Skák.is

Færsluflokkur: Spil og leikir

10.11.2014 | 13:54

Magnus Carlsen byrjar vel í heimsmeistaraeinvíginu

Magnus Carlsen (2863) byrjar vel í heimsmeistaraeinvíginu gegn Vishy Anand (2792) sem hófst á laugardag. Fyrstu skákinni sem fram fór á laugardag lauk með jafntefli en þar styrði Anand hvítu mönnunum og tefld var Grunfelds-vörn. Carlsen vann svo fremur góðan sigur í gær þar sem hann braut aftur Berlínar-vörn Anands. Caruana tísti svo:

Just realized today is the 25th anniversary of the fall of the Berlin Wall. Now that is a fantastic coincidence. #CarlsenAnand
— Fabiano Caruana (@FabianoCaruana) November 9, 2014

Í dag er frídagur en einvíginu verður framhaldið á morgun með þriðju skák. Þá verður Anand með hvítt.

Það er ljóst að Carlsen notar ekki eingöngu frídaga í skákstúderingar!

"Rest" day... Tip #3 from my #Chess Tips video http://t.co/zhdz4inK4k #PlayMagnus pic.twitter.com/9Tb6CcceEc
— Magnus Carlsen (@MagnusCarlsen) November 10, 2014

Heimasíða einvígisins
Beinar útsendingar (hefjast kl. 12)

Spil og leikir | Breytt s.d. kl. 13:57 | Slóð | Facebook | Athugasemdir (0)

10.11.2014 | 10:08

Íslandsmót eldri skákmanna - Strandbergsmótið í skák

Íslandsmót eldri skákmanna sem eru 50 ára + og 65 ára + í atskák eru nú haldin í fyrsta sinn, en stefnt er því að gera þau að árlegum viðburði sem hluta af Skákþingi Íslands, sem fer í mörgum flokkum eins og kunnugt er.

Mótin verða haldin laugardaginn 22. nóvember nk. í Strandbergi, safnaðarheimili Hafnarfjarðarkirkju, í samstarfi við RIDDARANN, annan skákklúbb eldri borgara á höfuðborgarsvæðinu. Mótshaldið tengist 100 ára afmæli kirkjunnar nú um þessar mundir. Boðið verður upp á góðan viðurgerning og aðstæður á mótsstað.

Teflt verður í tveimur flokkum 50 ára og eldri ( f. 1964 og síðar) og 65 ára og eldri (f. 1949 og fyrr). Verði skráðir keppendur í öðrum hvorum flokknum færri en 12 verður teflt í einum flokki en engu að síður teflt um tvo Íslandsmeistaratitla.

Nánar verður sagt frá fyrirkomulagi mótsins á næstum dögum.

Skráning

Skák.is (guli kassinn efst)
Sími: 568 9141 (á milli 10-13)
Einnig er hægt að skrá sig á þriðjudagsmótum hjá Ásum eða hjá Riddurnum á miðvikudögum.

Spil og leikir | Slóð | Facebook | Athugasemdir (0)

9.11.2014 | 20:00

Skákþáttur Morgunblaðsins: Stigahækkanir á Evrópumótinu í Batumi

Þótt skipulag Evrópumóts ungmenna í Batumi í Georgíu hafi mátt vera betra komast menn aldrei frá því að skákhefð þar í landi er stórmerk og lengi vel státuðu Georgíumenn af miklum valkyrjum, þ.ám. heimsmeisturum kvenna, Nonu Gaprindhavsvili og Maju Chiburdanidse. Nýr forseti evrópska skáksambandsins, Zurab Azmaparasvili, er Georgíumaður en hefur átt við nokkurn „ímyndarvanda" að stríða og þá aðallega vegna ofsafenginna skapsmuna.

Á Evrópumótinu var tekinn í notkun nýr stigastuðull sem þýddi að hækkanir og lækkanir skákmanna sem eru undir 18 ára aldri verða skarpari en áður. Í flestum tilvikum er betra að tefla „niður fyrir sig", eins og það er stundum orðað. Þess nutu Símon Þórhallsson, sem hlaut fjóra vinninga og hækkaði um 113 elo-stig, og Gauti Páll Jónsson, sem hlaut 3½ vinning og hækkaði um 77 elo-stig. Þeir fóru báðir vel fram úr ætluðum árangri. Dagur Ragnarsson, sem tefldi í 18 ára flokknum, byrjaði illa en var kominn á þokkalegan skrið undir lokin - en þá var mótið líka búið.

