Uppgjör Haustmóts TR

Kjartan Maack gerir upp Haustmót TR á heimasíðu TR í stórgóðum pistli. Grípum niður í pistil formannsins:

Haustmót Taflfélags Reykjavíkur, hið 84. í röðinni, var haldið í nýafstöðnum septembermánuði, nánar tiltekið dagana 6.-24.september. Mótið var óvenjulegt fyrir þær sakir að mótshaldarar brugðu á það ráð að hverfa frá hinni hefðbundnu flokkaskiptingu til þess að mæta dræmri skráningu. Því tefldu þátttakendurnir 30 í einum opnum flokki. Það er nokkur ráðgáta hví þátttaka í eina flokkaskipta opna kappskákmótinu á Íslandi er ekki betri, sérstaklega í ljósi háværra radda sterkari skákmanna í skáksamfélaginu um að mótshaldarar eigi að flokkaskipta mótum. Því skal þó haldið til haga að yfirstandandi haustmánuðir eru einstaklega annasamir hjá íslenskum skákmönnum og skaraðist Haustmótið við þrjú alþjóðleg skákmót, tvö erlendis og eitt heima fyrir. Hvað sem því líður þá var hraustlega tekist á í umferðunum níu, margar fléttur smíðaðar, óvæntir sigrar og heilu bílfarmarnir af skákstigum fluttust á milli skákmanna.

Pistil Kjartans má finna í heild sinni hér. 

Íslandsmót ungmenna (u8-u16) fer fram um næstu helgi

Íslandsmót ungmenna fer fram helgina 7.-8. október í Rimaskóla. Teflt er í fimm flokkum. Krýndir verða 10 Íslandsmeistarar - efsti strákur og efsta stelpa í öllum flokkunum fimm. Glæsilegar vinningar í boði.

Allir flokkar hefjast 12:00 á laugardeginum. Tekið verður við þátttökugjöldum og staðfestingu á mætingu frá 11:20 – 11:50. Þeir keppendur sem mæta eftir 11:50 geta misst sæti sitt í mótinu.

Skráning er á Skák.is (guli kassinn efst) til og með 5. október. Upplýsingar um þegar skráða keppendur má finna hér.

Þátttökugjald er krónur 1.500 og greiðist með reiðufé við staðfestingu á mætingu. Systkini borga aldrei meira en 2.500 kr. samtals. Hægt er jafnframt að greiða í gegnum netbanka fyrir mót inn á reikning 101-26-12763, kt. 58026-5409. Vinsamlegast látið nafn keppenda koma fram í skýringu og sendið kvittun á [e-mail].

Stefnt er að því að tefla í sérflokkum fyrir stráka og stelpur en mögulega þarf að sameina einstaka flokka verði þátttaka ekki nægjanleg. Sigurvegari í flokki 9-10 ára tryggir sér sæti á Norðurlandamótinu í skák sem fer fram í febrúar 2018 í Finnlandi. Sigurvegarar í elstu flokkunum þremur tryggja sér sæti á Unglingameistaramóti Íslands. 

Verði menn jafnir í efstu sætum er teflt um Íslandsmeistaratitla en stig reiknuð um önnur sæti. Í flokki átta ára og yngri verða þó reiknuð stig um öll sæti.

8 ára og yngri (f. 2009 og síðar)

Umhugsunartími: 8-2 mínútur.

Fjöldi umferða: Allir keppendur tefla fimm umferðir á laugardeginum. Eftir fimm umferðir verður niðurskurður þannig að keppendur með þrjá vinninga eða fleiri komast áfram og mæta líka á sunnudegi. Umferðafjöldi á sunnudegi verður tvær til fjórar umferðir eftir heildarfjölda keppenda.

Dagskrá: Mótið hefst 12:00 á laugardeginum og 12:00 á sunnudeginum fyrir þá sem komast áfram. 

