Carlsen öruggur sigurvegari í Biel

Magnus Carlsen (2821) vann öruggan sigur á ofurskákmótinu sem lauk í Biel í dag.  Magnus gerði jafntefli við Caruana (2711) í lokaumferðinni og hlaut 19 stig stig.  Morozevich (2694) kórónaði gott mót þegar hann vann Pelletier (2590) og varð annar með 17 stig.  Þeir voru í sérflokki en í 3.-4. sæti urðu Vachier-Lagrave (2722) og Shirov (2714) með 12 stig.  Sá fyrrnefndi náði 1,5 vinningi gegn Magnúsi.

Lokastaðan:

	Name		ELO	Points
1.	Magnus Carlsen	NOR	2821	19
2.	Alexander Morozevich	RUS	2694	17
3.	Maxime Vachier-Lagrave	FRA	2722	12
4.	Alexei Shirov	ESP	2714	12
5.	Fabiano Caruana	ITA	2711	10
6.	Yannick Pelletier	SUI	2590	5

Sex skákmenn tóku þátt og tefldu tvöfalda umferð.   Veitt voru 3 stig fyrir sigur og eitt stig fyrir jafntefli.

Heimasíða mótsins

 

Skák út um allt: Líf og fjör í Laugardalslaug!

Það var heldur betur líf í tuskunum þegar Bragi Þorfinnsson landsliðsmaður og Stefán Bergsson hjá Skákakademíu Reykjavíkur tefldu vígsluskákina í 38 gráðu pottinum í Laugardalslaug í dag, fimmtudag.
 
Þetta var liður í verkefninu ,,Skák út um allt" sem Skákakademían og Skáksamband Íslands standa saman að, en upp á síðkastið hefur taflsettum verið dreift á marga staði í borginni, og framundan eru enn fleiri heimsókn og taflgjafir.
 
Sundlaugargestir tóku heimsókninni fagnandi, ekki síst unga kynslóðin, og fjölmiðlar gerðu atburðinum góð skil. Hér eru myndir úr pottinum!

 

 

Til í slaginn! Bragi Þorfinnsson landsliðsmaður og Stefán Bergsson framkvæmdastjóri Skákakademíu Reykjavíkur búa sig undir vígsluskákina.

 

Pottverjar kunnu vel að meta heimsókn skákmeistaranna.

 

Bragi blés til stórsóknar með hvítu, fórnaði manni og ætlaði greinilega að drekkja svarta kónginum. Neðst til vinstri sést stóra tá alþjóðlega meistarans.

 

Arnar Valgeirsson skákfrömuður m.m. og Jón Viktor Gunnarsson alþjóðlegur meistari fylgjast með darraðardansinum.

 

 

 

 Bragi Þorfinnsson glaðbeittur í viðtali við Mbl.is eftir sigur í spennandi viðureign.

 

 

Krakkarnir hópuðust í heita pottinn og fylgdust spenntir með.

 

 

Bragi átti í vök að verjast með svörtu mönnunum, en fékk mörg góð ráð hjá krökkunum.

 

 

Skákin á greinilega heima í sundlaugunum!

 

Stefán Bergsson segir frá Skákakademíu Reykjavíkur og hinu skemmtilega verkefni ,,Skák út um allt" sem Akademían og Skáksamband Íslands standa saman að.

 

 

Bragi útskýrir leyndardóma skáklistarinnar.

 

 

Ragnhildur Sigurðardóttir fréttamaður Sjónvarpsins hikaði ekki við að demba sér í pottinn og skora meistarana á hólm!
 

• Myndaalbúm
• Frétt mbl.is
• Frétt RÚV

Hannes með vinningsforskot í Tékklandi

Stórmeistarinn Hannes Hlífar Stefánsson (2546) heldur áfram ótrúlegri sigurgöngu á Czech Open sem fram í Pardubice í Tekklandi.  Í sjöundu umferð, sem fram fór í dag, vann hann rússneska stórmeistarann Konstantin Chernyshov (2552).  Hannes hefur nú unnið 5 skákir í röð og hefur hlotið 6,5 vinning.  Hann hefur vinnings forskot á næstu menn.  Farið er yfir skák dagsins á Skákhorninu.  Í áttundu og næstsíðustu umferð sem fram fer á morgun teflir Hannes við rússneska stórmeistarann Alexandre Danin (2538).  Skákin verður sýnd beint á heimasíðu mótsins og án efa mun íslenskir skákfræðingar fjalla um hana jafnóðum á Skákhorninu.

