Skáktímar hefjast aftur í Stúkunni á Kópavogsvelli

Samvinnuverkefni Skákskóla Íslands og Skákakademíu Kópavogs fer aftur af stað í Stúkunni á Kópavogsvell og verður fyrsti tími næsta föstudag þann 28. september   kl. 14.30 og stendur til að verða kl. 16.30. Sem fyrr verður það Helgi Ólafsson stórmeistari og skólastjóri Skákskóla Íslands sem hefur umsjón með þessum tímum.

Æfingar Skákakademíu Kópavogs verða framvegis á föstudögum milli kl 14:30 og 16:30.

Hjörvar sigraði á hraðkvöldi Hellis

Það var vel mætt á hraðkvöldi Hellis sem fram fór 24. október sl. og það nokkuð vel skipað. Hjörvar Steinn Grétarsson sigraði örugglega með 7v í jafn mörgum skákum og kom það lítt á óvart. Jöfn í öðru og þriðja sæti voru Stefán Bergsson og Elsa María Kristínardóttir með 5,5v. Þau töpuðu fyrir Hjörvari en gerðu jafntefli þegar þau tefldu saman, í skák þar sem reyndi á nýju reglurnar um uppvakningu drottningar. Hjörvar fékk svo að draga í happdrættinu og dró þá forsetann.

Næsta skákkvöld í Hellisheimilinu verður næst komandi mánudagskvöld 1. október kl. 20. Þá verður atkvöld.

Lokastaðan á hraðkvöldinu:

Röð   Nafn                            Vinn.     M-Buch. Buch. Progr.

  1   Hjörvar Steinn Grétarsson,        7        20.5  29.0   28.0
 2-3  Stefán Bergsson,                  5.5      21.0  31.5   24.0
      Elsa María Kristínardóttir,       5.5      20.0  28.0   21.0
 4-6  Jón Úlfljótsson,                  4.5      18.0  26.5   18.5
      Dawid Kolka,                      4.5      17.0  23.5   14.5
      Hörður Aron Hauksson,             4.5      15.5  20.0   14.5
 7-8  Gunnar Nikulásson,                4        18.0  25.0   16.0
      Felix Steinþórsson,               4        17.5  24.5   13.0
9-15  Gunnar Björnsson,                 3.5      23.0  33.5   19.5
      Eggert Ísólfsson,                 3.5      20.0  27.0   14.5
      Gunnar Friðrik Ingibergsson,      3.5      19.5  26.0   14.5
      Vigfús Ó. Vigfússon,              3.5      17.5  25.5   18.5
      Hilmir Freyr Heimisson,           3.5      17.0  25.0   14.0
      Jón Olav Fivelstad,               3.5      16.5  22.0   15.0
      Steinþór Baldursson,              3.5      16.5  22.0   12.5
16-17 Bjarni Þór Guðmundsson,           3        18.0  24.0   11.0
      Kristján Hallberg,                3        16.0  24.5   12.0
18-19 Björgvin Kristbergsson,           2        16.5  22.0    6.0
      Leifur Eiríksson,                 2        16.5  22.0    5.0
20-21 Pétur Jóhannesson,                1.5      16.0  22.5    7.0
      Erik Daníel Jóhannesson,          1.5      15.5  21.0    9.0

Sævar sigraði í Vin: ,,Þeir ætla að drepa biskupinn!"

Sævar Bjarnason alþjóðameistari sigraði á spennandi og skemmtilegu haustmóti Skákfélags Vinjar, sem haldið var til heiðurs Finni Kr. Finnssyni mánudaginn 24. september. Sævar, sem nýlega gekk til liðs við Skákfélag Vinjar, hlaut 4,5 vinning af 6 mögulegum, og kom í mark sjónarmun á undan kempunni Gylfa Þórhallssyni og Róbert Lagerman sem nýverið tók við forsetaembætti í kraftmikla skákfélaginu við Hverfisgötu.