9-10 ára (f. 2007 og 2008)

Umhugsunartími: 8 + 2 mínútur

Fjöldi umferða: Allir keppendur tefla fimm umferðir. Eftir fimm umferðir verður niðurskurður þannig að keppendur með þrjá vinninga eða fleiri komast áfram og mæta líka á sunnudegi. Umferðafjöldi á sunnudegi verður tvær til fjórar umferðir eftir heildarfjölda keppenda.

Dagskrá: Mótið hefst 12:00 á laugardeginum og 12:00 á sunnudeginum fyrir þá sem komast áfram.

11–12 ára (f. 2005 og 2006)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.

13–14 ára (f. 2003 og 2004)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.

15–16 ára (f. 2001 og 2002)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9                                                                           

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.                        

Pálmi Ragnar nýr formaður Hugins

Aðalfundur Hugins var haldinn fimmtudaginn 28. september síðastliðinn. Svo fór, að stjórn síðasta starfsárs var endurkjörin en Þorsteinn og Pálmi höfðu stólaskipti. Stjórn Hugins er því þannig skipuð:

• Pálmi R. Pétursson, formaður.
• Hermann Aðalsteinsson, vara formaður
• Vigfús Vigfússon, gjaldkeri og umsjónarmaður unglingastarfs
• Kristján Olafur Eðvarðsson
• Sigurbjörn Ásmundsson
• Tómas Veigar Sigurðsson
• Þorsteinn Þorsteinsson

Skákþing Garðabæjar hefst eftir viku

Skákþing Garðabæjar hefst mánudaginn 9. október 2017. Tefldar verða 7 umferðir og verður mótið reiknað til íslenskra og alþjóðlegra stiga.

Mótsstaður: Garðatorg 1. (gamla Betrunarhúsið). 2. hæð. Inngangur til hægri við verslunina Víði.

Umferðatafla:
1. umf. Mánudag 9. okt. kl :19:30
2. umf. Föstudag 13. okt. kl. 19:30
3. umf. Mánudag 30. okt kl. 19:30
4. umf. Föstudag 3. nóv. kl. 19:30
5. umf. Mánudag 6. nóv. kl: 19:30
6. umf. Föstudag 10. nóv kl. 19:30
7. umf. Mánudag 13. nóv. kl. 19:30

Verðlaunaafhending og Hraðskákmót Garðabæjar mánudaginn 27. Nóvember kl 20:00

Keppnisfyrirkomulag er svissneskt kerfi. Skákstjóri er Páll Sigurðsson. Sími 860 3120
Tímamörk eru 90 mínútur og 30 sek sem bætist við hvern leik.

Mótið er opið öllum.
Leyfilegt er í mótinu í umferðum 1-5 að taka einu sinni hjásetu gegn hálfum vinning. Ekki er hægt að taka hjásetu eftir að pörun í umferð liggur fyrir. 0 vinningar reiknast í tiebreak fyrir slíka hjásetu.

Verðlaun auk verðlaunagripa:
Heildarverðlaun fyrir efstu 3 sæti uþb. 60% af aðgangseyri í hvorum flokki skipt eftir Hort Kerfinu.
Verðlaun skiptast (50/30/20). Lágmarks-heildarverðlaun eru 20.000 fyrir þessi sæti.

Mótið er um leið skákþing Taflfélags Garðabæjar. (keppt er um titilinn ef jafnt).

Aukaverðlaun verða fyrir þann skákmann sem nær flestum samanlögðum vinningum úr bæði Skákþingi Garðabæjar og U2000 móti Taflfélags Reykjavíkur. (samanlögð Buchholz stig ráða ef jafnt á vinningum) Kr. 10.000.-
Efsti skákmaður í ca. hverjum 10 manna stigaflokki mv. fide stig (ísl til vara) fær 5000 króna aukaverðlaun. Stigalausir telja ekki. þe. ef 30 keppendur verða tvenn slík verðlaun.

