NM í skólaskák: Fulltrúar Íslands

NM í skólaskák fer fram í Espoo í Finnlandi dagana 17.-19. febrúar.  Búið er að velja fulltrúa Íslands. 

Eftirtaldir voru valdir:

A-flokkur 92-94

Hallgerður Helga Þorsteinsdóttir

Nökkvi Sverrisson

 

B-flokkur 95-96

Mikael Jóhann Karlsson

Birkir Karl Sigurðarson

 

C-flokkur 97-98

Dagur Ragnarsson

Oliver Aron Jóhannesson

 

D-flokkur 99-2000

Jón Kristinn Þorgeirsson

Kristófer Jóel Jóhannesson

 

E-flokkur 2001 og yngri

Vignir Vatnar Stefánsson

Og verðandi Íslandsmeistari barna 2012 fær hitt sætið.

Jólaskákmót KR í kvöld

Góð þátttaka hefur verið kappskákmótum KR-inga undanfarnar vikur að jafnaði 20 keppendur að tafli og hart barist.  Birgir Berndsen hefur verið einna sigursælastur en Jón Friðjónsson,  Gunnar Gunnarsson,  Siguringi Sigurjónsson, Ingimar Jónsson Vilhjálmur Guðjónsson, Sigurður A. Herlufsen og Guðfinnur R. Kjartansson hafa einnig tyllt sér í efsta sætið og oftast verið meðal efstu manna.

Tefldar eru 13 skákir með 7 mín. uht.  í striklotu og því ekki heiglum hent að taka þátt.

Í kvöld verður haldið sérstakt JÓLAKAPPMÓT í KR-heimilinu í Frostaskjóli og mikið um dýrðir.

Glæsilegir jólapakkar í verðlaun og vinningahappdrætti í gangi auk þess sem menn fá 3 stig fyrir unna skák, 1 stig fyrir jafntefli  og ekkert fyrir tap, líkt og  í knattspyrnuvellinum  þegar mest er um að vara.

Ýtt verður á klukkurnar kl. 19.30   

Meira á www.kr.is (skák)

Myndaalbúm (ESE)

Frétt RÚV um Friðriksmót Landsbankans

Ríkissjónvarpið fjallar þessa dagana um skák daglega.   Í kvöld var frétt um Friðriksmótið á RÚV og meðal annars viðtal Hjartar Júlíusar við Henrik Danielsen.

Frétt RÚV um Friðriksmótið (skrolla á 24:40-26:10)

Myndir frá Friðriksmóti Landsbankans

Hrafn Jökulsson tók fjölda mynda á Friðriksmóti Landsbankans - Íslandsmótinu í hraðskák sem fram fór í dag í útibúi bankans, Austurstræti 11.   Um mótið má lesa hér.

Myndirnar má finna í myndaalbúmi mótsins en hér má sjá nokkur sýnishorn.  Fleiri myndir eru væntanlegar í albúmið á næstum dögum.

 

Gunnar forseti, Henrik Íslandsmeistari og Þorsteinn útibússtjóri

 

Bræðurnir að ræða jólaboðin eða skákina?

 

 

Arionbankamaðurinn Jón L. ánægður með Landsbankatékkann

Björgvin og Nansý - þar fyrir aftan grillir í Gauta Pál og Pétur

 

Ættarmót?  Bræðrasynirnir Hilmir Hrafnsson og Bjarki Arnaldarson.  Hrafn horfir á.

Landsliðsmennirnir Hjörvar og Bragi

 

Skákþáttur Morgunblaðsins: Þegar Guðmundur Pálmason vann Fuderer

Vefur sem greinarhöfundur lítur inná annað veifið og alþjóðaskáksambandið FIDE heldur úti ber nafnið www.olimpbase.org.

Þar er hægt að finna úrslit og skákir úr öllum helstu flokkakeppnum síðustu aldar. Nýjasta viðbótin á vefnum er umfjöllun um ólympíumót stúdenta en þau hófust snemma á sjötta áratugnum og runnu sitt skeið á enda undir lok þess áttunda.

Á fyrstu stúdentamótunum voru Friðrik Ólafsson, Guðmundur Pálmason, Ingvar Ásmundssson, Þórir Ólafsson og Jón Einarsson duglegastir að tefla fyrir Íslands hönd. Í umfjöllun um mótið 1956, sem fram fór í Uppsala í Svíþjóð, er þess getið að hinir geðþekku íslensku skákmenn hafi naumlega misst af sæti í A-úrslitum en engu að síður hafi Friðrik og Guðmundur verðlaun fyrir frammistöðu sína á 1. og 2. borði.