Þegar kemur að Oliver Jóhannessyni, sem tefldi í 16 ára flokknum með Símoni og Gauta Páli, þá tefldi hann allt mótið „niður fyrir sig" og lækkaði um 58 elo-stig. En hann hlaut fimm vinninga af níu mögulegum og að fá yfir 50% árangur í slíkum mótum, þar sem austurblokkin teflir fram einvalaliði, verður að teljast gott, einkum þegar litið er til þess að í flestum jafnteflisskákunum átti hann góða vinningsmöguleika - þar vantaði örlítið upp á slagkraftinn. Greinarhöfundur hefur tekið eftir því að margir þeir sem eru að henda á milli sín hugleiðingum um stig byggja mat sitt yfirleitt ekki á taflmennsku - heldur tölum á blaði. Því er þveröfugt farið með undirritaðan, sem með rýni í taflmennskuna þykist sjá fram á að Oliver standi á þröskuldi mikilla framfara. Eftir því sem leið á mótið áttaði hann sig á því að stundum er gott að breyta til. Í síðustu umferð vann hann sigur á albönskum skákmanni sem vissi ekki sitt rjúkandi ráð þegar Oliver hóf að tefla upp byrjun sem ekki hafði áður sést í skákum hans:

EM ungmenna, Batumi 2014:

Oliver Aron Jóhannesson - Mico Timoleo (Albanía)

Sikileyjarvörn

1. e4 c5 2. Rc3 Rc6 3. Bb5

Þennan leik hafði Oliver, sem sjaldan leikur kóngspeðinu, undirbúið sérstaklega.

3.... g6 4. Bxc6 dxc6 5. d3 Bg7 6. Be3 b6 7. Dd2 Rf6 8. Bh6 0-0 9. Bxg7 Kxg7 10. f4 Dc7 11. Rf3 Hd8 12 0-0 b5 13. e5 Rd5 14. Re4 c4 15. d4 Rb6 16. Df2

Þetta hefur allt gengið eins og í sögu, yfirburðir hvíts í rými eru umtalsverðir.

16.... f5 17. exf6+ exf6 18. f5!? He8?

Svartur var að taka peðið með 18.... Bxf5 eða leika 18.... Df4 sem hvítur getur svarað með 19. De1!

19. Rxf6! Hf8

19.... Kxf6 er svarað með 20. Dh4+ Kg7 21. Rg5 með myljandi sókn.

20. Rxh7! Hxf5

20.... Kxh7 kemur á svipaðan stað niður: 21. Dh4+ Kg8 22. fxg6 o.s.frv.

21. Rhg5 Bd7 22. Hae1 Rd5 23. Re6+ Bxe6 24. Hxe6 Rf4 25. He5

Með peði meira er eftirleikurinn auðveldur.

25.... Hf7 26. De3 Haf8 27. He1 Dd7 28. Rg5!

Nú má hrókurinn ekki hreyfa sig vegna - He7+. Svarta staðan er vonlaus.

28.... Dg4 29. Dg3 Dd7 30. Rxf7 Dxd4+ 31. De3 Dxe3+ 32. H1xe3 Hxf7 33. He7 Rd5 34. Hxf7+ kxf7 35. Hha3 Rb4 36. Hxa7+ Ke6 37. Hg7 Rxc2 38. Hxg6 Kd5 39. h4 b4 40. Kf1 Rd4 41. Ke1

- og svartur gafst upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Laugardagsmogganum, 1. nóvember 2014

Skákþættir Morgunblaðsins

Spil og leikir | Breytt 3.11.2014 kl. 11:03 | Slóð | Facebook | Athugasemdir (0)

9.11.2014 | 16:13

Jón Kristinn og Nansý Íslandsmeistarar í unglingaflokki í dag

Íslandsmót 15 ára og yngri og 13 ára og yngri lauk í dag í Rimaskóla. Jón Kristinn Þorgeirsson (2059) vann mjög öruggan sigur á mótinu en hann alla andstæðinga sína níu að tölu! Jón varði því titilinn sem hann vann í fyrra. Nansý Davíðsdóttir (1641), sem varð í fjórða sæti, varð efst keppenda 13 ára og yngri og varð þar með Íslandsmeistari í þeim aldursflokki.