Sæmdartitilinn Skákmeistari Garðabæjar geta aðeins fengið félagsmenn taflfélags í Garðabæ eða skákmaður með lögheimili í Garðabæ.

Þátttökugjöld:
Félagsmenn. Fullorðnir 3000 kr. 17 ára og yngri ókeypis.
Utanfélagsmenn. Fullorðnir 4000 kr. Unglingar 17 ára og yngri 2000 kr

Skráning í mótið fer fram á heimasíðu TG. www.tgchessclub.com og á skak.is

Skákmeistari Garðabæjar 2016 var Páll Sigurðsson.

Hér er hægt að skoða hverjir eru skráðir
https://docs.google.com/spreadsheets/d/1sCf0mBXdAk3y4IUj4Z_AFnDficJtrzH97JQk5feiyhM/edit?usp=sharing

Mjög góður árangur Íslendinganna á Mön - Carlsen sigurvegari

Alþjóðlega mótinu í Mön lauk í gær. Framúrskarandi árangur náðist hjá íslensku keppendum á mótinu sem munu skila fullt af stigum inní íslenskt skákstigahagkerfi. Í lokaumferðinni gerðu Dagur Ragnarsson (2340) og Helgi Ólafsson (2512) jafntefli í innbyrðis skák. Alexander Oliver Mai, Arnar Heiðarsson og Freyja Birkisdóttir náðu frábærum í 1. og 2. flokki mótsins.

Meistaraflokkur

Ekki gekk reyndar vel hjá íslensku skákmönnunum í gær. Tveir vinningar af átta mögulegum komu í hús. Helgi, Dagur og tvíburarnir Björn Hólm (2023) og Bárður Örn (2164) gerðu jafntefli í sínum skákum en aðrar skákir töpuðust.

Lokaniðurstaðan

Gauti Páll Jónsson hækkar mest allra íslensku keppendanna eða um 62 stig. Hilmir Freyr hækkar um 44 stig, Björn Hólm um 22 stig, Dagur um 8 stig og Bárður Örn um 1 stig. Þrír Íslendingar lækka á stigum og þar af tveir þeirra óverulega.

 

Heimsmeistarinn Magnus Carlsen (2827) sigraði á mótinu en hann hlaut 7½ vinning. Fyrsti mótasigur Magnúsar í ár á kappskákmóti. Anand (2794) og Nakamura (2781) urðu jafnir í 2.-3. sæti. 

Fyrsti flokkur (major)

Alexander Oliver Mai (1875) stóð sig frábærlega og endaði í öðru sæti með 5½ vinning í 7 skákum. Það þrátt fyrir að vera aðeins raðað nr. 18 í mótsbyrjun. Arnar Heiðarsson (1480) stóð sig einnig frábærlega en hann hlaut 3 vinninga og endaði í 23. sæti en hann var stigalægstur 40 keppenda. Alexander hækkar um 75 stig og Arnar um 73 stig!

Annar flokkur (minor)

Stigadrottning mótsins er Freyja Birkisdóttir (1332) stóð sig stórkostlega. Hún hlaut 4½ vinning í 7 skákum og endaði í sjöunda sæti en fyrirfram var henni raðað í 28. sæti 30 keppenda. Hún var taplaus á mótinu og hækkar um 129 skákstig!

• Heimasíða mótsins
• Chess-Results

 

Þrettán ungmenni stóðu sig vel á Västerås Open 2017 - Batel stökk upp stigalistann

Skákdeild Fjölnis og Rimaskóli efndu til ungmennaferðar til Västerås í Svíþjóð til þátttöku í hinu vinsæla helgarskákmóti Våsterås Open 2017.

Mótið mun vera eitt fjölmennasta alþjóðlega skákmót Norðurlanda ár hvert. Skákdeildin hefur verið iðin við að bjóða efnilegum og áhugasömum skákungmennum á þennan árlega viðburð og hafa þau undantekningarlítið náð ágætis árangri og stigasöfnun. Ennþá er það minnisstætt þegar Nansý Davíðsdóttir vann stigalægri riðilinn örugglega árið 2012, þá aðeins 10 ára gömul. Hún var að taka þátt í sínu fjórða Västeråsmóti í ár. 

