Hraðskákkeppni taflfélaga fer fram 19. nóvember

Hraðskákkeppni taflfélaga verður haldin í Rimaskóla 19. nóvember og hefst keppni kl. 13:00.

Tefldar verða 2x7 umferðir eftir svissnesku kerfi og verða tímamörkin 3 2. Hver sveit er skipuð 6 mönnum auk varamanna. Hvert félag má senda a og b lið til leiks en þó áskilja mótshaldarar sér rétt á að takmarka fjölda b liða ef skráning er þeim mun meiri. Mótsgjald er 10.000 krónur á lið. Mótið verður reiknað til alþjóðlegra hraðskákstiga.

Varamenn koma ávallt inn á neðsta borð og þarf lið að vera eins skipað í báðum skákum hverrar umferðar. Það lið sem hlýtur flesta vinninga er Íslandsmeistari skákfélaga í hraðskák 2017 og verði tvö lið jöfn er einföld umferð tefld til úrslita um titilinn (dregið um lit á borði eitt og sitthvor liturinn á næstu borðum).

Skákdeild Fjölnis sér um mótshaldið og hvetjum við sem flest lið til að skrá sig til leiks!

Skráning fer fram hér á Skák.is (guli kassinn). 

Upplýsingar um þegar skráðar sveitir má finna hér.

Mön: Góður gærdagur - Dagur vann alþjóðlega meistara

Íslensku skákmennirnir halda áfram að ná góðum úrslitum á alþjóðlega mótinu í Mön og breytir þar engu um hvort menn tefla í meistara-, 1. eða 2. flokki. Áttunda og næstsíðasta umferð fór fram í gær. Dagur Ragnarsson (2340) vann í gær bandaríska alþjóðlega meistarann Marc Esserman (2453) og Hilmir Freyr Heimisson (2185) lagði Indverjann V Pranav (2372) að velli. Guðmundur Kjartansson (2456) vann einnig sína skák. Alexander Oliver Mai og Arnar Heiðarsson og Freyja Birkisdottir náðu öllum góðum úrslitum í neðri flokkum mótsins.

Heimsmeistarinn Magnus Carlsen (2827) er efstur með 7 vinninga. Hikaru Nakamura (2781) er annar með 6½ vinning. Þeir mætast í dag og dugar Magnusi jafntefli með hvítu til að vinna sinn fyrsta mótasigur á kappskákmóti í ár.

Úrslit gærdagsins í Meistaraflokki

Staða íslensku keppendanna

Tveir Íslendingar taka þátt í 1. flokki (major). Alexander Oliver Mai (1875) oo Arnar Heiðarsson (1480) unnu báðir í gær. Alexander Oliver hefur 4½ eftir 6 umferðir og er í 3.-4. sæti aðeins hálfum vinningi á eftir efstu mönnum.  Arnar Heiðarsson (1480) vann skákmenn með 1811 skákstig og hefur 3 vinninga. Arnar hefur því 50% vinningshlutfall þrátt fyrir að vera stigalægstur keppenda!

Freyja Birkisdóttir (1332) teflir í 2. flokki (minor). Í gær gerði hún jafntefli við skákmann með 1685 skákstig. Freyja hefur 3½ vinning og er taplaus þrátt fyrir að hafa teflt við stigahærri andstæðinga í öllum umferðum!

• Heimasíða mótsins
• Chess-Results

 

Íslandsmót ungmenna (u8-u16) fer fram næstu helgi

Íslandsmót ungmenna fer fram helgina 7.-8. október í Rimaskóla. Teflt er í fimm flokkum. Krýndir verða 10 Íslandsmeistarar - efsti strákur og efsta stelpa í öllum flokkunum fimm. Glæsilegar vinningar í boði.

Allir flokkar hefjast 12:00 á laugardeginum. Tekið verður við þátttökugjöldum og staðfestingu á mætingu frá 11:20 – 11:50. Þeir keppendur sem mæta eftir 11:50 geta misst sæti sitt í mótinu.

Skráning er á Skák.is (guli kassinn efst) til og með 5. október. Upplýsingar um þegar skráða keppendur má finna hér.

