Jólabikarmót Hellis fer fram 30. desember

Jólabikarmót Hellis fer fram föstudaginn 30. desember nk og hefst taflið kl. 19.30. Fyrirkomulagið verður þannig að tefldar verða hraðskákir með fimm mínútna umhugsunartíma og eftir Monrad kerfi. Eftir fimm töp falla keppendur úr leik. Þannig verður teflt þangað til einn stendur eftir og allir andstæðingarnir fallnir úr leik. Teflt er í félagsheimili Hellis í Álfabakka 14a í Mjóddinni.

Þrír efstu fá bikara í verðlaun. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Íslandsmótið í netskák fer fram 29. desember á ICC

Íslandsmótið í netskák fer fram, fimmtudaginn 29. desember á ICC og hefst kl. 20. Mótið er öllum opið og er teflt er einum flokki.  Skráning fer fram á Skák.is.

Allt skráningarferlið er sjálfkrafa og eina sem þátttakendur þurfa að hafa í huga er að vera mættir tímanlega á ICC eða eigi síðar en kl. 19:50.   Tímamörk eru 4 2 (4 mínútur + 2 viðbótarsekúndur á hvern leik).    

Þeir sem ekki eru skráðir á ICC geta skráð sig á vef ICC en ekki þarf að greiða fyrir fyrstu vikuna. Að því loknu er hægt að skrá sig á Skák.is.  Þeir sem ekki hafa hugbúnað til að tefla geta halað niður þar til gerðu forriti (mælt er með Blitzin eða Dasher).   Einnig er hægt að tefla í gegnum java-forrit.  Þar sem allir keppendur þurfa að vera á svokallaðri Íslands-rás er æskilegt að menn slái inn "g-join Iceland" við næstu/fyrstu innskráningu á ICC.

Núverandi Íslandsmeistari í netskák er Davíð Kjartansson.

Fyrirspurnir sendist til Omars Salama, umsjónarmanns mótsins í netfangið [e-mail].

Verðlaun:

1. kr. 10.000
2. kr. 6.000
3. kr. 4.000

Auk þess verða í boði frímánuðir á ICC í einstaka aukaflokkum en frá því verður betur greint fljótlega.

Hægt er að fylgjast með skráningu hér.  

KORNAX mótið 2012 - Skákþing Reykjavíkur hefst 8. janúar

KORNAX mótið 2012 - Skákþing Reykjavíkur hefst sunnudaginn 8. janúar kl. 14. Tefldar verða 9 umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19.30 og á sunnudögum kl. 14.  Teflt er í húsnæði Taflfélags Reykjavíkur að Faxafeni 12.

Verðlaun:

• 1. sæti kr. 100.000
• 2. sæti kr. 50.000
• 3. sæti kr. 25.000
• Besti árangur undir 2000 skákstigum kr. 10.000 (íslensk stig gilda)
• Besti árangur undir 1800 skákstigum kr. 10.000 (íslensk stig gilda)
• Besti árangur undir 1600 skákstigum - bókaverðlaun (íslensk stig gilda)
• Besti árangur undir stigalausra - bókaverðlaun

Sigurvegarinn hlýtur auk þess nafnbótina Skákmeistari Reykjavíkur 2012 og farandbikar til varðveislu í eitt ár.  Núverandi Skákmeistari Reykjavíkur er Björn Þorfinnsson.

Þátttökugjöld:

• kr. 4.000 fyrir 16 ára og eldri
• kr. 2.000 fyrir 15 ára og yngri

Dagskrá:

• 1. umferð sunnudag   8. janúar  kl. 14
• 2. umferð miðvikudag 11. janúar  kl. 19.30
• 3. umferð föstudag     13. janúar  kl. 19.30
• 4. umferð sunnudag   15. janúar  kl. 14
• 5. umferð miðvikudag 18. janúar  kl. 19.30
• 6. umferð föstudag      20. janúar  kl. 19.30
• 7. umferð sunnudag    22. janúar  kl. 14
• 8. umferð miðvikudag 25. janúar  kl. 19.30
• 9. umferð föstudag      27. janúar  kl. 19.30

Skákþingið er reiknað til alþjóðlegra skákstiga.

Skráning fer fram á heimasíðu Taflfélags Reykjavíkur, http://www.taflfelag.is.

Athugið að skráningu lýkur 15 mínútum fyrir auglýst upphaf móts, þ.e. kl. 13.45.

Ný heimasíða Smára Rafns

Skákkennarinn Smári Rafn Teitsson hefur sett upp skáksíðu á engilsaxnesku.  Slóðin á hana má finna hér:  http://chessproducts.co.uk/

Smári er búinn að setja nú þegar 90 flokkaðar þrautir á hana og nokkrar skákir, og mun bæta við jafnt og þétt.  Einnig er hann með flipa fyrir byrjendur, það stæði mun stækka líka.

