Chessbase um N1 Reykjavíkurskákmótið

Einn keppandi á mótinu, Alina L´Ami skrifar fyrir Chessbase. Eftir þriðju umferð skrifaði hún litríka grein um mótið á Chessbase með fullt af myndum.

Greinina má nálgast á Chessbase.

 

N1 Reykjavíkurskákmótið: Spennandi umferð hafin - Jón L. með skákskýringar

Sjöunda umferð N1 Reykjavíkurskákmótsins hófst kl. 13 í dag. Margar spennandi skákir eru í gangi. Stigahæsti keppandi mótsins, Hollendingurinn Anish Giri, teflir við efsta mann mótsins, Úkraínumanninn Pavel Eljanov.

Okkar fyrsti stórmeistari, Friðrik Ólafsson, teflir við bandaríska FIDE-meistarinn Jayakumar, sem hefur aldeilis komið á óvart og hefur unnið bæði Ivan Sokolov og Íslandsmeistarann Þröst Þórhallsson. 

Hjörvar Steinn Grétarsson, stigahæsti íslenski keppandinn, teflir við úkraínska stórmeistarann Yuiry Kuzubov, sem er tvöfaldur sigurvegari á mótinu. 

Henrik Danielsen teflir við egypska stórmeistarann Bassem Amin og Dagur Arngrímsson teflir við pólska stórmeistarann Marcin Dziuba.

Skákskýringar hefjast kl. 14:30 og eru í umsjón Jón L. Árnasonar.

Minnt er á að Tímaritið Skák er hægt að nálgast á skákstað.

• Heimasíða mótsins
• Chess-Results
• Beinar útsendingar

 

N1 Reykjavíkurskákmótið: Hjörvar, Dagur og Henrik efstir Íslendinga

Frábær tilþrif sáust í 6. umferð N1 Reykjavíkurskákmótsins í Hörpu í dag. Mikil spenna er á toppnum og ljóst að lokaumferðirnar verða æsispennandi. Pavel Eljanov frá Úkraínu er einn efstur, en margir eiga möguleika á sigri á mótinu.

Alþjóðlegu meistararnir Hjörvar Steinn Grétarsson og Dagur Arngrímsson og stórmeistarinn Henrik Danielsen eru efstir íslenskra skákmeistara með 4,5 vinning. Hjörvar gerði öruggt jafntefli við hinn öfluga úkraínska stórmeistara Vladimir Baklan og Henrik gerði jafntefli við sænska stórmeistarann Nils Grandelius. Dagur Arngrímsson vann stórmeistarann Stefán Kristjánsson.

Úkraínski stórmeistarinn Pavel Eljanov er einn efstur með 5,5 vinning eftir sigur á Búlgaranum Ivan Cheparinov. Sjö skákmenn hafa 5 vinninga. Þar á meðal eru þrír stigahæstu skákmenn heims undir tvítugu, Anish Giri, Hollandi, Wesley So, Filippseyjum, og Yu Yangyi, Kína.

Mikið var um að vera í dag. Fyrr í dag fór fram Reykjavik Barna Blitz, sem er hraðskákkeppni ungra skákmanna. Dawid Kolka hafði þar sigur eftir sigur á Hilmi Frey Heimissyni, sigurvegara síðasta árs, í úrslitaeinvígi.

Einnig fór fram skáknámskeið fyrir stúlkur þar sem um 60-70 stelpur tóku þátt í tilefni Stelpuskákdagsins, sem stofnað var til í fyrra í tilefni komu Hou Yifan. Námskeiðinu verður framhaldið á morgun og þá verður hinn formlegi Stelpuskákdagur Íslands.

Í kvöld fer svo forgjafarskákmót þar sem hinir stigalægri fá meira tíma gegn þeim stigahærri.

Sjöunda umferð fer fram á morgun og hefst kl. 13. Þá verður Jón L. Árnason, stórmeistari, með skákskýringar.

• Heimasíða mótsins
• Chess-Results
• Beinar útsendingar

 

Skáktúristar á Íslandi

 

Peter Doggers heldur áfram að skrifa á N1 Reykjavíkurskákmótið á vef mótsins sem og á Chessvibes. Í grein dagsins fjallar hann um 4. og 5. umferð sem og skáktúrisma en í fyrradag fóru fjöldi erlendu keppendanna í hinn svokallaða gullna hring (Golden Circle) um Suðurlandið. Þeirra á meðal var stigahæsti keppandi Anish Giri, sem ákvað að nota tækifærið til að skoða landið.

 

Pistilinn má finna í heild sinni hér.