Þátttökugjald er krónur 1.500 og greiðist með reiðufé við staðfestingu á mætingu. Systkini borga aldrei meira en 2.500 kr. samtals. Hægt er jafnframt að greiða í gegnum netbanka fyrir mót inn á reikning 101-26-12763, kt. 58026-5409. Vinsamlegast látið nafn keppenda koma fram í skýringu og sendið kvittun á [e-mail].

Stefnt er að því að tefla í sérflokkum fyrir stráka og stelpur en mögulega þarf að sameina einstaka flokka verði þátttaka ekki nægjanleg. Sigurvegari í flokki 9-10 ára tryggir sér sæti á Norðurlandamótinu í skák sem fer fram í febrúar 2018 í Finnlandi. Sigurvegarar í elstu flokkunum þremur tryggja sér sæti á Unglingameistaramóti Íslands. 

Verði menn jafnir í efstu sætum er teflt um Íslandsmeistaratitla en stig reiknuð um önnur sæti. Í flokki átta ára og yngri verða þó reiknuð stig um öll sæti.

8 ára og yngri (f. 2009 og síðar)

Umhugsunartími: 8-2 mínútur.

Fjöldi umferða: Allir keppendur tefla fimm umferðir á laugardeginum. Eftir fimm umferðir verður niðurskurður þannig að keppendur með þrjá vinninga eða fleiri komast áfram og mæta líka á sunnudegi. Umferðafjöldi á sunnudegi verður tvær til fjórar umferðir eftir heildarfjölda keppenda.

Dagskrá: Mótið hefst 12:00 á laugardeginum og 12:00 á sunnudeginum fyrir þá sem komast áfram. 

9-10 ára (f. 2007 og 2008)

Umhugsunartími: 8 + 2 mínútur

Fjöldi umferða: Allir keppendur tefla fimm umferðir. Eftir fimm umferðir verður niðurskurður þannig að keppendur með þrjá vinninga eða fleiri komast áfram og mæta líka á sunnudegi. Umferðafjöldi á sunnudegi verður tvær til fjórar umferðir eftir heildarfjölda keppenda.

Dagskrá: Mótið hefst 12:00 á laugardeginum og 12:00 á sunnudeginum fyrir þá sem komast áfram.

11–12 ára (f. 2005 og 2006)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.

13–14 ára (f. 2003 og 2004)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.

15–16 ára (f. 2001 og 2002)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9                                                                           

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.                        

Skákþáttur Morgunblaðsins: Hótunin er sterkari en leikurinn

Þó að Hjörvar Steinn Grétarsson sé stigahæsti keppandinn á Haustmóti Taflfélags Reykjavíkur og meistaramóti Hugins er hann langt í frá öruggur með sigur en þátttaka hans í báðum mótunum er ánægjuleg og nokkrir aðrir hafa farið að dæmi hans og tefla bæði í Faxafeninu og í Mjóddinni þar sem Meistaramót Hugins fer fram. Á Haustmóti TR eru keppendur í efsta flokki 30 talsins og staða efstu manna þegar tefldar hafa verið sjö umferðir af níu er þessi: 1. Hjörvar Steinn Grétarsson 6 v. (af 7) 2. Magnús Örn Úlfarsson 5 ½ v. 3.-5. Einar Hjalti Jensson, Þorvarður Ólafsson og Björgvin Víglundsson 5 v.

Varðandi stöðuna á Meistaramóti Hugins er vert að hafa í huga að keppendur geta tekið tvær yfirsetur en reikna má með að úrslit fáist í uppgjöri efstu manna í lokaumferðunum. Efstu menn eru þessir: 1.-3. Vignir Vatnar Stefánsson, Hjörvar Steinn Grétarsson og Björn Þorfinnsson 4 v. (af 5).

Á Akureyri stendur yfir haustmót Skákfélags Akureyrar og þar er Jón Kristinn Þorgeirsson efstur með 3 ½ v. eftir fjórar umferðir en með ½ vinningi minna eru þeir Sigurður Arnarson og Smári Ólafsson.