Við upphaf mótsins var Finnur Kr. Finnsson heiðraður fyrir frábært starf um árabil í þágu yngri og eldri skákmanna. Hann hefur m.a. verið lykilmaður í kennslu barna í skákdeild Fjölnis í Grafarvogi, en þar hefur sannkallað skákævintýri átt sér stað undanfarin áratug. Þá er Finnur burðarás í starfi Skákfélagsins Æsir, sem er félag eldri borgara, sem hittist í Stangarhyl alla þriðjudaga klukkan 13.

 Finnur hlaut að gjöf taflborð, áritað af sjálfum Gary Kasparov, og þakkaði fyrir sig með snjallri ræðu. Þar rifjaði hann upp að skákáhuga hans mætti rekja til afreka Friðriks Ólafssonar á sjötta áratug síðustu aldar, en þeir Friðrik eru jafnaldrar. Friðrik tefldi þá sögufræg einvígi við Bent Larsen og voru skákirnar í beinni útsendingu í útvarpinu. Finnur kvaðst þá hafa búið í afskekktri sveit, þar sem gamli sveitasíminn var enn við lýði, en þá gátu allir ,,legið á línunni" einsog það var kallað. Strákarnir í sveitinni hefðu oft teflt í gegnum símann, svo allir gátu hlustað. Einhverntíma þegar Finnur tilkynnti að hann ætlaði að drepa biskup á e7 hefði gömul kona hljóðað í símann: ,,Þeir ætla að drepa biskupinn!"

Sævar, Gylfi og Róbert hlutu allir 4,5 vinning, en næstur kom Ingi Tandri Traustason, enn einn nýr liðsmaður Vinjar, með 4 vinninga. Gunnar Björnsson og Hrafn Jökulsson hlutu 3,5 vinning, en þau Jónas Jónasson, Elsa María Kristínardóttir, Sveinbjörn Jónsson og Haukur Halldórsson 3 vinninjga. Næst komu Viðar Eiríksson, Einar Leó Erlingsson og Aðalgeir Jóhannsson.

Æfingar eru í Vin alla mánudaga klukkan 13, undir stjórn Róberts, og eru allir hjartanlega velkomnir. Mánaðarlega verða haldin hraðskákmót og efnt verður til fleiri viðburða í vetur, auk þess sem Skákfélagið Vin mun senda lið til keppni í 3. og 4. deild á Íslandsmóti skákfélaga.

Myndaalbúm (HJ og VE)

Stefnumótunarvinna skákhreyfingarinnar hafin

Stjórn Skáksambands Íslands hóf laugardaginn 22. september með formlegum hætti stefnumótunarvinnu en líkt og kynnt hefur verið hefur stjórnin sett sér það markmið að leggja stefnumótunartillögu fyrir næsta aðalfund sambandsins og forgangsröðuðum verkefnalistum til að styðja við þá stefnumótun á næstu árum.

Á fundinnvar boðið fulltrúum allra skákfélaga sem aðild eiga að Skáksambandi Íslands. Því miður verður að segja að mæting hefði getað verið betri en auk stjórnarinnar og fulltrúa nefnda og  Skákskólans mætti aðeins tveir fulltrúar frá skákfélögunum, Sigurður Ægisson frá Skákfélagi Siglufjarðar og Kristján Örn Elíasson frá Skákfélagi Íslands.

Á fundinum var farið yfir ítarlega stöðugreiningu sem unnin var í samvinnu við nefndir sambandsins og skákfélögin í landinu. Í framhaldinu voru skipaðir 4 vinnuhópar á fundinum sem fengu tiltekin viðfangsefni til að greina og fjalla um en þau viðfangsefni voru barna- og unglingastarf,  afreksstarf og alþjóðlegt samstarf, þjónusta við félög og útbreiðsla og loks fjármál hreyfingarinnar. Hóparnir skiluðu í lok fundar samantekt og tillögum að áframhaldandi verkefnum og áherslum sem skoða þarf betur.

Í framhaldinu mun stjórn SÍ halda áfram með stefnumótunarvinnuna byggt á þeim grunni sem lagður var á fundinum. Í því efni verður aftur leitað til skákfélaganna varðandi afstöðu til tiltekinna viðfangsefna t.d. í tengslum við fjármál hreyfingarinnar, afreksstarfið, þjónustu sambandsins eða fyrirkomulag móta.