Fyrri pistla Doggers um N1 Reykjavíkurskákmótið má finna hér:

• Inspiration, enthusiasm, passion (1. umferð)
• Harpacoustics (2. og 3. umferð)

N1 Reykjavíkurskákmótið: 6. umferð að hefjast -- mikil spenna á toppnum

Sjötta umferð N1 Reykjavíkurskákmótsins hefst klukkan 13 og eru margar spennandi viðureignir í uppsiglingu. Tveir stigahæstu skákmenn heims undir 20 ára mætast, Yu frá Kína og Giri frá Hollandi. Þá glíma franski ofurstórmeistarinn Maxime Vachier-Lagrave og hinn ungi Wesley So frá Filippseyjum.

Íslensku meistararnir sem eru í toppbaráttunni fá verðug verkefni. Hannes Hlífar Stefánsson teflir við enska stórmeistarann Gawain Jones, Hjörvar Steinn Grétarsson mætir Baklan, sem hefur 2609 skákstig, og Friðrik Ólafsson hefur svart gegn Kjartani Mack.

Björn Þorfinnsson mætir heimsmeistara 20 ára og yngri, Alexander Ipatov, og Henrik Danielsen hefur svart gegn hinum sænska Grandelius. Stefán Kristjánsson stórmeistari teflir við alþjóðlega meistarann Dag Arngrímsson.

Sjö skákmenn eru efstir og jafnir á N1 Reykjavíkurmótinu, með 4,5 eftir fimm umferðir. Þrír íslenskir meistarar eru skammt undan með 4 vinninga, þeir Hannes Hlífar, Hjörvar Steinn og Henrik.

Segja má að seinni hálfleikur N1 Reykjavíkurmótsins sé nú að hefjast. Fimm umferðir af 10 eru að baki og spennan magnast.

Skákskýringar hefjast um kl. 14:30. Áskrifendur geta einnig nálgast eintak af Tímaritinu Skák á skákstað sem einnig er selt í lausasölu. 

Áhorfendur eru hjartanlega velkomnir í Hörpu! 

• Heimasíða mótsins
• Chess-Results
• Beinar útsendingar

Hjörvar, Hannes og Henrik hæstir heimamanna í Hörpu

Hjörvar Steinn Grétarsson gerði jafntefli við hinn sterka enska stórmeistarann Gawain Jones í fimmtu umferð N1 Reykjavíkurskákmótsins sem fram fór í kvöld. Þetta er í þriðja skipti í röð sem þeir gera jafntefli. Hjörvar er efstur Íslendinga með 4 vinninga ásamt Hannesi Hlífari Stefánssyni, sem vann austurríska FIDE-meistarann Lukas Handler í fórnarskák.

Sjö stórmeistarar frá jafn mörgum löndum eru efstir og jafnir með 4,5 vinning. Þeir skákmenn sem hafa fullt hús eru: Anish Giri, Hollandi, Wesley So, Filippseyjum, Ivan Cheparinov, Búlgaríu, Yu Yangyi, Kína, Gajewski, Póllandi, Vachier-Lagrave, Frakklandi, og Eljanov, Úkraínu.

Friðrik Ólafsson varð að sætta sig við jafntefli eftir að hafa sótt fast að hinum unga og efnilega Daða Ómarssyni.

Giri, sem vann heimsmeistara 20 ára og yngri, Alexander Ipatov, hefndi þar með kærustu sinnar, Sopiko Guramishvili, sem Ipatov vann umferðinni áður.

Nansý Davíðsdóttir, 11 ára, vann kanadísku landsliðskonuna Lizu Orlova, sem er 500 stigum hærri á stigum.

Sjötta umferð fer fram á morgun. Helgarumferðir hefjast fyrr en aðrar umferðir eða kl. 13. . Skákskýringar í umsjón Helga Ólafssonar hefjast kl. 14:30.

Pörun sjöttu umferðar liggur ekki fyrir.

• Heimasíða mótsins
• Chess-Results
• Beinar útsendingar
• Myndaalbúm frá fimmtu umferð

 

Skákstelpur á öllum aldri: Komið fagnandi í Hörpu um helgina -- Stelpuskákdagurinn á sunnudag!

Skákstelpur á öllum aldri eru boðnar hjartanlega velkomnar í Hörpu um helgina. Skákakademían efnir til skáknámskeiðs á morgun, laugardag, klukkan 11 fyrir áhugasamar stelpur og konur. Leiðbeinendur verða úr röðum Skákakademíunnar og kvennalandsliðsins og verður vel tekið á móti öllum.

Um 40 stúlkur eru þegar skráðar til leiks á skáknámskeiðið á laugardag, að sögn Stefáns Bergssonar, framkvæmdastjóra Skákakademíunnar.

