Kveynis efstur á Norðurljósamótinu - Hannes og Björn koma næstir

Litháíski stórmeistarinn (og bangsinn) Aloyzas Kveinys (2545) er efstur með 4 vinninga að loknum fimm umferðum á alþjóðlega Norðurljósamótinu. Í dag vann hann Hjörvar Stein Grétarsson (2571). Fimm skákmenn eru jafnir í 2.-6. sæti með 3½. Í þeim hópi eru Hannes Hlífar Stefánsson (2514) og Björn Þorfinnsson (2395) sem gerðu jafntefli í dag.

Björn Hólm Birkisson (2002) gerði sér lítið fyrir og vann bandaríska FIDE-meistarann Nikhil Kaumar (2274) en sá varð heimsmeistari 12 ára og yngri í fyrra. 

Sjötta umferð fer fram á morgun og hefst kl. 16. Hannes mætir þá Kveinys, Björn teflir við kínverska stórmeistarann Yinglun Xu 2518).  Bragi, bróðir Björns, fær krefjandi verkefni en hann mætir indverska undrabarninu Nihal Sarin (2387).  

• Heimasíða mótsins
• Chess-Results
• Beinar útsendingar (Chess24)

Fimm á toppnum á Norðurljósamótinu

Toppbaráttan er í algleymingi á Norðurljósamótinu. Fimm skákmenn eru efstir og jafnir eftir fjórar umferðir. Mesta spennan var í skák Björns Þorfinnssonar (2395) og Aloyzas Kveinys (2545) en þar var æsispennandi kapphlaup sem lauk með jafntefli. Öðrum skákum á efstur borðunum lauk með jafntefli. Sömu skákmenn eru því sem fyrr á toppnum. Hannes Hlífar Stefánsson (2514) og Björn eru í hópi efstu manna.

Hjörvar Steinn Grétarsson (2571) er að koma til baka eftir slæma byrjun. Hann vann í dag Ramyond Kaufamann (2295). Vignir Vatnar Stefánsson (2294) vann afar góðan sigur á hinum bandaríska Nikhil Kumar (2274) sem var heimsmeistari ungmenna undir 12 ára í fyrra. 

Fimmta umferð hófst núna kl. 16. Hannes og Björn mætast. Hjörvar teflir við Kveinys og Vignir Vatnar teflir við enska stórmeistarann Mark Hebden (2460). 

 

• Heimasíða mótsins
• Chess-Results
• Beinar útsendingar (Chess24)

Sjö skákmenn efstir á Skákþingi Garðabæjar

6. umferð skákþings Garðabæjar fór fram í 3 hlutum í vikunni. Áætlaður keppnisdagur var á föstudag en þá fóru 4 skákir fram. 3. skákir fóru fram á þriðjudag, 1 + 2 úr fyrri umferðum á miðvikudag en það tókst að ljúka öllum skákum áður en pörun 7. umferðar lá fyrir.

Eftir skákirnar er það ljóst að hvorki meira en minna en 7 skákmenn eru efstir og jafnir með 4 vinninga af 6 mögulegum fyrir síðustu umferð og mótið því galopið.

Það er líka ljóst að vegna norðurljósamótsins verða þessar skákir ekki tefldar allar sama dag, heldur verða tefldar á mánudag annarsvegar og föstudag hinsvegar eftir að norðurljósamótinu lýkur.

En nú að 6 umferð.
á þriðjudag tefldu.
Gauti Páll samdi jafntefli við Vigni Vatnar í líklega aðeins betri stöðu. 
Hilmir Freyr vann Eirík nokkuð örugglega og í lengstu skák kvöldsins gerðu þeir Bárður Örn og Patrick jafntefli í skrítnustu skák kvöldsins. Patrick byrjaði á að villast á keppnisstað og því byrjaði skákin seinna en hinar. Bárður lék af sér í byrjun og Patrick fékk mun betri stöðu (skrímslin segja uþb. 3,5+) En í stað þess að tefla einfalt reyndi hann að máta og þá náði Bárður vopnum sínum með því að loka drottningu andstæðingsins inni þannig að hann náði henni fyrir hrók og Biskup. Skákin endaði svo þar sem Patrick var með Hrók, Riddara og Biskup gegn Drottningu Bárðar. Reyndar tefldu þeir það vel áfram svo lengi að stöðva varð klukkuna, setja skákina í bið og færa viðureignina á annan stað því öryggiskerfi Garðaskóla þar sem viðureignin fór fram var við það að fara á .
Eftir að skákin fór af stað aftur ca. 15 mínútum seinna endaði hún svo fljótlega eins og áður sagði með jafntefli.