Taflfélag Reykjavíkur hefur látið slá inn allar viðureignir mótsins og birt á netinu, þar vakti athygli mína skák Hjörvars Steins og Einars Hjalta Jenssonar úr sjöttu umferð. Eftir átakalitla byrjun fór spennan að magnast og eftir 28. leik hvíts kom þessi staða upp:

Haustmót TR 2017:

Hjörvar Steinn – Einar Hjalti

28. ... Dxa4?!

Teflt á tæpasta vað. Öruggara var að valda f5-reitinn og leika 28. ... g6.

29. Dc4+ Kf8 30. b5!

Einar hafði búist við þessu, hann má ekki fara í drottningakaup en treysti á ...

30. ... Da3! 31. Df1!

Valdar hrókinn og hótar 32. Rc4.

31. ... Ra5 32. Ha1 Dxc3 33. Hc1 Dd3 34. Dh3!

Eftir allar þessar vendingar búast menn hvíts til innrásar, svartur er í raun varnarlaus.

34. ... Dd7 35. Hc8+?! Ke7 36. Rf5+ Ke6

Setningin að hótunin sé sterkari en leikurinn er talin ein mesta spekin úr herfræði skákarinnar og á vel við stöðuna sem kom upp eftir 34. leik svarts og einnig þessa. „Vélarnar“ staðhæfa að 35. Dxh7 hefði verið betra en 35. Hcc8+ og að nú sé 37. Dg4! leikurinn, t.d. 37. ... g6 38. Rh6+ f5 39. Rxf5 gxf5 40. Dg8+ og vinnur.

37. He8+? Kd5

Nú sleppur kóngurinn yfir á drottningarvænginn og sókn hvíts er runnin út í sandinn. Í framhaldinu gat Einar leikið 44. ... a5 með vinningsstöðu. Hjörvar var laginn við skapa sér gagnfæri og vann að lokum.

38. He7 Dxb5 39. Re3 Kc5 40. Dc8 Kb4 41. Dg4 Ka3 42. Df3 Ka2 43. Hxg7 Rc6 44. Dxf6 Db1 45. Kg2 De4 46. Kh3 Hb2 47. Rd1 Hb3 48. Hxb7 Dg6 49. Dxg6 hxg6 50. Hc7 Hb6 51. Rc3 Kb3 52. Rd5 Hb5 53. Hxc6 Hxd5 54. Ha6 Hd7 55. Kg4 Kc4 56. h4 Kb5 57. Hxg6 Hf7 58. He6 Hxf2 59. Hxe5 Kb4 60. h5 a5 61. h6 Hf8 62. h7 a4 63. Kg5 a3 64. g4 a2 65. He1 Ha8 66. Ha1

- og svartur gafst upp. 

Aronjan og Ding tefla til úrslita

Armeninn Levon Aronjan og Kínverjinn Liren Ding tefla til úrslita á heimsbikarmótinu í Tiblisi í Georgíu. Aronjan vann Frakkann Vachier-Lagrave í armageddon-skák sl. fimmtudag og samtals 5:4. Áður hafði Liren Ding unnið Wesley So 3 ½ : 2 ½. Einvígi Aronjan og Ding hefst í dag og tefla þeir fjórar skákir. Þeir hafa báðir unnið rétt til þátttöku í næsta áskorendamóti.

 

 

Helgi Ólafsson [e-mail]

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 23. september 2017

Skákþættir Morgunblaðsins

Mjög gott gengi í gær á Mön

Mjög vel gekk hjá íslensku skákmönnunum á alþjóðlega mótinu í Mön í gær. Alls kom 6½ vinningur í hús í átta skákum í meistaraflokki mótsins. Fimm vinningsskákir og þrjú jafntefli. Gauti Páll Jónsson (2011) vann þýska FIDE-meistarann Gerald Low (2262) og Aron Þór Mai (2038) hafði betur gegn skoska alþjóðlega meistaranum Stephan Mannion (2320). Auk þeirra unnu Dagur Ragnarsson (2340), Bárður Örn Birkisson (2164) og Björn Hólm Birkisson (2023) sínar skákir.