Ítrekað skal að markmið stjórnarinnar er að leggja fram heilstæða tillögu að stefnumörkun hreyfingarinnar á næsta aðalafundi þannig að það verður nægur tími fyrir hreyfinguna til að ræða og koma eða úrvinnslu einstakra viðfangsefna. Með það markmið að sem breiðust samstaða verði um mögulegar tillögur mun stjórnin tryggja umræður um einstök álitaefna bæði með umfjöllun á Skák.is, með beinum samskiptum við félögin og mögulega með öðrum stefnumótunardegi. Nánar um það síðar. Að lokum er rétt að taka fram að vinnugögn frá stefnumótunarfundinum verða við fyrsta tækifæri gerð aðgengileg á heimsíðu sambandsins.

Þröstur Olaf Sigurjónsson, lektor við HR, var hópnum til aðstoðar.   Andrea Margrét Gunnarsdóttir, stjórnaði vinnuhópnum innan SÍ en með henni í honum voru Stefán Bergsson, Steinþór Baldursson og Þorsteinn Stefánsson.  

Við þetta tilefni ákvað stjórn SÍ jafnframt að heiðra Ásdísi Bragadóttir, sem á um þessar mundir 25 ára starfsafmæli sem framkvæmdastjóri og henni fært gjöf.

Þátttakendur:

• Gunnar Björnsson, forseti SÍ
• Andra Margrét Gunnarsdóttir, varaforseti SÍ
• Helgi Árnason, gjaldkeri SÍ og formaður Fjölnis
• Eiríkur Björnsson, ritari SÍ og varaformaður TR
• Róbert Lagerman, skákritari SÍ og formaður Skákfélags Vinjar
• Stefán Bergsson, æskulýðsfulltrúi SÍ og framkvæmdastjóri Skákakademíunnar
• Ingibjörg Edda Birgisdóttir, landsmótsstjóri SÍ
• Þorsteinn Stefánsson, varastjórn SÍ
• Steinþór Baldursson, varastjórn SÍ
• Helgi Ólafsson, skólastjóri Skákskóla Íslands
• Kristján Örn Elíasson, formaður Skákfélags Íslands
• Sigurður Ægisson, formaður Skákfélags Siglufjarðar 
• Ásdís Bragadóttir, framkvæmdastjóri SÍ
• Þröstur Olaf Sigurjónsson, lektor við HR

Myndaalbúm (GB)

KR-Pistill: Skákáráttan er söm við sig

Hraðskákkvöldin í Vesturbænum eru með þeim allra líflegustu í borginni og þótt víðar væri leitið enda orðin  víðfræg.  Jafnan fjölgar í hópnum á haustin því alltaf eru einhverjir sem heltast úr lestinni yfir sumarið til að spila golf, veiða lax eða reita arfa.  

Á þriðja tug skákkappa, þjakaðir af „skákáráttupersónuleikastreyturöskun"  leita þar líknar við áþján þeirri sinni og  sem heltekur þá í tíma og ótíma. Eftir að hafa teflt stíft í hátt fjóra tíma og 13 umferðir við eitilharða og slynga andstæðinga ganga þeir afslappaðir á braut, þrátt fyrir misjafnt gengi eins og gengur.  Það að tefla sér til yndis og ánægju gefur þeim þá nauðsynlegu slökun sem þeir þarfnast til að halda fullri geðheilsu og geðprýði  í sínum annars hversdagslegu brauðstriti milli skákfunda.

Þrír valinkunnir meistarar hafa tyllt sér þar á toppinn síðasta mánuðinn þó oft megi vart á milli sjá hver nær að máta hvern og skipst á að raða sér í efstu sætin.  Ingimar Jónsson hefur unnið 2 síðustu mót en Gunnar Birgisson og Gunnar Gunnarsson mótin þar á undan, með þetta 11.5 v. til 10 v af 13.   Aðrir snillingar eins og Sigurður Herlufsen, Stefán Þormar Guðmundsson,  Guðfinnur Kjartansson og Vilhjálmur Guðjónsson, núna síðast, hafa fylgt þeim fyrrnefndu eftir og velgt þeim undir uggum.

