Fimmtudagsmót hjá TR í kvöld - ókeypis aðgangur

Fimmtudagsmót T.R. fer að venju fram í kvöld og hefst kl. 19.30.  Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12, og opnar húsið kl. 19.10.  Glæsilegur verðlaunapeningur er í boði fyrir sigurvegarann.

Mótin eru öllum opin.  Boðið er upp á kaffi ásamt léttum veitingum án endurgjalds.

ATH - Þar sem síðasta mót féll niður verður aðgangur ókeypis að þessu sinni.

Íslandsmót skákfélaga í Chess-Results

Páll Sigurðsson hefur slegið Íslandsmót skákfélaga inn í Chess-Results.   Forráðamenn félaganna eru hvattir til að athuga sína skráningu og þá sérstaklega í fjórðu deild.  Athugasemdir skal senda í netfangið [e-mail].

Fleiri skákstjóra vantar á mótið og það þótt menn geti aðeins tekið eina og eina umferð.    Þeir sem hafa tök á taka að sér skákstjórn eru hvattir til að hafa samband í ofangreint netfang.

Minnt er einnig á að hvert félag þarf að skila inn röðuðum lista yfir alla þá sem það hyggst nota í Íslandsmóti skákfélaga 2010-11.   Það skal gera í upphafi fyrstu umferðar.   

Chess-Results

 

 

Grantas, Ingimundur og Erlingur efstir á Meistaramóti SSON

Í gærkvöldi fóru fram 6. og 7. umferð Meistaramóts SSON.  Að þeim loknum er næsta víst að stefnir í spennandi lokaumferðir að viku liðinni.  Kasparovsbaninn Grantas var sá eini sem vann báðar skákir sínar í kvöld og tyllti sér þar með í skipt efsta sæti.

Erlingur Jensson og Ingimundur sem sátu fyrir umferðir kvöldsins einir að efsta sætinu unnu sína skákina hvor í kvöld en Erlingur gerði síðan jafntefli við Úlfhéðinn á meðan Ingimundur tapaði fyrir Magnúsi Matt.

Emil og Úlfhéðinn eiga eftir að tefla frestaða skák.

Úrslit:

Name	Rtg	Res.	Name	Rtg
Emil Sigurðsson	1790	0  -  1	Grantas Grigorianas	1740
Ingvar Örn Birgisson	1820	1  -  0	Magnús Gunnarsson	1990
Úlfhéðinn Sigurmundsson	1785	½  -  ½	Erlingur Jensson	1690
Erlingur Atli Pálmarsson	1425	0  -  1	Magnús Garðarsson	1465
Ingimundur Sigurmundsson	1775	0  -  1	Magnús Matthíasson	1670
Name	Rtg	Res.	Name	Rtg
Magnús Matthíasson	1670	½  -  ½	Emil Sigurðsson	1790
Magnús Garðarsson	1465	0  -  1	Ingimundur Sigurmundsson	1775
Erlingur Jensson	1690	1  -  0	Erlingur Atli Pálmarsson	1425
Magnús Gunnarsson	1990	½  -  ½	Úlfhéðinn Sigurmundsson	1785
Grantas Grigorianas	1740	1  -  0	Ingvar Örn Birgisson	1820

Staðan:

Rank	Name	Rtg	Pts	SB.
1	Grantas Grigorianas	1740	5½	17,75
2	Ingimundur Sigurmundsson	1775	5½	14,50
3	Erlingur Jensson	1690	5½	11,75
4	Magnús Matthíasson	1670	4	11,25
5	Magnús Gunnarsson	1990	3½	10,00
6	Úlfhéðinn Sigurmundsson	1785	3½	9,25
7	Ingvar Örn Birgisson	1820	3	5,00
8	Emil Sigurðsson	1790	2	4,75
9	Magnús Garðarsson	1465	1½	1,75
10	Erlingur Atli Pálmarsson	1425	0	0,00