Sumir íslensku skákmannanna spiluðu fótbolta í gær og í myndinni hér að ofan má sjá Bárð Örn og Alexander Oliver kljást um boltann við heimsmeistarann!

Heimsmeistarann er efstur á mótinu með 6 vinninga. Fimm skákmenn hafa 5½ vinning. 

Úrslit gærdagsins í Meistaraflokki

Staða íslensku keppendanna

Tveir Íslendingar taka þátt í 1. flokki (major). Alexander Oliver Mai (1875) oo Arnar Heiðarsson (1480) gerðu báðir jafntefli í gær. Sá síðarnefndi við skákmann við 1805 skákstig! Alexander hefur 3½ vinning en Arnar hefur 2 vinninga eftir 5 umferðir.

Freyja Birkisdóttir (1332) teflir í 2. flokki (minor). Hún heldur áfram að gera góða hluti. Í gær gerði hún jafntefli við skákkonu við 1724 skákstig. Hún hefur 3 vinning eftir 5 umferðir og er taplaus þrátt fyrir að hafa teflt við mun stigahærri skákmenn í öllum umferðum!

• Heimasíða mótsins
• Chess-Results

 

Haustmót Vinaskákfélagsins fer fram á mánudaginn

Haustmót Vinaskákfélagsins verður haldið mánudaginn 2. október. Mótið fer fram í Vin, að Hverfisgötu 47, og hefst kl.13.00.

Tefldar verða sex umferðir með 7 mínútna umhugsunartíma á hverja skák. Mótið verður reiknað til hraðskáksstiga. Skákstjóri mótsins verður Hörður Jónasson og verða góð verðlaun í boð.

Hægt er að skrá sig hér fyrir ofan á Skak.is (gulur kassi) en einnig verður tekið við skráningum á staðnum.

Eins og venjan er í Vin verður boðið uppá frábærar veitingar í hléi.

Upplýsingar um þegar skráða keppendur má finna hér. 

Allir velkomnir!!

 

Opið Hús hjá Hróknum: Hátíð á hamfærasvæðum á Grænlandi

Hrókurinn verður með opið hús í Pakkhúsinu, Geirsgötu 11 við Reykjavíkurhöfn, laugardaginn 30. september milli 14 og 16. Þar munu meðal annars sirkuslistamennirnir Axel Diego og Bjarni Árnason leika listir sínar, en þeir verða í föruneyti Hróksins sem heldur á hamfarasvæðin á Grænlandi í næstu viku með hátíð í farangrinum.

Uummannaq er 1300 manna bær á samnefndri eyju, 600 km norðan við heimskautsbaug. Þar eru líka um 170 flóttamenn, þar af 70 börn, frá þorpunum tveimur í firðinum sem voru rýmd eftir flóðbylgjuna ægilegu sem kostaði fjögur mannslíf í Nuugaatsiaq og sópaði ellefu húsum til hafs. Vegna hættu á frekari hamförum fá íbúar þorpanna tveggja aldrei að snúa heim, og er nú unnið að því að finna þeim framtíðarheimili.

Á leiðinni til Uummannaq verður komið við í höfuðborginni Nuuk og slegið upp skemmtun í verslunarmiðstöð borgarinnar, athvarf fyrir heimilislausa heimsótt og fleiri fastir viðkomustaðir Hróksins í Nuuk.

Hrafn Jökulsson forseti Hróksins og skipuleggjandi landssöfnunarinnar Vinátta í verki, sem efnt var til eftir hamfarirnar, segir mikla tilhlökkun í hópnum. ,,Það er stórkostlegt að fá snillingana úr Sirkus Íslands með, enda gleðigjafar af guðs náð. Við verðum líka með kennslu í skák, myndlist og dansi, og vonumst til að virkja bæjarbúa á öllum aldri í eina allsherjar hátíð gleði og vináttu."