Nafnarnir Guðmundur Gíslason (2323) og Guðmundur Kjartansson (2310) töpuðu báðir fyrir stórmeisturum.  Kjartansson fyrir Rússanum Alexei Gavrilov (2481) en Gíslason fyrir Tékkanum Petr Velicka (2461).  Kjartansson hefur 4 vinninga en Gíslason hefur 3,5 vinning.  Kjartansson mætir spænska alþjóðlega meistaranum David Recuero (2441) á morgun en Gíslason mætir tékkneska FIDE-meistaranum Josef Kratochvil (2230).  

Í b-flokki vann Sigurður Eiríksson (1951) en Jakob Sævar Sigurðsson (1789) tapaði  Sigurður hefur 4 vinninga en Jakob Sævar hefur 1 vinning.

Í a-flokki tefla 279 skákmenn.  Þar af eru 50 stórmeistarar og 58 alþjóðlegir meistarar.  Hannes er nr. 17 í stigaröð keppenda, Gíslason nr. 132 og Kjartansson nr. 140.

• Heimasíða mótsins
• Chess-Results
• Beinar útsendingar frá 15 efstu borðunum (hefjast kl. 13)

Dortmund: Kramnik með yfirburði

Vladimir Kramnik (2781) virðist vera kominn í gamla formið á Dortmund Sparkassen mótsins sem nú er í gangi.  Í sjöundu umferð sem fram fór í dag vann Meier (2656).  Kramnik hefur hlotið 6 vinninga í 7 skákum sem verður teljast mjög gott á svo sterku móti.   Víetnaminn Le Quang (2715) er annar með 4 vinninga

Rétt eins og í Biel taka 6 skákmenn þátt og tefld er tvöföld umferð.

Staðan:

• 1. Kramnik (2781) 6 v.
• 2. Le Quang (2715) 4 v.
• 3. Giri (2701) 3,5 v.
• 4. Ponomariov (2764) 3 v.
• 5. Nakamura (2770) 2,5 v.
• 6. Meier (2656) 2 v.

• Heimasíða mótsins
• Beinar útsendingar (hefjast um kl. 13:15 nema lokaumferðin sem hefst um 11:15.

 

Carlsen hefur tryggt sér sigur í Biel

Magnus Carlsen (2821) gerði jafntefli í dag við  Vachier-Lagrave (2722) í níundu og næstsíðustu umferð ofurmótsins í Biel.  Aðalandstæðingur hans Morozevich (2694) tapaði hins vegar fyrir Caruana (2711).  Þar með hefur Carlsen 4 stiga forskot fyrir lokaumferðina, sem fram fer í fyrramálið, og hefur þar með tryggt sér sigur á mótinu.

Staðan:

	Name		ELO	Points
1.	Magnus Carlsen	NOR	2821	18
2.	Alexander Morozevich	RUS	2694	14
3.	Maxime Vachier-Lagrave	FRA	2722	11
	Alexei Shirov	ESP	2714	11
5.	Fabiano Caruana	ITA	2711	9
6.	Yannick Pelletier	SUI	2590	5

Sex skákmenn taka þátt og tefla tvöfalda umferð.   Veitt eru 3 stig fyrir sigur og eitt stig fyrir jafntefli.

• Heimasíða mótsins
• Beinar útsendingar (hefjast kl. 12 nema lokaumferðin sem hefst kl. 9)

 

Miðsumarmót Riddarans

Riddarar reitaða borðsins vilja heldur tefla sér til gamans yfir sumarið en að reita arfa í góða veðrinu.  Yfir þrjátíu skákarar af eldri kynslóðinni hafa mætt til tafls í Strandbergi og krækt sér í vinning í Vonarhöfn í júlímánuði. Það skiptast reyndar líka á skin og skúrir á skákborðinu eins og úti við.

Í gær (27. Júlí) voru 20 galvösk gamalmenni mætt þar til tafls og tefldu 11 umferðir sér til afþreyingar og yndisauka.   Guðfinnur R. Kjartansson var sigur úr bítum með 8.5 vinning, með 3.5 niður, sem segir sína sögu um tvísýna og harða keppni. GRK vann einnig fyrir viku síðan og  þá með 10 vinningum. Þar á undan sigraði Sigurður Herlufsen með 9 v.  og á fyrsta móti júlímánaðar Ingimar Halldórsson með 9 v. einnig. Ýmsir valinkunnir meistarar hafa orðið að sætta sig við færri vinninga svo ekki sé nú talað um minni spámenn, sem hafa þó iðulega mikil áhrif á úrslit móta.   