Svo skemmtileg þóttu þessi mót að Íslendingar, með þá Jón Böðvarsson og Bjarna Felixson í broddi fylkingar, sóttu um og héldu stúdentamótið árið 1957. Tveir framtíðarheimsmeistarar mættu til leiks í Sjómannaskólann í Reykjavík, Mikhael Tal og Boris Spasskí og aðrir þekktir skákmenn voru t.d. Bent Larsen og William Lombardy.

Guðmundur Pálmason, sem síðar varð einn kunnasti jarðvísindamaður okkar, tefldi aldrei mikið en hélt engu að síður furðu miklum styrkleika alla tíð. Á ferlinum gerði hann jafntefli við þrjá heimsmeistara: Euwe, Tal og Spasskí. Hann tók þátt í fjórum stúdentamótum og tefldi á 1. borði þegar Íslendingar náðu hvað bestum árangri, 6. sæti í Lyon 1955. Þar mætti hann heimsmeistaraefni Júgóslava, Andrija Fuderer, sem um það leyti var ein skærasta stjarna skákarinnar á alþjóðavettvangi. Þegar Fuderer lést á dögunum var hans minnst fyrir tilþrif sem minntu á Tal og snilldarskákir rifjaðar upp þar sem hann lék sér að því að vinna meistara á borð við Najdorf og Bronstein. Skákin í viðureign Íslendinga og Júgóslava í Lyon árið 1955 sýnir hversu öflugur Guðmundur var, áreynslulaus stíllinn minnir á Smyslov:

Guðmundur Pálmason - Andrija Fuderer

Hollensk vörn

1. d4 d5 2. c4 e6 3. Rc3 c6 4. e3 f5

„Grjótgarðurinn" var vinsæl byrjun á þessum árum.

5. Bd3 Rf6 6. Rf3 Bd6 7. O-O O-O 8. Dc2 Re4 9. Re5 Rd7 10. f3 Bxe5 11. dxe5 Rec5 12. f4 Rxd3 13. Dxd3 b6 14. b4! a5 15. b5 Rc5 16. Dd4 cxb5 17. cxb5 Hf7 18. Ba3 Hc7 19. Hfc1 Bd7 20. Bxc5 Hxc5 21. a4!

Teflir upp á að halda biskupinum frá, þekktum vandræðagrip í hollensku vörninni . Riddarinn er betri þar sem hann hefur aðgang að d4-reitnum.

21. ... Hc4 22. Dd1 Hac8 23. Re2! De7 24. Hxc4 Hxc4 25. Hc1 He4 26. Rg3!

-Sjá stöðumynd-

26. ... Hb4

Af hverju hirti Fuderer ekki e3 peðið? Sennilega út af eftirfarandi afbrigði: sér: 27. Dd4! Da3 28. Hc7! Be8 og nú 29. Dxb6! ( betra en 29. Rxf5 exf5 30. e6 He1+31. Kf2 Da1! 32. Hxg7 Kh8 og svartur sleppur ) Kf8 30. Dd6+! Dxd6 31. exd6 og svartur ræður ekki við d6-peðið.

27. Hc7 Dd8 28. Hc3 Be8 29. h3!

Góður fyrirbyggjandi leikur.

29. ... g5 30. Re2 Bf7 31. Dc2 Kg7 32. Hc8 De7 33. Hc7 Hb2 34. Dc6 Dc5

34. .... Dd8 stoðaði lítt. Eftir 35. Rd4! getur svartur enga björg sér veitt.

35. Dd7! Dxc7 36. Dxc7 Hxe2 37. Dxb6 g4 38. Kh2 h5 39. h4 Ha2 40. Dxa5 Ha3

- og Fuderer gafst upp.

Helgi Ólafsson [e-mail]

-------------------------------------------

Skákþættur Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 11. desember 2011.

Skákþættir Morgunblaðsins

[Event "2nd StudWTCh final"] [Site "Lyon FRA"] [Date "1955.05.??"] [Round "7"] [White "Palmason, Gudmundur ISL"] [Black "Fuderer, Andrija YUG"] [Result "1-0"] [ECO "A84"] [EventDate "1954.05.06"] [PlyCount "80"] 1.d4 d5 2.c4 e6 3.Nc3 c6 4.e3 f5 5.Bd3 Nf6 6.Nf3 Bd6 7.O-O O-O 8.Qc2 Ne4 9.Ne5 Nd7 10.f3 Bxe5 11.dxe5 Nec5 12.f4 Nxd3 13.Qxd3 b6 14.b4 a5 15.b5 Nc5 16.Qd4 cxb5 17.cxb5 Rf7 18.Ba3 Rc7 19.Rfc1 Bd7 20.Bxc5 Rxc5 21.a4 Rc4 22. Qd1 Rac8 23.Ne2 Qe7 24.Rxc4 Rxc4 25.Rc1 Re4 26.Ng3 Rb4 27.Rc7 Qd8 28.Rc3 Be8 29.h3 g5 30.Ne2 Bf7 31.Qc2 Kg7 32.Rc8 Qe7 33.Rc7 Rb2 34.Qc6 Qc5 35.Qd7 Qxc7 36.Qxc7 Rxe2 37.Qxb6 g4 38.Kh2 h5 39.h4 Ra2 40.Qxa5 Ra3 1-0