Að þessu sinni voru 13 krakkar og unglingar á aldrinum 10 - 21 árs með í för. Athyglisvert var að í hópnum voru 7 stúlkur og 6 drengir, en skákdeild Fjölnis fékk styrk frá Jafnréttissjóði Íslands til að efla þátttöku stúlkna í skáklistinni. Drengirnir sex voru fimm bekkjarfélagar úr 7. bekk Rimaskóla og jafnaldri þeirra Kristján Dagur Jónsson í Langholtsskóla.

Tefldar voru 8 umferðir, þar af fjórar atskákir. Þar sem flestir íslensku þátttakendanna höfðu ekki teflt áður erlendis og ungir að árum þá var væntingum fyrirfram stillt í hóf. Það reyndist óþarfi því að frá upphafi til enda voru íslensku krakkarnir á fljúgandi siglingu. Í stigalægri flokknum var það Kristján Dagur sem gaf tóninn með því að vinna þrjár fyrstu skákirnar nokkuð örugglega, allt stigahærri andstæðinga og kom sér upp á efsta borð.

 

 

Þegar hann tók að gefa eftir þá voru þeir bekkjarbræður Joshua Davíðsson og Kjartan Karl Gunnarsson komnir á skrið og lögðu stigahærri andstæðinga hvern af öðrum og söfnuðu í stigapúkkið. Það var síðan Rimaskólastúlkan Batel Goitom sem stökk í lokaumferðunum upp um borðaraðir og hlaut 3,5 af 4 vinningum sem í boði voru í seinni hluta mótsins.

 

Batel kom sá og sigraði og bætti sig á skákstigalistanum um 107,2 stig. Joshua Davíðsson endaði í 3. sæti í stigalægri flokknum með 6 vinninga af 8. Hann hefur verið mjög iðinn við æfingar og keppni nú í september og kominn yfir 1500 stiga múrinn.

 

 

Arnór Gunnlaugsson í Rimaskóla hækkaði mikið á skákstigum líkt og Kjartan Karl Gunnarsson sem var skráður stigalaus fyrir mótið en með 5 vinningum í Västerås og ágætis árangri á Haustmóti TR ætti  hann að byrja með myndarlega stigasummu. Kritján Dagur sem fékk fljúgandi start á mótinu bætti sig um rúmlega 40 atskákstig en hafði hægar um sig í seinni hluta mótsins enda alltaf að tefla við stigahærri þátttakendur eins og þeir áðurnefndu líka í flestum skákum. 

Í opna mótinu, Västerås Open voru 226 þátttakendur og þar af tveir Íslendingar, Fjölnisstúlkurnar Nansý Davíðsdóttir og Hrund Hauksdóttir. Hrund tók atskákirnar með trompi og hækkaði sig um 42 stig. Hún tefldi síðan mjög vel og örugglega allt mótið og hlaut alls 4 vinninga. Nansý hlaut líka 4 vinninga og varð í 103 sæti, hækkaði um 20 ELÓ stig og er alveg við 2000 stiga múrinn, markmið sem hún setur sér að ná á þessu ári.

 

Helgi Árnason formaður skákdeildar Fjölnis og skólastjóri Rimaskóla var fararstjóri í þessari skemmtilegu og árangursríku skákferð og skipulagði hana í samvinnu við Andre Nilsen mótsstjóra og formanni skákfélaganna í Västerås. Gist var á Elite Stadtshotellet í þessum vinalega bæ við Vänern í Svíþjóð. Jafnréttissjóður, Samstarfssjóður Íslands og Svíþjóðar, Íslandsbanki og Skáksamband Íslands styrktu þátttökuna sem var ungmennunum nánast að kostnaðarlausu. Draumur þeirra allra er að endurtaka ævintýrið að ári liðnu. 