Nánari úrslit má sjá á www.riddarinn.net

Myndaalbúm (ESE)

 

 

 

Hannes efstur á Czech Open með 5,5 vinning eftir 6 umferðir

Stórmeistarinn Hannes Hlífar Stefánsson (2546) heldur áfram sigurgöngu sinni á Czech Open sem fram fer í Pardubice í Tékklandi.  Í sjöttu umferð, sem fram fór í dag vann hann indverska stórmeistarann Magesh Chandran Panchanathan (2556).  Farið er yfir skákina á Skákhorninu.   Hannes er nú einn efstur með 5,5 vinning.   

Í sjöundu umferð sem fram fer á morgun teflir Hannes við rússneska stórmeistarann Konstantin Chernyshov (2552).  Skákin verður sýnd beint og hefst kl. 13.

Guðmundur Kjartansson (2310) vann úkraínska alþjóðlega meistaranum Vitaliy Bernadskiy (2453) en Guðmundur Gíslason (2323) gerði jafntefli við  spænska alþjóðlega meistaranum Marcos Llaneza Vega (2465).  Kjartansson hefur 4 vinninga en Gíslason hefur 3,5 vinning.  Kjartansson mætir rússneska stórmeistaranum Alexei Gavrilov (2481) á morgun en Gíslason mætir tékkneska stórmeistaranum Petr Velicka (2461).

Í b-flokki gerði Sigurður Eiríksson (1951) jafntefli en Jakob Sævar Sigurðsson (1789) tapaði  Sigurður hefur 3 vinninga en Jakob Sævar hefur 1 vinning.

Í a-flokki tefla 279 skákmenn.  Þar af eru 50 stórmeistarar og 58 alþjóðlegir meistarar.  Hannes er nr. 17 í stigaröð keppenda, Gíslason nr. 132 og Kjartansson nr. 140.

• Heimasíða mótsins
• Chess-Results
• Beinar útsendingar frá 15 efstu borðunum (hefjast kl. 13)

EM-liðið valið

Á fundi landsliðs- og afreksnefndar í gær samþykkti nefndin tillögu Helga Ólafssonar, landsliðsþjálfara, um lið Íslands fyrir Evrópumót landsliða í skák, sem fer fram í Grikklandi 2.-12. nóvember nk.

Eftirtaldir voru valdir:

• SM Héðinn Steingrímsson (2570)
• SM Hannes Hlífar Stefánsson (2546)
• SM Henrik Danielsen (2535)
• FM Hjörvar Steinn Grétarsson (2437)
• AM Bragi Þorfinnsson (2427)

Helgi Ólafsson, sem einnig verður liðsstjóri, mun stjórna æfingum, undirbúningi og upplýsingaöflun íslenska liðsins fyrir mótið. Endanleg borðaröð verður ákveðin í byrjun september.

Heimasíða mótsins

Skák út um allt: Reykjavík skákvædd í rigningunni

Sendiboðar Skákakademíu Reykjavíkur og SÍ halda áfram að dreifa taflsettum á opinbera staði í höfuðborginni. Í dag lá leiðin á Reykjavíkurflugvöll, BSÍ, Perluna, íþróttamiðstöð Vals, Flugfélagið Ernir og Kaffivagninn. Taflsettunum var hvarvetna tekið með fögnuði og tafarlaust vígð, svo úr urðu margar ævintýralegar skákir.
 
Skákáhugamenn eru hvattir til að sækja þá staði þar sem tafl er í boði, en skákvæðingin heldur áfram af fullum krafti á næstunni. Stefán Bergsson framkvæmdastjóri SR hefur sett það markmið að 50 staðir verði hluti af þessu skemmtilega verkefni fyrir áramót.
 
Hér fylgir frásögn í máli og myndum af heimsóknum dagsins:

 

 

Skák á Reykjavíkurflugvelli: Ísfirðingurinn Eyjólfur Þráinsson beið eftir flugi til Egilsstaða, en hann starfar í álverinu á Reyðarfirði. Hann lærði ungur að tefla og tók einu sinni þátt í fjöltefli við Jón L. Árnason. Eyjólfur tefldi einsog herforingi og gerði heiðarlega tilraun til að heimaskítsmáta Stefán.
 

