Skáksögufélagið: Helgi Ólafsson ritar skákævisögu Friðriks - Brjóstmynd af meistaranum steypt í eir

Skáksögufélag Íslands var stofnað 1. nóvember 2014 í tengslum við 150 ára afmælismót Einars Benediktssonar, skálds, að frumkvæði Hrafns Jökulssonar og fleiri. Stofnfélagar þess voru 64 en eru nú helmingi fleiri eða 128 talsins. Félagið er öllum opið.

Tilgangur félagsins er að vinna að því að sögu manntaflsins og skáklistarinnar á  Íslandi verði sem best til haga haldið. Þá skal félagið beita sér varðveislu hvers kyns skákminja og muna, að gögn sem varða íslenskt skáklíf verði varðveitt og saga þess og helstu skákmeistara okkar skráð, eins og segir í lögum þess.  

Þó lítið hafi farið fyrir starfsemi Skáksögufélagsins hefur að ýmsu verið unnið á þess vegum bak við tjöldin.  Fyrsta stóra viðfangsefni félagsins var að safna efni, skanna og byggja upp yfirgripsmikinn gangagrunn svo hægt væri að setja upp veglega vefsíðu um skák- og afreksferil  Friðriks Ólafssonar, fyrsta og fremsta skákmeistara okkar.  Heimasíðan var formlega opnuð af Illuga Gunnarssyni, þáverandi menntamálaráðherra  fyrir tveimur árum.  Um er að ræða afar fjölbreytta upplýsingasíðu með ótal gömlum blaðafréttum, viðtölum og greinum um meistarann, auk yfirlits um öll þau mörgu mót  sem hann tefldi á, nær allar skákir hans og  helstu mótherja. Heimasíðan er ríkulega skreytt ljósmyndum frá ferli Friðriks og úr íslensku skáklífi frá miðbiki síðustu aldar fram til þessa dags.  Til verksins naut Skáksögufélagið verkefnisstyrks frá Alþingi og Menntamálaráðuneytinu, sem nú hefur verið aukið við til nýrra viðfangsefna.  

Ber þar fyrst að nefna að nú er unnað að ritun og útgáfu Skákævisögu Friðriks Ólafssonar. Fyrir nokkru síðan var gerður samningur við Helga Ólafsson, stórmeistara, um að taka þetta verðuga verkefni að sér sem aðalritstjóri og höfundur. Áður höfðu nokkrir aðrir hafið það verk en ekki lokið.  Honum til halds og trausts eru í ritnefnd auk Friðriks, þeir Jón Þ. Þór og Jón Torfason, báðir kunnir sagnfræðingar og skákmenn góðir. Áformað er að bókin komi út að rúmu ári liðnu eða haustið 2019 og verði myndarlegur prentgripur. 

Þá stendur einnig fyrir dyrum að setja brjóstmynd meistarans á stall innan tíðar, en nú  er verið að steypa gifsmynd hennar í eir út í Moskvu. Styttan var gerð fyrir aldarfjórðungi af hinum kunna rússnesk/bandaríska myndhöggvara Peter Saphiro en hefur verið í geymslu um árabil. Það var Ólafur Egilsson, fyrrv. sendiherra, sem hafði milligöngu um gerð gifsstyttunnar á sínum tíma og hefur nú aðstoðað við láta steypa hana í bronz þar ytra. Minnismerkið myndi sóma  sér vel við útitaflið í miðborg Reykjavíkur, en Friðrik er heiðursborgari hennar, samþykki borgarstjórn væntanlega beiðni þar um.

 

Þá hefur einnig verið óskað eftir því við umhverfis- og skipulagsnefnd borgarinnar að fá að merkja goðsögninni Bobby Fischer bekk þar í grennd en verið er að hanna koparskilti með lágmynd hans til uppfestingar.  Sagt er að Bobby heitinn muni hafi vermt fleiri útibekki í miðborginni, við Skólavörðustíginn og kringum tjörnina en nokkur annar síðustu ár sín hér,   

Að lokum má geta þess að sú hugmynd hefur verið viðruð við borgarstjóra fyrir nokkru að efnt verði til alþjóðlegrar hönnunarsamkeppni um gerð stórrar  höggmyndar um „Einvígi aldarinnar“ eða allra tíma eins og það er nú nefnt, heimsmeistaraeinvígi þeirra Fischers og Spasskys, í skugga kalda stríðsins, hér í Reykjavík 1972.  Vel færi að að vígja mikilfenglegt útilistaverk því tengdu eigi síðar en á 50 ára afmæli þessa heimssögulega viðburðar sumarið 2022. Það myndi sóma sér vel t.d. vestan við Laugardalshöllina á horni Laugavegs og Reykjavegar.   Nú er kominn tími á að hrinda þessari gömlu hugmynd í framkvæmd enda bara eitt kjörtímabil til stefnu.