Heimasíða mótsins

 

 

 

Haustmót Vinaskákfélagsins fer fram í dag

Haustmót Vinaskákfélagsins verður haldið mánudaginn 2. október. Mótið fer fram í Vin, að Hverfisgötu 47, og hefst kl.13.00.

Tefldar verða sex umferðir með 7 mínútna umhugsunartíma á hverja skák. Mótið verður reiknað til hraðskáksstiga. Skákstjóri mótsins verður Hörður Jónasson og verða góð verðlaun í boð.

Hægt er að skrá sig hér fyrir ofan á Skak.is (gulur kassi) en einnig verður tekið við skráningum á staðnum.

Eins og venjan er í Vin verður boðið uppá frábærar veitingar í hléi.

Upplýsingar um þegar skráða keppendur má finna hér. 

Allir velkomnir!!

 

Jón Kristinn með örugga forystu á Haustmóti SA

Önnur umferð seinni hluta Haustmóts Skákfélags Akureyrar var telfd í dag. Úrslit:

• Jón Kristinn-Ólafur     1-0
• Arnarson-Áskell         1/2
• Eiríksson-Smári         1/2
• Arnar Smári-Eymundur    0-1
• Jón Magnússon sat hjá.

Jón Kristinn hefur nú örugga forystu á mótinu með 10,5 stig, Sigurður Arnarson hefur 8 og Áskell 7,5. Vinningar í seinni hluta gilda tvöfalt í þessum útreikningi.

Þriðja umferð (af fimm) verður telfd eftir viku, 8. október. Þá eigast þessir við:

• Áskell og Jón Kristinn
• Smári og Arnarson
• Ólafur og Jón Magnússon
• Eymundur og Eiríksson
• Arnar Smári situr hjá.

 

• Heimasíða SA
• Chess-Results (síðari hlulti)
• Chess-Results (fyrri hluti)

 

Jón L. Árnason fer í Víking

Jón Loftur Árnason er genginn í Víkingaklúbbinn.  Hann var áður í Taflfélagi Bolungarvíkur.  Jón á glæstan feril á skáksviðinu.  Hann varð heimsmeistari unglinga árið 1977, alþjóðlegur meistari árið 1979 og stórmeistari árið 1986.  Jón hefur mjög skemmtilega skákstíl og var ásamt Jóhanni Hjartarsyni, Margeiri Pétursyni og Helga Ólafssyni einn af fjórmenningaklíkunni svokölluðu sem urðu allir stórmeistarar í skák á níunda áratug síðustu aldar. 

Jón L. Árnason, chessgames.com hér:
Jón L. Árnason wikipedia hér:

Ný alþjóðleg skákstig

Ný alþjóðleg stig eru komin út og taka þau gildi í dag. Héðnn Steingrímsson (2576) er sem fyrr stgahæsti skákmaður landsins.

Topp 20

Héðinn Steingrímsson (2576) sem er fyrr stigahæstur íslenskra skákmanna. Í næstu sætum eru Hjörvar Steinn Grétarsson (2567) og Jóhann Hjartarson (2534). Litlar breytingar eru á topp 20 enda tefldu aðeins tveir þeirra kappskákir í síðasta mánuði. 

Listann í heild sinni má finna hér. 