• Meistaramót SSON
• Chess-Results

Róbert sigraði á Vinjarmóti í Mosó

Skákfélag Vinjar setti upp mót í samstarfi við Kjósarsýsludeild Rauða kross Íslands í salarkynnum þeirra, Þverholti 7 í gær, miðvikudag.  Mótið hófst klukkan 13:30 og mættu 9 manns til leiks, þar sem tefldar voru sex umferðir með sjö mínútna umhugsunartíma.  Skáklífið í Mosfellsbæ, að okkur skilst, hefur ekki verið í miklum blóma undanfarin misseri, en mjór er mikils vísir og fleiri mót verða haldin í Þverholtinu í vetur.
 
Sveinn Ingi Sveinsson þurfti að lúta í gras eftir hörku viðureign við Róbert Lagerman, sem sigraði með fullt hús, en skákstjórinn hafði sigur einu sinni enn. Sveinn kom annar.
 
Flottir vinningar voru í boði og brugðið var á það snilldarráð að láta alla þátttakendur draga spil og velja sér vinning eftir því. Sveinn dró hjartaás og Róbert kóng þannig að tveir efstu völdu fyrst.  Trixið klikkaði að þessu sinni!

Róbert verður helmassaður eftir mánuð þegar nýja líkamsræktarkortið hans rennur út en Sveinn ekki eins mikið - en sæll og glaður - eftir heimsókn á kaffihúsið hans Kidda Rót. Aðrir fengu bókavinninga.
 
Úrslit:
Róbert Lagerman             6
Sveinn Ingi Sveinsson       5
Kristján B. Þór                4
Haukur Halldórsson         4
Þormar Jónsson               3
Finnur Kr. Finnsson         3
Arnar Valgeirsson            3
Stefán Gauti                     1
Jón S. Ólafsson                1

Róbert leiðir 2-0 gegn Tómasi

Annari skák októbers-einvígisins lauk með sigri Róberts Lagerman.  Upp kom Sikileyjarvörn og eftir ónákvæmni Tómasar,lauk Róbert skákinni með snoturri fléttu.  Staðan er nú 2-0 fyrir Róbert í einvíginu.
 
Þriðja skákin verður tefld í næstu viku.
 

Taflfélag Reykjavíkur 110 ára í dag

Óttar Felix Hauksson skrifar:

Taflfélag Reykjavíkur er 110 ára í dag, elst allra skákfélaga í landinu. Taflfélagið hefur lifað tvenn aldamót, staðið af sér alla storma, stendur enn hnarreist og horfir björtum augum fram á veginn. Stofnfélagar Taflfélagsins á haustdögum ársins 1900 voru ýmsir mektarmenn í höfuðstaðnum.  Má þar m.a. nefna Björn M. Ólsen, sem seinna varð okkar fyrsti háskólarektor, Einar Benediktsson skáld og athafnamann og  Pétur Zóphóníasson sem var fyrsti skákmeistari Íslands.

Engum blöðum er um það að fletta að það var fyrir hvatningu og  góðvilja Daniel Williard Fiske, bókavarðar og prófessors við Cornell háskóla í Bandaríkjunum, að stofnun Taflfélags Reykjavíkur varð að veruleika. Hann sendi  félaginu að gjöf taflmenn og borð, bækur og peninga. Þáttur Fiske í menningarsögu Íslands verður seint fullþakkaður, því auk þess að hvetja til skákiðkunar víða um land (m.a. norður í Grímsey), þá ánafnaði hann Cornellháskóla gífurlega dýrmætum bókakosti íslenskra bóka ásamt peningagjöf og  lagði þar grunn að rannsóknarstöðu í íslenskum fræðum sem var mönnuð nær alla síðustu öld.

