Friðriksmót Landsbankans fer fram á sunnudag

Hvorki meira né en minna en átta stórmeistarar taka þátt í Friðriksmóti Landsbankans - Íslandsmótið í hraðskák fer fram í útibúi Landsbankans við Austurstræti 11 sunnudaginn 18. desember.   Keppendalista í stigaröð má finna á Chess-Results.

Mótið fyllist á aðeins 18 klukkustundum en þátttaka á mótinu takmarkast við um 80 skákmenn.  Þeir sem eru á biðlista geta fylgst með stöðu sinni á honum hér.  Skráðir keppendur sem sjá fram á að geta ekki verið með eru beðnir um að láta vita sem fyrst í netfangið [e-mail] til að aðrir komist að.  

Tefldar verða 11 umferðir með 7 mínútna umhugsunartíma á mann og er reiknað með að mótið standi á milli 13.00 og 16.30. Gestir og gangandi eru velkomnir á staðinn og eru boðið upp á kaffi og með því. Hægt verður að fylgjast með helstu skák hverrar umferðar á risatjaldi.

Verðlaun eru sem hér segir:

• 1) 100.000 kr.
• 2)   60.000 kr.
• 3)   50.000 kr.
• 4)   30.000 kr.
• 5)   20.000 kr.

Aðalverðlaun skiptast séu menn jafnir að vinningum.  

Aukaverðlaun:

• Efsti unglingurinn 16 ára og yngri: 10.000 kr.
• Efsta konan: 10.000 kr.
• Efsti maður með 2200 stig og minna: 10.000 kr.
• Efsti maður með 2000 stig og minna: 10.000 kr.

Aukaverðlaun eru miðað við nýjustu útgefin íslensk skákstig.   Reiknuð eru stig séu menn jafnir og efstir. 

Efsti keppandi mótsins verður Íslandsmeistari í hraðskák.   Verði tveir eða fleiri efstir ræður stigaútreikningur.  Núverandi Íslandsmeistari í hraðskák er Jón Viktor Gunnarsson en hann sigraði í mótinu í fyrra ásamt Þresti Þórhallssyni. 

Þetta er áttunda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga.

Fyrri sigurvegarar:

• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

 

Myndir frá Vetrarmóti öðlinga

Mun fleiri nyndir frá Vetrarmóti öðlinga eru komnar inn á myndaalbúm mótsins.  Myndirnar tók Jóhann H. Ragnarsson.

Myndaalbúm mótsins

Davíð hraðskákmeistari Víkingaskákdeildar Þróttar 2011

Hörkuspennandi hraðskákmeistaramóti Þróttar-Víkingaklúbbsins 2011 lauk með látum í Þróttaraheimilinu í gærkvöldi. Mættir voru fjórtán vaskir keppendur, m.a nokkrir unglingar sem Svavar Viktorsson er að þjálfa auk nokkra sterka skákmanna úr Haukum og Íslandsmeistara kvenna í skák.

Fide-meistararnir Davíð Kjartansson og Tómas Björnsson voru í sérflokki framan af móti, en Gunnar Fr. Víkingaskákmeistari kom óvænt sterkur inn í seinni hluta mótsins, vann m.a Tómas og Davíð í miklum baráttuskákum. Gunnar vann sex síðustu skákir sínar og náði öðru sætinu af Tómasi, en Davíð sigraði með átta vinninga af níu mögulegum og náði að verja hraðskákmeistaratitil sinn frá árinu 2010.

ÚRSLIT:

* 1 Davíð Kjartansson 8.0 v.
* 2 Gunnar Fr. Rúnarsson 7.5
* 3 Tómas Björnsson 7.0
* 4-5 Stefán Þór Sigurjónsson 5.5
* 4-5 Elsa María 5.5
* 6 Jón Úlfljótsson 5.0
* 7. Sigurður Ingason 4.5
* 8 Ingi Tandri Traustason 4.0
* 9-10 Björn Stefánsson 3.5
* 9-10 Tómas Marteinsson 3.5
* 11-12 Gunnar Gunnarsson 3.0
* 11-12 Jóhannes K. Sólmundarsson 3.0
* 13 Rafnar Friðrik 2.5
* 14 Arnar Ingi 0.5

Hraðskákmeistari Víkingaskákdeildar Þróttar 2011: Davíð Kjartansson
Hraðskákmeistari kvenna: Elsa María
Hraðskákmeistari unglinga: Jóhannes Kári Sólmundarsson

Jóhann hraðskákmeistari Garðabæjar

Jóhann H Ragnarsson varð öruggur sigurvegari á Hraðskákmóti Garðabæjar sem fram fór í gær og vann allar sínar viðureignir.

Pálmi Pétursson varð í 2. sæti með einungis 1 tap, það er sjö vinninga

Síðan komu þeir Örn Leó Jóhannsson og Páll Andrason þar sem Örn náði 3. sætinu á stigum.

Sjá má öll úrslit á mótinu og endanlega stöðu á Chess-Results.