Stjórn Skáksögufélagsins skipa þeir: Einar S. Einarsson, forseti; Jón Þ. Þór, varaforseti;  Jón Torfason, Róbert Lagerman Harðarson og Guðmundur G. Þórarinsson;.

Fyrir þá sem vilja gerast félagar er bara að senda póst á netfang þess: [e-mail] Heimasíðan: www.skaksogufelagid.is eða www.fridrikolafsson.com.             

Aðalfundur SÍ fer fram á morgun

Aðalffundurinn Skáksambands Íslands verður haldinn laugardaginn 26. maí nk. kl. 10.00 fyrir hádegi í húsnæði TR, Faxafeni 12. 

Dagskrá:  Venjuleg aðalfundarstörf. 

Minnt er á 9. gr. laga S.Í., en sú grein hljóðar svo:

9. grein.

Við atkvæðagreiðslu á aðalfundi á hvert félag eitt atkvæði enda geti sýnt fram á a.m.k. 10 félagsmenn með lögheimili á Íslandi og geti sýnt fram á virka skákstarfsemi.  Eitt atkvæði bætist við hjá félagi fyrir hverja sveit sem það sendir í Íslandsmót skákfélaga það árið. Við atkvæðagreiðslu um kjörbréf í upphafi fundar skal gilda sú regla, að hvert félag fari ekki með fleiri atkvæði en það hafði á aðalfundi árið áður.  Enginn fulltrúi getur farið með meira en eitt atkvæði á fundinum.  Við atkvæðagreiðslur á aðalfundi ræður einfaldur meirihluti atkvæða, nema um þau mál sem sérstaklega eru tilgreind í þessum lögum.

Einnig skal bent á 6. grein: 

Standi aðildarfélag í gjaldfallinni skuld við sambandið hefur það ekki rétt til að eiga fulltrúa á aðalfundi.  Skákdeildir í félögum geta átt aðild að sambandinu, enda hafi þá minnst 10 menn bundist slíkum samtökum.  Heimilt er tveimur eða fleiri aðildarfélögum í sama landshluta að stofna með sér svæðissamband.

Hjálagt: Lagabreytingatillögur og ársreikningur SÍ

 

Icelandic Open - Íslandsmótið í skák - minningarmót um Hemma Gunn hefst 1. júní

Icelandic Open - Íslandsmótið í skák fer fram dagana 1.-9. júní nk. Teflt verður Valsheimilinu við Hlíðarenda við frábærar aðstæður í veislusal hússins. Mótið fer eftir sama fyrirkomulagi og mótið 2013 í Turninum árið sem var 100 ára afmælismót Skákþings Íslands. Þá sigraði Hannes Hlífar Stefánsson eftir að hafa lagt Björn Þorfinnsson að velli í úrslitaeinvígi. Björn krækti sér hins vegar í stórmeistaraáfanga á mótinu. Teflt verður til minningar um Hemma Gunn - en hann einmitt lést á mótið fór fram í Turninum 2013. 

Nú þegar stórmeistararnir Hannes Hlífar Stefánsson, Bragi Þorfinnsson og Þröstur Þórhallsson skráð til leiks sem og alþjóðlegu meistararnir Jón Viktor Gunnarsson, Björn Þorfinnsson og Einar Hjalti Jensson. Mótið núna er jafnframt Íslandsmót kvenna og hefur Lenka Ptácníková, stórmeistari kvenna, skráð til leiks. 

Mótið er opið öllum íslenskum sem og erlendum skákmönnum. Tefldar verða 10 umferðir og má finna umferðartöflu mótsins hér. Hægt er að taka tvær hálfs vinnings yfirsetur í umferðum 1-7. 