Í hundrað og tíu ár hefur Taflfélag Reykjavíkur  verið helsti vettvangur skákiðkunar Íslendinga. Þúsundir ungmenna hafa fengið þar þjálfun í öllum þeim þáttum sem skáklistin býður uppá.  Rökvís hugsun, sjálfsagi, efling sigurviljans og félagslegur þroski  er veganesti sem hverjum manni er hollt að hafa með í för á  lífsleiðinni. Skáksigrar Íslendinga á erlendri grund hafa, meira en margt annað, náð að sameina þjóðina og orðið henni lyftistöng. 

Ísland öðlaðist sjálfstæði 1944, er í rauninni ungt ríki og smátt í samfélagi þjóðanna. Án alls efa hefur árangur Friðriks Ólafssonar, Jóhanns Hjartarsonar og íslenska ólympuliðsins á alþjóðavettvangi, orðið til að skerpa sjálfstæðisvitund hnípinnar smáþjóðar sem var að byrja að fóta sig í menningarsamskiptum við stærri þjóðir upp úr miðri síðustu öld. Sigrar þeirra fullvissuðu þjóðina um kraft sinn og getu til að eigaí fullu tré, í þessari aldagömlu og göfugu íþrótt hugans, við aðrar þjóðir, jafnvel þær sem eru mun stærri og fjölmennari. Góður árangur Íslands á nýafstöðnu ólympíumóti , bæði í opnum flokki og kvennaflokki, er til marks um að enn er gunnfánanum haldið hátt á lofti.

Í tilefni 110 ára afmælisins býður Taflfélagið til kaffisamsætis  í húskynnum félagsins að Faxafeni 12  í dag kl. 18 og eru allir skákmenn og velunnarar hjartanlega velkomnir.

Óttar Felix Hauksson

 

Tómas Veigar og Jóhann Óli efstir

Tómas Veigar og Jóhann Óli Eiðsson eru efstir að loknum fjórum umferðum. Jóhann Óli hafði betur gegn Andra Frey eftir langa baráttu og Tómas Veigar vann Mikael Jóhann.

Siglfirðingurinn vann aðra skákina í röð og heldur fullu húsi frá því göngin opnuðu.

Úrslit:

Jón Magnússon -Sigurður Arnarson                                    0-1
Haukur H. Jónsson - Jón Kristinn Þorgerisson                     0-1
Hersteinn Heiðarsson - Jakob Sævar Sigurðsson                 0-1
Mikael Jóhann Karlsson - Tómas Veigar Sigurðarson          0-1
Jóhann Óli Eiðsson - Andri Freyr Björgvinsson                  1-0

Staðan:

Tómas Veigar Sigurðarson                            4
Jóhann Óli Eiðsson                                        4
Sigurður Arnarson                                         3
Jón Kristinn Þorgeirsson                                2½
Jakob Sævar Sigurðsson                                2½
Andri Freyr Björgvinsson                               2
Hersteinn Heiðarsson                                     1
Mikael Jóhann Karlsson                                 1

Í næstu umferð, sem tefld verður þriðjudaginn 12. okt mætast:

Andri Freyr - Jón Magnússon
Tómas Veigar - Jóhann Óli
Jakob Sævar - Mikael Jóhann
Jón Kristinn - Hersteinn Bjarki
Sigurður Arnarson - Haukur H. Jónsson

• Heimasíða SA
• Chess-Results

Ól í skák: Lokapistill

Ólympíuskákmótið endaði mjög vel en íslensku sveitirnar unnu báðar 3-1 í lokaumferðinni.   Sveitin í opnum flokki vann Rússland 5 en stelpurnar unnu Jamaíka í spennuþrunginni viðureign þar sem heyra mætti æsta stuðningsmenn Jamaíka stynja  og dæsa þegar Lenka bjargaði sér fyrir horn í lokin.  