Henrik Danielsen Íslandsmeistari í hraðskák

Stórmeistarinn Henrik Danielsen sigraði á Friðriksmóti Lansbankans - Íslandsmótinu í hraðskák sem fram fór í húsakynnum Landsbankans í Austurstræti 11 í dag.  Henrik hlaut 9,5 vinning í 11 skákum.  Björn Þorfinnsson varð annar með 9 vinninga.

Í 3.-6. sæti urðu Héðinn Steingrímsson, Jón L. Árnason, Bragi Þorfinnsson og Bergsteinn Einarsson en þeir hlutu 8 vinninga.  Bergsteinn, sem er starfsmaður bankans, fór sömu leið og í fyrra, þ.e. tryggði sér þriðja sætið með sigri, á stigahæsta skákmanni landsins, Jóhanni Hjartarsyni í lokaumferðinni!

Mótið var afar sterkt en nánast allir sterkustu skákmenn landsins tóku þátt í mótinu og þar á meðal 7 stórmeistarar.  Einnig tóku þátt flestir sterkustu skákmenn af yngri kynslóðinni og m.a. margir verðlaunahafanna frá Jólaskákmóti MS í gær.  

Aukaverðlaunahafar urðu:

Kvennaverðlaun: Hallgerður Helga Þorsteinsdóttir
Unglingaverðlaun: Mikael Jóhann Karlsson og Dagur Ragnarsson
Undir 2200: Hrafn Loftsson
Undir 2000: Gunnar Freyr Rúnarsson

82 skákmenn tóku þátt í mótinu sem er metþátttaka.

Skákstjórar voru Gunnar Björnsson og Ólafur S. Ásgrímsson.   Halldór Grétar Einarsson sá um tæknistjórn.  

Lokastöðu mótsins má nálgast á Chess-Results.

Myndir frá mótinu eru væntanlegar.

Friðriksmót Landsbankans - Íslandsmótið í hraðskák hefst kl. 13 í dag - 8 stórmeistarar taka þátt

Hvorki meira né en minna en átta stórmeistarar taka þátt í Friðriksmóti Landsbankans - Íslandsmótið í hraðskák fer fram í útibúi Landsbankans við Austurstræti 11 sunnudaginn 18. desember.   Keppendalista í stigaröð má finna á Chess-Results.

Mótið fyllist á aðeins 18 klukkustundum en þátttaka á mótinu takmarkast við um 80 skákmenn.  Þeir sem eru á biðlista geta fylgst með stöðu sinni á honum hér.  Skráðir keppendur sem sjá fram á að geta ekki verið með eru beðnir um að láta vita sem fyrst í netfangið [e-mail] til að aðrir komist að.  

Tefldar verða 11 umferðir með 7 mínútna umhugsunartíma á mann og er reiknað með að mótið standi á milli 13.00 og 16.30. Gestir og gangandi eru velkomnir á staðinn og eru boðið upp á kaffi og með því. Hægt verður að fylgjast með helstu skák hverrar umferðar á risatjaldi.

Verðlaun eru sem hér segir:

• 1) 100.000 kr.
• 2)   60.000 kr.
• 3)   50.000 kr.
• 4)   30.000 kr.
• 5)   20.000 kr.

Aðalverðlaun skiptast séu menn jafnir að vinningum.  

Aukaverðlaun:

• Efsti unglingurinn 16 ára og yngri: 10.000 kr.
• Efsta konan: 10.000 kr.
• Efsti maður með 2200 stig og minna: 10.000 kr.
• Efsti maður með 2000 stig og minna: 10.000 kr.

Aukaverðlaun eru miðað við nýjustu útgefin íslensk skákstig.   Reiknuð eru stig séu menn jafnir og efstir. 

Efsti keppandi mótsins verður Íslandsmeistari í hraðskák.   Verði tveir eða fleiri efstir ræður stigaútreikningur.  Núverandi Íslandsmeistari í hraðskák er Jón Viktor Gunnarsson en hann sigraði í mótinu í fyrra ásamt Þresti Þórhallssyni. 

Þetta er áttunda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga.

Fyrri sigurvegarar:

• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

 

MS Jólaskákmótið í fréttum RÚV

Í fréttum RÚV í kvöld var fjallað á fínan hátt um MS Jólaskákmótið sem fram fór í Ráðhúsinu í dag þar sem Hilmir Freyr Heimisson hafði sigur.  