Gauti Páll Jónsson (1843) varð í öðru sæti með 7 vinninga. Nansý, Dawid Kolka (1829), og tvíburabræðurnir Björn Hólm (1856) og Bárður Örn Birkissynir (1736) urðu í 3.-6. sæti með 6,5 vinning. Gauti og Dawid hlutu silfur og brons í 15 ára og yngri.

Vignir Vatnar Stefánsson (1959), sem hlaut 6 vinninga, varð annar á Íslandsmóti 13 ára og yngri. Róbert Luu (1323), sem einnig hlaut 6 vinninga tók þriðja sæti. Aron Þór Mai (1294) fékk jafnmarga vinninga.

Mótshaldið tókst afar vel en aðstæður í Rimaskóla eru afar góðar. Skákstjórn önnuðust Stefán Bergsson og Gunnar Björnsson.

Rg.	Name	Elo	Verein	Gr	Pkte
1	Jón Kristinn Þorgeirsson	2059	SA	U15	9
2	Gauti Páll Jónsson	1843	TR	U15	7
3	Dawid Kolka	1829	Huginn	U15	6½
4	Nansý Davíðsdóttir	1641	Fjölnir	U13	6½
5	Björn Hólm Birkisson	1856	TR	U15	6½
6	Bárður Örn Birkisson	1736	TR	U15	6½
7	Vignir Vatnar Stefánsson	1959	TR	U13	6
8	Róbert Luu	1323	TR	U13	6
9	Aron Þór Mai	1294	TR	U13	6
10	Heimir Páll Ragnarsson	1490	Huginn	U13	5½
11	Jóhann Arnar Finnsson	1477	Fjölnir	U15	5½
12	Guðmundur Agnar Bragason	1293	TR	U13	5½
13	Joshua Davíðsson	0	Fjölnir	U13	5½
14	Jón Þór Lemery	0	TR	U13	5
15	Mykhaylo Kravchuk	1462	TR	U13	5
16	Óskar Víkingur Davíðsson	1398	Huginn	U13	5
17	Þorsteinn Magnússon	1289	TR	U15	5
18	Sindri Snær Kristófersson	1298	Huginn	U13	5
19	Daníel Ernir Njarðarson	0	TR	U13	5
20	Brynjar Haraldsson	1016	Huginn	U13	5
21	Stefán Orri Davíðsson	1061	Huginn	U13	5

Spil og leikir | Slóð | Facebook | Athugasemdir (0)

9.11.2014 | 15:32

Örn Leó unglingameistari Íslands

Örn Leó Jóhannsson (2048) varð í gær unglingameistari Ísland (u20). Örn Leó hlaut 5,5 vinning í 7 skákum. Oliver Aron Jóhannesson (2170) og Jón Kristinn Þorgeirsson (2059) urðu í 2.-3. sæti. Sigur Arnar verður að teljast fremur óvæntur enda aðeins fimmti í stigaröð keppenda. Örn tryggði sér sigur á mótinu með sigri á Oliver í lokaumferðinni.

Fimmtán keppendur tóku þátt. Skákstjórar voru Gunnar Björnsson og Páll Sigurðsson.

Hjörvar Steinn Grétarsson, stórmeistari, afhendi verðlaunin.

Lokastaðan á Chess-Results

Spil og leikir | Slóð | Facebook | Athugasemdir (0)

9.11.2014 | 15:29

Stefán Kristjánsson er Karlöndin 2014

Í gærkvöld fór fram þriðja skemmtikvöld Talffélags Reykjvíkur þar sem keppt var um titilinn Karlöndin 2014. Átján keppendur voru mættir til leiks til að hita upp fyrir heimsmeistareinvígi Carlsen og Anand sem hófst í dag með bráðskemmtilegri skák. Það var ekki síður fjörlega teflt á skemmtikvöldinu og keppnin hörð. Forgjafarkerfið á klukkunni var skemmtileg nýbreitni og máttu margir stigaháir keppendur með naumt skammtaðan tíma hafa sig allan við að knésetja sér mun stigalægri andstæðinga.