Hjörvar hvíldi hjá strákunum.   Bræðurnir Bragi og Björn unnu góða sigra á 3. og 4. borði en stórmeistararnir Hannes og Héðinn gerðu jafntefli.   Hannes með svörtu á fyrsta borði.   Héðinn mun líklega haft vinningsstöðu um tíma.    Góð úrslit og fertugasta sætið staðreynd.   Til samanburðar endaði liðið í Dresden 2008 í 64. sæti, þá með 4 stórmeistara innanborðs en nú tefldu tveir með sveitinni.   Besti árangur síðan í Bled 2002.   Það urðu Þjóðverjar sem erfðu hið beiska 64. sæti!

Miklar umræður urðu í aðdraganda mótsins um val á liðinu en Helgi Ólafsson, landsliðsþjálfari, hafði lagt til að Henrik yrði ekki valinn og stjórn SÍ ákvað að gefa Helga býsna frjálsar hendur um val á liðinu.   Helgi getur verið stoltur af sínum árangri og ljóst að strákarnir voru mjög ánægðir með liðsstjórn Helga.   Liðinu var raðað nr. 54 fyrir mót, endar 14 sætum fyrir ofan það og 24 sætum ofar en í Dresden.   Allir meðlimir sveitarinnar hækka á stigum en til samanburðar lækkuðu allir á stigum í Dresden.

Sú stefna sem stjórn SÍ valdi, að ráða landsliðsþjálfara, leggja mun meiri áherslu á undirbúning, skilaði sér því með góðum árangri beggja liða og miklum framförum frá síðustu mótum.  

Skoðum árangur sveitarmiðlima:

1.       Hannes Hlífar Stefánsson, 6,5 v. af 11 - hækkar um 2 skákstig

2.       Héðinn Steingrímsson, 6 v. af 10 - hækkar um 4 stig

3.       Bragi Þorfinnsson, 5,5 v. af 9 - hækkar um 12 stig

4.       Björn Þorfinnsson, 4,5 v. af 7 - hækkar um 4 stig

5.       Hjörvar Steinn Grétarsson, 4 v. af 7 - hækkar um 2 stig

Samtals hækka sveitarmeðlimir um 24 stig sem samsvarar því að íslenska sveitin fékk um 2,5 vinningi meira en gera hefði mátt fyrir mót.  

Viðureign kvennasveitarinnar í lokaumferðinni varð ekki síður æsileg.   Til að byrja með leit viðureignin vel út.   Bæði Hallgerður og Jóhanna unnu örugga sigra, Sigurlaug hafði góða stöðu og lék af sér og tapaði.   Lenka tefldi æsilegustu skák umferðarinnar.   Hún fékk betra en tefldi ónákvæmt og skyndilega var staðan á borðinu orðin hrikalega spennandi og Lenka gat hæglega tapað.   Ég var eini Íslendingurinn sem eftir var en þarna voru örugglega um 8-10 Jamaíkabúar sem voru á nálum enda væntanlega hafði þetta verið einn þeirra besti árangur ef þeir hefðu náð 2-2 jafntefli.   Lenka lék einu sinni þegar hún átti 1 sekúndu eftir og heyrði ég þá vonbrigðastunurnar fyrir aftan mig.   Ekki urðu þær minni þegar Lenka snéri á Jamaísku.   Þegar Lenka hafði unnið ákvað ég að sýna mikla hógværð í virðingaskini við þessu stuðningsmenn.  

Allir meðlimir kvennasveitarinnar hækka á stigum - sem er auðvitað frábært.   Ekki síst vegna þess að Davíð Ólafsson, sem átti að verða liðsstjóri þeirra, forfallaðist  aðeins með sólarhringsfyrirfara.   Ég hljóp í skarðið með skömmum fyrirvara en get auðvitað ekki sinnt starfinu af sama mætti og Davíð hefði gert, m.a. annars vegna FIDE-þingsins, auk þess sem skáklegi grunnur minn er miklu lélegri.   Davíð reyndist okkur stelpunum þó mikill hjálparkokkur.   Hann talaði við stelpurnar á Skype og gaf þeim góð ráð.   Helgi aðstoðaði einnig stelpur eftir mætti.   Stelpurnar þurftu svo eðli málsins að taka meira af skarið sjálfar en ella.   Virkilega vel af sér vikið hjá þeim.   T.d. var ég upptekinn í tvo daga vegna FIDE-þings og þá áttu þær góð úrslit.   Ákveðið var að sú sem myndi klárast næstsíðast myndi ekki fara heldur veita síðustu skákkonunni stuðning með því að vera áfram.  