Síðan verður aðgengileg á tenglasafninu til vinstri undir lykilvefir.  

Tómas og Bragi tvískákmeistarar Akureyrar

Sl. sunnudag var háð Íslandsmót í akureyrartvískák, hið fyrsta sinnar tegundar um árabil.  Í stuttu máli þá tefla menn tveir í liði og leika til skiptis. Er þá mikilvægt að samhæfa skákhugsun sem mest má, en í þetta sinn var þó enginn tími gefinn til slíks undirbúnings. Í skipan liðanna var höfð sú regla að paraðir voru saman fulltíða maður og unglingur.

Svo jafnt væri í báðum flokkum, gekk elsti keppandinn, Bragi Pálmason, í barndóm og gerðist unglingur í annað sinn. Hófst svo taflið og lauk sem hér segir, eftir að allir höfðu teflt sex skákir með því að leika annan hvorn leik:

1. Tómas Veigar Sigurðarson/Bragi Pálmason 4,5 

2-4. Sigurður Eiríksson/Andri Freyr Björgvinsson, Jón Kristinn Þorgeirsson/Þorgeir Smári Jónsson("Fumlausir feðgar") og Sigurður Arnarson/Hjörtur Snær Jónsson 3,5

5. Benedikt Smári Ólafsson og Benedikt Stefánsson ("Nafnar") 3

6. Gunnar Aðalgeir Arason/Ari Gunnar Óskarsson("fræknir feðgar") 2

7. Hersteinn Bjarki Heiðarsson/Haki Jóhannesson  1

Nú fara skákmenn fyrir Norðan í örstutt jólafrí en koma næst saman í hinni árlegu hverfakeppni sem háð verður 27. desember nk.

Heimasíða SA (ítarlegri frétt með krúsídúllum!)

Enn fleiri myndir frá Friðriksmóti Landsbankans

Enn fleiri myndir hafa borist frá Friðriksmóti Landsbankans, teknar af Hilmari Þór Guðmyndssyni.   Einnig hafa borist myndir frá Pálma R. Péturssyni og Einari S. Einarssyni.  Áður höfðu birst myndir frá Hrafni Jökulssyni.

Allar myndirnar má finna í myndaalbúmi mótsins.

Hér að má sjá nokkrar myndir teknar af Hilmari sem hirðljósmyndari Landsbankans.  

 

 Úrslitaskákin - Henrik vann Jón L.

 

 

 Ungir og efnilegir: Heimir, Hilmir, Vignir og Bjarki

 

  Heimsmeistarar tefla: Sá fyrsti og sá nýjasti

 Utanríkisráðherra og Hrafn Jökulsson spá í spilin - skák eða pólítík?

 Fjórmenningarklíkan? - ekki alveg, Helgi Áss í stað Margeirs

 Kátar skákstelpur: Veronika, Nansý, Donika og Halla

 

Hilmir Freyr vann jólamót Skákakdemíu Kópvogs og Skákskóla Íslands

Jólamót Skákakdemíu Kópvogs og Skákskóla Íslands fór fram í hinni glæsilegu stúku Kópavogsvallar föstudaginn 16. desember. Keppendur voru 18 talsins og tefldu í tveim riðlum. Sigurvegarar hvors riðils tefldu síðan eina 5- mínútna hraðskák um efsta sætið og þeir sem urðu í 2. sæti í riðlunum tveimur tefldu um 3. verðlaun.

Úrslit urðu á þann veg að í úrslitaviðureigninni um 1. verðlaun mættust Hilmir Freyr Heimisson, sigurvegari A-riðils og Róbert Örn Vigfússon, sigurvegari B-riðils og vann Hilmir Freyr eftir að hafa haft erfiða stöðu lengst af. Í barárttunni um 3. sætið vann Róbert Leó Jónsson Hildi Berglindi Jóhannsdóttir.   Í A - riðli vann Hilmir Freyr allar skákir sínar sjö talsins og Róvert Leó kom næstur með 5½ vinning.  B-riðilinn vann Róbert Örn, hlaut 7½ vinning af 9 mögulegunm. Hildur Berglind og Felix Steinþórsson komu næst með 7 vinninga og tefldu aukaskák um 2. sætið sem Hildur vann. Mótstsjóri var Helgi Ólafsson, skólastjóri Skákskóla Íslands sem hefur haft veg og vanda að skákæfingunum í Stúkunni á haustönn.

Myndaalbúm (HÓ)

Bronsið afhent í Stúkunni

Áður en jólamót Skákskóla Íslands og Skakakademíu Kópavogs hófst í Stúkunni á föstudag voru afhent brons-merki þeim krökkum sem fengist við brons-verkefnið á haustönn.