Þátttökugjöld eru 10.000 kr. Stórmeistarar og alþjóðlegir meistarar fá frítt. FIDE-meistarar og unglingar 16 ára og yngri fá 50% afslátt. Allar skákkonur frá frítt í mótið. 

Góð verðlaun eru á mótinu eða samtals €7.500 eða um 950.000 kr. 

Allar nánari upplýsingar má nálgast á heimasíðu mótsins sem eins og er aðeins á ensku. Hægt er að skrá sig Skák.is (guli kassinn). Skákmenn eru hvattir til að skrá sig til leiks sem fyrst. 

Meistaramót Skákskóla Íslands hefst á morgun - skráningu lýkur á hádegi á morgun

Meistaramót  Skákskóla Íslands fyrir starfsárið 2017/2018 fer fram dagana 25.–27. maí og verður í tveim styrkleika/stigaflokkum. Annar flokkurinn verður skipaður keppendum sem hafa 1600 alþjóleg elo-stig eða meira en hinn flokkurinn er skipaður keppendum sem eru undir 1600 elo stigum eða stigalausir. 

Bent er á að lokað verður fyrir skráningu á morgun, föstudag, kl. 12. 

Vakin er athygli á því að tímamörk eru mismunandi í flokkunum og færri umferðir verða tefldar í efri styrkleikaflokknum en þar er teflt um sæmdarheitið Meistari Skákskóla Íslands. Núverandi meistari Skákskólans er Hilmir Freyr Heimisson.  

Þátttökurétt hafa nemendur skólans og allir þeir sem tekið hafa þátt í námskeiðum á vegum skólans eða hlotið þjálfun á vegum skólans.   

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku. 

Mótsnefnd mun jafnframt taka afstöðu til óska þeirra sem ekki ná stigalágmörkum en vilja tefla í stigahærri flokknum. 

Flokkur undir 1600–elo-stigum og stigalausir: 

1. umferð: Föstudagur 25. maí kl. 18:00
2. umferð: Föstudagur 25. maí kl. 20:00
3. umferð. Laugardagur 26. maí kl. 10:00
4. umferð: Laugardagur 26. maí kl. 13:00
5. umferð: Laugardagur 26. maí kl. 16:00 
6. umferð: Sunnudagur 27. maí kl. 10:00
7. umferð: Sunnudagur 27. maí kl. 13:00
8. umferð: Sunnudagur 27. maí kl. 16:00

Tímamörk í öllum umferðunum 30 30. 

Keppendur geta tekið eina eða tvær ½-vinnings yfirsetur í fyrstu fimm umferðunum en tilkynna verður um yfirsetuna fyrir umferð og áður en raðað er í þá næstu 

Flokkur keppenda með 1600 – elo stig og meira. 

Tefldar verða sex umferðir eftir svissneska kerfinu í báðum flokkum.

Dagskrá mótsins verður með eftirfarandi hætti: 

Flokkur 1600 alþjóðleg elo – stig og ofar: 

1. umferð: Föstudagurinn 25. maí kl. 16
2. umferð: Föstudagurinn 25. maí kl. 20 

3. umferð. Laugardagurinn 26. maí kl. 10
4. umferð: Laugardagurinn 26. maí kl. 15 

5. umferð: Sunnudagurinn 27. maí kl. 10
6. umferð: Sunnudagurinn 27. maí kl. 15 

Tímamörk í öllum umferðunum 90 30. 

Keppendur geta tekið eða tvær ½-vinnings yfirsetu í fyrstu fjórum umferðunum en verða að tilkynna um yfirsetuna fyrir umferðina og áður en raðað er í næstu umferð.

Skákmenn sem eru með minna en 1600 elo- stig geta óskað eftir því að tefla í flokki stigahærri keppenda og mun mótsnefnd taka afstöðu til þess og skila niðurstöðu með góðum fyrirvara.   

Verðlaun í flokki 1600 elo + 

1. verðlaun: farmiði að verðmæti kr. 50 þús + uppihaldskostnaður á kr. 35 þús.
2. verðlaun: Farmiði að verðmæti kr. 40 þús.
3. –5. sæti Vandaðar skákbækur.