Skoðum árangur sveitarmiðlima:

1.       Lenka Ptácníková, 8,5 v. af 11 - hækkar um 36 stig

2.       Hallgerður Helga Þorsteinsdóttir, 5,5 v. af 11 - hækkar um 13 stig

3.       Sigurlaug Regína Friðþjófsdóttir, 2,5 v. af 8 - hækkar um 16 stig

4.       Tinna Kristín Finnbogadóttir , 3 v. af 7 - hækkar um 1 stig

5.       Jóhanna Björg Jóhansdóttir, 2,5 v. af 7 - hækkar um 21 stig

Sveitarmeðlimir hækka um 87 stig!   Það þýðir að sveitin hafi fengið u.þ.b. 6 vinningum meira en hún hefði átt að fá samkvæmt stigum.  Ég ætla að nefna sérstaklega hana Lenku sem var sannkallaður leiðtogi í góðum hópi.   Hún tapaði í fyrstu umferð en eftir það tapaði hún ekki skák og vann sex skákir í röð.  Maður er virkilega stoltur af stelpunum og Davíð landsliðsþjálfara sem undirbjó liðið greinilega mjög vel fyrir átökin!

Í norðurlandakeppninni hafnaði sveitin í opnum flokki í þriðja sæti.   Danir unnu þá keppni en það var með fáranlegum endaspretti og í raun og veru án þess að vera mjög sannfærandi.   Sune Berg varð líka hálfvandræðalegur þegar við óskuðum honum til hamingju og sagði að sem betur fer væri mótið ekki lengra!   Svíar urðu aðrir, Norðmenn sem voru með stigahæsta liðið urðu aðeins fjórðu, Magnus Carlsen, náði sér aldri á strik og tapaði þremur skákum.   Finnar urðu fimmtu og Færeyingar sjöttu. 

Danir og Íslendingar urðu mun ofar en stigin gerðu ráð fyrir, Svíar, Finnar og Færeyingar u.þ.b. á pari en Norðmenn lægri.

Lokastaðan í opnum flokki:

• 19 (44) Danmörk, 15 stig (257,5)
• 34 (34) Svíþjóð, 13 stig (277)
• 40 (54) Ísland, 13 stig (257,5)
• 51 (23) Noregur, 12 stig (274,5)
• 59 (60) Finnland, 12 stig (218)
• 80 (83) Færeyjar, 11 stig (185,5)

Þrátt fyrir góða lokaniðurstöðu kvennaliðsins dugði það ekki þriðja sæti.   Svíar unnu þá keppni, Danir urðu aðrir, Norðmenn þriðju, þrátt fyrir að vera þar einnig stigahæstir.   Íslendingar voru skammt á eftir og getum vel við unað.   Liðið lenti í efri helmingi mótsins.   Þrjár af stúlkunum eru undir tvítugu þannig að lið Íslands ætti bara að styrkjast næstu ár.

Lokastaðan í kvennaflokki:

• 41 (55) Svíþjóð, 12 stig (244,5)br
• 45 (57) Danmörk, 12 stig (200,5)
• 53 (45) Noregur, 11 stig (204)
• 57 (69) Ísland, 11 stig (201)

Á ýmsu gekk á FIDE-þinginu.   Eftir .þennan eina FIDE-þing sem ég hef setið er ég sannfærður um að Kirsan sé afar gáfaður einstaklingur með mjög sterka nærveru.   Menn geta svo deilt um siðferðið á bakvið ýmislegt sem hann hefur gert.   Kosningarnar og framkoma Kasparov er það sem stendur upp úr í minningunni.   Að sumra mati tapaði Karpov allt að 10 atkvæðum við þennan hamagang.   Það er ljóst að það réði þó aldrei úrslitum.  