No.	Name	Tit	OCT17	Diff	Gms
1	Steingrimsson, Hedinn	GM	2576	0	0
2	Gretarsson, Hjorvar Steinn	GM	2567	0	9
3	Hjartarson, Johann	GM	2534	-5	2
4	Petursson, Margeir	GM	2516	0	0
5	Olafsson, Helgi	GM	2512	0	0
6	Stefansson, Hannes	GM	2508	0	0
7	Danielsen, Henrik	GM	2495	0	0
8	Gunnarsson, Jon Viktor	IM	2460	0	0
9	Arnason, Jon L	GM	2458	0	0
10	Kjartansson, Gudmundur	IM	2456	0	0
11	Thorfinnsson, Bragi	IM	2455	0	0
12	Gretarsson, Helgi Ass	GM	2448	0	0
13	Kristjansson, Stefan	GM	2447	0	0
14	Thorsteins, Karl	IM	2432	0	0
15	Gunnarsson, Arnar	IM	2428	0	0
16	Thorhallsson, Throstur	GM	2420	0	0
17	Thorfinnsson, Bjorn	IM	2398	0	0
18	Kjartansson, David	FM	2386	0	0
19	Arngrimsson, Dagur	IM	2376	0	0
20	Ulfarsson, Magnus Orn	FM	2375	0	0

Nýliðar

Fjórir nýliðar eru á listanum nú. Stigahæstur þeirra eru Anton Breki Óskarsson (1306). 

No.	Name	Tit	OCT17	Diff	Gms
1	Oskarsson, Anton Breki		1306	1306	6
2	Gunnarsson, Kjartan Karl		1061	1061	8
3	Sigfusson, Ottar Orn Bergmann		1023	1023	0
4	Berndsen, Soffia		1003	1003	20

Mestu hækkanir

Batel Goitom Haile (+74) hækkar mest á stigum eftir frábæra frammistöð á EM ungmenna. Í næstu sætum eru Joshua Davíðsson (+69) og Árni Ólafsson (+56).

No.	Name	Tit	OCT17	Diff	Gms
1	Haile, Batel Goitom		1318	74	9
2	Davidsson, Joshua		1483	69	10
3	Olafsson, Arni		1273	56	7
4	Bjarnthorsson, Alexander Mar		1274	50	3
5	Steinthorsson, Birgir Logi		1070	46	3
6	Thorgeirsson, Jon Kristinn		2276	44	9
7	Thorisson, Benedikt		1097	32	7
8	Sigurdsson, Birkir Karl		1931	30	4
9	Thorsteinsson, Thorsteinn	FM	2308	29	9
10	Ornolfsson, Magnus P.		2248	21	9

Stigahæstu ungmenni landsins (u20)

Dagur Ragnarsson (2340) er sem fyrr stigahæsta ungmenni landsins 20 ára og yngri. Í næstu sætum eru Vignr Vatnar Stefánsson (2300) og Jón Kristnn Þorgersson (2276).

No.	Name	Tit	OCT17	Diff	Gms	B-day
1	Ragnarsson, Dagur	FM	2340	0	0	1997
2	Stefansson, Vignir Vatnar	FM	2300	-12	14	2003
3	Thorgeirsson, Jon Kristinn		2276	44	9	1999
4	Johannesson, Oliver	FM	2273	1	7	1998
5	Heimisson, Hilmir Freyr		2185	0	0	2001
6	Birkisson, Bardur Orn		2164	0	0	2000
7	Hardarson, Jon Trausti		2146	0	0	1997
8	Mai, Aron Thor		2038	-1	0	2001
9	Thorhallsson, Simon		2027	-47	8	1999
10	Birkisson, Bjorn Holm		2023	0	0	2000

Reiknuð skákmót

• Haustmót TR
• Norðurlandamót barna - og grunnskólasveta
• Haustmót SA - fyrri hluti (atskák)
• Héraðsmót HSÞ (atskák)
• Hraðskákmót TR (hraðskák)
• Tvö Elítukvöld Hugins og Breiðablks (hraðskák)
• Hlemmur Square 2 (hraðskák)

Heimslistinn

Magnus Carlsen (2826) er auðvitað stigahæsti skákmaður landsins. Í næstu sætum eru Levon Aronan (2801) og Maxime Vachier-Lagrave, Fabiano Caruana og Vladimir Kramnik sem allir hafa 2794 skákstig. 

Topp 100 listann má nálgast hér. 

Skrár tengdar þessari bloggfærslu:

• Alþjóðleg skákstig, 1. október 2017