Hjörvar Steinn teflir við gesti á MS Jólaskákmótinu í Ráðhúsinu

Hjörvar Steinn Grétarsson, 18 ára landsliðsmaður í skák, býður gestum á öllum aldri í fjöltefli í Ráðhúsi Reykjavíkur, samhliða MS Jólaskákmótinu, laugardaginn 17. desember klukkan 13.

Hjörvar Steinn náði á dögunum tveimur áföngum að stórmeistaratitli. Hann er tefldi tvívegis á fyrsta borði fyrir landslið Íslands á Evrópumótinu í nóvember. Þar sigraði Hjörvar m.a. Alexei Shirov sem teflt hefur einvígi um heimsmeistaratitilinn.

MS Jólaskákmótið í Ráðhúsinu er fyrir börn 6-12 ára, sem verið hafa virkust í skákinni í að undanförnu. Gert er ráð fyrir 70-80 keppendum frá fjölmörgum grunnskólum á höfuðborgarsvæðinu.

Skákakademía Reykjavíkur stendur að hátíðinni í Ráðhúsinu, í samvinnu við TR, Helli, KR, Fjölni, TG og Hauka.

Umgjörð skákhátíðarinnar í Ráðhúsinu er glæsileg, enda aðalsalurinn fagurlega skreyttur í tilefni jólanna. Allir eru hjartanlega velkomnir að koma og fylgjast með meisturum framtíðarinnar og spreyta sig í fjölteflinu gegn Hjörvari Steini, efnilegasta skákmanni landsins.

Róbert efstur á Jólamóti Hressra Hróka

Jólamót Hressra Hróka fór fram í gær og mættu 13 keppendur til leiks. Tefldar voru 6 umferðir með 7 mín umhugsunartíma og var spenna allan tímann. Róbert Lagerman sigraði eftir stigaútreikning og varð Gunnar Freyr í öðru sæti, tæpara gat það ekki verið. Frábært mót að baki og þakka Hrókarnir kærlega fyrir skemmtilegt skákár.

Lokastaðan :

• 1. Róbert Lagerman með 5 ( hærri á stigum en Gunnar )
• 2. Gunnar Freyr Rúnarsson með 5
• 3. Rafn Jónsson með 4
• 4. Pálmar Breiðfjörð með 4
• 5. Lea Kienlein-Zach með 3.5
• 6. Haukur Halldórs með 3.5
• 7. Emil Ólafsson með 3
• 8. Guðmundur V. með 3
• 9. Einar Guðmundsson með 3
• 10. Arnar Valgeirsson með 3
• 11. Erlingur Arnarson með 2
• 12. Gunnar Björnsson með 2
• 13. Björgólfur Stefánsson með 1

Myndaalbúm (EÓ)

MS Jólaskákmót í Ráðhúsinu

Mörg af efnilegustu börnum landsins tefla á MS Jólaskákmótinu í Ráðhúsinu, sem fram fer á laugardaginn og hefst klukkan 13. Skákakademía Reykjavíkur stendur að mótinu, þar sem um 80 börn á aldrinum 6-12 ára tefla í sannkölluðu jólalandi í aðalsal Ráðhússins.

Mikil skákvakning er nú meðal ungu kynslóðarinnar og á MS Jólaskákmótið er boðið skákkrökkum frá Taflfélagi Reykjavíkur, Helli, Fjölni, KR, Haukum og Taflfélagi Garðabæjar.
Gestum og áhorfendum verður boðið upp á fjöltefli við skákmeistara meðan á mótinu stendur, skákbækur til sölu, jafnframt því sem starf Skákademíu Reykjavíkur og Skákskóla Íslands verður kynnt.

Skákakademía Reykjavíkur hefur á síðustu árum unnið að útbreiðslu skáklistarinnar í grunnskólum borgarinnar, auk þess að skipuleggja margskonar viðburði og hátíðir. MS hefur frá upphafi verið meðal helstu bakhjarla Skákakademíunnar.
 
Vegleg verðlaun eru veitt á laugardaginn og koma frá Eddu útgáfu, Borgarleikhúsinu, Bjarti, Sögum, Steineggi, Sölku, Senu, 12 tónum, Nexus, Pennanum, Óðinsauga, ÍTR,  Húsdýragarðinum og Heimilistækjum.

Heiðursgestur við setningu MS Jólaskákmótsins í Ráðhúsinu á laugardag er Guðni Ágústsson fv. ráðherra.

Mikið fjör á Jólaskákmóti KR

Það var kátt á hjalla hjá hinum kraftmiklu og ungu KR-ingum sem tóku þátt í Jólamóti KR miðvikudaginn 14. desember. Um tuttugu keppendur tóku þátt í átta umferða móti sem markaði lok barna- og unglingastarfs KR þetta árið. Um 30 ungir skákmenn úr skólum Vesturbæjar hafa sótt KR-æfingarnar sem eru samstarfsverkefni Skákdeildar KR og Skákakademíu Reykjavíkur.

Skák er á stundatöflu allra skóla Vesturbæjar, teflt er öll mánudagskvöld í skákherberginu Frostaskjóli, tveir stórmeistarar búa í hverfinu og KR er með sterkt lið á Íslandsmóti skákfélaga; Vesturbærinn er að vakna!