Ingvar Þór Jóhannesson gékk vel í byrjun og var einn með fullt hús eftir fyrstu fjórar skákirnar, en þá var gert langþráð hlé á taflmennskunni til að heimsækja vini vor á Billiardbarnum. Athygli vakti að fullyrðingu Björns Þorfinnssonar fyrir mót þess efnis að það væri nánast formsatriði að vinna var algjörlega hafnað í byrjun móts. Það voru Stefán Steingrímur og Jón Viktor sem sáu um að bjóta drauma Húnsins um Karlöndina 2014.

Eftir fyrsta hlé mætti Ingvar hinum eitilharða Don Róbert Lagerman og var ekki eins brosmildur eftir þá rimmu og fyrir. Róbert vann 1.5 - 0.5 og tók þar með forystuna í mótinu. Athyglisverð viðureign fór þá einnig fram milli Björns Þorfinnssonar og Pirc sérfræðingsins síkáta Kristjáns Arnar Elíassonar. Svo virtist sem Kristján ætlaði að feta sömu braut og Stefán og Jón V. og hafna Birni og hafði yfirburðatafl í fyrri skákinni. Með tvær og hálfa mínútu á klukkunni gegn 25 sekúndum andstæðingsins lék hann svo leik mótsins.

Í sirkað þessari stöðu fékk Kiddi þá frábæru vídeoflugu í höfuðið að gott væri bara að skipta upp á drottningunni sinni og hróknum og vinna svo létt með peðunum. Hann lék því hinum epíska leik Dd2! til að leppa hrókinn! Björn nýtti þá öll 2378 stigin sín til að svara þessari snilld með Hxd2! Kristján sá sitt óvænna og gaf. Hann fór svo örugglega niður í logum í seinni skákinni og báðir voru þeir kapparnir svo meira og minna íkjallaranum það sem eftir lifði móts.

Í fjórðu umferð mætti Róbert Stefáni Kristjánssyni og lauk þeirri viðureign 1-1. Það nýtti skákkennarinn knái Björn Ívar Karlsson sér vel og leiddi með hálfum vinning þegar annað hlé var gert á taflmennskunni. Fyrir lokaumferðina hafði hann ennþá hálfan vinning á Stefán Kristjánsson og mætti Jóhanni Ingvasyni í lokaumferðinni meðan Stefán tefldi við Ingvar Þór. Björn Ívar og Jóhann sættust á skiptan hlut, meðan Stefán knúði fram 1.5 - 0.5 sigur á internet stjörnunni Ingvar Þór.

Stefán og Björn Ívar enduðu jafnir með níu vinninga og hálfum betur meðan Jóhann Ingvason náði þriðja sætinu með 8 vinninga. Stefán var úrskurðaður sigurvegari á bindisbroti og er því Karlöndin 2014. Fékk hann í verðlaun forláta veldissprota með þremur ljósastillingum. Hann er því kominn í pottinn líkt og Mórinn 2014 Hannes Hlífar Stefánsson fyrir skemmtikvöldakóngakeppni vorsins.

Skemmtikvöldið var vel heppnað, engin deiluefni komu upp í skákunum þrátt fyrir að Jón Gunnar Jónsson hefði verið meðal keppenda, og allir skemmtu sér konunglega á Billiardbarnum í mótslok.

Taflfélag Reykjavíkur óskar Stefáni til hamingju með sigurinn og titilinn og vill þakka öllum þeim miklu meisturum sem tóku þátt. Síðasta skemmtikvöld félagsins fyrir jól verður svo haldið í lok nóvember.

Spil og leikir | Slóð | Facebook | Athugasemdir (0)

9.11.2014 | 15:00

Tómas 15 mín skákmeistari Hugins

Tómas Veigar Sigurðarson vann sigur á hinu árlega 15. mín skákmóti Hugins á norðursvæði sem fram fór á Húsavík í gær. Tómas fékk sex og hálfan vinning af sjö mögulegum og einungis Smári Sigurðsson náði að halda jöfnu gegn Tómasi. Þetta er annar titill Tómasar í vikunni því hann er nýkrýndur atskákmeistari Akureyrar eftir sigur á atskákmóti Akureyrar um sl. helgi.