Frétt RÚV (skákin byrjar á 26:10)

Hilmir Freyr sigraði á MS Jólaskákmótinu í Ráðhúsinu!

Hilmir Freyr Heimisson, 10 ára, sigraði á Jólaskákmóti MS og Skákakademíu Reykjavíkur í Ráðhúsi Reykjavíkur.

Mótið var æsispennandi og bráðskemmtilegt, enda mörg af efnilegustu börnum landsins meðal keppenda.

Hilmir Freyr hlaut 7 vinninga í 8 skákum. Vignir Vatnar Stefánsson, 8 ára, og Nansý Davíðsdóttir, 9 ára, hlutu jafnmarga vinninga og Hilmir Freyr, en voru örlítið lægri á stigum. Keppendur voru rúmlega 70, á aldrinum 6 til 12 ára.
 
Sérstök verðlaun voru veitt fyrir bestan árangur í hverjum árgangi og þau verðlaun hrepptu Joshua Davíðsson, Bassirou Mbaye, Vignir Vatnar Stefánsson, Nansý Davíðsdóttir, Hilmir Freyr Heimisson, Jón Otti Sigurjónsson og Kristófer Jóel Jóhannesson.
 
Verðlaun fyrir bestan árangur stúlkna hlutu Nansý, Hildur B. Jóhannsdóttir og Svandís Rós Ríkharðsdóttir.
 
Samhliða MS Jólaskákmótinu bauð Hjörvar Steinn Grétarsson, yngsti landsliðsmaður Íslands, gestum og áhorfendum í Ráðhúsinu í fjöltefli. Hjörvar Steinn er 18 ára og náði á dögunum tveimur áföngum af þeim þremur sem þarf til að verða stórmeistari í skák. 
 
Guðni Ágústsson fv. ráðherra flutti setningarávarp og lék fyrsta leikinn. Guðni hvatti börnin til dáða í skákinni, enda væri skáklistin frábærlega til þess fallin til að þjálfa heilann og hefði góð áhrif á námsgetu.  Ráðherrann fyrrverandi, sem er sjálfur snjall skákmaður, gaf börnunum þrjú heilræði: Taka lýsi, drekka mjólk og borða lambakjöt!

MS Jólaskákmótið í Ráðhúsinu heppnaðist í alla staði vel og sýndi vel þá grósku sem er í skáklífi ungu kynslóðarinnar.

Mjög vegleg verðlaun voru veitt og margir keppendur unnu líka í happdrætti mótsins. Vinningar og verðlaun komu frá Heimilistækjum,  Eddu útgáfu, Borgarleikhúsinu, Bjarti, Sögum útgáfu, Steineggi, Sölku, Senu, 12 tónum, Nexus, Pennanum, Óðinsauga, ÍTR,  Húsdýragarðinum.

Fleiri myndir og fréttir, ásamt lokaúrslitum, birtast innan tíðar á skak.is.

 

 

MS Jólaskákmót fer fram í Ráðhúsinu í dag

Mörg af efnilegustu börnum landsins tefla á MS Jólaskákmótinu í Ráðhúsinu, sem fram fer á laugardaginn og hefst klukkan 13. Skákakademía Reykjavíkur stendur að mótinu, þar sem um 80 börn á aldrinum 6-12 ára tefla í sannkölluðu jólalandi í aðalsal Ráðhússins.

Mikil skákvakning er nú meðal ungu kynslóðarinnar og á MS Jólaskákmótið er boðið skákkrökkumfrá Taflfélagi Reykjavíkur, Helli, Fjölni, KR, Haukum og Taflfélagi Garðabæjar.
Gestum og áhorfendum verður boðið upp á fjöltefli við skákmeistara meðan á mótinu stendur, skákbækur til sölu, jafnframt því sem starf Skákademíu Reykjavíkur og Skákskóla Íslands verður kynnt.

Skákakademía Reykjavíkur hefur á síðustu árum unnið að útbreiðslu skáklistarinnar í grunnskólum borgarinnar, auk þess að skipuleggja margskonar viðburði og hátíðir. MS hefur frá upphafi verið meðal helstu bakhjarla Skákakademíunnar.
 
Vegleg verðlaun eru veitt á laugardaginn og koma frá Eddu útgáfu, Borgarleikhúsinu, Bjarti, Sögum, Steineggi, Sölku, Senu, 12 tónum, Nexus, Pennanum, Óðinsauga, ÍTR,  Húsdýragarðinum og Heimilistækjum.

Heiðursgestur við setningu MS Jólaskákmótsins í Ráðhúsinu á laugardag er Guðni Ágústsson fv. ráðherra.