Landssöfnunin Vinátta í verki, sem var samstarfsverkefni Hjálparstarfs kirkjunnar, Hróksins og Kalak, vinafélags Íslands og Grænlands, skilaði yfir 40 milljónum króna. Hrafn segir að mikilvægt sé að peningarnir nýtist þeim, sem verst urðu úti, með sérstakri áherslu á börnin. Að beiðni Rauða krossins á Grænlandi verður 500.000 dönskum krónum varið til húsgagnakaupa fyrir þá sem misstu allt sitt og þá var að sjálfsögðu orðið við þeirri beiðni grænlenska Rauða krossins um að kosta ferð þeirra fjölskyldna sem verst urðu úti til nánustu ættingja skömmu eftir hamfarirnar.

Hrafn segist hlakka til að hitta fólkið í Uummannaq og kynnast ástandinu af eigin raun. Söfnunarfé Íslendinga eigi að sjálfsögðu að verja í samráði við heimamenn og flóttafólkið í Uummannaq og verður það meðal annars markmið ferðarinnar.

Ekki króna fór í kostnað við landssöfnunina Vinátta í verki. Hátíðin sem í hönd fer er heldur ekki kostuð af söfnunarfé, heldur með samstilltu átaki fyrirtækja á Íslandi og Grænlandi.

Hrafn segir að um sé að ræða mikilvægustu ferð Hróksins síðan 2003, þegar landnám félagsins á Grænlandi hófst. ,,Starf Hróksins á Grænlandi er löngu hætt að snúast bara um skák. Það snýst um að auðga lífið og auka vináttu og samskipti grannþjóðanna á öllum sviðum. Kynni okkar af Grænlandi hafa gefið okkur óendanlega mikið og þeir eru bestu nágrannar í heimi. Við viljum endurgjalda það og fara með gleði og kærleika á þann stað á Grænlandi þar sem nú er helst þörf."

Vignir Vatnar Stefánsson er hraðskákmeistari TR árið 2017

Hraðskákmót Taflfélags Reykjavíkur fór fram miðvikudagskvöldið 27.september og voru 26 vaskir skákmenn mættir í Skákhöllina til að takast á við skákgyðjuna. Tefldar voru 11 umferðir með tímamörkunum 4+2. Góð stemning var á meðal þátttakenda þar sem margir ungir og efnilegir skákmenn hittu fyrir eldri en ekkert síður efnilega skákmenn. Stigahæsti keppandinn –eini titilhafinn- vann mótið nokkuð örugglega og reynsluboltar af landsbyggðinni komust einnig á pall.

Vignir Vatnar Stefánsson kallar ekki allt ömmu sína þegar kemur að hröðum tilfærslum taflmanna á reitunum 64. Pilturinn lék við hvurn sinn fingur og þegar staðan á borðinu var ekki líkleg til að skila hagnaði þá beitti hann leifturhraða til að slá andstæðinga sína út af laginu. Þeir féllu í valinn hver á fætur öðrum allt þar til í 7.umferð er félagsmálafrömuðurinn að norðan, Stefán Bergsson, hélt ró sinni í æsispennandi endatafli og hafði sigur gegn Vigni Vatnari. Það varð norðanmanninum til happs að Vignir Vatnar missti af máti í 2 undir lokin og eru skákáhugamenn hvattir til þess að kynna sér þessi skemmtilegu tafllok á fésbókarsíðunni Íslenskir skákmenn (tímabundnir geta stokkið beint í mínútu 9:10). Þetta reyndist eina tapskák Vignis því hann vann allar hinar og lauk því keppni með 10 vinninga. TR-ingurinn knái vann ekki aðeins mótið heldur tryggði hann sér um leið nafnbótina Hraðskákmeistari Taflfélags Reykjavíkur 2017. Vignir Vatnar skipar sér þar með á bekk með snjöllum meisturum á borð við Friðrik Ólafsson og Guðmund Sigurjónsson.

Akureyringurinn beinskeytti Stefán Bergsson, sem í frístundum sínum selur skákvarning hvers konar, hlaut 9 vinninga og nægði það til silfurverðlauna. Stefán lagði báða félaga sína á verðlaunapallinum en varð að sætta sig við tvö jafntefli snemma móts, auk þess sem hann lét í minni pokann fyrir hinum bráðsnjalla knattspyrnumanni Stephani Briem.