Á miðvikudag fóru fram 3 skákir þar af ein úr 6. umferð en hinar úr 4. og 5. umferðum. Þær voru tefldar meðfram U2000 móti TR og enduðu allar með jafntefli.

Á föstudag mætti Sverrir ekki gegn Goitom. Jón Úlfljóts labbaði inn í Ensku árásina í Najdorf og tapaði gegn Páli og Jóhann var ekki líkur sjálfum sér gegn Hjálmari þar sem hann tapaði fyrst peði og svo manni og að lokum skákinni. Björgvin vann svo Pál Andrason í lokaskák umferðarinnar.

Í næstu umferð teflir efri hluti mótsins á föstudag. Nánari tíma og staðsetning síðar. 
Þetta verða skákirnar
Vignir Vatnar - Hilmir Freyr
Bárður - Gauti Páll
Patrick - Björgvin (gæti orðið á mánudag)
Páll Sig - Björn Hólm

Aðrar skákir fara fram á mánudag.

Keppnin um skákmeistara Garðabæjar er einnig í algleymingi því Páll Sig sem stendur best af vígi á eftir erfiða skák gegn Birni Hólm og sigurvegari í skák þeirra Dorin og Páls Andra geta hæglega náð honum. Einnig Gæti Jóhann Ragnarsson blandað sér í keppnina ef Páll Sig tapar og Dorin og Páll Andra gera jafntefli.

Chess-Results. 

Fimm á toppnum á Norðurljósamótinu - þar á meðal Hannes og Björn

Fimm skákmenn eru efstir og jafnir með 2½ vinning að lokinni þriðju umferð Alþjóðlega Norðurljósamótsins í skák. Þeirra á meðal eru Björn Þorfinnsson og Hannes Hlífar Stefánsson. Björn lagði bandaríska alþjóðlega meistarann Raymond Kaufman (2266) örugglega að velli og náði að komast í tíma í brúðkaup kl. 20 þar sem hann var veislustjóri. Hannes Hlífar Stefánsson (2514) yfirspilaði (yfirtefldi?) Mark Hebden (2460). Ásamt þeim hafa Litháinn Aloyzas Kveinys (2545) og Kínverjarnir Yinglun Xu og Yi Xu 2½ vinning. 

Meðal annarra úrslita í gær má nefna að Nihal Sarin (2487) vann Einar Hjalta jensson (2372) og Vignir Vatnar Stefánsson (2294) og Bragi Þorfinnsson (2443) gerðu jafntefli. 

Tvær umferðir eru tefldar í dag og hefst sú fyrri kl. 10. Björn teflir við Kveinys, Hannes við Yinglu og Sarin við Yi Xu.

 

• Heimasíða mótsins
• Chess-Results
• Beinar útsendingar (Chess24)

Hraðskákkeppni taflfélaga fer fram 19. nóvember

Hraðskákkeppni taflfélaga verður haldin í Rimaskóla 19. nóvember og hefst keppni kl. 13:00.

Tefldar verða 2x7 umferðir eftir svissnesku kerfi og verða tímamörkin 3 2. Hver sveit er skipuð 6 mönnum auk varamanna. Hvert félag má senda a og b lið til leiks en þó áskilja mótshaldarar sér rétt á að takmarka fjölda b liða ef skráning er þeim mun meiri. Mótsgjald er 10.000 krónur á lið. Mótið verður reiknað til alþjóðlegra hraðskákstiga.

Varamenn koma ávallt inn á neðsta borð og þarf lið að vera eins skipað í báðum skákum hverrar umferðar. Það lið sem hlýtur flesta vinninga er Íslandsmeistari skákfélaga í hraðskák 2017 og verði tvö lið jöfn er einföld umferð tefld til úrslita um titilinn (dregið um lit á borði eitt og sitthvor liturinn á næstu borðum).

Skákdeild Fjölnis sér um mótshaldið og hvetjum við sem flest lið til að skrá sig til leiks!

Upplýsingar um þegar skráðar sveitir má finna hér.

Skákþáttur Morgunblaðsins: Myndi sóma sér vel í hvaða kennslubók sem er

Íslenska liðið, Héðinn Steingrímsson, Hjörvar Steinn Grétarsson, Hannes Hlífar Stefánsson og Guðmundur Kjartansson, sem tekur þátt í Evrópumóti landsliða á Krít, hefur átt erfitt með að finna taktinn í fyrstu fimm umferðum mótsins og situr í 28 sæti af 40 þátttökuþjóðum með 4 stig og 8½ vinning af 20 mögulegum. Króatar eru óvænt efstir með 9 stig eftir sigur á Þjóðverjum en á hæla þeirra koma sveitir sem telja verður líklegri til sigurs á mótinu, Ungverjar, Rússar, Armenar og Pólverjar með átta stig.