Þessir fengu afhent merkin: Hilmir Freyr Heimisson, Jón Otti Sigurjónsson, Hildur Berglind Jóhannsdóttir, Sigurjón Ágústsson, Sindri Snær Kristófersson, Benedikt Arnar Björnsson, Axel Óli Sigurjónsson, Kjartan Gauti Gíslason, Aron Ingi Woodard, Gunnar Heimir Ólafsson, Felix Steinþórsson, Gunnar Heimir Ólafsson, Arnar Hauksson, Róbert Örn Vigfússon. Með hópnum á myndinni er Helgi Ólafsson. 

 

Jólakappmót KR - Davíð vann

Góð þátttaka var í Jólaskákmóti KR-inga sem fram fór í félagsheimili þess í Frostaskjóli  þar sem 30 keppendur að Jólakettinum meðtöldum sem þar leituðu skjóls í gærkvöldi undan frostinu á Fróni.  Forvitnilegir  JólaKapp pakkar vori í boði fyrir fengsælustu keppendur vin og hins vegar JólaHapp pakkar fyrir aðra, sem minna máttu sín gegn ofureflinu.

 Sigursælastur varð Davíð Kjartansson, sem tefldi af miklu öryggi  og vann kappteflið með fullu húsi 13 vinningum af jafnmörgum mögulegum og 39 stigum, þar sem 3 stig reiknuðust fyrir unna skák og 1 stig fyrir jafntefli.  Annar varð Bragi Halldórsson með 11v./33 tig. sigurvegarinn frá í hittiðfyrra og þriðji Gunnar Kr. Gunnarsson með 10 v. / 26 stig.

Í fjórða sæti með 8.5 v. varð svo enginn annar en formaðurinn sjálfur Kristján Stefánsson,  sem var í feiknastuði, skartaði kórónu sinni  og  lék á alls oddi í mótslok og sá til þess að enginn færi heim tómhentur.

Mótið var að öðru leyti frekar jafnt því aðeins skildi  einn  1 vinningur að 8. og 26. mann.

Nánari úrslit skv. meðf. mótstöflu og á www.kr.is (skák)

Myndaalbúm (ESE)

 

   

 

Krakkarnir í Kársnesskóla kláruðu fyrstir bronsið

Krakkar í Kársnesskóla  luku fyrstir við bronsið í Gull, silfur, brons- verkefni  sem Skákskóli Íslands og Skákakademía Kópavogs hafa hannað fyrir krakka á grunnskólaaldri en dæmin eru samin af Helga Óafssyni skólastjóra Skákskóla Íslands en fyrirmyndin er fengin úr bæklingum sem Æskulýðsráð Reykjavíkur og Taflfélag Reykavíkur gáfu út fyrir nokkrum áratugum síðan, líklegast að sænskri fyrirmynd.

Það var Grétar Halldórsson skólastjóri Kárnesskóla sem afhenti bronsmerkið og bronsbæklinginn áritaðan af prófsstjóranum Helga Ólafssyni. Gamall nemandi úr Kársnesskóla, Hlíðar Þór Hreinsson og helsti forsvarsmaður Skákakadeníu Kópvogs (og skákstyrktarsjóðsins) mætti við afhendinguna en Skákakademía Kópavogs hefur verið dugleg að styrkja skákstarf í Kópavogi og greiddi hluta kostnaðar við framleiðslu merkja og bæklinga.

Eftirfarandi nemendur luku við bronsverkefnið: Sölvi Santos, Kolbeinn Björnsson, Adrian Romanowsky,  Pétur Arinbjörnsson, Máni Steinn Þorsteinsson, Andri Snær Þórarinsson,  Brynjar Erwinssson,  Ólafur Helgason, Valens Ingimundarson, Kolka Ívarsdóttir, Mjöll Ívarsdóttir, Hertha 
Benjamínsdóttir, Katla Róbertsdóttir.

Að afhendingu lokinni hófst jólamót Kársnesskóla og þar sigraði Sölvi Santons, Kormákur Máni Kolbeinsson varð í 2. sæti og Andri Snær Þórarinsson varð í 3. sæti. 1. verðlaun stúlkna hlaut Katla Róbertsdóttir.

Á myndinni eru frá vinstri:

Valens Ingimundarson, Ólafur Helgason, Helgi Ólafsson,  Kolka Ívarsdóttir, Mjöll Ívarsdóttir,  Hertha Benjamínsdóttir, Sölvi Santos, Kolbeinn Björnsson, Adrian Romanowsky, Grétar Halldórsson, og Katla Robertsdóttir.

Myndina tók  Hlíðar Þór Hreinsson.