Síðast liðið vetur henti það slys að A-skáksveit félagsins féll naumlega niður um deild annað árið í röð og teflir nú í 3. deild þar sem B-sveit þess er fyrir.  Í ljósi þess hve mikið liggur nú við fyrir Sd. KR að vinna sig upp um deild að nýju hefur Kristján Stefánsson, formaður hennar lagt hart að Einari Ess fyrrv. liðstjóra, sem sagði af sér eftir ófarirnar, að snúa aftur og sagst vera „tilbúinn til að fyrirgefa honum ótímabæra afsögn hans". 

Í ljósi þess hversu mikilvægt er  að aðalskáksveit KR nái vopnum sínum og stöðu að nýju og vegna fjölda áskorana hefur Einar með nokkrum semingi fallast á að verða við frómum óskum skákfélaga sinna hér um taka að sér liðstjórastarfið að nýju sem einvaldur.  Jafnframt um hann innan tíðar taka sæti í stjórn Skákdeildarinnar og stuðla að framgangi  og farsæld hennar eftir bestu getu.    

Meira á www.kr.is (skák)

Úrslit:

 

 

Æsir - öflug starfsemi skákfélags eldri borgara

Æsir, skákfélag eldri borgara í Reykjavík, heldur úti öflugu og skemmtilegu starfi og eru þriðjudagsæfingar nú byrjaðar af fullum krafti. Félagið hefur mjög góða aðstöðu í Ásgarði að Stangarhyl 4, og þangað mættu um 60 skákmenn sl. vetur.

Skákfélagið Æsir var stofnað árið 1998 af Lárusi Johnsen, Heiðari Þórðarsyni og Sigurði Pálssyni. Sigurður var formaður fyrstu tvö árin en þá tók Birgir Sigurðsson við  og hefur gegnt embættinu í 12 ár. Birgir lætur af formennsku nú í haust, en hann hefur í áratugi verið meðal burðarása í íslensku skáklífi.

Æsir heldur mörg mót, sem hafa fest sig í sessi. Haustmót félagsins er að jafnaði haldið í október og í desember er haldið jólaskákmót. Einn hápunktur vetrarins er svo Toyota-skákmótið sem haldið er í lok janúar eða byrjun febrúar. Toyota á Íslandi hefur um árabil verið aðalbakhjarl skákfélagsins, og fara mótin fram í höfuðstöðvum fyrirtækisins sem leggur til vegleg verðlaun. Meistaramótið er svo að jafnaði haldið á vormánuðum.

Síðasta vetur var efnt til þeirrar skemmtilegu nýbreytni að halda svokallað Eðalskákmót, en þar fá þeir einir verðlaun sem orðnir eru 75 ára eða eldri. Magnús V. Pétursson forstjóri Jóa Útherja er hugmyndasmiður mótsins og gefur öll verðlaun.

Vertíðinni lýkur svo með vorhraðskákmóti, og eru þar veitt verðlaun fyrir samanlagðan árangur á öllum skákdögum vetrarins og fá þrír efstu sæmdarheitið Vetrarhrókar.

Æsir tefla auk þess árlega liðakeppni við eldri skákkempur frá Skákfélagi Akureyrar og hafa liðin mæst í Vatnsdal síðustu árin og heppnast afar vel. Þá fer og fram árleg keppni við Riddarana, sem eru eldri skákmenn í Hafnarfirði.

Æsir eru í Skáksambandi Íslands og hafa stundum sent lið til keppni á Íslandsmóti skákfélaga.

Eldri borgarar, sem hafa gaman af að tefla, eru hvattir til að mæta á þriðjudögum kl. 13 í Stangarhyl 4. Þangað eru allir hjartanlega velkomnir. Milli umferða og í kaffihléinu eru málin rædd og ráðið í lífsgátuna.

Finnur Kr. Finnsson

Þorsteinn Guðlaugsson

Mót til heiðurs Finni Kr. í Vin í dag

Haustmót Skákfélags Vinjar, til heiðurs Finni Kr. Finnssyni, verður haldið í dag, mánudag, og hefst klukkan 13. Tefldar verða 6 umferðir með 7 mínútna umhugsunartíma. Í leikhléi verður boðið upp á kaffi og meðlæti.