Og fjölgað hefur í Skákdeild KR því Skákdeildin hefur í vetur bætt við sig hátt í 20 nýjum félagsmönnum og meðalaldur félagsmanna lækkað nokkuð.

Hinn átta ára gamli nemandi Grandaskóla Jön Jörundur Guðmundsson og Hagskælingurinn Ísidór Jökull Bjarnason urðu efstir og jafnir með sjö vinninga og þurfa að há einvígi um sigur á mótinu.

Í lok mótsins veitti formaður skákdeildar KR Kristján Stefánsson þátttakendum viðurkenningu og verðlaun. Hin ýmsu verðulaun voru veitt; fljótastur að verða mát, skrýtnasti leikurinn, flottasti hróksleikurinn. Fannst krökkunum afar gaman af þessum nýstárlegu verðlaunum Kristjáns sem leysti alla út að lokum með nammipoka.

Skákæfingar í KR hefjast aftur miðvikudaginn 4. janúar.

Myndaalbúm (HJ)

Fleiri myndir frá Atskákmóti Icelandair

Fleiri myndir hafa borist frá Atskákmóti Icelandair sem fram fór síðustu helgi.  Nær má nálgast í myndaalbúmi mótsins.

 

Gallerý Skák: Vignir Vatnar 8 ára öllum skeinuhættur

Skákkvöldin í lista- og skák Gallerýinu í Bolholti 6 hafa verið vel sótt í haust enda opin öllum áhuga- og ástríðuskákmönnum, sem vilja spreyta sig eða sýna snilli sína gegn verðugum andstæðingum.

Fjölmargir gamalreyndir skákmenn einkum af eldri kynslóðinni hittast þar reglulega til tafls flest fimmtudagskvöld kl. 18 og tefla 11 umferða hvatskákmót (10 mín. uht) auk margra yngri og uppvaxandi skákmanna.

Þar fer fremstur í flokki Vignir Vatnar Stefánsson, 8 ára, sem mætt hefur 5 sinnum til keppni að undanförnu ásamt föður sínum Stefáni Má Péturssyni.  Þessi stórefnilegi yngissveinn hefur gert það gott og velgt gamlingjunum og öðrum heldur betur undir uggum svo undrun vekur, hefur tvisvar orðið í 4. sæti af 15-18 keppendum með 7 v. af 11 mögulegum og alls hlotið 32 vinninga af 55 í þeim 5 mótum sem hann hefur teflt í.  

Meðal fórnarlamba hans eru ýmsir valinkunnir skákmeistarar svo sem Gunnar Kr. Gunnarsson (78), fyrrv. Íslandsmeistari (sem vann mótið 24.11 með 10 v. -tapaði aðeins þessari einu skák), Ögmundur Kristinsson, Egill Þórðarson, Guðfinnur R. Kjartansson,  Stefán Þormar Guðmundsson, Kristján Stefánsson,  Þórarinn Sigþórsson, Sigurður E. Kristjánsson; Páll G. Jónsson og fleiri eitilharðir skákmenn, sem að jafnaði selja sig dýrt og hafa telft áratugum saman.

Hinn ungi og uppvaxandi skáksnillingur Vignir Vatnar á ekki langt að sækja skákhæfileika sína, sem virðast oft liggja í ættum. Langalangafi hans var Pétur Zóphóníasson, frumkvöðull að stofnun Taflfélags Reykjavíkur 1901. Synir Péturs þeir Sturla, Áki og Gunngeir voru allir mjög kunnir skákmenn og  þeir Zóphanías og Skarphéðinn bridgespilarar góðir.  Langamma Vignis Vatnars var Jakobína Pétursdóttir, systir þeirra bræðra, en hún var gift Hafsteini Gíslasyni, þekktum skákunnanda um miðja síðustu öld.  Afi hans og amma eru Pétur Vatnar Hafssteinsson og Dagný Jónsdóttir og foreldrar Sigurlína Guðbjörnsdóttir og Stefán Már Pétursson, svo öll ætt hans sé  hér rakin. Þess má og geta að Gunnar Skarphéðinsson, sem sá ungi hefur m.a. att kappi við í Gallerýinu er frændi hans, sonur Sr. Skarphéðins Péturssonar, prests í Bjarnanesi. 

Ekki verður annað sagt en framtíð Íslands á skáksviðinu sé björt því mörg önnur hæfileikarík ungmenni hafa sýnt framúrskarandi árangur að undanförnu, mörg hver eins og Vignir Vatnar lærisveinar Helga Ólafssonar, stórmeistara og skákskólastjóra.

Næst verður att kappi  í Gallerýinu í kvöld (fimmtudaginn 15. desember) og þar næst  29. desember þegar sérstakt jólaskákmótið verður haldið með pomp og prakt.  Ýtt á klukkurnar kl. 18 og lagt í púkk fyrir kaffi, kruðeríi og öðrum veisluföngum.

Nánari úrslit og fjölda mynda má sjá á: www.galleryskak.net.

ESE 15.12.11

Myndaalbúm (ESE)