Auk þess verða veitt stigaflokkaverðlaun í mótinu: 

1800 – 2000 elo:

1. verðlaun: Farmiði að verðmæti kr. 40 þús. 

1600-1800 elo:

1. verðlaun: Farmiði að verðmæti kr. 40 þús. 

Verðlaun í flokki 1600 elo og minna og stigalausra:

1. verðlaun: farmiði að verðmæti kr. 40 þús:
2. –3. verðlaun: vandaðar skákbækur að eigin vali. 

Verðlaun keppenda sem eru undir 1200 elo stig eða stigalausir:

1. verðlaun: Vönduð skákbók og landsliðstreyja „tólfunnar“.
2. verðlaun: Landsliðstreyja „tólfunnar“.
3. verðlaun: Landsliðstreyja „tólfunnar“. 

Mótsstig úrskurða verði keppendur jafnir að vinningum í báðum flokkum -  nema í keppni um 1. sæti í stigahærri flokknum. Þá skal teflt um titilinn:  

Meistari Skákskóla Íslands 2018. 

Aðalstyrktaraðili Meistaramóts Skákskóla Íslands 2018 er GAMMA.

Skráning fer fram á Skák.is (guli kassinn efst)

Upplýsingar um þegar skráða keppendur má finna hér. 

Mótið um Björn Sölva verður það fyrsta í röðinni af þremur á vegum Vinaskákfélagsins

Vinaskákfélagið og Hrókurinn ætla að bjóða upp á þrjú minningar skákmót í sumar, en það eru minningarskákmót um Björn Sölva, Jorge Fonseca og Hauk Angantýsson. Glæsileg verðlaun verða, en fyrir utan venjulega verðlaunapeninga, þá ætlar Air Iceland Connect og Hrókurinn að verðlauna þann sem verður með besta skor úr öllum 3 minningar skákmótunum með miða til Grænlands að verðmæti 100.000 kr.

Ennfremur ætlar Vinaskákfélagið og Hrókurinn að bjóða 20.000 kr. verðlaun fyrir 2. sætið og 10.000 kr. fyrir 3. sætið. 

Skipuleggjandi mótanna verður Hrafn Jökulsson, en skákstjóri verður Hörður Jónasson. 

Fyrsta skákmótið verður minningarskákmót um Björn Sölva  og verður haldið mánudaginn 28 maí kl: 13, í Vin að Hverfisgötu 47.

Ekki hefur verið ákveðið hvenær hin 2 skákmótin verða, en það verður auglýst nánar síðar. 

Fide - meistarinn Björn Sölvi Sigurjónsson fæddist 26 janúar 1949 á skákdeginum sjálfum og lést á Landspítalanum þann 22. desember 2011 eftir veikindi. Hann varð því 61 árs.

Björn varð þrívegis skákmeistari Kópavogs auk þess að verða bæði Reykjavíkur- og Akureyrarmeistari.

Hann keppti einnig í bréfskák, m.a. á Ólympíumóti og á heimsmóti 1990 þar sem hann sigraði. Björn varð alþjóðlegur FIDE-meistari árið 1996 og skákmeistari Sjálfsbjargar 2000.

FIDE-meistarinn Björn Sölvi kom til liðs við Vinaskákfélagið 2007, en það ár tók félagið fyrst þátt í Íslandsmóti skákfélaga. Björn Sölvi var kallaður „jókerinn“ í liðinu.

Tefldar verða 6 umferðir með 7 mínútur á skák. Mótið verður reiknað til hraðskákstiga. 

Í hléi verður boðið upp á kaffi og vöfflur. Þið getið skráð ykkur á mótið á gula kassanum efst á síðunni á skak.is 

Einnig getið þið skráð ykkur á staðnum.

Allir velkomnir!!

 

 

Sumarskáknámskeið Breiðabliks

Skákdeild Breiðabliks heldur 5 skáknámskeið í sumar fyrir börn fædd 2006-2013. Námskeiðin verða haldin í Stúkunni við Kópavogsvöll allar eftirfarandi vikur á milli 13:00 - 16:00. 

11. - 15. júní

18. - 22. júní

2. - 6. júlí

7. - 10. ágúst

13. - 17. ágúst

Umsjónarmaður skáknámskeiðsins er Kristófer Gautason. 