 

 

Skák á BSÍ: Kaffiterían á BSÍ er ein helsta menningarmiðstöð landsins og nú er hægt að tefla þar líka. Sölvi Már Viðarsson, starfsmaður, sýndi fína takta í vígsluskákinni enda lærði hann ungur að tefla í Borgaskóla.

 

 

Skák í Perlunni: Íris Óskarsdóttir tók á móti taflsettinu í kaffiteríu Perlunnar og stóð sig með prýði gegn Stefáni. Skák þeirra lauk með jafntefli, en Íris lærði að tefla á Selfossi, þeim góða skákbæ.
 

 

 

Skák hjá Flugfélaginu Ernir: Heiðursmaðurinn Hörður Guðmundsson, einn reyndasti flugkappi landsins, tók á móti sendiboðum SR og SÍ. Ernir fljúga til Vestmannaeyja, Hafnar, Sauðarárkróks, Bíldudals og Gjögurs, svo nú geta farþegar þangað stytt sér stundir við tafl meðan þeir bíða eftir flugi. 
 

 

 

Skák hjá Val: Framkvæmdastjóri Vals, Haraldur Daði Ragnarsson, tók fagnandi við taflsettinu enda jafnan líf og fjör í bækistöðvum Vals. Ungu pjakkarnir fylgdust spenntir með viðureign Haraldar og Hrafns Jökulssonar, og settust sjálfir að tafli um leið og vígsluskákinni lauk.
 

 

 

Skák í Kaffivagninum. Tveir harðsnúnir skákmenn, Kristján Örn Elíasson og Rúnar Berg, sátu og ræddu heimsmálin þegar komið var í Kaffivagninn. Óðar var slegið upp einvígi milli Stefáns og Kristjáns Arnar, en sá síðarnefndi er skæður sóknarskákmaður og komst í 3-1 áður en Stefáni tókst með harðfylgi að jafna. Gaman að þessu, einsog Kristján er vanur að segja!
 

 

 

Rúnar Berg, sá  ágæti fræðimaður á sviði byrjana, sá um skákskýringar enda kom upp mörg ævintýralega staða í viðureign Stefáns og Kristjáns.
 

 

 

Kristján Örn þungt hugsi með varðskipið Óðinn í baksýn. Kaffivagninn er með skemmtilegustu kaffihúsum og nú er sem sagt hægt að tefla þar líka.

Myndaalbúm (HJ)

Czech Open: Hannes vann og er í 1.-3. sæti

Stórmeistarinn Hannes Hlífar Stefánsson (2546) vann rússneska alþjóðlega meistarann Ivan Rozum (2464) í fimmtu umferð Czech Open sem fram fór í dag.  Farið er yfir skákina á Skákhorninu.  Hannes hefur 4,5 vinning og er efstur ásamt stórmeisturunum Magesh Chandran Panchanathan (2556), Indlandi og Konstantine Shanava (2535), Georgíu. 

Hannes mætir Panchanathan í sjöttu umferð, sem fram fer á morgun.  Skákin verður sýnd beint og hefst kl. 13.

Guðmundur Gíslason (2322) vann Rússann Mstislav Yefimov (2127) en Guðmundur Kjartansson (2310) gerði jafntefli við þýska alþjóðlega meistarann Dennis Breder (2443).   Nafnarnir hafa 3 vinninga.  Gíslason mætir spænska alþjóðlega meistaranum Marcos Llaneza Vega (2465) og Kjartansson mætir úkraínska alþjóðlega meistaranum Vitaliy Bernadskiy (2453).

Í b-flokki gerði Sigurður Eiríksson (1951) jafntefli en Jakob Sævar Sigurðsson (1789) tapaði  Sigurður hefur 2,5 vinning en Jakob Sævar hefur 1 vinning.

Í a-flokki tefla 279 skákmenn.  Þar af eru 50 stórmeistarar og 58 alþjóðlegir meistarar.  Hannes er nr. 17 í stigaröð keppenda, Gíslason nr. 132 og Kjartansson nr. 140.

• Heimasíða mótsins
• Chess-Results
• Beinar útsendingar frá 15 efstu borðunum (hefjast kl. 13)