Bronsverðlaunin komu í hlut hins eitilharða Magnúsar Pálma Örnólfssonar. Mikill völlur er á Bolvíkingnum um þessar mundir líkt og eftirtektarverð framganga hans í nýafstöðnu Haustmóti TR ber vott um. Magnús Pálmi vann átta skákir, gerði eitt jafntefli en beið lægri hlut fyrir bæði Vigni og Stefáni. Í skákinni gegn Stefáni varð Magnúsi Pálma það á að leika með báðum höndum en nýútkomnar skákreglur FIDE taka hart á því og ber skákstjóra að dæma tap í slíkum tilfellum. Þessi nýja regla alþjóða skáksambandsins FIDE er umdeild og mun vafalítið reynast mörgum skákmanninum erfið viðureignar. Engu að síður er óskandi að aðlögun íslenskra skákmanna gangi snurðulaust fyrir sig því töluverð ógleði fylgir því að tapa tafli vegna hinna nýju handalögmála. Hvað sem því líður þá nældi Magnús Pálmi sér í 8,5 vinning og virðist því vera kominn í áskrift þetta haustið að verðlaunapallinum í Skákhöllinni.

Í 4.-6. sæti með 6,5 vinning röðuðu sér reynsluboltarnir Ögmundur Kristinsson, Þór Valtýsson og Eiríkur K. Björnsson.

Taflfélag Reykjavíkur þakkar þátttakendum fyrir spennandi og drengilega keppni og vonast til þess að sjá sem flesta aftur á einhverjum af þeim fjölmörgu skákmótum sem framundan eru í vetur.

Úrslit og lokastaða: Chess-Results

Nánar á heimasíðu TR.

Íslandsmót skákfélaga hefst 19. október í Rimaskóla

Fyrri hluti Íslandsmóts skákfélaga 2017-2018 fer fram dagana 19.–22. október nk. Mótið fer fram í Rimaskóla. Fyrsta umferð (eingöngu í 1.deild) mun hefjast kl. 19.30 fimmtudaginn 19. október. Aðrar deildir munu hefja taflmennsku föstudaginn 20. október kl. 20.00 og síðan tefla laugardaginn 21. október kl. 11.00 og kl. 17.00 sama dag. Síðasta umferðin í fyrri hlutanum hefst kl. 11.00 sunnudaginn 22. október. 

Umhugsunartími er 90 mín. á skákina + 30 sek. viðbótartími bætist við eftir hvern leik. 

Frestur til félagaskipta rennur út á miðnætti í kvöld. Þó geta þeir sem eru utan félaga og stigalausir skráð sig í skákfélag allt fram á síðustu stundu.  

 

 

 

Síðari hluti Haustmóts SA hafinn - úrslit eftir bókinni

Í gærkvöldi var tefld fyrsta umferð af fimm í síðari hluta Haustmóts Skákfélags Akureyrar. Vinningar í þessum hluta gilda tvöfalt á móti vinningum úr fyrri hlutanum. Lítilsháttar breyting varð á keppendahópnum og eru tíu keppendur í síðari hlutanum. Úrslitin í gærkvöldi.

• Áskell-Sigurður E         1-0
• Eymundur-Jón Kristinn     0-1
• Ólafur-Ulker              1-0
• Jón Magnússon-Sigurður A  0-1
• Smári-Arnar Smári         1-0

Staðan í mótinu er þá þessi:

Jón Kristinn 8,5;  Sigurður A 7;  Áskell 6,5;  Ólafur og Smári 6;  Sigurður E 3,5; Eymundur og Arnar smári 2,5; Ulker 1,5.

Önnur umferð síðari hlutans verður tefld nk. sunnudag, 1. október, og hefst kl. 13. Þá tefla þessi:

• Jón Kristinn og Ólafur
• Arnarson og Áskell
• Eiríksson og Smári
• Arnar Smári og Eymundur
• Ulker og Jón Magnússon

 

• Heimasíða SA
• Chess-Results (síðari hlulti)
• Chess-Results (fyrri hluti)