllum skák og skákáhugamönnum nær og fær gleðilegra jóla. 

Skákmenn þurfa ekki að örvænta um jólin því a.m.k. 11 skákmót fara fram á milli jóla og nýárs víðsvegar um landið!

Það eru:

• 25. desember - Jólaskákmót TV
• 27. desember - Hraðskákmót Goðans
• 27. desember - Hverfakeppni SA
• 27. desember - Jólaskákmót Víkingaklúbbsins
• 28. desember - Jólahraðskákmót SA
• 28. desember - Jólahraðskákmót TR
• 28. desember - Flugeldamót SSON
• 28. desember - Jólaskákmót Riddarans (60+)
• 29. desember - Íslandsmótið í netskák (ICC)
• 29. desember - Jólaskákmót Gallerý Skákar
• 30. desember - Jólabikarmót Hellis

Mótin verða nánar kynnt á Skák.is sama dag og þau fara fram.

Gleðileg skákjól!

Jólaskákþrautir Skáklandsins

Stefán Bergsson, ritstjóri Skáklandsins á DV, hefur sett upp jólaskákþrautir á vefsíðu Skáklandsins.  45 þrautir/spurningar munu þar birtast næstu daga.

Sjón er sögu ríkari og eru skák(áhuga)menn hvattir til að taka þátt.

Skáklandið á DV 

 

Jólaskákmót Riddarans haldið 28. desember

RIDDARINN - skákklúbbur eldri borgara- efnir til glæsilegs jólaskákmóts miðvikudaginn 28. desember nk. í höfuðstöðvum sínum  í  Standbergi, safnaðarheimili Hafnarfjarðarkirkju, þar sem fjölmargir gamalreyndir gamlingjar hittast til tafls allan ársins hring, sér til ánægju og yndisauka, þó sumir séu vissulega tapsárari en aðrir.  Ný vinningsskák læknar þó öll sár um síðir.  Áberandi er hvað öldungarnir eru lítið gefnir fyrir jafntefli - vilja tefla til þrautar.  

Veglegir jólapakkar verða í verðlaun frá Urði Bókaútgáfu í JÓLAKAPPINU.  Jafnframt verða dregnir út góðir vinningar í JÓLAHAPPINU sem efnt verður til í mótslok en Jói Útherji og Halldór skósmiður í Grímsbæ sjá til þess að enginn fari í jólaköttinn.

Tefldar  verða 11 umferðir að venju með 10 mín uht. og hefst mótið kl. 13 og lýkur um 5 leitið.  Þátttökugjald er kr. 300 og innifelur kaffi og kræsingar. Allir liðtækir skákmenn 60 ára og eldri velkomnir.

Klúbburinn sendir öllum skákunnendum fjær og  nær bestu hátíðarkveðjur.

 

Þrjú skákmót hjá SA yfir hátíðirnar

Eins og oftast verður nóg um að vera hjá skákáhugamönnum fyrir Norðan um jólin. Næst á dagskrá er hin árlega hverfakeppni sem háð verður þriðja í jólum, 27. desember og hefst kl. 20.  Eins og í fyrra er gert ráð fyrir tveimur sveitum, norðan og sunnan Glerár. Tefldar verða ein eða tvær 15 mínútna skákir í upphafi og að því loknu bændaglíma í hraðskák. Áhugamenn eru hvattir til að fjölmenna; allir fá að vera með meðan húsrúm leyfir. Liðstjórar eru Áskell Örn Kárason (sunnan) og Smári Ólafsson (norðan).

Næst á dagskrá verður svo sjálft jólahraðskákmótið. Það hefur verið auglýst 29. desember en nú hefur verið ákveðið að flýta því um einn dag, vegna Íslandsmótsins í netskák, sem er á dagskrá þann 29. Sumsé, jólahraðskákmót 28. desember kl. 20!

Þá er líka minna á hið arfavinsæla nýjársmót félagsins, sem akkúrat fer fram á nýjársdag og hefst í síðasta lagi kl. 14. Þeir sem reynt hafa vita að betur er ekki hægt að fagna nýju ári en að láta máta sig á þessu móti! Eftir það liggur leiðin klárlega upp á við!

Jólaskákmót TV á Jóladag

Eftir gamalli hefð verður Jólaskákmót TV haldið á Jóladag og hefst kl. 13:00.  Allir félagsmenn og aðrir velunnarar félagsins eru að venju velkomnir.  Jólakonfekt í verðlaun.

Býsna ítarleg umfjöllun um Jólaskákmót TV og tilurð þess má finna á heimasíðu TV.

Jólahraðskákmót TR fer fram 28. desember

Jólahraðskákmót Taflfélags Reykjavíkur verður haldið miðvikudaginn 28. desember kl. 19.30.  Tefldar verða 9 umferðir með 5 mínútna umhugsunartíma.  Mótið fer fram í húsnæði T.R. að Faxafeni 12.  Þátttökugjald er kr. 500 en frítt fyrir 15 ára og yngri. Verðlaun fyrir þrjú efstu sætin.