Smári, Tómas og Rúnar

Rúnar Ísleifsson varð í öðru sæti með sex vinninga og Smári Sigurðsson varð þriðji með fimm vinninga. Í flokki 16 ára og yngri vann Jón Aðalsteinn Hermannsson sigur með þrjá og hálfan vinning, Jakub Piotr Statkiewicz varð annar með þrjá vinninga og Eyþór Kári Ingólfsson varð þriðji, einnig með þrjá vinninga en stigalægri. Átta keppendur tóku þátt í fullorðinsflokki en sex keppendur í flokki 16 ára og yngri og tefldu allir saman ein einum flokki. Skemmtikvöld Hugins fór svo fram um kvöldið í Dalakofanum á Laugum og verður nánar sagt frá því eftir helgi.

Jakub, Jón og Eyþór

Spil og leikir | Slóð | Facebook | Athugasemdir (0)

8.11.2014 | 17:27

Jón Kristinn efstur á Íslandsmóti 15 ára og yngri

Akureyringurinn knái, Jón Kristinn Þorgeirsson (2059), er efstur með fullt hús á Íslandsmóti 15 ára og yngri en fyrstu fimm umferðir mótsins fóru fram í dag í Rimaskóla. Dswid Kolka (1829) kemur næstur með 4,5 vinning. Fimm skákmenn koma næstir með 4 vinninga.

Mótið í dag er jafnframt Íslandsmót 13 ára og yngri. Þar eru þau Vignir Vatnar Stefánsson (1959), Nansý Davíðsdóttir (1641) og Mykhaylo Kravchuk (1462) efst með 4 vinninga.

Mótinu verður framhaldið á morgun með umferðum 6-9. Klukkurnar verða settar í gang kl. 11.

Núna kl. 17 hófst síðari hluti Unglingameistaramóts Íslands (u20). Hægt er að fylgjast með gangi mála á Chess-Results.

Spil og leikir | Breytt s.d. kl. 17:50 | Slóð | Facebook | Athugasemdir (0)

8.11.2014 | 07:00

Íslandsmót 15 ára og yngri hefst í dag í Rimaskóla

Keppni á Íslandsmótinu í skák 2014 - 15 ára og yngri (fædd 1999 og síðar) og 13 ára og yngri (fædd 2001 og síðar) verður haldið í Rimaskóla dagana 8. og 9. nóvember nk. Tefldar verða 9 umferðir eftir svissneska kerfinu og er umhugsunartími 20 mín + 5 sek. viðbótartími á hvern leik. Teflt verður í einum flokki.

Skráning fer fram á www.skak.is (skráningarform í gula kassanum efst).

Umferðataflan er þannig:

Laugardagur 8. nóvember

kl. 12.00 1. umferð
kl. 13.00 2. umferð
kl. 14.00 3. umferð
kl. 15.00 4. umferð
kl. 16.00 5. umferð

Sunnudagur 9. nóvember

kl. 11.00 6. umferð
kl. 12.00 7. umferð
kl. 13.00 8. umferð
kl. 14.00 9. umferð

Þetta eru áætlaðar tímasetningar, en hver ný umferð hefst að þeirri fyrri lokinni.

Að því loknu verðlaunaafhending og mótsslit.

Þátttökugjöld: kr. 1.000.- (hámark kr. 1.500.- fyrir fjölskyldu)

Verðlaun: Verðlaunabikarar fyrir þrjú efstu sætin í hvorum flokki.

Mótið er reiknað til alþjóðlegra atskákstiga.

Mótið á Chess-Results.

Spil og leikir | Breytt 7.11.2014 kl. 20:35 | Slóð | Facebook | Athugasemdir (0)

7.11.2014 | 23:16

Mikael Jóhann og Jón Kristinn efstir á Unglingameistaramóti Íslands

Félagarnir úr Skákfélagi Akureyrar, Mikael Jóhann Karlsson (2077) og Jón Kristinn Þorgeirsson (2059) eru efstir og jafnir með fullt hús að loknum þremur umferðum á Unglingameistaramóti Íslands sem hófst í kvöld í húsnæði SÍ.