Silvio Danilov kom sá og sigraði í Evrópu-kosningunum, eitthvað sem fáir áttu von á fyrir nokkrum mánuðum síðan.   Vonbrigði Ali voru mikil og virtist að einhver leiti kenna Norðmönnum um ófarir sínar og taldi að Norðmenn hafi haft áhrif á hinar Norðurlandaþjóðirnar.   

Sjálfur náði ég góðu sambandi við ýmsa þarna sem vonandi skilar sér í auknum tengslum í framtíðinni.  Til dæmis gæti verið að okkur yrði boðið að taka þátt í Smáþjóðarleikunum.   Ef við þiggjum það boð er þó ljóst að við munum aldrei senda okkar a-lið.     Ég nefndi þann kost við menn úti að Ísland myndi senda u-20 lið og var tekið vel í það.   Nefnt var mig hvort Ísland hefði áhuga að taka þátt í Commonwelth-móti.   Ég bíð eftir frekari upplýsingum.   Ég ræddi við hina Norðurlandaþjóðirnar um útfærslur á því að þjóðirnar myndi bjóða t.d. fulltrúum hinna Norðurlandanna á sín helstu opnu mót (Reykjavíkurmótið, Rilton Cup, Artic Open og Politiken Cup) og var vel tekið í það skoða það og við ætlum að ræða það betur síðar.   Ýmsir eins og t.d. Írar, Pólverjar og Tyrkir sýndu Reykjavíkurskákmótinu mikinn áhuga.   

Aðstæður allar í Khanty Mansiysk voru allar til fyrirmyndar og mun betri en menn áttu von á.   Helgi talaði um að þetta væru bestu aðstæður síðan í Manila 1992.    Skipulagning heimamanna að öllu leyti til fyrirmyndar.   Lögreglumenn voru á öllum gatnamótum og höfðu t.d. rúturnar sem fluttu okkur á milli ávallt forgang.   Aldrei þurfti að bíða eftir rútu nema um stutta stund.   Fluttir voru inn starfsmenn frá St. Pétursborg til að vinna á hótelum, fólk sem talaði góða ensku.     Öll liðin höfðu svokallaðan „tudor" eða aðstoðarmann.   Okkar aðstoðarmaður var hún Natalyia, tvítug stúlka í tungumálanámi frá nágrannaborg Khanty, stóð sig með miklum sóma sem okkar aðstoðarmaður.   Liðin voru misheppin einn mikill Íslandsvinur sagði við mig í miklum öfundartón að þeirra aðstoðarmaður væri „some stupid boy".  

Góður andi var í hópunum og mikið hlegið og haft gaman.   Skákmennirnir voru hraustir þrátt fyrir smá magapestir og einstaka hálsbólgur.    

Þegar mótinu lauk mót bauð fararstjórinn liðsmönnum út að borða   Sumir kusu reyndar fremur að fara á verðlaunaafhendinguna sem aðrir höfðu engan áhuga á að fara á.  

Mín reynsla eftir þetta er að SÍ þarf helst að senda 3 menn út með liðunum í framtíðinni, eins og til stóð.  Að hafa tvo menn er mjög knappt.  

Ferðalagið heim var erfitt og strangt og þegar ég er að klára þennan pistil hef ég verið á fótum í nærri 40 tíma samfellt.   Sumir sváfu reyndar eins og englar í fluginu og mátti t.d. sjá tvo stórmeistara nánast í faðmlögum í vélinni heim.  

Ég vil að lokum þakka fyrir allar baráttukveðjurnar sem við fengum!