Tefldar verða níu umferðir en sjötta umferðin fór fram í gær og mættu Íslendingar þá Makedóníu og voru með stigahærri menn á öllum borðum. Í reynd mætir íslenska sveitin til leiks án varamanns þó að liðsstjórinn Ingvar Þ. Jóhannesson sé skráður sem slíkur, en gefið hefur verið út að hann muni ekki tefla nema veikindi komi upp. Það er gagnrýnisverð ákvörðun hjá stjórn SÍ að búa svona um hnútana því að Evrópumótið er alltaf geysilega krefjandi keppni og við marga öfluga skákmenn að etja. Þarna eru mættir til leiks Levon Aronjan, Anish Giri, Shakriyar Mamedyarov, Alexander Grischuk, Jan Nepomniachtchi, David Navara og Peter Leko svo nokkrir séu nefndir.

Þó að sveitin hafi verið á miklu lágflugi mun endanleg niðurstaða auðvitað ráðast í lokaumferðunum og ein virkilega góð úrslit geta breytt miklu. Athugun á viðureignunum tuttugu leiðir í ljós að það vantar öryggi í taflmennskuna; níu töp er allt of mikið.

Hannes Hlífar Stefánsson er sá eini í sveitinni sem hefur bætt ætlaðan árangur sinn. Skákin sem hann vann í viðureign Íslands og Albaníu myndi sóma sér vel í í hvaða kennslubók sem er þar sem fjallað væri um skjóta og árangursríka liðsskipan:

EM 207; 2. umferð:

Hannes Hlífar Stefánsson – Franc Ashiku

Spænskur leikur

1. e4 e5 2. Rf3 Rc6 3. Bb5 a6 4. Ba4 d6 5. O-O Bd7 6. d4 b5 7. Bb3 Rxd4 8. Rxd4 exd4

Þekkt gildra, 9. Dxd4?? er svarað með 9. .... c5 10. Dd5 c4 og biskupinn fellur. En Hannes kann til verka og missir ekki af besta leiknum.

9. c3! dxc3 10. Dh5 g6?

Albaninn virðist tefla þessa sjaldséðu byrjun án þess að kunna hana, 10. ... De7 eða 10. ... Df6 er betra.

11. Dd5 Be6 12. Dc6+ Bd7 13. Dxc3 f6 14. f4 Bg7 15. e5! 

Opnar stöðuna upp á gátt. Kóngurinn á hvergi skjól gott.

15. ... dxe5 16. fxe5 f5 17. Hd1 Re7 18. Bg5 c5 19. Dxc5

Einfaldast, 19. Bf6 vinnur einnig.

19. ... Hc8 20. Df2 Dc7 21. Rc3 Dc5 22. Be3 Db4 23. Hd4 Da5 24. Had1 Bc6 25. Hd6 b4 

26. Bb6!

Lokahnykkurinn.

26. ... Dxe5 27. Hd8+

– og svartur gaf. Það er mát í næsta leik. 

Óvænt úrslit

Óvæntustu úrslit Evrópumótsins urðu strax í fyrstu umferð þegar Aserbaídsjan tapaði fyrir Ítalíu 1½:2½ og í 4. umferð töpuðu Rússar fyrir Ungverjum og hefði það einhvern tímann þótt saga til næsta bæjar. Nigel Short byrjaði vel en í viðureigninni við Grikki missté hann sig í þessari stöðu í 5. umferð: 

Kelieres – Short

Hvítur lék síðast 30. Df3 og nú er best 30. .. Rxd7 31. Hxd7 Dxf2+ 32. Dxf2 Hxf2 33. Kxf2 fxg5 og svarta staðan er aðeins betri. En Short vildi meira og lék ...

30. ... H2e5?? 31. H1d6! Hf5 32. Hxb6 Hxf3

og þá kom banvæn sending...

 

 

 

 

 

33. He7!

– og svartur gafst upp því að mát eða hrókstap blasir við.

 

 

Helgi Ólafsson [e-mail]

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 4. nóvember 2017

Skákþættir Morgunblaðsins

Þrír efstir á Norðurljósamóti - Hannes og Björn efstir Íslendinganna

Önnur umferð Norðurljósamótsins fór fram í morgun. Þrír stórmeistarar eru efstir og jafnir með fullt hús að henni lokinni. Það eru Xu Yinglun (2518), Kína, Mark Hebeden (2460), Englandi, og Aloyzas Kveinys (2545), Litháen.