Ekki er aðeins setið við skákborðið því einnig er mikil útivera þar sem farið er í leiki, göngutúra og fleira þegar veður er gott. 

Gjald fyrir hvert námskeið er 7.300 kr. 

Nánari upplýsingar má finna hér: https://breidablik.is/sumarnamskeid-2018/

Sumarnámskeið Taflfélags Reykjavíkur hefjast 11. júní

Taflfélag Reykjavíkur heldur átta skáknámskeið í sumar fyrir börn fædd árin 2005-2011. Námskeiðin verða haldin í húsakynnum Taflfélags Reykjavíkur að Faxafeni 12.

Námskeið 1: 11. júní – 15. júní kl. 09:30 – 12:00
Námskeið 2: 11. júní – 15. júní kl. 13:00 – 15:30
Námskeið 3: 18. júní – 22. júní kl. 09:30 – 12:00
Námskeið 4: 18. júní – 22. júní kl. 13:00 – 15:30
Námskeið 5: 25. júní – 29. júní kl. 09:30 – 12:00
Námskeið 6: 25. júní – 29. júní kl. 13:00 – 15:30
Námskeið 7: 02. júlí – 06. júlí kl. 09:30 – 12:00
Námskeið 8: 02. júlí – 06. júlí kl. 13:00 – 15:30

Kennari á námskeiðunum er stórmeistarinn Bragi Þorfinnsson.

Gjald fyrir hvert námskeið er 8.500kr. Ef þátttakandi velur bæði námskeiðin fyrir og eftir hádegi í sömu vikunni þá er gjaldið 13.500kr. Systkynaafsláttur verður veittur í formi 20% afsláttar. Hægt er að velja á milli þess að greiða námskeiðisgjaldið með reiðufé við upphaf námskeiðis eða í gegnum heimabanka (þá bætist við umsýslugjald).

Námskeiðin eru hugsuð fyrir börn af ólíkum skákstyrkleika, en þó er ætlast til þess að börnin kunni allan mannganginn. Allir fá því viðfangsefni við sitt hæfi. Taflfélag Reykjavíkur áskilur sér rétt til þess að fella niður námskeið sé þátttaka ekki næg. Hámarksfjöldi á hvert námskeið er 16.

Nánari upplýsingar um námskeiðin má finna á vef Taflfélags Reykjavíkur eða í síma 867 2627 (Bragi). Skráning fer fram í gegnum skráningarform sem nálgast má í gula kassanum á skak.is.

Aðalfundur SÍ fer fram á laugardaginn

Aðalffundurinn Skáksambands Íslands verður haldinn laugardaginn 26. maí nk. kl. 10.00 fyrir hádegi í húsnæði TR, Faxafeni 12. 

Dagskrá:  Venjuleg aðalfundarstörf. 

Minnt er á 9. gr. laga S.Í., en sú grein hljóðar svo:

9. grein.

Við atkvæðagreiðslu á aðalfundi á hvert félag eitt atkvæði enda geti sýnt fram á a.m.k. 10 félagsmenn með lögheimili á Íslandi og geti sýnt fram á virka skákstarfsemi.  Eitt atkvæði bætist við hjá félagi fyrir hverja sveit sem það sendir í Íslandsmót skákfélaga það árið. Við atkvæðagreiðslu um kjörbréf í upphafi fundar skal gilda sú regla, að hvert félag fari ekki með fleiri atkvæði en það hafði á aðalfundi árið áður.  Enginn fulltrúi getur farið með meira en eitt atkvæði á fundinum.  Við atkvæðagreiðslur á aðalfundi ræður einfaldur meirihluti atkvæða, nema um þau mál sem sérstaklega eru tilgreind í þessum lögum.

Einnig skal bent á 6. grein: 

Standi aðildarfélag í gjaldfallinni skuld við sambandið hefur það ekki rétt til að eiga fulltrúa á aðalfundi.  Skákdeildir í félögum geta átt aðild að sambandinu, enda hafi þá minnst 10 menn bundist slíkum samtökum.  Heimilt er tveimur eða fleiri aðildarfélögum í sama landshluta að stofna með sér svæðissamband.