Með mótinu vilja Vinjarmenn heiðra Finn Kr. Finnsson, sem um árabil hefur verið mjög virkur í félagsmálum skákmanna -- á öllum aldri. Helgi Árnason skólastjóri Rimaskóla og formaður skákdeildar Fjölnis hefur þannig bent á að Finnur hefur leiðbeint ótal efnisbörnum í Grafarvogi, en hann er líka einn af burðarásum í starfi Skákfélagsins Æsir, sem er skákfélag eldri borgara.

Skákfélag Vinjar er með æfingar alla mánudaga og í vetur verða hraðskákmót haldin mánaðarlega. Þá mun félagið tefla fram sveitum í 3. og 4. deild Íslandsmóts skákfélaga og efna til viðburða af ýmsu tagi.

Allir eru velkomnir í Vin.

Hraðkvöld hjá Helli í kvöld

Taflfélagið Hellir heldur hraðkvöld mánudaginn 24. september nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun pizzu frá Dominos Pizzum. Einnig verður dreginn út af handahófi annar keppandi, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Haustmót SA hefst á föstudaginn

Haustmót Skákfélags Akureyrar verður í ár með nýju sniði.  Mótið verður teflt á tveimur helgum, dagana 28.-30. september og 13.-14. október. Tefldar verða 7 umferðir. Tímasetningar umferða og tímamörk eru sem hér segir:

• 1.-2. umferð föstudaginn 28. september kl. 20.00. Umhugsunartími 25 mín.
• 3. umferð laugardaginn 29. september kl. 13.00. Umhugsunartími 60 mín + 30 sek. á leik.
• 4. umferð sunnudaginn 30. september kl. 13.00. Umhugsunartími 60 mín + 30 sek. á leik.
• 5. umferð laugardaginn 13. október kl. 13.00. Umhugsunartími 60 mín + 30 sek. á leik.
• 6. umferð laugardaginn 13. október kl. 17.00. Umhugsunartími 60 mín + 30 sek. á leik.
• 7. umferð sunnudaginn 14. október kl. 13.00. Umhugsunartími 60 mín + 30 sek. á leik.

Þátttökugjald er kr. 3000 fyrir félagsmenn SA, en kr. 3.500 fyrir aðra. Unglingar fæddir 1996 og síðar greiða kr. 1500, en þeir sem greiða æfingajald fyrir haustmisseri greiða ekkert aukalega fyrir þátttöku í haustmótinu.

Arion banki er aðalstyrktaraðili mótsins og verða veitt peningaverðlaun sem hér segir:

• 1. verðlaun kr. 20.000
• 2. verðlaun kr. 10.000
• 3. verðlaun kr. 6.000

Stigaverðlaun (1799 stig og lægri) kr. 6.000

Teflt er um titilinn "Skákmeistari Skákfélags Akureyrar". Mótið er öllum opið en aðeins félagsmaður í Skákfélaginu getur unnið meistaratitilinn. Peningaverðlaun gilda fyrir alla án tillits til félagsaðildar.

Skákir 3-7. umferðar verða reiknaðar til íslenskra og alþjóðlegra skákstiga

Námskeið Skákskólans að hefjast

Skráning er hafin í byrjenda- og framhaldsflokka Skákskólans.  Skráning og fyrirspurnir sendast á netfangið [e-mail].

Námskeiðin hefjast laugardaginn 29. september og tímasetningar verða þannig:

 

 

 

 

• Byrjendaflokkur I: Laugardaga kl. 10.30 - 11.30. 
• Byrjendaflokkur II: Laugardaga kl. 11.30 - 12.30. 
• Byrjendaflokkur III: Laugardaga kl. 16.00 - 17.00. 
• Framhaldsflokkur: Laugardaga kl. 12.30 - 14.00 og þriðjudaga kl. 15:30-17:00

Verð:  Byrjendaflokkar kr. 14.000.- fyrir 10 vikur.  Framhaldsflokkar kr. 22.000.- fyrir 10 vikur.

Skráning hér á Skák.is

Nemendur fá tilkynningu um tímasetningar og hópaskiptingar að lokinni heildarskráningu, en kennt er í flestum flokkum á laugardögum.