Hannes Hlífar Stefánsson (2514), Björn Þorfinnsson (2395) er efstir Íslendinga með 1½ vinning.

Kveinys tefldir afar vandað gegn Braga Þorfinnssyni (2443) og vann sannfærandi sigur. Hannes og Simon Williams (2437) gerðu stutt stórmeistarajafntefli og Hebden náði "að trikka" Einar Hjalta Jensson (2372) í baráttuskák. 

Hjörvar tefldi aftur lengstu skák umerðinnar. Hann reyndi sitt besta til að knésetja indverska undrabarnið Nihal Sarin (2487) en sá indverski reyndist of seigur og hélt jafntefli.

Þriðja umferð hófst núna kl. 16.

Hannes teflir við Hebden, Björn við bandaríska alþjóðlega meistarann Raymond Kaufman (2266), Einar Hjalti við Sarin og Bragi við Vigni Vatnar Stefánsson (2294).

• Heimasíða mótsins
• Chess-Results
• Beinar útsendingar (Chess24)

Hlemmur Square mót nr. 3

Hlemmur Square mun í samstarfi við Vinaskákfélagið halda hraðskákmót á Hlemmur Square sunnudaginn, 26. nóvember, klukkan átta.

Þetta er þriðja skákmótið í seríu mánaðarlegra móta þar sem teflt er í rúmgóðum heimkynnum veitingastaðar hótelsins, Pylsa/Pulsa Restaurant. Á síðasta móti var hörku barátta, en Páll Andrason sigraði og fékk 7 vinninga af 8 mögulegum. 

Tefldar verða 8 umferðir með 4+2 mínútna umhugsunartíma. Skákstjóri og dómari er Hörður Jónasson frá Vinaskákfélaginu.

Þátttaka er ókeypis á mótið en Hlemmur Square gefur gjafabréf fyrir efstu þrjú sætin auk þess sem medalía verður veitt fyrir vinningshafann. 

1. verðlaun: Gjafabréf á Pylsa/Pulsa Restaurant / bar fyrir 7.000 kr. +medalía
2. verðlaun: Gjafabréf á Pylsa/Pulsa Restaurant / bar fyrir 5.000 kr.
3. verðlaun: Gjafabréf á Pylsa/Pulsa Restaurant / bar fyrir 3.000 kr. 

Gleðistundarverðlag á kranaveigum fyrir þátttakendur mótsins, ef þörf skyldi krefja í þeim annars harða skóla sem skákin er!

Gert er ráð fyrir því að skákmótið taki innan við þrjár klukkustundir.

Hægt er að skrá sig í gegnum skak.is á gula kassann, en einnig á staðnum.

Norðurljósamótið: Einar Hjalti vann Hjörvar

Alþjóðlega Norðurljósamótið hófst í dag í húsnæði TR, Faxafeni 12. Hart var barist í öllum skákum umferðarinnar og aðeins einni skák lauk með jafntefli. Hinir stigahærri unnu iðulega hina stigalægri en á því voru tvær undantekningar. Indverska undrabarninu, Nihal Sarin, tókst ekki að leggja að velli bandaríska alþjóðlega meistarann Raymond Kaufmann. Þau úrslit sem vöktu óneitanlegu mestu athygli voru þau að Einar Hjalti Jensson lagði stigahæsta keppendann að velli. Fórnaralambið var landsliðsmaðurinn Hjörvar Stein Grétarsson  í lengstu skák umferðinnar en Hjörvar hafði lengstum mun betri stöðu í skákinni.

Á morgun verða tefldar tvær umferðir. Sú fyrri hefst kl. 10 og sú síðari kl. 16. Þess má geta að Hjörvar fær afar ögrandi verkefni í fyrri skák morgundagsins en hann mætir Sarin.

Skákáhugamenn eru hvattir til fjölmenna í Fenið. Hinir "lötu" geta fylgst með í gegnum netið. Það er samt ekki næstum því jafn gaman. 

• Heimasíða mótsins
• Chess-Results
• Beinar útsendingar (Chess24)

Norðurljósamótið: Pörun fyrstu umferðar

Alþjóðlega Norðurljósamótið í skák hefst kl. 16 í húsakynnum Taflfélags Reykjavíkur, Faxafeni 12. 22 skákmenn taka þátt og er búið að para í fyrstu umferð.

Margar athyglisverðar viðureignir strax í fyrstu umferð!

Pörun fyrstu umferðar

 

• Heimasíða mótsins
• Chess-Results
• Beinar útsendingar (Chess24)