Hjálagt: Lagabreytingatillögur og ársreikningur SÍ

 

Guðmundur Kjartansson sigraði á Meistaramóti Truxva

Það var sjálfur Íslandsmeistarinn, Guðmundur Kjartansson, sem sigraði á Meistaramóti Truxva 2018 sem fram fór á annan í hvítasunnu. Guðmundur tefldi örugglega og landaði 10 vinningum af 11 mögulegum. Alls tóku 20 keppendur þátt, þar af 4 titilhafar.

Eitthvað vantaði af „stigamönnum” til að stríða Íslandsmeistaranum en gestirnir að þessu sinni voru þrír efnilegir Blikar, þrír grjótharðir Skákgengismenn og Fjölnismaðurinn geðþekki Dagur Ragnarsson. Óvæntustu úrslit mótsins voru án efa þau að Halldór Ingi Kárason (1809) gerði sé lítið fyrir og vann Guðmund (2443) með svörtu í fjórðu umferð, en að eigin sögn á hann það til að vinna sigurvegara hraðskákmóta! Í öðru sæti með 7,5 vinning var einn af tveimur kandídatameisturum félagsins, Hilmir Freyr Heimisson, en hann vann fyrstu fimm skákirnar. Í þriðja sæti var Björn Hólm Birkisson með 7 vinninga en hann skaust upp listann með sigrum í síðustu tveimur umferðunum eftir brösótta byrjun. Loftur Baldvinsson var einnig með 7 vinninga en var lægri en Björn á stigaútreikningi. Í halarófu komu svo sex skákmenn með 6,5 vinning.

Stigakóngar mótsins voru þeir félagar úr Skákgenginu, Loftur og áðurnefndur Halldór Ingi, en þeir hækkuðu um 56 og 50 stig. Næstur var Arnar Ingi Njarðarson með 44 stiga hækkun en hann hefur nú hafið taflmennsku á ný eftir nokkurra ára hlé. Veitt voru bókaverðlaun frá Bóksölu Stefáns Bergssonar og notuð forláta viðurkenningarskjöl sem fundust eftir nokkurt grams á skrifstofu félagsins. Þessi viðurkenningarskjöl eru eflaust komin til ára sinna en komu að góðum notum nú á öðru Meistaramóti Truxva.

Öll úrslit mótsins sem og lokastöðu má finna á Chess-Results.

Nú er vorönn Taflfélagsins formlega lokið og undirbúningur hafinn fyrir mót haustsins, sem verða mörg, að vanda. Meistaramót Truxva hefur fest sig rækilega í sessi og ef ekkert breytist má búast við að mótið verði haldið aftur annan í hvítasunnu að ári, þann 10. júní 2019.

Minningarskákmót um Björn Sölva fer fram 28. maí

Minningarskákmót um Björn Sölva verður haldið mánudaginn 28 maí kl: 13, í Vin að Hverfisgötu 47. FIDE-meistarinn Björn Sölvi Sigurjónsson fæddist 26 janúar 1949 á skákdeginum sjálfum og lést á Landspítalanum þann 22. desember 2011 eftir veikindi. Hann varð því 61 árs. Björn varð þrívegis skákmeistari Kópavogs auk þess að verða bæði Reykjavíkur- og Akureyrarmeistari.

Hann keppti einnig í bréfskák, m.a. á Ólympíumóti og á heimsmóti 1990 þar sem hann sigraði. Björn varð alþjóðlegur FIDE-meistari árið 1996 og skákmeistari Sjálfsbjargar 2000.

FIDE–meistarinn Björn Sölvi kom til liðs við Vinaskákfélagið 2007, en það ár tók félagið fyrst þátt í Íslandsmóti skákfélaga. Björn Sölvi var kallaður „jókerinn“ í liðinu. Við í Vinaskákfélaginu ætlum að minnast hans með skákmóti í Vin. 

Tefldar verða 6 umferðir með 7 mínútur á skák. Skipuleggjandi verður Hrafn Jökulsson. Skákstjóri verður Hörður Jónasson. Mótið verður reiknað til hraðskákstiga. 

Í hléi verður boðið upp á kaffi og vöfflur. Góð verðlaun verða í boði. Þið getið skráð ykkur á mótið á gula kassanum efst á síðunni á skak.is. Einnig getið þið skráð ykkur á staðnum.

Upplýsingar um þegar skráða keppendur má finna hér.

Allir velkomnir!!