Kveðja,
Gunnar Björnsson

Sverrir efstur á Haustmótinu

Haukamaðurinn ungi, Sverrir Þorgeirsson (2223), er einn í efsta sæti með 4,5 vinning þegar fimm umferðir hafa verið tefldar á Haustmóti TR.  Í fimmtu umferð, sem fór fram í gærkvöldi, sigraði Sverrir Gylfa Þórhallsson (2200) eftir að Gylfi lék af sér manni í nokkuð jafnri stöðu.  Á meðan gerðu Þorvaður Ólafsson (2205) og Daði Ómarsson (2172) jafntefli og þar með skaust Sverrir hálfum vinningi fram úr Daða sem hefur 4 vinninga.  Stórmeistarinn, Þröstur Þórhallsson (2381), og Sigurbjörn Björnsson (2300) skutust upp í 3.-4. sæti með 3 vinninga eftir sigra í gær.  Sigurbjörn vann Sverri Örn Björnsson (2161) í mikilli stöðubaráttuskák en Þröstur vann fremur auðveldan sigur á Guðmundi Gíslasyni (2346) sem hefur ekki átt gott mót.

Sverrir Þorgeirsson situr því einn á toppnum þegar hlé verður gert á mótinu vegna afmælishófs T.R. og Íslandsmóts skákfélaga sem fer fram um næstu helgi.  Sjötta umferð fer fram miðvikudaginn 13. október og hefst kl. 19.30.

Öllum skákum b-flokks lauk með jafntefli utan viðureignar Ögmundar Kristinssonar (2050) og Jorge Fonseca (2024) þar sem Ögmundur hafði sigur og skaust þar með upp í 2.-3. sæti ásamt alþjóðlega meistaranum, Sævari Bjarnasyni (2148), sem gerði jafntefli við Þór Valtýsson (2078).  Stefán Bergsson (2102) er áfram efstur með 4 vinninga eftir stutt jafntefli við Eirík K. Björnsson (2038).

Í c-flokki er Páll Sigurðsson (1884) í óhemju stuði og vann núna Ólaf Gísla Jónsson (1891). Páll er efstur með 4,5 vinning og heldur eins vinnings forskoti á Inga Tandra Traustason (1808) sem lagði Svanberg Má Pálsson (1781) eftir að Garðbæingurinn ungi fór of geyst í mannsfórnum snemma skákar.  Í þriðja sæti með 3 vinninga er Jon Olav Fivelstad (1853).

Baráttan í d-flokki harðnar enn.  Páll Andrason (1604) og Birkir Karl Sigurðsson (1466) unnu báðir sínar viðureignir og deila efsta sætinu með 4 vinninga.  Jafnir í 3.-4. sæti með 3,5 vinning eru Guðmundur Kristinn Lee (1553) og Snorri Sigurður Karlsson (1585).

Í opnum e-flokki heldur Grímur Björn Kristinsson enn forystunni með fullu húsi en jöfn í 2.-3. sæti með 4 vinninga eru Veronika Steinunn Magnúsdóttir og Jóhannes Kári Sólmundarson.

Hlé verður nú gert á Haustmótinu.  Sjötta umferð hefst miðvikudaginn 13. október kl. 19.30.

Allar nánari upplýsingar á heimasíðu mótsins.