Á sunnudaginn er svo komið að einum af hápunktum skákársins, Stelpuskákdeginum, sem fyrst var haldinn hátíðlegur í fyrra. Dagskrá verður í Hörpu milli klukkan 11 og 12.30 og þangað verður íslenskum landsliðskonum fyrr og nú boðið sem heiðursgestum.

Komið fagnandi í Hörpu -- skák er skemmtileg!

Peter Doggers skrifar um N1 Reykjavíkurskákmótið

Ýmsa umfjöllun má finna um N1 Reykjavíkurskákmótið í erlendum skákmiðlum. Meðal gesta á mótinu er Peter Doggers, sem rekur einn allra besta skákfréttavef heims, Chessvibes. Hann hefur fjallað um mótið í tveimur pistlum og mun skrifa daglega um mótið á heimasíðu þess.

Pistla Doggers um N1 Reykjavíkurskákmótið má finna hér:

• Inspiration, enthusiasm, passion (1. umferð)
• Harpacoustics (2. og 3. umferð)

 

Fimmta umferð N1 Reykjavíkurmótsins að hefjast: Jóhann Hjartarson með skákskýringar kl. 18

Fimmta umferð N1 Reykjavíkurmótsins hefst klukkan 16.30 í Hörpu. Í 5. umferð mætast meðal annars Stefán Kristjánsson og Ivan Cheparinov og Hjörvar Steinn og enski stórmeistarinn Jones. Hannes Hlífar mætir stigalágum keppanda og Friðrik Ólafsson glímir við hinn unga og stórefnilega Daða Ómarsson.

Þeir skákmenn sem hafa fullt hús eru: Yu Yangyi, Kína, sem stóð sig svo eftirminnilega vel í landskeppninni við Íslendinga, Gajewski, Póllandi, og Vachier-Lagrave, Frakklandi, og Eljanov, Úkraínu. Meðal þeirra sem hafa 3,5 vinning er hinn 13 ára Wei Yi, sem freistar þess að ná lokaáfanga að stórmeistaratitli.

 Jóhann Hjartarson verður með skákskýringar sem hefjast upp úr kl. 18.

• Heimasíða mótsins
• Chess-Results
• Beinar útsendingar
• Myndaalbúm frá fjórðu umferð

Jóhann Arnar sigraði á fjölmennu Vetrarleyfisskákmóti Fjölnis

Rúmlega 30 þátttakendur mættu á Vetrarleyfisskákmót Skákdeildar Fjölnis og Gufunesbæjar sem fram fór við hinar bestu aðstæður í Hlöðunni Gufunesbæ í Grafarvogi. Mótið var ætlað grunnskólanemendum í 1. - 7. bekk. Tefldar voru 6 umferðir og hart barist um 17 glæsilega vinninga sem í boði voru.

Það var Jóhann Arnar Finnsson Rimaskóla sem stóð uppi sem sigurvegari. Jóhann fékk 5,5 vinninga, gerði eitt jafntefli en vann aðrar.

Í öðru sæti varð Nansý Davíðsdóttir í Rimaskóla með 5 vinninga. Í 3. - 5. sæti með 4,5 vinninga urðu bræðurnir snjöllu úr Smáraskóla, Björn Hólm og Bárður Örn,  ásamt Joshua Davíðssyni í Rimaskóla. Aðrir í verðlaunasætum urðu þeir Sigurður Bjarki (4) Kelduskóla, Kristófer Halldór (4) Rimaskóla, Hilmir Hrafnsson (4) Kelduskóla, Róbert Orri (4) Rimaskóla, Alex Þór (3,5) Foldaskóla, Birgir Logi (3,5) Ölduselsskóla, Arnar Gauti (3,5) Vættaskóla, Guðríður Halima (3,5) Vættaskóla, Sindri Snær (3) Salaskóla, Andri Gylfason (3) Kelduskóla, Jón Hreiðar (3) Ingunnarskóla), Stefán Karl (Norðlingaskóla), Styrmir Rafn (3) Kelduskóla, Ægir Þór (3) Vættaskóla og Kristján Dagur (3) Langholtsskóla.

Eins og sjá má af úrslitunum þá var mótið afar jafnt og hver vinningur dýrmætur. Krakkarnir voru mjög ánægð með mótið og aðstæður í Hlöðunni við Gufunesbæ eru eins góðar og hugsast getur. Skákstjórar voru þeir Helgi Árnason og Davíð Hallsson frá skákdeild Fjölnis í frábæru samstarfi við Hafstein Hrafn Grétarsson frá Tígrisbæ.