• Heimasíða TR
• Chess-Results

Skákþáttur Morgunblaðsins: Ólympíumót á slóðum loðfílanna

Að heimsmeistaranum Anand undanskildum eru allir bestu skákmenn heims samankomnir á ólympíuskákmótinu í í Khanty Manyisk í Síberíu sem hófst á þriðjudaginn. Hér spranga um sali meistarar á borð við Vladimir Kramnik, Venselin Toplaov, Levon Aronjan, Boris Gelfand, Peter Leko, Hikaru Nakamura og Judit Polgar. Enginn er þó jafn vel klæddur og stigahæsti skákmaður heims, Norðmaðurinn Magnús Carlsen sem nýverið hefur hafið störf fyrir þekktan framleiðenda tískufatnaðar. Ýmsum finnst támjóu rú-skinnsskórnir hans býsna svalir. Að loknum þrem umferðum hefur karlasveitin, sem er skipuð Hannesi Hlífari Stefánssyni Héðni Steingrímssyni, bræðrunum Braga og Birni Þorfinnssonum og Hjörvar Steini Grétarssyni, unnið eina viðureign, gert jafntefli og tapað einni. Kvennasveitin sem er skipuð Lenku Ptacnikovu, Hallgerði Helgu Þorsteinsdóttur, Sigurlaugu Friðþjófsdóttur, Tinnu Kristínu Finnbogadóttur og Jóhönnu Björgu Jóhannsdóttur hefur unnið eina viðureign og tapað tveimur. Tefldar verða ellefu umferðir. Nú skipta stigin úr hverri viðureign höfuðmáli. Karlasveitin er með þrjú stig og sjö vinninga en konurnar 2 stig og fimm vinninga.

Greinarhöfundur er í fyrsta sinn í hlutverki liðsstjóra íslenska liðsins og er það í sjálfu sér ágætis tilbreyting. Samanburður við framkvæmd annarra Ólympíumóta er staðarhöldurum hagstæður.

Íbúar Khanty Manyisk munu vera um 70 þúsund og er þetta uppgangspláss sakir mikils olíuauðs. Mikið um stórframkvæmdir og flest nýtt af nálinni, hótelinu var komið upp síðustu dagana og skipuleggjendur hafa greinilega kostað miklu til að allt fari vel fram. Öldum fyrr rigsuðu um steppurnar í grennd við þennan bæ hinir forsögulegu loðfílar, löngu útdauð tegund sem er höfð í miklum metum hér og mega heita einkennisdýr Khanty Manyisk.

Þó keppnin sé komin of stutt á veg til þess að hægt sé að draga víðtækar ályktanir þá hafa hér orðið ýmis óvænt úrslit. Kínverjar eru næsta stórveldi skákarinnar stóð einhvers staðar og það er örugglega rétt, en hvað getur maður sagt um granna þeirra í Víetnam sem hafa unnið allar viðureignir sínar, þar af eina sterkustu sveitina frá Azerbadsjan? Hollendingar eru með þétta sveit og þar vekur mesta athygli undrabarnið Giri sem er líklegur til mikilla afreka í framtíðinni. Hann er einn þeirra sem virðast ekkert hafa fyrir því að tefla. En í fyrstu umferð tapaði Hollendingur, sem mikið hefur verið látið með, fyrir einum af minni spámönnunum sem er frá Dóminíska lýðveldinu.

Ol Khanty Manyisk 2010 – 1. umferð:

Jan Smeets – Lisandro Munoz

Sikileyjarvörn

1.e4 c5 2. Rf3 e6 3. d4 cxd4 4. Rxd4 Rc6 5. Rc3 Dc7 6. g3 a6 7. Bg2 d6 8. O-O Bd7 9. Rb3 b5 10. a4 b4 11. Re2 Rf6 12. a5 e5 13. c3 Be6 14. Bg5 Hb8 15. Hc1Be7 16. Rbd4?!

Snotur leikur á yfirborðinu en svartur á einfalda vörn.

16. .. . Rxd4 17. cxd4 Dxa5 18. Dd3 Bd7!

Riddarinn á e2 er vandræðagripur.

19. Hfe1 Bb5 20. Db3 O-O 21. Ha1 Dc7 22. Da2 h6 23. Bd2 Dc2 24. b3 Hfc8 25. Rc1 exd4 26. Bxb4 Rg4 27. Bh3

( STÖÐUMYND )

27. ... Re5!

Bráðsnjall leikur sem gerir út um taflið.

28. Bxc8 Rf3+ 29. Kh1 Rxe1 30. Bf5 Dd1 31. Re2 Dxe2 32. Bxe1

32. Dxe2 Bxe2 33. Bxe1 var skárra en gjörtapað engu að síður.

32. ... Df1 mát!

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 26. september 2010.

Skákþættir Morgunblaðsins